ବାରିପଦା: ବର୍ଷେ ନୁହେଁ କି ଦୁଇ ବର୍ଷ ନୁହେଁ । ଜେଲର ଚାରି କାନ୍ଥ ଭିତରେ ବିତିଗଲା ଯୁବାବସ୍ଥା । ଜେଲର ଅନ୍ଧାରୀ କୋଠରୀରେ ହଜିଗଲା ୧୯ଟି ଫଗୁଣ । ଏବେ ମିଳିଛି ମୁକ୍ତି । ଉଦୟ ହୋଇଛି ନୂଆ ସୂର୍ଯ୍ୟ । ଜୀବନ ରଥକୁ ପୁଣି ସଜାଡ଼ି ଆଗକୁ ବଢ଼ିବେ । ହେଲେ, ଯୌବନର ୧୯ ବର୍ଷ କିଏ ଫେରାଇବ ? କେଉଁଠି ରହିଗଲା ଭୁଲ ? ଯେଉଁଠି ପାଇଁ ଜେଲ୍ ଭିତରେ ବିତିଗଲା ଜଣେ ନିର୍ଦ୍ଦୋଷଙ୍କ ୧୯ ବର୍ଷ ।

ଆମ ଆଇନ କହୁଛି, ୧୦୦ ଦୋଷୀ ପଛେ ଖସି ଯାଆନ୍ତୁ, ହେଲେ ଜଣେ ନିର୍ଦ୍ଦୋଷକୁ ଦଣ୍ଡ ନ ମିଳୁ । ହେଲେ ଏଠି ୧୯ ବର୍ଷ ଜେଲରେ ରହିବା ପରେ ପ୍ରମାଣ ଅଭାବରୁ ମୁକ୍ତି ପାଇଛନ୍ତି ମୟୂରଭଞ୍ଜନ ଯଶିପୁର ଥାନା ବଳରାମପୁର ଗାଁର ବିଚାରାଧୀନ କଏଦୀ ହାବିଲ ସିନ୍ଧୁ । ଜିଲ୍ଲା ଦୌରାଜଜ୍ କୋର୍ଟ ତାଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି ।

୨୦୦୩ ମସିହାର କଥା । ଶ୍ବଶୁର ଘର କୁଦୁପୁଟୁରେ ରହୁଥିଲେ ହାବିଲ । ସ୍ଥାନୀୟ ଲୋକେ ତାଙ୍କ ଶୁଶୁଙ୍କୁ ଡାହାଣୀ ବୋଲି ସନ୍ଦେହ କରୁଥିଲେ । ଶାଶୁଘର ଗାଁକୁ ଜମାଦାର ପିଙ୍ଗୁଅ, ତାଙ୍କ ୨ ବର୍ଷ ପୁଅ ଶୁକୁରୁ ପିଙ୍ଗୁଅ ଓ ଦାଦା ତୁରମ ପୁର୍ତ୍ତି ଆସିଥିଲେ । ହେଲେ ସେମାନେ ଘରକୁ ଫେରି ନଥିଲେ । ୩ ତାରିଖରେ ଯଶୀପୁର ଖଇର ନଦୀ ପଠାରୁ ସେମାନଙ୍କ ଗଣ୍ଡିମୁଣ୍ଡ ଅଲଗା ମୃତଦେହ ଉଦ୍ଧାର କରାଯାଇଥିଲା । ହୋମଗାର୍ଡଙ୍କ ଅଭିଯୋଗକୁ ଆଧାର କରି ପୋଲିସ ହତ୍ୟା ମାମଲା ରୁଜୁ କରିବା ସହ ହାବିଲଙ୍କୁ ଗିରଫ କରିଥିଲା ।

ଗିରଫ ପରେ ୨ ବର୍ଷ ଚାଲିଲା ବିଚାର । ୨୦୦୫ରେ ବାରିପଦାର ତତ୍କାଳୀନ ଅତିରିକ୍ତ ଦୌରାଜଜ୍ ମାମଲାର ବିଚାର କରି ହାବିଲଙ୍କୁ ଆଜୀବନ କାରା ଦଣ୍ଡାଦେଶ ଶୁଣାଇଥିଲେ ।

କୋର୍ଟଙ୍କ ରାୟକୁ ବିରୋଧ କରି ହାବିଲ ଉଚ୍ଚ ନାୟାଳୟଙ୍କ ଦ୍ବାରସ୍ଥ ହୋଇଥିଲେ । ଆବେଦନର ବିଚାର କରି ଉଚ୍ଚ ନ୍ୟାୟାଳୟ ମାମଲାର ପୁନଃର୍ବିଚାର କରିବାକୁ ନିର୍ଦ୍ଦେଶ ଦେଇଥିଲେ । ସେବେଠାରୁ ଗଡୁଥିଲା ତାରିଖ ପରେ ତାରିଖ, ଚାଲୁଥିଲା ବିଚାର । ବିଚାର ହୋଇ ରାୟ ଆସିବାକୁ ଲାଗିଗଲା ୧୬ ବର୍ଷ । ଆଉ ପ୍ରମାଣ ଅଭାବରୁ ହାବିଲଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି କୋର୍ଟ ।

କୋର୍ଟରୁ ମୁକ୍ତି ପାଇବା ପରେ ଖୁସି ଜାହିର କରିଛନ୍ତି ହାବିଲ । ମୁହଁରୁ ହସ ଫୁଟୁଛି । ଜେଲରୁ ଘରକୁ ଫେରିଥିବାରୁ କୋହ ସମ୍ଭାଳି ପାରୁନାହାନ୍ତି । ପରିବାର ସହ ସମୟ ବିତାଇବା ସହ ଚାଷ କରି ବାକି ଜୀବନ ବିତାଇ ଦେବେ ବୋଲି କହିଛନ୍ତି ।

ଏବେ ପ୍ରଶ୍ନ ଉଠୁଛି, ପୋଲିସ ତଦନ୍ତରେ ଭୁଲ ରହିଗଲା ନାଁ ବିଚାର ଅଧିକ ଦିନ ଚାଲିଲା । ଏହାର ଜବାବ କିଏ ଦେବ ? ଦେଶରେ ଆଜୀବନ କରାଦଣ୍ଡାଦେଶ ୧୪ ବର୍ଷ ଥିବା ବେଳେ ୧୯ ବର୍ଷ ଜେଲରେ ଜଣେ ବିଚାରାଧୀନ କଏଦୀ କାଟିବାକୁ ନେଇ ପ୍ରଶ୍ନ ଉଠାଇଛନ୍ତି ଲୋକେ ।