ନନ୍ଦିଘୋଷ ବ୍ୟୁରାେ : ରାଜଧାନୀରେ ଆଇନଜୀବୀଙ୍କ ଆତ୍ମଦାହ। ଗତକାଲି ବିଳମ୍ବିତ ରାତିରେ ପାଣ୍ଡରାରେ ଘଟିଛି ଏଭଳି ଅଭାବନୀୟ ଘଟଣା। ଦେହରେ ନିଆଁ ଲାଗିବା ଦ୍ୱାରା ଜଳି ଯାଇଛନ୍ତି ଯୁବ ଆଇନଜୀବୀ ଦୀପକ ସାହୁ। ଦୀପକଙ୍କ ବୟସ ପାଖାପାଖି ୪୬ ବର୍ଷ। ସିଭିଲ ଲୟର ହିସାବରେ ସ୍ଥାନୀୟ ଅଞ୍ଚଳରେ ଜଣାଶୁଣା ଥିଲେ। ପରିବାର ସହ ପାଣ୍ଡରାରେ ରହୁଥିଲେ। ଗତକାଲି ରାତିରେ ଛାତ ଉପରକୁ ଯିବାକୁ କହି ଦେହରେ ନିଆଁ ଲଗାଇଥିବା ସନ୍ଦେହ କରାଯାଉଛି। ମଞ୍ଚେଶ୍ୱର ପୋଲିସ ଖବର ପାଇ ଘଟଣାସ୍ଥଳରେ ପହଁଚି ମୃତଦେହକୁ ଉଦ୍ଧାର କରିଥିଲା। ଆମ୍ବୁଲାନ୍ସ ଯୋଗେ ମୃତଦେହ ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲ ପଠାଯାଇଛି। ସେପଟେ ପୋଲିସ ଘଟଣାସ୍ଥଳରେ ପହଁଚି କିଛି ସଙ୍ଗୀନ ତଥ୍ୟ ହାସଲ କରିଛି। ଦୀପକ ପୂର୍ବରୁ ମେଣ୍ଟାଲ ଡିପ୍ରେସନରେ ଥିଲେ। ଦୁଇଥର ହସ୍ପିଟାଲରେ ଆଡ଼ମିଟ ହୋଇ ମେଡ଼ିସିନ ଖାଉଥିଲେ। କିନ୍ତୁ ଗତ ୧୫ ଦିନ ହେବ ମେଡ଼ିସିନ ବନ୍ଦ କରି ମାନସିକ ଭାବେ ଚାପଗସ୍ତ ଥିବା କହିଛନ୍ତି ଜୋନ୍ ଏସିପି। କ୍ରାଇମ ସ୍ପଟ ନିକଟରୁ ଏକ ପ୍ଲାଷ୍ଟିକ ବୋତଲ ମିଳିଛି। ଏଣୁ ପ୍ଲାଷ୍ଟିକ ବୋତଲରେ ଥିବା ପେଟ୍ରୋଲ କିମ୍ୱା କିରାସିନି ସାହାଯ୍ୟରେ ସେ ଆତ୍ମଦାହ କରିଥିବା ଜଣାପଡ଼ିଛି।
ଋଣରେ ବୁଡ଼ି ରହିଛି ପାକିସ୍ତାନ, ADBକୁ କାହିଁକି ମାଗୁଛି ୭ ବିଲିୟନ ଡଲାର ଋଣ ?
ନନ୍ଦିଘୋଷ ବ୍ୟୁରାେ : ଋଣରେ ବୁଡ଼ି ରହିଛି ପଡ଼ୋଶୀ ଦେଶ ପାକିସ୍ତାନ । ଗୁରୁବାର ଦିନ ଏକ ରିପୋର୍ଟ ଅନୁଯାୟୀ, ପାକିସ୍ତାନ ଏବେ ଏସୀୟ ବିକାଶ ବ୍ୟାଙ୍କଠାରୁ ୭ ବିଲିୟନ ଆମେରିକୀୟ ଡଲାରର ଋଣ ମାଗିଛି। ଏକ ପ୍ରମୁଖ ରେଳ ଲାଇନକୁ ଉନ୍ନତ କରିବା ପାଇଁ ଦେଶ ଏହି ଋଣ ଚାହୁଁଛି। ଏଥିପାଇଁ ପାକିସ୍ତାନ ମଧ୍ୟ ଚୀନ୍ ଠାରୁ ସାହାଯ୍ୟ ମାଗିଥିଲା, କିନ୍ତୁ ଚୀନ୍ ଏହି ପ୍ରକଳ୍ପକୁ ସମର୍ଥନ କରିବାକୁ ମନା କରିଦେଇଛି ବୋଲି ଜଣାପଡ଼ିଛି।
ରିପୋର୍ଟ ଅନୁଯାୟୀ, ପାଣ୍ଠି ଅଭାବରୁ ପେଶାୱର ଏବଂ କରାଚୀ ମଧ୍ୟରେ ମେନଲାଇନ୍-୧ (ML-I) ରେଳପଥର ବିକାଶ ଅଟକି ରହିଛି। ରିପୋର୍ଟରେ କୁହାଯାଇଛି ଯେ ପାକିସ୍ତାନ ଚୀନ୍ ତା’ର ୮୫ ପ୍ରତିଶତ ଆର୍ଥିକ ସହାୟତା ସମାପ୍ତ କରିବାକୁ ଅପେକ୍ଷା କରିଥିଲା। କିନ୍ତୁ ଚୀନ୍ ଏହି ପ୍ରକଳ୍ପକୁ ସମର୍ଥନ କରିବାକୁ ମନା କରିବା ପରେ, ପାକିସ୍ତାନ ଏବେ ADB ଆଡ଼କୁ ମୁହାଁଇଛି। ପାକିସ୍ତାନ ଅନ୍ୟ ଅନ୍ତର୍ଜାତୀୟ ବ୍ୟାଙ୍କଗୁଡ଼ିକ ସହିତ ML-I ପ୍ରକଳ୍ପର ସମ୍ପୂର୍ଣ୍ଣ ଖର୍ଚ୍ଚ ବହନ କରିବାକୁ ବ୍ୟାଙ୍କକୁ ଅନୁରୋଧ କରିଛି। ତଥାପି ADB, ଏସୀୟ ଭିତ୍ତିଭୂମି ନିବେଶ ବ୍ୟାଙ୍କ (AIIB) ସହିତ, କରାଚୀ-ରୋହରୀ ସେକ୍ସନ ପାଇଁ ପ୍ରାୟ ୬୦% ପାଣ୍ଠି ଯୋଗାଇବାକୁ ପ୍ରସ୍ତୁତ ଅଛି ବୋଲି କୁହାଯାଉଛି।
ପାକିସ୍ତାନ ADB ଠାରୁ ସାହାଯ୍ୟ ଲୋଡିଲା
ବୁଧବାର ଇସଲାମାବାଦରେ ପ୍ରଧାନମନ୍ତ୍ରୀ ଶାହବାଜ ସରିଫ ଏବଂ ଅର୍ଥମନ୍ତ୍ରୀ ମହମ୍ମଦ ଔରଙ୍ଗଜେବଙ୍କ ମଧ୍ୟରେ ADB ସଭାପତି ମାସାଟୋ କାଣ୍ଡାଙ୍କ ସହ ଏକ ବୈଠକରେ ପାକିସ୍ତାନ ADB, AIIB ଏବଂ ଅନ୍ୟାନ୍ୟ ଅନ୍ତର୍ଜାତୀୟ ପ୍ରତିଷ୍ଠାନରୁ ପୂର୍ଣ୍ଣ ପାଣ୍ଠି ପ୍ରଦାନ ପ୍ରସଙ୍ଗ ଉଠାଇଥିଲା। ପ୍ରକୃତ ପାଣ୍ଠିର ଆବଶ୍ୟକତା ପାଇଁ ADB କରାଚୀ-ରୋହରୀ ସେକ୍ସନ ପାଇଁ ଡିଜାଇନ୍ ଡକ୍ୟୁମେଣ୍ଟ୍ ମାଗିଛି। ସୂତ୍ର ଅନୁଯାୟୀ ADB ଏହି ସେକ୍ସନ ପାଇଁ ପ୍ରାୟ ୧.୨ ବିଲିୟନ ଆମେରିକୀୟ ଡଲାର (ପ୍ରାୟ ୬୦% ପାଣ୍ଠି) ଯୋଗାଇବା ପାଇଁ AIIB ସହିତ ସହଭାଗୀ ହୋଇପାରେ। ପ୍ରକୃତ ଖର୍ଚ୍ଚ ନିର୍ଣ୍ଣୟ କରିବା ପାଇଁ ଯୋଜନା କମିଶନ ଏହି ସପ୍ତାହରେ ସଂଶୋଧିତ ପ୍ରକଳ୍ପ ମୂଲ୍ୟର ବିବରଣୀ ପାଇବାର ଆଶା କରାଯାଉଛି।
ଆହୁରି ୨ ଦିନ ବର୍ଷା ; ଆଜି ପାଇଁ ୧୧ ଜିଲ୍ଲାକୁ ୟେଲୋ ଆଲର୍ଟ
ନନ୍ଦିଘୋଷ ବ୍ୟୁରୋ : ଓଡ଼ିଶା ଉପକୂଳ ବଙ୍ଗୋପସାଗରରେ ଲଘୁଚାପ କ୍ଷେତ୍ର ପ୍ରଭାବରେ ରାଜ୍ୟରେ ଲାଗି ରହିଛି ବର୍ଷାୀ। ଲଘୁଚାପ ଧୀରେ ଧୀରେ ପଶ୍ଚିମ-ଉତ୍ତରପଶ୍ଚିମ ଦିଗରେ ଗତି କରିବା ସହ ଅଧିକ ଘନୀଭୂତ ହେବ ବୋଲି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି। ଲଘୁଚାପ ପ୍ରଭାବରେ ଏବେ ବର୍ଷା ଲାଗି ରହିଥିବାବେଳେ ପୁଣି ୧ ତାରିଖରେ ଆଉଏକ ଲଘୁଚାପ ସୃଷ୍ଟି ହେବା ସମ୍ଭାବନା ରହିଛି। ଏହାର ପ୍ରଭାବରେ ଆଉ ୨ ଦିନ ପ୍ରବଳ ବର୍ଷା ହେବା ନେଇ ସତର୍କ କରିଛି ପାଣିପାଗ କେନ୍ଦ୍ର। ପ୍ରଭାବରେ ରାଜ୍ୟରେ ୩୧ ତାରିଖ ଯାଏ ବର୍ଷା ଜାରି ରହିବ ।
ଆଜି ଓଡ଼ିଶାର ବାଲେଶ୍ବର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, କଟକ, ଜଗତସିଂହପୁର, ପୁରୀ, ଖୋର୍ଦ୍ଧା, ନୟାଗଡ଼, ଗଞ୍ଜାମ ଓ ଗଜପତି ଜିଲ୍ଲାରେ ଗୋଟିଏ କିମ୍ଵା ଦୁଇଟି ସ୍ଥାନରେ ବର୍ଷା ସହ ୩୦-୪୦ କିଲୋମିଟର ବହିବା ସମ୍ଭାବନା ରହିଛି। ଏଥିପାଇଁ ଏହି ୧୧ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ସେପଟେ ଆଉ ଏକ ଲଘୁଚାପ ପ୍ରଭାବରେ ୧ ତାରିଖରୁ ପୁଣି ରାଜ୍ୟରେ ବର୍ଷା ଲାଗି ରହିବ । ଉପକୂଳବର୍ତ୍ତୀ ଜିଲ୍ଲା ଓ ପଶ୍ଚିମ ଓଡ଼ିଶାର ଅନେକ ଜିଲ୍ଲାରେ ତୁହାକୁ ତୁହା ବର୍ଷା ହେବା ସମ୍ଭାବନା ରହିଛି । ତେବେ ଏହା ସେତେଟା ପ୍ରଭାବ ପକାଇବ ନାହିଁ ବୋଲି ପୂର୍ବାନୁମାନ କରିଛନ୍ତି ପାଣିପାଗ ବିଜ୍ଞାନୀ। ଲଘୁଚାପ ପ୍ରଭାବରେ ସମୁଦ୍ର ଅଶାନ୍ତ ରହୁଥିବାରୁ ମତ୍ସ୍ୟଜୀବୀମାନଙ୍କୁ ସମୁଦ୍ର ଭିତରକୁ ନ ଯିବାକୁ ସତର୍କ କରିଛି ବିଭାଗ
ବିନା କୋଚିଂରେ ପାଠ ପଢ଼ା ଠପ୍: ଚିନ୍ତା ବଢ଼ାଇଲା କେନ୍ଦ୍ର ସରକାରଙ୍କ CMS ରିପୋର୍ଟ
ବିନା କୋଚିଂରେ ପାଠ ପଢ଼ା ଠପ୍ । ଚିନ୍ତା ବଢ଼ାଇଲା କେନ୍ଦ୍ର ସରକାର CMS ରିପୋର୍ଟ । ରାଜ୍ୟରେ ୫୦ ପ୍ରତିଶତରୁ ଅଧିକ ଛାତ୍ରଛାତ୍ରୀଙ୍କୁ ଟ୍ୟୁସନ୍ ବା କୋଚିଂ ଉପରେ ନିର୍ଭର କରୁଛନ୍ତି । ଏଥିପାଇଁ ଅଭିଭାବକଙ୍କୁ ଖର୍ଚ୍ଚାନ୍ତ ହେବାକୁ ପଡ଼ୁଛି । ଟ୍ୟୁସନ ଓ କୋଚିଂ ପାଇଁ ସହାରାଞ୍ଚଳରେ ଛାତ୍ର ପିଛା ୧୦ ହଜାର ୮୯୯ ଟଙ୍କା ଏବଂ ଗ୍ରାମାଞ୍ଚଳରେ ୩ ହଜାର ୫୪୭ ଟଙ୍କା ଖର୍ଚ୍ଚ କରୁଛନ୍ତି ଅଭିଭାବକ । ଏଥିପାଇଁ ସ୍କୁଲରେ ଶିକ୍ଷକ ଅଭାବ ଓ ପାଠପଢ଼ାର ମାନକୁ ଦାୟୀ କରିଛନ୍ତି ଅଭିଭାବକ ଓ ଶିକ୍ଷାବିତ୍ । ସ୍କୁଲ ପାଠ୍ୟକ୍ରମ ବୁଝିବା ପାଇଁ ଟ୍ୟୁସନ ଉପରେ ନିର୍ଭରଶୀଳ ହେଉଛନ୍ତି ଛାତ୍ରଛାତ୍ରୀ ।
ସର୍ଭେରୁ ପ୍ରକାଶ, ଦେଶର ଏକ ତୃତୀୟାଂଶ ଛାତ୍ରଛାତ୍ରୀ ପାଠପଢା ପାଇଁ କୋଚିଂ ଉପରେ ନିର୍ଭର କରୁଛନ୍ତି । ଓଡିଶା ସ୍ଥିତି ଆହୁରି ଅଦବେଗଜନକ । ଓଡିଶାର ପ୍ରାୟ ୫୭ ପ୍ରତିଶତ ଛାତ୍ରଛାତ୍ରୀ କୋଚିଂ ଉପରେ ନିର୍ଭରଶୀଳ । ନ୍ୟାସନାଲ ସାମ୍ପଲ ସର୍ଭେ ପକ୍ଷରୁ ପ୍ରକାଶିତ ରିପୋର୍ଟରେ ସାମ୍ନାକୁ ଆସିଛି ଏଭଳି ଉଦବେଗଜନଜ ତଥ୍ୟ । ବିଶେଷ କରି ସହରାଞ୍ଚଳରେ ଏହି ସଂଖ୍ୟା ଅଧିକ । ତଥ୍ୟ ଅନୁସାରେ ଦେଶର ସହରାଞ୍ଚଳରେ ୩୦.୭ ପ୍ରତିଶତ ଛାତ୍ରଛାତ୍ରୀ ଟ୍ୟୁସନ ଉପରେ ନିର୍ଭରଶୀଳ । ସେହିଭଳି ଗ୍ରାମାଞ୍ଚଳରେ ଏହି ସଂଖ୍ୟା ୨୫.୫ ପ୍ରତିଶତ ରହିଛି । ତେବେ ଓଡିଶା କଥା ଦେଖିଲେ ଆମ ରାଜ୍ୟର ୫୪.୬ ପ୍ରତିଶତ ଗ୍ରାମାଞ୍ଚଳ ଛାତ୍ରଛାତ୍ରୀ ଟ୍ୟୁସନ ଯାଉଥିବା ବେଳେ ସହରାଞ୍ଚଳରେ ଏହି ସଂଖ୍ୟା ୬୬.୬ ପ୍ରତିଶତ ରହିଛି । ଏଥିରୁ ସ୍ପଷ୍ଟ ଯେ, ସରକାର ସ୍କୁଲ ଶିକ୍ଷା ପାଇଁ ଯେତେ ଅର୍ଥ ବରାଦ କଲେ ବି ଶିକ୍ଷାଦାନରସ୍ତର ଆଖି ଦୃଶିଆ ହେଉନାହିଁ ।
ଦେଶର ସ୍ଥିତି ଦେଖିଲେ ସହରାଞ୍ଚଳରେ ପ୍ରତି ଛାତ୍ର ପିଛା ହାରାହାରି ୩ ହଜାର ୯୮୮ ଟଙ୍କା ଖର୍ଚ୍ଚ ହେଉଥିବାବେଳେ ଗ୍ରାମାଞ୍ଚଳରେ ଏହା ୧ ହଜାର ୭୯୩ ଟଙ୍କା ରହିଛି । ସେହିଭଳି ହାଇସ୍କୁଲ କ୍ଷେତ୍ରରେ କୋଚିଂ ପାଇଁ ସହରାଞ୍ଚଳ ଛାତ୍ରମାନେ ହାରାହାରି ୯ ହଜାର ୯୫୦ ଟଙ୍କା ଦେଉଥିବାବେଳେ ଗ୍ରାମାଞ୍ଚଳ ଛାତ୍ରମାନେ ୪ ହଜାର ୫୪୮ ଟଙ୍କା ଖର୍ଚ୍ଚ କରୁଛନ୍ତି ।
ରାଜ୍ୟରେ ବିଜୁଳି ବିଭ୍ରାଟକୁ ନେଇ ତେଜୁଛି ଅସନ୍ତୋଷ
ମିଟର ପୁରୁଣା ଥିଲେ ଲଗାଅ ସ୍ମାର୍ଟ ମିଟର । ନୂଆ ବିଜୁଳି ସଂଯୋଗ ପାଇଁ ବାଧ୍ୟତାମୂଳକ ସ୍ମାର୍ଟ ମିଟର । ବିଜୁଳି ଉପଭୋକ୍ତାଙ୍କ ପାଇଁ ଏଭଳି ନିୟମ କରିଛନ୍ତି ରାଜ୍ୟ ସରକାର । ଏପରିକି ନୂଆ କନେକସନ୍ ପାଇଁ ବହୁ ଅର୍ଥ ଦାବି କରାଯାଉଥିବା ଅଭିଯୋଗ ହେଉଛି । ମନଇଚ୍ଛା ଘଣ୍ଟାଘଣ୍ଟା ବିଜୁଳି କଟୁଛି । ଲୋ-ଭୋଲଟେଜ୍ ଯୋଗୁ ମିଞ୍ଜି ମିଞ୍ଜି ଆଲୁଅ ଲୋକଙ୍କୁ ଛଟପଟ କରୁଛି। ଓଡିଶା ବିଦ୍ୟୁତ ନିୟାମକ ଆୟୋଗଙ୍କ ନିକଟରେ ଏମିତି ମାଳମାଳ ଅଭିଯୋଗ ଦାଖଲ କରିଛନ୍ତି ଉପଭୋକ୍ତା। ଅଭିଯୋଗର ଶୁଣାଣି କରିବାକୁ ଆସନ୍ତାକାଲି ଦିନ ଧାର୍ଯ୍ୟ ହୋଇଥିଲା । ଏବେ ତାକୁ ଘୁଞ୍ଚାଇ ଅକ୍ଟୋବର ୧୦ ତାରିଖ କରାଯାଇଛି। ରାଜ୍ୟର ଲକ୍ଷ ଲକ୍ଷ ବିଜୁଳି ଉପଭୋକ୍ତା ନାନା ଉପାୟରେ ଶୋଷିତ ହେଉଥିବାରୁ ସରକାରଙ୍କୁ ଦାୟୀ କରିଛି ଓଡିଶା ରାଜ୍ୟ ବିଦ୍ୟୁତ ଉପଭୋକ୍ତା ମହାସଂଘ। ବାରମ୍ବାର ଆନ୍ଦୋଳନ ପରେ ମଧ୍ୟ ଲୋକେ ବିଜୁଳି ଶୋଷଣରୁ ମୁକ୍ତି ପାଉନାହାନ୍ତି । ଏପରିକି ମହାସଙ୍ଘ ପକ୍ଷରୁ ମଧ୍ୟ ଲୋକଙ୍କ ବିଜୁଳି ସମସ୍ୟାକୁ ନେଇ ଅଭିଯୋଗ ଦାଖଲ କରାଯାଇଛି।
ବିଜୁଳି ପ୍ରସଙ୍ଗକୁ ନେଇ ବିରୋଧୀ ଓ ଗଣ ସଂଗଠନ ବିରୋଧ କରି ଆସୁଛନ୍ତି । ସରକାର ଏବଂ ଓଇଆରସି ସମାଧାନ ନକଲେ ରାଜ୍ୟବ୍ୟାପୀ ପ୍ରତ୍ୟେକ ଜିଲ୍ଲାରେ ଆନ୍ଦୋଳନ ପାଇଁ ସଜବାଜ ହେଉଛନ୍ତି ମହାସଂଘ ଓ ବିରୋଧୀ । ଓଡ଼ିଶା ବିଜୁଳି ବଳକା ରାଜ୍ୟ । ହେଲେ ତଥାପି ବିଜୁଳି ଯନ୍ତ୍ରଣାରେ ହେଉଛି ଜର୍ଜରିତ । ଯାହାକୁ ନେଇ ରାଜ୍ୟବ୍ୟାପୀ ତୀବ୍ର ହେବାରେ ଲାଗିଛି ଜନ ଅସନ୍ତୋଷ।
ରାଜ୍ୟର ରାଜନୈତିକ ସ୍ଥିତିକୁ ଦେଖି କଂଗ୍ରେସ କ୍ଷମତା ହାସଲ ପାଇଁ ପ୍ରସ୍ତୁତ କରିଛି ରଣନୀତି
ରାଜ୍ୟର ରାଜନୈତିକ ସ୍ଥିତିକୁ ଦେଖି କଂଗ୍ରେସ କ୍ଷମତା ହାସଲ ପାଇଁ ପ୍ରସ୍ତୁତ କରିଛି ରଣନୀତି। ଜିଲ୍ଲା ସ୍ତରରେ ନେତୃତ୍ୱକୁ ଖୋଦ ଦଳର ତୃଣମୂଳସ୍ତରର କର୍ମୀ, ନେତା, ସାମାଜିକ ସଂଗଠନ ତଥା ସାଧାରଣ ଲୋକଙ୍କ ମତ ନେଇ ଚୟନ କରିବାକୁ ଆରମ୍ଭ ହୋଇଛି କାର୍ଯ୍ୟକ୍ରମ। ସଂଗଠନ ସୃଜନ ଅଭିଯାନ ମାଧ୍ୟମରେ ଏଆଇସିସି ପର୍ଯ୍ୟବେକ୍ଷକ ମାନେ ପିସିସି ପର୍ଯ୍ୟବେକ୍ଷକଙ୍କ ସହାୟତାରେ ଜିଲ୍ଲା, ବ୍ଲକ ଓ ପଂଚାୟତ ସ୍ତରକୁ ଯାଇ ସମସ୍ତଙ୍କ ମତାମତ ନେଇ ଜିଲ୍ଲା ସଭାପତି ଓ ଅନ୍ୟ ନେତୃତ୍ୱକୁ ଚୟନ କରିବେ। ସେଥିପାଇଁ ଆସନ୍ତା ୩୧ ତାରିଖରୁ ସେପ୍ଟେମ୍ବର ୫ ତାରିଖ ପର୍ଯ୍ୟନ୍ତ ବିଭିନ୍ନ ସାଙ୍ଗଠନିକ ଜିଲ୍ଲା ପାଇଁ ଚୟନ ହୋଇଥିବା ଏଆଇସିସି ପର୍ଯ୍ୟବେକ୍ଷକ ମାନେ ଓଡିଶା ଆସିବେ। ଯାହାକୁ ଯେଉଁ ଜିଲ୍ଲା ଦାୟିତ୍ଵ ଦିଆଯାଇଛି ସେମାନେ ନିଯୁକ୍ତି ପିସିସି ପର୍ଯ୍ୟବେକ୍ଷକମାନଙ୍କ ସହ ଜିଲ୍ଲା ଗସ୍ତ କରିବେ। ଦଳୀୟ ନେତା, କର୍ମୀ ତଥା ସାମାଜିକ ସଂଗଠନ ଓ ଜନତାଙ୍କ ସହ ଆଲୋଚନା କରି ଜିଲ୍ଲା ସ୍ତରର ନେତୃତ୍ୱ ଚୟନ କରିବେ। ସେଥିପାଇଁ ଦଳ ଆୟୋଜିତ ଏକ ଭର୍ଚୁଆଲ ବୈଠକରେ ଆଲୋଚନା ହୋଇଛି। ଓଡିଶା ପାଇଁ ପ୍ରସ୍ତୁତ ବ୍ଲୁପ୍ରିଣ୍ଟକୁ କିଭଳି ସଠିକ ରୂପ ଦିଆଯିବ ସେ ନେଇ ହୋଇଛି ଆଲୋଚନା।
ପୂର୍ବ ଢାଞ୍ଚା ଠାରୁ ସମ୍ପୂର୍ଣ୍ଣ ଭିନ୍ନ ଢଙ୍ଗରେ କାର୍ଯ୍ୟ ଆରମ୍ଭ କରିଛି କଂଗ୍ରେସ।ଏହି ଢାଞ୍ଚାରେ ଦେଶର ୩ରୁ ୪ଟି ରାଜ୍ୟରେ କାମ କରି ଦଳ ସଫଳ ହୋଇଥିବାରୁ ଓଡ଼ିଶାରେ ଏହି ଶୈଳୀରେ କାମ ଆରମ୍ଭ ହୋଇଥିବା କୁହାଯାଉଛି। ଶୀର୍ଷ ନେତୃତ୍ୱଙ୍କ ଇଚ୍ଛାରେ ଆଉ ଜିଲ୍ଲା ଓ ବ୍ଲକସ୍ତରର ନେତୃତ୍ୱ ଚୟନ ହେବେନାହିଁ। ପ୍ରତିଭା, ସାମର୍ଥ୍ୟ ଓ ଲୋକପ୍ରିୟତା ଆଧାରରେ ଜିଲ୍ଲା ନେତୃତ୍ୱ ଚୟନ ପାଇଁ କାର୍ଯ୍ୟ ଆରମ୍ଭ ହୋଇଛି।ଦଳର ୩୫ ସାଙ୍ଗଠନିକ ଜିଲ୍ଲା ପାଇଁ ନିଯୁକ୍ତ ଏଆଇସିସି ପର୍ଯ୍ୟବେକ୍ଷକଙ୍କୁ ସହାୟତା କରିବେ ପ୍ରତି ଜିଲ୍ଲା ପାଇଁ ପିସିସିର ତିନି ଜଣ ପର୍ଯ୍ୟବେକ୍ଷକ। ଏହି କାର୍ଯ୍ୟ ପାଇଁ ସୃଷ୍ଟି ହୋଇଥିବା ସୃଜନ କମିଟି ସମସ୍ତ ପ୍ରକ୍ରିୟାର ତଦାରଖ କରିବେ। ୧୫ ରୁ ୨୦ ଦିନ ମଧ୍ୟରେ ଏ ସମସ୍ତ ପ୍ରକ୍ରିୟା ଶେଷ କରି ଏଆଇସିସିକୁ ରିପୋର୍ଟ ଦିଆଯିବାର ଯୋଜନା ରହିଛି।
ଟ୍ରମ୍ପ ସରକାରଙ୍କ ଟାରିଫ: ଭାରତରେ ଲକ୍ଷାଧିକ ଶ୍ରମିକ ବେରୋଜଗାର ହେବାକୁ ବସିଲେଣି
ଆମେରିକାର ଟ୍ରମ୍ପ ସରକାରଙ୍କ ଟାରିଫ । ଭାରତରେ ଲକ୍ଷାଧିକ ଶ୍ରମିକ ବେରୋଜଗାର ହେବାକୁ ବସିଲେଣି । ଗତକାଲିଠୁ ଭାରତ ତିଆରି ପୋଷାକ ରପ୍ତାନୀ ଉପରେ ଟ୍ରମ୍ପ ସରକାର ଲାଗୁ କରିଛନ୍ତି ୫୯ ପ୍ରତିଶତ ଟାରିଫ । ଯାହାକି ପୋଷାକ ଶିଳ୍ପ ପ୍ରତି ଭାରି ବିପଦ । ବିକଳ୍ପ ବଜାର ନଥିବାରୁ ଭାରତରେ ପ୍ରଭାବିତ ହେଲାଣି ସୂତାକଳ ଓ ପୋଷାକ ଶିଳ୍ପ । ଗୁଜୁରାଟର ସୁରତ ଓ ତାମିଲନାଡ଼ୁର ତିରୁପୁରରେ ସୂତାକଳ ବନ୍ଦ ହେବାରେ ଲାଗିଲାଣି । ଅତ୍ୟଧିକ ଟାରିଫ ବୋଝ ଯୋଗୁ ବନ୍ଦ ହେଲାଣି ରପ୍ତାନୀ । ପୋଷାକ ଶିଳ୍ପ ଶ୍ରମିକ ଭିତ୍ତିକ ହୋଇଥିବାରୁ ଲକ୍ଷାଧିକ ଶ୍ରମିକ ଛଟେଇ ହେବା ଆଶଙ୍କା ଉପୁଜିଛି । ବିଶେଷକରି ଓଡ଼ିଶାର ବହୁ ଶ୍ରମିକ ଗୁଜୁରାଟ, ପଞ୍ଜାବ, ହରିୟାଣା, ତାମିଲନାଡ଼ୁରେ ଥିବା ସୂତା, କପଡ଼ା ଓ ପୋଷାକ ଶିଳ୍ପରେ କାମ କରନ୍ତି । ଏକ ଆକଳନରୁ ଜଣାପଡ଼ିଛି ଉତ୍ପାଦନ ବନ୍ଦ ହେଲେ ପ୍ରାୟ ୫ ଲକ୍ଷରୁ ଅଧିକ ଓଡ଼ିଆ ଶ୍ରମିକ ରୋଜଗାର ହରାଇବେ । କଣ କରିବେ କିଛି ବି ବିକଳ୍ପ ବାଟ ବାହାରିପାରୁନି । ପୋଷାକ ଶିଳ୍ପରେ ଏତେ ସଂଖ୍ୟାରେ ଓଡ଼ିଆଙ୍କ ଛଟେଇ ହେବାକୁ ବସିଛି । କେମିତି ସେମାନଙ୍କ ପରିବାର ଚଳିବ ତାକୁ ନେଇ ସରକାରୀ ସ୍ତରରେ କିଛି ବି ଉଦ୍ୟମ ଦେଖିବାକୁ ମିଳିନି । ୨୦୨୪-୨୫ ବର୍ଷରେ ଆମେରିକାକୁ ଭାରତ ରପ୍ତାନୀ କରିଥିଲା ୧୦.୯ ବିଲିୟନ ଡଲାର ପୋଷାକ । ଆମେରିକାକୁ ଭାରତ ପୋଷାକ ରପ୍ତାନୀ କରିବାରେ ବିଶ୍ବରେ ତୃତୀୟ ଦେଶ । ଦେଶର ମୋଟ ଅଭିବୃଦ୍ଧିରେ ୨.୩ ପ୍ରତିଶତ ପୋଷାକ ଶିଳ୍ପର ଅବଦାନ ରହିଛି । ସେପଟେ ଚୀନ ଓ ଆଫ୍ରିକା କେବେ ବି ଭାରତୀୟ ପୋଷାକ ଶିଳ୍ପ ପାଇଁ ବିକଳ୍ପ ବଜାର ହୋଇପାରିବନି । କାରଣ ଭାରତ ନିର୍ମିତ ଗୋଟିଏ ଶାର୍ଟ ଆମେରିକାରେ ୮ ଡଲାରରେ ବିକ୍ରି ହୋଇଥାଏ । କିନ୍ତୁ ଚୀନ ଓ ଆଫ୍ରିକାରେ ବିକ୍ରି ହେଲେ ଏହା ୪ ଡଲାରରେ ବିକ୍ରି ହେବ । ଯାହାକୁ ପୋଷାକ ଶିଳ୍ପ କ୍ଷତିରେ ପଡ଼ିବେ ଓ ରପ୍ତାନୀ ମଧ୍ୟ ପ୍ରଭାବିତ ହେବ ।
ବିଶେଷଜ୍ଞଙ୍କ ଅଭିଯୋଗ ଆମେରିକା ଯେବେଠୁ ଭାରତକୁ ଟାରିଫ ଧମକ ଦେଲାଣି । ସେବେଠାରୁ କେନ୍ଦ୍ର ସରକାର କୁଟନୈତିକ ସ୍ତରରେ କଥାବାର୍ତ୍ତା ଜାରି ରଖିଥିଲେ ବି ସଫଳତା ପାଇନାହାନ୍ତି । ଟ୍ରମ୍ପ ସରକାର ଭାରତକୁ ଏକ ପ୍ରକାର ବ୍ଲାକମେଲିଂ କରିବା ଭଳି ସ୍ଥିତିକୁ ଆଣିଛନ୍ତି । ଭାରତର ପୋଷାକ ଶିଳ୍ପ ରପ୍ତାନୀ ଉପରେ ଟ୍ରମ୍ପ ସରକାର ଅତିରିକ୍ତ ୨୫ ପ୍ରତିଶତ ଶୁଳ୍କ ସହ ମୋଟ ୫୯ ପ୍ରତିଶତ ଟାରିଫ ଲଗାଇଛନ୍ତି । କିନ୍ତୁ ସେଠି ଚୀନ ଉପରେ ୩୦ ପ୍ରତିଶତ, ଭିଏତନାମ ଉପରେ ୨୦, ଇଣ୍ଡୋନେସିଆ ଉପରେ ୧୯ ଓ ଜାପାନ ଉପରେ ୧୫ ପ୍ରତିଶତ ମାତ୍ର ଟାରିଫ ଲଗାଇଛନ୍ତି । ଭାରତ ଉପରେ ବସାଇଥିବା ଟାରିଫ ଅନ୍ୟ ବିକଶିତ ଓ ବିକାଶଶୀଳ ରାଷ୍ଟ୍ରଠାରୁ ଯଥେଷ୍ଠ ଅଧିକ । କେତେକ ବିଶେଷଜ୍ଞଙ୍କ ମତରେ ଭାରତ ଉପରେ ଆମେରିକା ଟାରିଫ ବୋଝ କମ କରିବାକୁ ସ୍ବତନ୍ତ୍ର ଭାବେ ଲାୟସନିଂ କରିବାକୁ କେନ୍ଦ୍ର ସରକାର ଗୋଟିଏ କମ୍ପାନୀକୁ ଦାୟିତ୍ବ ଦେଇ ସେ କମ୍ପାନୀ ପିଛା କୋଟି କୋଟି ଟଙ୍କା ବ୍ୟୟ କରୁଛନ୍ତି । ହେଲେ ତଥାପି ସଫଳତା ମିଳୁନି । ଲକ୍ଷାଧିକ ଓଡ଼ିଆ ବେରୋଜଗାର ହେଲେ ସେମାନଙ୍କୁ ରୋଜଗାର ପନ୍ଥା କଣ ହେବ ସେ ନେଇ ଏବେଠୁ ରାଜ୍ୟ ସରକାର ବି ତତ୍ପର ଦେବା ଦରକାର ବୋଲି ବିଶେଷଜ୍ଞ ପରାମର୍ଶ ଦେଇଛନ୍ତି ।
କାହିଁକି ଅଧାରେ ବନ୍ଦ ହୋଇ ପଡ଼ିଛି ଏକାମ୍ର ଐତିହ୍ୟ ପ୍ରକଳ୍ପ ?
କାହିଁକି ଅଧାରେ ବନ୍ଦ ହୋଇ ପଡ଼ିଛି ଏକାମ୍ର ଐତିହ୍ୟ ପ୍ରକଳ୍ପ ? ରାଜ୍ୟ ସରକାରଙ୍କ ଅବହେଳା ନା ଠିକା ସଂସ୍ଥାର ମନମାନି ? ଜୁଲାଇ ମାସରୁ ବନ୍ଦ ହୋଇ ପଡ଼ିଛି ପ୍ରକଳ୍ପ କାମ । ଏହି ଐତିହ୍ୟ ପ୍ରକଳ୍ପ ବନ୍ଦ ହୋଇଯିବା ଘଟଣା ଅଗଣିତ ଶ୍ରଦ୍ଧାଳୁଙ୍କୁ ବ୍ୟଥିତ କରିଛି । ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏକାମ୍ରକ୍ଷେତ୍ର ବିକାଶ ପାଇଁ ଏହି ପ୍ରକଳ୍ପ କରିଥିଲେ । ମେଟ୍ରୋ ରେଳ ପରି ଏକାମ୍ର ପ୍ରକଳ୍ପ ଟେଣ୍ଡରକୁ ପ୍ରଥମେ ବାତିଲ କରିଦେଲେ ବିଜେପି ସରାକର । ପୁନଃ ଟେଣ୍ଡର ନାଁରେ ସମୟ ଗଡ଼ାଇଚାଲିଛନ୍ତି । ଫଳରେ ଅନିଶ୍ଚିତତା ଭିତରେ ଏକ୍ରାମ୍ର ପ୍ରକଳ୍ପ କାମ । ପୂର୍ବ ସରକାର ସମୟର ସମସ୍ତ ଯୋଜନା ବନ୍ଦ କରିବାକୁ ବିଜେପି ସରକାର ଷଡ଼ଯନ୍ତ୍ର କରୁଥିବା ବିଜେଡି ଅଭିଯୋଗ କରିଛି । ଏହି ଐତିହ୍ୟ ପ୍ରକଳ୍ପ ଜରିଆରେ ଶ୍ରୀଲିଙ୍ଗରାଜ ମନ୍ଦିର ଚତୁଃପାର୍ଶ୍ଵର ସୌନ୍ଦର୍ଯ୍ୟକରଣ ସହ ବିଭିନ୍ନ ସ୍କାରକୀ, ପବିତ୍ର ପୁଷ୍କରିଣୀ ଏବଂ ଜଳାଶୟର ପୁନରୁଦ୍ଧାର, ଯାନବାହନ ଚଳାଚଳ ନିମନ୍ତେ ଚଉଡ଼ା ରାସ୍ତା, ପଥଚାରୀଙ୍କ ପାଇଁ ଚଲାପଥ ଏବଂ ପାର୍କିଂ ବ୍ୟବସ୍ଥା, ଶ୍ରଦ୍ଧାଳୁଙ୍କ ନିମନ୍ତେ ବ୍ୟାଖ୍ୟାନ କେନ୍ଦ୍ର, ସୂଚନା ଓ ନିୟନ୍ତ୍ରଣ କକ୍ଷ, ସ୍ଥାୟୀ ଭଜନ ମଣ୍ଡପ, ସାମନ୍ତରାପୁର ଛକରୁ ରଥଦାଣ୍ଡ ପର୍ଯ୍ୟନ୍ତ ଏକ ରିଂ ରୋଡ ନିର୍ମାଣ, ୫୦ ବସ୍ ଓ କାର୍ ପାର୍କିଂ ବ୍ୟବସ୍ଥା, ପାର୍କିଂସ୍ଥଳରେ ପର୍ଯ୍ୟଟକଙ୍କ ପାଇଁ ଦୋକାନ, ଶୌଚାଳୟ ଆଦି ବ୍ୟବସ୍ଥା ଓ ପର୍ଯ୍ୟଟକଙ୍କ ଭ୍ରମଣ ପାଇଁ ବ୍ୟାଟେରି ଯାନର ବ୍ୟବସ୍ଥା, କୋଟିତୀର୍ଥରୁ ତାଳେଶ୍ଵର ଛକ ପର୍ଯ୍ୟନ୍ତ ରାସ୍ତା, ସହସ୍ରଲିଙ୍ଗ ପୁଷ୍କରିଣୀର ସୌନ୍ଦର୍ଯ୍ୟକରଣ,ଏକାମ୍ର ପ୍ରକଳ୍ପରେ ସଂସ୍କୃତି ପ୍ଲାଜା, ଲିଙ୍ଗରାଜ ପ୍ଲାଜା, ଅନନ୍ତ ବାସୁଦେବ ପ୍ଲାଜା, କେଦାରଗୌରୀ ପ୍ଲାଜା ତିଆରି ପାଇଁ ପ୍ରସ୍ତାବ ରହିଥିଲା । ବିଜେପି କ୍ଷମତାକୁ ଆସିବା ପରେ ନିଜେ ପୂର୍ତ୍ତମନ୍ତ୍ରୀ, ଏକାମ୍ର ବିଧାୟକ ଓ ଭୁବନେଶ୍ବର ସାଂସଦ ଦୁଇ ଥର ପ୍ରକଳ୍ପ ଅଞ୍ଚଳ ପରିଦର୍ଶନ କଲେ । ପ୍ରଥମେ କହିଲେ ୪୨ ପ୍ରତିଶତ କାମ ସରିଛି । ପରେ ପୁଣି କହିଲେ ମାତ୍ର ୧୦ ପ୍ରତିଶତ କାମ ହୋଇଛି । ସରକାରଙ୍କ ବଦଳୁଥିବା ଆଭିମୁଖ୍ୟକୁ ନେଇ ବିଜେଡି ପ୍ରଶ୍ନ ଉଠାଇଛି ।
୨୦୧୯ରେ ତତ୍କାଳୀନ ନବୀନ ପଟ୍ଟନାୟକ ସରକାର ଏକାମ୍ରକ୍ଷେତ୍ରକୁ ବିଶ୍ଵସ୍ତରୀୟ କରିବା ଲକ୍ଷ୍ୟରେ ଏକାମ୍ର ଐତିହ୍ୟ ପ୍ରକଳ୍ପ ଘୋଷଣା କରିଥିଲ । ଏ ନେଇ ମନ୍ଦିର ଚତୁଃପାର୍ଶ୍ବରୁ ଜବରଦଖଲ ହଟାଯାଇ ଜମି ଅଧିଗ୍ରହଣ କରାଯାଇଥିଲା । ଜମି ମାଲିକଙ୍କୁ ତାଙ୍କ ପୈତୃକ ସମ୍ପତ୍ତି ଛାଡ଼ିବାକୁ ସରକାରଙ୍କ ନିବେଦନକୁ ଗ୍ରହଣ କରିଥିଲେ ୧୦୧ ଜଣ ଜମି ମାଲିକ । ୧୧୪ ପ୍ଲଟର ପ୍ରାୟ ୫.୭ ଏକର ଜମି ଅଧିଗ୍ରହଣ କରାଯାଇଥିଲା । ଏକାମ୍ର ପ୍ରକଳ୍ପର ଭୂମି ପୂଜନ ଓ ଶିଳାନ୍ୟାସ ତିନିଦିନ ଧରି ହୋଇଥିଲା । ୨୦୨୩ ଜୁଲାଇ ୧୦ରେ ଓବିସିସି ପକ୍ଷରୁ ଏକ ଠିକା ସଂସ୍ଥାକୁ ପ୍ରକଳ୍ପ ପାଇଁ କାର୍ଯ୍ୟାଦେଶ ଦିଆଗଲା । ପ୍ରଥମ ପର୍ଯ୍ୟାୟରେ ୧୫୬ କୋଟି ୨୧ ଲକ୍ଷ ଟଙ୍କା ବ୍ୟୟବରାଦ ହୋଇଥିଲା । ୩୦ କୋଟି ଖର୍ଚ୍ଚ ହେବା ପରେ ଅଧାରୁ କାମ ବନ୍ଦ ହୋଇ ପଡ଼ିରହିଛି । ହେଲେ ଜମି ଅଧିଗ୍ରହଣ ସହ ଠିକାସଂସ୍ଥାର ଅବହେଳାକୁ ଦାୟୀ କଲେ ବିଜେପି ସରକାର । ସାନି ଟେଣ୍ଡର ଆବଶ୍ୟକତାକୁ ଗୁରୁତ୍ବ ଦେଇଛି ବିଜେପି । ଏହା ବିରୋଧରେ କଂଗ୍ରେସ ସ୍ବର ଉଠାଇ ସରକାରଙ୍କ ଅପାରଗତାକୁ ଦାୟୀ କରିଛି ।
ପଡ଼ୋଶୀ ରାଜ୍ୟରେ ମହାନଦୀ ଲଢ଼େଇ: ସମାଧାନ ପାଇଁ ଛତିଶଗଡରେ ଗୋଲ ଟେବୁଲ ବୈଠକ
ପଡ଼ୋଶୀ ରାଜ୍ୟରେ ମହାନଦୀ ଲଢ଼େଇ । ସମାଧାନ ପାଇଁ ଛତିଶଗଡରେ ଗୋଲ ଟେବୁଲ ବୈଠକ । ମହାନଦୀ ବଞ୍ଚାଅ ଆନ୍ଦୋଳନ ସହ ବିଭିନ୍ନ ସଙ୍ଗଠନ ସାମିଲ । ବିଜେଡି କହିଲା, ହକ ନମିଳିବା ଯାଏ ଜୀବନ ରେଖା ପାଇଁ ଚାଲିବ ଲଢ଼େଇ । ମହାନଦୀ ପାଇଁ ଗୋଲ ଟେବୁଲ ବୈଠକ । ଏକାଠି ହେଲେ ବିଭିନ୍ନ ସାମାଜିକ ସଙ୍ଗଠନ, ସ୍ୱେଚ୍ଛାସେବୀ, ଜଳ ମାନବଙ୍କ ସହ ମହାନଦୀ ବଞ୍ଚାଅ ଆନ୍ଦୋଳନ। ସମସ୍ତଙ୍କ ଗୋଟିଏ ଲକ୍ଷ୍ୟ ଓଡ଼ିଶା ଓ ଛତିଶଗଡ଼ ସରକାରଙ୍କ ମଧ୍ୟରେ ଦୀର୍ଘ ଦିନ ଧରି ଲାଗି ରହିଥିବା ମହାନଦୀ ଜଳ ବିବାଦର ହେଉ ଆପୋଷ ସମାଧାନ। ମହାନଦୀ ବଞ୍ଚାଅ ଆନ୍ଦୋଳନର ଯୁକ୍ତି ହେଉଛି, ଦୁଇ ସରକାର ଭିତରେ ଜଳ ସମାଧାନ ସମ୍ଭବ ନୁହେଁ। ମହାନଦୀ ସହ ଜଡ଼ିତ ପ୍ରତ୍ୟେକ ଅଂଶୀଦାର ବା ଷ୍ଟେକ୍ ହୋଲାଡର ଚାହିଁଲେ ଜଳ ବିବାଦର ହୋଇପାରିବ ସମାଧାନ। ଯାହାକୁ ନେଇ ଗୋଲ ଟେବୁଲ୍ ବୈଠକରେ ହୋଇଛି ଆଲୋଚନା। ମହାନଦୀର ୧ ଲକ୍ଷ ୪୧ ହଜାର ବେସିନ ଏରିଆ ରହିଛି। ଏହା କିପରି ସୁରକ୍ଷିତ ରହିବ, ସେନେଇ ମଧ୍ୟ ସର୍ବସମ୍ମତି କ୍ରମେ ଆଲୋଚନା ହୋଇଛି । ଟ୍ରିବ୍ୟୁନାଲ ଏହାର ସମାଧାନ ନୁହେଁ। ଆପୋଷ ବୁଝାମଣାରେ ମହାନଦୀର ବିବାଦର ସମାଧାନ ସମ୍ଭବ ବୋଲି ଗୋଲ ଟେବୁଲ୍ ବୈଠକରେ ମତ ପ୍ରକାଶ ପାଇଛି।
ମହାନଦୀ ଜଳ ବିବାଦକୁ ନେଇ ୨୦୧୬ ମସିହାରୁ ଲଢ଼େଇ ଜାରି ରଖିଛି ବିଜେଡି। ଏବେ ଓଡ଼ିଶା, ଛତିଶଗଡ ଓ କେନ୍ଦ୍ରରେ ବିଜେପି ସରକାର। ଓଡ଼ିଶାର ଜୀବନ ରେଖାକୁ ନ୍ୟାୟ ଦେବା ପାଇଁ ଏବେ ସୁବର୍ଣ୍ଣ ସୁଯୋଗ ଆସିଛି। ତେଣୁ କାଳ ବିଳମ୍ବ ନକରି ଓଡ଼ିଶା ସରକାର ଏହାର ସମାଧାନ କରନ୍ତୁ ବୋଲି ବରିଷ୍ଠ ବିଜେଡି ନେତା ପ୍ରଶାନ୍ତ ମୁଦୁଲି କହିଛନ୍ତି । କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ କହିଛନ୍ତି, ଓଡ଼ିଶାର ଲାଇଫ ଲାଇନକୁ ଜୀବିତ ରଖିବା ପାଇଁ ବାରମ୍ବାର ଦାବି ହେଉଛି। ସବୁ ସ୍ତରରେ ଲଢ଼େଇ ଜାରି ରହିଛି। ଓଡ଼ିଶା, ଛତିଶଗଡ଼, କେନ୍ଦ୍ରରେ ବିଜେପି ସରକାର ଥିବାରୁ ସମାଧାନ ବାଟ ବିଜେପି ସରକାର କରିବା ଆବଶ୍ୟକ ବୋଲି କହିଛି କଂଗ୍ରେସ। ରାଜ୍ୟ ସରକାର ମହାନଦୀ ଜଳ ବିବାଦର ଆପୋଷ ସମାଧାନ କଥା କହୁଥିବା ବେଳେ, କି ପ୍ରକାର ଆପୋଷ ସମାଧାନ କରୁଛନ୍ତି ତାହା ରାଜ୍ୟବାସୀଙ୍କ ଜଣାନ୍ତୁ ବୋଲି ଦଳ ଦାବି କରିଛି । ଯାହାର ଜବାବ ରଖିଛି ବିଜେପି।
କମୁଛି ବନ୍ୟା ହେଲେ ବଢୁଛି ଲୋକଙ୍କ ଦୁଃଖ ଓ ଦୁର୍ଦ୍ଦଶା
ବୈତରଣୀ ଓ ସୁବର୍ଣ୍ଣରେଖାରେ କମୁଛି ବନ୍ୟା ହେଲେ ବଢୁଛି ଲୋକଙ୍କ ଦୁଃଖ ଓ ଦୁର୍ଦ୍ଦଶା। ଏବେ ବି ଅନେକ ଗାଁ ପାଣି ଘେରରେ। ଉତ୍କଟ ହେଉଛି ପାନୀୟ ଜଳ ସାଙ୍ଗକୁ ଖାଦ୍ୟାଭାବ। ବୈତରଣୀରେ ଆସିଥିବା ବନ୍ୟା ୬ଦିନ ପରେ କମିବା ଆରମ୍ଭ କରିଛି। ବନ୍ୟାରେ ପ୍ରଭାବିତ ହୋଇଛି ଧାମନଗର ବ୍ଲକର ୧୨ଟି ପଞ୍ଚାୟତର ୩୫ରୁ ଅଧିକ ଗାଁ ଓ ଚାନ୍ଦବାଲି ବ୍ଲକର ୪ ପଞ୍ଚାୟତର ୨୦ ଗାଁ। ବାହ୍ୟ ଜଗତରୁ ବିଚ୍ଛିନ୍ନ ହୋଇଥିଲା ଆରଡି ଅଞ୍ଚଳର ୧୪ ଗାଁ। ବନ୍ୟା ପାଣି କମିବା ଆରମ୍ଭ ହୋଇଥିଲେ ବି ଅନେକ ଗାଁ ରାସ୍ତାରେ ଚାଲୁଛି ପାଣି। ୬ ଦିନ ହେଲା ଶହ ଶହ ଏକର ଚାଷଜମି ଜଳମଗ୍ନ ହୋଇ ରହିଛି। ତାସହ ପ୍ରଭାବିତ ହୋଇଛନ୍ତି ଗୃହପାଳିତ ପଶୁ। ୫ ଦିନ ପରେ ଜିଲ୍ଲା ପ୍ରଶାସନର ଅଧିକାରୀ ବନ୍ୟାଞ୍ଚଳକୁ ଯାଇ ବିପନ୍ନଙ୍କୁ ଭେଟି ରନ୍ଧାଖାଦ୍ୟର ବ୍ୟବସ୍ଥା କରାଇଥିଲେ । କିନ୍ତୁ ଗୋଟିଏ ଓଳି ରନ୍ଧା ଖାଦ୍ୟ ଦେଇ ପ୍ରଶାସନ ତା’ର କାମ ସାରି ଦେଇଛି।
ସେହିଭଳି ଗତ ୨୫ ତାରିଖରେ ଯାଜପୁର କାଣୀ ନଦୀରେ ବନ୍ୟା ଆସିବା ଫଳରେ ଦଶରଥପୁର ଅଞ୍ଚଳରେ ବ୍ୟାପକ କ୍ଷୟକ୍ଷତି ହୋଇଛି । ଦଶରଥପୁର ବ୍ଲକର ୨୧ଟି ପଞ୍ଚାୟତର ୧୮ ହଜାର ୪୩୩ ଜଣ ଲୋକ ପ୍ରଭାବିତ ହୋଇଛନ୍ତି। ଆହୁରି ଅନେକ ଲୋକ ବାସଶୂନ୍ୟ ହୋଇଛନ୍ତି। ଅନେକ ଲୋକଙ୍କ ଘରେ ପାଣି ପଶି ବହୁ ମୂଲ୍ୟର ଆସବାବପତ୍ର ସହ ଦରକାରୀ କାଗଜ ପତ୍ର ମଧ୍ୟ୍ୟ ନଷ୍ଟ ହୋଇଯାଇଛି। ସବୁଠୁ ଗୁରୁତ୍ବପୂର୍ଣ୍ଣ କଥା ହେଲା, ପାଖାପାଖି ୧୫ଟି ପଞ୍ଚାୟତର ହଜାର ହଜାର ହେକ୍ଟର ଚାଷ ଜମିରେ ଏବେ ବି ଜମି ରହିଛି ବନ୍ୟା ପାଣି। ଏହାରି ଭିତରେ ମଲ୍ଲିକାପୁର ପଞ୍ଚାୟତରେ ବନ୍ୟାପାଣିରେ ଭାସି ଯାଇ ଜଣେ ୨୦ ବର୍ଷୀୟ ଯୁବକଙ୍କ ମୃତ୍ୟୁ ହୋଇଛି। ବନ୍ୟା ପରବର୍ତ୍ତି ସମୟରେ ବିଭିନ୍ନ ରୋଗ ବ୍ୟାପିବାର ସମ୍ଭାବନା ଥିବାରୁ, ଯାଜପୁର ଜିଲ୍ଲା ସ୍ୱାସ୍ଥ୍ୟ ଅଧିକାରୀ ପ୍ରଭାବିତ ଅଞ୍ଚଳକୁ ଯାଇ ଲୋକଙ୍କୁ ସଚେତନ କରି ବିଭିନ୍ନ ପ୍ରକାର ଔଷଧ ପ୍ରଦାନ କରିଛନ୍ତି। ସୁବର୍ଣ୍ଣରେଖା ନଦୀର ବି କମୁଛି ଜଳସ୍ତର। ରାଜଘାଟରେ ବିପଦ ସଙ୍କେତ ତଳେ ବନ୍ୟା ଜଳ ପ୍ରବାହିତ ହେଉଥିଲେ ବି ବାଲିଆପାଳ ଓ ଭୋଗରାଇ ବ୍ଲକର ବହୁ ଗାଁ ଜଳବନ୍ଦୀ ହୋଇ ରହିଛି । ବନ୍ୟା ପ୍ରଭାବିତ ଅଞ୍ଚଳରୁ ପାଣି ଛାଡ଼ିବାକୁ ଆହୁରି ଦୁଇରୁ ତିନି ଦିନ ଲାଗିବ । ବନ୍ୟାରେ ଚାଷ ଉଜୁଡି ଯାଇଥିବାରୁ ବର୍ଷ ଯାକ କିପରି ପରିବାର ପ୍ରତିପୋଷଣ କରିବେ ସେନେଇ ଚିନ୍ତାରେ ଚାଷୀ ।