ଭୁବନେଶ୍ୱର: ରାଜଧାନୀରେ ସାଇକେଲ ଚାଳକଙ୍କ ପାଇଁ ଖୁସି ଖବର। ସ୍ମାର୍ଟସିଟିରେ ପୁଣି ପୂର୍ବଭଳି ଚାଲିବ ସମସ୍ତ ମୋ ସାଇକେଲ। ଏନେଇ ସ୍ମାର୍ଟସିଟି ପକ୍ଷରୁ ପଦକ୍ଷେପ ନିଆଯାଇଛି। ମୋଟ ୨ହଜାର ସାଇକେଲର ପରିଚାଳନା ଦାୟିତ୍ୱ ୩ଟି କମ୍ପାନୀକୁ ଦିଆଯାଇଥିଲା। ୟୁଲୁ, ୟାନା ଓ ହେକ୍ସି କମ୍ପାନୀ କୁ ଦିଆଯାଇଥିଲା ଦାୟିତ୍ୱ। କିନ୍ତୁ ସର୍ବାଧିକ ଏକ ହଜାର ମୋ ସାଇକେଲର ଦାୟିତ୍ୱ ନେଇଥିବା ହେକ୍ସି କମ୍ପାନୀ ଅବହେଳା ପ୍ରଦର୍ଶନ କରିଥିଲା। ତେବେ ହେକ୍ସି କମ୍ପାନି ବିରୋଧରେ ଥାନାରେ ବି ଏତଲା ଦିଆଯାଇଥିଲା। ଏଣୁ ହେକ୍ସି କମ୍ପାନୀକୁ ସ୍ମାର୍ଟସିଟି କର୍ତ୍ତୃପକ୍ଷ କଳା ତାଲିକା ଭୁକ୍ତ କରିଛନ୍ତି। ଉକ୍ତ ସାଇକେଲର ପରିଚାଳନା ଦାୟିତ୍ୱ ବର୍ତ୍ତମାନ ୟାନା କମ୍ପାନୀକୁ ଦିଆଯାଇଛି। ଏଣିକି ୧୫୦୦ ମୋ ସାଇକେଲର ପରିଚାଳନା ଓ ରକ୍ଷଣାବେକ୍ଷଣ ୟାନା ଓ ଅବଶିଷ୍ଟ ୫୦୦ ମୋ ସାଇକେଲର ଦାୟିତ୍ୱ ତୁଲାଇବ ୟୁଲୁ କମ୍ପାନୀ। ଏଭଳି ସୂଚନା ଦେଇଛନ୍ତି ସ୍ମାର୍ଟସିଟି ସିଇଓ ସଞ୍ଜୟ ସିଂ।

ଓଡ଼ିଶା: ବ୍ରିଟେନ୍‌ରେ କରୋନାର ସ୍ଥିତି ଦେଖିବା ପରେ ଏବେ ଦେଶରେ ତୃତୀୟ ଲହର ଆସିବା ଆଶଙ୍କା ଦେଖାଦେଇଛି। ବ୍ରିଟେନରେ ସଂକ୍ରମଣକୁ ନଜରରେ ରଖି ଜନସ୍ୱାସ୍ଥ୍ୟ ନିର୍ଦ୍ଦେଶକ କରାଇଛନ୍ତି ସତର୍କ। ତୃତୀୟ ଲହର ମୁକାବିଲା ଲାଗି ଆମେ ସମର୍ଥ ବୋଲି କହିଛନ୍ତି ଜନସ୍ୱାସ୍ଥ୍ୟ ନିର୍ଦେଶକ। ଯେତେ ରୋଗୀ ଚିହ୍ନଟ ହେଲେ ମଧ୍ୟ ତାଙ୍କୁ ସ୍ୱାସ୍ଥ୍ୟସେବା ଯୋଗାଇଦିଆଯିବ। ରାଜ୍ୟର ସମସ୍ତ କୋଭିଡ ହସ୍ପିଟାଲ, ଘରୋଇ ହସ୍ପିଟାଲରେ ସ୍ୱତନ୍ତ୍ର ଓମିକ୍ରନ ବ୍ଲକ ରଖିବାକୁ ନିର୍ଦେଶ ଦିଆଯାଇଛି। ସ୍ୱାସ୍ଥ୍ୟ ବିଭାଗ ପ୍ରସ୍ତୁତ ରହିଛି ବୋଲି କହିଛନ୍ତି ନିରଞ୍ଜନ ମିଶ୍ର। ସରକାରଙ୍କର କରୋନା ନିୟମାବଳୀ ଅନୁସାରେ ଆନ୍ତର୍ଜାତିକ ଯାତ୍ରୀଙ୍କର ସର୍ଭେଲାନ୍ସ ଚାଲିଛି।

ଓମିକ୍ରନ ଚିହ୍ନଟ ପାଇଁ ଜିନମ ସିକ୍ୱେନ୍ସିଂ ଆବଶ୍ୟକ। ତେଣୁ ସିକ୍ୱେନ୍ସିଂ ପାଇଁ ଯାଉଥିବା ନମୁନା ସଂଖ୍ୟା ବଢାଇବାକୁ କୁହାଯାଇଛି। ଏବେ ସୁଦ୍ଧା ରାଜ୍ୟକୁ ଆଟ ରିସ୍କ କଣ୍ଟ୍ରିରୁ ୧୫ ଶହରୁ ଅଧିକ ଲୋକ ଆସିଲେଣି। ଯାହା ତଥ୍ୟ ଅଛି, ଓମିକ୍ରନର ଲକ୍ଷଣ ପୂର୍ବ ଭଳି ପ୍ରାୟ ସମାନ। ଦ୍ଵିତୀୟ ଲହରରେ ଯେଉଁ ଟ୍ରିଟମେଣ୍ଟ ଥିଲା, ଏବେ ବି ତାହା ରହିଛି। ଓମିକ୍ରନ ଯୋଗୁ ଯେଉଁ ପରିସ୍ଥିତି ସୃଷ୍ଟି ହେବ, ତାକୁ ସମ୍ଭାଳିବା ଲାଗି ସ୍ୱାସ୍ଥ୍ୟ ବିଭାଗ ସକ୍ଷମ ବୋଲି କହିଛନ୍ତି ଜନସ୍ୱାସ୍ଥ୍ୟ ନିର୍ଦ୍ଦେଶକ। ରୋଗୀ ସଂଖ୍ୟା ବୃଦ୍ଧି ସହ ତାଳ ଦେଇ ଭିତ୍ତିଭୂମି ବଢ଼ାଯିବ। ପୂର୍ବ ପ୍ରସ୍ତୁତି ସହ ଅକ୍ସିଜେନ, ବେଡ଼, ଜରୁରି ଔଷଧ ମହଜୁଦ ରଖାଯାଉଛି। ନିୟମିତ ଏହାର ତର୍ଜମା କରାଯାଉଛି ସେହି ଅନୁପାତରେ ପ୍ରସ୍ତୁତି ଚାଲିଛି।