spot_img
Home Blog Page 4963

ଜାମ୍ମୁ କାଶ୍ମୀରରେ ପୁଣି ଆତଙ୍କୀ ହାମଲା; ୨ ଯବାନ ସହିଦ, ୧୪ ଯବାନ ଆହତ

Santosh Kumar Sahoo
-
0
ଜାମ୍ମୁ କାଶ୍ମୀରରେ ପୁଣି ଆତଙ୍କୀ ହାମଲା; ୨ ଯବାନ ସହିଦ, ୧୪ ଯବାନ ଆହତ

କାଶ୍ମୀର: ଜାମ୍ମୁ-କାଶ୍ମୀରର ଶ୍ରୀନଗରରେ ପୁଣି ଆତଙ୍କୀ ହାମଲା । ଶ୍ରୀନଗର ନିକଟସ୍ଥ ଜେଓ୍ବାନସ୍ଥିତ ପୋଲିସ କ୍ୟାମ୍ପ ନିକଟରେ ଏକ ବସ୍ ଉପରକୁ ହାମଲା କରିଛନ୍ତି ଆତଙ୍କବାଦୀ । ଯବାନମାନେ ଏକ ବସରେ ଯାଉଥିବାବେଳେ ପାନ୍ଥ ଛକରେ ଆତଙ୍କବାଦୀ ଆକ୍ରମଣ କରିଥିଲେ । ଆକ୍ରମଣରେ ୨ ଜଣ ସହିଦ ହୋଇଥିବାବେଳେ ୧୪ ଜଣ ଯବାନ ଆହତ ହୋଇଛନ୍ତି । ସମସ୍ତ ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ହାମଲା ପରେ ସ୍ଥାନୀୟ ଅଞ୍ଚଳରେ କାଶ୍ମୀର ଜୋନ ପୋଲିସ ପକ୍ଷରୁ ସର୍ଚ୍ଚ ଅପରସେନ ଜୋରଦାର କରାଯାଇଛି । ଘଟଣାସ୍ଥଳରେ ପୋଲିସ ମୁତୟନ କରାଯାଇଛି ।

ସବୁଠାରୁ ବଡ଼ କଥା ହେଉଛି ଯବାନ ଯାଉଥିବା ବସଟି ବୁଲେଟ ପ୍ରୁଫ ନଥିଲା ଓ ପୋଲିସମାନଙ୍କ ପାଖରେ ରାଇଫଲ ବଦଳରେ ଥିଲା ଲାଠି ଓ ସିଲଡ୍ । ସେମାନେ ଡ୍ୟୁଟି ସାରି ବାରାକକୁ ଫେରୁଥିଲେ । ସାଧାରଣତଃ ଏପରି ବସ୍ ସହିତ ଏକ ସଶସ୍ତ୍ର ପୋଲିସ ଗାଡ଼ି ଯାଇଥାଏ । କିନ୍ତୁ ଆଜି ଏହି ସୁରକ୍ଷା ବ୍ୟବସ୍ଥା କରାଯାଇଥିଲା । ଯାହା ଫଳରେ ବସ୍ ଉପରେ ଆତଙ୍କବାଦୀମାନେ ଆକ୍ରମଣ କରିଥିଲେ । ଏହି ଆକ୍ରମଣରେ ୨ ଜଣ ଯବାନ ସହିଦ ହୋଇଛନ୍ତି ।

 

ବିଶ୍ୱରେ ପ୍ରଥମ ମୁଣ୍ଡ ନେଲା ଓମିକ୍ରନ

Swapna Ray
-
0
ବିଶ୍ୱରେ ପ୍ରଥମ ମୁଣ୍ଡ ନେଲା ଓମିକ୍ରନ

ବିଟ୍ରେନ : ସୁପର ମ୍ୟୁଟାଣ୍ଟ ଓମିକ୍ରନରେ ବ୍ରିଟେନରେ ପ୍ରଥମ ମୃତ୍ୟୁ । ଓମିକ୍ରନ ଷ୍ଟ୍ରେନରେ ପ୍ରଥମ ମୃତ୍ୟୁକୁ ନେଇ ସୂଚନା ଦେଇଛନ୍ତି ବ୍ରିଟେନ ପ୍ରଧାନମନ୍ତ୍ରୀ ବୋରିସ୍ ଜନସନ । ଦେଶରେ କରୋନା ମାମଲା ବୃଦ୍ଧି ପାଉଥିବା ବେଳେ ଓମିକ୍ରନ ମାମଲା ମଧ୍ୟ ଦିନକୁ ଦିନ ବଢ଼ିବାରେ ଲାଗୁଛି । କରୋନାର ନୂଆ ଭାରିଆଣ୍ଟକୁ ନେଇ ବ୍ରିଟେନରେ ବୁଷ୍ଟର ଡୋଜ୍ ପ୍ରୋଗ୍ରାମ ଆରମ୍ଭ ହୋଇଥିବା ବେଳେ ପ୍ରଥମ ମୃତ୍ୟୁ ବିଶେଷଜ୍ଞଙ୍କ ଚିନ୍ତା ବଢ଼ାଇ ଦେଇଛି ।

ସର୍ବାଧିକ ଥର ମ୍ୟୁଟେସନ ହୋଇଥିବା ଏହି ଷ୍ଟ୍ରେନରେ ପ୍ରଥମ ମୃତ୍ୟୁ ହେବା ପରେ ସମସ୍ତେ ଏହାକୁ ନେଇ ସତର୍କ ରହିବାକୁ ପରାମର୍ଶ ଦେଇଛନ୍ତି ବୋରିସ୍ । ଓମିକ୍ରନ ଆକ୍ରାନ୍ତଙ୍କ କ୍ଷେତ୍ରରେ ଅତ୍ୟଧିକ ଲକ୍ଷଣ ଦେଖାଯାଉ ନଥିବାରୁ ଏହାକୁ କମ୍ ମାରାତ୍ମକ ବୋଲି ଭାବିବା ଠିକ୍ ନୁହେଁ । ୧୮ ବର୍ଷରୁ ଉର୍ଦ୍ଧ୍ୱ ସମସ୍ତ ବ୍ୟକ୍ତି ବୁଷ୍ଟର ଡୋଜ୍ ନେବା ସହ କରୋନା କଟକଣା ପାଳନ କରିବାକୁ ବ୍ରିଟେନ ପ୍ରଧାନମନ୍ତ୍ରୀ ପରାମର୍ଶ ଦେଇଛନ୍ତି । ସେପଟେ ବ୍ରିଟେନରେ ନୂଆ ଭାରିଆଣ୍ଟ ଅତି ଭୟଙ୍କର ସ୍ଥିତି ଆଣିପାରେ ବୋଲି ଆଶଙ୍କା କରିଛନ୍ତି ସ୍ୱାସ୍ଥ୍ୟ ବିଶେଷଜ୍ଞ ।

ଆଗାମୀ କିଛି ମାସ ମଧ୍ୟରେ ଆକ୍ରାନ୍ତଙ୍କ ସଂଖ୍ୟା ବଢ଼ିବା ସହ ହସ୍ପିଟାଲରେ ଭର୍ତ୍ତି ହେବା ଆକ୍ରାନ୍ତଙ୍କ ସଂଖ୍ୟା ବି ବୃଦ୍ଧି ପାଇବ ବୋଲି ନିକଟରେ କରାଯାଇଥିବା ଏକ ଷ୍ଟଡିରୁ ଜଣାପଡ଼ିଛି । ସ୍ଥିତି ବିଗିଡ଼ିବା ପୂର୍ବରୁ ଆବଶ୍ୟକ ପଦକ୍ଷେପ ଗ୍ରହଣ କରାନଗଲେ ଆସନ୍ତା ଏପ୍ରିଲ ସୁଦ୍ଧା ଓମିକ୍ରନ ଭାରିଆଣ୍ଟ ମୃତକଙ୍କ ସଂଖ୍ୟା ୨୫ରୁ ୭୫ହଜାର ଛୁଇଁପାରେ ବୋଲି କହିଛି ଲଣ୍ଡନ ସ୍କୁଲ ଅଫ୍ ହାଇଜିନ୍ ଆଣ୍ଡ ଟ୍ରପିକାଲ ମେଡିସିନ । ଅନ୍ୟଦେଶ ତୁଳନାରେ ବ୍ରିଟେନରେ ଓମିକ୍ରନ ଭରିଆଣ୍ଟ ଅଧିକ ଲୋକଙ୍କୁ ସଂକ୍ରମିତ କରୁଛି ।  ପ୍ରତିଦିନ ୬ଶହରୁ ଉର୍ଦ୍ଧ୍ୱ ଆକ୍ରାନ୍ତ ଚିହ୍ନଟ ହେଉଛନ୍ତି

ମୋଦିଙ୍କୁ ଅଖିଳେଶଙ୍କ କଟାକ୍ଷ: ‘ଶେଷ ସମୟ ପାଇଁ କାଶୀଠାରୁ ଭଲ ସ୍ଥାନ ନାହିଁ’

Santosh Kumar Sahoo
-
0
ମୋଦିଙ୍କୁ ଅଖିଳେଶଙ୍କ କଟାକ୍ଷ: ‘ଶେଷ ସମୟ ପାଇଁ କାଶୀଠାରୁ ଭଲ ସ୍ଥାନ ନାହିଁ’

ଲକ୍ଷ୍ନୌ: ସୋମବାର ଉତ୍ତରପ୍ରଦେଶର ବାରଣାସୀରେ ଉଦଘାଟନ ହୋଇଛି ଐତିହାସକ କାଶୀ ବିଶ୍ୱନାଥ କରିଡର । ଏହି ଐତିହାସିକ କାଶୀ ବିଶ୍ୱନାଥ ଐତିହ କରିଡରକୁ ପ୍ରଧାନମନ୍ତ୍ରୀ ମୋଦୀ ଉଦଘାଟନ କରିଛନ୍ତି । ତେବେ ପ୍ରଧାନମନ୍ତ୍ରୀଙ୍କ ବାରଣାସୀ ଗସ୍ତକୁ ନେଇ କଟାକ୍ଷ କରିଛନ୍ତି ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଯାଦବ । ଅଖିଳେଶ କହିଛନ୍ତି କି ଶେଷ ସମୟରେ କାଶୀଠାରୁ ଭଲ ସ୍ଥାନ ଆଉ କିଛି ନାହିଁ । ସେଥିପାଇଁ ପ୍ରଧାନମନ୍ତ୍ରୀ ଗୋଟିଏ ମାସ ପରିବର୍ତ୍ତେ ୩ ମାସ ବନାରସରେ ରୁହନ୍ତୁ ବୋଲି କହିଛନ୍ତି ଅଖିଳେଶ ।

ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ କହିଛନ୍ତି କି ମୋଦି ସରକାର ଚାଷୀ ଓ ଶିଖମାନଙ୍କ ଭୟରେ ଏବଂ ଆଗାମୀ ଦିନରେ ହେବାକୁ ଥିବା ୟୁପି ଓ ପଞ୍ଜାବ ନିର୍ବାଚନକୁ ଦୃଷ୍ଟିରେ ରଖି କୃଷି ଆଇନ ପ୍ରତ୍ୟାହାର କରିନେଇଛନ୍ତି । ଯଦି ଏହି ଆଇନକୁ ପୂର୍ବରୁ ପ୍ରତ୍ୟାହାର କରିନେଇଥାନ୍ତେ ତେବେ ୭୦୦ ଚାଷୀ ମୃତ୍ୟୁ ବରଣ କରିନଥାନ୍ତେ । ଯଦି ୟୁପିରେ ସମାଜବାଦୀ ପାର୍ଟିର ସରକାର ଆସିବ ତେବେ ଏହି ଆନ୍ଦୋଳନରେ ସହିଦ ହୋଇଥିବା ଚାଷୀଙ୍କୁ ୨୫ ଲକ୍ଷ ସାହାଯ୍ୟ ମିଳିବ । ବିଜେପି ପାଇଁ କୃଷକମାନେ ଗୁରୁତ୍ୱପୂର୍ଣ୍ଣ ନୁହଁନ୍ତି ତାଙ୍କ ପାଇଁ ଭୋଟ ହିଁ ସବୁଠାରୁ ମହତ୍ୱପୂର୍ଣ୍ଣ ବୋଲି କହିଥିଲେ ଅଖିଳେଶ ଯାଦବ ।

ଅଖିଳେଶ ଆହୁରି କହିଛନ୍ତି କି ବିଗତ ଦିନରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଇଟଓ୍ୱାରେ ଯେଉଁ କାର୍ଯ୍ୟର ଉଦଘାଟନ କରିଥିଲେ ସେ ସବୁ ସପା ସରକାର ସମୟରେ ହୋଇଥିଲା । ସେହିପରି ଯେଉଁସବୁ ଏକ୍ସପ୍ରେସଓ୍ୱ ମଧ୍ୟ ନିର୍ମାଣ କରାଯାଉଛି ତାହା ମଧ୍ୟ ସପା କାର୍ଯ୍ୟକାଳ ମଧ୍ୟରେ ହୋଇଥିଲା । ବିଜେପି ଆସିବା ପରଠାରୁ ବିକାଶ ବନ୍ଦ ହୋଇଯାଇଛି ବୋଲି କହିଛନ୍ତି ଅଖିଳେଶ ଯାଦବ । ସେ ଆହୁରି କହିଛନ୍ତି କି ବର୍ତ୍ତମାନ ବିଦ୍ୟୁତ୍ ବିଲ୍ ମହଙ୍ଗା ହୋଇଛି । ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟ ନାଥ ଏଟାଠାରେ ଥିବା ବିଦ୍ୟୁତ କେନ୍ଦ୍ରର କାର୍ଯ୍ୟ ସମାପ୍ତି ହୋଇ ନଥିବାରୁ ମୁଖ୍ୟମନ୍ତ୍ରୀ ଏହି ବିଜୁଳି କାରଖାନାର ନାଁ ନେଉ ନାହାନ୍ତି । ସରକାର ଏଟାୱାରେ ଭେଦଭାବ କରିଛନ୍ତି। ଏଠାରେ ସମସ୍ତ ବିକାଶମୂଳକ କାର୍ଯ୍ୟ ବନ୍ଦ ହୋଇଯାଇଛି । ଚାଷୀ ସାର ପାଇଁ ଧାଡିରେ ଛିଡା ହୋଇଛି | ସରକାର ଏହାର ଉତ୍ତର ଦେବାକୁ ସକ୍ଷମ ନୁହଁନ୍ତି, ଚାଷୀଙ୍କୁ ସାର ଏବଂ ବିଦ୍ୟୁତ୍ ଶସ୍ତା ଦରକାର କିନ୍ତୁ ସରକାର ଆବଶ୍ୟକତା ପୂରଣ କରିବାରେ ସକ୍ଷମ ନୁହଁନ୍ତି ବୋଲି କହିଛନ୍ତି ଅଖିଳେଶ ଯାଦବ ।

 

ଆଘାତ କାରଣରୁ ଦକ୍ଷିଣ ଆଫ୍ରିକା ଗସ୍ତରୁ ବାଦ୍ ପଡ଼ିଲେ ରୋହିତ

Santosh Kumar Sahoo
-
0
ଆଘାତ କାରଣରୁ ଦକ୍ଷିଣ ଆଫ୍ରିକା ଗସ୍ତରୁ ବାଦ୍ ପଡ଼ିଲେ ରୋହିତ

ନୂଆଦିଲ୍ଲୀ: ଆସନ୍ତା ଡିସେମ୍ବର ୨୬ରୁ ଆରମ୍ଭ ହେବାକୁ ଯାଉଛି ଭାରତ-ଦକ୍ଷିଣ ଆଫ୍ରିକା ଟେଷ୍ଟ ସିରିଜ୍ । ଏହି ସିରିଜ ପାଇଁ ଡିସେମ୍ବର ୧୭ରେ ଦକ୍ଷିଣ ଆଫ୍ରିକା ଗସ୍ତରେ ଯିବ ଟିମ୍ ଇଣ୍ଡିଆ । ତେବେ ଏହି ଗସ୍ତ ପୂର୍ବରୁ ଭାରତକୁ ଲାଗିଛି ଏକ ବଡ଼ ଝଟକା । ମୁମ୍ବାଇରେ ଅଭ୍ୟାସ କରିବା ସମୟରେ ଭାରତୀୟ ଟେଷ୍ଟ ଦଳର ଉପ ଅଧିନାୟକ ରୋହିତ ଶର୍ମା ଆଘାତର ଶିକାର ହୋଇଥିଲେ । ବ୍ୟାଟିଂ କରୁଥିବା ସମୟରେ ରୋହିତଙ୍କ ହାତରେ ଆଘାତ ଲାଗିଛି । ଯାହା ଫଳରେ ଦକ୍ଷିଣ ଆଫ୍ରିକାରେ ହେବାକୁ ଥିବା ତିନି ଟିକିଆ ଟେଷ୍ଟ ସିରିଜରୁ ବାଦ୍ ପଡ଼ିଛନ୍ତି ରୋହିତ ।

ଏକ ରିପୋର୍ଟ ଅନୁସାରେ ରବିବାର ମୁମ୍ବାଇରେ ଟିମର କିଛି ଖେଳାଳି ଅଭ୍ୟାସ କରୁଥିଲେ । ଏହି ସମୟରେ ନେଟ୍ସରେ ବ୍ୟାଟିଂ କରିବାକୁ ଆସିଥିଲେ ରୋହିତ ଶର୍ମା । ବ୍ୟାଟିଂ କରୁଥିବା ସମୟରେ ଭାରତୀୟ ଦଳର ଥ୍ରୋ-ଡାଉନ ଏକ୍ସପୋର୍ଟ ରଘୁଙ୍କ ଏକ ବଲ ରୋହିତଙ୍କ ହାତରେ ଲାଗିଥିଲା । ଆଘାତ ଫଳରେ କିଛି ସମୟ ବ୍ୟାଟିଂ କରିଥିଲେ ରୋହିତ, କିନ୍ତୁ ପରବର୍ତ୍ତୀ ସମୟରେ ଆଉ ବ୍ୟାଟିଂ କରିବାକୁ ନେଟ୍ସକୁ ଆସିଲେ ନାହିଁ । ହାତରେ ଆଘାତ ଲାଗିବାରୁ ରୋହିତ ଦକ୍ଷିଣ ଆଫ୍ରିକା ବିପକ୍ଷରେ ହେବାକୁ ଥିବା ତିନିଟିକିଆ ଟେଷ୍ଟ ସିରିଜରୁ ବାଦ୍ ପଡ଼ିଛନ୍ତି । ଏନେଇ ବିସିସିଆଇ ଟ୍ୱିଟ କରି ସୂଚନା ଦେଇଛି । ଏହି ଟେଷ୍ଟ ସିରିଜରେ ରୋହିତଙ୍କ ସ୍ଥାନରେ ପ୍ରିୟଙ୍କ ପଞ୍ଛଲଙ୍କୁ ସୁଯୋଗ ମିଳିଛି ।

 

View this post on Instagram

 

A post shared by Rohit Sharma (@rohitsharma45)


ସୂଚନା ଅନୁସାରେ ଆସନ୍ତା ଡିସେମ୍ବର ୨୬ରୁ ଦକ୍ଷିଣ ଆଫ୍ରିକା ବିପକ୍ଷରେ ହେବାକୁ ଥିବା ଟେଷ୍ଟ ସିରିଜ୍ ପାଇଁ ଦଳ ଘୋଷଣା ସରିଛି । ଦକ୍ଷିଣ ଆଫ୍ରିକା ଗସ୍ତରେ ଆଜିଙ୍କେ ରାହାଣେଙ୍କ ସ୍ଥାନରେ ରୋହିତ ଶର୍ମା ଉପ-ଅଧିନାୟକ ଭାବରେ ନିଯୁକ୍ତି ହୋଇଥିଲେ । ଡିସେମ୍ବର ୨୬ରୁ ଆରମ୍ଭ ହେବାକୁ ଥିବା ଟେଷ୍ଟ ସିରିଜ୍ ପାଇଁ ଡିସେମ୍ବର ୧୬ରୁ ଭାରତୀୟ ଦଳ ଦକ୍ଷିଣ ଆଫ୍ରିକା ଗସ୍ତ କରିବ । ଏହି ସିରିଜରେ ତିନୋଟି ଟେଷ୍ଟ ଓ ତିନୋଟି ଦିନିକିଆ ମ୍ୟାଚ ଖେଳାଯିବ ।

 

 

ଚାରି ମହଲାରୁ ଡେଇଁ ମହିଳାଙ୍କ ଆତ୍ମହତ୍ୟା

Swapna Ray
-
0
ଚାରି ମହଲାରୁ ଡେଇଁ ମହିଳାଙ୍କ ଆତ୍ମହତ୍ୟା

ଦିଲ୍ଲୀ : ଦିଲ୍ଲୀର ପ୍ରଶାନ୍ତ ବିହାର ଅଞ୍ଚଳରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ଚାରି ମହଲା ଛାତରୁ ଡେଇଁ ଜଣେ ମହିଳା ଆତ୍ମହତ୍ୟା କରିଥିବା ସୂଚନା ମିଳିଛି । ଏହି ମହିଳା ଜଣକ ଏକ ବିୟର ବାରରେ କାମ କରୁଥିବା ବେଳେ ବାରର ମାଲିକ ମହିଳା ଜଣଙ୍କୁ ଏଠାରେ ଡ୍ୟାନ୍ସ କରିବାକୁ ବାଧ୍ୟ କରୁଥିଲେ । ଏହି କାରଣରୁ ମହିଳା ଜଣକ ବିୟର ବାରର ୪ ମହଲାରୁ ଡେଇଁ ଆତ୍ମହତ୍ୟା କରିଥିବା ପୋଲିସ କହିଛି । ମୃତ ମହିଳା ଜଣକଙ୍କ ନାଁ ରାକ୍ଷୀ ବୋଲି ଜଣାପଡ଼ିଥିବା ବେଳେ ତାଙ୍କୁ ୨୧ ବର୍ଷ ବୟସ ।

ସୂଚନାକ୍ରମେ ବୁଧବିହାରରେ ବାସ କରୁଥିବା ରାକ୍ଷୀ ଏବଂ ତାଙ୍କ ଭଉଣୀ ଉଭୟେ ନର୍ଥ ଏକ୍ସ ମଲର ଏକ ବିୟର ବାରରେ କାମ କରୁଥିଲେ । ବାରର ପାର୍ଟି ଆୟୋଜକ ସହ ରାକ୍ଷୀଙ୍କର ଝଗଡ଼ା ହୋଇଥିବା କଥା ମଧ୍ୟ କୁହାଯାଉଛି । ଅଚାନକ ଗତକାଲି ରାକ୍ଷୀ ବାରର ୪ର୍ଥ ମହଲାରୁ ଡେଇଁ ପଡ଼ିଥିବା ସ୍ଥାନୀୟ ଲୋକେ କହିଥିଲେ । ଏହାପରେ ତାଙ୍କୁ ସଙ୍ଗେ ସଙ୍ଗେ ପାଖ ଡାକ୍ତରଖାନାକୁ ନିଆଯାଇଥିଲା ମାତ୍ର ସେଠାରେ ତାଙ୍କର ମୃତ୍ୟୁ ହୋଇଥିଲା ।

ଘଟଣାସ୍ଥଳରେ ପୋଲିସ ପହଞ୍ଚି ରାକ୍ଷୀଙ୍କ ଭଉଣୀଙ୍କୁ ଏ ବାବଦରେ ପଚରାଉଚରା କରିଥିବା ବେଳେ ସେଠାରେ ଲାଗିଥିବା ସମସ୍ତ ସିସିଟିଭିକୁ ମଧ୍ୟ ଯାଞ୍ଚ କରିଛି । ବାର ମାଲିକ ରାକ୍ଷୀଙ୍କୁ ବାରରେ ଡ୍ୟାନ୍ସ କରିବାକୁ ବାଧ୍ୟ କରୁଥିଲେ । ଏଥିପାଇଁ ରାକ୍ଷୀ ସବୁବେଳେ ମାନସିକ ଚାପରେ ରହୁଥିଲେ । ଏଥିପାଇଁ ସେ ଆତ୍ମହତ୍ୟା କରିଥିବା ଦିଲ୍ଲୀ ପୋଲିସ ସୂଚନା ଦେଇଛି । ବାରରେ କାମ କରୁଥିବା ସମସ୍ତ କର୍ମଚାରୀଙ୍କୁ ପୋଲିସ ଅଟକ ରଖି ପଚରାଉଚରା କରିବା ସହ ମାମଲାର ତଦନ୍ତ ଚଳାଇଛି ।

ସଞ୍ଜୟ ରାଉତଙ୍କ ନାଁରେ ମାମଲା ରୁଜୁ; ବିଜେପି ନେତ୍ରୀ ଦିପ୍ତି ଭରଦ୍ୱାଜ ଆଣିଲେ ସଙ୍ଗୀନ ଅଭିଯୋଗ

Santosh Kumar Sahoo
-
0
ସଞ୍ଜୟ ରାଉତଙ୍କ ନାଁରେ ମାମଲା ରୁଜୁ; ବିଜେପି ନେତ୍ରୀ ଦିପ୍ତି ଭରଦ୍ୱାଜ ଆଣିଲେ ସଙ୍ଗୀନ ଅଭିଯୋଗ

ନୂଆଦିଲ୍ଲୀ: ପୁଣି ଏକ ବିବାଦରେ ପଡ଼ିଛନ୍ତି ଶିବସେନା ସାଂସଦ ସଞ୍ଜୟ ରାଉତ । ଏକ ଟେଲିଭିଜନ ସାକ୍ଷାତକାରରେ ବିଜେପି ନେତାଙ୍କ ବିରୋଧରେ ଅଶାଳୀନ ମନ୍ତବ୍ୟ ଦେଇ ଫସିଛନ୍ତି ସଞ୍ଜୟ । ଏହି ଘଟଣାରେ ଭାରତୀୟ ଜନତା ପାର୍ଟିର ମହାସଚିବ ଦିପ୍ତି ରାଓ୍ୱତ ଭରଦ୍ୱାଜ ଦିଲ୍ଲୀର ମଣ୍ଡାଓ୍ୱାଲି ଥାନାରେ ଅଭିଯୋଗ କରିଥିଲେ । ଏହି ଅଭିଯୋଗ ଆଧାରରେ ଦିଲ୍ଲୀ ପୋଲିସ ସଞ୍ଜୟ ରାଉତଙ୍କ ବିରୋଧରେ ଏକ ମାମଲା ରୁଜୁ କରିଛି ।

ଅଭିଯୋଗ ଅନୁସାରେ ଡିସେମ୍ବର ୯ରେ ସଞ୍ଜୟ ରାଉତଙ୍କ ସାକ୍ଷାତକାର ଦୁଇଟି ଟେଲିଭିଜନରେ ପ୍ରସାରିତ ହୋଇଥିଲା । ସେ ଏହି ସାକ୍ଷାତକାରରେ ଭାରତୀୟ ଜନତା ପାର୍ଟିଙ୍କ କାର୍ଯ୍ୟକର୍ତ୍ତାଙ୍କ ବିରୋଧରେ ଖରାପ ଶବ୍ଦ ବ୍ୟବହାର କରିଥିଲେ । ମହିଳା କାର୍ଯ୍ୟକର୍ତ୍ତାଙ୍କ ବିରୋଧରେ ମଧ୍ୟ ଅଶାଳୀନ ମନ୍ତବ୍ୟ ବ୍ୟବହାର କରିଛନ୍ତି ସଞ୍ଜୟ ।  ଏହି ଘଟଣା ଫଳରେ ୯ ଡିସେମ୍ବରରେ ଦିପ୍ତି ଭରଦ୍ୱାଜ ଦିଲ୍ଲୀର ମଣ୍ଡାଓ୍ୱାଲି ଥାନାରେ ଅଭିଯୋଗ କରିଥିଲେ । ଏହି ଅଭିଯୋଗ ଆଧାରରେ ଏବେ ପୋଲିସ ସଞ୍ଜୟ ରାଉତଙ୍କ ବିରୋଧରେ ମାମଲା ରୁଜୁ କରି ତଦନ୍ତ କରୁଛି ।

ଏହି ମାମଲାରେ ପୋଲିସ ଧାରା ୫୦୦ ଏବଂ ଧାରା ୫୦୯ ଅନୁସାରେ FIR ରୁଜୁ କରିଛି । ସଞ୍ଜୟ ରାଉତଙ୍କ ବିରୋଧରେ ମହିଳା ସମାଜକୁ ଅପମାନିତ ଓ ମହିଳାଙ୍କ ପ୍ରତି ଖରାପ ଶବ୍ଦ ବ୍ୟବହାର କରିବା ଅଭିଯୋଗରେ ମାମଲା ରୁଜୁ କରିଛି । ଦିପ୍ତି ରାଓ୍ୱତ ଭରଦ୍ୱାଜ ଅଭିଯୋଗ କରିବା ସମୟରେ ପୋଲିସକୁ ଟେଲିଭିଜନରେ ପ୍ରସାରିତ ହୋଇଥିବା ଭିଡିଓ କ୍ଲିପ୍ ମଧ୍ୟ ଦେଇଥିଲେ । ଯେଉଁଥିରେ ସେ ଖରାପ ଶବ୍ଦ ବ୍ୟବହାର କରୁଛନ୍ତି ।

ସନ୍ଧ୍ୟା ହେଲେ ଗାଁ ଛାଡ଼ନ୍ତି, ଗଛ ଉପରେ ଆଶ୍ରୟ ନେଉଛନ୍ତି ଲୋକେ

Tanmaya Reddy
-
0
ସନ୍ଧ୍ୟା ହେଲେ ଗାଁ ଛାଡ଼ନ୍ତି, ଗଛ ଉପରେ ଆଶ୍ରୟ ନେଉଛନ୍ତି ଲୋକେ

ଢେଙ୍କାନାଳ: ସଦର ରେଞ୍ଜ ଗୋବିନ୍ଦପୁର ଗ୍ରାମରେ ବଢୁଛି ହାତୀ ଭୟ । ରାତି ହେଲେ ଜଙ୍ଗଲରୁ ହାତୀ ପଲ୍ଲ ଗାଁ ମୁହାଁ ହେଉଛନ୍ତି । ଘରଦ୍ୱାର ଭାଙ୍ଗିବା ସହ ଜମିରେ ପଶି ନଷ୍ଟ କରୁଛନ୍ତି ଫସଲ । ସଂଧ୍ୟାହେଲେ ଭୟରେ ଗାଁର ତାଟିକବାଟ ପଡ଼ି ଯାଉଥିବାବେଳେ ଅନେକ ଘର ଛାଡି ବିଲରେ ଥିବା ଗଛ ଉପରେ ମଞ୍ଚା କରି ରାତି ବିତାଉଛନ୍ତି ।

ରାତି ବଢ଼ିଲେ ବଢୁଛି ଆତଙ୍କ । ଘନ ଅନ୍ଧକାରରେ ଶୁଭୁଛି ହାତୀର ଗର୍ଜନ । ସଂଧ୍ୟା ନଇଁଲେ ଶୂନସାନ୍ ଗାଁ ଦାଣ୍ଡ । ମଞ୍ଚାରେ ବିତୁଛି ଜୀବନ । ଏମିତି ଦୃଶ୍ୟ ଦେଖିବାକୁ ଗୋବିନ୍ଦପୁର ଗ୍ରାମରେ । ଢେଙ୍କାନାଳ ଠାରୁ ୭ କିଲୋମିଟର ଦୂରରେ ଥିବା ଏହି ଗାଁରେ ଦିନକୁ ଦିନ ହାତୀଙ୍କ ଉପଦ୍ରବ ବଢିବାରେ ଲାଗିଛି । ସୂର୍ଯ୍ୟ ବୁଡିବା ପରେ ଗାଁ ମୁହାଁ ହେଉଛନ୍ତି ହାତୀ ପଲ । ଘରଦ୍ୱାର ଭାଙ୍ଗିବା ସହ ଧାନ ଚାଉଳ ଖାଇ ଯାଉଛନ୍ତି । ଏହି ହାତୀଙ୍କ ଉପଦ୍ରବ ଯୋଗୁଁ ଅଧିକ କ୍ଷତିଗ୍ରସ୍ତ ହୁଅନ୍ତି ଚାଷୀକୂଳ ।

ବିଲରେ ପଶି ଫସଲ ଖାଇବା ସହ ଏହାକୁ ପାଦରେ ଦଳି ନଷ୍ଟ କରୁଛନ୍ତି ହାତୀପଲ । ଘରୁ ଲୋକଙ୍କୁ ଟାଣି ଆଣି କଚାଡି ମାରୁଛି । ତେଣୁ ଭୟରେ ଲୋକେ ଗଛ ଉପରେ ମଞ୍ଚା ବାନ୍ଧି ରାତି ବିତାଉଛନ୍ତି । କିଛି ଯୁବକ ୟୁଟ୍ୟୁବ ଦେଖି ତିଆରି କରିଥିବା ବିଶାଳ ଶବ୍ଦ କରୁଥିବା ପ୍ଲାଷ୍ଟିକ୍ ଗନରେ ହାତୀଙ୍କୁ ଘଉଡାଇବାକୁ ଚେଷ୍ଟା କରୁଛନ୍ତି । ସେପଟେ ହାତୀ ଉପଦ୍ରବ ଘଟଣାକୁ ସ୍ୱୀକାର କରିଛି ବନ ବିଭାଗ । ହାତୀଙ୍କୁ ଘଉଡାଇବାକୁ ଚେଷ୍ଟା କରାଯାଉଥିବା ଡିଏଫଓ ସୂଚନା ଦେଇଛନ୍ତି ।

‘ଜଓ୍ୱାଦ’ ପ୍ରଭାବିତ ଅଞ୍ଚଳ ବୁଲି ଦେଖିଲେ କେନ୍ଦ୍ରୀୟ ଟିମ୍: ସପ୍ତାହକ ମଧ୍ୟରେ ରିପୋର୍ଟ ପ୍ରଦାନ

Tanmaya Reddy
-
0
‘ଜଓ୍ୱାଦ’ ପ୍ରଭାବିତ ଅଞ୍ଚଳ ବୁଲି ଦେଖିଲେ କେନ୍ଦ୍ରୀୟ ଟିମ୍: ସପ୍ତାହକ ମଧ୍ୟରେ ରିପୋର୍ଟ ପ୍ରଦାନ

ଭୁବନେଶ୍ୱର: କେତେ କ୍ଷୟକ୍ଷତି କରିଛି ଜଓ୍ୱାଦ? ବାତ୍ୟାରେ କ୍ଷତିଗ୍ରସ୍ତ ଅଞ୍ଚଳ ବୁଲି ଦେଖିଲା କେନ୍ଦ୍ରୀୟ ଟିମ୍‌ । କ୍ଷେତ୍ର ପରିଦର୍ଶନ ପରେ ମୁଖ୍ୟ ଶାସନ ସଚିବ, ଏସଆରସି, କୃଷି ବିଭାଗ ପ୍ରମୁଖ ସଚିବଙ୍କ ସହ ଆଲୋଚନା କରିଛନ୍ତି। ଏହାପରେ ଦିଲ୍ଲୀ ଫେରିଛି କେନ୍ଦ୍ରୀୟ ଟିମ । ବାତ୍ୟା ଜନିତ ଲଗାଣ ବର୍ଷାରେ ଚାଷୀଙ୍କର ବ୍ୟାପକ ଫସଲ ନଷ୍ଟ ହୋଇଥିବା କେନ୍ଦ୍ରୀୟ ଟିମ୍‌ ସଦସ୍ୟ ଡକ୍ଟର ମାନସ କୁମାର ସିହ୍ନା କହିଛନ୍ତି । ଧାନ ଫସଲ ସମ୍ପୂର୍ଣ୍ଣ ଉଜୁଡ଼ି ଯାଇଛି । ଚିନାବାଦାମ ପରି ଅର୍ଥକରୀ ଫସଲ, ପନିପରିବା ବିଲରେ ପଚିଯାଇଛି । ଚାଷୀଙ୍କୁ କିପରି ଉଚିତ୍‌ ସହାୟତା ମିଳିବ, କେନ୍ଦ୍ରୀୟ ଟିମ କେନ୍ଦ୍ର ସରକାରଙ୍କୁ ସୁପାରିସ କରିବ ।

ଏହାସହ ଦୁର୍ବିପାକ ସମୟରେ ଫସଲ ନଷ୍ଟ ରୋକିବାକୁ ଦୀର୍ଘ ମିଆଦୀ ପଦକ୍ଷେପ ନେବାକୁ କୁହାଯାଇଛି । ଜମିରୁ ଜଳ ନିଷ୍କାସନ ଯେପରି ସୁବିଧାରେ ହୋଇପାରିବ, ସେଥିଲାଗି କ୍ଷେତ୍ରସ୍ତରରେ ପଦକ୍ଷେପ ନିଆଯିବ। ଆବଶ୍ୟକସ୍ଥଳେ ରିଲିଫ କୋଡ୍‌ ସଂଶୋଧନ ପାଇଁ ପଦକ୍ଷେପ ନିଆଯାଇପାରେ । କେନ୍ଦ୍ରୀୟ ଟିମ କ୍ଷୟକ୍ଷତି ଆକଳନ କରି ସପ୍ତାହକ ମଧ୍ୟରେ ସ୍ୱରାଷ୍ଟ୍ର ବିଭାଗକୁ ରିପୋର୍ଟ ପ୍ରଦାନ କରିବ । ଲଗାଣ ବର୍ଷା ଯୋଗୁଁ ୬ଟି ଜିଲ୍ଲା, ପୁରୀ, ଗଞ୍ଜାମ, ଜଗତସିଂହପୁର, କଟକ, ଯାଜପୁର, କେନ୍ଦ୍ରାପଡ଼ାରେ ଚାଷୀଙ୍କର ବ୍ୟାପକ କ୍ଷୟକ୍ଷତି ହୋଇଛି ।

ଏଥିସହିତ ପଢ଼ନ୍ତୁ: ଚିତ୍ତ ରଞ୍ଜନଙ୍କ ପରିବାର ଲୋକଙ୍କ ଅଭିଯୋଗ: କହିଲେ, ଧାର ଟଙ୍କାକୁ ନେଇ ହତ୍ୟାକାଣ୍ଡ

ଅଧିନାୟକ ହେବା ପରେ ପ୍ରଥମ ଥର ମୁହଁ ଖୋଲିଲେ ରୋହିତ, ବିରାଟଙ୍କୁ ନେଇ କହିଲେ ଏମିତି କିଛି…

Santosh Kumar Sahoo
-
0
ଅଧିନାୟକ ହେବା ପରେ ପ୍ରଥମ ଥର ମୁହଁ ଖୋଲିଲେ ରୋହିତ, ବିରାଟଙ୍କୁ ନେଇ କହିଲେ ଏମିତି କିଛି…

ନୂଆଦିଲ୍ଲୀ: ଗତ ବୁଧବାର ବିସିସିଆଇ ଏକ ବଡ଼ ନିଷ୍ପତି ନେଇଛି । ଭାରତୀୟ କ୍ରିକେଟ ଦଳର ଦିନିକିଆ ଅଧିନାୟକ ପଦରୁ ବିରାଟ କୋହଲିଙ୍କୁ ବାହାର କରି ତାଙ୍କ ସ୍ଥାନରେ ରୋହିତ ଶର୍ମାଙ୍କୁ ଅଧିନାୟକ ଭାବରେ ନିଯୁକ୍ତି କରିଛି । ଚଳିତ ବର୍ଷ ଦୁବାଇରେ ହୋଇଥିବା ଟି-୨୦ ବିଶ୍ୱକପ ପୂର୍ବରୁ ବିରାଟ କୋହଲି ଘୋଷଣା କରିଥିଲେ କି ସେ ଟି-୨୦ ବିଶ୍ୱକପ ପରେ ଟି-୨୦ରେ ଆଉ ଅଧିନାୟକତ୍ୱ କରିବେ ନାହିଁ। ଟି-୨୦ରୁ ଅଧିନାୟକ ପଦ ଛାଡିବା ପରେ ଏବେ ଦିନିକିଆରୁ ମଧ୍ୟ ଯାଇଛି ବିରାଟଙ୍କ ଅଧିନାୟକ ପଦ । ଆଗାମୀ ଦକ୍ଷିଣ ଆଫ୍ରିକା ଗସ୍ତଠାରୁ ଦିନିକିଆରେ ଅଧିନାୟକତ୍ୱ ଭାର ତୁଲାଇବେ ରୋହିତ ଶର୍ମା ।

ରୋହିତ ଶର୍ମା ଅଧିନାୟକ ହେବା ପରେ ପ୍ରଥମ ଥର ପାଇଁ ପୂର୍ବତନ ଅଧିନାୟକ ବିରାଟ କୋହଲିଙ୍କୁ ନେଇ ମୁହଁ ଖୋଲିଛନ୍ତି । ରୋହିତ ଶର୍ମା ବିଶ୍ୱକପ, ରାହୁଲ ଦ୍ରାବିଡ ଓ ପୂର୍ବତନ ଅଧିନାୟକ ବିରାଟ କୋହଲିଙ୍କୁ ନେଇ ପ୍ରଥମ ଥର ପାଇଁ ମୁହଁ ଖୋଲିଛନ୍ତି । ନୂଆ କରି ଅଧିନାୟକ ହୋଇଥିବା ରୋହିତ ବିରାଟଙ୍କୁ ପ୍ରଶଂସା କରିବା ସହ ବ୍ୟାଟ୍ସମ୍ୟାନ ଭାବରେ ଦଳରେ ତାଙ୍କର ଗୁରୁତ୍ୱପୂର୍ଣ୍ଣ ଭୂମିକା ଥିବା କହିଛନ୍ତି । BCCIକୁ ଦେଇଥିବା ସାକ୍ଷାତକାରରେ ରୋହିତ କହିଥିଲେ କି ବିରାଟ ଚତ୍ମକାର ଭାବରେ ୫ ବର୍ଷ ଭାରତୀୟ ଦଳର ନେତୃତ୍ୱ ନେଇଥିଲେ । ବିରାଟ ଭାରତୀୟ ଦଳକୁ ଯେଉଁଠାରେ ପହଞ୍ଚାଇଛନ୍ତି ସେଠାରୁ ଆଉ ଦଳ ପଛକୁ ଫେରିବ ନାହିଁ । କୋହଲିଙ୍କ ନେତୃତ୍ୱରେ ଦଳରେ ଗୋଟିଏ ମାତ୍ର ଲକ୍ଷ୍ୟ ଥିଲା ତାହା ହେଉଛି କିପରି ବିଜୟ ଲାଭ କରାଯିବ ।

ଅଧିନାୟକ ରୋହିତ ଶର୍ମା କହିଛନ୍ତି କି ମୁଁ ବିରାଟ କୋହଲିଙ୍କ ସହ ବହୁତ କ୍ରିକେଟ ଖେଳିଛି । ଆମକୁ ଏକ ଦଳ ଭାବରେ ଆଗକୁ ବଢ଼ିବାକୁ ହେବ ଏବଂ ଉନ୍ନତି ମଧ୍ୟ କରିବାକୁ ପଡ଼ିବ ବୋଲି କହିଛନ୍ତି ରୋହିତ ଶର୍ମା । ଟି-୨୦ରେ ଅଧିନାୟକ ପଦ ପାଇବା ପରେ ମଧ୍ୟ ରୋହିତ ଶର୍ମା ପ୍ରତିକ୍ରିୟା ଦେଇଥିଲେ । ସେ କହିଥିଲେ କି ବିରାଟ କୋହଲି ବିଶ୍ୱର ସବୁଠାରୁ ଭଲ ବ୍ୟାଟ୍ସମ୍ୟାନଙ୍କ ମଧ୍ୟରେ ଅନ୍ୟତମ । କେବଳ ଜଣେ ଭଲ ବ୍ୟାଟ୍ସମ୍ୟାନ ନୁହଁ ଜଣେ ଭଲ ଲିଡର ମଧ୍ୟ । ବ୍ୟାଟ୍ସମ୍ୟାନ ଭାବରେ ଭାରତୀୟ ଦଳ ପାଇଁ ତାଙ୍କ ଭୂମିକା ଗୁରୁତ୍ୱପୂର୍ଣ୍ଣ ବୋଲି କହିଥିଲେ ରୋହିତ ଶର୍ମା ।

କରିନା କପୁରଙ୍କୁ କରୋନା, ସୁପରସ୍ପେଡର ଆଶଙ୍କା

Swapna Ray
-
0
କରିନା କପୁରଙ୍କୁ କରୋନା, ସୁପରସ୍ପେଡର ଆଶଙ୍କା

ମୁମ୍ବାଇ: ସାରା ଦେଶରେ କରୋନା ସଂକ୍ରମଣ ମାମଲା ବୃଦ୍ଧି ପାଉଥିବା ବେଳେ ଏବେ କରୋନାରେ ସଂକ୍ରମିତ ହେଲେ ବଲିଉଡ ଅଭିନେତ୍ରୀ କରୀନା କପୁର ଖାନ୍। ଗତ କିଛି ଦିନ ତଳେ ସାଉଥ୍ ଆକ୍ଟର କମଲ ହାସନ୍ କରୋନା ପଜିଟିଭ୍ ହୋଇଥିବା ବେଳେ ଏବେ ବଲିଉଡ ବେବୋ କରିନା କରୋନା ପଜିଟିଭ୍ । କରୋନାଙ୍କ ଟେଷ୍ଟ ରିପୋର୍ଟ ପଜିଟିଭ ଆସିଛି। ତାଙ୍କ ବ୍ୟତୀତ ଅଭିନେତ୍ରୀ ଅମୃତା ଅରୋରା ମଧ୍ୟ କରୋନା ପଜିଟିଭ ଚିହ୍ନଟ ହୋଇଛନ୍ତି।

ଦୁଇ ଦିନ ତଳେ କରିନା ଭଉଣୀ କରିସ୍ମା କପୁରଙ୍କ ସହ ଫିଲ୍ମ ନିର୍ମାତା କରଣ ଜୋହରଙ୍କ ଆୟୋଜିତ ଏକ ପାର୍ଟିରେ ଯୋଗ ଦେଇଥିଲେ। ଫିଲ୍ମ ‘କଭି ଖୁସି କଭି ଗମ୍‌’ର ୨୦ ବର୍ଷ ପୂର୍ତ୍ତି ଅବସରରେ ଏହି ପାର୍ଟି ଆୟୋଜନ କରାଯାଇଥିଲା । କରିନା ଏବଂ କରିସ୍ମାଙ୍କ ସମ୍ପର୍କରେ ଆସିଥିବା ବ୍ୟକ୍ତିଙ୍କୁ ଆରଟିପିସି ପରୀକ୍ଷା କରିବା ପାଇଁ ବିଏମସି ଆଦେଶ ଦେଇଛି । କରିନା କରୋନା ପଜିଟିଭ୍ ହୋଇଥିବା ନେଇ ଏଏନଆଇ ସୂଚନା ଦେଇଛି ।

କରିନା କପୁର ଏବଂ ଅମୃତା ଉଭୟଙ୍କ ମଧ୍ୟରେ ଭଲ ବନ୍ଧୁତା ଥିବା ସମସ୍ତେ ଜାଣନ୍ତି । ନିକଟରେ ଉଭୟେ କରଣ ଜୋହରଙ୍କ ଏହି ପାର୍ଟିର ଫଟୋ ନିଜ ସୋସିଆଲ ମିଡିଆ ଆକାଉଣ୍ଟରେ ସେୟାର କରିଥିବା ବେଳେ ଉଭୟେ ଆୟୋଜିତ ପାର୍ଟିରେ କରୋନା ନିୟମ ଉଲଙ୍ଘନ କରିଥିବା କଥା ସୂଚନା ମିଳିଛି । କେବଳ ଏତିକି ନୁହେଁ ଉଭୟ ସୁପରସ୍ପେଡର ହେବାର ଆଶଙ୍କା ରହିଥିବା କୁହାଯାଉଛି ।

1...4,9624,9634,964...8,105Page 4,963 of 8,105

Latest Stories

Location

Popular Tags

Odisha16659NANDIGHOSHA TV6043INDIA3284BHUBANESWAR3082BJD2151NandighoshaTv2066Naveen Patnaik1914PURI1744BJP1630

Contact us