କଟକ: କଟକ ଜିଲ୍ଲାର ଅଧାରୁ ଅଧିକ କଲେଜ କର୍ମଚାରୀଙ୍କ ଦରମା ବନ୍ଦ। ଆଇସିସି ରିପୋର୍ଟ ନଦେବାରୁ ପ୍ରଶାସନିକ କାର୍ଯ୍ୟାନୁଷ୍ଠାନ। ଆଇସିସି ରିପୋର୍ଟ ନ ଦେବା ପର୍ଯ୍ୟନ୍ତ ମିଳିବ ନାହିଁ ଦରମା। ଜିଲ୍ଲାରେ ଥିବା ୨୧୦ ମହାବିଦ୍ୟାଳୟ ଅଧ୍ୟକ୍ଷଙ୍କୁ ଆଇସିସି ରିପୋର୍ଟ ମଗା ଯାଇଥିଲା। କିଏ ଆଇସିସିରେ ରିପୋର୍ଟ କରିଛନ୍ତି ? ରିପୋର୍ଟ ଆସିବା ପରେ ଆଇସିସି ଘଟଣାର କ’ଣ ଅନୁଧ୍ୟାନ କରିଛି ? ଅଭିଯୋଗ କରିଥିବା ମହିଳାଙ୍କ ଯୋଗାଯୋଗ ଠିକଣା ସହ ଅନୁଷ୍ଠାନ ମୁଖ୍ୟଙ୍କ ହସ୍ତାକ୍ଷର ସହ ରିପୋର୍ଟ ମଗାଯାଇଥିଲା। ଅଧାରୁ କମ କଲେଜ ଚିଠିର ଉତ୍ତର ଦେଇ ପାରିନାହାନ୍ତି। ବାରମ୍ବାର ଜିଲା ପ୍ରଶାସନ ପକ୍ଷରୁ ଆଇସିସି ରିପୋର୍ଟ ମଗାଯାଇଥିଲା। କିନ୍ତୁ ରିପୋର୍ଟ ନ ଦେବାରୁ କାର୍ଯ୍ୟାନୁଷ୍ଠାନ ସ୍ଵରୂପ ସେମାନଙ୍କ ଦରମା ବନ୍ଦ କରାଯାଇଛି।
ହାଇୱା ଧକ୍କାରେ ଅବସରପ୍ରାପ୍ତ କିରାଣୀ ମୃତ: କ୍ଷତିପୂରଣ ଦାବିରେ ରାସ୍ତା ଅବରୋଧ
ହାଇୱା ଧକ୍କାରେ ଅବସରପ୍ରାପ୍ତ କିରାଣୀ ମୃତ । ବଲାଙ୍ଗୀର ଜାତୀୟ ରାଜପଥ 57 ପୁଇଁତଳା ଛକ ନିକଟରେ ଦୁର୍ଘଟଣା। ମୃତକ ହେଲେ ସର୍ବେଶ୍ଵର ମୁଗ୍ରୀ। ସାଇକେଲରେ ଯାଉଥିବା ସମୟରେ ଚଢିଗଲା ହାଇୱା । ମୃତଦେହ ଜବତ କରି ତଦନ୍ତ ଆରମ୍ଭ କରିଛି ପୁଇଁତଳା ପୋଲିସ । କ୍ଷତିପୂରଣ ଦାବୀରେ NH 57 ଅବରୋଧ କଲେ ପରିବାର ଲୋକେ ଓ ସ୍ଥାନୀୟ ବାସିନ୍ଦା । ଉଭୟ ପାର୍ଶ୍ଵରେ ଶହଶହ ଯାନବାହାନ ଅଟକି ରହିଛି ।
ନାବାଳିକା କ୍ରୀଡାଛାତ୍ରୀଙ୍କୁ ଗଣଦୁଷ୍କର୍ମ ଅଭିଯୋଗ ଘଟଣା: ପୀଡ଼ିତାଙ୍କ ପରିବାରକୁ ଭେଟିଲେ ବିଜେଡିର ମହିଳା ଟିମ୍
ଯାଜପୁର: ଯାଜପୁରରେ ନାବାଳିକା କ୍ରୀଡାଛାତ୍ରୀଙ୍କୁ ଗଣଦୁଷ୍କର୍ମ ଅଭିଯୋଗ ଘଟଣା। ପୀଡ଼ିତାଙ୍କ ପରିବାରକୁ ଭେଟିଲେ ଯାଜପୁର ବିଜେଡିର ମହିଳା ପ୍ରତିନିଧି ଦଳ। ପୀଡ଼ିତାଙ୍କ ମାଆଙ୍କ ସହିତ ଘଟଣା ସମ୍ପର୍କରେ ଆଲୋଚନା କଲେ ଦଳୀୟ କର୍ମକର୍ତ୍ତା । ଏଭଳି ଘଟଣାକୁ ତୀବ୍ର ନିନ୍ଦା କରିଛି ବିଜେଡି । ଯାଜପୁର ସମେତ ରାଜ୍ୟରେ ଆଇନଶୃଙ୍ଖଳା ବିପର୍ଯ୍ୟସ୍ତ ହୋଇପଡିଛି । ଏଥିଲାଗି ସିଧାସଳଖ ସରକାରଙ୍କୁ ଦାୟୀ କରିଛି ଟିମ । ଟିମରେ ଯାଜପୁର ବିଧାୟିକା ସୁଜାତା ସାହୁ, ଯାଜପୁରର ପୂର୍ବତନ ସାଂସଦ ଶର୍ମିଷ୍ଠା ସେଠୀ, ଜ଼ିଲ୍ଲାପରିଷଦ ଅଧ୍ୟକ୍ଷା ନଳିନୀପ୍ରଭା ଜେନା, ଯାଜପୁର ପୌରଧକ୍ଷା ରଞ୍ଜୁଲତା ହୋତା, ମହିଳା ସଙ୍ଗଠନର ଜିଲ୍ଲା ସଭାନେତ୍ରୀ ସବିତା ରାଉତ, ଜିଲ୍ଲାପରିଷଦ ସଭ୍ୟା ମାମିନା ମଲ୍ଲିକ, ଜିଲ୍ଲା ସଭାପତି ସରୋଜ ମହାପାତ୍ର ପ୍ରମୁଖ ସାମିଲ ଥିଲେ।
ଉତ୍ପାତ ମଚାଉଚି ଗୋଠଛଡା ଦନ୍ତା: ଦୁଇ ଶହରୁ ଊର୍ଦ୍ଧ୍ବ ଘର ଭାଙ୍ଗିବା ସହ ଲୋକଙ୍କୁ ମାରିଛି
ଉତ୍ପାତ ମଚାଉଚି ଗୋଡଛଡା ଦନ୍ତା। ବେଶ କିଛିଦିନ ବ୍ୟବଧାନରେ ବଣାଇଁ ବନଖଣ୍ଡର ଦୁଇଟି ରେଞ୍ଜ ବଣାଇଁ ଓ କୋଇଡ଼ାକୁ ଫେରିଲେ ଦୁଇ ନରହନ୍ତା ଗୋଠଛଡା ଦନ୍ତା । ଉଭୟ ହାତୀ ବନଖଣ୍ଡର ବିଭିନ୍ନ ଅଞ୍ଚଳରେ ଘୁରି ବୁଲି ଅଦ୍ୟାବଧି ଦୁଇଶହରୁ ଉର୍ଦ୍ଧ୍ୱ ଘର ଭାଙ୍ଗିବା ଓ ଆକ୍ରମଣ କରି ଲୋକଙ୍କୁ ମାରିଛି। ଯାହାକୁ ନେଇ ଗ୍ରାମବାସୀ ଭୟଭୀତ ଅବସ୍ଥାରେ ରହିଛନ୍ତି। ତୁରନ୍ତ ବନବିଭାଗ ପଦକ୍ଷେପ ନେଇ ହାତୀ ଘଉଡାଇବା ପ୍ରଚେଷ୍ଟା କରୁ ବୋଲି ସାଧାରଣରେ ଦାବୀ ହେଉଛି। ଅନ୍ୟପଟେ ବନବିଭାଗ ପକ୍ଷରୁ ହାତୀ ଦୁଇଟିକୁ ଟ୍ରାଙ୍କୁଲାଇଜ କରି ରେଡିଓକଲାର ଲଗାଯାଇ ଧରିବାକୁ ଚେଷ୍ଟା ଜାରି ରହିଛି।
ବାତ୍ୟା ଆଶ୍ରୟସ୍ଥଳୀ ମରାମତିକୁ ନେଇ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ
ପୁରୀ ଜିଲ୍ଲା କାକଟପୁର ବ୍ଲକ ଛୋଟୀପଡା ଗାଁରେ ଗୋଷ୍ଠୀ ସଂଘର୍ଷ। ଛୋଟୀପଡା ଗ୍ରାମସ୍ଥିତ ବହୁମୁଖି ବାତ୍ୟା ଆଶ୍ରୟସ୍ଥଳୀ ମରାମତିକୁ ନେଇ ଦୁଇ ଗୋଷ୍ଠୀ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଛି। କାକଟପୁର ଥାନାରେ ଅଭିଯୋଗ ପରେ ପୋଲିସ ଘଟଣା ସ୍ଥଳରେ ପହଂଚି ଅନୁଧ୍ୟାନ କରିଛନ୍ତି। ସୂଚନା ଅନୁଯାୟୀ, ଛୋଟୀପଡା ଗ୍ରାମସ୍ଥିତ ବହୁମୁଖି ବାତ୍ୟା ଆଶ୍ରୟସ୍ଥଳୀ ମରାମତି ଓ ରଙ୍ଗ କରିବା ପାଇଁ ଓଡିଶା ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ ପକ୍ଷରୁ ୬ଲକ୍ଷ ଟଙ୍କା ମଂଜୁର ହୋଇଥିଲା । ଏହାର କାର୍ଯ୍ୟାଦେଶ ବ୍ଲକର କନିଷ୍ଠ ଯନ୍ତ୍ରୀ ନାମରେ ଥିବା ବେଳେ କିନ୍ତୁ କାର୍ଯ୍ୟଟିକୁ ବାତ୍ୟା ଆଶ୍ରୟସ୍ଥଳୀ ପରିଚାଳନା କମିଟି କରିବାକୁ ବିଡ଼ିଓଙ୍କୁ ଅବଗତ କରାଇଥିଲେ । କିନ୍ତୁ ସ୍ଥାନୀୟ ସରପଞ୍ଚ କମିଟି ସମ୍ପାଦକ, କିଛି ସଦସ୍ୟକୁ ଅଣଦେଖା କରି କମିଟି ସଭାପତି ତଥା ବାଙ୍ଗୁରିଗାଁ ସରପଞ୍ଚ ମରାମତି କାମ କରିଛନ୍ତି । ଯାହାକୁ ନେଇ ଗଣ୍ଡଗୋଳ ତୀବ୍ର ହୋଇଛି। ଏହା ସହ ବାତ୍ୟା ଆଶ୍ରୟସ୍ଥଳୀ ମରାମତି ଓ ରଙ୍ଗ ମରା କାର୍ଯ୍ୟ ସମ୍ପୂର୍ଣ୍ଣ ନିମ୍ନ ମାନର ହୋଇଥିବା କମିଟି ସଦସ୍ୟ ଅଭିଯୋଗ କରିଛନ୍ତି। ଅଭିଯୋଗ ପରେ ପୋଲିସ ପହଂଚି ପାରିପାର୍ଶ୍ଵିକ ସ୍ଥିତି ଅନୁଧ୍ୟାନ କରିଛନ୍ତି। ଅନ୍ୟ ପଟେ ଏହାକୁ ଖଣ୍ଡନ କରି ବାଙ୍ଗୁରିଗାଁ ସରପଞ୍ଚ। ଯଦି ନିମ୍ନମାନର କାର୍ଯ୍ୟ ହୋଇଛି ତେବେ ସ୍ୱତନ୍ତ୍ର ଯନ୍ତ୍ରୀ ନିକଟରେ ଅଭିଯୋଗ କରିବାକୁ ସରପଞ୍ଚ ନିର୍ଦ୍ଦେଶ ଦେଇଛନ୍ତି।
ଛାତ୍ରୀଙ୍କୁ ଅଶୋଭନୀୟ ଆଚରଣ: ୪ ଅଧ୍ୟାପକଙ୍କ ବିରୋଧରେ ଅଭିଯୋଗ ଆଣିଲେ ଅଭିଭାବକ
ଅନୁଗୁଳରେ ୪ ଅଧ୍ୟାପକଙ୍କ ବିରୋଧରେ ଛାତ୍ରୀଙ୍କୁ ଅଶୋଭନୀୟ ଆଚରଣ ଅଭିଯୋଗ ଆଣିଲେ ଅଭିଭାବକ। ଅନୁଗୁଳ କଲେଜର ଚାରି ଜଣ ଅଧ୍ୟାପକଙ୍କ ବିରୁଦ୍ଧରେ ତିନି ଜଣ ଅଭିଭାବକ ମିଶି ମୁଖ୍ୟମନ୍ତ୍ରୀଙ୍କ ଦପ୍ତରକୁ ଅଭିଯୋଗ ପତ୍ର ପଠାଇଥିବା ଜଣା ପଡ଼ିଛି। ପ୍ରାଣୀ ବିଜ୍ଞାନର ଦୁଇ ଅଧ୍ୟାପକ, ଉଭିଦ ବିଜ୍ଞାନ ଅଧ୍ୟାପକ ଏବଂ ଇଂରାଜୀ ବିଭାଗର ଅଧ୍ୟାପକଙ୍କ ନାମରେ ଏହି ସାଙ୍ଘାତିକ ଅଭିଯୋଗ ଆସିଛି। ଛାତ୍ରୀମାନଙ୍କୁ ଅଧ୍ୟାପକ ଅଶୋଭନୀୟ କଥାବାର୍ତ୍ତା କରିବା ସହ ମାନସିକ ନିର୍ଯାତନା ଦେଉଥିବା ଭଳି ସାଂଘାତିକ ଅଭିଯୋଗ କରିଛନ୍ତି। କ୍ଲାସ ଏବଂ ଲାବୋରେଟୋରୀରେ ଏହି ସବୁ ଘଟଣା ଘଟିଛି। ଛାତ୍ରୀମାନେ ମାନସିକ ସ୍ତରରେ ଭାଙ୍ଗି ପଡିଛନ୍ତି। ଅଧ୍ୟାପକମାନେ ୧୫ ରୁ ୨୦ ବର୍ଷ ଧରି ଏଇ କଲେଜରେ ଅଛନ୍ତି। ତାଙ୍କୁ ବଦଳି କରାଯାଉ ନାହିଁ କାହିଁକି ବୋଲି ଅଭିଭାବକ ପ୍ରଶ୍ନ ଉଠାଇଛନ୍ତି। ଗତ ଜାନୁଆରୀ ୧୩ ତାରିଖରେ ଅଭିଭାବକମାନେ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଥିଲେ ମଧ୍ୟ ତଦନ୍ତ ପାଇଁ ଅନୁଗୁଳ କଲେଜକୁ ଆସି ନଥିଲା କିପରି ବୋଲି ଏବେ ପ୍ରଶ୍ନ ଉଠିଛି। ସବୁଆଡୁ ଖୋଳତାଡ଼ ପରେ ଏବେ ଅଭିଭାବକଙ୍କ ଚିଠି ଉପରେ ତର୍ଜମା ଚାଲିଛି। ଏଥିନେଇ ଅନୁଗୁଳ କଲେଜର ପ୍ରିନ୍ସପାଲ ନିଲାଞ୍ଚଳ ପଟେଲଙ୍କୁ ପଚାରିବାରୁ ସେ ଏବେ ଘଟଣା ସମ୍ପର୍କରେ ଶୁଣିଥିବା କହିଛନ୍ତି। କୌଣସି ଅଭିଭାବକ ତାଙ୍କୁ ଭେଟି ନାହାନ୍ତି। ଘଟଣା ନେଇ ଆମେ ତଦନ୍ତ କରୁଛୁ ବୋଲି ପ୍ରିନ୍ସିପାଲ ପ୍ରକାଶ କରିଛନ୍ତି। ତେବେ ଗତ ସାତ ମାସ ଧରି ନିର୍ଯାତନା ନେଇ ଆସିଥିବା ଅଭିଯୋଗ ପତ୍ର ବା ଚିଠିକୁ କିଏ କାହିଁକି ଚାପି ରଖିଥିଲା ସେନେଇ ପ୍ରଶ୍ନ ଉଠିଛି। ଅଭିଯୋଗର ଶୀଘ୍ର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନେବାକୁ ଅଭିଭାବକ ଓ ବୁଦ୍ଧିଜୀବୀ ଦାବି କରିଛନ୍ତି ।
ରାଜ୍ୟରେ ନାରୀ ଅସୁରକ୍ଷିତ: ସରକାରଙ୍କ ଉପରେ ବର୍ଷିଲା କଂଗ୍ରେସ
ସାରା ଓଡିଶାରେ ଛାତ୍ରୀ ଅସୁରକ୍ଷିତ ହୋଇ ପଡିଥିବା ବେଳେ ବାଲେଶ୍ୱରର ଏଫଏମ କଲେଜ, ସମ୍ବଲପୁରର ଜିଏମ କଲେଜରେ ଛାତ୍ରୀ ନିର୍ଯାତନା ଘଟଣା ମନରୁ ନଲିଭୁଣୁ ପୁଣି ଏବେ ଯାଜପୁରରେ ଜଣେ ହକି କ୍ରୀଡାବିତ୍ ନାବାଳିକାକୁ ଗଣଦୁଷ୍ମର୍ମ କରାଯିବାର ଘଟଣା ସମଗ୍ର ରାଜ୍ୟରେ ଆଲୋଡନ ସୃଷ୍ଟି କରିଛି । ଯାହାକୁ ନେଇ ଜିଲ୍ଲା କଂଗ୍ରେସର ୧୧ ଜଣିଆ ପ୍ରତିନିଧି ମଣ୍ଡଳୀ ପିଡୀତାର ଘରକୁ ଯାଇ ପୀଡିତା ସହ ଆଲୋଚନା କରିଥିଲେ । ଏହି ଘଟଣାରେ ସମବେଦନା ଜଣାଇବା ସହ ନ୍ୟାୟ ନମିଳିବା ପର୍ଯ୍ୟନ୍ତ ପୀଡିତା ପରିବାର ସହ କଂଗ୍ରେସ ଛିଡା ହେବ ବୋଲି ପ୍ରତିଶ୍ରୃତି ଦେଇଥିଲେ । ଏହି ପ୍ରତିନିଧି ମଣ୍ଡଳୀରେ ଏଆଇସିସି ସଭ୍ୟ ପଦ୍ମାକର ଗୁରୁ, ସଭ୍ୟ ସନ୍ତୋଷ ନନ୍ଦ, ବିଧାନସଭା ପ୍ରାର୍ଥୀ ସୁଦିପ କୁମାର କର, ଆଇନୀଜୀବୀ ପ୍ରତିମା କର ପ୍ରମୁଖଙ୍କ ନେତୃତ୍ୱରେ ପୀଡିତା ଭେଟିଥିଲେ । ପରେ ଜିଲ୍ଳା କଂଗ୍ରେସ କାର୍ଯ୍ୟାଳୟ ଠାରେ ଏହି ପ୍ରତିନିଧି ମଣ୍ଡଳୀଙ୍କ ଉପସ୍ଥିତିରେ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଥିଲା । ସରକାରଙ୍କ ଅପାରଗତା ଯୋଗୁ ସମଗ୍ର ଓଡିଶାରେ ନାରୀ ନିର୍ଯ୍ୟାତନା ଦିନକୁ ଦିନ ବୃଦ୍ଧି ପାଇବାରେ ଲାଗିଥିବା ବେଳେ ସରକାର ଏବେବି ମଧ୍ୟ କୁମ୍ଭକର୍ଣ୍ଣ ନିଦ୍ରାରେ ଶୋଇଥିବା କମିଟି ସଦସ୍ୟମାନେ ମତ ଦେଇଥିଲେ ।
ଲାଇଭ ଭିଡିଓ କରି ଟ୍ରେନ ଆଗକୁ ଡେଇଁ କଲେ ଆତ୍ମହତ୍ୟା
ଯୁବକ ନେଲେ ଚରମ ନିଷ୍ପତ୍ତି । ଲାଇଭ ଭିଡିଓ କରି ଟ୍ରେନ ଆଗକୁ ଡେଇଁ କଲେ ଆତ୍ମହତ୍ୟା । ସୂଚନା ମୁତାବକ, ଯୁବକ ଜଣକ ସାଲେପୁର ଥାନା ଅନ୍ତର୍ଗତ ଛାଣିପୁର ପଞ୍ଚାୟତ ଅଧିନସ୍ତ ସାତବାଟି ଗାଁର ବୋଲି ଜଣାପଡିଛି । ଖବର ଅନୁସାରେ, ମାଧବାନନ୍ଦ ମହାରଣାଙ୍କ ଏକ ମାତ୍ର ପୁଅ ସୁନୀଲ କୁମାର ମହାରଣା। ସୁନୀଲ ଭୁବେନେଶ୍ୱରରେ ଏକ ଟ୍ରାଭେଲ ଏଜେନ୍ସି କରିଥିଲେ । କୌଣସି କାରଣକୁ ନେଇ ସୁନୀଲ ମାନସିକ ଭାରସାମ୍ୟ ହରାଇ ମଞ୍ଚେଶ୍ୱରରେ ଲାଇଭି ଭିଡିଓ କରିଥିଲେ । ପରେ ମଞ୍ଚେଶ୍ଵରରେ ଟ୍ରେନ ଆଗକୁ ଡେଇଁ ଆତ୍ମହତ୍ୟା କରିଥିବାର ଜଣା ପଡିଛି । ଏ ଖବର ଶୁଣିବା ପରେ ଗାଁରେ ଶୋକର ଛାୟା ଖେଳି ଯାଇଛି ।
ବାଲେଶ୍ଵରରେ ଲଜ୍ଜା: ୭ ବର୍ଷର ନାବାଳିକାଙ୍କୁ ସମ୍ପର୍କୀୟ ଜେଜେବାପା ଦୁଷ୍କର୍ମ କରିଥିବା ଅଭିଯୋଗ
ବାଲେଶ୍ଵର ବସ୍ତା ଅଂଚଳରେ ଲଜ୍ଜା। ୭ ବର୍ଷର ନାବାଳିକାଙ୍କୁ ସମ୍ପର୍କୀୟ ଜେଜେବାପା ଦୁଷ୍କର୍ମ କରିଥିବା ଅଭିଯୋଗ। ଅଭିଯୁକ୍ତ ଜେଜେବାପାକୁ ଥାନାରେ ଅଟକ ରଖିଛି ପୋଲିସ। ବସ୍ତା ଅମର୍ଦ୍ଦାରୋଡ଼ ଫାଣ୍ଡି ଅଂଚଳର ଏ ଘଟଣା। ନାବାଳିକା ଜଣକ ପଡୋଶୀ ଘରକୁ ଯିବା ସମୟରେ ଅଭିଯୁକ୍ତ ଜଣକ ନାବାଳିକାଙ୍କୁ ବିଭିନ୍ନ ପ୍ରକାରର ପ୍ରଲୋଭନ ଦେଖାଇ ଘରକୁ ନେଇ ଦୁଷ୍କର୍ମ ଉଦ୍ୟମ କରିଥିଲା। ଝିଅର ଚିତ୍କାର ଶୁଣି ପଡ଼ୋଶୀ ଆସି ନାବାଳିକାଙ୍କୁ ଉଦ୍ଧାର କରିଥିଲେ। ପରିବାର ଲୋକେ ଏ ସମ୍ପର୍କରେ ଅମର୍ଦ୍ଦାରୋଡ଼ ଫାଣ୍ଡିରେ ଲିଖିତ ଅଭିଯୋଗ କରିବା ପରେ ଫାଣ୍ଡି ଅଧିକାରୀ ଅଭିଯୁକ୍ତ ଜଣକୁ ଘରୁ ଉଠାଇ ଆଣି ପଚରାଉଚରା ଜାରି ରଖିଛନ୍ତି।
ଅନ୍ତରଙ୍ଗ ଭିଡିଓ ଭାଇରାଲ ପରେ ଯୁବତୀଙ୍କ ବିଷ ପିଇ ଆତ୍ମହତ୍ୟା ଉଦ୍ୟମ
ଅନ୍ତରଙ୍ଗ ଭିଡିଓ ଭାଇରାଲ ପରେ ଯୁବତୀଙ୍କ ବିଷ ପିଇ ଆତ୍ମହତ୍ୟା ଉଦ୍ୟମ। ନବରଙ୍ଗପୁର ରାଇଘର ବ୍ଲକ ଅଂଚଳର ଏ ଘଟଣା। ଯୁବତୀଙ୍କୁ ବିଚ ରାସ୍ତାରେ ମାଡ଼ ମାରିବା ସହ ଯୁବତୀ ଏବଂ ଅନ୍ୟ ଜଣେ ଯୁବକଙ୍କ ଅନ୍ତରଙ୍ଗ ଭିଡିଓ ଭାଇରାଲ କରିଥିଲେ ଅନ୍ୟ ଜଣେ ଯୁବକ। ଭିଡିଓ ଭାଇରାଲ ପରେ ଅପମାନ ଓ ବଦନାମ ଭୟରେ ଚରମ ନିଷ୍ପତ୍ତି ନେଲେ ଯୁବତୀ। କୀଟନାଶକ ପିଇ ଆତ୍ମହତ୍ୟା ଉଦ୍ୟମ କରିଛନ୍ତି ଯୁବତୀ। ଯୁବତୀଙ୍କୁ ଚିକିତ୍ସା ପରେ ଡାକ୍ତର ଫେରାଇ ଦେବାପରେ ଏବେ ମୃତ୍ୟୁ ସହ ଲଢେ଼ଇ କରୁଛନ୍ତି। ଜୟପୁରର ଏକ ନର୍ସିଂ କଲେଜରେ ପଢୁଛନ୍ତି ସମ୍ପୃକ୍ତ ଯୁବତୀ। କିଛି ଦିନ ତଳେ ଯୁବତୀ ଜଣକ ଲୁଚି ବିବାହ କରିଥିବା ମଧ୍ୟ ଚର୍ଚ୍ଚା ହେଉଛି। ସେପଟେ ଏକତରଫା ପ୍ରେମ କରୁଥିବା ଅନ୍ୟ ଜଣେ ଯୁବକ ଜଣକ ତାଙ୍କୁ ରାସ୍ତାରେ ମାରପିଟ୍ କରିବା ସହ ଯୁବତୀଙ୍କ ଫଟୋ ଓ ଭିଡିଓକୁ ସୋସିଆଲ ମିଡିଆରେ ଭାଇରାଲ କରିଥିଲେ। ଯୁବତୀଙ୍କ ପରିବାର ପକ୍ଷରୁ ରାଇଘର ଥାନାରେ ଏତଲା ଦିଆଯାଇଛି। ପୀଡ଼ିତାଙ୍କୁ ନ୍ୟାୟ ସହ ଅପରାଧୀଙ୍କୁ ଉଚିତ୍ ଦଣ୍ଡ ମିଳୁ ବୋଲି ଦାବି କରିଛନ୍ତି। ରାଇଘର ପୋଲିସ ଯୁବତୀଙ୍କ ଘରକୁ ଯାଇ ବୟାନ ନେଇଛି।