ପୂର୍ତ୍ତବିଭାଗ ମନ୍ତ୍ରୀ ପୃଥ୍ବୀରାଜ ହରିଚନ୍ଦନଙ୍କୁ ଭେଟିଲେ ବରିଷ୍ଠ ବିଜେପି ନେତା ଦିଲୀପ ରାୟ । ରାଉରକେଲାରେ ଗ୍ଲାସ ବ୍ରିଜ୍, ଝୁଲା ବ୍ରିଜ ଓ ରିଂ ରୋଡ ନେଇ ଆଲୋଚନା ହୋଇଛି । ଦୁର୍ଗା ପୂଜା ସୁଦ୍ଧା ବ୍ରିଜ କାମ ଆରମ୍ଭ ହେବ ବୋଲି ପୃଥ୍ବୀରାଜ ହରିଚନ୍ଦନ କହିଛନ୍ତି । ଏହାସହ ଓଡ଼ିଶାର ବିକାଶମୂଳକ କାର୍ଯ୍ୟ ନେଇ ମଧ୍ୟ ସେ ଆଲୋଚନା କରିଛନ୍ତି। ହେଲେ ରାଜ୍ୟସଭା ଯିବା ନେଇ ଚାଲିଥିବା ଚର୍ଚ୍ଚାକୁ ଏଡ଼ାଇ ଦେଇଛନ୍ତି ଦିଲ୍ଲୀପ ରାୟ।
ଉପରାଷ୍ଟ୍ରପତି ପଦରୁ କାହିଁକି ଇସ୍ତଫା ଦେଲେ ଜଗଦୀପ ଧନଖଡ଼?
ନୂଆଦିଲ୍ଲୀ: ଉପରାଷ୍ଟ୍ରପତି ପଦରୁ ଜଗଦୀପ ଧନଖଡ଼ ଇସ୍ତଫା ଦେବା ପରେ ଏବେ ରାଜନୈତିକ ମହଲରେ ବଡ଼ ଚର୍ଚ୍ଚା ଜାରି ରହିଛି । କାର୍ଯ୍ୟକାଳ ସରିବାର ୨ ବର୍ଷ ପୂର୍ବରୁ ସ୍ବାସ୍ଥ୍ୟଗତ କାରଣ ଦର୍ଶାଇ ଶ୍ରୀ ଧନଖଡ଼ ନିଜ ପଦ ଛାଡ଼ିଛନ୍ତି । ତେବେ ଅଚାନକ ଧନଖଡ଼ କାହିର୍କି ଇସ୍ତଫା ଦେଲେ ବୋଲି ଏବେ ରାଜନୈତିକ ମହଲରେ ଚର୍ଚ୍ଚା ଜାରି ରହିଥିବା ବେଳେ ଏନେଇ ଆସିଛି ଏକ ବଡ଼ ଖବର । ଏହି ଇସ୍ତଫା ପଛରେ ସ୍ବାସ୍ଥ୍ୟ ସମସ୍ୟା ଠାରୁ ଆହୁରି ଗମ୍ଭୀର କାରଣ ରହିଛି ବୋଲି କଂଗ୍ରେସ ପକ୍ଷରୁ ଦାବି କରାଯାଇଛି । ଭେଙ୍କେୟା ନାଇଡୁଙ୍କ ପରେ ୨୦୨୨ ମସିହା ଅଗଷ୍ଟ ୧୧ ତାରିଖରେ ଧନଖଡ଼ ଭାରତର ଉପରାଷ୍ଟ୍ରପତି ପଦ ଗ୍ରହଣ କରିଥିଲେ । ଉପରାଷ୍ଟ୍ରପତି କାର୍ଯ୍ୟକାଳ ୫ ବର୍ଷ ପାଇଁ ହୋଇଥାଏ । ଆସନ୍ତା ୨୦୨୭ ମସିହା ଅଗଷ୍ଟ ମାସରେ ଧନଖଡ଼ଙ୍କ କାର୍ଯ୍ୟକାଳ ସରିଥାନ୍ତା, ମାତ୍ର ତା’ ପୂର୍ବରୁ ସେ ପଦ ଛାଡ଼ିଛନ୍ତି । ନିଜ କାର୍ଯ୍ୟକାଳ ମଧ୍ୟରେ ସେ ପଦ ଛାଡ଼ିଛନ୍ତି । ଏହା କରିବାରେ ସେ ତୃତୀୟ ଉପରାଷ୍ଟ୍ରପତି ହୋଇଛନ୍ତି । ତାଙ୍କ ପୂର୍ବରୁ ଭିଭି ଗିରି ଓ ଭୌରା ସିଂହ ଶେଖାଓ୍ବତ ମଧ୍ୟ କାର୍ଯ୍ୟକାଳ ସରିବା ପୂର୍ବରୁ ଇସ୍ତଫା ଦେଇଥିଲେ ।
ତେବେ ଇସ୍ତଫା ପଛର କାରଣ ସ୍ବାସ୍ଥ୍ୟ ସମସ୍ୟା ଠାରୁ ଆହୁରି ଗମ୍ଭୀର ବୋଲି କଂଗ୍ରେସ କହିଛି । ଧନଖଡ଼ଙ୍କ ଇସ୍ତଫା ତାଙ୍କ ପାଇଁ ଠିକ୍ ହୋଇପାରେ, ମାତ୍ର ଅନେକଙ୍କ ପାଇଁ ଖରାପ । ଏହି ଖରାପ ସେହି ମାନଙ୍କ ପାଇଁ ଯେଉଁମାନେ ତାଙ୍କୁ ଏହି ପଦରେ ନିର୍ବାଚିତ କରାଇଥିଲେ । ବରିଷ୍ଠ କଂଗ୍ରେସ ନେତା ଜୟରାମ ରମେଶ ଏହି ପ୍ରସଙ୍ଗରେ ଏକ ବଡ଼ ପ୍ରଶ୍ନ କରିଛନ୍ତି । ଜୁଲାଇ ୨୧ ତାରିଖ ଦ୍ବିପ୍ରହର ୧ଟାରୁ ଅପରାହ୍ଣ ସାଢ଼େ ୪ଟା ମଧ୍ୟରେ କିଛି ବଡ଼ ଘଟଣା ଘଟିଥିବା ରମେଶ କହିଛନ୍ତି । ସେହି କାରଣରୁ ସେ ଦ୍ବିତୀୟ କାର୍ଯ୍ୟ ମନ୍ତ୍ରଣା ସମିତି (ବିଏଏସି)ରୁ ଜାଣିଶୁଣି ଅନୁପସ୍ଥିତ ରହିଥିଲେ । ଜୁଲାଇ ୨୧ରେ ସଂସଦର ମୌସୁମୀ ଅଧିବେଶନର ପ୍ରଥମ ଦିନ ଦ୍ବିପ୍ରହର ୧୨.୩୦ରେ ରାଜ୍ୟସଭାର ବିଏଏସିର ଅଧ୍ୟକ୍ଷତା କରିଥିଲେ ଧନଖଡ଼ ।
ସେଥିରେ ଗୃହରେ ଜେପି ନଡ୍ଡା ଓ ସଂସଦୀୟ କାର୍ଯ୍ୟ ମନ୍ତ୍ରୀ କିରେନ ରିଜିଜୁଙ୍କ ସମେତ ଅଧିକାଂଶ ସଦସ୍ୟ ଭାଗ ନେଇଥିଲେ । କିଛି ଚର୍ଚ୍ଚା ପରେ ଅପରାହ୍ଣ ୪.୩୦ରେ ବୈଠକ କରିବାକୁ ବିଏଏସି ନିଷ୍ପତ୍ତି ନେଇଥିଲା । ଏକ ଅଦ୍ଭୂତପୂର୍ଣ୍ଣ ପଦକ୍ଷେପ ସ୍ବରୂପ ଧନଖଡ଼ ନିଜ ପଦରୁ ଇସ୍ତଫା ଦେଇଥିବା ରମେଶ କହିଛନ୍ତି । ନିଜ ସ୍ବାସ୍ଥ୍ୟ କାରଣରୁ ସେ ପଦ ଛାଡ଼ିଥିବା ଉଲ୍ଲେଖ କରିଛନ୍ତି । ତାଙ୍କୁ ସମ୍ମାନ ଦେବା ଉଚିତ । ମାତ୍ର ଏହା ସତ ଯେ, ଇସ୍ତଫା ପଛରେ ଆହୁରି ଗଭୀର କାରଣ ରହିଛି ବୋଲି ରମେଶ କହିଛନ୍ତି ।
ସ୍ପଷ୍ଟୀକରଣ ରଖିଲା ଏନସିଇଆରଟି : ଦ୍ବିତୀୟ ଖଣ୍ଡ ବହିରେ ଆସିବ ପାଇକ ବିଦ୍ରୋହ ବିଷୟ
ନନ୍ଦିଘୋଷ ବ୍ୟୁରୋ : ଅଷ୍ଟମ ଶ୍ରେଣୀ ପାଠ୍ୟ ପୁସ୍ତକରେ କାହିଁକି ପାଇକ ବିଦ୍ରୋହ ବାଦ ପଡିଲା ସେ ନେଇ ସ୍ପଷ୍ଟୀକରଣ ରଖିଛି ଏନସିଇଆରଟି । ସାମାଜିକ ବିଜ୍ଞାନର ଦ୍ଵିତୀୟ ଖଣ୍ଡରେ ପାଇକ ବିଦ୍ରୋହ ବିଷୟ ସ୍ଥାନ ପାଇବ ବୋଲି କହିଛି ଏନସିଇଆରଟି । ଅଷ୍ଟମ ଶ୍ରେଣୀ ସାମାଜିକ ବିଜ୍ଞାନ ପାଠ୍ୟପୁସ୍ତକର ‘ଏକ୍ସପ୍ଲୋରିଂ ସୋସାଇଟି: ଇଣ୍ଡିଆ ଆଣ୍ଡ ବିୟଣ୍ଡ’ର ଦ୍ଵିତୀୟ ଖଣ୍ଡରେ ବ୍ରିଟିଶରାଜ ବିରୋଧରେ ସୃଷ୍ଟି ହୋଇଥିବା ଓଡ଼ିଶାର ପାଇକ ବିଦ୍ରୋହ-୧୮୧୭ ଆନ୍ଦୋଳନ ସ୍ଥାନ ପାଇବ । ଏବେ ଦ୍ଵିତୀୟ ଖଣ୍ଡର ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି । ଯାହାକି ଆସନ୍ତା ସେପ୍ଟେମ୍ବର-ଅକ୍ଟୋବର ୨୦୨୫ରେ ପ୍ରକାଶ ପାଇବ। ଏଥିରେ ବ୍ରିଟିଶରାଜ ବିରୋଧରେ ଆଞ୍ଚଳିକସ୍ତରରେ ଦେଖାଯାଇଥିବା ବିଦ୍ରୋହ, ଜନଆନ୍ଦୋଳନ ଘଟଣାବଳୀ ଆଦି ରହିଛି । ଓଡ଼ିଶାର ଖୋର୍ଦ୍ଧା ପାଇକ ବିଦ୍ରୋହ, ପଞ୍ଜାବରେ ଶିଖଙ୍କ କୁକା ବିଦ୍ରୋହ ଆଦିକୁ ପୁସ୍ତକରେ ସ୍ଥାନ ମିଳିବ ବୋଲି ଏନସିଇଆରଟି ପ୍ରେସ ବିଜ୍ଞପ୍ତିରେ ଉଲ୍ଲେଖ ରହିଛି । ତେବେ ପ୍ରଥମ ଖଣ୍ଡରେ ଓଡ଼ିଶାର ପାଇକ ବିଦ୍ରୋହ ବିଷୟକୁ ସ୍ଥାନ ନମିଳିବା କାରଣରୁ ବିବାଦ ସୃଷ୍ଟି ହୋଇଥିଲା।
ଜଗଦୀପଙ୍କ ବୈଠକରେ ଯୋଗ ନଦେବା ନେଇ ମୁହଁ ଖୋଲିଲେ ଜେପି ନଡ୍ଡା…; ଉଠିଲା ସସପେନ୍ସ ଉପରୁ ପରଦା
ନନ୍ଦିଘୋଷ ବ୍ୟୁରୋ : ଜଗଦୀପ ଧନଖଡ଼ ଉପରାଷ୍ଟ୍ରପତି ପଦରୁ ଇସ୍ତଫା ପରେ ତାଙ୍କର ହଠାତ୍ ନିଷ୍ପତ୍ତିକୁ ନେଇ ସବୁଠି ହଇଚଇ ସୃଷ୍ଟି ହୋଇଛି। କଂଗ୍ରେସ ସମେତ ସମସ୍ତ ବିରୋଧୀ ଦଳ ଏହି ନିଷ୍ପତ୍ତିକୁ ସନ୍ଦେହଜନକ ଦୃଷ୍ଟିରେ ଦେଖୁଛନ୍ତି। କଂଗ୍ରେସ ଏହା ମଧ୍ୟ କହୁଛି ଯେ, ଜଗଦୀପ ଧନଖଡ଼ଙ୍କ ବୈଠକରେ ଜେପି ନଡ୍ଡା ଏବଂ କିରେନ ରିଜିଜୁ ଯୋଗ ଦେଇ ନଥିଲେ, ଏଥିରେ ଜଗଦୀପ ଧନଖର ଆଘାତ ପାଇଥିଲେ ଏବଂ ସୋମବାର ସନ୍ଧ୍ୟାରେ ସେ ଇସ୍ତଫା ଦେଇଥିଲେ। ତଥାପି, ଜଗଦୀପ ଧନଖର ତାଙ୍କ ଇସ୍ତଫାପତ୍ରରେ ସ୍ୱାସ୍ଥ୍ୟ ବିଷୟରେ ଉଲ୍ଲେଖ କରିଛନ୍ତି। ସେ କହିଛନ୍ତି ଯେ ସେ ଏବେ ତାଙ୍କ ସ୍ୱାସ୍ଥ୍ୟକୁ ପ୍ରାଥମିକତା ଦେବାକୁ ଚାହାଁନ୍ତି। ଏବେ ପ୍ରଶ୍ନ ହେଉଛି ଏହା ପ୍ରକୃତରେ ସତ୍ୟ କି ?ଜଗଦୀପ ଧନଖଡ଼ କ’ଣ ଅସୁସ୍ଥତା ଯୋଗୁଁ ଇସ୍ତଫା ଦେଇଥିଲେ? ନା ସେ ବୈଠକରେ ଯୋଗ ନଦେବା ଯୋଗୁଁ ଜେପି ନଡ୍ଡାଙ୍କ ଉପରେ ରାଗିଛନ୍ତି ? ନା ଏହା ଗୃହରେ ଜେପି ନଡ୍ଡା ଯାହା କହିଥିଲେ ତାହାର ପ୍ରଭାବ? ଏହି ସମସ୍ତ ପ୍ରଶ୍ନର ଉତ୍ତର ଏବେ ମିଳିସାରିଛି। ଜଗଦୀପ ଧନଖରଙ୍କ ଇସ୍ତଫା ସହ ଜଡିତ ସସପେନ୍ସର ପରଦା ନିଜେ ଜେପି ନଡ୍ଡା ଉଠାଇଛନ୍ତି।
ସୂଚନା ଅନୁଯାୟୀ, ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା କହିଛନ୍ତି ଯେ, କିରେନ ରିଜିଜୁ ଏବଂ ସେ କିଛି ଗୁରୁତ୍ୱପୂର୍ଣ୍ଣ ସଂସଦୀୟ କାର୍ଯ୍ୟରେ ବ୍ୟସ୍ତ ଥିଲେ, ଯାହା ଯୋଗୁଁ ସେ ଜଗଦୀପ ଧନଖଡ଼ଙ୍କ ବୈଠକରେ ଯୋଗ ଦେଇପାରି ନଥିଲେ। ଏ ବିଷୟରେ ଉପରାଷ୍ଟ୍ରପତିଙ୍କ କାର୍ଯ୍ୟାଳୟକୁ ପୂର୍ବରୁ ସୂଚନା ଦିଆଯାଇଥିଲା।
ଜେପି ନଡ୍ଡା ଦେଲେ ସ୍ପଷ୍ଟୀକରଣ
ସେ ତାଙ୍କ ବକ୍ତବ୍ୟକୁ ମଧ୍ୟ ସ୍ପଷ୍ଟ କରିଛନ୍ତି ଯେ, ମୁଁ ରାଜ୍ୟସଭାରେ କହିଥିଲି ଯେ ମୁଁ ଯାହା କହୁଛି ତାହା ରେକର୍ଡରେ ରହିବ, ଆପଣ ଯାହା କହୁଛନ୍ତି ତାହା ରେକର୍ଡରେ ରହିବ ନାହିଁ… ଏହା ବିରୋଧୀ ଦଳର ସାଂସଦମାନଙ୍କୁ ପାଇଁ ଥିଲା, ଅଧ୍ୟକ୍ଷ (ଉପରାଷ୍ଟ୍ରପତି ଜଗଦୀପ ଧନଖଡ଼)ଙ୍କ ପାଇଁ ନୁହେଁ। କିନ୍ତୁ ଅନ୍ୟପଟେ, କଂଗ୍ରେସ ସନ୍ଦେହ କରୁଛି ଯେ ସୋମବାର ଦିନ ୧ଟାରୁ ୪.୩୦ ଟା ମଧ୍ୟରେ କିଛି ଗମ୍ଭୀର ଘଟଣା ଘଟିଛି ଯାହା ଯୋଗୁଁ କେନ୍ଦ୍ରୀୟ ମନ୍ତ୍ରୀ ଜେପି ନଡ୍ଡା ଏବଂ କିରେନ ରିଜିଜୁ ବ୍ୟବସାୟ ପରାମର୍ଶଦାତା କମିଟିର ବୈଠକରେ ଯୋଗ ଦେଇ ନାହାଁନ୍ତି। କଂଗ୍ରେସ ସନ୍ଦେହ କରୁଛି ଯେ ଏହା ହିଁ ଇସ୍ତଫା ପଛରେ କାରଣ।
ସୂଚନା ମୁତାବତ, ଜୁଲାଇ ୨୧ ତାରିଖରେ ଜଗଦୀପ ଧନଖଡ଼ ଦିନ ୧୨ଟା ୩୦ ରେ ରାଜ୍ୟସଭାର BAC ବୈଠକ ଡାକିଥିଲେ। ଏଥିରେ ଜେପି ନଡ୍ଡା ଏବଂ କିରେନ ରିଜିଜୁଙ୍କ ସମେତ ଅଧିକାଂଶ ସଦସ୍ୟ ଉପସ୍ଥିତ ଥିଲେ। ଅପରାହ୍ନ ୪ଟା ୩୦ ରେ ପୁଣି ଥରେ ବୈଠକ କରିବାକୁ ନିଷ୍ପତ୍ତି ନିଆଯାଇଥିଲା। ଯାହହା ଜଗଦୀପ ଧନଖରଙ୍କ ଅଧ୍ୟକ୍ଷତାରେ ହେବାର ଥିଲା। କିନ୍ତୁ ଜେପି ନଡ୍ଡା ଏବଂ ରିଜିଜୁ ଏହି ଦ୍ୱିତୀୟ ବୈଠକରେ ଯୋଗ ଦେଇ ନଥିଲେ। ଏହାକୁ ନେଇ କଂଗ୍ରେସ ନେତା ଜୟରାମ ରମେଶ ଦାବି କରିଛନ୍ତି ଯେ ଉଭୟ ମନ୍ତ୍ରୀଙ୍କ ‘ଜାଣିଶୁଣି’ ଅନୁପସ୍ଥିତି ରହିଥିଲେ ଏବଂ ଜଗଦୀପ ଧନଖଡ଼ଙ୍କୁ ପୂର୍ବ ସୂଚନା ନ ଦେବା ସେମାନଙ୍କ ଇସ୍ତଫାର କାରଣ ହୋଇପାରେ। ଅନପଟେ ରମେଶ କହିଛନ୍ତି, ‘ଅପରାହ୍ନ ୧ରୁ ୪ଟା୩୦ ମଧ୍ୟରେ କିଛି ବହୁତ ଗମ୍ଭୀର ଘଟଣା ଘଟିଥିଲା, ଯାହା ଯୋଗୁଁ ସେମାନେ ଅନୁପସ୍ଥିତି ଥିଲେ।’
ଜଗଦୀପ ଧନଖଡ଼ କାହିଁକି ଦେଲେ ଇସ୍ତଫା ? ସରକାରକୁ ସ୍ପଷ୍ଟୀକରଣ ଦେବାକୁ ଦାବି
ନନ୍ଦିଘୋଷ ବ୍ୟୁରୋ : ଉପରାଷ୍ଟ୍ରପତି ପଦରୁ ଜଗଦୀପ ଧନଖଡଙ୍କ ହଠାତ୍ ଇସ୍ତଫାକୁ ନେଇ ଦିଲ୍ଲୀରେ ଚର୍ଚ୍ଚା ଜୋର। କଂଗ୍ରେସର ବରିଷ୍ଠ ନେତା ଜୟରାମ ରମେଶ ଏ ନେଇ ପ୍ରତିକ୍ରିୟା ପ୍ରକାଶ କରିଛନ୍ତି। ଉପ ରାଷ୍ଟ୍ରପତିଙ୍କ ଇସ୍ତଫା ପଛରେ ଗଭୀର କାରଣ ରହିଥିବା ସେ ଉଲ୍ଲେଖ କରିଛନ୍ତି। ଗତକାଲି ଅପରାହ୍ନ ୧ଟାରୁ ୪.୩୦ ମିନିଟ୍ ମଧ୍ୟରେ କଣ ହୋଇଥିଲା ବୋଲି ସେ ପ୍ରଶ୍ନ କରିଛନ୍ତି।
ଧନଖଡ ସ୍ବାସ୍ଥ୍ୟଗତ କାରଣରୁ ଇସ୍ତଫା ଦେଉଥିବା ଉଲ୍ଲେଖ କରୁଥିବାରୁ ଏହାକୁ ଆମେ ସମ୍ମାନ କରୁଛୁ ବୋଲି ଜୟରାମ କହିବା ସହ କିଛି ପ୍ରସଙ୍ଗକୁ ମଧ୍ୟ ଉଲ୍ଲେଖ କରିଛନ୍ତି। ସେ ଏକ୍ସରେ ଲେଖିଛନ୍ତି ଯେ, ଜୁଲାଇ ୨୧, ସୋମବାର ସଂସଦର ମୌସୁମୀ ଅଧିବେଶନ ଆରମ୍ଭ ହୋଇଥିଲା। ଦିନ ପ୍ରାୟ ୧୨ଟା ୩୦ରେ ବିଜନେସ୍ ଆଡଭାଇଜରୀ କମିଟିର ବୈଠକ ଅନୁଷ୍ଠିତ ହୋଇଥିଲା। ଏଥିରେ ବହୁ ସଦସ୍ୟ ଯୋଗଦେଇଥିଲେ। ବୈଠକରେ ସରକାରଙ୍କ ୨ ମନ୍ତ୍ରୀ କିରଣ ରିଜିଜୁ ଓ ଜେ.ପି ନଡ୍ଡା ମଧ୍ୟ ଉପସ୍ଥିତ ଥିଲେ। ପରେ ୪.୩୦ରେ ପୁଣିଥରେ BAC ଆରମ୍ଭ ହୋଇଥିଲା କିନ୍ତୁ ଏଥର ନଡ୍ଡା ଓ ରିଜିଜୁ ଉପସ୍ଥିତ ହୋଇନଥିଲେ। ସେମାନଙ୍କୁ କିଛି ସମୟ ଅପେକ୍ଷା କରାଯାଇଥିବା ମଧ୍ୟ ରମେଶ କହିଛନ୍ତି। ତେବେ ଦିନ ଗୋଟାଏରୁ ସାଢ଼େ ୪ଟା ମଧ୍ୟରେ କଣ ଘଟିଲା ବୋଲି କଂଗ୍ରେସ ପ୍ରଶ୍ନ କରିଛି।
ଚଳିତମାସ ଆରମ୍ଭରୁ JNUର ଏକ ବୈଠକରେ ଧନଖଡ଼ କହିଥିଲେ ଯେ, ସେ ୨୦୨୭ରେ ଅବସର ଗ୍ରହଣ କରିବେ। ତେବେ ଏହା ପୂର୍ବରୁ କେମିତି ହଠାତ୍ ସେ ପଦଛାଡ଼ିଲେ ତାକୁ ନେଇ ନାନା ଆଲୋଚନା ଆରମ୍ଭ ହୋଇଛି। ଏବେ ଧନଖଡ଼ଙ୍କ ଇସ୍ତଫା ପରେ କିଏ ହେବ ପରବର୍ତ୍ତୀ ଉପରାଷ୍ଟ୍ରପତି ଏହାକୁ ନେଇ ମଧ୍ୟ ଚର୍ଚ୍ଚା ଜୋର ଧରିଛି। ଉପରାଷ୍ଟ୍ରପତି ନିର୍ବାଚନ ନେଇ ଖୁବଶୀଘ୍ର ବିଜ୍ଞପ୍ତି ପ୍ରକାଶ ପାଇପାରେ। ନିର୍ବାଚନ କମିଶନ ଏ ନେଇ ବିଜ୍ଞପ୍ତି ପ୍ରକାଶ କରିପାରନ୍ତି। କାର୍ଯ୍ୟାକାଳ ପୂରିବାର ୨ ବର୍ଷ ପୂର୍ବରୁ ଗତକାଲି ରାତିରେ ସ୍ବାସ୍ଥ୍ୟଗତ କାରଣ ଦର୍ଶାଇ ନିଜ ପଦରୁ ଇସ୍ତଫା ଦେଇଥିଲେ ଉପରାଷ୍ଟ୍ରପତି। ସେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ନିକଟକୁ ପଠାଇଥିଲେ ତାଙ୍କର ଇସ୍ତଫାପତ୍ର।
NCERT ପାଠ୍ୟ ପୁସ୍ତକରୁ ପାଇକ ବିଦ୍ରୋହକୁ ବାଦ୍ ; ଉଦବେଗ ପ୍ରକାଶ କଲେ ନବୀନ
ନନ୍ଦିଘୋଷ ବ୍ୟୁରୋ : ପୁଣି NCERTରୁ ବାଦ୍ ପଡିଲା ପାଇକ ବିଦ୍ରୋହ । NCERT ପାଠ୍ୟ ପୁସ୍ତକରୁ ପୁଣି ଏକ ଐତିହାସିକ ବିଷୟକୁ ବାଦ ଦିଆଯାଇଛି । ଯାହାକୁ ନେଇ ଗଭୀର ଉଦବେଗ ପ୍ରକାଶ କରିଛନ୍ତି ବିଜେଡି ସୁପ୍ରିମୋ ତଥା ବିରୋଧୀ ଦଳ ମୁଖ୍ୟ ନବୀନ ପଟ୍ଟନାୟକ । ସେ ସୋସିଆଲ୍ ମିଡିଆ ଏକ୍ସରେ ଏନେଇ କହିଛନ୍ତି ଯେ, NCERT ପାଠ୍ୟ ପୁସ୍ତକରୁ ଓଡ଼ିଶାର ପାଇକ ବିଦ୍ରୋହକୁ ବାଦ ଦିଆଯିବା ନେଇ ମୁଁ ଚିନ୍ତିତ । ପାଇକ ବିଦ୍ରୋହ ଓଡ଼ିଶା ଇତିହାସର ଏକ ଐତିହାସିକ ମୁହୂର୍ତ୍ତ ଥିଲା କାରଣ ଆମ ସାହସୀ ପାଇକମାନେ ୧୮୧୭ ମସିହାରେ ଅତ୍ୟାଚାରୀ ବ୍ରିଟିଶ ବିରୋଧରେ ଅସାଧାରଣ ସାହସର ସହିତ ଲଢିଥିଲେ ।
ସେ ଆହୁରି ମଧ୍ୟ କହିଛନ୍ତି ଯେ, ସେ ଭାରତ ସରକାରଙ୍କୁ ଏହାକୁ ପ୍ରଥମ ସ୍ୱାଧୀନତା ସଂଗ୍ରାମ ଭାବେ ଘୋଷଣା କରିବାକୁ ଅନେକ ଥର ଅନୁରୋଧ କରିଥିଲେ । ପାଇକମାନେ ଅତୁଳନୀୟ ସାହାସର ସହିତ ବିଦେଶୀ ଉପନିବେଶବାଦୀ ଶାସନ ଏବଂ ଅତ୍ୟାଚାର ବିରୋଧରେ ଲଢିବା ପାଇଁ ଏବଂ ସ୍ୱର ଉଠାଇବା ପାଇଁ ଏକାଠି ହୋଇଥିଲେ ।
ଆଜିକୁ ୨୦୦ବର୍ଷ ବର୍ଷ ପରେ ତଥା ସିପାହୀ ବିଦ୍ରୋହର ୪୦ ବର୍ଷ ପୂର୍ବେ ମହାନ ପାଇକ ବିଦ୍ରୋହ ହୋଇଥଲା । ଯାହା ବ୍ରିଟିଶ ଶାସନ ବିରୋଧରେ ଜନ ଆନ୍ଦୋଳନର ଏକ ମଶାଲବାହକ ପାଲଟିଥିଲା; ତାହାକୁ NCERT ପାଠ୍ୟ ପୁସ୍ତକରୁ ବାଦ ଦିଆଯିବା ଆମ ସାହସୀ ପାଇକ ମାନଙ୍କ ପ୍ରତି ଏକ ବଡ଼ ଅପମାନ ବୋଲି କହିଛନ୍ତି ବିଜେଡି ସୁପ୍ରିମୋ । ଏହା ଛଡା ସେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏବଂ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ପାଇକ ବିଦ୍ରୋହ ଏବଂ ଓଡ଼ିଶାକୁ ନ୍ୟାୟ ଦେବା ପାଇଁ ଅନୁରୋଧ କରିଛନ୍ତି ।
https://x.com/Naveen_Odisha/status/1947540022338679210
ବଳଙ୍ଗା ପୀଡ଼ିତାଙ୍କ ବୟାନ ରେକର୍ଡ ହେବ ! ଛାନବିନ୍ କରୁଛି କ୍ରାଇମବ୍ରାଞ୍ଚର ୫ ଜଣିଆ ଟିମ୍
ନନ୍ଦିଘୋଷ ବ୍ୟୁରୋ : ବଳଙ୍ଗା ପୀଡ଼ିତାଙ୍କ ବୟାନ ରେକର୍ଡ କରିପାରେ ପୋଲିସ । ଏଥିପାଇଁ ଦିଲ୍ଲୀ ଏମ୍ସର ଅନୁମତି ମଗାଯାଇଥିବା ଜଣାପଡ଼ିଛି। ପୀଡ଼ିତା ଜଣକ ଏବେ ଦିଲ୍ଲୀ ଏମ୍ସରେ ଚିକିତ୍ସାଧୀନ ଅଛନ୍ତି। ସେପଟେ ଏହି ଘଟଣାର ଛାନବିନ୍ କରୁଛି କ୍ରାଇମବ୍ରାଞ୍ଚର ୫ ଜଣିଆ ଟିମ୍। ସ୍ପେସାଲ ସ୍କ୍ଵାର୍ଡର ୩ଟି ଟିମ୍ ଓ ଗୁଇନ୍ଦା ବିଭାଗର ସ୍ଵତନ୍ତ୍ର ଟିମ୍ ମଧ୍ୟ ତଦନ୍ତରେ ସାମିଲ ଅଛନ୍ତି। ୨୦ରୁ ଅଧିକ ସନ୍ଦିଗ୍ଧ ବ୍ଯକ୍ତିଙ୍କ ମୋବାଇଲ ଟ୍ରାକ କରୁଛି ସାଇବର ପୋଲିସ । ସେହିପରି କେତେକ ପାର୍ସଲ ସଂସ୍ଥାର କର୍ମଚାରୀଙ୍କୁ ମଧ୍ୟ ପଚରା ଉଚରା କରୁଛି ପୋଲିସ । ଘଟଣାକୁ ୩ ଦିନ ହୋଇ ଯାଇଥିଲେ ମଧ୍ୟ କିଏ ନିଆଁ ଲଗାଇଥିଲା, ତାହା ଏବେ ବି ଜଣାପଡ଼ିନି କି କେହି ଏଯାଏ ଧରା ପଡ଼ି ନାହାନ୍ତି। ଜବତ ହୋଇଥିବା ଚପଲ କି ଅଳଙ୍କାର ଝିଅର ନୁହେଁ ବୋଲି ପୀଡ଼ିତାଙ୍କ ପରିବାର କହିବା ପରେ ଘଟଣା ଆହୁରି ରହସ୍ଯ ଘେରକୁ ଚାଲି ଯାଇଛି। କିରାସିନକୁ ନେଇ ମଧ୍ୟ ତଦନ୍ତ ଚାଲିଛି।
୬୪ କୋଟିର ଟଙ୍କାର ଲାଞ୍ଚ ମାମଲାରେ ICICI ବ୍ୟାଙ୍କର ପୂର୍ବତନ ସିଇଓ ଚନ୍ଦା କୋଚର ଦୋଷୀ ସାବ୍ୟସ୍ତ
ନନ୍ଦିଘୋଷ ବ୍ୟୁରୋ : ଆଇସିଆଇସିଆଇ ବ୍ୟାଙ୍କର ପୂର୍ବତନ ସିଇଓ ଚନ୍ଦା କୋଚରଙ୍କୁ ଦୋଷୀ ସାବ୍ୟସ୍ତ କରାଯାଇଛି। ତାଙ୍କ ଉପରେ ଭିଡିଓକନ୍ କମ୍ପାନୀକୁ ୩୦୦ କୋଟି ଟଙ୍କାର ଋଣ ପାସ୍ କରିବା ପାଇଁ ୬୪ କୋଟି ଟଙ୍କା ଲାଞ୍ଚ ନେବାର ଅଭିଯୋଗ ହୋଇଥିଲା। ଯେଉଁଥିରେ ତାଙ୍କୁ ଆପିଲେଟ୍ ଟ୍ରିବ୍ୟୁନାଲ୍ ଦୋଷୀ ସାବ୍ୟସ୍ତ କରିଛନ୍ତି । ଏକ ରିପୋର୍ଟ ଅନୁଯାୟୀ, ୩ ଜୁଲାଇରେ ଦିଆଯାଇଥିବା ଆଦେଶରେ, ଟ୍ରିବ୍ୟୁନାଲ୍ କହିଛନ୍ତି ଯେ, ଚନ୍ଦାଙ୍କ ସ୍ୱାମୀ ଦୀପକ କୋଚରଙ୍କ ଜରିଆରେ ଭିଡିଓକନ୍ ସହିତ ଜଡିତ ଏକ କମ୍ପାନୀ ମାଧ୍ୟମରେ ଟଙ୍କା ପ୍ରଦାନ କରାଯାଇଥିଲା। ଏହାକୁ ‘କ୍ୱିଡ୍ ପ୍ରୋ କ୍ୱ’ର ଏକ ସ୍ପଷ୍ଟ ମାମଲା ବୋଲି କୁହାଯାଇଛି ।
ଇଡି ଦାବି କରିଛି ଯେ ଚନ୍ଦା କୋଚର ଆଇସିଆଇସିଆଇ ବ୍ୟାଙ୍କର ଆଭ୍ୟନ୍ତରୀଣ ନୀତି ଉଲ୍ଲଂଘନ କରି ଏହି ଋଣ ପ୍ରଦାନ କରିଛନ୍ତି। ଟ୍ରିବ୍ୟୁନାଲ୍ ଇଡିର ଦାବିକୁ ସମର୍ଥନ କରି କହିଛନ୍ତି ଯେ ଚନ୍ଦା ତାଙ୍କ ସ୍ୱାମୀଙ୍କ ଭିଡିଓକନ୍ ସହିତ ବ୍ୟବସାୟିକ ସମ୍ପର୍କକୁ ଲୁଚାଇଥିଲେ, ଯାହା ବ୍ୟାଙ୍କର ସ୍ୱାର୍ଥ ମମ୍ୱନ୍ଧୀୟ ନିୟମ ବିରୁଦ୍ଧରେ ଥିଲା।
ଟଙ୍କାର ଖେଳ
ଟ୍ରିବ୍ୟୁନାଲ୍ ଅନୁଯାୟୀ, ICICI ବ୍ୟାଙ୍କ ଭିଡିଓକନ୍କୁ ୩୦୦ କୋଟି ଟଙ୍କା ଋଣ ଦେବା ମାତ୍ରେ, ପରଦିନ ଭିଡିଓକନ୍ର କମ୍ପାନୀ SEPL ରୁ NRPLକୁ ୬୪ କୋଟି ଟଙ୍କା ସ୍ଥାନାନ୍ତରିତ ହୋଇଥିଲା। କାଗଜପତ୍ରରେ, NRPLର ମାଲିକଙ୍କୁ ଭିଡିଓକନ୍ର ଅଧ୍ୟକ୍ଷ ଭେଣୁଗୋପାଳ ଧୂତଙ୍କୁ ଦର୍ଶାଯାଇଥିଲା, କିନ୍ତୁ ବାସ୍ତବରେ ଏହା ଦୀପକ କୋଚରଙ୍କ ଦ୍ୱାରା ନିୟନ୍ତ୍ରିତ ଥିଲା, ଯିଏ ଏହାର ପରିଚାଳନା ନିର୍ଦ୍ଦେଶକ ମଧ୍ୟ ଥିଲେ। ଟ୍ରିବ୍ୟୁନାଲ୍ ଏହାକୁ ଲାଞ୍ଚର ସିଧାସଳଖ ପ୍ରମାଣ ଭାବରେ ବିବେଚନା କରିଥିଲେ।
ଟ୍ରିବ୍ୟୁନାଲ୍ ୨୦୨୦ ମସିହାରେ ଏକ କର୍ତ୍ତୃପକ୍ଷଙ୍କ ନିଷ୍ପତ୍ତିକୁ ମଧ୍ୟ ଭୁଲ ବୋଲି କହିଛନ୍ତି, ଯେଉଁଥିରେ ଚନ୍ଦା ଏବଂ ତାଙ୍କ ସହଯୋଗୀଙ୍କ 78 କୋଟି ଟଙ୍କାର ସମ୍ପତ୍ତି ରିଲିଜ୍ କରିଥିଲେ । ଅନ୍ୟପଟେ ଦୃଢ଼ ପ୍ରମାଣ ଏବଂ ଘଟଣାଗୁଡ଼ିକର ସ୍ପଷ୍ଟ ସମୟସୀମା ଆଧାରରେ ED ସମ୍ପତ୍ତିକୁ ଆଟାଚ୍ କରିଛି। ଟ୍ରିବ୍ୟୁନାଲ୍ କହିଛନ୍ତି ଯେ ଋଣ ପ୍ରଦାନ, ଟଙ୍କା ସ୍ଥାନାନ୍ତର ଏବଂ ଦୀପକ କୋଚରଙ୍କ କମ୍ପାନୀକୁ ପାଣ୍ଠି ପଠାଇବା ଏସବୁ ଚନ୍ଦା କୋଚରଙ୍କ ଦ୍ୱାରା କ୍ଷମତାର ଅପବ୍ୟବହାର ଏବଂ ନୀତିର ଉଲ୍ଲଂଘନକୁ ଦର୍ଶାଉଛି।
ପୁଣି ମାଲକାନଗିରିରେ ଲଜ୍ଜା ! ଜଣେ ନାବାଳିକାକୁ ଦୁଷ୍କର୍ମ ଅଭିଯୋଗ
ନନ୍ଦିଘୋଷ ବ୍ୟୁରୋ : ମାଲକାନଗିରିରେ ମଧ୍ୟ ଜଣେ ନାବାଳିକାକୁ ଦୁଷ୍କର୍ମ ଅଭିଯୋଗ। ପୀଡ଼ିତାଙ୍କ ପରିବାର ମାଲକାନଗିରି ସଦର ଥାନାରେ ଲିଖିତ ଅଭିଯୋଗ କରିଛନ୍ତି। ମାଲକାନଗିରି ସଦର ଥାନା ଅଞ୍ଚଳର ନାବାଳିକା ଜଣକ ରବିବାର ସନ୍ଧ୍ୟାରେ ନିଜ ସାଙ୍ଗର ଜନ୍ମ ଦିନ ପାଳନ ପାଇଁ ତାଙ୍କ ଘରକୁ ଯାଇଥିଲେ। କିନ୍ତୁ ବିଳମ୍ଵିତ ରାତି ଯାଏ ନ ଫେରିବାରୁ ପରିବାର ଲୋକେ ଖୋଜାଖୋଜି କରିଥିଲେ। ବିଳମ୍ଵିତ ରାତିରେ ମାଲକାନଗିରି – ଜୟପୁର ରାସ୍ତାକୁ ସଂଯୋଗ କରୁଥିବା ମୁଖ୍ୟ ରାସ୍ତାର ବିଜାଘାଟିରେ ଉକ୍ତ ନାବାଳିକା ଓ ଜଣେ ଟ୍ରକ ଚାଳକକୁ ସନ୍ଦେହଜନକ ସ୍ଥିତିରେ ଦେଖିଥିଲେ କିଛି ଲୋକେ। ଖବର ଦେବା ପରେ ପୋଲିସ ସେଠାରେ ପହଞ୍ଚିଥିଲା। ନାବାଳିକାକୁ ଉଦ୍ଧାର କରି ଶକ୍ତି ସଦନ ଗୃହରେ ରଖାଯାଇଛି। ଟ୍ରକ ଚାଳକକୁ ଅଟକ ରଖିଛି ପୋଲିସ। ନାବାଳିକାଙ୍କ ପରିବାର ମାଲକାନଗିରି ଆଦର୍ଶ ଥାନାରେ ଲିଖିତ ଅଭିଯୋଗ କରିଛନ୍ତି।
ପୁରୀରେ ୩ ନାବାଳିକା ଭଉଣୀଙ୍କୁ ଅସଦାଚରଣ ଅଭିଯୋଗ
ନନ୍ଦିଘୋଷ ବ୍ୟୁରୋ : ପୁରୀରେ ୩ ନାବାଳିକା ଭଉଣୀଙ୍କୁ ଅସଦାଚରଣ ଅଭିଯୋଗ। ସମଙ୍ଗ ପାର୍କିଂରେ ଗତକାଲି ଏହି ଘଟଣା ଘଟିଥିବାର ଅଭିଯୋଗ ହୋଇଛି। ୩ ଜଣ ନାବାଳିକା ଟିଉସନ ସାରି କଣ୍ଠପୁର ଗାଁକୁ ଫେରୁଥିବା ବେଳେ ସେମାନଙ୍କୁ ଅସଦାଚରଣ କରାଯାଇଥିଲା। ୩ ଜଣ ଯୁବକ ଟଣାଓଟରା କରିଥିଲେ। ସେମାନଙ୍କଠାରୁ ନଗଦ ଟଙ୍କା ଓ ସୁନା ଚେନ ଛଡାଇ ନେଇଥିଲେ। ପୋଲିସ ନିକଟରେ ନାବାଳିକାଙ୍କ ଭାଇ ଅଭିଯୋଗ କରିଛନ୍ତି। ଏହା ପରେ ପୋଲିସ ଦୁଇ ଜଣକୁ ଧରିଥିବା ଜଣାପଡ଼ିଅଛି। ଅନ୍ୟ ୪ଜଣ ଖସି ପଳାଇଥିବା ବେଳେ ସେମାନଙ୍କୁ ଧରିବା ନେଇ ସଦର ଥାନା ପୋଲିସ ଉଦ୍ୟମ କରୁଥିବା ଥାନା ଅଧିକାରୀ ସୁନୀଲ କୁମାର ପ୍ରଧାନ କହିଛନ୍ତି।