ମୟୂରଭଞ୍ଜ ଉଦଳା ମାର୍କେଟରେ ଭୟାବହ ଅଗ୍ନିକାଣ୍ଡ। ବିଳମ୍ବିତ ରାତିରେ ଶାଢ଼ୀ ସୋରୁମରେ ଲାଗିଲା ନିଆଁ। ହୁ ହୁ ହୋଇ ଜଳିଲା ଦୋକାନ ଘର। ଜଳି ନଷ୍ଟ ପୋଡି ହୋଇଗଲା ୭୦ ଲକ୍ଷ ରୁ ଊର୍ଦ୍ଧ୍ବ ଟଙ୍କାର ଶାଢ଼ୀ ସହିତ ଅନ୍ୟ ସାମଗ୍ରୀ। ୩ ଘଣ୍ଟାର ପରିଶ୍ରମ ପରେ ଅଗ୍ନିଶମ ବାହିନୀ ଦ୍ବାରା ନିଆଁ ଆୟତ୍ତ ହୋଇଛି। ମାର୍କେଟରେ ଥିବା ଶାଢ଼ୀ ମହଲରେ ଅଚାନକ ନିଆଁ ଲାଗିଥିଲା। ଦୋକାନ ଭିତରେ ନିଆଁ ଲାଗିବା ପରେ ସଟର ଦେଇ ଧୂଆଁ ବାହାରିବା ରାତ୍ର ଜଗୁଆଳି ଏହା ଦେଖି ଦୋକାନ ମାଲିକଙ୍କ ଫୋନ କରିଥିଲେ। ଖବର ପାଇ ଉଦଳା ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଦୀର୍ଘ ୩ ଘଣ୍ଟାର ପରିଶ୍ରମ ପରେ ନିଆଁ କୁ ଆୟତ୍ତ କରିବାରେ ସକ୍ଷମ ହୋଇଥିଲେ। ଅଗ୍ନିକାଣ୍ଡରେ ୭୦ ଲକ୍ଷ ରୁ ଉର୍ଦ୍ଧ ଟଙ୍କାର ସାମଗ୍ରୀ ପୋଡି ନଷ୍ଟ ହୋଇଥିବା ବେଳେ ସର୍ଟ ସର୍କିଟ କୁ ଅଗ୍ନିକାଣ୍ଡ ହୋଇଥିବା ସନ୍ଦେହ କରାଯାଉଛି।
ଦୁର୍ଦ୍ଦାନ୍ତ ଅପରାଧୀ ସୁନିଲ ନାହାକକୁ ଏନକାଉଣ୍ଟର: ସୁନିଲର ବାମ ଗୋଡ଼ରେ ବାଜିଛି ଗୁଳି
ଦୁର୍ଦ୍ଦାନ୍ତ ଅପରାଧୀ ସୁନିଲ ନାହାକକୁ ଏନକାଉଣ୍ଟର। ବ୍ରହ୍ମପୁର ପୋଲିସ ଜିଲ୍ଲା ଗୋଳନ୍ଥରା ଥାନା ପକ୍ଷରୁ ଦୁର୍ଦ୍ଦାନ୍ତ ଅପରାଧୀକୁ ଏନକାଉଣ୍ଟର କରାଯାଇଛି । ବ୍ରହ୍ମପୁର ଏସପିଙ୍କ ନିର୍ଦ୍ଦେଶ କ୍ରମେ ଥାନା ଅଧିକାରୀ ବିବେକାନନ୍ଦ ଓ ତାଙ୍କ ଟିମ ଏନକାଉଣ୍ଟର କରିଛନ୍ତି। ସୁନିଲ ନିମଖଣ୍ଡି ଥାନା ଲୁଟ୍ ଘଟଣା ସମେତ ଅନ୍ୟାନ୍ୟ ମାମଲାରେ ସମ୍ପୃକ୍ତ ରହି ଫେରାର ରହିଥିଲା । ଗୋଳନ୍ଥରା ଥାନା ପୋଲିସ ଓ ସ୍ୱତନ୍ତ୍ର ଟିମ ଚଢ଼ାଉ ବେଳେ ସୁନିଲ ନାହାକ ପୋଲିସ ଉପରକୁ ଦୁଇ ରାଉଣ୍ଡ ଗୁଳି କରିଥିବା ଜଣାପଡ଼ିଛି । ସୁନିଲର ବାମ ଗୋଡ଼ରେ ଗୁଳି ବାଜିଥିବା ସୂଚନା ରହିଛି ।
ଜାତୀୟ ଚଳଚ୍ଚିତ୍ର ପୁରସ୍କାର ନାଁ ଘୋଷଣା: କଥଲ ଶ୍ରେଷ୍ଠ ହିନ୍ଦି ଫିଲ୍ମ, ପୁଷ୍କରାକୁ ଶ୍ରେଷ୍ଠ ଓଡ଼ିଆ ଚଳଚ୍ଚିତ୍ର ପୁରସ୍କାର
ନନ୍ଦିଘୋଷ ବ୍ୟୁରୋ: ୭୧ତମ ଜାତୀୟ ଚଳଚ୍ଚିତ୍ର ପୁରସ୍କାର ବିଜେତାଙ୍କ ନାଁ ଘୋଷଣା କରାଯାଇଛି । ଏଥର ଏହି ପୁରସ୍କାରଗୁଡ଼ିକ ୨୦୨୩ ମସିହାରେ ମୁକ୍ତିଲାଭ କରିଥିବା ଚଳଚ୍ଚିତ୍ର ପାଇଁ ଦିଆଯାଇଛି । ଏଥର ଜାତୀୟ ପୁରସ୍କାରରେ ସର୍ବୋତ୍ତମ ହିନ୍ଦୀ ଚଳଚ୍ଚିତ୍ର ପାଇଁ ‘କଥଲ’କୁ ପୁରସ୍କାର ଦିଆଯାଇଛି । ଏହି ଚଳଚ୍ଚିତ୍ରଟି ୧୯ ମଇ ୨୦୨୩ରେ ନେଟଫ୍ଲିକ୍ସରେ ମୁକ୍ତିଲାଭ କରିଥିଲା । ‘କଥଲ’ରେ ସାନ୍ୟା ମାଲହୋତ୍ରା, ଅନନ୍ତ ଭି ଜୋଶୀ, ବିଜୟ ରାଜ, ରାଜପାଲ ଯାଦବ, ବ୍ରିଜେନ୍ଦ୍ର କାଲା ଏବଂ ନେହା ସରାଫଙ୍କ ଭଳି କଳାକାର ମୁଖ୍ୟ ଭୂମିକାରେ ଅଭିନୟ କରିଥିଲେ ।
ଫିଲ୍ମ ‘ଜବାନ’ ପାଇଁ ଶାହରୁଖ ଖାନ ଏବଂ ଫିଲ୍ମ ‘ଟ୍ବେଲଥ ଫେଲ୍’ ପାଇଁ ବିକ୍ରାନ୍ତ ମାସେଙ୍କୁ ଶ୍ରେଷ୍ଠ ଅଭିନେତା ପୁରସ୍କାର ଦିଆଯାଇଛି । ଏହି ପରିପ୍ରେକ୍ଷୀରେ ଫିଲ୍ମ ‘ମିସେସ୍ ଚାଟାର୍ଜୀ ଭର୍ସେସ୍ ନରୱେ’ ପାଇଁ ରାଣୀ ମୁଖାର୍ଜୀଙ୍କୁ ଶ୍ରେଷ୍ଠ ଅଭିନେତ୍ରୀ ପୁରସ୍କାର ଦିଆଯାଇଛି । କେରଳ ଫାଇଲ୍ସ ସିନେମା ଶ୍ରେଷ୍ଠ ସିନେମାଟୋଗ୍ରାଫି ପାଇଁ ପୁରସ୍କାର ଜିତିଛି ।
ଶ୍ରେଷ୍ଠ ନୃତ୍ୟ ନିର୍ଦ୍ଦେଶିକଙ୍କ କଥା କହିବା, ତେବେ ବୈଭବୀ ମର୍ଚାଣ୍ଟଙ୍କୁ ‘ରକି ରାନୀ କି ପ୍ରେମ କାହାନି’ ଚଳଚ୍ଚିତ୍ରର “ଢ଼ିଣ୍ଡୋରା ବାଜେ”ରେ ଗୀତ ପାଇଁ ପୁରସ୍କାର ମିଳିଛି । ଜାତୀୟ ଚଳଚ୍ଚିତ୍ର ପୁରସ୍କାରରେ “ଆନିମଲ୍” ଚଳଚ୍ଚିତ୍ରକୁ ଏକ ସ୍ୱତନ୍ତ୍ର ଉଲ୍ଲେଖ ମିଳିଛି । ଶ୍ରେଷ୍ଠ ତେଲୁଗୁ ଚଳଚ୍ଚିତ୍ର ‘ବାଗୱନ୍ତ କେଶରୀ’ ସମ୍ନାନିତ ହୋଇଛି । ଶ୍ରେଷ୍ଠ ଅଣ ଫିଚର ଫିଲ୍ମ ପୁରସ୍କାର “ଦି ସାଇଲେଣ୍ଟ ଏପିଡେମିକ୍”କୁ ଦିଆଯାଇଛି । ଶ୍ରେଷ୍ଠ ଚଳଚ୍ଚିତ୍ର ସ୍କ୍ରିପ୍ଟ ପାଇଁ “ସନଫ୍ଲାୱାର୍ ୱେର୍ ଦି ଫାଷ୍ଟ ୱନ୍ସ ଟୁ ନୋ” ଚଳଚ୍ଚିତ୍ରକୁ ଚୟନ କରାଯାଇଛି । ଶ୍ରେଷ୍ଠ ଚଳଚ୍ଚିତ୍ର କ୍ରିଟିକ୍ ପୁରସ୍କାର ଉତ୍ପଲ୍ ଦତ୍ତଙ୍କୁ ଦିଆଯାଇଛି ।
ଏହି ଅବସରରେ ଓଡ଼ିଆ ସିନେ ଜଗତକୁ ମିଳିଛି ବଡ଼ ଉପହାର । ଓଲିଉଡ୍ ଇଣ୍ଡଷ୍ଟ୍ରି ପାଇଁ ଆସିଛି ଖୁସିର ଖବର । ସବ୍ୟସାଚୀ ମିଶ୍ର ଅଭିନୀତ ‘ପୁଷ୍କରା’କୁ ମିଳିଛି ଶ୍ରେଷ୍ଠ ଓଡ଼ିଆ ଚଳଚ୍ଚିତ୍ର ପୁରସ୍କାର । ୨୦୨୩ରେ ମୁକ୍ତିଲାଭ କରିଥିବା ଓଡ଼ିଆ ଚଳଚ୍ଚିତ୍ର ‘ପୁଷ୍କରା’ ବହୁ ପ୍ରଶଂସା ସାଉଁଟିଥିଲା । ଏହି ଚଳଚ୍ଚିତ୍ରରେ ସବ୍ୟସାଚୀ ମିଶ୍ର ଏବଂ ସୁପ୍ରିୟା ନାୟକ ଜୀବନ୍ତ ଅଭିନୟ କରି ଦର୍ଶକଙ୍କ ହୃଦୟ ଜିଣିବାରେ ସଫଳ ହୋଇଥିଲେ । ‘ପୁଷ୍କରା’ ଚଳଚ୍ଚିତ୍ରର ପ୍ରଯୋଜନା କରିଥିଲେ ରମେଶ ବାରିକ । ଶଙ୍କର ତ୍ରିପାଠୀ ଏହାର କାହାଣୀ ଏବଂ ସଂଳାପ ଲେଖିଥିଲେ ।
ନବୀନ ନାଁ ନେଇଯିବେ ବୋଲି ମେଟ୍ରୋ ପ୍ରକଳ୍ପକୁ ବଳି ପକାଇ ଦେଲେ ରାଜ୍ୟ ସରକାର
ନନ୍ଦିଘୋଷ ବ୍ୟୁରୋ: ଓଡିଶାର ମେଟ୍ରୋ ରେଳ ସ୍ବପ୍ନ ସ୍ବପ୍ନରେ ରହିଗଲା । ନବୀନ ପଟ୍ଟନାୟକ ନାଁ ନେଇଯିବେ ବୋଲି ବିଜେପି ସରକାର ମେଟ୍ରୋ ପ୍ରକଳ୍ପ କରିବାକୁ ଚାହୁନାହିଁ ବୋଲି ଅଭିଯୋଗ କରିଛନ୍ତି ଉଭୟ କଂଗ୍ରେସ ଓ ବିଜେଡି । ରାଜ୍ୟ ସରକାରଙ୍କ ଏପରି ଆଭିମୁଖ୍ୟ ଓଡ଼ିଶାକୁ ପଛକୁ ନେଇଯାଇଛି ବୋଲି ବିଜେଡି ଅଭିଯୋଗ କରିଛି । ଯାହାର ଜବାବରେ ବିଜେପି କହିଛି ରାଜଧାନୀରେ ମେଟ୍ରୋ ପ୍ରକଳ୍ପ ଆବଶ୍ୟକତା ନାହିଁ । ଯାହାକୁ ନେଇ ରାଜନୀତି ତେଜିବାରେ ଲାଗିଛି ।
ନବୀନଙ୍କ ଶାସନ ସମୟରେ ଓଡ଼ିଶାର ରାଜଧାନୀ ଭୁବନେଶ୍ବର ସାଜିଥିଲା ଦେଶ ତଥା ବିଶ୍ବର ଏକ ପ୍ରମୁଖ ଡେଷ୍ଟିନେସନ । କ୍ରୀଡା, ଶିଳ୍ପୟନ, ଆଇଟି, ପର୍ଯ୍ୟଟନ ସବୁଥିରେ ମୁଖ୍ୟ ଆକର୍ଷଣ ସାଜିଥିଲା ଭୁବନେଶ୍ବର । ସେଥିପାଇଁ ହୁ ହୁ ହୋଇ ବଢୁଥିବା ଭୁବନେଶ୍ବରକୁ ଦିଲ୍ଲୀ, ମୁମ୍ବାଇ, ବାଙ୍ଗାଲୋର ସହର ପରି ଗଢି ତୋଳିବାକୁ ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ ମେଟ୍ରୋ ପ୍ରକଳ୍ପର ପରିକଳ୍ପନା କରିଥଲେ । ୨୦୨୩ ଏପ୍ରିଲ ୧ ତାରିଖରେ ମେଟ୍ରୋ ପ୍ରକଳ୍ପକୁ ଅନୁମୋଦନ କରିଥିଲେ ନବୀନ । ୨୦୨୪ ଜାନୁଆରୀ ପହିଲାରେ ତ୍ରିଶୁଳିଆରେ ନବୀନ ପ୍ରଳ୍ପଳର ଭିତ୍ତିପ୍ରସ୍ତର ସ୍ଥାପନ କରିଥିଲେ । କାମ ମଧ୍ୟ ଆରମ୍ଭ ହୋଇଯାଇଥିଲା । ପ୍ରଥମ ପର୍ଯ୍ୟାୟରେ ଭୁବନେଶ୍ବର ବିମାନବନ୍ଦରୁ ତ୍ରିଶୁଳିଆ ଯାଏଁ ମେଟ୍ରୋ ଗଡିଥାନ୍ତା । ପ୍ରକଳ୍ପ ପାଇଁ ମୋଟ ୬ ହଜାର ୨୫୫ କୋଟି ଟଙ୍କା ଖର୍ଚ୍ଚ ହୋଇଥାନ୍ତା । ହେଲେ ନବୀନଙ୍କ ଏହି ସ୍ବପ୍ନକୁ ବିଜେପି ସରକାର ଧୂଳିସାତ କରିଛି । ତାହା କେବଳ ଶ୍ରେୟ ରାଜନୀତି ପାଇଁ । ଯାହାକୁ ନେଇ ବିଜେପି ସରକାର ଉପରେ ବର୍ଷିଛନ୍ତି ଉଭୟ ବିଜେଡି ଓ କଂଗ୍ରେସ । ପିସିସି ସଭାପତି ଭକ୍ତ ଚରଣ ଦାସ କହିଛନ୍ତି, ବିଜେଡି ସରକାର ମେଟ୍ରୋ ଶ୍ରେୟ ନେଇଯିବ ବୋଲି ବିଜେପି ପ୍ରକଳ୍ପ କରୁନାହିଁ । ବିଜେପି ସରକାରକୁ ଆସିବା ପରେ ଓଡିଶାବାସୀଙ୍କ ସବୁ ସ୍ବପ୍ନକୁ ଧୂଳିସାତ କରୁଛି ବୋଲି କହିଛନ୍ତି ବିଜେଡି ବିଧାୟକ ସାରଦା ଜେନା । ମେଟ୍ରୋ ପ୍ରକଳ୍ପ ହେଲେ ନବୀନ ପଟ୍ଟନାୟକ ନାଁ ନେଇଯିବେ ବୋଲି ବିଜେପି ପ୍ରକଳ୍ପକୁ ବନ୍ଦ କରିଦେଲା । ବିଜେପି ବିଧାୟକ ବାବୁ ସିଂହ ଏହାର ଜବାବରେ କହିଛନ୍ତି ରାଜଧାନୀରେ ମେଟ୍ରୋର ଆବଶ୍ୟକତା ନାହିଁ ।
ଅନ୍ୟପଟେ ଭୁବେନଶ୍ବର ମଧ୍ୟ ବିଧାୟକ ଅନନ୍ତ ନାରାୟଣ ଜେନା କହିଛନ୍ତି, ମେଟ୍ରୋ ପ୍ରକଳ୍ପ ନେଇ ବିଜେପି ବିଧାୟକ ଓ ମନ୍ତ୍ରୀମାନେ କେତେବେଳେ କେଉଁ ସୂଚନା ଦେଉଛନ୍ତି ତାହାର ତାଳମେଳ ନାହିଁ । ଭୁବନେଶ୍ବର ମେଟ୍ରୋ ଚୁକ୍ତିନାମା ବାତିଲ ଅତ୍ୟନ୍ତ ଦୁର୍ଭାଗ୍ୟଜନକ । ଭୁବନେଶ୍ବର ପାଇଁ ମେଟ୍ରୋ ଜରୁରୀ ହୋଇପଡ଼ିଛି । ବିଜେଡି ସରକାର କାମ ଆରମ୍ଭ କରିଥିଲେ । ପ୍ରକଳ୍ପ ଶେଷ ହେଲେ କାଳେ ନବୀନ ନାଁ ନେଇଯିବେ ତେଣୁ ବିଜେପି ପ୍ରକଳ୍ପକୁ ବନ୍ଦ କରିଛି । ଓଡିଶାବାସୀ ଏହାର ଜବାବ ଦେବେ ବୋଲି ସେ କହିଛନ୍ତି ।
୨୦୨୭-୨୮ ସୁଦ୍ଧା ମେଟ୍ରୋ ପ୍ରକଳ୍ପ ଶେଷ କରିବାକୁ ଲକ୍ଷ୍ୟ ରଖାଯାଇଥିଲା । ହେଲେ ସରକାର ବଦଳିବା ପରେ ସବୁ କିଛି ବଦଳିଗଲା ଓ ମେଟ୍ରୋ ରେଳ ଏବେ ଅନ୍ଧାରକୁ ଚାଲିଯାଇଛି ।
ବଜାରରେ ଲାଗିଛି ଦରଦାମ ନିଆଁ, ସରକାରଙ୍କ ଉପରେ ବର୍ଷିଲା ବ୍ୟବସାୟୀ ମହାସଂଘ
ନନ୍ଦିଘୋଷ ବ୍ୟୁରୋ: ଦୋକନ ବଜାରରେ ଯିଏ ଯେତେ ପାରିଲା ସେତେ ଦର ନେଲା । ଅତ୍ୟାବଶ୍ୟକ ସାମଗ୍ରୀ ଠାରୁ ଆରମ୍ଭ କରି ପନିପରିବା ସବୁଥିରେ ଏବେ ଏଭଳି ଅବସ୍ଥା । ଯାହାକୁ ନେଇ ସରକାରଙ୍କ ଉପରେ ବର୍ଷିଛି ବ୍ୟବସାୟୀ ମହାସଂଘ । ସରକାରଙ୍କ ଆନ୍ତରିକତା ନ ରହିଲେ ଏମିତି ହିଁ ହେବ ବୋଲି କହିଛି ମହାସଂଘ । ଏପରିକି ସରକାରକୁ ୧୩ ମାସରୁ ଅଧିକ ବିତିଯାଇଥିଲେ ମଧ୍ୟ ନା ଉତ୍ପାଦନ ବଢ଼ିଲା ନା ଚାଷୀ ସାମଗ୍ରୀ ରଖିବାକୁ ଶିତଲଭଣ୍ଡାରଟିଏ ହେଲା । ତେଣୁ ସାଧାରଣ ଲୋକେ ହିଁ ହଇରାଣ ହେବା ସାର ହୋଇଛି ବୋଲି କୁହାଯାଇଛି । ସେପଟେ ଛୋଟ ବ୍ୟବସାୟୀମାନେ ମଧ୍ୟ ସେମାନଙ୍କ ହାତରେ କିଛି ନ ଥିବା କହିଛନ୍ତି ।
ଦର ବୃଦ୍ଧି ଓ ଦରରେ ଅସଂଗତିକୁ ନେଇ ସରକାରଙ୍କୁ ସମ୍ପୂର୍ଣ୍ଣ ଦୋଷ ଦେଇଛି ଓଡିଶା ବ୍ୟବସାୟୀ ମହାସଂଘ। କଞ୍ଚାଲଙ୍କା, କଦଳୀ, ଟମାଟୋଠୁ ଆରମ୍ଭ କରି ଏକାଧିକ ସାମଗ୍ରୀ ପାଇଁ ବାହାର ରାଜ୍ୟ ଉପରେ ଓଡ଼ିଶା ନିର୍ଭରଶୀଳ । ରାଜ୍ୟ ସରକାରଙ୍କ ଉପରେ ଯେଉଁ ଆଶା ଥିଲା ତାହା ହେଲାନି । ଏ ସମ୍ପର୍କରେ ଆଲୋଚନା ପାଇଁ ସରକାର କାହିଁକି ପଛାଉଛନ୍ତି ବୋଲି ପ୍ରଶ୍ନ କରିଛି ବ୍ୟବସାୟୀ ମହାସଂଘ । ଏସବୁ ପ୍ରସଙ୍ଗକୁ ନେଇ ଆସନ୍ତାକାଲି ଦିଲ୍ଲୀ ଗସ୍ତ କରିବ ବ୍ୟବସାୟୀ ମହାସଂଘ । ଦିଲ୍ଲୀରେ ହେବ ଗୁରୁତ୍ୱପୂର୍ଣ୍ଣ ବୈଠକ । ଦିଲ୍ଲୀରେ ଲୋକସଭା ବାଚସ୍ପତି ଓ ବାଣିଜ୍ୟ ମନ୍ତ୍ରୀ ପୀୟୂଷ ଗୋୟଲଙ୍କୁ ଭେଟି ବିଭିନ୍ନ ପ୍ରସଙ୍ଗରେ ଆଲୋଚନା କରିବ ବ୍ୟବସାୟୀ ମହାସଂଘ ।
ଏବେ ଟମାଟୋ ଦର ଆକାଶଛୁଆଁ । କେଉଁଠି ଦର କିଲୋ ପିଛା ୬୦ ତ ଆଉ କେଉଁଠି ୧୦୦ ରେ ବିକ୍ରି ହେଉଛି । ବିଶେଷ କରି ଖୁଚୁରା ବଜାରରେ ମନଇଚ୍ଛା ଦର ନିଆଯାଉଛି । ଓଡ଼ିଶାରେ ସାମଗ୍ରୀ ସଂରକ୍ଷଣ ପାଇଁ ବ୍ୟବସ୍ଥା କାହିଁକି ଅଣାଯାଉନାହିଁ ବୋଲି ପ୍ରଶ୍ନ ଉଠିଛି । ଯେଉଁଥି ପାଇଁ ବାହାରୁ ଆସୁଥିବା ସାମଗ୍ରୀକୁ ଯିଏ ଯାହା ସୁବିଧା ଦରରେ ବିକୁଛନ୍ତି । ସରକାର ଚାଷୀଙ୍କ ଉପରେ ଫୋକସ କରୁ ନଥିବା ଅଭିଯୋଗ ହୋଇଛି । କିଛି ଦିନ ଆଳୁ ଓ ପୂର୍ବରୁ ଟମାଟୋ ଯନ୍ତ୍ରଣା ଭୋଗୁଥିବା ଲୋକେ ଏବେ ପୁଣି ଦରଦାମ ନିଆଁରେ ଜଳିବା ଆରମ୍ଭ କରିଛନ୍ତି ।
ମ୍ୟାଲେରିଆ ନିରାକରଣରେ ଓଡ଼ିଶା ଫେଲ, NVBDCP ରିପୋର୍ଟ ପଦାକୁ ଆଣିଲା ବାସ୍ତବ ଚିତ୍ର
ନନ୍ଦିଘୋଷ ବ୍ୟୁରୋ: ମ୍ୟାଲେରିଆ ନିରାକରଣରେ ଓଡ଼ିଶା ଫେଲ । ଜାତୀୟ କୀଟବାହିତ ରୋଗ ନିୟନ୍ତ୍ରଣ କାର୍ଯ୍ୟକ୍ରମ (NVBDCP) ରିପୋର୍ଟ ଅନୁସାରେ ମ୍ୟାଲେରିଆ ବୃଦ୍ଧିରେ ଝାଡ଼ଖଣ୍ଡ ଓ ଛତିଶଗଡ ପରି ମ୍ୟାଲେରିଆ ପ୍ରବଣ ରାଜ୍ୟକୁ ପଛରେ ପକାଇଲା ଓଡ଼ିଶା । ଚଳିତବର୍ଷ ୫ ଜିଲ୍ଲାରେ ୧୦ ହଜାରରୁ ଅଧିକ ରୋଗୀ ଥିବାବେଳେ ସର୍ବାଧିକ ରୋଗୀ ସଂଖ୍ୟା ଏକ ଲକ୍ଷ ଟପିଛି । ଯାହା ମ୍ୟାଲେରିଆ ନିରାକରଣ କାର୍ଯ୍ୟକ୍ରମର କାର୍ଯ୍ୟକାରିତାକୁ ନେଇ ପ୍ରଶ୍ନ ଉଠାଇଛି ।
ଓଡ଼ିଶାର ଅଲୋଡ଼ା ରେକର୍ଡ । ଜାତୀୟ କୀଟ ବାହିତ ରୋଗ ନିୟନ୍ତ୍ରଣ କାର୍ଯ୍ୟକ୍ରମର ରିପୋର୍ଟ ରାଜ୍ୟର ମ୍ୟାଲେରିଆ ନିରାକରଣର ବାସ୍ତବ ଚିତ୍ର ପଦାରେ ପକାଇ ଦେଇଛି । ସ୍ଥିତି ଏପରି ବିଗିଡ଼ିଲାଣି ଯେ ମ୍ୟାଲେରିଆ ବୃଦ୍ଧିରେ ଝାଡ଼ଖଣ୍ଡ ଓ ଛତିଶଗଡ ପରି ରାଜ୍ୟକୁ ପଛରେ ପକାଇଦେଇଛି ଓଡ଼ିଶା । ଚଳିତ ବର୍ଷ ଏକ ଲକ୍ଷ ୬୭ ହଜାର ୨୩୩ ମ୍ୟାଲେରିଆ ରୋଗୀ ଚିହ୍ନଟ ହୋଇଛନ୍ତି । ସ୍ବାସ୍ଥ୍ୟ ବିଭାଗ ପାଖରେ ରାୟଗଡ଼ାରେ ୩୧ ହଜାର ୭୪୫, ନବରଙ୍ଗପୁରରେ ୨୮ ହଜାର ୧୩୪, କନ୍ଧମାଳରେ ୨୨ ହଜାର ୧୦୫, ନୟାଗଡ଼ରେ ୧୨ ହଜାର ୪୬୦, କେନ୍ଦୁଝରରେ ୧୧ ହଜାର ୭୬୫ ମ୍ୟାଲେରିଆ ରୋଗୀଙ୍କ ରିପୋର୍ଟ ରହିଛି । ସୁବର୍ଣ୍ଣପୁର, ଅନୁଗୁଳ, ମାଲକାନଗିରିରେ ୬ ହଜାରରୁ ଅଧିକ ମ୍ୟାଲେରିଆ ରୋଗୀ ଅଛନ୍ତି । କୋରାପୁଟ ଓ ବଲାଙ୍ଗୀର ୫ ହଜାର ଛୁଇଁବାକୁ ଯାଉଛି ସଂଖ୍ୟା । ମ୍ୟାଲେରିଆରେ ୬ ଜଣଙ୍କ ମୃତ୍ୟୁ ବି ହୋଇଛି । ମାଲକାନଗିରିରେ ୩, କେନ୍ଦୁଝର, ଅନୁଗୁଳ ଓ ବୌଦ୍ଧରେ ଜଣେ ଲେଖାଏଁ ରୋଗୀ ମ୍ୟାଲେରିଆ ଯୋଗୁଁ ପ୍ରାଣ ହରାଇଛନ୍ତି । ଦେଶର ସମୁଦାୟ ରୋଗୀଙ୍କ ୩୮ ପ୍ରତିଶତ ମ୍ୟାଲେରିଆ ରୋଗୀ ଓଡ଼ିଶାରେ ଅଛନ୍ତି । ଛତିଶଗଡ଼, ଝାଡ଼ଖଣ୍ଡ ଭଳି ମ୍ୟାଲେରିଆ ପ୍ରବଣ ରାଜ୍ୟରେ ରୋଗୀଙ୍କ ସଂଖ୍ୟା ଓଡ଼ିଶା ତୁଳନାରେ ଯଥେଷ୍ଟ କମ୍ ରହିଛି । ଓଡ଼ିଶାର ଏହି ଚିନ୍ତାଜନକ ସ୍ଥିତି ଜୁଲାଇ ଶେଷ ଯାଏଁ ରେକର୍ଡ କରାଯାଇଛି । ଆଗାମୀ ୫ ମାସରେ ଏହା ଯଥେଷ୍ଟ ବୃଦ୍ଧି ପାଇବ ବୋଲି ଆଶଂକା କରାଯାଉଛି ।
ମ୍ୟାଲେରିଆ ରୋଗୀଙ୍କ ସଂଖ୍ୟା ବଢିବା ସହ ଦମନ କାର୍ଯ୍ୟକ୍ରମର କାର୍ଯ୍ୟକାରିତାକୁ ନେଇ ପ୍ରଶ୍ନ ଉଠିଲାଣି । ଦମନରେ ଚିହ୍ନଟ ହେଉଥିବା ରୋଗୀଙ୍କୁ ରାଜ୍ୟ ସରକାରଙ୍କ ବାର୍ଷିକ ମ୍ୟାଲେରିଆ ରୋଗୀ ତାଲିକାରେ ସାମିଲ କରାଯାଉ ନାହିଁ । ଯେଉଁଥି ପାଇଁ ରାଜ୍ୟରେ ପ୍ରତିବର୍ଷ ପ୍ରକୃତରେ କେତେ ସଂଖ୍ୟକ ଆକ୍ରାନ୍ତ ଚିହ୍ନଟ ହେଉଛନ୍ତି, ତାହାର ସ୍ପଷ୍ଟ ଚିତ୍ର ମିଳୁନି । ଲୋକଙ୍କ ଏଲଏଲଆଇଏନ ମଶାରୀ ବ୍ୟବହାର ଉପରେ ବି ସନ୍ଦେହ ଉପୁଜିଲାଣି । ସଚେତନତା ଅଭାବ ବି ଏହାର ଏକ ବଡ଼ କାରଣ ପାଲଟିଛି ।
୨୦୩୦ ମସିହା ସୁଦ୍ଧା କେନ୍ଦ୍ର ସରକାର ମ୍ୟାଲେରିଆ ନିରାକରଣ ପାଇଁ ଲକ୍ଷ୍ୟ ରଖିଛନ୍ତି । ୨୦୨୭ ସୁଦ୍ଧା ନିଜ ଅଞ୍ଚଳରେ ମ୍ୟାଲେରିଆ ଚିହ୍ନଟକୁ ଶୂନ କରିବାର ଲକ୍ଷ୍ୟ ଧାର୍ଯ୍ୟ ହୋଇଛି । ହେଲେ ଓଡ଼ିଶାରେ ଯେଉଁଭଳି ଢଙ୍ଗରେ ମ୍ୟାଲେରିଆ ନିୟନ୍ତ୍ରଣ କାର୍ଯ୍ୟକ୍ରମ ଚାଲିଛି, ତାହା କେନ୍ଦ୍ର ସରକାରଙ୍କ ଲକ୍ଷ୍ୟ ପୂରଣରେ ବାଧକ ସାଜିପାରେ ।
ଓଟିଇଟି ପ୍ରଶ୍ନପତ୍ର ମାମଲାକୁ ନେଇ ସରକାରଙ୍କୁ ଘେରିଲେ ବିରୋଧୀ
ନନ୍ଦିଘୋଷ ବ୍ୟୁରୋ: ରକ୍ଷକ ସାଜୁଛି ଭକ୍ଷକ । ଓଟିଇଟି ପ୍ରଶ୍ନପତ୍ର ମାମଲାକୁ ନେଇ ସରକାରଙ୍କୁ ଘେରିଲେ ବିରୋଧୀ । ସରକାରଙ୍କୁ ମନେପକାଇ ଦେଇ ବିଜେଡି କହିଛି, ପୂର୍ବରୁ ସରକାର ଘୋଷଣା କରିଥିଲେ ପ୍ରଶ୍ନପତ୍ର ପ୍ରଘଟ ହେଲେ କୋଟିଏ ଟଙ୍କାର ଜରିମାନା ସହ ସଶ୍ରମ କାରାଦଣ୍ଡ ଦିଆଯିବ । ଉପସଭାପତି ନିହାର ମହାନ୍ତିଙ୍କ କାରନାମାକୁ ନେଇ ପ୍ରଶ୍ନ ଉଠାଇଛନ୍ତି ପୂର୍ବତନ ମୁଖ୍ୟ ଶାସନ ସଚିବ । ସେପଟେ ଏହି ମାମଲାରେ ଏବେ ସୁଦ୍ଧା ୭ ଜଣ ଗିରଫ ହୋଇଛନ୍ତି । ହେଲେ ପ୍ରଶ୍ନପତ୍ର ଲିକର ଚେର ପାଖରେ ପହଞ୍ଚିବାର ରହିଛି ଆବଶ୍ୟକତା ।
ବୋର୍ଡର ଉପସଭାପତିଙ୍କ ପାସଓ୍ବାର୍ଡ କେମିତି ପାଇଲେ ଅଭିଯୁକ୍ତ ଶିକ୍ଷକ ? କେମିତି ଲିକ୍ ହେଲା ଓଟିଇଟି ପ୍ରଶ୍ନପତ୍ର । ଏସବୁ ଗୋଲକଧନ୍ଦା ଭିତରେ କିଏ ? ଓଟିଇଟି ପ୍ରଶ୍ନପତ୍ର ଲିକ୍ ମାମଲାରେ ସରକାରଙ୍କୁ ଘେରିଛନ୍ତି ବିରୋଧୀ । ପ୍ରଶ୍ନପତ୍ର ଲିକ୍ ଘଟଣାରେ ପୂର୍ବରୁ ୬ ଜଣଙ୍କୁ ଗିରଫ କରିଥିଲା କ୍ରାଇମବ୍ରାଞ୍ଚ । ଆଜି ଆଉ ଜଣେ ଅଭିଯୁକ୍ତ ଶିକ୍ଷକଙ୍କୁ ଗିରଫ କରାଯାଇଛି । ଗଣଶିକ୍ଷା ମନ୍ତ୍ରୀଙ୍କ ଦାବି କାହାରିକୁ ଛଡ଼ାଯିବ ନାହିଁ । ଇଂରାଜୀ ପ୍ରଶ୍ନପତ୍ରକୁ ଓଡ଼ିଆରେ ଅନୁବାଦ କରି ଗିରଫ ହୋଇଛନ୍ତି କଳାହାଣ୍ଡିର ଶିକ୍ଷକ ପ୍ରଶାନ୍ତ ଖମାରୀ । ପ୍ରଶାନ୍ତ ଓଡ଼ିଆ ଅନୁବାଦ କରିବା ପରେ ଏହାକୁ ହାତରେ ଲେଖି ଅନ୍ୟ ଜଣେ ଅଭିଯୁକ୍ତ ବିଜୟ ମିଶ୍ରଙ୍କୁ ପଠାଇବା ସହ ୯୯ ହଜାର ଟଙ୍କା ଅନଲାଇନରେ ପଠାଇଥିଲେ । ପ୍ରଶାନ୍ତକୁ କ୍ରାଇମବ୍ରାଞ୍ଚ ଗିରଫ କରିଥିବା ବେଳେ, ବୋର୍ଡର ସମସ୍ତ କର୍ମଚାରୀଙ୍କୁ ପଚରାଉଚରା ଜାରି ରଖିଛି ।
ସରକାରଙ୍କ ଏପରି ଅକ୍ଷମଣୀୟ ତ୍ରୁଟିକୁ ସମାଲୋଚନା କରିଛନ୍ତି ବିରୋଧୀ ବିଜେଡି ଓ କଂଗ୍ରେସ । ବୋର୍ଡର ଉପସଭାପତିଙ୍କ ଭୂମିକାକୁ ନେଇ ପ୍ରଶ୍ନ ଉଠାଇବା ସହ ପ୍ରାଶାସନିକ ତଦନ୍ତ ଦାବି କରିଛନ୍ତି ପୂର୍ବତନ ମୁଖ୍ୟ ଶାସନ ସଚିବ ବିଜୟ ପଟ୍ଟନାୟକ । ଉପସଭାପତି ନିହାର ମହାନ୍ତିଙ୍କ ଲାପଟପକୁ ପ୍ରଶ୍ନପତ୍ର କିପରି ଆସିଲା ? ରାଜ୍ୟର ବିଭିନ୍ନ ପରୀକ୍ଷାର ଦାୟିତ୍ବ ନେଇଥିବା ଚାରୁ ମାଇଣ୍ଡ ସଂସ୍ଥା ଲଜିଷ୍ଟିକ ଓ ବିଭିନ୍ନ ସରକାରୀ ପରୀକ୍ଷା ପରିଚାଳନା କରିଥାଏ । ଏହି ସଂସ୍ଥା ନିହାର ମହାନ୍ତିଙ୍କ ପୁଅ ଓ ବୋହୂଙ୍କର ବୋଲି ଚର୍ଚ୍ଚା ହେଉଛି । ଯଦି ଏହା ସତ ହୋଇଥାଏ ତା’ହେଲେ ସାଂଘାତିକ । ତଦନ୍ତ ପରିସର ହୋଇଥିବା ଅଧିକାରୀଙ୍କୁ ସରକାର ତୁରନ୍ତ କାମରୁ ଅପସାରଣ କରନ୍ତୁ ବୋଲି ବିଜୟ ଦାବି କରିଛନ୍ତି । କଂଗ୍ରେସ ଓ ବିଜେଡି ମଧ୍ୟ ଏହି ମାମଲାରେ ସରକାରଙ୍କୁ କଡ଼ା ସମାଲୋଚନା କରିଛନ୍ତି । ପ୍ରଶ୍ନପତ୍ର ଲିକ୍ ହେଲେ କୋଟିଏ ଟଙ୍କାର ଜରିମାନା ସହ ସଶ୍ରମ କରାଦଣ୍ଡ କଥା ସରକାର କହୁଥିବା ବେଳେ, କାର୍ଯ୍ୟାନୁଷ୍ଠାନ କାହିଁ ବୋଲି ବିଜେଡି ପ୍ରଶ୍ନ କରିଛି ।
ଓଡ଼ିଶା ଟିଚର ଏଲିଜିବିଲିଟି ଟେଷ୍ଟ ବା ଓଟିଇଟି ପରୀକ୍ଷାରେ ବିଫଳ ହେଲେ କାର୍ଯ୍ୟରତ ହାଇସ୍କୁଲ ଶିକ୍ଷକମାନେ ଚାକିରି ହରାଇବାର ବ୍ୟବସ୍ଥା ରହିଛି । ଶିକ୍ଷକଙ୍କ ପରୀକ୍ଷାରେ ଏଭଳି ତ୍ରୁଟି ସାଙ୍ଗକୁ ଲକ୍ଷ ଲକ୍ଷ ପିଲାମାନଙ୍କ ପରୀକ୍ଷା କରୁଥିବା ବୋର୍ଡର ଦକ୍ଷତା ଓ ସ୍ବଚ୍ଛତା ଉପରେ ଉଠିଛି ପ୍ରଶ୍ନ ।
ଦୁଷ୍କର୍ମ ମାମଲାରେ ପୂର୍ବତନ ସାଂସଦ ପ୍ରଜ୍ବଳ ରେଭାନ୍ନା ଦୋଷୀ
ନନ୍ଦିଘୋଷ ବ୍ୟୁରୋ: କର୍ଣ୍ଣାଟକ ହାସନର ପୂର୍ବତନ ସାଂସଦ ତଥା ଜେଡି(ଏସ) ନେତା ପ୍ରଜ୍ବଳ ରେଭାନ୍ନାଙ୍କୁ ଏକ ଦୁଷ୍କର୍ମ ମାମଲାରେ କୋର୍ଟ ଦୋଷୀ ସାବ୍ୟସ୍ତ କରିଛନ୍ତି । ଆସନ୍ତାକାଲି ଅର୍ଥାତ ଅଗଷ୍ଟ ୨ ତାରିଖରେ ତାଙ୍କ ବିରୋଧରେ ଦଣ୍ଡ ଘୋଷଣା କରାଯିବ । କୋର୍ଟଙ୍କ ରାୟ ଆସିବା ପରେ ପ୍ରଜ୍ବଳ କୋର୍ଟ ଭିତରେ କାନ୍ଦି ପାକାଇଥିଲେ । ବେଙ୍ଗାଲୁରୁ ସ୍ଥିତି ଜନପ୍ରତିନିଧିଙ୍କ ସହ ଜଡିତ ମାମଲାର ଶୁଣାଣି ପାଇଁ ଗଠିତ ସ୍ବତନ୍ତ୍ର ଅଦାଲତ ଏହି ରାୟ ଦେଇଛନ୍ତି । ଏତଲା ଦିଆଯିବାର ମାତ୍ର ୧୪ ମରସ ମଧ୍ୟରେ ଏହି ରାୟ ପ୍ରକାଶ ପାଇଛି ।
ମୁଖ୍ୟ ପ୍ରମାଣ ‘ଶାଢ଼ୀ’
ପ୍ରଜ୍ବଳଙ୍କ ବିରୋଧରେ ଦାୟର ଦୁଷ୍କର୍ମ ମାମଲାରେ ଏକ ଗୁରୁତ୍ବପୂର୍ଣ୍ଣ ପ୍ରମାଣ ଭାବେ କୋର୍ଟରେ ଶାଢ଼ୀ ଉପସ୍ଥାପନ କରାଯାଇଥିଲା । ଅଭିଯୋଗ ହୋଇଛି କି ଅଭିଯୁକ୍ତ ପ୍ରଜ୍ବଳ ଘରୋଇ ସହାୟିକାଙ୍କ ସହ ଥରେ ନୁହେଁ ଦୁଇ ଥର ଦୁଷ୍କର୍ମ କରିଥିଲେ । ପୀଡ଼ିତା ଦୁଷ୍କର୍ମ ଘଟଣାର ଭିଡିଓ ରେକର୍ଡ କରିବା ସହ ଶାଢ଼ୀକୁ ପ୍ରମାଣ ଭାବେ ପାଖରେ ରଖିଥିଲେ । ଯାଞ୍ଚ ବେଳେ ଉକ୍ତ ଶାଢ଼ୀରୁ ଦୁଷ୍କର୍ମର ପ୍ରମାଣ ମିଳିଥିଲା । ଏହି ଶାଢ଼ୀକୁ କୋର୍ଟରେ ମୁଖ୍ୟ ପ୍ରମାଣ ଭାବେ ଉପସ୍ଥାପନ କରାଯାଇଥିଲା । ଭାରତୀୟ ଦଣ୍ଡ ସଂହିତା (IPC) ଏବଂ IT ଆକ୍ଟର ଏକାଧିକ ଧାରାକୁ ଆଧାର କରି ତାଙ୍କୁ ଦୋଷୀ ସାବ୍ୟସ୍ତ କରାଯାଇଛି । ଆସନ୍ତାକାଲି କୋର୍ଟ ତାଙ୍କ ବିରୋଧରେ ଦଣ୍ଡବିଧାନ କରିବେ ।
୧୨୩ ପ୍ରମାଣ
କେଆର ନଗରର ଜଣେ ଘରୋଇ ସହାୟିକା ସିଆଇଡି ସାଇବର କ୍ରାଇମ ଥାନାରେ ପ୍ରଜ୍ବଳଙ୍କ ବିରୋଧରେ ଦୁଷ୍କର୍ମ ଅଭିଯୋଗ କରିଥିଲେ । ଅଭିଯୁକ୍ତ ତାଙ୍କୁ ଦୁଷ୍କର୍ମ କରିବାର ସହ ଏହାର ଭିଡିଓ ବନାଇଥିବା ପୀଡ଼ିତା ଅଭିଯୋଗ କରିଥିଲେ । ସିଆଇଡିର ଏକ ସ୍ପେଶାଲ ଟିମ୍ (ଏସଆଇଟି) ମାମଲାର ତଦନ୍ତ କରିଥିଲା । ଯେଉଁଥିରେ ୨୦୦୦ ପୃଷ୍ଠାର ଚାର୍ଜସିଟ ଦାକଲ କରାଯାଇଥିଲା । ତଦନ୍ତ ବେଳେ ତଦନ୍ତକାରୀ ଟିମ୍ ହାତରେ ୧୨୩ଟି ପ୍ରମାଣ ଲାଗିଥିଲା ।
୭ ମାସରେ ଟ୍ରାଲଏ ଶେଷ
ସିଆଇଡି ଇନ୍ସପେକ୍ଟର ଶୋଭା ଏବଂ ତାଙ୍କ ଟିମ୍ ମାମଲାର ତଦନ୍ତ କରୁଥିଲେ । ୨୦୨୪ ଡିସେମ୍ବର ୩୧ ତାରିଖରେ ମାମଲାରୁ ଶୁଣାଣି ଆରମ୍ଭ ହୋଇଥିଲା । ଏହି ସମୟରେ ୨୩ ଜଣଙ୍କ ସାକ୍ଷୀ ନିଆଯାଇଥିଲା । ଏହାବାଦ ଭିଡିଓ କ୍ଲିପ୍ସର ଫରେନ୍ସିକ ରିପୋର୍ଟ ଏବଂ ଘଟଣା ସ୍ଥଳ ଯାଞ୍ଚର ସମୀକ୍ଷା କରାଯାଇଥିଲା । ମାତ୍ର ୭ ମାସରେ ଟ୍ରାଏଲ ଶେଷ ହୋଇଯାଇଥିଲା । ଦୁଇ ପକ୍ଷଙ୍କୁ ଶୁଣିବା ପରେ ବିଶେଷ ବିଚାରପତି ସନ୍ତୋଷ ଜଗାନନ ଭଟ୍ଟ ରାୟ ସଂରକ୍ଷିତ ରଖିଥିଲେ ।
ପଞ୍ଜାବ ଓ ହରିୟାଣା ହାଇକୋର୍ଟରୁ କଙ୍ଗନାଙ୍କୁ ଝଟକା, ମାନହାନି ମାମଲାର ପୁଣି ଆରମ୍ଭ ହେବ ଟ୍ରାଏଲ୍
ନନ୍ଦିଘୋଷ ବ୍ୟୁରୋ: ବଲିଉଡ଼ ଅଭିନେତ୍ରୀ ଏବଂ ବିଜେପି ସାଂସଦ କଙ୍ଗନା ରଣାବତଙ୍କୁ ପଞ୍ଜାବ ଓ ହରିୟାଣା ହାଇକୋର୍ଟରୁ ଲାଗିଛି ବଡ଼ ଝଟକା । ୨୦୨୧ରେ ବଠିଣ୍ଡାରେ ତାଙ୍କ ବିରୋଧରେ ଦାୟର ମାନହାନୀ ମକଦ୍ଦମାକୁ ରଦ୍ଦ କରିବାକୁ ହାଇକୋର୍ଟ ମନା କରିଦେଇଛନ୍ତି । କୋର୍ଟଙ୍କ ଏହି ରାୟ ପରେ ବନ୍ଦ ଥିବା ଟ୍ରାଏଲ ପୁଣି ଥରେ ଆରମ୍ଭ ହେବାକୁ ଯାଉଛି ।
ସୂଚନାଯୋଗ୍ୟ, ୨୦୨୦-୨୧ ଚାଷୀ ଆନ୍ଦୋଳନ ସହ ଏହି ମାମଲା ଜଡ଼ିତ । ସେହି ସମୟରେ କଙ୍ଗନା ସୋସିଆଲ ମିଡିଆରେ ବଠିଣ୍ଡାର ମୋହିନ୍ଦର କୌରଙ୍କ ଫଟୋ ପୋଷ୍ଟ କରିଥିଲେ । ଏଥିରେ ସେ ଦାବି କରିଥିଲେ କି ଆନ୍ଦୋଳନରେ ସାମିଲ ହେବାକୁ ମହିଳାଙ୍କୁ ଟଙ୍କା ଦିଆଯାଉଛି । ଏହାକୁ ନେଇ ଲୋକଙ୍କ ମଧ୍ୟରେ ଆକ୍ରୋଶ ବୃଦ୍ଧି ପାଇଥିଲା । ଏପରିକି ମୋହିନ୍ଦର କୌର ୨୦୨୧ ଜାନୁଆରୀରେ କଙ୍ଗନାଙ୍କ ବିରୋଧରେ ବଠିଣ୍ଡାର ସ୍ଥାନୀୟ କୋର୍ଟରେ ମାନହାନୀ ମକଦ୍ଦମା ରୁଜୁ କରିଥିଲେ । କଙ୍ଗନାଙ୍କ ପୋଷ୍ଟ ତାଙ୍କ ସମ୍ମାନହାନୀ କରିବା ସହ ସାର୍ବଜନୀନ ସ୍ତରରେ ତାଙ୍କୁ ଅପମାନିତ କରିଛି ବୋଲି ସେ ଅଭିଯୋଗ କରିଥିଲେ ।
ଏହି ମାମଲାକୁ ରଦ୍ଦ କରିବାକୁ କଙ୍ଗନା ପଞ୍ଜାବ ଓ ହରିୟାଣା ହାଇକୋର୍ଟକୁ ଯାଇଥିଲେ । ତାଙ୍କ ବୟାନ ସାମାନ୍ୟ ଟିପ୍ପଣୀ ଥିଲା ଓ ଏଥିରେ କାହାରିଙ୍କୁ ଅପମାନିତ କରିବା ଉଦ୍ଦେଶ୍ୟ ନଥିଲା ବୋଲି କଙ୍ଗନା ଯୁକ୍ତି ରଖିଥିଲେ । ହେଲେ କୋର୍ଟ ତାଙ୍କ ଆବେଦନକୁ ଖାରଜ କରିଦେଇଛନ୍ତି ।
କୋର୍ଟଙ୍କ ଏହି ନିର୍ଦ୍ଦେଶ ପରେ ୨୦୨୧ରୁ ବନ୍ଦ ଥିବା ଟ୍ରାଏଲ ପୁଣି ଥରେ ଆରମ୍ଭ ହେବାକୁ ଯାଉଛି । ତେବେ କୋର୍ଟଙ୍କ ସମ୍ପୂର୍ଣ୍ଣ ନିଷ୍ପତ୍ତି ରିପୋର୍ଟ ଲେଖାଯିବା ପର୍ଯ୍ୟନ୍ତ ଜାରି କରାଯାଇନାହିଁ । ଏଥିପାଇଁ କଙ୍ଗନାଙ୍କ ଆବେଦନ ଖାରଜ କରାଯିବା ପଛର କାରଣ ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇନାହିଁ ।
ଅନିଲ ଅମ୍ବାନୀଙ୍କୁ ଇଡିର ସମନ ପରେ ନକଲି ବ୍ୟାଙ୍କ ଗ୍ୟାରେଣ୍ଟି ମାମଲାରେ କାର୍ଯ୍ୟାନୁଷ୍ଠାନ, ଓଡ଼ିଶା-କୋଲକାତାରେ ଚଢାଉ
ନନ୍ଦିଘୋଷ ବ୍ୟୁରୋ : ବଢ଼ିଲା ରିଲାଏନ୍ସ ଗ୍ରୁପ ପରିଚାଳନା ନିର୍ଦ୍ଦେଶକ ଏବଂ ଅଧ୍ୟକ୍ଷ ଅନିଲ ଅମ୍ବାନୀଙ୍କ ଅଡୁଆ । ୧୭ ହଜାର କୋଟି ଟଙ୍କାର ବ୍ୟାଙ୍କ ଋଣ ଠକେଇ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟର ରିଲାଏନ୍ସ ଗ୍ରୁପ ପରିଚାଳନା ନିର୍ଦ୍ଦେଶକ ଏବଂ ଅଧ୍ୟକ୍ଷ ଅନିଲ ଅମ୍ବାନୀଙ୍କୁ ସମନ ଜାରି। ଅଗଷ୍ଟ ୫ ତାରିଖରେ ଦିଲ୍ଲୀସ୍ଥିତ ମୁଖ୍ୟାଳୟରେ ପଚରାଉଚରା ପାଇଁ ହାଜର ହେବାକୁ କହିଛି ଇଡି।
ଅନ୍ୟପଟେ ବ୍ୟାଙ୍କ ଋଣ ଠକେଇ ମାମଲା ପରେ, ଏବେ ଇଡି ୬୮ କୋଟି ଟଙ୍କାର ନକଲି ବ୍ୟାଙ୍କ ଗ୍ୟାରେଣ୍ଟି ମାମଲାର ତଦନ୍ତକୁ ଜୋରଦାର କରିଛି। ଏହି ସମ୍ପର୍କରେ, ଇଡି ଶୁକ୍ରବାର ଓଡ଼ିଶା ଓ କୋଲକାତାରେ ଚଢାଉ କରିଛି। ନଭେମ୍ବର ୧୧, ୨୦୨୪ରେ ଦିଲ୍ଲୀ ପୋଲିସର ଅର୍ଥନୈତିକ ଅପରାଧ ଶାଖା ଦ୍ୱାରା ପଞ୍ଜିକୃତ ମାମଲା ଆଧାରରେ ଇଡି ଏହି ମାମଲାରେ ଏକ ECIR ଦାଖଲ କରିଛି। ଇଡି ଅଭିଯୋଗ କରିଛି ଯେ ଏହି ନକଲି ବ୍ୟାଙ୍କ ଗ୍ୟାରେଣ୍ଟି ଆଧାରରେ ଅନିଲ ଅମ୍ବାନୀଙ୍କ କମ୍ପାନୀକୁ ଚୁକ୍ତିନାମା ଦିଆଯାଇଥିଲା। ଭୁବନେଶ୍ୱରରେ, ଇଡି ମେସର୍ସ ବିସୱାଲ ଟ୍ରେଡଲିଙ୍କ ପ୍ରାଇଭେଟ୍ ଲିମିଟେଡ୍ ଏବଂ ଏହାର ନିର୍ଦ୍ଦେଶକଙ୍କ ୩ଟି ଘର ଉପରେ ଚଢାଉ କରି ତଲାସୀ କରିଥିଲା। କୋଲକାତାରେ, ଇଡି ସେହି ଫାର୍ମର ଜଣେ ସହଯୋଗୀଙ୍କ ଘର ଉପରେ ଚଢାଉ କରିଥିଲା। ମେସର୍ସ ବିସୱାଲ ଟ୍ରେଡଲିଙ୍କ ପ୍ରାଇଭେଟ୍ ଲିମିଟେଡ୍, ଏହାର ନିର୍ଦ୍ଦେଶକ ଏବଂ ସହଯୋଗୀମାନେ ୮ ପ୍ରତିଶତ କମିଶନରେ ନକଲି ବ୍ୟାଙ୍କ ଗ୍ୟାରେଣ୍ଟି ପ୍ରଦାନ କରିବାରେ ସମ୍ପୃକ୍ତ ଥିବା ଜଣାପଡ଼ିଥିଲା।
ଇଡି ଅଭିଯୋଗ କରିଛି ଯେ ଅନିଲ ଅମ୍ବାନୀଙ୍କ କମ୍ପାନୀ ଫାର୍ମକୁ କମିଶନ ଦେବା ପାଇଁ ନକଲି ବିଲ୍ ମଧ୍ୟ ପ୍ରସ୍ତୁତ କରିଥିଲା। ଅନେକ ଅଘୋଷିତ ବ୍ୟାଙ୍କ ଆକାଉଣ୍ଟ ଚିହ୍ନଟ ହୋଇଛି। ଏହି ବ୍ୟାଙ୍କ ଆକାଉଣ୍ଟଗୁଡ଼ିକରେ କୋଟି କୋଟି ଟଙ୍କାର ସନ୍ଦେହଜନକ କାରବାର ମିଳିଛି। ଫେଡେରାଲ୍ ଏଜେନ୍ସି କହିଛି ଯେ ଏହା ଅନିଲ ଅମ୍ବାନୀ ଗୋଷ୍ଠୀ କମ୍ପାନୀଗୁଡ଼ିକ ଏବଂ ଭାରତୀୟ ସୌର ଶକ୍ତି ନିଗମ (SECI) କୁ ଦାଖଲ କରାଯାଇଥିବା ୬୮.୨ କୋଟି ଟଙ୍କାର ନକଲି ବ୍ୟାଙ୍କ ଗ୍ୟାରେଣ୍ଟି ମଧ୍ୟରେ ଲିଙ୍କ ପ୍ରକାଶ କରିଛି। ଏକ ସମ୍ପର୍କିତ ମାମଲାରେ, ପୂର୍ବରୁ ଜବତ ହୋଇଥିବା ପ୍ରମାଣ ବର୍ତ୍ତମାନର ତଦନ୍ତ ସହିତ ସିଧାସଳଖ ଜଡିତ।
ଇଡି ଅନୁଯାୟୀ, ଏହି ନକଲି ଗ୍ୟାରେଣ୍ଟି ମେସର୍ସ ରିଲାଏନ୍ସ ଏନୟୁ ବେସ୍ ଲିମିଟେଡ୍ ଏବଂ ମେସର୍ସ ମହାରାଷ୍ଟ୍ର ଏନର୍ଜି ଜେନେରେସନ୍ ଲିମିଟେଡ୍ ନାମରେ ଜାରି କରାଯାଇଥିଲା, ଉଭୟ ଅନିଲ ଅମ୍ବାନୀ ଗ୍ରୁପ୍ ସହିତ ଜଡିତ। ନକଲି ବ୍ୟାଙ୍କ ଗ୍ୟାରେଣ୍ଟିକୁ ପ୍ରକୃତ ବୋଲି ଦେଖାଇବା ପାଇଁ, ଅନିଲ ଅମ୍ବାନୀଙ୍କ ରିଲାଏନ୍ସ ଗ୍ରୁପ୍ SECI ସହିତ ଯୋଗାଯୋଗ କରିବା ପାଇଁ ସରକାରୀ sbi.co.in ବଦଳରେ ଏକ ନକଲି ଇମେଲ୍ ଡୋମେନ୍ s-bi.co.in ବ୍ୟବହାର କରିଥିବା ଅଭିଯୋଗ ହୋଇଛି। ଏହି ନକଲି ଡୋମେନର ଉତ୍ସ ଖୋଜିବା ପାଇଁ ଇଡି ନ୍ୟାସନାଲ ଇଣ୍ଟରନେଟ୍ ଏକ୍ସଚେଞ୍ଜ ଅଫ୍ ଇଣ୍ଡିଆ ଠାରୁ ଡୋମେନ୍ ପଞ୍ଜିକରଣ ବିବରଣୀ ମାଗିଛି।
ଇଡି ଅନୁଯାୟୀ, କମ୍ପାନୀ କେବଳ ଏକ କାଗଜପତ୍ର ସଂସ୍ଥା – ଏହାର ପଞ୍ଜିକୃତ କାର୍ଯ୍ୟାଳୟ ଜଣେ ସମ୍ପର୍କୀୟଙ୍କ ଆବାସିକ ସମ୍ପତ୍ତି। ଠିକଣାରେ କମ୍ପାନୀର କୌଣସି ବୈଧାନିକ ରେକର୍ଡ ମିଳିନାହିଁ। ଅନେକ କମ୍ପାନୀ ସହିତ ସନ୍ଦେହଜନକ ଆର୍ଥିକ କାରବାର ଚିହ୍ନଟ ହୋଇଛି। କମ୍ପାନୀ ସହିତ ଜଡିତ ପ୍ରମୁଖ ବ୍ୟକ୍ତିମାନେ ଅଦୃଶ୍ୟ ବାର୍ତ୍ତା ବୈଶିଷ୍ଟ୍ୟ ସକ୍ଷମ ଥିବା ସହିତ ଟେଲିଗ୍ରାମ ଆପ୍ ବ୍ୟବହାର କରି ଚାଟ୍ କରୁଥିବାର ଜଣାପଡ଼ିଛି, ଯାହା ବାର୍ତ୍ତାଳାପକୁ ଲୁଚାଇବାର ପ୍ରୟାସକୁ ସୂଚିତ କରେ। ପୂର୍ବରୁ, ୧୭ ହଜାର କୋଟି ଋଣ ଠକେଇ ମାମଲାର ତଦନ୍ତ ସମ୍ପର୍କରେ ଇଡି ଶୁକ୍ରବାର ଅମ୍ବାନୀଙ୍କୁ ସମନ ଜାରି କରିଥିଲା ଏବଂ ଅଗଷ୍ଟ ୫ ରେ ନୂଆଦିଲ୍ଲୀସ୍ଥିତ କାର୍ଯ୍ୟାଳୟରେ ପଚରାଉଚରା ପାଇଁ ହାଜର ହେବାକୁ କୁହାଯାଇଥିଲା।