ସମ୍ବଲପୁର ଭିସୁଟରେ ଲାଗୁ ହେଲା ୟୁନିଫର୍ମ ବା ଡ୍ରେସ କୋଡ । ପ୍ରଥମ ଥର ପାଇଁ ଛାତ୍ରଛାତ୍ରୀଙ୍କ ପାଇଁ ୟୁନିଫର୍ମ ଲାଗୁ ହୋଇଛି । ୨୦୨୫-୨୦୨୬ ବର୍ଷ ପାଇଁ ଆଡମିଶନ ନେଇଥିବା ସମସ୍ତ ପ୍ରଥମ ବର୍ଷର ଛାତ୍ରଛାତ୍ରୀଙ୍କ ପାଇଁ ଏହା ଲାଗୁ ହେବ । ଏଥିରେ ପିଜି ଓ ପିଏଚଡି ଛାତ୍ରଛାତ୍ରୀଙ୍କୁ ବାଦ ଦିଆଯାଇଛି । ପୁଅଙ୍କ ପାଇଁ ଫର୍ମାଲ ପ୍ୟାଣ୍ଟ ଓ ସାର୍ଟ ରହିଥିବାବେଳେ ଝିଅଙ୍କ ପାଇଁ ସାଲଓ୍ବାର କମିଜ୍ ସହ ଓ୍ବେଷ୍ଟକୋଟ ବାଧ୍ୟତାମୂଳକ କରାଯାଇଛି । ସୁରକ୍ଷା ଦୃଷ୍ଟିରୁ ଝିଅଙ୍କ ପାଇଁ ଓଢଣୀ ବାରଣ କରାଯାଇଛି । ପେଣ୍ଟ, ସାଲଓ୍ବାର ଓ ଓ୍ବେଷ୍ଟକୋଟର ରଙ୍ଗ ନେଭି ବ୍ଲୁ ଓ ସାର୍ଟର ରଙ୍ଗ ବ୍ଲୁ ରହିବ ବୋଲି କୁହାଯାଇଛି ।
ସୁରକ୍ଷା କର୍ମୀ ଓ ମାଓବାଦୀଙ୍କ ମଧ୍ୟରେ ଗୁଳି ବିନିମୟ: ଦୁଇ ମାଓବାଦୀଙ୍କ ମୃତଦେହ ଠାବ
ଛତିଶଗଡ଼ର ବିଜାପୁର ଜିଲ୍ଲାର ଗଙ୍ଗାଲୁର ଜଙ୍ଗଲରେ ସୁରକ୍ଷା କର୍ମୀ ଓ ମାଓବାଦୀଙ୍କ ମଧ୍ୟରେ ଗୁଳି ବିନିମୟ । ଏଥିରେ ଦୁଇ ଜଣ ଯବାନ ଆହତ ହୋଇଛନ୍ତି । ସେମାନଙ୍କୁ ପ୍ରାଥମିକ ଚିକିତ୍ସା ପରେ ରାୟପୁରକୁ ସ୍ଥାନାନ୍ତର କରାଯାଇଛି । ଏହି ଏନକାଉଣ୍ଟରରେ ନକ୍ସଲପନ୍ଥିଙ୍କ ମଧ୍ୟ ବହୁତ କ୍ଷତି ହୋଇଥିବା ବସ୍ତର ଆଇଜି ସୁନ୍ଦରରାଜ ପି ସୂଚନା ଦେଇଛନ୍ତି । ଗଙ୍ଗାଲୁର ଜଙ୍ଗଲରେ ସୁରକ୍ଷା ବାହିନୀଙ୍କ ପକ୍ଷରୁ ସର୍ଚ୍ଚ ଅପରେସନ ଜାରି ରହିଛି । ବର୍ତ୍ତମାନ ସୁଦ୍ଧା ଦୁଇ ଜଣ ମାଓବାଦୀଙ୍କ ମୃତଦେହ ଠାବ ହୋଇଥିବା ବେଳେ ଘଟଣାସ୍ଥଳରୁ ବନ୍ଧୁକ ସହ ବହୁ ବିସ୍ଫୋରକ ସାମଗ୍ରୀ ଜବତ ହୋଇଛି । ମୃତ ମାଓବାଦୀ ହେଉଛନ୍ତି ଦଣ୍ଡକାରଣ୍ୟ ସ୍ପେଶାଲ ଜୋନାଲ କମିଟିର ସଦସ୍ୟ ବିଜୟ ରେଡ୍ଡି ଓ ଡିଭିସିଏମ ମେମ୍ବର ଲୋକେସ ସଲାମେ ।
ଖରାପ ନିଦ୍ରା ପାଇଁ ୧୭୦ ବିମାରୀ ଆଶଙ୍କା ! ଲିଷ୍ଟରେ ରହିଛି ଡାଇବେଟିସ, ହାଡ଼ ଭାଙ୍ଗିବା…..
ଖରାପ ନିଦ କାରଣରୁ ଆପଣଙ୍କ ପାଇଁ ୧୭୦ରୁ ଅଧିକ ବିମାରୀର ଆଶଙ୍କା ବଢ଼ିପାରେ । ଏହି ଲିଷ୍ଟରେ ଡିମେନ୍ସିଆ, ଲିଭର ସମସ୍ୟା, ହାଡ଼ ଭାଙ୍ଗିବା, ଡାଇବେଟିସ ଆଦି ଅନେକ ଗମ୍ଭୀର ରୋଗ ରହିଛି । ଆଜିକାଲି ସମୟରେ ଅନେକ ଲୋକ ନିଦ୍ରାହୀନତାର ଶିକାର ହେଉଥିବା ବେଳେ ଏହି ଖବର ସେମାନଙ୍କ ପାଇଁ ବିପଦ ବଢ଼ାଇପାରେ । ଏନେଇ ସାମ୍ନାକୁ ଆସିଛି ଏକ ରିସର୍ଚ୍ଚ ରିପୋର୍ଟ । ଆପଣ କେତେ ବିଳମ୍ବରେ ଶୋଉଛନ୍ତି, କେବଳ ତା’ ଉପରେ ଆପଣଙ୍କ ସ୍ବାସ୍ଥ୍ୟ ନିର୍ଭର କରେନାହିଁ, ବରଂ ଆପଣ କେତେ ଭଲ ନିଦ୍ରା ନେଉଛନ୍ତି ତା’ ଉପରେ ମଧ୍ୟ ନିର୍ଭର କରେ ବୋଲି ଅଧ୍ୟୟନରୁ ଜଣାପଡ଼ିଛି ।
ପେକିଂ ୟୁନିଭରସିଟି ଓ ଚୀନର ଆର୍ମି ମେଡିକାଲ ୟୁନିଭରସିଟିର ଗବେଷକମାନେ ଏନେଇ ଏକ ରିସର୍ଚ୍ଚ କରିଥିଲେ । ସେଥିରେ ୮୮,୪୬୦ ଜଣ ଲୋକଙ୍କ ନିଦ ଷ୍ଟାଟସକୁ ନେଇ ଅନୁଧ୍ୟାନ କରିଥିଲେ । ସେମାନଙ୍କ ମଧ୍ୟରେ ଅଧିକାଂଶ ଲୋକଙ୍କ ବୟସ ୬୨ ବର୍ଷ ଥିଲା ଓ ୪୩ ପ୍ରତିଶତ ପୁରୁଷ ଥିଲେ । ୯୨ଟି ବୀମାରୀରେ ଖରାପ ନିଦର ବିପଦ ୨୦ ପ୍ରତିଶତ ରହିଥିଲା । ୪୨ଟି ବିମାରୀରେ ଏହି ଆଶଙ୍କା ଦୁଇଗୁଣରୁ ବି ଅଧିକ ଥିଲା । ଖରାପ ନିଦ କାରଣରୁ କୌଣସି ବିମାରୀର ଆଶଙ୍କା ୫୨ ପ୍ରତିଶତ ପର୍ଯ୍ୟନ୍ତ ବଢ଼ିପାରେ ବୋଲି ରିସର୍ଚ୍ଚରୁ ଜଣାପଡ଼ିଛି । ତେଣୁ ନିଦର ଗୁଣବତ୍ତା ଓ ସଠିକ୍ ଦିନଚର୍ଯ୍ୟା କେତେ ଜରୁରୀ, ତାହା ଏହି ରିସର୍ଚ୍ଚରୁ ଜଣାପଡ଼ିଛି । ଏକ ଭଲ ସ୍ବାସ୍ଥ୍ୟୃ ପାଇଁ ଲୋକଙ୍କୁ ଦୈନିକ ୭-୯ ଘଣ୍ଟା ନିଦ ନେବା ଜରୁରୀ ବୋଲି ଏକ୍ସପର୍ଟସ କହିଛନ୍ତି । କମ୍ ନିଦ ନେଲେ ଅନେକ ପ୍ରକାରର କ୍ଷତି ହୋଇପାରେ । ଯେପରିକି, ନଭର୍ସ ସିଷ୍ଟମ ବିଗିଡ଼ିବା, ହୃଦ ସ୍ପନ୍ଦନ ତେଜ ହେବା, ବ୍ଲଡ ପ୍ରେସର ବଢ଼ିବା, ଷ୍ଟ୍ରେସ ବଢ଼ିବା ଆଦି ।
ଶିଳ୍ପା ଶେଟ୍ଟୀ ଓ ରାଜ କୁନ୍ଦ୍ରାଙ୍କ ନାମରେ ୬୦ କୋଟି ଟଙ୍କା ଠକେଇ ଅଭିଯୋଗ
ବଲିଉଡ ଅଭିନେତ୍ରୀ ଶିଳ୍ପ ଶେଟ୍ଟୀ ଓ ତାଙ୍କ ବିଜିନେସମ୍ୟାନ ପତି ରାଜ କୁନ୍ଦ୍ରାଙ୍କ ନାମରେ ୬୦ କୋଟି ଟଙ୍କାର ଠକେଇ ଅଭିଯୋଗ ଆସିଛି । ଷଡ଼ଯନ୍ତ୍ର କରି ଏହି ଟଙ୍କା ହଡ଼ପ କରାଯାଇଥିବା ଅଭିଯୋଗ କରିଛନ୍ତି ମୁମ୍ବାଇର ଜଣେ ବ୍ୟବସାୟୀ । ସେଲିବ୍ରେଟୀ ଦମ୍ପତିଙ୍କର ବନ୍ଦ ହୋଇଯାଇଥିବା ଓ୍ବେଷ୍ଟ ଡିଲ ଟିଭି ପ୍ରାଇଭେଟ ଲିମିଟେଡରେ ନିବେଶ ସହ ଏହି ମାମଲା ଜଡ଼ିତ ରହିଛି । ବିଜିନେସମ୍ୟାନ ଦୀପକ କୋଠାରୀ ଏହି ଅଭିଯୋଗ ଆଣିଛନ୍ତି । କାରବାର ବଢ଼ାଇବା ପାଇଁ ୨୦୧୫-୨୦୨୩ ପାଖାପାଖି ସମୟରେ ବ୍ୟବସାୟୀ ଜଣଙ୍କ ଦମ୍ପତିଙ୍କୁ ୬୦.୪୮ କୋଟି ଟଙ୍କା ଦେଇଥିଲେ । ମାତ୍ର ସେମାନେ ତାହାକୁ ବ୍ୟକ୍ତିଗତ ଖର୍ଚ୍ଚରେ ଲଗାଇ ଦେଇଥିବା ବ୍ୟବସାୟୀ ଜଣଙ୍କ ଅଭିଯୋଗ କରିଛନ୍ତି ।
୨୦୧୫ରେ ଜଣେ ଏଜେଣ୍ଟ ରାଜେଶ ଆର୍ଯ୍ୟଙ୍କ ମାଧ୍ୟମରେ ଦୀପକ ଦମ୍ପତିଙ୍କ ସମ୍ପର୍କରେ ଆସିଥିଲେ । ଏକ ଅନଲାଇନ୍ ଶପିଂ ପ୍ଲାଟଫର୍ମ, ଓ୍ବେଷ୍ଟ ଡିଲ ଟିଭିର ନିର୍ଦ୍ଦେଶକ ଥିଲେ ଏହି ଦମ୍ପତି । ସେହି ସମୟରେ କମ୍ପାନୀରେ ଶିଳ୍ପାଙ୍କର ୮୭ ପ୍ରତିଶତ ଶେୟାର ରହିଥିଲା । ୬୦ କୋଟିରୁ ଅଧିକ ଟଙ୍କା ଟ୍ରାନ୍ସଫର କରିବା ସହ ୩.୧୯ ଲକ୍ଷ ଟଙ୍କାର ଷ୍ଟାମ୍ପ ଚାର୍ଜ ମଧ୍ୟ ଦେଇଥିଲେ ଦୀପକ । ପରର୍ବତ୍ତୀ ସମୟରେ ଦୀପକ ବାରମ୍ବାର ନିଜର ଟଙ୍କା ମାଗିଥିଲେ ମଧ୍ୟ ଦମ୍ପତି ତାହାକୁ ଧ୍ୟାନ ଦେଇନଥିଲେ । ତାଙ୍କ ବିରୋଧରେ ଏକ ଷଡ଼ଯନ୍ତ୍ର ରଚାଯାଇ ଦମ୍ପତି ଅର୍ଥ ହଡ଼ପ କରିଥିବା ଅଭିଯୋଗ ଆଣିଛନ୍ତି ଦୀପକ ।
ଗ୍ୟାସ୍ ସିଲିଣ୍ଡରରେ ଲାଗିଲା ନିଆଁ: ଅଳ୍ପକେ ବର୍ତ୍ତିଲେ ପାଚିକା ଓ ଛାତ୍ରଛାତ୍ରୀ
ଗ୍ୟାସ୍ ସିଲିଣ୍ଡରରେ ଲାଗିଲା ନିଆଁ। ଅଳ୍ପକେ ବର୍ତ୍ତିଲେ ପାଚିକା । ଘଟଣା ଘଟିଛି ଢେଙ୍କାନାଳ ଜିଲ୍ଲା ଭୁବନ ବିଜ୍ଞାପିତ ଅଞ୍ଚଳ ୱାର୍ଡ ନମ୍ୱର୍ -୨ ରେ ଥିବା ନୂଆଭୁବନ ଉଚ୍ଚ ବିଦ୍ୟାଳୟରେ। ଛାତ୍ରଛାତ୍ରୀଙ୍କ ପାଇଁ ମଧ୍ୟାହ୍ନ ଭୋଜନ ରୋଷେଇ ଚାଲିଥିବା ସମୟରେ ଗ୍ୟାସ ସିଲିଣ୍ଡରରେ ହଠାତ୍ ନିଆଁ ଲାଗିଯାଇଥିଲା । ତେବେ ଉପସ୍ଥିତ ବୁଦ୍ଧି ଖଟାଇ ପାଚିକା ମାନେ ନିଆଁ ଲାଗିଥିବା ଗ୍ୟାସ ଟାଙ୍କିଙ୍କୁ ବାହାରକୁ ଫୋପାଡ଼ି ଦେଇଥିଲେ । ଫଳରେ ଏକ ବଡ଼ ଦୁର୍ଘଟଣାରୁ ସମ୍ପୂର୍ଣ୍ଣ ସ୍କୁଲ ଓ ଛାତ୍ରଛାତ୍ରୀମାନେ ରକ୍ଷା ପାଇପାରିଥିଲେ। ଦୁର୍ଘଟଣାରେ ରୋଷେଇ ଘର ସାମଗ୍ରୀ ଜଳି ଯିବା ସହିତ ପରିବା, ଅଣ୍ଡା ପୋଡି ନଷ୍ଟ ହୋଇଯାଇଛି । ବିଦ୍ୟାଳୟରେ ମୋଟ ୪୫୨ ଜଣ ଛାତ୍ରଛାତ୍ରୀ ଅଧ୍ୟୟନ କରୁଥିବାବେଳେ ୧୪ ଜଣ ଶିକ୍ଷକ ଶିକ୍ଷୟିତ୍ରୀ ନିଯୁକ୍ତି କରାଯାଇଛି । ବିଦ୍ୟାଳୟରେ ମୋଟ ଚାରି ଜଣ ପାଚିକା ଆଜି ରୋଷେଇ କାର୍ୟ୍ୟରେ ନିୟୋଜିତ ଥିଲେ।
ସରକାରଙ୍କ ତାଗିଦ ସତ୍ତ୍ଵେ ଆନ୍ଦୋଳନରେ ଅମଲା ସଂଘ କର୍ମଚାରୀ
ସରକାରଙ୍କ କଡ଼ା ତାଗିଦ ସତ୍ତ୍ବେ ଆଜି ବି କଲମ ଛାଡ ଆନ୍ଦୋଳନରେ ବସିଛନ୍ତି ରାଜସ୍ବ ଅମଲା କର୍ମଚାରୀ। ସରକାର ବାରମ୍ବାର ଆଲୋଚନା ପରେ ଦାବି ଶୁଣୁନାହାନ୍ତି। ଅପରପକ୍ଷରେ ଆନ୍ଦୋଳନକୁ ଦବାଇବା ପାଇଁ ସରକାର ଉଦ୍ୟମ କରୁଥିବା ଅଭିଯୋଗ କରିଛନ୍ତି ଆନ୍ଦୋଳନକାରୀ। ବିଭିନ୍ନ ଦାବି ନେଇ ରାଜସ୍ବ ଅମଲା ସଂଘର 30 ଜିଲ୍ଲାର 10 ହଜାରରୁ ଅଧିକ କର୍ମଚାରୀ ୩ ଦିନ ହେବ ସମୂହ ଛୁଟିରେ ଯାଇଛନ୍ତି। ଗତ ଜୁଲାଇ 7 ତାରିଖରେ ଅମଲା କର୍ମଚାରୀମାନେ କଳାବ୍ଯାଜ୍ ପରିଧାନ କରିଥିଲେ। ପରେ ସରକାରଙ୍କ ସହ ଆଲୋଚନା ପରେ ଦାବି ପୂରଣ ଆଶାରେ ଅଗଷ୍ଟ 10 ତାରିଖ ପର୍ଯ୍ୟନ୍ତ ଆନ୍ଦୋଳନକୁ ସ୍ଥଗିତ ରଖିଥିଲା। ଏହା ଭିତରେ ସରକାର କୌଣସି ପ୍ରତିଶୃତି ପାଳନ ନକରିବାରୁ ସମସ୍ତେ ସମୂହ ଛୁଟିରେ ଯାଇଛନ୍ତି।
ଅଗଷ୍ଟ ୧୫ ଠାରୁ SBI ଗ୍ରାହକଙ୍କ ପାଇଁ ବଦଳିଯିବ ଏହିସବୁ ନିୟମ
ଆସନ୍ତାକାଲି ଅର୍ଥାତ ଅଗଷ୍ଟ ୧୫ ତାରିଖ ଠାରୁ ଏସବିଆଇ ଗ୍ରାହକଙ୍କ ପାଇଁ ଅନେକ ନିୟମ ବଳିବାକୁ ଯାଉଛି । ତେଣୁ ଆପଣ ଯଦି ଜଣେ ଏସବିଆଇ ଗ୍ରାହକ, ତେବେ ଏନେଇ ଆପଣମାନେ ସତର୍କ ହେବା ନିହାତି ଆବଶ୍ୟକ । ବ୍ୟାଙ୍କ ପକ୍ଷରୁ IMPS ମାଧ୍ୟମରେ ଅନଲାଇନ୍ ଟଙ୍କା ପଠାଇବା ନିୟମ ପରିବର୍ତ୍ତନ କରାଯାଇଛି । ଆସନ୍ତାକାଲି ଠାରୁ ଏଥିପାଇଁ ଚାର୍ଜ ନିଆଯିବ । ଏହି ପରିବର୍ତ୍ତନ ରିଟେଲ ଗ୍ରାହକଙ୍କ ପାଇଁ ଲାଗୁ ହେବ । ସେହିପରି କର୍ପୋରେଟ ଗ୍ରାହକଙ୍କ ପାଇଁ ଏହା ସେପ୍ଟେମ୍ବର ୮ରୁ ଲାଗୁ ହେବ । ଏସବିଆଇର ଏହି ନିୟମ ପରିବର୍ତ୍ତନ ଫଳରେ ପାଖାପାଖି ୪୦ କୋଟି ଗ୍ରାହକ ପ୍ରଭାବିତ ହେବେ ।
ସାଧାରଣ ଭାବେ ଫଟାଫର ଅନଲାଇନ ଟଙ୍କା ପଠାଇବା ପାଇଁ IMPSର ବ୍ୟବହାର କରାଯାଇଥାଏ । ମାତ୍ର ଏହି ନିୟମ ପରିବର୍ତ୍ତନ ଫଳରେ ଗ୍ରାହକଙ୍କୁ କିଛି ଚାର୍ଜ ଦେବାକୁ ପଡ଼ିପାରେ । ଛୋଟ ଛୋଟ କାରବାର ପାଇଁ କୌଣସି ଚାର୍ଜ ଲାଗିବ ନାହିଁ । ୨୫ ହଜାର ଟଙ୍କା ପର୍ଯ୍ୟନ୍ତ ଟ୍ରାଞ୍ଜାକସନ ଉପରେ କୌଣସି ଶୁଳ୍କ ଲାଗିବ ନାହିଁ । ଇଣ୍ଟରନେଟ ବ୍ୟାଙ୍କ ବା YONO ଆପରେ ୨୫ ହଜାର ଟଙ୍କା ପର୍ଯ୍ୟନ୍ତ କାରବାର ପାଇଁ କୌଣସି ଚାର୍ଜ ଲାଗିବ ନାହିଁ । ଏହି ରାଶିଠାରୁ ଅଧିକ ଟ୍ରାନ୍ସଫର କଲେ ଶଳ୍କ ଦେବାକୁ ପଡ଼ିବ । ତେବେ ଏହି ଶୁଳ୍କ କେବଳ ଅନଲାଇନ (ଇଣ୍ଟରନେଟ ବ୍ୟାଙ୍କିଂ, ମୋବାଇଲ ବ୍ୟାଙ୍କିଂ) ପାଇଁ କେବଳ ଲାଗୁ ହେବ । ତେବେ ବ୍ରାଞ୍ଚ ଟ୍ରାଞ୍ଜାକସନ ପାଇଁ ଅଲଗା ନିୟମ ରହିଛି ।
ନିଷ୍ପତ୍ତି ପ୍ରତ୍ୟାହାର କଲା ICICI ବ୍ୟାଙ୍କ: ଏବେ ଆକାଉଣ୍ଟରେ ୫୦ ହଜାର ରଖିବା ଜରୁରୀ ନୁହେଁ
ଦେଶର ଦ୍ବିତୀୟ ସର୍ବବୃହତ ପ୍ରାଇଭେଟ ବ୍ୟାଙ୍କ ICICI ବ୍ୟାଙ୍କ ଗ୍ରାହକଙ୍କ ପାଇଁ ଆକାଉଣ୍ଟରେ ସର୍ବନିମ୍ନ ବାଲାନ୍ସ ସୀମା ହ୍ରାସ କରିଛି । ଆକାଉଣ୍ଟରେ ସର୍ବନିମ୍ନ ବାଲାନ୍ସ ୫୦ ହଜାର ରଖିବାକୁ ନିକଟରେ ବ୍ୟାଙ୍କ ପକ୍ଷରୁ ସୂଚନା ଜାରି କରାଯାଇଥିଲା । ମାତ୍ର ଏବେ ବ୍ୟାଙ୍କ ପୂର୍ବ ନିଷ୍ପତ୍ତିକୁ ପ୍ରତ୍ୟାହାର କରିନେଇଛି । ଅର୍ଥାତ ଏବେ ଗ୍ରାହକମାନେ ନିଜ ନିଜର ବ୍ୟାଙ୍କ ଆକାଉଣ୍ଟରେ ୫୦ ହଜାର ଟଙ୍କା ରଖିବା ଜରୁରୀ ନୁହେଁ । ଗ୍ରାମାଞ୍ଚଳ ଲୋକଙ୍କ ପାଇଁ ଏହି ଲିମିଟ୍ ହ୍ରାସ କରାଯାଇ ୨୫୦୦ ଟଙ୍କା କରାଯାଇଛି ।
ସେହିପରି ମେଟ୍ରୋ ଓ ସହରାଞ୍ଚଳର ନୂଆ ସେଭିଙ୍ଗ ଆକାଉଣ୍ଟ ପାଇଁ ସର୍ବନିମ୍ନ ମାସିକ ଆଭରେଜ ବାଲାନ୍ସ (MAB) ୧୫ ହଜାର ଟଙ୍କା କରାଯାଇଛି । ଅଗଷ୍ଟ ପହିଲା ଠାରୁ ଏହା ଲାଗୁ କାର୍ଯ୍ୟକାରୀ ହେବ । ଅର୍ଦ୍ଧ-ସହରୀ କ୍ଷେତ୍ର ପାଇଁ ୨୫ ହଜାର ଟଙ୍କାରୁ ହ୍ରାସ କରାଯାଇ ୭,୫୦୦ ଟଙ୍କା କରାଯାଇଛି । ଗ୍ରାମୀଣ କ୍ଷେତ୍ର ପାଇଁ ୧୦ ହଜାରରୁ ହ୍ରାସ କରାଯାଇ ୨,୫୦୦ କରାଯାଇଛି । ଅଗଷ୍ଟ ପହିଲା ଠାରୁ ନୂଆ ସେଭିଂ ଆକାଉଣ୍ଟ ପାଇଁ MABର ନୂଆ ନିୟମ ବ୍ୟାଙ୍କ ଲାଗୁ କରିଥିଲା । ମାତ୍ର ଗ୍ରାହକଙ୍କ ପକ୍ଷରୁ ପ୍ରତିକ୍ରିୟା ମିଳିବା ପାଇଁ ବ୍ୟାଙ୍କ ପକ୍ଷରୁ ଉକ୍ତ ସର୍ତ୍ତରେ ପରିବର୍ତ୍ତନ କରାଯାଇଛି ।
୨୪ ଘଣ୍ଟା ମଧ୍ୟରେ ପ୍ରବଳ ବର୍ଷା ଆଶଙ୍କା: ଘଣ୍ଟା ପ୍ରତି ୩୦-୪୦ କିମି ବେଗରେ ବହିବ ପବନ
ବଙ୍ଗୋପ ସାଗରରେ ସକ୍ରିୟ ସୃଷ୍ଟ ଲଘୁଚାପ। ୨୪ ଘଣ୍ଟାରେ ଘନୀଭୂତ ହୋଇ ସୁଦୃଶ୍ୟ ଲଘୁଚାପର ରୂପ ନେଇପାରେ। ପ୍ରଭାବରେ ପ୍ରବଳ ବର୍ଷା ସମ୍ଭାବନା ରହିଛି। ଆସନ୍ତାକାଲିଠାରୁ ଅତି ପ୍ରବଳ ବର୍ଷା ଆଶଂକା କରାଯାଉଛୀ । ଘଣ୍ଟା ପ୍ରତି ୩୦ରୁ ୪୦ କିମି ବେଗରେ ବହିବ ପବନ। ଶନିବାରଠାରୁ ପାଗରେ ପରିବର୍ତ୍ତନ ସମ୍ଭାବନା ରହିଛି। ।
ପୁଣି ଅଡୁଆରେ ଅଭିନେତ୍ରୀ ଶିଳ୍ପା ସେଟ୍ଟୀ ଓ ସ୍ବାମୀ ରାଜ କୁନ୍ଦ୍ରା: ୬୦ କୋଟି ଟଙ୍କା ଠକେଇ ଅଭିଯୋଗରେ ମାମଲା ରୁଜୁ
ପୁଣି ଅଡୁଆରେ ଅଭିନେତ୍ରୀ ଶିଳ୍ପା ସେଟ୍ଟୀ ଓ ସ୍ବାମୀ ରାଜ କୁନ୍ଦ୍ରା। ମୁମ୍ବାଇର ଜଣେ ବ୍ୟବସାୟୀଙ୍କଠାରୁ ପ୍ରାୟ ୬୦ କୋଟି ଟଙ୍କା ଠକେଇ ଅଭିଯୋଗରେ ରୁଜୁ ହୋଇଛି ମାମଲା। ବେଷ୍ଟ ଡିଲ୍ ଟିଭି ପ୍ରାଇଭେଟ ଲିମିଟେଡକୁ ନେଇ ହୋଇଥିବା ଡିଲରେ ଏହି ଠକେଇ ଘଟିଥିବା ଅଭିଯୋଗ ହୋଇଛି। ବର୍ତ୍ତମାନ ଏହି ଫାର୍ମ ବନ୍ଦ ହୋଇଯାଇଥିବା ସୂଚନା ମିଳିଛି। ଶିଳ୍ପା ଓ କୁନ୍ଦ୍ରାଙ୍କ ବିରୋଧରେ ୬୦ କୋଟି ଟଙ୍କାର ଅଭିଯୋଗ ଆଣିଛନ୍ତି ବ୍ୟବସାୟୀ ଦୀପକ କୋଠାରି। ୨୦୧୫ରୁ ୨୦୨୩ ମଧ୍ଯରେ ଏହି ଠକେଇ ହୋଇଥିବା ଅଭିଯୋଗ ହୋଇଛି। ଲୋଟସ କ୍ୟାପିଟାଲ ଫାଇନାନସିଆଲ ସର୍ଭିସେସର ନିର୍ଦ୍ଦେଶକ ଅଛନ୍ତି ଦୀପକ। ଶିଳ୍ପା ଓ କୁନ୍ଦ୍ରାଙ୍କୁ ତାଙ୍କ ସହ ପରିଚୟ କରାଇଥିଲେ ରାଜେଶ ଆର୍ଯ୍ୟ ନାମକ ଜଣେ ବ୍ୟକ୍ତି। ସେମାନେ ସେତେବେଳେ ବେଷ୍ଟ ଡିଲ ଟିଭି ପ୍ରାଇଭେଟ ଲିମିଟେଡର ନିର୍ଦ୍ଦେଶକ ଥିଲେ। ଏହା ଥିଲା ଏକ ହୋମ ସପିଙ୍ଗ ଓ ଅନଲାଇନ ରିଟେଲ ପ୍ଲାଟଫର୍ମ। ସେମାନେ କମ୍ପାନୀର ୮୭.୬ ପ୍ରତିଶତ ସେୟାର ରଖିଥିଲେ। ପ୍ରଥମେ ବଲିଉଡ ଦମ୍ପତି୧୨ ପ୍ରତିଶତ ସୁଧହାରରେ ୭୫ କୋଟି ଟଙ୍କାର ଋଣ ଚାହିଁଥିଲେ। ଦମ୍ପତିଙ୍କ ଅନୁରୋଧ ପରେ ଏପ୍ରିଲ ୨୦୧୫ ଦୀପକ ୩୧.୯୫ କୋଟି ଟଙ୍କାର ଋଣ ଦେଇଥିଲେ। ସେପ୍ଟେମ୍ବରରେ ଆଉ ୨୮.୫୩ କୋଟି ଟଙ୍କା ପ୍ରଦାନ କରିଥିଲେ। ଋଣ ମିଳିବା ପରେ କମ୍ପାନୀର ନିର୍ଦ୍ଦେଶିକା ପଦରୁ ଶିଳ୍ପା ଇସ୍ତଫା ଦେଇଥିଲେ। ଏହା ସହ ଦୀପକଙ୍କ ଟଙ୍କା ଫେରାଇ ନଥିଲେ। ପୂର୍ବରୁ ଆଡଲ୍ଟ ଫିଲ୍ମ ଓ ବିଟକଏନ ଠକେଇ ମାମଲାରେ ଛନ୍ଦି ହୋଇଥିଲେ କୁନ୍ଦ୍ରା।