ଭୁବନେଶ୍ବର: ଜିଦରେ ଅଟଳ ବିଏମସି ଅଧିକାରୀ ଓ କର୍ମଚାରୀ। ତୃତୀୟ ଦିନରେ କଲମ ଛାଡ଼ ଆନ୍ଦୋଳନ। କଳାବ୍ୟାଜ ପିନ୍ଧି ପ୍ରତିବାଦ। ବିଏମସି ଅତିରିକ୍ତ କମିଶନରଙ୍କୁ ଆକ୍ରମଣ ଘଟଣାରେ ଆନ୍ଦୋଳନରେ ପଡୁନି ପୂର୍ଣ୍ଣଚ୍ଛେଦ। ଘୁଞ୍ଚୁନି ସରକାରୀ ଫାଇଲ। ଚାକିରି କରିବା ଦିନୁ ଏଭଳି ଆକ୍ରମଣ କେବେ ଦେଖି ନଥିବା କହିଛନ୍ତି କର୍ମଚାରୀ। ସେମାନେ କହିଛନ୍ତି ଅଫିସ ଭିତରେ ସେମାନେ ସୁରକ୍ଷିତ ମଣୁନାହାନ୍ତି। ମାଷ୍ଟରମାଇଣ୍ଡ କୁହାଯାଉଥିବା ଜଗନ୍ନାଥ ପ୍ରଧାନ ଗିରଫ ନ ହେବା ଯାଏ ଆନ୍ଦୋଳନ ଜାରି ରହିବ। ତେଣେ ଆନ୍ଦୋଳନକୁ ସମର୍ଥନ ଜଣାଇଛନ୍ତି ସମସ୍ତ କର୍ପୋରେଟର ଓ କଂଗ୍ରେସ ନେତା I

ବିଏମସି ଅଧିକାରୀଙ୍କୁ ଅମାନୁଷିକ ମାଡ଼ ମାରିବା ଘଟଣା ପରେ ବଦଳିଛି ବିଏମସି ଅଫିସରେ ସିକୁରିଟି ବ୍ୟବସ୍ଥା I ସାଧା ସୁରକ୍ଷା କର୍ମଚାରୀ ବଦଳରେ ଏବେ ବିଏମସି ଅଫିସ ଜଗୁଛନ୍ତି ଗନମ୍ୟାନ I ସେପଟେ ବିଏମସି ଅଫିସରେ ପହଞ୍ଚି ଆନ୍ଦୋଳନକୁ ସମର୍ଥନ ଜଣାଇଛନ୍ତି ପୂର୍ବତନ ମନ୍ତ୍ରୀ ତଥା ବରିଷ୍ଠ କଂଗ୍ରେସ଼  ନେତା ସୁରେଶ ରାଉତରାୟ।

ସ୍ପଷ୍ଟ ଦିବାଲୋକରେ ଖୋଦ୍ ଅଫିସ ଭିତରେ ବରିଷ୍ଠ ସରକାରୀ ଅଧିକାରୀଙ୍କୁ ହେଲା ମାଡ଼। ହେଲେ ସରକାର ବସିଛନ୍ତି ଚୁପ୍।

ଭୁବନେଶ୍ବର: ଜଗନ୍ନାଥ ପ୍ରଧାନଙ୍କୁ ଗିରଫ କର, ଘଣ୍ଟାଏ ଭିତରେ ଆମେ କାମରେ ଯୋଗ ଦେବୁ। ଓଏଏସ ସଂଘର ଏହି ଜିଦରେ ଆକ୍ତାମାକ୍ତା ସରକାର। ୩ ଦିନ ପରେ ବି ଆକ୍ରମଣର ମାଷ୍ଟରମାଇଣ୍ଡ ଗିରଫ ହୋଇନଥିବାରୁ ସାରା ରାଜ୍ୟରେ ଠପ୍ ହୋଇଛି ପ୍ରଶାସନିକ ବ୍ୟବସ୍ଥା। ରାଜ୍ୟ ପ୍ରଶାସନରେ ଦେଖାଦେଇଛି ଅଚଳାବସ୍ଥା। ଜିଲ୍ଲା ସ୍ତରରେ ଠପ୍ ହୋଇଛି ସରକାରୀ କାମ। ଦୁଇ ଦିନ ହେଲା ସମୂହ ଛୁଟି ଘୋଷଣା କରି କାମରେ ଯୋଗ ଦେଉନାହାଁନ୍ତି ଓଏଏସ ସଂଘ । ସରକାର କିନ୍ତୁ ବିଏମସି ଅତିରିକ୍ତ କମିଶନର ରତ୍ନାକର ସାହୁ ଆକ୍ରମଣ ଘଟଣାରେ ମୁଖ୍ୟ କାର୍ପଟଦାର ଜଗନ୍ନାଥ ପ୍ରଧାନଙ୍କୁ ଗିରଫ କରିପାରିନାହାଁନ୍ତି। ସଂଘ କହିଛି, ମାସ ମାସ ଧରି ତଦନ୍ତ କଲେ ଚଳିବ ନାହିଁ । ତରୁନ୍ତ ସରକାର ମାଷ୍ଟରମାଇଣ୍ଡକୁ ଗିରଫ କରନ୍ତୁ। ଆମେ ଘଣ୍ଟାଏ ଭିତରେ କାମରେ ଯୋଗ ଦେବୁ । ଓଏଏସ ଅଫିସରମାନେ ଆଉ କେତେଦିନ ଚୁପ ବସିବେ। ନୈତିକତା ଦୃଷ୍ଟିରୁ ବନ୍ୟା ପ୍ରଭାବିତ ଅଞ୍ଚଳ ଓ ପୁରୀରେ ବାହୁଡା ଯାତ୍ରାରେ ନିୟୋଜିତ ଅଫିସରମାନେ କାମ କରୁଛନ୍ତି ବୋଲି ଓଏଏସ ସଂଘ ସଭାପତି କହିଛନ୍ତି ।

ଓଏଏସ ଅଫିସରଙ୍କ କାର୍ଯ୍ୟବନ୍ଦ ଯୋଗୁଁ ଠପ ହୋଇଯାଇଛି ରାଜ୍ୟ ପ୍ରଶାସନ। ଜିଲ୍ଲା ସ୍ତରରେ ହେଉନି ସରକାରୀ କାମ । ଧିମେଇ ଗଲାଣି ସବୁ ବିକାଶମୂଳକ କାମ। ଭତ୍ତା, ପେନସନ, ଜମିବାଡି ସଂକ୍ରାନ୍ତ ସମସ୍ୟାକୁ ନେଇ ଦୈନିକ ତହସିଲ କିମ୍ବା ଜିଲ୍ଲାପାଳଙ୍କ କାର୍ଯ୍ୟାଳୟକୁ ଆସୁଥିବା ସାଧାରଣ ଲୋକେ ହତାଶ ହୋଇ ଫେରୁଛନ୍ତି । ଯାହାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ସାଧାରଣ ଲୋକେ।

ସରକାର ଓ ଅଫିସରଙ୍କ ଜିଦ ଭିତରେ ଘାଣ୍ଟି ହେଉଛନ୍ତି ସାଧାରଣ ଜନତା। ଅଫିସରେ ହୋଇପାରୁନି ଲୋକଙ୍କ କାମ। ଜଣଙ୍କ ଗିରଫଦାରୀ ଏଡାଇବାକୁ ସରକାର ଏବେ ପୂରା ପ୍ରଶାସନକୁ ସ୍ଥାଣୁ କରିଦେଲେଣି ବୋଲି ଅଭିଯୋଗ ହେଲାଣି

ଭୁବନେଶ୍ବର: ନିଶା ନିଶାଣରେ ରାଜଧାନୀ ଶିକ୍ଷାନୁଷ୍ଠାନ । ଛତୁ ଫୁଟିବା ଭଳି ପାନ ଦୋକାନରେ ମିଳୁଛି ନିଶା ସାମଗ୍ରୀ ।  ସହରର ଚାକଚକ୍ୟ ଦେଖି ହୁଡୁଛନ୍ତି ବାଟ । ପିଲାଙ୍କୁ ସୁଧାରିବା ପାଇଁ ଅଣ୍ଟା ଭିଡ଼ିଲା ଅବକାରୀ ବିଭାଗ। କିଏ ଡାକ୍ତର ବନିବ ତ ଆଉ କିଏ ଇଂଜିନିୟର । ଉଜ୍ଜ୍ୱଳ ଭବିଷ୍ୟତର ସ୍ୱପ୍ନ ନେଇ ରାଜଧାନୀ ଭୁବନେଶ୍ବର ଆସୁଛନ୍ତି ଛାତ୍ରଛାତ୍ରୀ। କିନ୍ତୁ ଏଠାରେ ନାମିଦାମୀ କଲେଜ, କୋଚିଂ ସେଣ୍ଟରରେ ପାଠ ପଢିବା ବେଳେ ନିଶାରେ କବଳିତ ହେଉଛନ୍ତି ପିଲା। ବ୍ରାଉନସୁଗର, କୋକେନ, ଗଞ୍ଜେଇ, ଚରସ, ଅଫିମ, ମ୍ୟାରିଜୁଆନା ଭଳି ନିଶା ଏବେ ପିଲାଙ୍କୁ କବଳିତ କରିଛି । ଏ ସବୁକୁ ରୋକିବା ପାଇଁ ଅବକାରୀ ବିଭାଗ ପକ୍ଷରୁ ବିଭିନ୍ନ ଶିକ୍ଷାନୁଷ୍ଠାନ ସହ ଆୟୋଜିତ ହୋଇଛି ଏକ interaction programme । ପୋଲିସ ଆଖିରେ ଧୂଳି ଦେଇ କ୍ୟାମ୍ପସରେ ନିଶା ପହଞ୍ଚିବାକୁ କିଭଳି ରୋକାଯାଇପାରିବ ସେ ନେଇ ଏନଫୋର୍ସମେଣ୍ଟକୁ କୁ ଗୁରୁତ୍ୱ ଦିଆଯିବ ବୋଲି କହିଛନ୍ତି ଅବକାରୀ ସୁପରି ଟେଣ୍ଡେଣ୍ଟ।

କିଛିଦିନ ତଳେ ଏକ ଘରୋଇ କଲେଜ ଛାତ୍ର ନିଶା ଖାଇ କୁଆଖାଇ ନଦୀରେ ବୁଡିଯିବା ପରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା । କଲେଜ କର୍ତ୍ତୃପକ୍ଷ କ୍ୟାମ୍ପସରେ ଆୱାରନେସ କରି ନୋଟିସ ବୋର୍ଡ ସହ ହଷ୍ଟେଲ ଓ ମେସରେ ନୀତିଦିନ ଚେକିଂ କରିବେ । ଯଦି କୌଣସି ଛାତ୍ର ନିଶା ସେବନ ନେଇ ସୂଚନା ମିଳେ, ତେବେ ଅବିଭାବକଙ୍କୁ ତୁରନ୍ତ ଜଣାଯିବ । କ୍ୟାମ୍ପସରେ ପ୍ରବେଶ ପ୍ରସ୍ଥାନ ଅନ୍ୟାନ୍ୟ ସ୍ଥାନରେ ସିସିଟିଭି ଲଗାଯିବ । ଡ୍ରଗ୍ସ ଏନଫୋର୍ସମେଣ୍ଟ ପାଇଁ କଲେଜରେ ଏକ କମିଟି ମଧ୍ୟ ରହିବ। ପୂର୍ବରୁ ଏ ସବୁ ଦିଗରେ ଉଭୟ କମିଶନରେଟ ପୋଲିସ ଓ ଅବକାରୀ ବିଭାଗ ବାରମ୍ବାର ଚେଷ୍ଟା କରିଛନ୍ତି । ଆଉ ଗୋଟିଏ ପାଦ ଆଗକୁ ବଢି ନିଜେ ଅବକାରୀ ସୁପରିଟେଣ୍ଡେଣ୍ଟ ବିଜେବି କଲେଜରେ ଛାତ୍ରଛାତ୍ରୀଙ୍କୁ ସଚେତନ କରାଇବା ଘଟଣାକୁ ବିଭିନ୍ନ ମହଲରୁ ସ୍ୱାଗତ କରାଯାଇଛି ।

କିଛିଦିନ ତଳେ ସ୍ପେଶାଲ କ୍ରାଇମ ୟୁନିଟ ମଧ୍ୟ ସହରର କୋଣ ଅନୁକୋଣ ରେ ନିଶାଡୀ ଓ ନିଶା ବେପାରୀଙ୍କୁ ଧରିଥିଲା । ଆଗକୁ ଠିକ ସେହିଭଳି ଜିରୋ ଟଲରାନ୍ସ ନୀତି ଅବକାରୀ ବିଭାଗ ଗ୍ରହଣ କରିବ ବୋଲି କହିଛନ୍ତି ସୁପରୀଟେଣ୍ଡେଣ୍ଟ ।

ବାଲେଶ୍ୱର: ବନ୍ୟା ଟଳିଲା ଦର ବଢିଲା । ପରିବା ବଜାରରେ ମହଙ୍ଗା ମାଡ଼ । ଏକାଥରେ ଦୁଇ ଗୁଣ ବଢିଯାଇଛି ମୂଲ୍ୟ । ସୁବର୍ଣ୍ଣରେଖା ଓ ବୁଢ଼ାବଳଙ୍ଗ ନଦୀ ପାଣି ପଶି ପରିବା ଚାଷକୁ ପ୍ରଭାବିତ କରିଛି ।  ବାଲେଶ୍ୱର ଜିଲ୍ଲାରେ ବ୍ୟାପକ କ୍ଷୟକ୍ଷତି ହୋଇଛି । ଯାହା ଫଳରେ ଆକାଶ ଛୁଆଁ ହୋଇଛି ପନି ପରିବା ଦର।  ବଜାରରେ ଏବେ ପୋଟଳ 70 ଟଙ୍କାକୁ ବାଇଗଣ 80 , ବିଲାତି 50କୁ କାଙ୍କଡ଼ 80 , ଜହ୍ନି 60 , କଖାରୁ 50 , କଲରା 80 ଟଙ୍କା ରହିଛି । କଟକରେ ବି ସମାନ ସ୍ଥିତି ଦେଖିବାକୁ ମିଳିଛି । ରାଜ୍ୟ ବାହାରର ପରିବା ଉପରେ ନିର୍ଭର କରୁଛନ୍ତି ବ୍ୟବସାୟୀ । ଫଳରେ କିଣା ଅଧିକ ଯୋଗୁ ବିକ୍ରୟ ମଧ୍ୟ ଅଧିକ ଟଙ୍କାରେ କରାଯାଉଛି । ଯେ ପର୍ଯ୍ୟନ୍ତ ନୂଆ ପରିବ ଅମଳ ନହୋଇଛି ସେ ପର୍ଯ୍ୟନ୍ତ ଦର ବୃଦ୍ଧି ପାଇବ ବୋଲି କହିଛନ୍ତି ଛତ୍ରବଜାର ବ୍ୟବସାୟୀ ସଂଘ ସଭାପତି।

ପନିପରିବା ଦର ବୃଦ୍ଧି ପାଇଁ ରାଜ୍ୟ ସରକାରଙ୍କୁ ଦାୟୀ କରିଛି ଓଡିଶା ବ୍ୟବସାୟୀ ମହାସଂଘ। ଅନେକ ଥର ପନିପରିବା ଉତ୍ପାଦନ ବୃଦ୍ଧି ପାଇଁ ରାଜ୍ୟ ସରକାରଙ୍କ ସହଯୋଗ ଲୋଡ଼ାଯାଇଛି। ଖାଉଟିଙ୍କ ସ୍ୱାର୍ଥକୁ ଆଖି ଆଗରେ ରଖି ସରକାରଙ୍କ ଦୃଷ୍ଟି ଆକର୍ଷଣ କରାଯାଇଛି। କିନ୍ତୁ ସରକାର କୁମ୍ଭକର୍ଣ୍ଣ ନିଦ୍ରାରେ ଶୋଇ ଯାଇଛନ୍ତି। ଖରା ଦିନ ବର୍ଷା ବି ସମସ୍ୟା ସାଜିଛି। ୮୦ ଭାଗ ପରିବା ବାହାର ରାଜ୍ୟରୁ ଆମଦାନୀ ହେଉଛି। ଚାହିଦା ଠାରୁ କମ ମାଲ ଉପଲବ୍ଧ ହେଉଛି। ସେଥିପାଇଁ ପନିପରିବା ଦର ହୁ ହୁ ହୋଇ ବଢୁଛି । ଏଭଳି ଦରଦାମ ବୃଦ୍ଧିରୁ ବର୍ତ୍ତିବା ପାଇଁ ସରକାର ଚାଷୀଙ୍କ ଉତ୍ପାଦନ ବୃଦ୍ଧି ସହ ସେମାନଙ୍କୁ ସଠିକ ମାର୍କେଟ ଲିଂକେଜ ଦେବା ଆବଶ୍ୟକ ବୋଲି କହିଛି ସଂଘ । ଓଡିଶା ପନିପରିବା ଉତ୍ପାଦନରେ ଦେଶରେ ଦ୍ଵିତୀୟ ସ୍ଥାନରେ ଥିଲା, କିନ୍ତୁ ଏବେ ଓଡ଼ିଶା ସ୍ଥାନ ବହୁ ତଳକୁ ଖସିଥିବା ଅଭିଯୋଗ ବାଢିଛି ଓଡିଶା ବ୍ୟବସାୟୀ ମହାସଂଘ ।

କୋରାପୁଟ: ଲଗାଣବର୍ଷାରେ ବେହାଲ କୋରାପୁଟ ।  ଜିଲ୍ଲା ବିଭିନ୍ନ ସ୍ଥାନରେ ଭୂସ୍ଖଳନ । କୋରାପୁଟ କିରଣ୍ଡାଲ ଲାଇନକୁ ରେଳ ଚଳାଚଳ ବନ୍ଦ ।  ମାଳିଗୁଡ଼ା ଠାରୁ ଜରଟି ରେଳ ଲାଇନରେ ମାଟି ଧସି ଅବରୋଧ କରିଛି । ସଫା କରିବାରେ ଲାଗି ପଡିଛନ୍ତି ରେଳ ବିଭାଗୀୟ କର୍ତ୍ତୃପକ୍ଷ। ଏପରି ସମସ୍ୟା ଯୋଗୁ  ଅନେକ ଟ୍ରେନ ବାତିଲ ହୋଇଥିବାବେଳେ ଆଜି ଠାରୁ ଅନେକ ଟ୍ରେନ ଜଗଦଲପୁର ପରିବର୍ତ୍ତେ କୋରାପୁଟରୁ ଯାତାୟାତ କରିବ ବୋଲି ୱାଲଟର ଡିଭିଜନ ପକ୍ଷରୁ ସୂଚନା ଦିଆଯାଇଛି । ମାଲିଗୁଡ଼ା ରେଳ ଷ୍ଟେସନ ଓ ଜରଟି ରେଳ ଷ୍ଟେସନ ମଧ୍ୟରେ ୨୦୮/୨୦୯ କିଲୋମିଟର ରେଳ ଲାଇନରେ ଭୂସ୍ଖଳନ ହୋଇଛି । ରେଳ ବିଭାଗୀୟ ଉଚ୍ଚ ପଦାଧିକାରୀ, ଇଞ୍ଜିନିୟରଙ୍କ ସମସ୍ତ ଅଧିକାରୀ ଓ କର୍ମଚାରୀ ପହଞ୍ଚି ରେଳ ଲାଇନ୍ କିପରି ସ୍ଵାଭାବିକ କରାଯିବ ସେ ଦିଗରେ କାର୍ଯ୍ୟ ଜାରି ରଖିଛନ୍ତି   । ଘଟଣା ସ୍ଥଳରେ ୧୧ରୁ ଅଧିକ ଜେସିବି ମୁତୟନ ହୋଇଛି । ବର୍ଷା ସତ୍ୱେ ରେଳ ଲାଇନ ସ୍ଵାଭାବିକ ପାଇଁ  ଜୋରସୋର ରେ କାର୍ଯ୍ୟ ଜାରି ରହିଛି ।

ପ୍ରତି ବର୍ଷ ଏପରି ଅଘଟଣ ଘଟୁଛି । ଗତକାଲିର ପାସେଞ୍ଜର ଟ୍ରେନ ଯିବାର ୨ ମିନିଟ ପରେ ପାହାଡ଼ ଧସି ପଡିଥିଲା । ବଡ଼ ଦୁର୍ଘଟଣାରୁ ଅଳ୍ପକେ ବର୍ତ୍ତି ଯାଇଥିଲେ ଯାତ୍ରୀ ଓ ଶ୍ରମିକ । ବାରମ୍ବାର ଏପରି ପାହାଡ଼ ରୁ ମାଟି ଅତଡ଼ା ଖସୁଥିବାରୁ ଲୋକଙ୍କ ମନରେ ଭୟ ସୃଷ୍ଟି ହୋଇଛି ।

ଗତ ୨୪ ଘଣ୍ଟାରୁ ଅଧିକ ସମୟ ହେଲାଣି ବର୍ଷାରେ ମାଟି ଓ ପଥର ଉଦ୍ଧାର କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଚାଲିଛି । ଏହା ପୂର୍ବରୁ ଗତ ୨୦୨୩ ମସିହା ସେପ୍ଟେମ୍ବର ମାସ ୧୦ ତାରିଖରେ ମଧ୍ୟ ଏକ ବଡଧରଣର ଭୂସ୍ଖଳନ ହୋଇଥିଲା ।

ନୟାଗଡ଼: ନିଷ୍ଠୁର ଦଇବ । ଆଗପଛ କରି ନେଇଗଲା ଗୋଟିଏ ପରିବାରର ୩ ଜୀବନ । ବାପାଙ୍କ ମୁହଁରେ ମୁଖାଗ୍ନି ଦେବାକୁ ଆସି ଶବ ହୋଇଗଲେ ପୁଅ ବୋହୂ । ନୟାଗଡ଼ ଜିଲ୍ଲା ଗଣିଆ ପାଟଣା ସାହିର ହୃହୟବିଦାରକ ଘଟଣା ଏବେ ସମସ୍ତଙ୍କୁ ସ୍ତବ୍ଧ କରିଦେଇଛି । ପରିବାରରେ ଖେଳିଯାଇଛି ଶୋକର ଛାୟା । ବନ୍ଧୁବାନ୍ଧବ, ସାଇ ପଡୋଶୀଙ୍କ ଆଖିରୁ ଶୁଖୁନି ଲୁହ । ଗତକାଲି ବିଳମ୍ବିତ ରାତ୍ରିରେ ପାଟଣା ସାହିର ଅବସରପ୍ରାପ୍ତ ଶିକ୍ଷକ ବଲ୍ଲଭ ସାହୁଙ୍କ ମୃତ୍ଯୁ ଘଟିଥିଲା । ଖବର ପାଇ ନୂଆପଡା ଜିଲ୍ଲା କୁରୁମଭୋଇ ହାଇସ୍କୁଲରେ ବିଜ୍ଞାନ ଶିକ୍ଷକ ଭାବେ କାର୍ଯ୍ୟରତ ବଲ୍ଲଭଙ୍କ ବଡ଼ପୁଅ ରାଜ କିଶୋର ସାହୁ ଓ ବୋହୁ ମିନାକ୍ଷୀ ସାହୁ ଆସୁଥିବା ବେଳେ ତାଙ୍କର ଦୁର୍ଘଟଣାରେ ମୃତ୍ଯୁ ଘଟିଛି ।…

ରାଜ କିଶୋର ଓ ମିନାକ୍ଷୀ ବାପାଙ୍କ ଶେଷ ଦର୍ଶନ କରିବାକୁ ସୁଦୂର ନୂଆପଡାରୁ ଆସୁଥିଲେ । ନୂଆପଡା ସ୍ଥିତ ଟୋଲଗେଟ ନିକଟରେ ଛିଡାହୋଇଥିବା ଟ୍ରକ ସହ କାରଟି ଧକ୍କା ହୋଇଥିଲା । ସଙ୍ଗେସଙ୍ଗେ ସ୍ଥାନୀୟ ଲୋକେ ଦୁହିଁଙ୍କୁ ବୌଦ୍ଧ ମେଡିକାଲକୁ ସ୍ଥାନାନ୍ତରିତ କରିଥିଲେ । କିନ୍ତୁ ବିଡମ୍ବନାର ବିଷୟ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । …

ରାଜକିଶୋର ଓ ମିନାକ୍ଷୀଙ୍କ ଗୋଟିଏ ପୁଅ ଓ ଗୋଟିଏ ଝିଅ ଥିବାବେଳେ ସେ ଦୁହେଁ ରାଜ୍ଯ ବାହାରେ ଘରୋଇ ଅନୁଷ୍ଠାନରେ ଚାକିରୀ କରୁଛନ୍ତି । ହେଲେ ବାପା ମାଆଙ୍କ ମୃତ୍ଯୁ ପରେ ହସ-ଖୁସିର ସଂସାରରେ  ଅନ୍ଧକାର ଘୋଟିଯାଇଛି ।