ନୂଆଦିଲ୍ଲୀ:  ଚାଲିଛି ବେଆଇନ ଗୋରୁ କାରବାର । ଶତ ପ୍ରଚେଷ୍ଟା ପରେ ମଧ୍ୟ ବଳି ପଡ଼ି ଯାଉଛନ୍ତି ନିରୀହ ପଶୁ । ସରକାର ଏହାକୁ ରୋକିବାକୁ ଉଦ୍ୟମ କରୁଥିବା ବେଳେ ଅଣ୍ଟିଛୁରୀ ତଣ୍ଟି କାଟୁଛି । ଯାହାର ଖୁଲାସା କରିଛି ନିଜେ CBI ।

CBI ଗୋ-ଚାଲଣକୁ ନେଇ ଆଶ୍ଚର୍ଯ୍ୟ କରିବା ଭଳି ରିପୋର୍ଟ ଦେଇଛି । ସିବିଆଇର କହିବା ମୁତାବକ ଲଗାତାର ଦେଶରୁ ଗୋ ଚାଲାଣ ହେଉଛି । ତାହା ମଧ୍ୟ ହଜାର ହଜାର ସଂଖ୍ୟାରେ ପଶ୍ଚିମ ବଙ୍ଗ ଦେଇ ବାଂଲାଦେଶ କୁ ଗୋଚାଲଣ କରୁଛନ୍ତି । ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି ତାହା ହେଉଛି ସୀମା ସୁରକ୍ଷା ବଳ ବା BSF ଏବଂ କଷ୍ଟମର କିଛି ଅଧିକାରୀ ଏଥିରେ ଗୋ ତଷ୍କରଙ୍କୁ ସହଯୋଗ କରୁଛନ୍ତି । ଏହା ସହିତ କେତେକ ବରିଷ୍ଠ ନେତା ମଧ୍ୟ ଏଜେନ୍ସିର ରାଡ଼ାରରେ ଅଛନ୍ତି ।

ପ୍ରାୟ ଏକ ବର୍ଷ ଧରି ଚର୍ଚ୍ଚାର ବିଷୟ ସାଜିଛି ଗୋରୁ ଚାଲାଣ । ଭାରତକୁ ଲାଗିଥିବା ବାଂଲାଦେଶର ଦୁଇ ହଜାର ଦୁଇ ଶହ ଷୋହଳ କିଲୋମିଟର ସୀମା ଦେଇ ପ୍ରତିବର୍ଷ ମହୁଳ ମାତ୍ରାରେ ଗୋ-ଚାଲଣ ହେଉଛି । ପଶ୍ଚିମବଙ୍ଗର ସୀମାବର୍ତ୍ତୀ ଅଞ୍ଚଳ ମାଲଦା-ମୁର୍ଶିଦାବାଦର କିଛି ରାସ୍ତା ଦେଇ ପ୍ରତିଦିନ ଗାଈ ମାନଙ୍କୁ ବାଂଲାଦେଶରେ ପହଞ୍ଚାଯାଏ । ସିବିଆଇ ରିପୋର୍ଟ କହୁଛି ଯେତେ ମାତ୍ରାରେ ଗୋ-ଚାଲଣ ହେଉଛି ତାହାର ମାତ୍ର ପାଞ୍ଚ ପ୍ରତିଶତ ଚାଲଣକୁ ଅଟକାଇବାରେ ସଫଳ ହୋଇପାରନ୍ତି BSF । ବାକି ବିଷୟରେ ହୁଏତ ସେମାନଙ୍କ ନିକଟରେ ପକ୍କା ଖବର ନଥାଏ, କିମ୍ବା ସେମାନଙ୍କ ମିଳିତ ସହଯୋଗରେ ଗୋ-ଚାଲଣ ଅତି ସହଜରେ ହୋଇଯାଏ । ଏବେ ଏହା ପଛର ରାଜ୍ ଖୋଲିବାକୁ ଚେଷ୍ଟା କରୁଛି CBI ।

ଗଣମାଧ୍ୟମ ରିପୋର୍ଟ କହୁଛି, ସିବିଆଇ କିଛି ଲୋକଙ୍କ ଉପରେ ସନ୍ଦେହ କରୁଛି । ଏଥିରେ କେତେକ ବଡ଼ ବଡ଼ ନାଁ ମଧ୍ୟ ସାମିଲ ରହିଛି । ଯେଉଁଥିରେ ଗୋଟିଏ ନାଁ ହେଉଛି ତୃଣମୂଳ ନେତା ବିନୟ ମିଶ୍ର । ସେପ୍ଟେମ୍ବର ୨୦୨୦ରେ ସିବିଆଇ ଗୋ-ଚାଲାଣର ସରଗନା ଏନାମୁଲ ହକ୍ ର କୋଲକାତା ସ୍ଥିତ ବାସଭବନ ତଥା ଅଫିସରେ ଛାନଭିନ କରି କେତେକ ପ୍ରମାଣ ହାସଲ କରିଥିଲା । ଏହା ଜରିଆରେ ବିନୟ ମିଶ୍ର ବିଷୟରେ ସୂଚନା ମିଳିଥିଲା । ପଶୁ ଚାଲାଣ କରି ଏହି ନେତା ଯଥେଷ୍ଟ ଧନ ଠୁଳ କରିଥିବା କୁହାଯାଏ । ଯଦିଓ ଏହାର ତଦନ୍ତ ଚାଲିଛି, ତଥାପି ଏହି ନେତା ଏବେ ଦେଶରୁ ଗାଏବ ।

ପ୍ରଜାତି ଏବଂ ଉଚ୍ଚତାକୁ ଆଧାର କରି ଗାଈ ମାନଙ୍କର ମୂଲ୍ୟ ଧାର୍ଯ୍ୟ ହୋଇଥାଏ । ଯେପରିକି ଉତ୍ତରପ୍ରଦେଶ ଏବଂ ହରିୟାଣାର ଗୋରୁ ମାନଙ୍କୁ ଅଧିକ ଦାମରେ ବିକ୍ରି କରାଯାଏ । ଇଦ୍ ସମୟରେ ଏହାର ଚାହିଦା ଏବଂ ମୂଲ୍ୟ ପୂର୍ବାପେକ୍ଷା ଯଥେଷ୍ଟ ବଢିଯାଏ । ବାଂଲାଦେଶରେ ମୁସଲିମଙ୍କ ସଂଖ୍ୟା ଅଧିକ ହୋଇଥିବାରୁ, ସେଠାରେ ଗୋ-ମାଂସ ଖାଉଥିବା ବ୍ୟକ୍ତିଙ୍କ ସଂଖ୍ୟା ମଧ୍ୟ ଅଧିକ । ତେଣୁ ଗୋ-ଚାଲଣ ବାଂଲାଦେଶକୁ ହିଁ ହୋଇଥାଏ ।

ବିଏସଏଫ ହାତରେ ଧରା ପଡ଼ିବା ମାତ୍ରେ ଜାଣିଶୁଣି ଗାଈର ମୂଲ୍ୟକୁ କମ୍ କରିଦିଆଯାଏ । ଏହା ସହିତ ମାତ୍ର କିଛି ବେପାରୀଙ୍କୁ କମ୍ ମୂଲ୍ୟରେ କିଣିବା ପାଇଁ ଅନୁମତି ଦିଆଯାଏ । କିନ୍ତୁ ପରେ ଗାଈର ମୂଲ୍ୟ ବଢାଇ ବେପାରୀମାନେ ବାଂଲାଦେଶରେ ବିକ୍ରି କରିଦିଅନ୍ତି । ଗୋ-ଚାଲଣ ପାଇଁ ଚୋରାଚାଲଣକାରୀମାନେ ପ୍ରତିଦିନ କିଛି ନା କିଛି ଉପାୟ ବାହାର କରନ୍ତି । ଏଥିପାଇଁ ପ୍ରତିଦିନ ସେମାନେ ନୂଆ ନକ୍ସା ପ୍ରସ୍ତୁତ କରନ୍ତି । ଏହା ସହିତ କ’ଣ ସମସ୍ୟା ଆସିପାରେ ଏବଂ କିଭଳି ତାହାର ସମାଧାନ ହୋଇପାରିବ ତାହାକୁ ନେଇ ମଧ୍ୟ ଯୋଜନା କରନ୍ତି ସେହି ଚୋରାଚାଲାଣକାରୀ । ଏହା ସହିତ ଏମାନେ ବାଡ଼ କାଟିବାରେ ଲିପ୍ତ ରୁହନ୍ତି । କେବେ କେବେ ସୀମା ପାର ହେବାପାଇଁ ମହିଳା ଏବଂ ଛୋଟ ପିଲାଙ୍କୁ ମଧ୍ୟ ବ୍ୟବହାର କରାଯାଏ । ଏହାର ମୁଖ୍ୟ କାରଣ ହେଉଛି ମହିଳା ଏବଂ ଛୋଟ ପିଲାଙ୍କ ଉପରେ ଏତେ ଶୀଘ୍ର ସନ୍ଦେହ କରାଯାଏ ନାହିଁ । ଏହାକୁ ବାଦ୍ ଦେଲେ ଝୁଲା ଟେକନିକ୍ ମାଧ୍ୟମରେ କ୍ଷୁଦ୍ର ଆକୃତିର ଗୋରୁ ମାନଙ୍କୁ ସୀମା ପାର କରାଯାଏ ।

ଗୋଟିଏ ପଟେ ଦେଶରେ ଗୋ-ଚାଲାଣ ଏବଂ ଗୋ-ମାଂସ ଭକ୍ଷଣ ଉପରେ ପ୍ରତିବନ୍ଧକ ଲାଗିଥିବା ବେଳେ ଅନ୍ୟପଟେ ଚାଲିଛି ବେଆଇନ କାରବାର । କିନ୍ତୁ କେରଳ ଓ ପଶ୍ଚିମବଙ୍ଗରେ ଗୋମାଂସ ଉପରେ ପ୍ରତିବନ୍ଧକ ନାହିଁ । କେବଳ ପଶ୍ଚିମବଙ୍ଗ ନୁହେଁ ବରଂ ଆସାମରେ ମଧ୍ୟ ବେଧଡ଼କ ଭାବରେ ଚାଲିଛି ଗୋ-ଚାଲାଣ । ଆନ୍ତର୍ଜାତୀୟ ସୀମାକୁ ପାର କରି ବାଂଲାଦେଶର ଚୋରାଚାଲାଣକାରୀଙ୍କୁ ଗାଈ ମାନଙ୍କୁ ବିକ୍ରି କରିଦିଆଯାଉଛି ।

୨୦୧୪ରେ ଚାଲାଣ ହେଉଥିବା ପ୍ରାୟ ଏକ ଲକ୍ଷ ଦଶ ହଜାର ପଶୁଙ୍କୁ BSF ଜବାନ ଜବତ କରିଥିଲେ । ୨୦୧୬ ବେଳକୁ ଜବତ ହୋଇଥିବା ଗାଈଙ୍କ ସଂଖ୍ୟା ୧ ଲକ୍ଷ ୬୯ ହଜାରରେ ପହଞ୍ଚିଗଲା । କେତେ ମାତ୍ରାରେ ଗୋ-ଚାଲାଣ ହେଉଛି ତାହା ଜବତ ହୋଇଥିବା ପଶୁଙ୍କୁ ଦେଖି ଆକଳନ କରିବା କଷ୍ଟସାଧ୍ୟ ।
ଗୋ-ଚାଲାଣର ଏକ ପ୍ରମୁଖ କାରଣ ହେଉଛି ଦେଶର ଭୌଗଳିକ ସୀମାରେଖା । ଯାହାର ପ୍ରତ୍ୟେକ ସୀମାକୁ ବାଡ଼ଦ୍ୱାରା ଆବଦ୍ଧ କରିବା ସମ୍ଭବ ନୁହେଁ । ଯେଉଁଥିପାଇଁ ଏଭଳି ବେଆଇନ କାରବାର କରିପାରୁଛନ୍ତି ଚୋରାଚାଲାଣକାରୀ ।

କେବଳ ସେତିକି ନୁହେଁ, ଆମ ଦେଶର ଆଇନ କାନୁନ ପ୍ରକ୍ରିୟାର ଲମ୍ବା ଅବଧି ଏକ ପ୍ରମୁଖ କାରଣ । ଯାହାର ସିଧାସଳଖ ପ୍ରଭାବ ପଡ଼ୁଛି ଗାଈ ଏବଂ ଅନ୍ୟ ନିରୀହ ପଶୁ ମାନଙ୍କ ଉପରେ । ଆମ ଦେଶରେ ଗୋ-ଚାଲାଣ ବେଆଇନ ହୋଇଥିବା ବେଳେ ବାଂଲାଦେଶରେ ଏହା ସମ୍ପୂର୍ଣ୍ଣ ଓଲଟା । ବାଂଲାଦେଶ ସରକାରଙ୍କ ନଜରରେ ଏହା ତାଙ୍କ ପାଇଁ ରାଜସ୍ୱର ଜରିଆ । ଏହା ସହିତ ପଶୁ ମାନଙ୍କ ସହିତ ଜଡ଼ିତ ଚମଡ଼ା ଉଦ୍ୟୋଗ ସେଠାରେ ଖୁବ୍ ପ୍ରଚଳିତ । ମୋଟାମୋଟି କହିବାକୁ ଗଲେ ଆମ ଦେଶର ପଶୁ ପଡ଼ୋଶୀ ଦେଶର ଜିଡିପିରେ ଏକ ପ୍ରମୁଖ ଯୋଗଦାନ ଦେଉଛନ୍ତି ।