ନନ୍ଦିଘୋଷ ବ୍ୟୁରୋ : ବଡ଼ଦାଣ୍ଡ ପାଲଟିଲା ଚିଲିକାର ନୀଳ ଜଳରାଶି। ଚିଲିକାର ନୀଳ ଜଳରାଶିରେ ଘୋଷଯାତ୍ରା । ଡଙ୍ଗାରେ ବସି ନୌ ବିହାର କଲେ ଚତୁର୍ଦ୍ଧା ବିଗ୍ରହ । ସାରା ବିଶ୍ବ ଦେଖିଲା ଖୋର୍ଦ୍ଧ ଜିଲ୍ଲା ଚିଲିକା ନଇରି ଗାଁ ନିକଟ ଚିଲିକା ହ୍ରଦ ନିକଟରେ ଥିବା ଏହି ନିଆରା ରଥଯାତ୍ରା । ଘଣ୍ଟ, ଘଣ୍ଟା, ମୃଦଙ୍ଗ, ଝାଞ୍ଜରେ କମ୍ପିଲା ଚିଲିକା ପାଦଦେଶ । ଆଗରେ ନୃତ୍ଯରତା କୁନି ନୃତ୍ୟଶିଳ୍ପୀ, ପଛକୁ ସଂକୀର୍ତ୍ତନ ମଣ୍ଡଳୀ, ଶେଷରେ ୩ ସେବାୟତଙ୍କ ହାତରେ ପହଣ୍ଡି ହୋଇ ଆସିଲେ ତିନି ଠାକୁର । ଡଙ୍ଗାରେ ବିଜେ ହେବା ପରେ ଆରମ୍ଭ ହୋଇଥିଲା ଯାତ୍ରା ।
ପୁରୀରେ ବଡ଼ଦାଣ୍ଡରେ ରଥରେ ବସି ଠାକୁର ନବଦିନାତ୍ମକ ଯାତ୍ରାରେ ଯାଉଥିବେଳେ କାଙ୍କଣ ଶିଖରୀରେ ଚିଲିକାରେ ପାଳିତ ଘୋଷଯାତ୍ରା । ଚିଲିକା ହ୍ରଦର ଅଥଳ ଜଳରାଶିରେ ନୌକା ରଥରେ ଯାତ୍ରା କରନ୍ତି ମହାପ୍ରଭୁ । ତିନି ଠାକୁର ନୌ ବିହାର କରି ପୁଣି ମନ୍ଦିରକୁ ଫେରି ଆସନ୍ତି । ସୁଚନା ମୁତାବକ, ମୋଗଲ ସମ୍ରାଟ ତକି ଖାଁ ଯେତେବେଳେ ଜଗନ୍ନାଥଙ୍କ ଉପରେ ଆକ୍ରମଣ କରିଥିଲେ ସେତେବେଳେ ଦଇତାପତିମାନେ ପ୍ରଭୁ ଜଗନ୍ନାଥଙ୍କୁ ପାରିକୁଦର ଗୁରୁବାଇକୁ ନେଇଥିଲେ । ସେଠାରେ ଗୋଟିଏ ରାତି ରହିବା ପରେ ନଇରୀ ନିକଟ ଏହି କୁଦରେ ଆଣି ରଖିଥିଲେ । ସେଠାରେ ଭୋଗ ଲାଗି ପାଇଁ କେବଳ କାଙ୍କଡ଼ ଫଳ ବ୍ୟତୀତ ଅନ୍ୟ କିଛି ନଥିଲା । ମହାପ୍ରଭୁଙ୍କୁ କାଙ୍କଡ଼ ଭୋଗ ଲାଗି ହେଉଥିବାରୁ ଏହି ସ୍ଥାନ କାଙ୍କଣ ଶିଖରୀ ଭାବେ ପ୍ରଶିଦ୍ଧି ଲାଭ କରିଛି । ଜଣେ ସ୍ଥାନୀୟ ଭକ୍ତଙ୍କୁ ସ୍ବପ୍ନାଦେଶ ପରେ ଜଗନ୍ନାଥଙ୍କ ନିଟକରୁ ଏକ ରଥ ଚକ ଆଣି ଏଠାରେ ପୂଜାର୍ଚ୍ଚନା କରାଯାଉଛି । ଏଠାରେ ମଧ୍ୟ ପୁରୀ ଭଳି ମହାପ୍ରଭୁଙ୍କ ସବୁ ନୀତିକାନ୍ତି ହୋଇଥାଏ । ଚଳିତବର୍ଷ ରଥଯାତ୍ରା ପାଇଁ ଏଠାରେ ପ୍ରଶାସନ ପକ୍ଷରୁ ସମସ୍ତ ବ୍ଯବସ୍ଥା କରାଯାଇଥିଲା ।
ସାରା ବିଶ୍ବରେ କାଙ୍କଣ ଶିଖରୀର ଏହି ଘୋଷଯାତ୍ରା ବେଶ ନିଆରା । ଏହାକୁ ଦେଖିବାକୁ ଡଙ୍ଗାରେ ବିଭିନ୍ନ ଗାଁରୁ ଆସିଥାନ୍ତି ଶହଶହ ଶ୍ରଦ୍ଧାଳୁ ।
ଚିଲିକାର ନୀଳ ଜଳରାଶିରେ ଘୋଷଯାତ୍ରା
ବନ୍ଦ ହେଲା ରଥ ଟଣା: ଆସନ୍ତାକାଲି ସକାଳ ସାଢେ ୯ଟାରୁ ପୁଣି ରଥଟଣା ହେବ
ପୁରୀ: ବଳଭଦ୍ରଙ୍କ ରଥଟଣା ବିଳମ୍ବ ଯୋଗୁଁ ବଡ଼ଦାଣ୍ଡରେ ଅଟକିଗଲେ ମହାପ୍ରଭୁ। ଯାହାକୁ ନେଇ ଶ୍ରଦ୍ଧାଳୁ, ଜଗନ୍ନାଥପ୍ରେମୀ, ଭକ୍ତଙ୍କ ମନରେ ଗଭୀର କ୍ଷୋଭ ସୃଷ୍ଟି କରିଛି। ଆଜି ଅପରାହ୍ନ ୪ଟା ୫ରେ ରଥଟଣା ଆରମ୍ଭରୁ ହିଁ ବିଗିଡିଯାଇଥିଲା ରଥଟଣା ଶୃଙ୍ଖଳା। ବଳଭଦ୍ରଙ୍କ ରଥ ମୋଡ଼ ଖାଇବାରୁ ରଥଟଣା ବିଳମ୍ବ ହୋଇ ଚାଲିଥିଲା। ବଳଭଦ୍ରଙ୍କ ରଥଟଣା ବିଳମ୍ବ ହେବାରୁ ପଛକୁ ପଛ ସୁଭଦ୍ରାଙ୍କ ରଥଟଣା ମଧ୍ୟ ବିଳମ୍ବ ହୋଇଥିଲା।
ରଥଟଣା ବିଳମ୍ବ ନେଇ ପ୍ରତିକ୍ରିୟା ରଖି ସୂଚନା କହିଛନ୍ତି ଆଇନ ମନ୍ତ୍ରୀ ପୃଥ୍ଵୀରାଜ ହରିଚନ୍ଦନ। ରଥଯାତ୍ରାରେ କୌଣସି ଅସୁବିଧା ହୋଇନି ବୋଲି ସେ କହିଛନ୍ତି। ବିଧି ଅନୁସାରେ ନନ୍ଦିଘୋଷ ରଥ ଗଡ଼ିଛି। ଆସନ୍ତାକାଲି ସକାଳ ସାଢେ ୯ ଟାରୁ ପୁଣି ରଥଟଣା ହେବ। ଆସନ୍ତାକାଲି ସକାଳେ ସମସ୍ତେ ରଥ ଟାଣିପାରିବେ ବୋଲି କହିଛନ୍ତି ଆଇନମନ୍ତ୍ରୀ ପୃଥ୍ଵୀରାଜ ହରିଚନ୍ଦନ।
ଆଜି ସଂଧ୍ୟା ୭ଟା ୪୧ରେ ରଥଟଣା ବନ୍ଦ ହୋଇଥିଲା। ବଳଗଣ୍ଡି ଛକରେ ଅଟକିଛନ୍ତି ବଳଭଦ୍ରଙ୍କ ରଥ। ମରିଚିକୋଟ ଛକରେ ଅଟକିଛି ମା ସୁଭଦ୍ରାଙ୍କ ରଥ। ସିଂହଦ୍ଵାର ସାମ୍ନାରେ କିଛି ବାଟ ଯାଇ ଅଟକିଛି ନନ୍ଦିଘୋଷ ରଥ। ସମସ୍ତ ଦେବନୀତି ଠିକ ସମୟରେ ହୋଇଥବା କହିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ। ରଥଟଣା କାର୍ଯ୍ୟ ଟିକିଏ ବିଳମ୍ବ ହୋଇଥିଲା।
କୋକିଳାବେନ୍ ହସ୍ପିଟାଲରେ ବିଶ୍ବ ପ୍ରସିଦ୍ଧ ରଥଯାତ୍ରାର ସିଧା ପ୍ରସାରଣ ଦେଖିଲେ ନବୀନ ପଟ୍ଟନାୟକ
ନନ୍ଦିଘୋଷ ବ୍ୟୁରୋ : ବଡ଼ଦାଣ୍ଡରେ ମହାପ୍ରଭୁଙ୍କ ଲୀଳାଖେଳ। ସାରା ଦୁନିଆରୁ ଛୁଟିଆସିଛନ୍ତି ଭକ୍ତ। ବଡ଼ଦାଣ୍ଡ ପାଲଟିଛି ଜନସମୁଦ୍ର। ସେପଟେ ଚିକିତ୍ସିତ ଅବସ୍ଥାରେ ମହାପ୍ରଭୁଙ୍କ ସାନ୍ନିଧ୍ୟ ଲାଭ କରିଛନ୍ତି ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ। ମୁମ୍ବାଇ କୋକିଳାବେନ-ଧୀରୁଭାଇ ଅମ୍ବାନୀ ହସ୍ପିଟାଲରେ ସଫଳ ଅସ୍ତ୍ରୋପଚାର ପରେ ଆରୋଗ୍ୟ ଲାଭ କରୁଥିବା ନବୀନ ଆଜି ନନ୍ଦିଘୋଷ ଟିଭି ଜରିଆରେ ଦେଖିଛନ୍ତି ରଥାଯାତ୍ରା ସିଧାପ୍ରସାରଣ। ଡାକ୍ତରଖାନା ଶଯ୍ୟାରେ ରହି ମହାପ୍ରଭୁଙ୍କ ଆଶୀର୍ବାଦ ଭିକ୍ଷା ସହ ରାଜ୍ଯବାସୀଙ୍କ କଲ୍ୟାଣ କାମନା କରିଛନ୍ତି ନବୀନ।
ସର୍ଭିକାଲ ଆର୍ଥ୍ରାଇଟିସରେ ପୀଡ଼ିତ ନବୀନଙ୍କ ସଫଳ ଅସ୍ତ୍ରୋପଚାର ପରେ ଏବେ ତାଙ୍କର ଫିଜିଓଥେରାପି ଚାଲିଛି । ରଥଯାତ୍ରା ଅବସରରେ ବିଜେଡି ନେତା, ସାଂସଦ ଓ ବିଧାୟକ, ପୂର୍ବତନ ସାଂସଦ ଓ ବିଧାୟକମାନେ ମଧ୍ଯ ଶ୍ରୀଜଗନ୍ନାଥଙ୍କ ନିକଟରେ ନିଜ ପ୍ରିୟ ନେତାଙ୍କ ଆଶୁ ଆରୋଗ୍ୟ କାମନା କରିଛନ୍ତି । ଶୀଘ୍ର ସଂପୂର୍ଣ୍ଣ ସୁସ୍ଥ ହୋଇ ସେ ଓଡ଼ିଶା ଫେରିଆସିବେ ବୋଲି କାଳିଆଠାକୁର ପାଖରେ ପ୍ରାର୍ଥନା କରିଛନ୍ତି ଦଳୀୟ ନେତା ।
ମହାଗଠବନ୍ଧନ ଜିତିଲେ କିଏ ହେବ ମୁଖ୍ୟମନ୍ତ୍ରୀ ? କନହୈୟା କୁମାର କହିଲେ ଆଗାମୀ ସିଏମ୍ ନାଁ
ନନ୍ଦିଘୋଷ ବ୍ୟୁରୋ : ଚଳିତ ବର୍ଷ ବିହାରରେ ବିଧାନସଭା ନିର୍ବାଚନ ହେବାକୁ ଯାଉଛି । ଏନେଇ ବିହାରରେ ବଢିଲାଣି ରାଜନୈତିକ ତାତି । ନିର୍ବାଚନକୁ ନେଇ ସବୁ ଦଳ ମଧ୍ୟରେ କସରତ ଜୋରସୋର ଚାଲିଛି । ଏହାରି ଭିତରେ କଂଗ୍ରେସ ନେତା କନହୈୟା କୁମାର ଏକ ବଡ଼ ବୟାନ ଦେଇଛନ୍ତି । ସେ କହିଛନ୍ତି, ଯଦି ମହାଗଠବନ୍ଧନ ବିଧାନସଭା ନିର୍ବାଚନରେ ବହୁମତ ପାଏ, ତେବେ ମୁଖ୍ୟମନ୍ତ୍ରୀ ଆରଜେଡିରୁ ହେବେ। ତେଜସ୍ୱୀ ଯାଦବ ମୁଖ୍ୟମନ୍ତ୍ରୀ ହୋଇପାରନ୍ତି, ଏଥିରେ କୌଣସି ଦ୍ୱନ୍ଦ୍ୱ କିମ୍ବା ବିବାଦ ନାହିଁ। ତଥାପି, ନିର୍ବାଚନ ପ୍ରସଙ୍ଗ ଶୀର୍ଷରେ ରହିବ। ଆହୁରୀ ମଧ୍ୟ କହିଛନ୍ତି ଶାସକ ଦଳ ଗଠବନ୍ଧନର ସିଏମ୍ ଚେହେରାକୁ ପ୍ରସଙ୍ଗ କରି ଲୋକଙ୍କ ଧ୍ୟାନ ହଟାଇବା ପାଇଁ ଷଡ଼ଯନ୍ତ୍ର କରୁଛି।
କଂଗ୍ରେସ ନେତା କନହୈୟା କୁମାର ମଧ୍ୟ ବିଜେପି ବିଷୟରେ ଏକ ବଡ଼ ଦାବି କରିଛନ୍ତି । ସେ କହିଥିଲେ ଯେ, ବିଜେପିକୁ ସୁଯୋଗ ମିଳିବା ମାତ୍ରେ ସେ ମୁଖ୍ୟମନ୍ତ୍ରୀ ନୀତିଶ କୁମାରଙ୍କୁ ପ୍ରଥମେ ହଟାଇବେ। ତାଙ୍କ ସ୍ଥାନରେ ବିଜେପି ନିଜ ନେତାଙ୍କୁ ବସାଇବ। ବିଜେପି ତାର ପୁରୁଣା ରଣନୀତି ଉପରେ କାମ କରୁଛି, ଯେଉଁଥିରେ ସେ ପ୍ରଥମେ ଆଞ୍ଚଳିକ ଦଳର ସମର୍ଥନ ନେବ ଏବଂ ପରେ ତାଙ୍କୁ ହଟେଇବ ।
କନହୈୟା ଏକ ସାକ୍ଷାତକାରରେ କହିଛନ୍ତି ଯେ, ମୁଖ୍ୟମନ୍ତ୍ରୀ ସେହି ଦଳର ହେବେ ଯାହାର ଅଧିକ ବିଧାୟକ ଥିବେ। ମହାଗଠବନ୍ଧନରେ ଆରଜେଡି ସବୁଠାରୁ ବଡ଼ ଦଳ ଏବଂ ଏହାର ଅଧିକ ବିଧାୟକ, ତେଣୁ ମୁଖ୍ୟମନ୍ତ୍ରୀ ମଧ୍ୟ ସେମାନଙ୍କ ଦଳରୁ ହେବେ। ଏଥିରେ କୌଣସି ସନ୍ଦେହ ନାହିଁ।
ଇରାନ ପରେ ଏବେ ଏହି ସ୍ଥାନରେ ବୋମା ବର୍ଷା କରୁଛି ଇସ୍ରାଏଲ
ନନ୍ଦିଘୋଷ ବ୍ୟୁରୋ : ଇରାନ ଏବଂ ଇସ୍ରାଏଲ ମଧ୍ୟରେ ଚାଲିଥିବା ୧୨ ଦିନିଆ ଭୟଙ୍କର ଯୁଦ୍ଧରେ ଅସ୍ତ୍ରବିରତି। କୁହାଯାଉଥିଲା ଯେ, ଏବେ ମଧ୍ୟପ୍ରାଚ୍ୟର ପରିସ୍ଥିତି କିଛିଟା ସ୍ୱାଭାବିକ ହେବ । କିନ୍ତୁ ଇସ୍ରାଏଲ ହଠାତ୍ ଲେବାନନରେ ବଡ ଧରଣର ଆକ୍ରମଣ କରିଛି । ଶୁକ୍ରବାର ଦିନ ଇସ୍ରାଏଲ ଦକ୍ଷିଣ ଲେବାନନରେ ବୋମା ବର୍ଷା କରିଥିଲା । ସମଗ୍ର ଅଞ୍ଚଳ ଧୂଆଁ ଧୂଆଁ ହୋଇଯାଇଥିଲା ।
ରିପୋର୍ଟ ଅନୁୟାୟୀ, ଇସ୍ରାଏଲୀ ଯୁଦ୍ଧ ବିମାନରେ ବୋମା ପକାଇଥିଲା । ଏହା ବ୍ୟତୀତ ଦକ୍ଷିଣ ଲେବାନନର ଅନେକ ସ୍ଥାନରେ ନିରୀକ୍ଷଣ ଡ୍ରୋନ ମଧ୍ୟ ଉଡ଼ୁଥିବାର ଦେଖାଯାଇଥିଲା।
ଇସ୍ରାଏଲୀ ସେନା କହିଛି ଯେ ହିଜବୁଲାର କାର୍ଯ୍ୟକଳାପକୁ ବନ୍ଦ କରିବା ପାଇଁ ସେମାନେ ଏହି ଆକ୍ରମଣ କରିଥିଲେ। ଦକ୍ଷିଣ ଲେବାନନର ନାବାଟିଆହ ଅଲ-ଫୌକା ଏବଂ ଇକଲିମ ଅଲ-ତୁଫା ପାହାଡ଼ରେ ଅନେକ ସ୍ଥାନକୁ ଟାର୍ଗେଟ କରାଯାଇଥିଲା। ଏହି ଆକ୍ରମଣରେ ହିଜବୁଲାର ଭିତ୍ତିଭୂମି ଏବଂ କାର୍ଯ୍ୟକର୍ତ୍ତାଙ୍କୁ ଟାର୍ଗେଟ କରାଯାଇଥିବା ଦାବି କରାଯାଇଛି।
ଫେସବୁକରେ ଏହି ୩ଟି ଶବ୍ଦ ଲେଖି ଫସିଲେ ବ୍ୟାଙ୍କ କର୍ମଚାରୀ, ହରାଇଲେ ୭ ଲକ୍ଷ ଟଙ୍କା
ନନ୍ଦିଘୋଷ ବ୍ୟୁରୋ : ୭ ଲକ୍ଷ ଟଙ୍କା ହରାଇଲେ ବ୍ୟାଙ୍କ କର୍ମଚାରୀ । ଫେସବୁକରେ ଏହି ୩ଟି ଶବ୍ଦ ଲେଖିବା ପଡିଲା ଭାରି । ସାଇବର ଠକେଇର ଶିକାର ହେଲେ ବ୍ୟାଙ୍କ କର୍ମଚାରୀ । ଏହି ମାମଲାରେ କର୍ଣ୍ଣାଟକର କୋଡାଗୁ ପୋଲିସ ୫ ଜଣଙ୍କୁ ଗିରଫ କରିଛି । ୫ ଜଣ ନକଲି ପୋଲିସ ପରିଚୟ ଦେଇ ବ୍ୟାଙ୍କ କର୍ମଚାରୀଙ୍କୁ ଠକିଥିଲେ।
ସୂଚନା ଅନୁଯାୟୀ, ପାର୍ଶିବ ମୂର୍ତ୍ତି ମାଡାପାଟନ ଗ୍ରାମର ବାସିନ୍ଦା । ସେ ଜଣେ ବ୍ୟାଙ୍କ କର୍ମଚାରୀ । ପାର୍ଶିବ କହିଛନ୍ତି ଯେ, ୧୧ ଅକ୍ଟୋବର ୨୦୨୪ରେ ଫେସବୁକରେ ସେ ଜଣେ ଝିଅକୁ ପ୍ରେମ ନିବେଦନ କରି ଆଇ ଲଭ୍ ୟୁ ମେସେଜ ପଠାଇଥିଲେ । ଏହାପରେ ୨ ନଭେମ୍ବରରେ ତାଙ୍କୁ ଏକ କଲ୍ ଆସିଥିଲା । ସାଇବର ଠକ କଲ କରି ନିଜକୁ ପେରିଆପାଟନ ସାଇବର ପୋଲିସ ବୋଲି ପରିଚୟ ଦେଇଥିଲେ । ଏବଂ ଝିଅଟିକୁ ହଇରାଣ କରୁଥିବା କଥା କହିଥିଲେ । ଏହାସହ ୭ ଲକ୍ଷ ଟଙ୍କା ମାଗିଥିଲେ। ଯଦି ସେ ଟଙ୍କା ନ ଦିଅନ୍ତି, ତେବେ ସେ ତାଙ୍କ ଘରକୁ ଆସି ତାଙ୍କୁ ଗିରଫ କରିବେ ବୋଲି ଧମକ ଦେଇଥିଲେ ଅଭିଯୁକ୍ତ। ଜେଲ୍ ଯିବା ଡରରେ ପାର୍ଶିବ ସାଇବର ଠକଙ୍କୁ ୭ ଲକ୍ଷ ଟଙ୍କା ଦେଇଥିଲେ ।
ଏହାପରେ ସାଇବର ଠକମାନେ ତାଙ୍କୁ ହଇରାଣ କରିବା ଛାଡିନଥିଲେ । ବାର ବାର ଫୋନ କରି ଟଙ୍କା ମାଗୁଥିଲେ । ପ୍ରଥମେ ସେ ଅଭିଯୋଗ କରିବାକୁ ସଂକୋଚ କରୁଥିଲେ । ଲଗାତାର ଧମକପୂର୍ଣ୍ଣ କଲ୍ ଏବଂ ମାନସିକ ଚାପ ଯୋଗୁଁ ସେ ଟଙ୍କା ଦେଇ ଚାଲିଥିଲେ । ସେ ଠକମାନଙ୍କୁ ପ୍ରାୟ ୭ ଲକ୍ଷ ଟଙ୍କା ଦେଇଥିଲେ।
ପାର୍ଶିବ ଜାନୁଆରୀ ୧୧, ୨୦୨୫ରେ ପୋଲିସ ଷ୍ଟେସନରେ ଅଭିଯୋଗ କରିଥିଲେ। ଡିଏସ୍ପି ପି. ଚନ୍ଦ୍ରଶେଖରଙ୍କ ନେତୃତ୍ୱରେ ଏକ ଟିମ୍ ଗଠନ କରାଯାଇ ତଦନ୍ତ ଚାଲିଥିଲା । ଏବଂ ସମସ୍ତ ଅଭିଯୁକ୍ତଙ୍କୁ ଗିରଫ କରାଯାଇଛି। ଅଭିଯୁକ୍ତଙ୍କ ନିକଟରୁ ଚାରୋଟି ମୋବାଇଲ୍ ଫୋନ୍ ମଧ୍ୟ ଜବତ ହୋଇଛି ।
ଅହମ୍ମଦାବାଦରେ ଅଘଟଣ : ରଥଯାତ୍ରାରେ ଡିଜେ ବାଜିବାରୁ ବେକାବୁ ହେଲା ଗଜରାଜ
ନନ୍ଦିଘୋଷ ବ୍ୟୁରୋ : ଅହମଦାବାଦରେ ଚାଲିଛି ମହାପ୍ରଭୁଙ୍କ ରଥଯାତ୍ରା । ଏହି ଯାତ୍ରା ସମୟରେ ବେକାବୁ ହେଲା ହାତୀ, ରାଗିକି ରାସ୍ତାରେ ଦୌଡିଲା। ଡିଜେର ପ୍ରଚଣ୍ଡ ଶବ୍ଦରେ ଅନିୟନ୍ତ୍ରିତ ହାତୀଟି ଏପଟ ସେପଟ ଦୌଡ଼ିବାକୁ ଲାଗିଥିଲା ଏବଂ ଆଖପାଖ ଲୋକଙ୍କ ମଧ୍ୟରେ ଦଳାଚକଟା ସୃଷ୍ଟି ହୋଇଥିଲା। ବହୁ ଚେଷ୍ଟା ପରେ ଶେଷରେ ମାହୁନ୍ତମାନେ ହାତୀଟିକୁ ନିୟନ୍ତ୍ରଣକୁ ଆଣିଥିଲେ।
ସୂଚନାଅନୁଯାୟୀ, ଅହମଦାବାଦ ଜଗନ୍ନାଥଙ୍କ ଏହି ରଥଯାତ୍ରାରେ ହଜାର ହଜାର ଭକ୍ତ ଏକାଠି ହୁଅନ୍ତି। ଏହି ସମୟରେ, ତିନୋଟି ହାତୀ ନିୟନ୍ତ୍ରଣ ବାହାରକୁ ଯିବାରୁ, ଭିଡ଼ରେ ଉପସ୍ଥିତ ଲୋକମାନେ ମଧ୍ୟ ଦୌଡ଼ିବାକୁ ଲାଗିଥିଲେ। ହାତୀକୁ ଦେଖି ସେଠାରେ ଥିବା ଲୋକ ଭୟଭୀତ ହୋଇଯାଇଥିଲେ। ଯେଉଁଠାରୁ ହାତୀ ନିୟନ୍ତ୍ରଣ ବାହାରକୁ ଯିବାର ଭିଡିଓ ଭାଇରାଲ ହୋଇଥିଲା। କୁହାଯାଉଛି ଯେ ଯାତ୍ରା ସମୟରେ ୫-୬ଟି ହାତୀ ନିୟନ୍ତ୍ରଣ ବାହାରକୁ ଚାଲିଯାଇଥିଲେ। ଏଥିମଧ୍ୟରୁ ତିନୋଟି ହାତୀ ଖାଡିଆର ରାସ୍ତାରେ ଦୌଡ଼ିବାକୁ ଲାଗିଥିଲେ।
ଅନ୍ୟପଟେ ଏହି ଦଳାଚକଟାରେ ତିନିରୁ ଚାରି ଜଣ ଆହତ ହୋଇଥିବା ସୂଚନା ମିଳିଛି। ସୌଭାଗ୍ୟବଶତଃ କାହାକୁ ଗୁରୁତର ଆଘାତ ଲାଗିନାହିଁ। ଏହି ଲୋକମାନେ ହାତୀ ପାଖରେ ଠିଆ ହୋଇଥିଲେ ଏବଂ ଦଳାଚକଟାରେ ପଡ଼ିଯାଇଥିଲେ। ଘଟଣାସ୍ଥଳକୁ ୧୦୮ ଆମ୍ବୁଲାନ୍ସ ଡକାଯାଇଥିଲା ଏବଂ ଆହତମାନଙ୍କୁ ଡାକ୍ତରଖାନା ପଠାଯାଇଥିଲା। ୧୫ ମିନିଟ ବିରତି ପରେ, ହାତୀଗୁଡ଼ିକୁ ରାସ୍ତାରୁ ବାହାର କରି ମୁଖ୍ୟ ରାସ୍ତାକୁ ଅଣାଯାଇଥିଲା ଏବଂ ସେମାନଙ୍କୁ ନିୟନ୍ତ୍ରଣ କରିବା ପରେ ପୁଣି ରଥଯାତ୍ରା ଆରମ୍ଭ କରାଯାଇଥିଲା।
ପୁଣି କୋଲକାତାରେ ଲଜ୍ଜା : ଲ’ କଲେଜ ଛାତ୍ରୀଙ୍କୁ ଗଣଦୁଷ୍କର୍ମ ଅଭିଯୋଗ
ନନ୍ଦିଘୋଷ ବ୍ୟୁରୋ : ପୁଣି କୋଲକାତାରେ ଲଜ୍ଜା । ପ୍ରତିଷ୍ଠିତ କୋଲକାତା ଲ’ କଲେଜରେ ଜଣେ ଛାତ୍ରୀଙ୍କୁ ଗଣଦୁଷ୍କର୍ମ ଅଭିଯୋଗ । ଏହି ଘଟଣା ସାରା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି । ଜୁନ ୨୫ ତାରିଖରେ କଲେଜ ପରିସରେ ଜଣେ ଛାତ୍ରୀକୁ ଗଣ ଦୁଷ୍କର୍ମ କରାଯାଇଛି । ପୀଡିତାଙ୍କ ଅଭିଯୋଗ କ୍ରମେ, କସବା ଥାନା ପୋଲିସ ୩ ଜଣ ଅଭିଯୁକ୍ତଙ୍କୁ ଗିରଫ କରିଛି । ଅଭିଯୁକ୍ତଙ୍କ ମଧ୍ୟରେ ଜଣେ ପୂର୍ବତନ ଛାତ୍ର ଏବଂ ୨ଜଣ ବର୍ତ୍ତମାନର ଛାତ୍ର ସାମିଲ ଅଛନ୍ତି ।
ସୂଚନା ଅନୁଯାୟୀ, ୨୫ ଜୁନ ରାତିରେ ଏହି ଘଟଣା ଘଟିଥିବା କୁହାଯାଉଛି । ପୀଡିତା ପୋଲିସକୁ ଦେଇଥବା ବୟାନରେ କହିଛନ୍ତି ଯେ, କଲେଜ କ୍ୟାମ୍ପସ ଭିତରେ ସନ୍ଧ୍ୟା ୭ଟା ୩୦ରୁ ୧୦ଟା ୫୦ ମଧ୍ୟରେ ତାଙ୍କୁ ଗଣ ଦୁଷ୍କର୍ମ କରାଯାଇଥିଲା । ଅଭିଯୋଗ କ୍ରମେ ପୋଲିସ ୩ ଅଭିଯୁକ୍ତଙ୍କୁ ଗିରଫ କରିବା ସହ ତଦନ୍ତ ଜାରି କରିଛି ।
ବଡ଼ ଦେଉଳରୁ ବଡ଼ଦାଣ୍ଡକୁ ଓହ୍ଲାଇ ଆସିଛନ୍ତି ବଡ଼ଠାକୁର; ରଥରେ ଝଟକୁଛନ୍ତି ଦାରୁଦିଅଁ
ନନ୍ଦିଘୋଷ ବ୍ୟୁରୋ : ଉଠୁଛି ପଡୁଛି ବଡ଼ଦାଣ୍ଡ । ଜନସମୁଦ୍ର ଭିତରେ ତିନି ରଥ । ଭକ୍ତ ଆଖି ଛଳଛଳ । ଆଜି ହସୁଛି ଶୀକ୍ଷେତ୍ର, ହସୁଛି ବଡ଼ଦାଣ୍ଡ, ହସୁଛି ଜଗତ । ଆଜି କାଳିଆ ଆସିଛି ଭକ୍ତ ପାଖକୁ । ସେ ବଡ଼ଦାଣ୍ଡ ଆଜି ଧନ୍ୟ, ସେ ରଥ ଆଜି ଧନ୍ୟ, ସେ ପଥ ଆଜି ଧନ୍ୟ, ସେ ଭକ୍ତ ଆଜି ଧନ୍ୟ । ବଡ଼ ଦେଉଳ ଛାଡି ଆଜି ବଡ଼ ଠାକୁର ଆସିଛି ତା ଭକ୍ତ ପାଖକୁ । ଲକ୍ଷ ଲକ୍ଷ ଭକ୍ତ ଭିଡ଼ରେ ଆଜି ହସୁଛି କାଳିଆ ସାଆନ୍ତ ।
ଆଜି ମହାପ୍ରଭୁଙ୍କ ବିଶ୍ବପ୍ରସିଦ୍ଧ ଘୋଷଯାତ୍ରା। ଦାରୁଦିଅଁ ଶ୍ରୀମନ୍ଦିରରୁ ବଡ଼ଦାଣ୍ଡକୁ ଓହ୍ଲାଇଆସି ଭକ୍ତଙ୍କୁ ଦର୍ଶନ ଦେଉଛନ୍ତି। ଜଗା ପାଇଁ ଜନସମୁଦ୍ର ହୋଇଛି ବଡ଼ଦାଣ୍ଡ। କାଳିଆ ପ୍ରେମରେ ଭିଜୁଛନ୍ତି ଭକ୍ତ । କାଳିଆର ଗୁଣ୍ଡିଚା ଯାତ ଦେଖିବାକୁ କାହିଁ କେତେ ଦୂରରୁ ଧାଇଁ ଆସିଛନ୍ତି ଭକ୍ତ । ମହାପ୍ରଭୁ ଶ୍ରୀଜଗନ୍ନାଥ ଧାଡ଼ି ପହଣ୍ଡିରେ ଆସି ନନ୍ଦିଘୋଷ ରଥରେ ବିରାଜମାନ କରିଛନ୍ତି। ପ୍ରଥମେ ଚକ୍ରରାଜ ସୁଦର୍ଶନ, ପରେ ବଳଭଦ୍ର ରଥାରୂଢ଼ ହୋଇଥିଲେ। ଦେବୀ ସୁଭଦ୍ରାଙ୍କ ରଥାରୂଢ଼ ପରେ ଶେଷରେ ରଥାରୂଢ଼ ହୋଇଛନ୍ତି ମହାପ୍ରଭୁ ଶ୍ରୀଜଗନ୍ନାଥ। ଶଙ୍ଖ, ଘଣ୍ଟ, ହରିବୋଲରେ ପ୍ରକମ୍ପିତ ହେଉଛି ବଡ଼ଦାଣ୍ଡ।
ସକାଳ ୬ଟାରେ ମଙ୍ଗଳ ଆଳତି ପରେ ଅନ୍ୟାନ୍ୟ ନୀତି ବଢ଼ି ୯ଟାରେ ରଥ ପ୍ରତିଷ୍ଠା, ୯ଟା ୩୦ରେ ପହଣ୍ଡି ଆରମ୍ଭ ହୋଇଥିଲା। ଅପରାହ୍ନ ୨ଟା ୩୦ରୁ ୩ଟା ୩୦ ମଧ୍ୟରେ ଛେରାପହଁରା ସରିବ। ଅପରାହ୍ନ ୪ଟାରେ ରଥଟଣା ଆରମ୍ଭ ହେବ ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ ନୀତି ନିର୍ଘଣ୍ଟ ହୋଇଛି।
ରାଷ୍ଟ୍ରୀୟ ରାଜଧାନୀରେ ଆଉ ଚାଲିପାରିବନି ପୁରୁଣା ଗାଡ଼ି, ଜୁଲାଇ ୧ରୁ ମିଳିବନି ତେଲ
ନନ୍ଦିଘୋଷ ବ୍ୟୁରୋ : ଆଉ ରାସ୍ତାରେ ଗଡ଼ିବନି ପୁରୁଣା ଗାଡ଼ି । ରାଷ୍ଟ୍ରୀୟ ରାଜଧାନୀ ଦିଲ୍ଲୀରେ ୧୦ ବର୍ଷ ପୁରୁଣା ଡିଜେଲ ଏବଂ ୧୫ ବର୍ଷ ପୁରୁଣା ପେଟ୍ରୋଲ ଯାନ ପାଇଁ ଲାଗିବ ପ୍ରତିବନ୍ଧକ। ଦିଲ୍ଲୀ ସରକାର ଏହି ଯାନଗୁଡ଼ିକ ଉପରେ କଟକଣା ଲଗାଇବା ପାଇଁ ଏକ ନୂଆ ଉପାୟ ବାହାର କରିଛି । ଏଥର ପୁରୁଣା ଗାଡିକୁ ପେଟ୍ରୋଲ ଏବଂ ଡିଜେଲ ଦେବା ପାଇଁ ମନା କରିଛି ଦିଲ୍ଲୀ ସରକାର । ଏବେ କୌଣସି ରାଜ୍ୟର ପୁରୁଣା ଯାନ ଦିଲ୍ଲୀରେ ପେଟ୍ରୋଲ-ଡିଜେଲ ପାଇବ ନାହିଁ। ଜୁଲାଇ ୧ରୁ ଏହି ନିୟମ ଲାଗୁ ହେବ । ଦିଲ୍ଲୀ ପରିବହନ ବିଭାଗ ପେଟ୍ରୋଲ ପମ୍ପରେ ଏଣ୍ଡ-ଅଫ୍-ଲାଇଫ୍ ଯାନ (ELV) ରେ ଇନ୍ଧନ ଭର୍ତ୍ତି କରିବା ଉପରେ ସମ୍ପୂର୍ଣ୍ଣ ନିଷେଧ କରିବ।
ଜାତୀୟ ରାଜଧାନୀରେ ଯାନବାହନ ଦ୍ୱାରା ହେଉଥିବା ପ୍ରଦୂଷଣକୁ ହ୍ରାସ କରିବା ପାଇଁ ଆୟୋଗ ଫର୍ ଏୟାର କ୍ୱାଲିଟି ମ୍ୟାନେଜମେଣ୍ଟ (CAQM) ଦ୍ୱାରା ଏପରି ପଦକ୍ଷେପ ନିଆଯାଇଛି । ଏହି ଯୋଜନା ଅଧୀନରେ, ସର୍ଭିଲାନ୍ସ ସିଷ୍ଟମ ମାଧ୍ୟମରେ ପୁରୁଣା ଯାନଗୁଡ଼ିକୁ ଚିହ୍ନଟ କରାଯିବ। ଏହା ସହିତ, ଦିଲ୍ଲୀରେ ଏହି ଅଭିଯାନ ଆରମ୍ଭ କରିବା ପରେ, ଏହାକୁ ଧୀରେ ଧୀରେ NCRର ଅନ୍ୟ ଅଂଶକୁ ମଧ୍ୟ ବିସ୍ତାର କରାଯିବ। ତଥାପି, ଦିଲ୍ଲୀ ସରକାରଙ୍କ ଏହି ପଦକ୍ଷେପ ମଧ୍ୟ ବିରୋଧର ସମ୍ମୁଖୀନ ହୋଇଛି ।