ଭୁବନେଶ୍ୱର: ଭୁବନେଶ୍ୱରରେ ଖୁବଶୀଘ୍ର ଲାଗୁହେବ ଡିଜିଟାଲ ଡୋର ନମ୍ବରିଂ ସିଷ୍ଟମ । ସ୍ମାର୍ଟ ସିଟିରେ କେତେ ଘର ରହିଛି ତାହା ସହଜରେ ଜାଣିହେବ । କେଉଁ ବ୍ୟକ୍ତି କେଉଁଠାରେ ରହୁଛି ତାହା ମଧ୍ୟ ଅତି ସହଜରେ ଜଣା ପଡ଼ିବ । ଏହି ବ୍ୟବସ୍ଥାକୁ ଜିଆଇଏସ୍‌ ସହ ସଂଯୋଗ କରାଯାଉଥିବାରୁ ଯେକୌଣସି ବ୍ୟକ୍ତିଙ୍କ ଘରର ଠିକଣା ଜାଣିବା ସୁବିଧା ହେବ ।

ସେପଟେ ହୋଲଡିଂ ଟ୍ୟାକ୍ସ ଓ ଟ୍ରେଡ଼ ଲାଇସେନ୍ସ ଆଦାୟରେ ବିଏମ୍‌ସିକୁ ବହୁତ ସହଜ ହେବ । ବର୍ତ୍ତମାନ ସ୍ମାର୍ଟ ସିଟିରେ ମୋଟ ୫୦ହଜାର ବ୍ୟବସାୟୀ ଥିବାବେଳେ ମାତ୍ର ୧୫ହଜାର ବ୍ୟବସାୟୀ ପଞ୍ଜିକୃତ ହୋଇ ହୋଲଡିଂ ଟ୍ୟାକ୍ସ ପଇଠ କରୁଛନ୍ତି ।

ଅବଶିଷ୍ଟ ୩୫ହଜାର ବ୍ୟବସାୟୀ ବା ବ୍ୟବସାୟୀକ ପ୍ରତିଷ୍ଠାନ ବିଏମସି ରେ ପଞ୍ଜିକୃତ ହୋଇନଥିବା ଜଣାପଡ଼ିଛି । ଡିଜିଟାଲ ଡୋର ନମ୍ବରିଂ ସିଷ୍ଟମ କାର୍ଯ୍ୟକାରୀ ହେଲେ ଅଣପଞ୍ଜୀକୃତ ବ୍ୟବସାୟୀଙ୍କୁ ଚିହ୍ନଟ ସହିତ ବିଏମ୍‌ସିର ରାଜସ୍ୱ ଆଦାୟ ବୃଦ୍ଧି ପାଇବ ବୋଲି ବିଏମସି ଲକ୍ଷ୍ୟ ରଖିଛି ।

ଟେଣ୍ଡର ମାଧ୍ୟମରେ ହାଇଦ୍ରାବାଦର ଏକ ଘରୋଇ ସଂସ୍ଥାକୁ ଏହି ଦାୟିତ୍ୱ ଦିଆଯାଇଛି । ୫ରୁ ୬ମାସ ମଧ୍ୟରେ କାର୍ଯ୍ୟ ଶେଷ କରିବାକୁ ଲକ୍ଷ୍ୟ ରଖିଛି ବିଏମ୍‌ସି । କିନ୍ତୁ କୋଭିଡ ଯୋଗୁଁ ଏଥିରେ ବିଳମ୍ବ ହେଉଛି ।

ଭୁବନେଶ୍ୱର: ବିଧାନସଭା ଆଗରେ ଦମ୍ପତିଙ୍କ ଆତ୍ମାହୁତି ଉଦ୍ୟମ । ଦେହରେ ପେଟ୍ରୋଲ ଢାଳି ଆତ୍ମାହୁତି ଉଦ୍ୟମ ବେଳେ କାବୁ କଲେ ସୁରକ୍ଷାକର୍ମୀ । ନାବାଳିକା ଝିଅ ହତ୍ୟା ମାମଲାରେ ପୋଲିସ କାର୍ଯ୍ୟାନୁଷ୍ଠାନ ନେବାରେ ବିଫଳ ହୋଇଥିବା ଅଭିଯୋଗ କରି ଆତ୍ମାହୁତି ଉଦ୍ୟମ କରିଛନ୍ତି ବାପା- ମା’ । ନୟାଗଡ଼ରୁ ଆସିଥିଲେ ଦମ୍ପତି  । ତାଙ୍କ ଝିଅକୁ ପୋଲିସ ନ୍ୟାୟ ଦେଇନଥିବାରୁ ଏଭଳି ନିଷ୍ପତ୍ତି ନେଇଛନ୍ତି ବୋଲି ସେମାନେ କହିଛନ୍ତି ।

ଦମ୍ପତ୍ତିଙ୍କ ଅଭିଯୋଗ ଯେ, ତାଙ୍କ ଝିଅ ସହ ଦୁଷ୍କର୍ମ ପରେ ହତ୍ୟା କରାଯାଇଥିଲା । କିନ୍ତୁ ପୋଲିସ ତଦନ୍ତରେ ଅବହେଳା କାରଣରୁ ତାକୁ ନ୍ୟାୟ ମିଳି ପାରିନାହିଁ । ଯଥାଶୀଘ୍ର ଦୋଷୀଙ୍କୁ ଗିରଫ କରିବାକୁ ସେମାନେ ଦାବି କରିଛନ୍ତି । ପୋଲିସର ଅପାରଗତାକୁ ସମସ୍ତଙ୍କର ସାମ୍ନାକୁ ଆଣିବା ପାଇଁ  ସେମାନେ ଏଭଳି କରିଛନ୍ତି ବୋଲି କହିଛନ୍ତି ଦମ୍ପତି ।

ଉଭୟ ସ୍ୱାମୀ ସ୍ତ୍ରୀ ଶାଲ ଘୋଡାଇ ହୋଇ ବିଧାନସଭା ଆଗରେ ପହଂଚିଥିଲେ । ସେମାନେ ହଠାତ ନିଜ ଦେହରେ ଜ୍ୱଳନଶୀଳ ସାମଗ୍ରୀ ଢାଳି ଆତ୍ମହୁତି ଉଦ୍ୟମ କରିଥିଲେ । ତେବେ ପାଖରେ ଥିବା ପୋଲିସ ଓ ଅନ୍ୟ ସୁରକ୍ଷାକର୍ମୀ ତୁରନ୍ତ ସେମାନଙ୍କୁ କାବୁ କରିବାରେ ସଫଳ ହୋଇଥିଲେ । ଫଳରେ ଗୋଟିଏ ବଡ ଧରଣର ଦୁର୍ଘଟଣା ଘଟିନଥିଲା । ଦମ୍ପତ୍ତିଙ୍କୁ ପୋଲିସ ଏକ ଅଟୋରେ ଘଟଣାସ୍ଥଳରୁ ନେଇ ଯାଇଥିଲା । ତେବେ ଏହି ସମୟରେ ସେମାନେ ମିଡିଆକୁ ଆତ୍ମହତ୍ୟା ଉଦ୍ୟମ ପଛର କାରଣ ବାବଦରେ କହିଥିଲେ ।

ସବୁଠାରୁ ବଡ଼ କଥା ହେଉଛି ଏତେ ସୁରକ୍ଷା ବଳୟ ମଧ୍ୟରେ ବାରମ୍ବାର ଏଭଳି ଘଟଣା ଘଟୁଛି । ମୌସୁମୀ ଅଧିବେଶନରେ ଏମିତି ଏକ ଘଟଣା ସାମ୍ନାକୁ ଆସିଥିଲା ଏବଂ ଶୀତକାଳୀନ ଅଧିବେଶନରେ ମଧ୍ୟ ପୁଣି ଏଭଳି ଘଟଣା ଘଟିଛି । ତେବେ ପୋଲିସକୁ ଏଥିପ୍ରତି ଆହୁରି ଅଧିକ ସଚେତନ ହେବା ଆବଶ୍ୟତା ରହିଛି ।

ମାଲକାନାଗିରି: ମାଡ଼ ମାରି ୬ଲକ୍ଷ ଟଙ୍କା ଲୁଟ । ମାଲକାନଗିରି ସାପ୍ତାହିକ ହାଟ ନିକଟରେ ଏହି ଘଟଣା ଘଟିଛି । ଏକ ହାର୍ଡୱେର ଦୋକାନର ଜଣେ କର୍ମଚାରୀ ଟଙ୍କା ଜମା କରିବା ପାଇଁ ବ୍ୟାଙ୍କକୁ ଯାଉଥିବା ବେଳେ ଦୁଇଜଣ ଦୁର୍ବୃତ୍ତ ଆସି ତାଙ୍କୁ ନିସ୍ତୁକ ମାଡ଼ ମାରି ଟଙ୍କା ଛଡ଼ାଇ ନେଇଥିଲେ।  ଟଙ୍କା ଲୁଟ ପରେ ଦୁର୍ବୃତ୍ତ ଫେରାର ହେବାର ଦୃଶ୍ୟ ସିସିଟିଭିରେ କଏଦ ହୋଇଛି ।

ମାଲକାନଗିରି ପୋଲିସ ଘଟଣାର ତଦନ୍ତ ଆରମ୍ଭ କରିଛି । ଯଦି ଦେଖିବା ତେବେ ମାଲକାନାଗିରିରେ ଏଭଳି ଘଟଣା ପ୍ରଥମ । କାରଣ ପୂର୍ବରୁ ମାଲକାନାଗିରିରେ ଏଭଳି ଘଟଣା ଘଟିନଥିଲା । ଏହି ଘଟଣାକୁ ନେଇ ପୋଲିସ ଏବେ ତଦନ୍ତ କରୁଛି । କିନ୍ତୁ ପୋଲିସର ତଦନ୍ତ ନେଇ ଏପର୍ଯ୍ୟନ୍ତ କୌଣସି ସୂଚନା ମିଳିପାରିନାହିଁ ।

ଭୁବନେଶ୍ୱର:କରୋନା କାରଣରୁ ରାଜ୍ୟରେ ମନ୍ଦିର ସବୁ ବନ୍ଦ ହୋଇ ରହିଛି । ଯେଉଁଥିପାଇଁ ମନ୍ଦିର ଉପରେ ନିର୍ଭରଶୀଳ ପୂଜକ ଓ ଅନ୍ୟମାନଙ୍କ ଆୟ ପ୍ରଭାବିତ ହେଉଛି ।  ତେଣୁ ମନ୍ଦିର ଖୋଲିବାକୁ ବିଧାନସଭାରେ ଦାବି କରିଛନ୍ତି କଂଗ୍ରେସ ବିଧାୟକ ତାରା ବାହିନୀପତି । ପୁରୀ ଶ୍ରୀମନ୍ଦିରକୁ ଭକ୍ତଙ୍କ ପାଇଁ ତୁରନ୍ତ ଖୋଲିବା ପାଇଁ ସେ ବାଚସ୍ପତିଙ୍କ ନିକଟରେ ଗୁହାରି କରିଛନ୍ତି ।

କଂଗ୍ରେସ ବିଧାୟକ ତାରା ବାହିନୀପତି ଆଜି  ମନ୍ଦିର ଖୋଲିବା ପାଇଁ ମଧ୍ୟ ଗୃହରେ ଦାବି କରିଥିଲେ । ୨୪ଘଣ୍ଟା ଭିତରେ ପୁରୀ ମନ୍ଦିର ସହ ଅନ୍ୟ ମନ୍ଦିର ଖୋଲା ଯାଉ ବୋଲି ସେ କହିଥିଲେ । ତାଙ୍କ କହିବା ହେଉଛି ମନ୍ଦିର ବନ୍ଦ କାରଣରୁ  ସେବାୟତ ଓ ପୂଜକ ହଇରାଣ ହଉଛନ୍ତି । ସେମାନଙ୍କ ଆୟ ପ୍ରଭାବିତ ହେଉଛି । ତେଣୁ ରାଜ୍ୟର ମନ୍ଦିର ଗୁଡିକୁ ତୁରନ୍ତ ଖୋଲାଯାଉ ।  ହାତ ଯୋଡ଼ି ଏ ପ୍ରସଙ୍ଗରେ ରୁଲିଂ ଦେବାକୁ କରିଛନ୍ତି ଦାବି । ତାରା ସ୍ୱରରେ ସ୍ୱର ମିଳାଇଥିଲେ ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝୀ । ସେ ମଧ୍ୟ କହିଛନ୍ତି ୨୪ ଘଣ୍ଟା ଭିତରେ ମନ୍ଦିର ଖୋଲାଯାଉ ବୋଲି କହିଛନ୍ତି ।

ଅନ୍ୟପକ୍ଷରେ ଅନଲାଇନ୍ ଶିକ୍ଷା ଉପରେ ମଧ୍ୟ ତାରା ପ୍ରଶ୍ନ ଉଠାଇଥିଲେ । ଏହା ସହ ସେ ମଧ୍ୟ ଶିକ୍ଷା  ସହାୟକ ନିଯୁକ୍ତି ପ୍ରସଙ୍ଗକୁ ମଧ୍ୟ ଉଠାଇଥିଲେ । ୬ ବର୍ଷ ପରେ ବି ଯେଉଁ ଶିକ୍ଷା ସହାୟକ ମାନଙ୍କୁ ସରକାର ନିୟମିତ କରିନାହାନ୍ତି ସେମାନଙ୍କୁ ନିୟମିତ କରିବାକୁ ଦାବି କରିଛନ୍ତି । ନହେଲେ ଶିକ୍ଷା ବ୍ୟବସ୍ଥା ସୁଦୃଢ଼ ହୋଇପାରିବ ନାହିଁ ବୋଲି ଯୁକ୍ତି ବାଢ଼ିଥିଲେ ତାରା ।

ଭୁବନେଶ୍ୱର: ରାଜ୍ୟରେ ଖସୁଛି ପାରା, ବଢୁଛି ଶୀତ । ସକାଳୁ ସକାଳୁ ଥଣ୍ଡା ବେଶି ଅନୁଭୂତ ହେଉଛି । ଦିନ ୧୦ ଟା ପର୍ଯ୍ୟନ୍ତ ଆକାଶ ମେଘାଚ୍ଛନ୍ନ ରହୁଛି । ଗତ ଦୁଇଦିନ ହେବ ରାଜ୍ୟରେ ବଢ଼ିଛି ଥଣ୍ଡା । ଗତ ରାତିରୁ ରାଜଧାନୀରେ ପ୍ରବଳ ଥଣ୍ଡା ପଡ଼ିଥିଲା । କିଛି କିଛି ସ୍ଥାନରେ କୁହୁଡିର ଆସ୍ତରଣ ଯାତାୟତରେ ସମସ୍ୟା ସୃଷ୍ଟି କରୁଛି । ଥଣ୍ଡା ସାଙ୍ଗକୁ କୋହଲା ପବନ ଶୀତଦିନର ଆଭାସ ଦେଉଛି । ସବୁଠୁ ଥଣ୍ଡା ସହର ଦାରିଙ୍ଗବାଡ଼ିରେ ମଧ୍ୟ ପ୍ରବଳ ଶୀତର ଅନୁଭବ ହେଲାଣି ।

ଲୋକେ ଅଧିକ ଥଣ୍ଡା କାରଣରୁ ଘରୁ ବହୁତ ଡ଼େରିରେ ବାହାରୁଛନ୍ତି । ବୟସ୍କ ଲୋକଙ୍କୁ ଘରୁ ଡ଼େରିରେ ବାହାରିବା ପାଇଁ ଜିଲ୍ଲା ପ୍ରଶାସନ ନିର୍ଦ୍ଦେଶ ଦେଇଛି । ୧୫ ଡ଼ିଗ୍ରୀ ତଳେ ୧୨ ସହର ରହିଛି । ଓଡ଼ିଶାର କାଶ୍ମୀର ଦାରିଙ୍ଗବାଡ଼ିରେ ସର୍ବନିମ୍ନ ରାତ୍ରି ତାପମାତ୍ରା  ୯.୦ ଡିଗ୍ରୀ ରେକର୍ଡ କରାଯାଇଛି । ଫୁଲବାଣୀ ୧୧.୦, ସୋନପୁର ୧୧.୪ , ଅନୁଗୁଳ ୧୧.୬, ବାରିପଦା ୧୨.୦,  କେନ୍ଦୁଝର ୧୨.୪, ତାଳଚେର ୧୨.୫ , ଭବାନୀପାଟଣା ୧୩.୬ , ଝାରସୁଗୁଡା ୧୩.୮, କୋରାପୁଟ ୧୪.୦,  କଟକ ୧୪.୫,   ଏବଂ  ଚାନ୍ଦବାଲି ୧୪.୮, ରାଜଧାନୀ ଭୁବନେଶ୍ୱର ରେ  ରାତ୍ରି ତାପମାତ୍ରା ୧୬.୦ ଡ଼ିଗ୍ରୀ ରେକର୍ଡ ହୋଇଛି ।

ଫୁଲବାଣୀ ଏବଂ ସୁନ୍ଦରଗଡ ରେ ଘନ କୁହୁଡି ରହିଛି । ଯାହାଫଳରେ ଦୃଶ୍ୟମାନ ଦୂରତା ୧୦୦ ମିଟର ରୁ କମ ରହୁଛି । କୋରାପୁଟ ଠାରେ ମଧ୍ୟମ ଧରଣର କୁହୁଡି  ଏବଂ ଦୃଶ୍ୟମାନ ଦୂରତା ୩୦୦ ମିଟର । ତାଳଚେର, ବଲାଙ୍ଗୀର ଏବଂ ଭବାନୀପାଟଣା ଠାରେ ହାଲୁକା କୁହୁଡି ଦୃଶ୍ୟମାନ ଦୂରତା ୮୦୦ ମିଟର ରହିଛି ।