ଭୁବନେଶ୍ୱର: ଆଜି ସ୍ୱାଭିମାନ ଅଞ୍ଚଳର ଲୋକଙ୍କ ସହିତ ଆଲୋଚନା କରିବେ ମୁଖ୍ୟମନ୍ତ୍ରୀ । ପୂର୍ବାହ୍ନ ସାଢେ ୧୧ଟାରେ ସ୍ୱାଭିମାନ ଅଞ୍ଚଳବାସୀଙ୍କ ସହ ଟେଲିଫୋନରେ ବାର୍ତ୍ତାଳାପ କରିବେ ମୁଖ୍ୟମନ୍ତ୍ରୀ । ଏଥିସହ ସ୍ଥାନୀୟ ଅଞ୍ଚଳର ଲୋକଙ୍କୁ ମୋବାଇଲ ପ୍ରଦାନ କରିବେ । ଗତ କିଛି ବର୍ଷ ମଧ୍ୟରେ ଅଞ୍ଚଳରେ ଗମନାଗମନର ବ୍ୟବସ୍ଥା ସହ ଟେଲିକମ୍ୟୁନିକେସନର ବ୍ୟବସ୍ଥା କରିଛନ୍ତି ସରକାର । ସ୍ୱାଭିମାନ ଅଞ୍ଚଳରେ ୫ଟି ଟେଲିଫୋନ ଟାଓ୍ୱାର ସ୍ଥାପନ କରାଯାଇଛି । ଗତ ବର୍ଷ ଗୁରୁପ୍ରିୟା ସେତୁର ଉଦଘାଟନ କରିଥିଲେ ମୁଖ୍ୟମନ୍ତ୍ରୀ । ପରେ ସ୍ୱାଭିମାନ ଅଞ୍ଚଳକୁ ଫିଟିଥିଲା ବିକାଶର ରାସ୍ତା । ସ୍ଥାନୀୟ ଅଞ୍ଚଳରେ ୧୪ଟି ନୂଆ ରାସ୍ତା ତିଆରି ନେଇ ଟେଣ୍ଡର ଦିଆଯାଇଥିବା ବେଳେ, ୭ଟି ରାସ୍ତାର କାର୍ଯ୍ୟ ଜାରି ରହିଛି ।
ରାୟଗଡ଼ା: ଦୁର୍ଘଟଣାଗ୍ରସ୍ତ ହେଲା ଯାତ୍ରୀବାହୀ ବସ୍ ,୩ ମୃତ, ଏକାଧିକ ଯାତ୍ରୀ ଚାପି ହୋଇ ରହିଥିବା ସୂଚନା
ରାୟଗଡ଼ା : ରାୟଗଡା-ବିଷମକଟକ ଥାନା ଅନ୍ତର୍ଗତ କୁମ୍ଭାର ଧାମୁଣି ନିକଟରେ ବସ ଦୁର୍ଘଟଣା ,୩ ମୃତ । ଭାରସାମ୍ୟ ହରାଇ ବସଟି ଦୁର୍ଘଟଣାଗ୍ରସ୍ତ ହୋଇଥିବା ସୂଚନା ମିଳିଛି । ଫର୍ଚୁନ ନାମକ ଘରୋଇ ବସଟି ଟିକିରି ରୁ ଭୁବନେଶ୍ୱର ଯାଉଥିଲା । ଘଟଣାସ୍ଥଳରେ ପୋଲିସ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛି ।
ଏହି ବସରେ ପ୍ରାୟ ୫୦ରୁ ଅଧିକ ଯାତ୍ରୀ ରହିଥିବା ସୂଚନା ମିଳିଛି । ରାତି ହୋଇଥିବାରୁ ଉଦ୍ଧାର କାର୍ଯ୍ୟରେ ସାମାନ୍ୟ ବିଳମ୍ବ ଦେଖା ଦେଇଛି । ବସ ତଳେ ଚାପି ହୋଇଛନ୍ତି ଏକାଧିକ ଯାତ୍ରୀ । ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛି ।
ପୁଣି ଭାରତକୁ ଫେରିବ ପବ୍ଜୀ: ନିର୍ଦ୍ଧାରିତ ସମୟରୁ କିଛିଟା ବିଳମ୍ୱରେ ହୋଇପାରେ ଲଞ୍ଚ
ନୂଆଦିଲ୍ଲୀ: ପବଜୀ ଖେଳାଳିଙ୍କ ପାଇଁ ଖୁସି ଖବର । ପୁଣି ଥରେ ନୂଆ ରୂପରେ ଭାରତକୁ ଫେରିଆ ଏହି ଲୋକପ୍ରିୟ ମୋବାଇଲ ଗେମ୍ । ଏ ନେଇ କମ୍ପାନୀ ପକ୍ଷରୁ ଆନୁଷ୍ଠାନିକ ଭାବେ ଘୋଷଣା କରାଯାଇଛି । ପବଜୀ ମୋବାଇଲ ଇଣ୍ଡିଆ ନାଁରେ ଏହାକୁ ଭାରତ ବଜାରେ ଲଞ୍ଚ କରାଯିବ । ପବଜୀ ଭାରତରେ ଏକ ଭାରତୀୟ ସହଯୋଗୀ କମ୍ପାନୀ ପ୍ରତିଷ୍ଠା କରିବ, ଯେଉଁଥିରେ ବିଭିନ୍ନ ଶ୍ରେଣୀରେ ପ୍ରାୟ ୧୦୦ରୁ ଊର୍ଦ୍ଧ୍ୱ କର୍ମଚାରୀଙ୍କୁ ନିଯୁକ୍ତି ମିଳିବା ସୂଚନା । ଏଥିସହିତ ପବଜୀ ମୋବାଇଲ ଏକ ନୂଆ ଓ୍ୱେବସାଇଟ ଲଞ୍ଚ କରିବା ସହ ପବଜୀର ଟିଜର ସେୟାର କରିଛି । ତେବେ ସେପ୍ୱେମ୍ୱର ମାସରେ ଚୀନ ସହ ଉତ୍ତେଜନାପୂର୍ଣ୍ଣ ପରିସ୍ଥିତିରେ ପବଜୀ ସମେତ ୧୧୮ଟି ଚୀନ ମୋବାଇଲ ଆପ୍ଳିକେସନ୍ ବ୍ୟାନ୍ କରିଥିଲା ଭାରତ । ଏ ନେଇ ଯୁବଗୋଷ୍ଠୀଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା। ଚୀନ୍କୁ ମାତ୍ ଦେବାକୁ ଏହା ଏକ ସ୍ବାଗତଯୋଗ୍ୟ ପଦକ୍ଷେପ ବୋଲି କିଛି ଲୋକ କହୁଥିବା ବେଳେ କିଛି ଦୁଃଖ ପ୍ରକାଶ କରିଥିଲେ। ତେବେ ଆପରେ କିଛି ପରିବର୍ତ୍ତନ କରାଯାଉଥିବାରୁ ଏହାର ଲଞ୍ଚିରେ ବିଳମ୍ୱ ହୋଇପାରେ ।
ଧାନବିଲରେ ମୃତଦେହ; ପଚି ଯାଇଥିବାରୁ ଚିହ୍ନା ପଡୁନି ଶବ
ଦିଗପହଣ୍ଡି: ହିଞ୍ଜିଳି ଥାନା ଆଡପଡା ଫାଣ୍ଡି ନିକଟ ଆଡପଡା ଗ୍ରାମ ନିକଟସ୍ଥ ଏକ ଧାନବିଲ ନିକଟରୁ ଜଣେ ଯୁବକଙ୍କ ଗଳିତ ମୃତ ଦେହକୁ ହିଞ୍ଜିଳି ପୁଲିସ ଉଦ୍ଧାର କରିଛି । ମୃତକଙ୍କ ପରିଚୟ ମିଳିନାହିଁ ତେବେ ମୃତକଙ୍କ ବୟସ ପ୍ରାୟ ୪୫ ବର୍ଷ ହେବ ବୋଲି ଜଣାପଡିଛି । ଏ ନେଇ ହିଞ୍ଜିଳି ଥାନାରେ ୩୪/୨୦ରେ ଏକ ଅପମୃତ୍ୟୁ ମାମଲା ରୁଜୁ କରି ମୃତଦେହକୁ ଜବତ କରି ବ୍ୟବଚ୍ଛେଦ ସକାଶେ ବ୍ରହ୍ମପୁର ବଡ ଡାକ୍ତରଖାନାକୁ ପଠାଇ ଘଟଣାର ତଦନ୍ତ ଚଳାଇଛି ହିଂଜିଳି ପୋଲିସ ।
ସୂଚନା ଅନୁଯାୟୀ, ସୋମବାର ସକାଳେ ହିଞ୍ଜିଳି ଥାନା ଓ ପାଟପୁର ଥାନା ମଧ୍ୟ ଡେଙ୍ଗାଡି ଏବଂ ଆଡପଡା ଗ୍ରାମ ଏକ ଧାନ ବିଲ ନିକଟରେ ଜଣେ ଯୁବକଙ୍କ ଗଳିତ ମୃତ ଦେହକୁ ବିଲୁଆ, କୁକୁର ଖାଉଥିବା ବେଳେ ଗ୍ରାମର କିଛି ଲୋକ ଦେଖି ହିଞ୍ଜିଳି ଥାନାକୁ ଖବର ଦେଇଥିଲେ । ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଚଳାଇଛି । ମୃତଦେହ ପଚିସଢି ଯାଇଥିବାରୁ ଚିହ୍ନଟ କରିବା ସମ୍ଭବପର ହୋଇପାରିନାହିଁ । ତେବେ ଏହା ଆତ୍ମହତ୍ୟା ନା ସୁପରିକଳ୍ପିତ ହତ୍ୟା ତାହା ସନ୍ଦେହ ଘେରରେ ରହିଥିବା ବେଳେ ସ୍ଥାନୀୟ ଅଂଚଳ ରେ 3 ଦିନ ଭିତରେ ଏଭଳି ୫ଟି ଘଟଣା ଦେଖିବାକୁ ମିଳିଛି । ତେବେ ଶବ ବ୍ୟବଛେଦ ପରେ ମୃତ୍ୟୁ ର କାରଣ ସ୍ୱଷ୍ଟ ହେବ ଏବଂ ବିଭିନ୍ନ ଥାନା କେସ ରୁଜୁ ଫାଇଲ ରୁ ଚିହ୍ନଟ କିମ୍ବା DNA ଟେଷ୍ଟ ରୁ ଜଣା ପଡିବ ବୋଲି ସୂଚନା ମିଳିଛି ।
ଦଳ ଆଗ ଦିଅଁ ପଛ; ଲେଖାଶ୍ରୀଙ୍କ ବୟାନ ପରେ ତୁମ୍ୱିତୋଫାନ
ପୁରୀ: ଦଳ ଆଗ, ଦିଅଁ ପଛ । ପାର୍ଟି ପାଇଁ ଶ୍ରୀଜଗନ୍ନାଥଙ୍କ ପୀଠର ପରିଚୟ ଖୋଜିଲେ ବିଜେପି ନେତ୍ରୀ ଲେଖାଶ୍ରୀ ସାମନ୍ତସିଂହାର । ବାଢିଲେ ବିତଣ୍ଡା ଯୁକ୍ତି । ପୁରୀକୁ କୁଆଡେ ପରିଚୟ ଦେଇଛନ୍ତି ବିଜେପି ନେତା ସମ୍ବିତ ପାତ୍ର । ଆଗରୁ ଦେଶବାସୀ ପୁରୀକୁ କଲିକତାରେ ବୋଲି ଭାବୁଥିଲେ । ହେଲେ ପୁରୀ ଲୋକସଭା ଆସନରୁ ବିଜେପି ନେତା ସମ୍ବିତ ପାତ୍ର ପ୍ରତିଦ୍ବନ୍ଦ୍ବିତା କରିବା ପରେ କୁଆଡ଼େ ସମସ୍ତ ଜାଣିପାରିଲେ ପୁରୀ ଓଡ଼ିଶାରେ ବୋଲି । ସୋସିଆଲ୍ ମିଡିଆରେ ଲେଖାଶ୍ରୀଙ୍କ ଏଭଳି ବିତଣ୍ଡା ଯୁକ୍ତି ଭାଇରା ହେଉଛି । ପୁରୀର ପରିଚୟ ନିଜେ ଶ୍ରୀଜଗନ୍ନାଥ । ସାରା ବିଶ୍ବ ଜାଣିଛି ଶ୍ରୀଜଗନ୍ନାଥ ସଂସ୍କୃତିର ମହନୀୟତା ।
ପ୍ରତିଟି ଓଡ଼ିଆଙ୍କ ସ୍ବାଭିମାନର ପ୍ରତୀକ ହେଉଛି ଶ୍ରୀକ୍ଷେତ୍ର । ହେଲେ ଦଳୀୟ ପ୍ରଚାର ଆଗରେ କେମିତି ନିଜ ପରିଚୟକୁ ଭୁଲିଗଲେ ଲେଖାଶ୍ରୀ । ନିଜେ ଜଣେ ଓଡିଆ, ଓଡ଼ିଶାର ଝିଅ, ଓଡ଼ିଆ ଘରର ବୋହୂ । ହେଲେ କେମିତି ଓଡ଼ିଆଙ୍କ ସ୍ବାଭିମାନକୁ ପାଦରେ ଦଳିଦେଲେ । ପୁରୀର ପରିଚୟ ଖୋଜିବା ଅର୍ଥ, ଶ୍ରୀଜଗନ୍ନାଥ ସଂସ୍କୃତିକୁ ଅଣଦେଖା କରିବା । ଯେଉଁ ଶ୍ରୀକ୍ଷେତ୍ରକୁ ଦେଶ ବିଦେଶରୁ ଶ୍ରଦ୍ଧାଳୁଙ୍କ ଭିଡ଼ ଜମୁଛି । ସେଇ ପୁରୀକୁ କୁଆଡ଼େ ପରିଚୟ ଦେଲେ ସମ୍ବିତ ପାତ୍ର । ଯେଉଁ ଶ୍ରୀଜଗନ୍ନାଥ ଧାମ ସାତ ଦରିଆ ପାରିରୁ ଟାଣିଆଣିଛି ଭକ୍ତଙ୍କୁ, ତାର କୁଆଡ଼େ ପରିଚୟ ଲୋଡ଼ା । ପାର୍ଟି ପାଇଁ କେମିତି ଶ୍ରୀଜଗନ୍ନାଥ ପୀଠର ପରିଚୟରେ ପ୍ରଶ୍ନବାଚୀ ଲଗାଇଲେ ଲେଖାଶ୍ରୀ? ଦଳ କଣ ଆତ୍ମାଠୁ ଉପରେ ।
ଶ୍ରୀଜଗନ୍ନାଥଙ୍କ ଅପେକ୍ଷା କଣ ସମ୍ବିତ ପାତ୍ର ଅଧିକ ପରିଚିତ? ପବ୍ଲିସିଟି ପାଇଁ ଆଉ କେତେ ତଳକୁ ଖସିବେ ବିଜେପି ନେତ୍ରୀ? ଲେଖାଶ୍ରୀଙ୍କ ବୟାନକୁ ସୋସିଆଲ୍ ମିଡିଆରେ ଅନେକ ସମାଲୋଚନା କରିଛନ୍ତି । ସେପଟେ ଲେଖାଶ୍ରୀଙ୍କ ବୟାନ ନେଇ ସତ୍ୟବାଦୀ ଓ ପିପିଲିରେ ଅସନ୍ତୋଷ ପ୍ରକାଶ ପାଇଛି । କଂଗ୍ରେସ ପକ୍ଷରୁ ଲେଖାଶ୍ରୀଙ୍କ ମନ୍ତବ୍ୟକୁ ଦୃଢ ନିନ୍ଦା କରିବା ସହ କ୍ଷମା ମାଗିବାକୁ ଦାବି କରାଯାଇଛି । ପୁରୀର ମହାନତାକୁ ଭୃକ୍ଷେପ କରି ଲେଖାଶ୍ରୀ ଯେଉଁ ମନ୍ତବ୍ୟ ଦେଇଛନ୍ତି ତାହା ଅତ୍ୟନ୍ତ ଦୁର୍ଭାଗ୍ୟ ଜନକ ବୋଲି କହିଛି କଂଗ୍ରେସ ।…
ବ୍ରିଟେନରେ ଖ୍ରୀଷ୍ଟମାସ୍ ପୂର୍ବରୁ ଆସିବ କୋଭିଡ-୧୯ ଟିକା
ଲଣ୍ଡନ: ବିଶ୍ୱବାସୀଙ୍କ ପାଇଁ ଖୁସିଖବର । ବ୍ରଟେନ୍ ସ୍ୱାସ୍ଥ୍ୟ ମନ୍ତ୍ରୀ ମେଟ ହେନକାକ ସୋମବାର କହିଛନ୍ତି ଯେ, ଖ୍ରୀଷ୍ଟମାସ୍ ପୂର୍ବରୁ ଫାଇଜର କମ୍ପାନୀର ଟିକା ମାର୍କେଟକୁ ଆସିଯିବ । ହେନକାକ୍ ଅନ୍ତର୍ଜାତୀୟ ଗଣମାଧ୍ୟମକୁ ଦେଇଥିବା ଇଣ୍ଟରଭ୍ୟୁରେ କହିଛନ୍ତି ଯେ, ଆମେ ଡିସେମ୍ୱର ପହିଲାରେ କୋଭିଡ-୧୯ର ଟିକା ବଜାରରେ ଉପଲବ୍ଧ କରିବାକୁ ଚେଷ୍ଟା କରୁଛୁ । କିନ୍ତୁ ଖ୍ରୀଷ୍ଟମାସ୍ ପୂର୍ବରୁ ଏହା ମାର୍କେଟରେ ଉପଲବ୍ଧ ହେବ । ଆଉ ଏକ ଭଲ ଖବର ହେଉଛି ବର୍ଷ ଶେଷ ବେଳକୁ ଆମେରିକା ସମେତ ବିଶ୍ୱର ବହୁ ଦେଶରେ ବର୍ଷ ଶେଷରେ କୋଭିଡ-୧୯ ସମେତ ଅନେକ ଦେଶରେ କୋଭିଡ-୧୯ ଟିକା ଉପଲବ୍ଧ ହେବ ।
ଫିଜର ବ୍ୟତୀତ ଅନ୍ୟ ଏକ ଟିକା ନିର୍ମାତା କମ୍ପାନୀ ହେଉଛି ମାଡେର୍ଣ୍ଣା । କମ୍ପାନୀର ଦାବି ହେଉଛି ଟିକା କରୋନା ଭାଇରସ୍ ଉପରେ ୯୪.୫ ପ୍ରତିଶତ ପ୍ରଭାବୀ । ଏହାର ଏକ ସପ୍ତାହ ପୂର୍ବରୁ ଫାଇଜର କମ୍ପାନୀ ନିଜ ସଫଳତା ନେଇ ଦାବି କରିଛି । ତେବେ ଉଭୟ କମ୍ପାନୀ ଏହାର ଉପଯୋଗ ନେଇ ଆମେରିକାର ଅନୁମତିକୁ ଅପେକ୍ଷା କରିଛି ।
ମୋବାଇଲ ଫାଟି ବର୍ଷକର ଶିଶୁ ଗୁରୁତର
କୋରାପୁଟ: ଅବହେଳାରୁ ଅଘଟଣ। ମୋବାଇଲ୍ ଫାଟି ବର୍ଷକର ଛୁଆ ଆହତ ହୋଇଛି । କୋରାପୁଟ ଜିଲ୍ଲା ଲକ୍ଷ୍ମୀପୁର ବ୍ଲକ ତଳ ବିଲାଂସିଲ ଗାଁରେ ଅଘଟଣ ଘଟିଛି । ଗୁରୁତର ଶିଶୁ କନ୍ୟାଟିକୁ ଲକ୍ଷ୍ମୀପୁର ଡାକ୍ତରଖାନାରୁ କୋରାପୁଟ ସ୍ଥିତ ସହୀଦ ଲକ୍ଷ୍ମଣ ନାଏକ ମେଡିକାଲ କଲେଜକୁ ସ୍ଥାନାନ୍ତର କରାଯାଇଛି । ଘଟଣା ଅନୁଯାଇ ଗାଁର ରୋହିତ ନାଚିକା ବର୍ଷେ ତଳେ ଏକ ମୋବାଇଲ୍ କିଣିଥିଲେ । ମୋବାଇଲଟି ଗତ କାଲି ରାତିରେ ଫୁଲ ଚାର୍ଜ ହୋଇଯିବା ପରେ ଖଟ ଉପରେ ରଖି ଦେଇଥିଲେ ।
ଖଟ ଉପରେ ତାଙ୍କ ସ୍ତ୍ରୀ ଓ ବର୍ଷକର ଝିଅ ବର୍ଷା ସୋଇଥିବା ବେଳେ ହଠାତ୍ ମୋବାଇଲଟି ଫାଟି ଯାଇଥିଲା । ଫଳରେ ଶିଶୁଟି ଗୁରୁତର ଆହତ ହୋଇଥିବା ବେଳେ ଭୋରରୁ ତାକୁ ଲକ୍ଷ୍ମୀପୁର ମେଡିକାଲରେ ଭର୍ତ୍ତି କରାଯାଇଥିଲା । ହେଲେ ଗୁରୁତର ଶିଶୁଟିର ଅଧିକ ଚିକତ୍ସା ଆବଶ୍ୟକ ଥିବାରୁ ତାକୁ କୋରାପୁଟ ସହୀଦ ଲକ୍ଷ୍ମଣ ନାଏକ ମେଡିକାଲକୁ ପଠାଇ ଦିଆଯାଇଥିଲା । ତେବେ ଚିକିତ୍ସାପରେ ଶିଶୁଟିର ସ୍ଵାସ୍ଥ୍ୟ ଅବସ୍ଥା ଠିକ୍ ଥିବା ସୂଚନା ରହିଛି ।
କାଲିଠାରୁ କ୍ୱାଡ୍ ଦ୍ୱିତୀୟ ପର୍ଯ୍ୟାୟ,ଚୀନକୁ ଦେଖାଇବେ ତାକତ୍ ସୁପର ୪
ନୂଆଦିଲ୍ଲୀ: ରଣନୀତି ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ଯୁଦ୍ଧାଭ୍ୟାସ (Malabar Exercise)ର ଦ୍ୱିତୀୟ ପର୍ଯ୍ୟାୟ କାଲିଠୁ ଆରମ୍ଭ ହେବ । ଉତ୍ତର ଆରବ ସାଗରରେ ଆରମ୍ଭ ହେବ ଏହି ଯୁଦ୍ଧାଭ୍ୟାସ । ୧୭-୨୦ ନଭେମ୍ୱର ଯାଏଁ ଏହି ଯୁଦ୍ଧାଭ୍ୟାସ ଅନୁଷ୍ଠିତ ହେବ । ୪ ଦିନିଆ ଏହି ଅଭ୍ୟାସରେ ଭାରତ ସହିତ ଜାପାନ, ଆମେରିକା ଏବଂ ଅଷ୍ଟ୍ରେଲିଆ ନ୍ୟାଭି ନିଜ ନିଜ କଳା କୌଶଳ ପ୍ରଦର୍ଶନ କରିବେ । ଏହା ପୂର୍ବରୁ ୩ରୁ ୬ ନଭେମ୍ୱର ମଧ୍ୟରେ ମାଲାବର ଯୁଦ୍ଧାଭ୍ୟାସର ପ୍ରଥମ ଚରଣ ବଙ୍ଗୋପସାଗରରେ ପୂରା ହୋଇଥିଲା ।
Second phase of Exercise #Malabar2020 will be conducted in the Northern Arabian Sea from 17 to 20 November 2020.
This phase will involve coordinated operations of increasing complexity between navies of Australia, India, Japan & the United States: Government of India
— ANI (@ANI) November 16, 2020
ଦ୍ୱିତୀୟ ପର୍ଯ୍ୟାୟ ଯୁଦ୍ଧାଭ୍ୟାସରେ ଆମେରିକା ବିମାନବାହକ ଯୁଦ୍ଧତୋପ ୟୁଏସ୍ ନିମିଜ୍ଜ ଏବଂ ଭାରତୀୟ ନୈସେନାର ସବୁଠାରୁ ଶକ୍ତିଶାଳୀ ଯୁଦ୍ଧତୋପ ବିକ୍ରମାଦିତ୍ୟ ସହିତ ଅଷ୍ଟ୍ରେଲିଆ ଏବଂ ଜାପାନୀ ନୈସେନାର ଦୁଇ ବିଧ୍ୱସଂକ ପୋତ ଭାଗନେବେ । ଭାରତର ବିକ୍ରମାଦିତ୍ୟରେ ମିଗ୍ ୨୯ ପ୍ଳେନ୍ ମଧ୍ୟ ସାମିଲ ରହିବ । ଏଥିସହିତ ଏଫ୍-୧୮ ଫାଇଟର୍ ପ୍ଳେନ୍ ମଧ୍ୟ ଉପସ୍ଥିତ ରହିବ । ଏହି ଯୁଦ୍ଧାଭ୍ୟାସରେ ୪ ଦେଶର ନୈସେନା ପ୍ରଶିକ୍ଷଣ ଦିଆଯିବ ।
ବର୍ତ୍ତମାନର ସୂଚନା ମୁତାବକ ଯୁଦ୍ଧାଭ୍ୟାସ ୭୦ ବିଦେଶୀ ଯୁଦ୍ଧପୋତ ପହଞ୍ଚିଥିବା ଖବର ରହିଛି । ଶୀର୍ଷ ନୈସେନା କମାଣ୍ଡରଙ୍କ ଅନୁସାରେ ଭାରତୀୟ ନୈସେନା ସମ୍ପୂର୍ଣ୍ଣ ଭାବେ ପୂର୍ବ ଏବଂ ପଶ୍ଚିମ ସମୁଦ୍ର ତଟରେ ମୁତୟନ ହୋଇଛି । ଯଦି ପୂର୍ବ ଲଦାଖରେ ସ୍ଥିତି ପୂର୍ବାପେକ୍ଷା ଖରାବ ହୁଏ ତେବେ ଯେ କୌଣସି ପ୍ରକାର ଆକସ୍ମିକ ପରିସ୍ଥିତ ଉପୁଜେ ତାହାର ମୁକାବିଲା ନେଇ ସମ୍ପୂର୍ଣ୍ଣ ପ୍ରସ୍ତୁତ ।
RTOରେ କାମ ଆରମ୍ଭ; ଆଗ ସାରିବେ ପୂରୁଣା କାମ, ଅଫଲାଇନ୍ ସୁବିଧାକୁ ନା’….
ଭୁବନେଶ୍ୱର: କୋଭିଡ୍ ସଂକ୍ରମଣ ପାଇଁ ରାଜ୍ୟର ପ୍ରାୟ ସରକାରୀ ଦପ୍ତର ବନ୍ଦ ଥିଲା । ଆଞ୍ଚଳିକ ପରିବହନ କାର୍ଯ୍ୟାଳୟ ମଧ୍ୟ ସମ୍ମାନ ନ୍ୟାୟରେ ବନ୍ଦ ହୋଇଥିଲା । ତେବେ ଏବେ କଟକଣା ହାଲୁକା ହେବା ପରେ ଆଞ୍ଚଳିକ ପରିବହନ କାର୍ଯ୍ୟାଳୟ ଖୋଲିଛି । ଉଲ୍ଲେଖଯୋଗ୍ୟ ଯେ ଲର୍ଣ୍ଣିଂ ଲାଇସେନ୍ସ ସେବା ମାର୍ଚ୍ଚ ମାସରୁ ବନ୍ଦ କରାଯାଇଥିଲା । ଏବେ ଖୋଲିବା ପରେ ପ୍ରଥମେ ପୂରୁଣା ଆବେଦନକାରୀଙ୍କୁ ଲର୍ଣ୍ଣିଂ ଲାଇସେନ୍ସ ଦେବା ଉପରେ କାର୍ଯ୍ୟାଳୟ ଗୁରୁତ୍ୱ ଦେଇଛି ।
ଡିସେମ୍ୱର ପ୍ରଥମ ସପ୍ତାହ ଯାଏଁ କୌଣସି ନୂଆ ଆବେଦନ ଗ୍ରହଣ କରାଯିବ ନାହିଁ । ବକେୟା ଥିବା କାମ ଏଇ ସମୟ ମଧ୍ୟରେ ଶେଷ କରିବାକୁ କାର୍ଯ୍ୟାଳୟ ପକ୍ଷରୁ ଚେଷ୍ଟା କରାଯିବ । ପୂରୁଣା କାମ ସରିଲେ ନୂଆ ଆବେଦନ ଗ୍ରହଣ କରାଯିବ । ଅର୍ଥାତ୍ ଡିସେମ୍ୱର ପ୍ରଥମ ସପ୍ତାହରୁ ନୂଆ ଲାଇସେନ୍ସ ପାଇଁ ଆବେଦନ ଗ୍ରହଣ କରାଯିବ । ଗତ ମାର୍ଚ୍ଚ ୨୦ ତାରିଖରୁ କାର୍ଯ୍ୟାଳୟ ବନ୍ଦ ଥିବାରୁ ପ୍ରାୟ ଲକ୍ଷାଧିକ ଆବେଦନ ପଡ଼ି ରହିଛି ।
ଏଣୁ ଜରୁରୀକାଳୀନ ଭିତ୍ତିରେ ଏହି କାମ ଶେଷ କରିବା ପରେ ହିଁ ନୂଆଙ୍କୁ ସୁଯୋଗ ମିଳିବ ଆଞ୍ଚଳିକ ପରିବହନ କାର୍ଯ୍ୟାଳୟ ପକ୍ଷରୁ କୁହାଯାଇଛି । ଏହାବ୍ୟତୀତ ଏବେ କେବଳ ଅନଲାଇନ ସେବା ହିଁ କାର୍ଯ୍ୟକ୍ଷମ ହେବ । ଅଫଲାଇନ ସେବା ପାଇଁ କୌଣସି ସୁଯୋଗ ରହିବ ନାହିଁ । ତେବେ କାର୍ଯ୍ୟାଳୟରେ କର୍ମଚାରୀ ଓ ଅଧିକାରୀମାନଙ୍କ ପାଇଁ ମାସ୍କ, ସାନିଟାଇଜର ଓ ସାମାଜିକ ଦୂରତାକୁ କଡ଼ାକଡ଼ି କରାଯାଇଛି ।
ଶ୍ରୀଜୀଉଙ୍କୁ ସୁନା ଅଳଙ୍କାର ଭେଟି; ମାପଚୁପ ସରିଲା, ତିଆରି ହେବ ଅଳଙ୍କାର…
ପୁରୀ: ବଡ଼ଦେଉଳକୁ ଜଣେ ଭକ୍ତ ସୁନା ଅଳଙ୍କାର ଦାନ କରିବେ । ତିନି ମୂର୍ତ୍ତିଙ୍କ ପାଇଁ ୩ ସେଟର ସୁନା ଅଳଙ୍କାର ଦାନ କରିବେ । ସୁନା ଅଳଙ୍କାର ମଧ୍ୟରେ ରହିଛି- ଚନ୍ଦ୍ର, ସୂର୍ଯ୍ୟ ଓ ପାତିଆ । ଆଜି ଏହି ଭକ୍ତ ଜଣକ ଶ୍ରୀମନ୍ଦିରକୁ ବଣିଆ ପଠାଇ ଅଳଙ୍କାରର ମାପ ନେଇଛନ୍ତି ।
ଶ୍ରୀମନ୍ଦିର ନୀତି ପ୍ରଶାସକ ଓ ପରିଚାଳନା କମିଟିର ସଦସ୍ୟମାନେ ମାପଚୁପ କରିଛନ୍ତି । ଏହାପରେ ସୁନା ଅଳଙ୍କାର ପ୍ରସ୍ତୁତ ହେବ । ତେବେ ସୁନା ଅଳଙ୍କାରର ମୂଲ୍ୟ କୋଟି କୋଟି ଟଙ୍କାରେ ଆକଳନ ହେଉଥିବା ବେଳେ ଏଯାବତ୍ ଶ୍ରୀଜୀଉଙ୍କୁ ଦାନ କରିବାକୁ ଆଗ୍ରହୀ ଥିବା ଏହି ଦାତାଙ୍କ ନାମ ସାର୍ବଜନୀନ ହୋଇନାହିଁ ।