ଭୁବନେଶ୍ୱର: ରାଜ୍ୟରେ ବନ୍ୟା ସ୍ଥିତିର ସମୀକ୍ଷା କରିଛନ୍ତି SRC ଓ ଜଳ ସମ୍ପଦ ବିଭାଗ । ମହାନଦୀର ଉପରମୁଣ୍ଡରେ ପ୍ରବଳ ବର୍ଷା ଯୋଗୁଁ ଏବେ ୪୬ଟି ଗେଟ୍‌ ଖୋଲାଯାଇଛି । ବାମ ପାର୍ଶ୍ୱରେ ୩୧ଟି ଗେଟ୍‌ ଖୋଲାଯାଇଥିବା ବେଳେ ଡ଼ାହାଣ ପାର୍ଶ୍ୱରେ ୧୫ଟି ଗେଟ୍‌ ଦେଇ ବନ୍ୟା ଜଳ ନିଷ୍କାସନ ହେଉଛି୧ । ଜଳଭଣ୍ଡାର ମଧ୍ୟକୁ ପ୍ରତି ସେକେଣ୍ଡରେ ୮ଲକ୍ଷ ୮୦ ହଜାର କ୍ୟୁସେକ ଜଳ ପ୍ରବେଶ କରୁଥିବା ବେଳେ, ୪୬ଟି ଗେଟ ଦେଇ ପ୍ରାୟ ୭ ଦଶମିକ ୫ ଲକ୍ଷ କ୍ୟୁସେକ ଜଳ ନିଷ୍କାସନ ହେଉଛି । ଯେଉଁଥି ପାଇଁ ପୁରୀ, ଖୋର୍ଦ୍ଧା, କଟକ, ଜଗତସିଂହପୁର, ନୟାଗଡ଼ ଓ କେନ୍ଦ୍ରାପଡ଼ା ପ୍ରଭାବିତ ହେବ ବନ୍ୟାଜଳ । କଟକ ମୁଣ୍ଡଳୀରେ ଆସନ୍ତାକାଲି ଭୋରରେ ବନ୍ୟାପାଣି ପହଞ୍ଚିବ । ମୁଣ୍ଡଳୀରେ ପ୍ରାୟ ୧୦ ଦଶମିକ ୫ ଲକ୍ଷ କ୍ୟୁସେକ ଜଳ ପ୍ରବାହିତ ହେବ ।

ସେପଟେ ସୁବର୍ଣ୍ଣରେଖା ଓ ବୁଢ଼ାବଳଙ୍ଗ ନଦୀ ବିପଦ ସଂକେତ ତଳେ ଅଛି । ବୈତରଣୀ ନଦୀ ଆନନ୍ଦପୁରରେ ବିପଦ ସଙ୍କେତ ତଳେ ପ୍ରବାହିତ ହେଉଛି । ସେହିପରି ଆଖୁଆପଦା ଠାରେ ବିପଦ ସଙ୍କେତରେ ଅଛି ବୈତରଣୀ । ବ୍ରାହ୍ମଣୀର ଉପରମୁଣ୍ଡ ଝାଡ଼ଖଣ୍ଡ, ପାନପୋଷ, ବାରକୋଟରେ ପ୍ରବଳ ବର୍ଷା ହୋଇଛି । ତେବେ ରେଙ୍ଗାଳି ଜଳଭଣ୍ଡାରରୁ ଖୋଲିଥିବା ୪ ଗେଟ ମଧ୍ୟରୁ ଏବେ ୨ଟି ଗେଟ ବନ୍ଦ କରାଯାଇଛି । ତେବେ ସନ୍ଧ୍ୟା ପରେ ବ୍ରାହ୍ମଣୀରେ ବନ୍ୟା ପରିସ୍ଥିତି ସୁଧୁରିଯିବ ବୋଲି କହିଛି ଜଳସମ୍ପଦ ବିଭାଗ । ବୈତରଣୀ ପାଇଁ ଯାଜପୁର ଜିଲ୍ଲାର ବରୀ, ଦଶରଥପୁର ବ୍ଲକ, ବିଞ୍ଝାରପୁର ସମେତ ଭଦ୍ରକ ଜିଲ୍ଲା ଭଣ୍ଡାରିପୋଖରୀ, ଧାମନଗର ବ୍ଲକରେ ବନ୍ୟା ହୋଇଛି ।

ଭୁବନେଶ୍ୱର: ଦୌଡ଼ରାଣୀ ଦୂତୀ ଚାନ୍ଦଙ୍କୁ ମିଳିଲା ଅର୍ଜୁନ ପୁରସ୍କାର । ଆଜି ଜାତୀୟ କ୍ରୀଡ଼ା ଦିବସ ଅବସରରେ ଦୂତୀଙ୍କୁ ଏହି ପୁରସ୍କାର ପ୍ରଦାନ କରାଯାଇଛି । ଭିଡିଓ କନଫରେନ୍ସି ମାଧ୍ୟମରେ ରାଷ୍ଟ୍ରପତି ରାମନାଥ କୋବିନ୍ଦ ପୁରସ୍କାର ପ୍ରଦାନ କରିଛନ୍ତି । କ୍ରୀଡା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଦୂତୀ ଚଳିତ ବର୍ଷ ଅର୍ଜୁନ ପୁରସ୍କାର ପାଇଁ ମନୋନୀତ ହୋଇଥିଲେ ।

କୋଲକାତା ସାଇ କେନ୍ଦ୍ର ଠାରେ ଦୂତୀ ଚାନ୍ଦ ଅର୍ଜୁନ ପୁରସ୍କାର ଗ୍ରହଣ କରିଛନ୍ତି । ୨୦୧୯ ଅକ୍ଟୋବର ମାସରେ ଦୂତୀ ନ୍ୟାସନାଲ ଚାମ୍ପିଅନସିପରେ ସ୍ୱର୍ଣ୍ଣ ପଦକ ପାଇଥିଲେ । ନିଜ ପୂର୍ବ ରେକର୍ଡକୁ ଭାଙ୍ଗିବା ସହ ଦୂତୀ ୧୦୦ ମିଟର ଦୌଡ଼କୁ ୧୧.୨୨ ସେକେଣ୍ଡରେ ପୂରା କରିଥିଲେ । ପୂର୍ବରୁ ଦୂତୀଙ୍କ ନାଁରେ ଏହି ରେକର୍ଡ ୧୧.୨୬ ସେକେଣ୍ଡର ଥିଲା ।

ଭୁବନେଶ୍ୱର (ପ୍ରିୟ ପ୍ରିତମ ମହାନ୍ତି):  JEE ଓ NEET ଦେବାକୁ ଆସୁଥିବା ପରୀକ୍ଷାର୍ଥୀଙ୍କ ହେବ ଥର୍ମାଲ ସ୍କାନିଂ । ପରୀକ୍ଷା ପାଇଁ ବସ୍‌ରେ ଚଢ଼ିବା ସମୟରେ ଥରେ ଓ ପହଞ୍ଚିବା ପରେ ଆଉ ଥରେ ହେବ ଥର୍ମାଲ ସ୍କାନିଂ ।  JEE ଓ NEET ପରୀକ୍ଷାର ପରିଚାଳନା କେମିତି ହେବ, ସେ ନେଇ ଆଜି ଖୋର୍ଦ୍ଧା ଜିଲ୍ଲାପାଳ ସନତ ମହାନ୍ତିଙ୍କ ଅଧ୍ୟକ୍ଷତାରେ ବୈଠକ ବସିଥିଲା । ବୈଠକରେ ଏହି ନିଷ୍ପତି ନିଆଯାଇଛି ।  ବୈଠକରେ ଜିଲ୍ଲାର ବରିଷ୍ଠ ଅଧିକାରୀଙ୍କ ସମେତ ନୋଡାଲ ସେଣ୍ଟର ହୋଇଥିବା ସରକାରୀ ITIର Principal ଜିତା ମିତ୍ର ଶତପଥି ଉପସ୍ଥିତ ଥିଲେ ।  ଯେପରି ଯାତାୟତରେ ଆସୁବିଧା ନ ହୁଏ, ତା ଧ୍ୟାନ ଦିଆଯିବ। ବସ ବ୍ୟବସ୍ଥା ପାଇଁ ସବୁ ଜିଲ୍ଲାପାଳଙ୍କ ଭିତରେ ଆଲୋଚନା ହେବ। ପରୀକ୍ଷା ସେଣ୍ଟରରେ ଯଦି ହଷ୍ଟେଲ ସୁବିଧା ଅଛି, ଛାତ୍ରଛାତ୍ରୀ ଓ ସେମାନଙ୍କ ସହ ଆସିଥିବା ଅଭିଭାବକ ରହିବେ। ନ ହେଲେ ବିକଳ୍ପ ବ୍ୟବସ୍ଥା କରାଯିବ ବୋଲି ବୈଠକରେ ନିଷ୍ପତି ନିଆଯାଇଛି । ତେବେ ସବୁଠାରୁ ବଡ଼ ସେଣ୍ଟର ଗୁଡ଼ିକରେ ହି ଅଧିକ ପରୀକ୍ଷାର୍ଥୀ ରହିବେ। ପର୍ଯ୍ୟାୟକ୍ରମେ ପରୀକ୍ଷା ହେଉଥିବାରୁ ଅସୁବିଧା ହେବନାହିଁ। ଗାଡ଼ି ଯେପରି ନ ଅଟକା ଯାଏ, ସେ ନେଇ RTO ମାନଙ୍କୁ ବିଶେଷ ନିର୍ଦ୍ଦେଶ ଦିଆଯାଇଛି। ନୋଡାଲ ସେଣ୍ଟର ଅଧିକାରୀଙ୍କ ବ୍ୟକ୍ତିଗତ ନମ୍ବରରେ ଛାତ୍ରଛାତ୍ରୀ ଫୋନ କରି ଦ୍ୱନ୍ଦ୍ୱ ଦୂର କରିପାରିବେ ବୋଲି ବୈଠକ ପରେ ସୂଚନା ଦିଆଯାଇଛି ।

ସୂଚନାଯୋଗ୍ୟା ଯେ, ଜେଇଇ ମେନ୍ ଓ ନିଟ ପରୀକ୍ଷାର୍ଥୀ ମାଗଣାରେ  ପରୀକ୍ଷା କେନ୍ଦ୍ରକୁ  ଯିବା ପାଇଁ ସରକାର ବ୍ୟବସ୍ଥା କରିଛନ୍ତି ।  ଯେଉଁ ପରୀକ୍ଷାର୍ଥୀ ମାନେ ଯାତାୟତ ଓ ରହିବା ସମସ୍ୟା ଥିବ ସେମାନେ ଏହି ସୁବିଧା ପାଇପାରିବେ । ଏକ ସାମ୍ବାଦିକ ସମ୍ମିଳନୀରେ  ଗତକାଲି ଏହି ସୂଚନା ଦେଇଥିଲେ ମୁଖ୍ୟ ଶାସନ ସଚିବ ଅସିତ ତ୍ରିପାଠୀ ।   ପ୍ରତି ଜିଲ୍ଲାର ଗୋଟିଏ ଲେଖାଏଁ ଆଇଟିଆଇ କଲେଜକୁ ସରକାର ନୋଡାଲ ସେଣ୍ଟର୍ କରିଛନ୍ତି । ଏହି ନୋଡାଲ ସେଣ୍ଟରକୁ ଫୋନ୍ କରି ପରୀକ୍ଷାର୍ଥୀ ମାନେ ପ୍ରଥମେ ପଞ୍ଜିକରଣ କରିବେ । ସେହି ନୋଡାଲ ସେଣ୍ଟରରୁ ପରୀକ୍ଷାର୍ଥୀଙ୍କୁ ପରୀକ୍ଷା ହେବାକୁ ଥିବା ୭ ସହରର ୨୬ ଟି ସେଣ୍ଟର୍ କୁ ନିଆଯିବ । ସେଠାରେ ସେମାନେ ପରୀକ୍ଷା ଦେବା ସହ ଯେଉଁ ମାନଙ୍କର ରହିବା ସୁବିଧା ନଥିବ ସେମାନଙ୍କୁ ଆଇଟିଆଇ, ପଲିଟେକନିକ୍ ଓ ଘରୋଇ ଇଞ୍ଜିନିୟରିଂ କଲେଜର ହଷ୍ଟେଲରେ ରଖିବା ବ୍ୟବସ୍ଥା କରାଯିବ ।

ଯାତାୟତ ଓ ରହିବା ଲାଗି କୌଣସି ଦେୟ ଦେବାକୁ ପଡ଼ିବନି ପରୀକ୍ଷାର୍ଥୀ ଏବଂ ତାଙ୍କ ସାଙ୍ଗରେ ଯାଉଥିବା ସମ୍ପର୍କୀୟଙ୍କୁ । ରାଜ୍ୟର ପ୍ରାୟ ୩୭ ହଜାର ଛାତ୍ର ଛାତ୍ରୀ ଜେଇଇ ମେନ୍ ଓ ନିଟ୍‌ ପରୀକ୍ଷା ଦେଉଛନ୍ତି । ଏହି ସୁବିଧା ପାଇବା ଲାଗି ୩୧ ଅଗଷ୍ଟ ସୁଦ୍ଧା ପରୀକ୍ଷାର୍ଥୀ ନିଜ ତଥ୍ୟ ଦେଇ ପଞ୍ଜିକରଣ କରିପାରିବେ ବୋଲି ମୁଖ୍ୟ ଶାସନ ସଚିବ ସୂଚନା ଦେଇଛନ୍ତି।

ଭୁବନେଶ୍ୱର: ରାଜ୍ୟରେ କିଛି ଦିନର ଲଗାଣ ବର୍ଷା ପାଇଁ କିଛି ଜିଲ୍ଲାରେ ବନ୍ୟା ପରିସ୍ଥିତି ଦେଖା ଦେଇଛି । ଅଧା ଓଡ଼ିଶା ଏବେ ପାଣି ଘେରରେ ରହିଛି । ରାଜ୍ୟର ବିଭିନ୍ନ ଅଞ୍ଚଳରେ ୨୬ଟି ଘାଇ ସୃଷ୍ଟି ହୋଇଛି । ରାଜ୍ୟରେ ୪୮ଟି ରହିଛି ଦୁର୍ବଳ ସ୍ଥାନ । ତେବେ ସମ୍ଭାବ୍ୟ ବନ୍ୟା ମୁକାବିଲା ପାଇଁ ବରିଷ୍ଠ ୭ ଆଇଏଏସ୍‌ ଅଧିକାରୀଙ୍କୁ ବିଭିନ୍ନ ଜିଲ୍ଲା ଦାୟିତ୍ୱ ଦେଇଛନ୍ତି ମୁଖ୍ୟମନ୍ତ୍ରୀ । ବନ୍ୟା ସ୍ଥିତି ଉପରେ ନଜର ରଖି ଆବଶ୍ୟକ ପଦକ୍ଷେପ ନେବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି  । ହେମନ୍ତ ଶର୍ମାଙ୍କୁ କେନ୍ଦ୍ରାପଡା ଓ ଡି.କେ ସିଂଙ୍କୁ କଟକ ଦାୟିତ୍ୱ ଦିଆଯାଇଥିବାବେଳେ ବିଶାଲ ଦେବଙ୍କୁ ବାଲେଶ୍ୱର ଦାଯିତ୍ୱ ଦିଆଯାଇଛି ।

ଏହା ସହିତ ବିପି ସେଠୀଙ୍କୁ ଭଦ୍ରକ, ଭିଭି ଯାଦବଙ୍କୁ ଯାଜପୁର ସତ୍ୟବ୍ରତ ସାହୁଙ୍କୁ ଜଗତସିଂହପୁର ଦାୟିତ୍ୱ ଦିଆଯାଇଛି । ସେହିଭଳି କେନ୍ଦ୍ରାଞ୍ଚଳ ଆରଡିସିଙ୍କୁ ପୁରୀ ଦାୟିତ୍ୱ ଦିଆଯାଇଛି । ମୁଖ୍ୟମନ୍ତ୍ରୀଙ୍କ ନିର୍ଦଦେଶ ପରେ ସମସ୍ତ ଦାୟିତ୍ୱ ଦିଆଯାଇଥିବା ସଚିବ କାର୍ଯ୍ୟରେ ନିୟୋଜିତ ରହିଛନ୍ତି  । ଏନେଇ ମୁଖ୍ୟ ଶାସନ ସଚିବଙ୍କ କାର୍ଯ୍ୟାଳୟ ତରଫରୁ ସୂଚନା ଦିଆଯାଇଛି  ।