ଭୁବନେଶ୍ୱର: କରୋନା ଭୂତାଣୁ ଦିନକୁ ଦିନ ତା’ର କାୟା ବିସ୍ତାର କରିଚାଲିଛି । ଏହି ଭୂତାଣୁର ସଂକ୍ରମଣ ବଢୁଥିବାରୁ ସରକାର ରାଜ୍ୟବାସୀଙ୍କ ପାଇଁ ଅନେକ ପଦକ୍ଷେପ ନେଇଛନ୍ତି । କରୋନା ମହାମାରୀ ସମୟରେ ରକ୍ତର ଅଭାବ ନହେଉ, ସେଥିପାଇଁ ବ୍ୟାପକ ଭାବେ ରକ୍ତଦାନ କରିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆହ୍ୱାନ ଦେଇଥିଲେ । ରକ୍ତର ଅଭାବ ଯୋଗୁଁ ଯେପରି କାହାର ମୃତ୍ୟୁ ନହୁଏ, ସେ ଦିଗରେ କାମ କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ ।

ତେବେ ଏହି ମହାମାରୀ ମସୟରେ କ୍ରାନ୍ତି ଦିବସ ଠାରୁ ଆରମ୍ଭ ହୋଇଥିଲା ସାପ୍ତାହିକ ଜୀବନ ବିନ୍ଦୁ ରକ୍ତଦାନ କାର୍ଯ୍ୟକ୍ରମ । କରୋନା ସଙ୍କଟରେ ବିଭିନ୍ନ ସ୍ଥାନରେ ଜୀବନ ବିନ୍ଦୁ ସାପ୍ତାହି ରକ୍ତ ଦାନ କାର୍ଯ୍ୟକ୍ରମର ସମାପ୍ତ ହୋଇଛି । ତେବେ କ୍ରାନ୍ତି ଦିବସରୁ ସପ୍ତାହେ ବ୍ୟାପି ଏହି କାର୍ଯ୍ୟକ୍ରମ ବିଜେଡି ମୋ ପରିବାର ଆୟୋଜନ କରିଥିଲା । ବିଭିନ୍ନ ଜିଲ୍ଲାର ଯୁବ ଗୋଷ୍ଠୀ ଏହି ରକ୍ତ ଦାନ କାର୍ଯ୍ୟକ୍ରମରେ ଯୋଗ ଦେଇ ନିଜର ରକ୍ତ ଦାନ କରିଥିଲେ । ତେବେ ଏହି କାର୍ଯ୍ୟକ୍ରମ ସରିବା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟ୍ୱିଟ କରି ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି ।

ମୁଖ୍ୟମନ୍ତ୍ରୀ କହିଛନ୍ତି ଲୋକଙ୍କ ଜୀବନ ବଞ୍ଚାଇବା ଠାରୁ ଅଧିକ ପୁଣ୍ୟ ଆଉ କିଛି ନାହିଁ । କୋଭିଡ ସଙ୍କଟ ସମୟରେ ଜୀବନ ବିନ୍ଦୁ କାର୍ଯ୍ୟକ୍ରମକୁ ସଫଳ କରାଇଥିବା ଏବଂ ସ୍ୱେଚ୍ଛାକୃତ ରକ୍ତଦାନ ପରି ମହତ କାର୍ଯ୍ୟ କରିଥିବା ସମସ୍ତ ଯୁବଗୋଷ୍ଠୀଙ୍କୁ ସାଧୁବାଦ ଜଣାଇଛନ୍ତି ମୁଖ୍ୟମନ୍ତ୍ରୀ । ଏହା ସହ  ଏହି କାର୍ଯ୍ୟକ୍ରମରୁ ୧୪ ହଜାର ୮୩୯ ୟୁନିଟ ରକ୍ତ ସଂଗ୍ରହ କରି ଓଡ଼ିଶା ମୋ ପରିବାର ଏକ ମାଇଲ ଖୁଣ୍ଟ ତିଆରି କରିଛି ବୋଲି ମୁଖ୍ୟମନ୍ତ୍ରୀ କହିଛନ୍ତି ।

ଅବଶ୍ୟ ସବୁ ଦଳୀୟ ଓ ରାଜନୈତିକ କାର୍ଯ୍ୟକ୍ରମକୁ କରୋନା ସଙ୍କଟ ସମୟରେ ବିଜେଡି ବନ୍ଦ ରଖିଛି । ହେଲେ ବିଜୁ ଛାତ୍ର ଓ ଯୁବ ଜନତା ଦଳ ପକ୍ଷରୁ ଆଜି ଭୁବନେଶ୍ୱର ବିଜେଡି ମୁଖ୍ୟାଳୟରେ ଜୀବନ ବିନ୍ଦୁ ରକ୍ତଦାନ ଶିବିର ଆୟୋଜନ କରାଯାଇଛି । ବିଜେଡିର ଏହି ନିଆରା ପଦକ୍ଷେପରେ ଅନେକ ସମର୍ଥନ ସାମିଲ ହୋଇଥିଲେ ।

ଭୁବନେଶ୍ୱର: ରାଜ୍ୟସ୍ତରୀୟ ସ୍ୱାଧିନତା ଦିବସ ଉତ୍ସବରେ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କରୋନା କଟକଣା ଭିତରେ ଆୟୋଜିତ ହୋଇଥିଲା ଉତ୍ସବ । ତେବେ ଚର୍ଚ୍ଚା ହୋଇଥିଲା, ମୁଖ୍ୟମନ୍ତ୍ରୀଙ୍କ ଡ୍ରାଇଭର ସିଟରେ ବସିଥିଲେ ତାଙ୍କ ବ୍ୟକ୍ତିଗତ ସଚିବ ଭି.କେ.ପାଣ୍ଡିଆନ୍ । ମୁଖ୍ୟମନ୍ତ୍ରୀଙ୍କୁ ସାମାଜିକ ଦୂରତାରେ ରଖିବାକୁ ଡ୍ରାଇଭରଙ୍କ ବଦଳରେ ନିଜେ କାର୍ ଡ୍ରାଇଭ କରି ପ୍ରଦର୍ଶନୀ ପଡିଆକୁ ଆଣିଥିଲେ ପାଣ୍ଡିଆନ୍ । ତେବେ ଏହି ଘଟଣାକୁ ସହଜରେ ହଜମ୍ କରିପାରିନି ବିରୋଧି ବିଜେପି । ମୁଖ୍ୟମନ୍ତ୍ରୀଙ୍କ କାରର ବୀମା ବା ଇନ୍ସ୍ୟୁରାନ୍ସ ନଥିବା ନେଇ ଅଭିଯୋଗ ଆଣିଛନ୍ତି ବିଜେପି ମୁଖପାତ୍ର ସୋନାଲି ସାହୁ । ଏଥିପାଇଁ ଜରିମାନା ଆଦାୟ ନେଇ ସେ ପ୍ରଶ୍ନ କରିଛନ୍ତି । ବିଜେପି ନେତ୍ରୀଙ୍କ ଏଭଳି ପ୍ରଶ୍ନକୁ ନେଇ ଏକ ନିର୍ଦ୍ଦିଷ୍ଟ ଚ୍ୟାନେଲ ତାର ଡିଜିଟାଲ୍ ମିଡିଆରେ ଖବର ପୋଷ୍ଟ କରିଛି । ତେବେ ବୀମା ବାବଦରେ ସରକାରୀ ଗାଡି ପାଇଁ କଣ ରହିଛି ନିୟମ ।

ଅପରପକ୍ଷରେ ଭୋକ ବିକଳରେ ତାଟିଆ କାମୁଡିବା ନ୍ୟାୟରେ କେବଳ ଚର୍ଚାରେ ରହିବାକୁ ଓ ବିରୋଧ କରିବା ଉେଦ୍ଦଶ୍ୟରେ ବିଜେପି ନେତ୍ରୀ ବିଭ୍ରାନ୍ତିକର ତଥ୍ୟ ପ୍ରଦାନ କରିଥିବା ସିଧାସଳଖ ଅଭିଯୋଗ ଆଣିଛନ୍ତି ସଡକ ସୁରକ୍ଷା ସମିତି କର୍ମକର୍ତ୍ତା । ବ୍ୟକ୍ତିଗତ ଓ ଘରୋଇ ଯାନବାହାନ ପାଇଁ ଏବଂ ସରକାରୀ ଯାନବାହାନ ପାଇଁ ଇନ୍ସ୍ୟୁରାନ୍ସ ନିୟମରେ ପାର୍ଥକ୍ୟ ରହିଛି । ଏନେଇ ସାମାନ୍ୟତମ ଜ୍ଞାନ ନଥାଇ ଏଭଳି ଭୁଲ ତଥ୍ୟକୁ ନେଇ ରାଜନୀତି କରିବା ଆଦୌ ସମୀଚିନ ନୁହେଁ ବୋଲି ସେ କହିଛନ୍ତି । ଶସ୍ତା ରାଜନୀତି ଚକ୍କରରେ ଜଣେ ନେତ୍ରୀ ଏଭଳି ଭୂଲ ତଥ୍ୟ ରଖିଲେ । ହେଲେ ଏହାକୁ ନ୍ୟୁଜ୍ ଆକାରରେ ପୋଷ୍ଟ କରିବା କେତେ ଦୂର ଯୁକ୍ତିଯୁକ୍ତ । ଭାଇରାଲ୍ ଅଡିଓ ପ୍ରସାରଣକୁ ନେଇ ବିବାଦ ଥମି ନଥିବା ବେଳେ ଏଥର ବିଜେପି ନେତ୍ରୀ ଓ ସଂପୃକ୍ତ ଗଣମାଧ୍ୟମ ପୁଣି ଥରେ ବିବାଦ ଭିତରକୁ ଆସିଛନ୍ତି ।

କଟକ: କଟକ ଜିଲ୍ଲାରେ କମୁଛି ପଜିଟିଭଙ୍କ ସଂଖ୍ୟା । ବଡିଛି ଟେଷ୍ଟିଂ, ଜିଲ୍ଲାରେ ୬୬ ପ୍ରତିଶତରୁ ୭୨ ପ୍ରତିଶତକୁ ବୃଦ୍ଧି ପାଇଛି ଟେଷ୍ଟିଂ । ଏପର୍ଯ୍ୟନ୍ତ ୫୪ ହଜାର ୮୮୪ ନମୁନା ସଂଗ୍ରହ କରାଯାଇ ଥିବା କଟକ ଜିଲ୍ଲା ପ୍ରଶାସନ ପକ୍ଷରୁ ସୂଚନା ଦିଆ ଯାଇଛି । ସମସ୍ତ ନମୁନାରୁ ମଧ୍ୟରୁ ୩୭୪୭ ଜଣ ପଜିଟିଭ ଚିହ୍ନଟ ହୋଇଛନ୍ତି । ଏଥିରୁ ୪୯ ପ୍ରତିଶତ ସହରାଞ୍ଚଳର ସଂକ୍ରମିତ ଅଛନ୍ତି । ସମସ୍ତ ସଂକ୍ରମିତଙ୍କ ଚିକତ୍ସା ପାଇଁ ଜିଲ୍ଲାରେ ୧୨୩୦ଟି ବେଡ୍ ବିଶିଷ୍ଠ ୮ଟି କୋଭିଡ କେୟାର ସେଣ୍ଟର ପସ୍ତୁତ ରହିଛି ।

ତେବେ କରୋନା ପଜିଟିଭ୍ ପରେ କୌଣସି ଲକ୍ଷଣ ନଥିବା ବ୍ୟକ୍ତିଙ୍କୁ ହୋମ କ୍ୱାରେଣ୍ଟାଇନ ପାଇଁ ପରାମର୍ଶ ଦିଆଯାଉଥିବା ସିଏମସି ପକ୍ଷରୁ ସୂଚନା ଦିଆଯାଇଛି । ଏ ସପ୍ତାହରେ ୨୨୩ ଜଣ ହୋମ କ୍ୱାରେଣ୍ଟାଇନରେ ରହିଛନ୍ତି । ପ୍ଲାଜମା ଥେରାପୀ ଯୁଗାନ୍ତକାରୀ ଚିକିତ୍ସା ପଦ୍ଧତିରେ ପରିଣତ ହୋଇଛି । ଏବେ ସୁଦ୍ଧା ଜିଲ୍ଲାରେ ୧୧୨ ଜଣଙ୍କଠାରୁ ୨୨୪ ୟୁନିଟ ପ୍ଲାଜମା ସଂଗ୍ରହ କରାଯାଇଛି । ଅଧିକରୁ ଅଧିକ ପ୍ଲାଜମା ସଂଗ୍ରହ ପାଇଁ ଲୋକଙ୍କୁ ସେଚତନ କରାଯାଉଛି ।

ସେପଟେ ୩୩୨ ଜଣ କୋଭିଡ ଯୋଦ୍ଧାଙ୍କ ମଧ୍ୟରୁ ୩୪ ଜଣ ଚିକିତ୍ସାଧୀନ ଅଛନ୍ତି । ଜିଲ୍ଲାରେ ପଜିଟିଭଙ୍କ ମଧ୍ୟରୁ ୧୦୨୦ ଜଣ ଚିକିତ୍ସାଧୀନ ଅଛନ୍ତି । ତବେ କଟକରେ କରୋନା ସୁସ୍ଥତାହାର ୭୨ ପ୍ରତିଶତ ରହିଥିବା ସୂଚନା ଦେଇଛନ୍ତି ଜିଲ୍ଲାପାଳ ଭବାନୀ ଶଙ୍କର ଚୟନୀ । ଅନ୍ୟପଟେ ଯୁଗାନ୍ତକାରୀ ଚିକତ୍ସା ସେବା ପ୍ରଦାନ କରିଥିବାରୁ ୩୯ କୋଭିଡ ଯୋଦ୍ଧାଙ୍କୁ କଟକରେ ସମ୍ମାନିତ କରାଯାଇଥିବା ମଧ୍ୟ ସୂଚନା ଦେଇଛନ୍ତି ଜିଲ୍ଲାପାଳ ।