ନୂଆଦିଲ୍ଲୀ: ଭାରତ ଓ ଚୀନ୍ ସୀମାରେ ଦୀର୍ଘ ଦିନ ହେବ ଉତ୍ତେଜନା ପରିସ୍ଥିତି, ସମସ୍ତଙ୍କ ମୁଣ୍ଡ ବିନ୍ଧାର କାରଣ ପାଲଟିଥିବା ବେଳେ ଏବେ ଆଉ ଏକ ଚର୍ଚ୍ଚା ସମସ୍ତଙ୍କୁ ଚକିତ କରିଛି । ଭାରତୀୟ ସେନାରୁ ମିଳିଥିବା ଭିତିରି ରିପୋର୍ଟ ଅନୁଯାୟୀ ଗତ ୬ ବର୍ଷ ମଧ୍ୟରେ ଯେତିକି ଟଙ୍କାର ଖରାପ ଗୋଳାବାରୁଦ କଣାଯାଇଛି, ସେହି ଟଙ୍କାରେ ୧୦୦ ଆର୍ଟଲିରି ଗନ୍ ଭଳି ତୋପ କିଣାଯାଇ ପାରିଥାନ୍ତା । ଏହି ରିପୋର୍ଟ ଏବେ ଭାରତୀୟ ପ୍ରତିରକ୍ଷା ମନ୍ତ୍ରାଳୟକୁ ଦିଆଯାଇଛି ।
ଗତ ୨୦୧୪ ରୁ ୨୦୨୦ ମଧ୍ୟରେ କିଣାଯାଇଥିବା ଲୋ’କ୍ୱାଲିଟି ଗୋଳାବାରୁଦର ଦାମ୍ ୯୬୦ କୋଟି ହେବ ବୋଲି ଜଣାପଡ଼ିଛି । ତେବେ ଏହି ମୂଲ୍ୟରେ ସେନା ପାଇଁ 150-MM ମିଡିୟମ ଆର୍ଟିଲିରି ବନ୍ଧୁକ କିଣାଯାଇ ପାରିଥାନ୍ତା ।
ସୂଚନାଯୋଗ୍ୟ ଯେ, ପ୍ରତିରକ୍ଷା ମନ୍ତ୍ରଣାଳୟ ଅଧୀନରେ ଅର୍ଡିନାନ୍ସ ଫ୍ୟାକ୍ଟ୍ରି ବୋର୍ଡ (OFB) ପରିଚାଳିତ ହୋଇଥାଏ । ଏହା ବିଶ୍ୱର ସର୍ବ ପୁରାତନ ସରକାରୀ ଅର୍ଡିନାନ୍ସ ଉତ୍ପାଦନ ୟୁନିଟ୍ ମଧ୍ୟରୁ ଅନ୍ୟତମ । ଏହା ଅଧୀନରେ ସେନା ପାଇଁ ଗୁଳିଗୋଳା ପ୍ରସ୍ତୁତ କରାଯାଇଥାଏ । ଯାହାକୁ ନେଇ ସେନା ସମାଲୋଚନା କରିଛି । ତ୍ରୁଟିପୂର୍ଣ୍ଣ ଉତ୍ପାଦ ମଧ୍ୟରେ 23-MM ଏୟାର୍ ଡିଫେନ୍ସ ସେଲ, ଆର୍ଟିଲିରି ସେଲ୍, 125 MM ଟ୍ୟାଙ୍କ ରାଉଣ୍ଡ ସମେତ ବିଭିନ୍ନ କ୍ୟାଲିବରର ବୁଲେଟ୍ ସାମିଲ ରହିଛି ।
ସେନା ରିପୋର୍ଟରେ ଦର୍ଶାଯାଇଛି ଯେ, ଏହି ଖରାପ କ୍ୱାଲିଟିର ଗୋଳାବାରୁଦ ପାଇଁ କେବଳ ଟଙ୍କା ନଷ୍ଟ ହୋଇନାହିଁ ବରଂ ଅନେକ ସମୟରେ ଜୀବନ ମଧ୍ୟ ହାନୀ ହୋଇଛି ।
ଏହି ଆଭ୍ୟନ୍ତରୀଣ ରିପୋର୍ଟରେ ଦର୍ଶାଯାଇଛି ଯେ, ୨୦୧୪ ପରଠାରୁ ଆସିଥିବା ଖରାପ କ୍ୱାଲିଟିର ଗୋଳାବାରୁଦ ଯୋଗୁଁ ୪୦୩ ଅଘଟଣ ଘଟିଛି । ଯଦିଓ ପରବର୍ତ୍ତୀ ସମୟରେ ଏହା ହ୍ରାସ ପାଇଛି, କିନ୍ତୁ ଏହା ଚିନ୍ତାର ବିଷୟ ନିଶ୍ଚୟ । ତେବେ ୨୦୧୪ ରେ ୧୧୪ ଅଘଟଣ ଘଟିଥିବା ବେଳେ ୨୦୧୭ରେ ୫୩, ୨୦୧୮ ରେ ୭୮, ୨୦୧୯ରେ ୧୬ ଅଘଟଣ ଘଟିଥିବା ରିପୋର୍ଟରୁ ସୂଚନା ମିଳିଛି ।
ଏହି ଘଟଣାରେ ପ୍ରାୟ ୨୭ ସୈନିକଙ୍କର ମୃତ୍ୟୁ ହୋଇଥିବା ବେଳେ ପ୍ରାୟ ୧୫୯ ସୈନିକ ଆହତ ହୋଇଛନ୍ତି । ଚଳିତ ବର୍ଷ ଏବେ ସୁଦ୍ଧା ୧୩ଟି ଅଘଟଣ ଘଟିଛି । ହେଲେ କୌଣସି ଜୀବନ ହାନି ହୋଇନାହିଁ । ଏହି ୯୬୦ କୋଟି ଟଙ୍କା ମଧ୍ୟରୁ ୬୫୮ କୋଟି ଟଙ୍କା ୨୦୧୪ରୁ ୨୦୧୯ ମଧ୍ୟରେ ସେଲ୍ଫରେ ଖର୍ଚ୍ଚ ହୋଇଛି । ଏହାବାଦ୍ ବଳକା ୩୦୩ କୋଟି ଟଙ୍କା ମୂଲ୍ୟର ମାଇନ୍ସ, ମହାରାଷ୍ଟ୍ର ଅଗ୍ନିକାଣ୍ଡରେ ଶେଷ ହୋଇଛି । ଗତ ଦୁଇ ବର୍ଷ ମଧ୍ୟରେ ବେସରକାରୀ କ୍ଷେତ୍ରଗୁଡ଼ିକୁ ସେନା ପକ୍ଷରୁ ଆମନ୍ତ୍ରଣ କରାଯାଉଛି । ଯାହାଦ୍ୱାରା ସେମାନେ ସେନା ପାଇଁ ଅସ୍ତ୍ରଶସ୍ତ୍ର ଯୋଗାଣ ଜାରି ରଖିବେ । ତେବେ ଏଥିପାଇଁ ଅନେକ ଜୋର ଦେବାକୁ ହେବ ବୋଳି କୁହାଯାଉଛି ।
