ପୁରୀ: ନରେନ୍ଦ୍ର ପୁଷ୍କରଣୀ ପ୍ରଦୂଷଣ ନେଇ ହେବ ତଦନ୍ତ । ଏଥିପାଇଁ ଶ୍ରୀମନ୍ଦିର ଉନ୍ନୟନ ପ୍ରଶାସକଙ୍କ ଅଧ୍ୟକ୍ଷତାରେ ଏକ ଟିମ ଗଠନ କରାଯାଇଛି । ଏହାକୁ ସଫା କରାଯିବା ସହ ଏହାର ରକ୍ଷଣାବେକ୍ଷଣ ଉପରେ ଧ୍ୟାନ ଦେବାକୁ ନିର୍ଦ୍ଦେଶ ଦିଆଯାଇଛି । ଏହି ପବିତ୍ର ତୀର୍ଥ ପୁଷ୍କରିଣୀ ଏବେ ପ୍ରଦୂଷିତ ହୋଇଛି । ସହରର ନଳା ପାଣି ପଶିବାଦ୍ୱାରା ଏହାର ଜଳ ବିଷାକ୍ତ ହୋଇଛି । ପରିବେଶ ଅପରିଷ୍କାର ରହିବା ସହ ପୁଷ୍କରିଣୀରେ ମାଛ ମଡକ ଦେଖାଦେଇଛି । ତେଣୁ ଏହାର ପୂନଋଦ୍ଧାର ପାଇଁ ବିଭିନ୍ନ ମହଲରୁ ଦାବି ହୋଇଛି । ନରେନ୍ଦ୍ର ପୁଷ୍କରିଣୀର ହେବ ପୂନଋଦ୍ଧାର । ଅନୁଧ୍ୟାନ କରିବା ପାଇଁ ଟିମ୍ ଗଠିତ । ସଫା ସହ ରକ୍ଷଣାବେକ୍ଷଣ ନେଇ ହେବ ଅନୁଧ୍ୟାନ । କାହିଁକି ଦୂଷିତ ହେଉଛି ତଦନ୍ତ କରିବ ଟିମ୍ । ଶ୍ରୀମନ୍ଦିର ନୀତିକାନ୍ତି ସହ ଜଡିତ ପୁରୀର ନରେନ୍ଦ୍ର ତୀର୍ଥ ପୂଷ୍କରିଣୀ । ତେବେ ରକ୍ଷଣାବେକ୍ଷଣ ଅଭାବରୁ ଏହାର ଜଳ ହେବେ ବିଷାକ୍ତ ହୋଇଛି । ନଳା ପାଣି ମିଶିବା ଦ୍ୱାରା ପାଣିର ରଙ୍ଗ ବଦଳିଯାଇଛି । ସ୍ନାନ କଲେ ଦେହ କୁଣ୍ଡାଇ ହେବା ସହ ଏଥିରେ ଥିବା ମାଛ ମରି ଯାଉଛନ୍ତି । ଦୂଷିତ ପରିବେଶ ସାଙ୍ଗକୁ ମାଛ ମଡକ ହେବାରୁ ଅଞ୍ଚଳ ଦୁର୍ଗନ୍ଧମୟ ହୋଇଛି । ଯାହାକୁ ନେଇ ଅଞ୍ଚଳରେ କ୍ଷୋଭ ପ୍ରକାଶ ପାଇଛି । ଅଭିଯୋଗ ଆସିବାପରେ ଶ୍ରୀମନ୍ଦିର ଉନ୍ନୟନ ପ୍ରଶାସକଙ୍କ ଅଧକ୍ଷତାରେ ଏକ ଟିମ ଏହାର ତଦନ୍ତ କରିଛି । ତେବେ ଏଠାରେ 24 ଘଣ୍ଟିଆ ସିକ୍ୟୁରିଟି ବ୍ୟବସ୍ଥା କରିବା ସମ୍ଭବ ନୁହେଁ, ବରଂ ଖୁବଶିଘ୍ର ଏହାକୁ ସଫା କରାଯିବା ସହ ରକ୍ଷଣାବେକ୍ଷଣ ପାଇଁ ଉନ୍ନୟନ ପ୍ରଶାସକ ସୂଚନା ଦେଇଛନ୍ତି । କରୋନା କଟକଣା ପରେ ଦେଶ ବିଦେଶରୁ ପୁଣି ପର୍ଯ୍ୟଟକଙ୍କ ଏଠାକୁ ସୂଅ ଛୁଟିବ । ତେଣୁ ଏହାର ପୂନଋଦ୍ଧାର ତୁରନ୍ତ ହେବା ଆବଶ୍ୟକ ହୋଇପଡିଛି ।
ଲଘୁଚାପ ପ୍ରଭାବରେ ରାଜ୍ୟରେ ବର୍ଷା ଜାରି: ୭ ଜିଲ୍ଲାକୁ ରେଡ ଓ୍ୱାର୍ଣ୍ଣିଂ
ଭୁବନେଶ୍ୱର: ଉତ୍ତରପୂର୍ବ ବଙ୍ଗୋପସାଗରରେ ସୃଷ୍ଟ ଲଘୁଚାପ ପ୍ରଭାବରେ ରାଜ୍ୟରେ ଜାରି ରହିଛି ପ୍ରବଳ ବର୍ଷା । ଏ ନେଇ ୭ଟି ଜିଲ୍ଲାକୁ ରେଡ ୱାର୍ଣ୍ଣିଂ ଜାରି କରିଛି ପାଣିପାଗ ବିଭାଗ । ପ୍ରଭାବରେ ବରଗଡ଼, ନୂଆପଡ଼ା, ବଲାଙ୍ଗୀର, କଳାହାଣ୍ଡି, ସମ୍ବଲପୁର, ଝାରସୁଗୁଡ଼ା ଓ ଦେବଗଡ଼ରେ ଅତି ପ୍ରବଳ ବର୍ଷା ହୋଇପାରେ । ସେହିପରି ଅରେଞ୍ଜ ୱାର୍ଣ୍ଣିଂରେ ଅଛନ୍ତି ୫ ଜିଲ୍ଲା । ସୋନପୁର, ବୌଦ୍ଧ, ଅନୁଗୁଳ, ସୁନ୍ଦରଗଡ଼ ଓ କେନ୍ଦୁଝରରେ ପ୍ରବଳରୁ ଅତି ପ୍ରବଳ ବର୍ଷା ହୋଇପାରେ । ସେହିପରି ୨୨ ତାରିଖରେ ପୁରୀ, ଖୋର୍ଦ୍ଧା, ସୁନ୍ଦରଗଡ, ଝାରସୁଗଡା, ବରଗଡ, କୋରାପୁଟ ଓ ମାଲକନାଗିରିରେ ଅତିପ୍ରବଳ ବର୍ଷା ହେବାର ସମ୍ଭାବନା ରହିଛି । ସମୁଦ୍ର ଅଶାନ୍ତ ଥିବାରୁ ମତ୍ସ୍ୟଜୀବୀଙ୍କୁ ସତର୍କତା ଜାରି କରିଛି ପାଣିାପାଗ ବିଭାଗ ।
କୋଭିଡ ସହ ଯୁଝୁଛି କମିଶନରେଟ୍ ପୋଲିସ: ୧୧ଶହ ପୋଲିସ କର୍ମଚାରୀ ଏବେ କରୋନା କବଳିତ
ଏଲଏସି ବିବାଦ ମଧ୍ୟରେ ଆଜି ଭାରତ ଓ ଚୀନ୍ ମଧ୍ୟରେ କମାଣ୍ଡରସ୍ତରୀୟ ଆଲୋଚନା
ନୂଆଦିଲ୍ଲୀ: ଏଲଏସିରେ ଉତ୍ତେଜନା ହ୍ରାସ ନେଇ ଭାରତ-ଚୀନ୍ ମଧ୍ୟରେ କୋର କମାଣ୍ଡରସ୍ତରୀୟ ଆଲୋଚନା । ପୂର୍ବ ଲଦାଖ ସୀମା ମୋଲଡୋରେ ବୈଠକ ବସୁଛି । ଦୁଇ ଦେଶ ମଧ୍ୟରେ କମାଣ୍ଡରସ୍ତରୀୟ ଆଲୋଚନାରେ ପ୍ରଥମ ଥର ପାଇଁ ବିଦେଶ ମନ୍ତ୍ରାଳୟର ବରିଷ୍ଠ ଅଧିକାରୀ ନବୀନ ଶ୍ରୀବାସ୍ତବ ଯୋଗ ଦେଉଛନ୍ତି ।
ଅଗଷ୍ଟ ୨ ପରେ ବରିଷ୍ଠ କମାଣ୍ଡର ଲେଫ୍ଟେନେଣ୍ଟ ଜେନରଲ ହରିନ୍ଦର ସିଂହ ଓ ତାଙ୍କ ଚୀନ୍ ପ୍ରତିପକ୍ଷ ମେଜର ଜେନେରାଲ ଲିୟୁ ଲିନ୍ଙ୍କ ମଧ୍ୟରେ ଏହା ପ୍ରଥମ ବୈଠକ । ନିଜ ମାଟିରୁ ଇଞ୍ଚେ ବି ପଛକୁ ହଟିବ ନାହିଁ ବୋଲି ଭାରତ ସ୍ପଷ୍ଟ କରିଛି । ଆଜିର ବୈଠକରେ ଫୋକସ୍ରେ ରହିଛି ପେଙ୍ଗୋଙ୍ଗ ଓ ଦେପସାଙ୍ଗ ଅଞ୍ଚଳ ।
ଗଲୱାନ୍ ପରି ସେଠାରୁ ମଧ୍ୟ ସେନା ଅପସାରଣ ଉପରେ ଗୁରୁତ୍ୱ ଦେବ ଭାରତ । ବୈଦେଶିକ ବ୍ୟାପାର ମନ୍ତ୍ରୀ ଓ ପ୍ରତିରକ୍ଷା ମନ୍ତ୍ରୀଙ୍କ ବୈଠକରେ ହୋଇଥିବା ନିଷ୍ପତ୍ତିର ଅନୁପାଳନ ନେଇ ଦାବି ରଖାଯିବ । ମସ୍କୋରେ ବିଦେଶ ମନ୍ତ୍ରୀ ଏସ. ଜୟଶଙ୍କର ଓ ତାଙ୍କ ଚୀନ୍ ପ୍ରତିପକ୍ଷ ୱାଙ୍ଗ ୱିଙ୍କ ମଧ୍ୟରେ ସୀମା ବିବାଦ ନେଇ ଆଲୋଚନା ହୋଇଥିଲା । ଏହାପରେ ଦୁଇ ଦେଶ ମଧ୍ୟରେ ପଞ୍ଚସୂତ୍ରୀ ସହମତି ହୋଇଥିଲା । ଏହାପରେ ଆଜି ପ୍ରଥମ ବୈଠକ ବସୁଛି ।
ଆଜିଠୁ ୨ ଦିନ ପାଇଁ ହାଇକୋର୍ଟ ବନ୍ଦ
କଟକ: ଆଜିଠୁ ଦୁଇ ଦିନ ପାଇଁ ବନ୍ଦ ରହିବ ହାଇକୋର୍ଟ । ଆଜି ଓ ଆସନ୍ତାକାଲି ୨ ଦିନ ଧରି କୋର୍ଟର ସମସ୍ତ କାର୍ଯ୍ୟାଳୟ ସାନିଟାଇଜ ହେବ । ଏଥିପାଇଁ ହାଇକୋର୍ଟ ବନ୍ଦ ରଖିବା ପାଇଁ ନିଷ୍ପତ୍ତି ନିଆଯାଇଛି। ଏନେଇ ହାଇକୋର୍ଟ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି। ୨୧ତାରିଖର ସମସ୍ତ ମାମଲା ୨୩ ତାରିଖକୁ ଘୁଞ୍ଚାଇ ଦିଆଯାଇଛି । ରାଜ୍ୟରେ ବଢିବାରେ ଲାଗିଛି କରୋନା ସଂକ୍ରମିତଙ୍କ ସଂଖ୍ୟା , କୋର୍ଟ କାର୍ଯ୍ୟ ଆରମ୍ଭ ହୋଇଥିବାରୁ ଏହାକୁ ନଜରରେ ରଖି ଏଭଳି ନିଷ୍ପତ୍ତି ନେଇଛି ହାଇକୋର୍ଟ କାର୍ଯ୍ୟାଳୟ ।
ବ୍ୟର୍ଥ ଗଲା ମୟଙ୍କ ଅଗ୍ରୱାଲଙ୍କ ୮୯ ରନ, ସୁପର ଓଭରରେ ଦିଲ୍ଲୀ ଏମିତି ମାରିଲା ବାଜି
ଦୁବାଇ: ଆଇପିଏଲ୍ ୧୩ର ଦ୍ୱିତୀୟ ମ୍ୟାଚ୍କୁ ସୁପର ଓଭରରେ ବାଜି ମାରିନେଇଛି ଦିଲ୍ଲୀ । ଦିଲ୍ଲୀ କ୍ୟାପିଟାଲ୍ସ ଏବଂ କିଙ୍ଗ୍ସ ଇଲେଭେନ୍ ପଞ୍ଜାବ ମଧ୍ୟରେ ଦ୍ୱିତୀୟ ମ୍ୟାଚ୍ ଖେଳାଯାଇଥିଲା । ଟସ୍ ଜିତି ପଞ୍ଜାବ ପ୍ରଥମେ ବ୍ୟାଟିଂ ପାଇଁ ଦିଲ୍ଲୀକୁ ଆମନ୍ତ୍ରଣ କରିଥିଲା । ଉଭୟ ଦଳ ନିର୍ଦ୍ଧାରିତ ଓଭରରେ ୧୫୭ କରିଥିଲେ । ମ୍ୟାଚ୍ ଟାଇ ରହିବା ପରେ ସୁପର ଓଭର ଖେଳାଯାଇଥିଲା । ସୁପର ଓଭରରେ ପ୍ରଥମେ ପଞ୍ଜାବ ବ୍ୟାଟିଂ କରିଥିଲା । ପଞ୍ଜାବ ୨ ୱିକେଟ୍ ବିନିମୟରେ ମାତ୍ର ୨ ରନ୍ କରିପାରିଥିଲା । ମାତ୍ର ୩ ରନର ବିଜୟ ଲକ୍ଷ ଦିଲ୍ଲୀ ପାଇଁ ସହଜ ହୋଇଯାଇଥିଲା । ମାର୍କସ୍ ଷ୍ଟୋଇନିସ୍ ମ୍ୟାଚ୍ର ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ। ଦିଲ୍ଲୀ ପକ୍ଷରୁ ମାର୍କସ ଷ୍ଟୋଇନସ୍ ସର୍ବାଧିକ ୫୩ ରନ୍ କରିଥିଲାବେଳେ ପଞ୍ଜାବ ପକ୍ଷରୁ ମୟଙ୍କ ଅଗ୍ରୱାଲ୍ ୮୯ରନ୍ କରିଛନ୍ତି ।
ଦିଲ୍ଲୀ କ୍ୟାପିଟାଲ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ୮ ୱିକେଟ ହରାଇ ୧୫୭ ରନ କରିଥିଲା । ପଞ୍ଜାବ ଟିମକୁ ଲକ୍ଷ ମିଳିଥିବା ୧୫୮ ରନ୍ । କିନ୍ତୁ ପଞ୍ଜାବ ଟିମ୍ ୨୦ ଓଭରରେ ୮ ୱିକେଟ ହରାଇ ୧୫୭ ରନ୍ କରିପାରିଥିଲା ଏବଂ ସୁପର ଓଭରରେ କିଙ୍ଗସ୍ ଇଲେଭେନ ପଞ୍ଜାବ ମାତ୍ର ୨ ରନ କରିପାରିଥିଲା । ଏହା ପରେ ଦିଲ୍ଲୀ ଟିମ୍ ସୁପର ଓଭରରେ ୩ ରନ କରି ମ୍ୟାଚକୁ ହାତେଇ ଥିଲା । ମୟଙ୍କ ଅଗ୍ରୱାଲ ୬୦ ବଲରେ ୭ଟି ଚଉକା ଏବଂ ୪ଟି ଛକ୍କା ମାରିଥିଲେ । ଦିଲ୍ଲୀ ପାଇଁ କୈଗିସୋ ରବାଡା, ରବିଚନ୍ଦ୍ରନ ଅଶ୍ୱିନ ଏବଂ ମର୍କସ ଷ୍ଟୋଇନିସ ୨-୨ଟି ୱିକେଟ ନେଇଥିଲେ । ଅନ୍ୟପଟେ ମୋହିତ ଶର୍ମା ଏବଂ ଅକ୍ଷୟ ପଟେଲ ଗୋଟିଏ ଲେଖାଏଁ ୱିକେଟ ନେଇଥିଲେ ।
ପ୍ରଥମେ ଦିଲ୍ଲୀ କ୍ୟାପିଟାଲର ଅଲରାଉଣ୍ଡର ପ୍ଲେୟର ମାର୍କସ ଷ୍ଟୋଇନିସଙ୍କ ଜବରଦସ୍ତ ବ୍ୟାଟିଂରେ କିଙ୍ଗସ୍ ଇଲେଭେନ ପଞ୍ଜାବ ବିପକ୍ଷରେ ୮ ୱିକେଟରେ ୧୫୭ ସ୍କୋର କରିଥିଲା । ଦିଲ୍ଲୀ କ୍ୟାପିଟାଲ ଶେଷ ୩ ଓଭରରେ ୫୭ ରନ କରିବାରେ ସଫଳ ହୋଇଥିଲା । ଏଥିରେ ଷ୍ଟୋଇନିସଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଥିଲା । ସେ ୨୧ ବଲରେ କରିଥିଲେ ୫୩ ରନ୍, ଯେଉଁଥିରେ ସାମିଲ ଥିଲା ୭ଟି ଚଉକା ଏବଂ ୩ଟି ଛକ୍କା ।
ପାୱର ପ୍ଲେରେ ଦିଲ୍ଲୀ କ୍ୟାପିଟାଲ ୩ ୱିକେଟରେ ୨୩ ରନ କରିପାରିଥିଲା । ପନ୍ଥ ଏବଂ ଐୟର ୧୦ ଓଭର ଯାଏଁ ମାତ୍ର ୪୯ ରନ କରିପାରିଥିଲେ । ଏଥିରେ ଗୌତମ ଉପରେ ଐୟରଙ୍କର ଦର୍ଶନୀୟ ଛକ୍କା ମଧ୍ୟ ଶାମିଲ ରହିଛି । ପରବର୍ତ୍ତୀ ସମୟରେ ଏହି ବୋଲର ବିପକ୍ଷରେ ଲଗାତାର ଦୁଇଟି ଛକ୍କା ମାରି ରନର ଗତି ବଢ଼ାଇଥିଲେ । କିନ୍ତୁ ମାତ୍ର ୩ ବଲରେ ଏହି ଦୁଇଜଣ ବ୍ୟାଟସମ୍ୟାନଙ୍କ ଆଉଟ ହେଇଯିବା ଦିଲ୍ଲୀକୁ ପୁଣି ଥରେ ଗେମକୁ ଫେରାଇଦେଇଥିଲା ।
ବିଶନୋଇ ପନ୍ଥଙ୍କୁ ଗୁଗଲିରେ ବୋଲ୍ଡ କରିଥିଲେ । ଏହାପରେ ଶାମୀ ନିଜର ଶେଷ ଓଭରରେ ବୋଲିଂ କରିବା ପାଇଁ ଆସିଲେ ଏବଂ ଆସିବା ମାତ୍ରେ ଐୟରଙ୍କୁ ମିଡୱିକେଟରେ କ୍ୟାଚ ଦେବା ପାଇଁ ବାଧ୍ୟ କରିଦେଇଥିଲେ । ତେବେ ଦିଲ୍ଲୀର ସ୍କୋର ତିନି ଅଙ୍କ ବିଶିଷ୍ଟ ସଂଖ୍ୟାରେ ପହଁଞ୍ଚି ସାରିଥିଲା । କିନ୍ତୁ ତା ପରେ ଷ୍ଟୋଇନିସ ପୁରା ମ୍ୟାଚ ବଦଳାଇ ଦେଲେ ।
ଏହା ପୂର୍ବରୁ କ୍ୟାପଟେନ ଶ୍ରେୟସ ଐୟର (୩୨ ବଲରେ ୩୯, ୩ ଛକ୍କା) ଏବଂ ଋଷଭ ପନ୍ଥ (୨୯ ବଲରେ ୩୧, ୪ ଚଉକା) ୪ ୱିକେଟ ସହ ୭୩ ରନ କରିଥିଲେ । ଶାମୀ ୧୫ ରନ ଦେଇ ୪ ୱିକେଟ ହାସଲ କରିଥିଲେ । ଅନ୍ୟପଟେ ଆଇପିଏଲରେ ନୂଆ କରି ପାଦ ଦେଇଥିବା ଲେଗ ସ୍ପିନର ରବି ବିଶୋନୋଇ ମଧ୍ୟ ନିଜର ପ୍ରଭାବ ଛାଡ଼ିଛନ୍ତି ଏବଂ ୨୨ ରନ ଦେଇ ଗୋଟେ ୱିକେଟ ନେଇଛନ୍ତି ।
କୋଭିଡ ସହ ଯୁଝୁଛି କମିଶନରେଟ୍ ପୋଲିସ: ୧୧ଶହ ପୋଲିସ କର୍ମଚାରୀ ଏବେ କରୋନା କବଳିତ
ଭୁବନେଶ୍ୱର: ବଢୁଛି ଅପରାଧ, ବିଗୁଡୁଛି ଆଇନଶୃଙ୍ଖଳା । କ୍ରାଇମ କଣ୍ଟ୍ରୋଲ ଦାୟିତ୍ୱରେ ଥିବା କରୋନା ଯୋଦ୍ଧା ଏବେ କୋଭିଡ ସଂକ୍ରମିତ । କମିଶନରେଟ ପୋଲିସର ୧୧ ଶହ ପୋଲିସ କର୍ମଚାରୀ କରୋନାରେ ସଂକ୍ରମିତ ହେବା ପରେ ଟୁଇନ ସିଟିରେ କୋଭିଡ ଏନଫୋର୍ସମେଣ୍ଟ ପାଇଁ ଏବେ ମୁଣ୍ଡବିନ୍ଧାର କାରଣ ପାଲଟିଛି ।
କରୋନା କବଳରେ କରୋନା ଯୋଦ୍ଧା । କୋଭିଡ ସହ ଯୁଝୁଛି କମିଶନରେଟ୍ ପୋଲିସ୍ । ୧୧ ଶହ ଆକ୍ରାନ୍ତ, ୪ ମୃତ । ମାନବ ସମ୍ବଳ ଅଭାବରୁ ବିପର୍ଯ୍ୟସ୍ତ ଆଇନଶୃଙ୍ଖଳା । ଟୁଇନ ସିଟିରେ କେଉଁଠି ଆଇଆଇସି ନାହାନ୍ତି ତ ଆଉ କେଉଁଠି ଥାନାବାବୁଙ୍କୁ ଛାଡି ସମସ୍ତେ କରୋନା ପଜିଟିଭ । ଭୁବନେଶ୍ୱରର ୮ ଥାନଧିକାରୀ କରୋନା ସଂକ୍ରମିତ ହୋଇ ମେଡିକାଲରେ ଚିକିତ୍ସାଧୀନ ଅଛନ୍ତି । ଜୋନ ୧, ଜୋନ ୩ ଓ ଜୋନ ୪ ଏସିପିଙ୍କ ସହ ଅତିରିକ୍ତ ଡିସିପି ବି କରୋନା ସଂକ୍ରମିତ । ମହାମାରୀ ଯୋଗୁଁ ରାଜ୍ୟରେ ୩୩ ପୋଲିସ କର୍ମଚାରୀଙ୍କ ମୃତ୍ୟୁ ଘଟିଥିବା ବେଳେ କମିଶନରେଟ ପୋଲିସ ୪ ଦକ୍ଷ କର୍ମଚାରୀଙ୍କୁ ହରାଇଛି ।
ଟ୍ୱିନ୍ସିଟିର ସୁରକ୍ଷା ଦାୟିତ୍ୱରେ ଥିବା ୧୧ ଶହ ପୋଲିସ କର୍ମଚାରୀ ଏବେ କରୋନା କବଳିତ । ଏଭଳି କ୍ଷେତ୍ରରେ ଆଇନଶୃଙ୍ଖଳା ଏବେ ପୋଲିସ୍ ପାଇଁ ଚ୍ୟାଲେଞ୍ଜ ହୋଇଛି । ସେପଟେ ଥାନାରେ କର୍ମଚାରୀଙ୍କୁ ଥର୍ମାଲ ସ୍କ୍ରିନିଂ, କରୋନା କିଟ୍ ପ୍ରଦାନ ଓ ନିୟମିତ ସ୍ୱାସ୍ଥ୍ୟବସ୍ଥାର ଯାଞ୍ଚର କରିବା ପାଇଁ ପରାମର୍ଶ ଦେଇଛନ୍ତି ବରିଷ୍ଠ ଆଇନଜୀବୀ । ଟ୍ୱିନ୍ସିଟିରେ ପୋଲିସ ମହାନିର୍ଦ୍ଦେଶକଙ୍କୁ ପ୍ରତ୍ୟକ୍ଷ ଦୃଷ୍ଟି ଦେବା ସହ କୋଭିଡ ନିୟମ ଉଲଂଘନକାରୀଙ୍କ ବିରୋଧରେ କଠୋର ହେବାକୁ ନିର୍ଦ୍ଦେଶ ଦେଇଥିଲେ ମୁଖ୍ୟମନ୍ତ୍ରୀ । ପରିସ୍ଥିତିର ଫାଇଦା ନେଇ ସହରରେ ଲୁଟ ଓ ରାହାଜାନି ଏକ ପ୍ରକାର ବୃଦ୍ଧି ପାଇଛି । ତେଣୁ ଯେଉଁ ଜିଲ୍ଲାରେ କରୋନା ସ୍ଥିତି ଭଲ ଅଛି ସେଠାରୁ କିଛି ପୋଲିସଙ୍କୁ ଆଣିବା ସହ ଟ୍ରାଫିକ ଭଲ୍ୟୁଣ୍ଟର ନିୟୋଜିତ କଲେ ପରିସ୍ଥିତି ନିୟନ୍ତ୍ରଣ କୁ ଆସିପାରିବ ବୋଲି କହିଛନ୍ତି ଅବସରପ୍ରାପ୍ତ ପୋଲିସ ଅଧିକାରୀ । ଗତ ୬ ମାସ ଭିତରେ ପ୍ରାୟ ଦେଢ଼ ଲକ୍ଷ କୋଭିଡ ନିୟମ ଉଲଂଘନକାରୀଙ୍କ ଠାରୁ ୨ କୋଟିରୁ ଅଧିକ ଫାଇନ ଆଦାୟ ସାରିଲାଣି ପୋଲିସ୍ । ତଥାପି କିଛି ଅମାନିଆଙ୍କ ପାଇଁ ରାଜଧାନୀରେ ବୋଲ ମାନୁନି କରୋନା ।
ମହାରାଷ୍ଟ୍ରର ଭିୱଣ୍ଡୀ ସହରରେ ଭୁଶୁଡ଼ିଲା ୩ ମହଲା କୋଠା, ୮ ମୃତ
ମହାରାଷ୍ଟ୍ର: ମହାରାଷ୍ଟ୍ରର ଥାନେ ଜିଲ୍ଲାର ଭିୱଣ୍ଡୀ ସହରରେ ରବିବାର ବିଳମ୍ବିତ ରାତିରେ ଭୁଶୁଡ଼ିଗଲା ଏକ ତିନି ମହଲା କୋଠା । ଏଥିରେ ୮ଜଣଙ୍କ ମୃତ୍ୟୁ ହୋଇଥିବାବେଳେ ସ୍ଥାନୀୟ ଲୋକ ୫ଜଣଙ୍କୁ ଉଦ୍ଧାର କରିଛନ୍ତି । ଏବେବି ୨୦ରୁ ୨୫ ଜଣ ଭଙ୍ଗା କୋଠା ତଳେ ଫସି ରହିଥିବା ଆଶଙ୍କା କରାଯାଉଛି । ଏନଡିଆରଏଫ୍ ପକ୍ଷରୁ ଉଦ୍ଧାର କାର୍ଯ୍ୟ କରାଯାଉଛି । ଗତକାଲି ବିଳମ୍ବିତ ରାତିରେ କୋଠାଟି ଭୁଶୁଡ଼ି ପଡ଼ିଥିଲା । ଭିୱଣ୍ଡୀର ପଟେଲ୍ କମ୍ପାଉଣ୍ଡରେ ଘଟିଛି ଏହି ଅଘଟଣ । ସ୍ଥାନୀୟ ଲୋକଙ୍କ କହିବା ଅନୁଯାୟୀ ୧୯୮୪ ମସିହାରେ ନିର୍ମିତ ଏହି ଆପାର୍ଟମେଣ୍ଟର ୬୯ ନଂ ବିଲଡିଂର ଅଧା ଅଂଶ ଭାଙ୍ଗି ଭୁଶିଡ଼ି ପଡ଼ିଥିଲା ।
#WATCH Maharashtra: A team of NDRF rescued a child from under the debris at the site of building collapse in Bhiwandi, Thane.
At least five people have lost their lives in the incident which took place earlier today. pic.twitter.com/6j90p1GloQ
— ANI (@ANI) September 21, 2020
ସୂଚନା ଅନୁଯାୟୀ ଭୁଶୁଡିଥିବା ଏହି ୩ ମହଲା କୋଠାରେ ମୋଟ ୨୧ଟି ଫ୍ଲାଟ ରହିଛି । ବିଳମ୍ବିତ ରାତିରେ ସମସ୍ତେ ଶୋଇଥିବା ସମୟରେ ହଠାତ ରାତି ୩ଟା ୨୦ ମିନିଟରେ ବିଲଡିଂଟି ଭୁଶୁଡ଼ି ପଡ଼ିଥିଲା । ପ୍ରଥମେ ସ୍ଥାନୀୟ ଲୋକ ଏବଂ ପରବର୍ତ୍ତୀ ସମୟରେ ଏନଡିଆରଏଫ ଟିମ ଆସି ଉଦ୍ଧାର କାର୍ଯ୍ୟ ଆରମ୍ଭ କରିଛନ୍ତି ।
ମିଳିଥିବା ତାଜା ସୂଚନା ଅନୁଯାୟୀ ଭୁଶୁଡ଼ିଥିବା କୋଠା ଭିତରୁ ବର୍ତ୍ତମାନ ଯାଏଁ ୮ ଜଣଙ୍କର ମୃତ ଦେହ ଉଦ୍ଧାର କରାଯାଇଛି । ଅନ୍ୟପଟେ ଉଦ୍ଧାର କାର୍ଯ୍ୟବେଳେ ୫ ଜଣ ଜୀବିତ ଲୋକଙ୍କୁ ସୁରକ୍ଷିତ ରୂପରେ ଉଦ୍ଧାର କରାଯାଇଛି । ଏବେବି ଅନେକ ଲୋକ କୋଠା ତଳେ ଫସି ରହିଥିବା ସୂଚନା ରହିଛି ।
ଆଜିଠୁ ଯୁକ୍ତ ୨ ନାମଲେଖା: ସେପ୍ଟେମ୍ୱର ୨୬ ଯାଏଁ ଜାରି ରହିବ
ଭୁବନେଶ୍ୱର: ଆଜିଠୁ ଯୁକ୍ତ ୨ ନାମଲେଖା । ପ୍ରଥମ ପର୍ଯ୍ୟାୟ ମେଧା ତାଲିକା ଆଧାରରେ କଳା, ବିଜ୍ଞାନ, ବାଣିଜ୍ୟ ବିଭାଗରେ ନାମଲେଖା ହେବ । ଏହି ପର୍ଯ୍ୟାୟରେ ନାମଲେଖା ପାଇଁ ୩ଲକ୍ଷ ୪୭ ହଜାର ୬୨୬ ଜଣ ଛାତ୍ରଛାତ୍ରୀଙ୍କ ତାଲିକା ପ୍ରକାଶ ପାଇଛି । କଳା ବିଭାଗରେ ସର୍ବାଧିକ ୨ ଲକ୍ଷ ୨୩ ହଜାର ୫୭୫ ଛାତ୍ରଛାତ୍ରୀ ଥିବା ବେଳେ ବିଜ୍ଞାନରେ ୮୪ ହଜାର ୭୮୯, ବାଣିଜ୍ୟରେ ୨୫ ହଜାର ୬୨ ଜଣ ଅଛନ୍ତି । ସେପ୍ଟେମ୍ବର ୨୬ ପର୍ଯ୍ୟନ୍ତ ଚାଲିବାକୁ ଥିବା ଏହି ପର୍ଯ୍ୟାୟ ନାମଲେଖା ସମୟରେ କୋଭିଡ୍ ଗାଇଡ୍ଲାଇନ୍ ପାଳନ କରିବାକୁ କଲେଜଗୁଡିକୁ ନିର୍ଦ୍ଦେଶ ଦିଆଯାଇଛି । ମାସ୍କ ବ୍ୟବହାର କରିବା ସହ ସାମାଜିକ ଦୂରତା ରଖିବାକୁ ପରାମର୍ଶ ଦିଆଯାଇଛି । ଚଳିତ ଶିକ୍ଷା ବର୍ଷରେ ରାଜ୍ୟର ୨ହଜାର ୨୮ଟି କଲେଜରେ ୪ଲକ୍ଷ ୫୩ ହଜାର ୬୪୩ ସିଟ୍ରେ ନାମଲେଖା ହେଉଛି । ଅକ୍ଟୋବର ୧୭ ସୁଦ୍ଧା ନାମଲେଖା ପ୍ରକ୍ରିୟା ଶେଷ ହେବ ।
ପ୍ରକାଶ ପାଇଲା ଯୁକ୍ତ ୨ ପ୍ରଥମ ପର୍ଯ୍ୟାୟ କଟ୍ ଅଫ୍ ମାର୍କ, ବିଜ୍ଞାନରେ ରେଭେନ୍ସା ସର୍ବାଧିକ ୮୯ %
ସୀମାରେ ଭାରତୀୟ ସେନାକୁ ବଡ଼ ସଫଳତା, ୬ଟି ବଡ଼ ପାହାଡ଼ ଏବେ ଯବାନଙ୍କ କବ୍ଜାରେ
ନୂଆଦିଲ୍ଲୀ: ପୂର୍ବ ଲଦାଖରେ ବିବାଦୀୟ ସ୍ଥିତି ଭିତରେ ଭାରତୀୟ ସେନାଙ୍କୁ ମିଳିଛି ବଡ଼ ସଫଳତା । ଛଅଟି ବଡ଼ ବଡ଼ ପାହାଡ ଏବେ କବ୍ଜା କରିଛି ଭାରତୀୟ ସେନା । ଗତ ୨୦ ଦିନ ମଧ୍ୟରେ ଏହି ସଫଳତା ହାସଲ କରିଛି ଭାରତୀୟ ସେନା । ଚୀନ ସେନା ଉପରେ ଚାପ ପକାଇବା ପାଇଁ ଭାରତୀୟ ସେନା ଏବେ ଆକସନ୍ ମୋଡ୍କୁ ଆସିଛି । ସେନାର ସୂଚନା ଅନୁଯାୟୀ ମଗର ହିଲ୍, ଗୁରଙ୍ଗ ହିଲ୍, ରେଜାଙ୍ଗ ଲା ରାଚନା ହିଲ୍, ମୋଖପାରୀ ଓ ଫିଙ୍ଗର ଫୋର୍ ଅଞ୍ଚଳର ଅନେକ ସ୍ଥାନକୁ କବ୍ଜା କରି ନେଇଛନ୍ତି ଭାରତୀ ଯବାନ ।
ଏହି ଉଚ୍ଚ ପାହାଡ଼ LACର ଦକ୍ଷିଣରୁ ଉତ୍ତର ଅଞ୍ଚଳ ପର୍ଯ୍ୟନ୍ତ ବ୍ୟାପିଛି । ଭାରତ ଏହି ଉଚ୍ଚ ପାହାଡ଼ କବ୍ଜା କରି PLA ଉପରେ ଭାରି ପଡ଼ିଛି । ଗତ କିଛି ଦିନ ଧରି ସୀମାରେ ଭାରତ ଓ ଚୀନ ମଧ୍ୟରେ ମୁହାଁମୁହିଁ ସ୍ଥିତି ଲାଗି ରହିଥିବାବେଳେ ଭାରତୀୟ ସେନା ଚୀନ୍କୁ ଉଚିତ୍ ଜବାବ ଦେଉଛି । ସ୍ଥିତି ଏଭଳି ହୋଇଛି ଯେ ଉଭୟ ସେନା ପକ୍ଷରୁ ସୀମାରେ ଅଧିକ ସୈନ୍ୟ ମୁତୟନ ସହ ଅଧିକ ଅସ୍ତ୍ରଶସ୍ତ୍ର ଠୁଳ କରାଯାଉଛି । ସୀମା ସମସ୍ୟାର ସମାଧାନ ପାଇଁ ଦୁଇ ଦେଶ ମଧ୍ୟରେ ସବୁ ସ୍ତରରେ ଆଲୋଚନା ଚାଲିଥିବା ବେଳେ କିଛି ସୁଫଳ ମିଳୁନାହିଁ ।
RBI ରୁ ୯୭ ହଜାର କୋଟି ଟଙ୍କା ଋଣ ଆଣିବାକୁ କେନ୍ଦ୍ର ସରକାରଙ୍କ ଯୋଜନା
ନୂଆଦିଲ୍ଲୀ: କରୋନା ପାଇଁ ବିଗିଡିବାରେ ଲାଗିଛି ଦେଶର ଅର୍ଥନୀତି । ଏଭଳି ସମୟରେ GST କ୍ଷତିପୂରଣ ନେଇ ଚିନ୍ତାରେ ପଡିଛନ୍ତି କେନ୍ଦ୍ର ସରକାର । GST କ୍ଷତିପୂରଣ ପାଇଁ ରାଜ୍ୟମାନେ ୯୭ ହଜାର କୋଟି ଟଙ୍କା ଋଣ କରିବା ପାଇଁ ସହମତି ଜଣାଇଛନ୍ତି । ଏହି ଋଣ ଯୋଜନାକୁ ୨୧ଟି ରାଜ୍ୟ ସମର୍ଥନ କରିଛନ୍ତି । ଆନ୍ଧ୍ର ପ୍ରଦେଶ, ଅରୁଣାଚଳ ପ୍ରଦେଶ, ଆସାମ, ବିହାର, ଗୋଆ, ଗୁଜରାଟ, ହରିୟାଣା, ହିମାଚଳ ପ୍ରଦେଶ, କର୍ଣ୍ଣାଟକ, ମଧ୍ୟପ୍ରଦେଶ, ମଣିପୁର, ମେଘାଳାୟ, ମିଜୋରାମ, ନାଗାଲାଣ୍ଡ, ଓଡିଶା, ତ୍ରିପୁରା, ଉତ୍ତରାଖଣ୍ଡ, ସିକ୍କିମ ଓ ଉତ୍ତର ପ୍ରଦେଶ ସରକାରଙ୍କ ସମେତ କଂଗ୍ରେସ ଶାସିତ କେନ୍ଦ୍ରଶାସିତ ଅଞ୍ଚଳ ପୁଡୁଚେରୀ କେନ୍ଦ୍ରସରକାରଙ୍କ GST ଋଣ ଯୋଜନାକୁ ସମର୍ଥନ ଜଣାଇଛନ୍ତି ।
ତେବେ ଝାଡଖଣ୍ଡ, କେରଳ, ମହାରାଷ୍ଟ୍ର ,ପଶ୍ଚିମବଙ୍ଗ, ତାମିଲନାଡୁ, ତେଲେଙ୍ଗାନା, ରାଜସ୍ଥାନ ଓ ପଞ୍ଜାବ ସରକାର ଏବେ ବି ସେମାନଙ୍କ ନିଷ୍ପତ୍ତି ଶୁଣାଇ ନାହାଁନ୍ତି । କରୋନା ସମୟରେ GST କମ୍ ଆଦାୟ ହୋଇଥିବାରୁ ଓ ଏହାର କ୍ଷତିପୂରଣ ନେଇ ସରକାର ଋଣ କରିବା ପାଇଁ ନିଷ୍ପତ୍ତି ନେଇଛନ୍ତି । କେନ୍ଦ୍ର ସରକାର GST କ୍ଷତିପୂରଣ ପାଇଁ ସମସ୍ତ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳ ପାଖରେ ଦୁଇଟି ପ୍ରସ୍ତାବ ରଖିଥିଲେ । ଗୋଟିଏ ହେଉଛି RBI ପାଖରୁ ଋଣ ଆଣିବା ଅନ୍ୟଟି ହେଉଛି ବଜାରରୁ ଋଣ ନେବା । ତେବେ RBI ପାଖରୁ ୯୭ ହଜାର କୋଟି ଟଙ୍କାର ଋଣ ଆଣିବା ପ୍ରସ୍ତାବକୁ ସମର୍ଥନ ଜଣାଇଛନ୍ତି ୨୧ଟି ରାଜ୍ୟର ସରକାର ।