ପୁରୀ: ଏଥରର ରଥଯାତ୍ରା ଭିନ୍ନ ଥିଲା । ବିନା ଭକ୍ତରେ ସେବାୟତ ଓ ପୋଲିସ ମିଶି ରଥ ଭିଡିଲେ । ସୁନାବେଶରେ ବି ବଡଦାଣ୍ଡ ଖାଁ ଖାଁ ଥିଲା । ତେବେ ସବୁ ସତ୍ତ୍ୱେ ମଧ୍ୟ ରଥଯାତ୍ରା ଆୟୋଜନ ବେଳେ ସବୁଠାରୁ ବଡ ଆଶଙ୍କା ଥିଲା ଯେ ଲୋକେ ମହାପ୍ରଭୁଙ୍କ ଦର୍ଶନ ପାଇଁ ବିଶୃଙ୍ଖଳିତ ହୋଇ ପାରନ୍ତି । ମାତ୍ର ସବୁ ଆଶଙ୍କାକୁ ଭୁଲ ପ୍ରମାଣିତ କରି ପୁରୀ ପ୍ରଶାସନ ଓ ମୁଖ୍ୟତଃ ପୁରୀ ଲୋକେ ସଫଳତା ପୂର୍ବକ ରଥଯାତ୍ରା ସାରିଲେ । ତେବେ ରଥାଯାତ୍ରାର ସଫଳ ପରିଚାଳନାକୁ ନେଇ ଗଜପତିଙ୍କ ଅଧ୍ୟକ୍ଷତାରେ ପ୍ରସ୍ତୁତ ହେବ ଡକ୍ୟୁମେଣ୍ଟ୍ରୀ । ସେହିପରି ରଥଯାତ୍ରାରେ ନିୟୋଜିତ ସେବାୟତଙ୍କ ଆଉ ଥରେ ହେବ କୋଭିଡ ଟେଷ୍ଟ ।
୧୧ରୁ ୧୪ ତାରିଖ ଯାଏଁ ସେବାୟତଙ୍କ କୋଭିଡ ଟେଷ୍ଟ କରିବାକୁ ଛତିଶା ନିଯୋଗ ବୈଠକରେ ସ୍ଥିର କରାଯାଇଛି । ଶ୍ରଦ୍ଧାଳୁ ଆସୁନଥିବାରୁ ସେବାୟତଙ୍କ ଆର୍ଥିକ ଅସୁବିଧାକୁ ଦୃଷ୍ଟିରେ ରଖି ଏକ କମିଟି ଗଠନ ହୋଇଛି । ୭ ଦିନ ଭିତରେ ଏନେଇ ବ୍ୟବସ୍ଥା ଗ୍ରହଣ କରାଯିବ ବୋଲି ଛତିଶା ନିଯୋଗ ଓ ପରିଚାଳନା କମିଟିର ଯୁଗ୍ମ ବୈଠକ ଆଲୋଚନା କରାଯାଇଛି । ଶୃଙ୍ଖଳିତ ରଥଯାତ୍ରା ପାଇଁ ସମସ୍ତ ନିଯୋଗ ଓ ପ୍ରଶାସନକୁ ବୈଠକରେ ଧନ୍ୟବାଦ ଜଣାଯାଇଛି । କୋଭିଡ କଟକଣା ଭିତରେ ଆଗାମୀ ଦିନର ନୀତିକାନ୍ତି ନେଇ ମଧ୍ୟ ଆଲୋଚନା ହୋଇଛି । ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ତତ୍ତ୍ୱାବଧାନରେ ସେବା ନୀତି କରିବାକୁ ନିଷ୍ପତ୍ତି ହୋଇଛି ।
ତେବେ ରାଜ୍ୟର ରିପୋର୍ଟ କାର୍ଡ ଦେଖିଲେ, ଏକଥା ସ୍ପଷ୍ଟ ଯେ, ଗଞ୍ଜାମ ଜିଲ୍ଲା ପୁରା ଓଡିଶା ପାଇଁ ସମସ୍ୟା ବଢାଉଛି । ପ୍ରବାସୀ ଓଡିଆ ଗଞ୍ଜାମକୁ ଯେଉଁ ମାତ୍ରାରେ ଫେରିଲେ ତାହା ହିଁ ସଂକ୍ରମଣ ବୃଦ୍ଧି ପଛର ସବୁଠାରୁ ପ୍ରମୁଖ କାରଣ ହୋଇ ବାହାରକୁ ଆସିଲା । ତେବେ କ୍ୱାରେଣ୍ଟାଇନ୍ ସେଣ୍ଟରରେ ଅନେକ ଅବ୍ୟବସ୍ଥା ମଧ୍ୟ ଦେଖା ଦେଇଥିଲା । ପ୍ରଶାସନର ସବୁ ପ୍ରକାର ପ୍ରଚେଷ୍ଟା ସତ୍ତ୍ୱେ ଜିଲ୍ଲାକୁ ଫେରିଥିବା ଲୋକେ କ୍ୱାରେଣ୍ଟାଇନ ନିୟମକୁ ଉଲଙ୍ଘନ କରିଥିଲେ । ସେସବୁର ଫଳ ଏବେ ସାରା ରାଜ୍ୟକୁ ଭୋଗିବାକୁ ପଡୁଛି । ସଂକ୍ରମିତଙ୍କ ସଂଖ୍ୟାରେ ରୋକ୍ ନଲାଗିବା ହେତୁ ବାଧ୍ୟ ହୋଇ ଜିଲ୍ଲା ପ୍ରଶାସନ ଜିଲ୍ଲାକୁ ୧୩ ତାରିଖ ପର୍ଯ୍ୟନ୍ତ ସଟଡାଉନ୍ କରିଛନ୍ତି । ଏହି ସମୟ ଅବଧି ମଧ୍ୟରେ ଗଞ୍ଜାମର ସହରାଞ୍ଚଳର ସମସ୍ତ ଘରେ ପହଞ୍ଚି ଜିଲ୍ଲା ପ୍ରଶାସନ ସ୍କ୍ରିନିଂ କରିବେ । ସଂକ୍ରମଣ ନେଇ ଲକ୍ଷଣ ଦେଖା ଦେଲେ ରକ୍ତ ନମୁନା ପରୀକ୍ଷା ହେବ ।
