କୋଭିଡ୍-୧୯ ସଂକ୍ରମଣକୁ ରୋକିବା ପାଇଁ ସାମାଜିକ ଦୂରତ୍ୱକୁ ପ୍ରାଥମିକତା ମିଳୁଥିବା ବେଳେ ଜେମୋପାଇ ଇସ୍କୁଟର କମ୍ପାନୀ ଏକ ସିଙ୍ଗିଲ୍ ସିଟର ସ୍କୁଟର ଲଞ୍ଚ କରିଛି । ସ୍କୁଟରର ଦର ରହିଛି ୪୪ହଜାର ଟଙ୍କା । ତେବେ ଏବେ ଏହି ଇ-ସ୍କୁଟରର ବୁକିଂ ଆରମ୍ଭ ହୋଇଯାଇଥିବା ବେଳେ ଗ୍ରାହକଙ୍କ ପାଖରେ ସ୍କୁଟର ଆଗାମୀ ମାସରେ ପହଞ୍ଚିବ । ଗୋରିନ ଇମୋବିଲିଟି ଓ ଓପାଇ ଇଲେକଟ୍ରିକର ମିଳିତ ପ୍ରଚେଷ୍ଟାରେ ଜେମୋପାଇ ଇ-ସ୍କୁଟରକୁ ପ୍ରସ୍ତୁତ କରାଯାଇଛି । ଏହି ସ୍କୁଟରରେ କେବଳ ଚାଳକଙ୍କ ପାଇଁ ବସିବାକୁ ସ୍ଥାନ ରହିଛି । ଥରେ ପୂର୍ଣ୍ଣ ଚାର୍ଜ କରିବା ପରେ ଏହି ସ୍କୁଟର ପାଖପାଖି ୭୫ କିଲୋମିଟରର ଯାତ୍ରା କରିପାରିବ । ସେହିଭଳି ଏହାର ସେଲ ୨ ଘଣ୍ଟା ମଧ୍ୟରେ ୯୦ ପ୍ରତିଶତ ଚାର୍ଜ ହୋଇପାରିବ ବୋଲି କମ୍ପାନୀ ଦାବି କରିଛି । କମ୍ପାନୀର ସହ ପ୍ରତିଷ୍ଠାତା ଅମିତ ରାଜ ସିଂ କହିଛନ୍ତି ଯେ, ଏଭଳି ସଙ୍କଟ ସମୟ ବ୍ୟାପର କରିବା ଆମ ପାଖରେ ସବୁଠାରୁ ବଡ ଆହ୍ୱାନ । ସୁରକ୍ଷିତ ରହି ବ୍ୟାପାର ଜାରି ରହିବା କ୍ଷେତ୍ରରେ ଏହି ସ୍କୁଟର ବିଶେଷ ଭାବେ ସହାୟକ ହେବ । ଗମନାଗମନ ପାଇଁ ଏହି ସ୍କୁଟର ଏକ ସୁରକ୍ଷିତ ବିକଳ୍ପ । ଏହାକୁ ଚଳାଇବା ପାଇଁ ଆରଟିଓର ଅନୁମତିର ମଧ୍ୟ ଆବଶ୍ୟକତା ନାହିଁ । ସ୍କୁଟରର ସର୍ବାଧିକ ବେଗ ୨୫ କିଲୋମିଟର ହୋଇଥିବା ବେଳେ ୧୨୦ କିଲୋଗ୍ରାମର ଆସବାପତ୍ର ପରିବହନ କରିବା ପାଇଁ କ୍ୟାରିୟରର ସୁବିଧା ମଧ୍ୟ ରହିଛି ।
ରାଜ୍ୟସ୍ତରୀୟ ପ୍ରାକୃତିକ ବିପର୍ଯ୍ୟୟ କମିଟି ବୈଠକ, ଆଗୁଆ ପ୍ରସ୍ତୁତି ଓ ତ୍ୱରିତ ପଦକ୍ଷେପ ଉପରେ ମୁଖ୍ୟମନ୍ତ୍ରୀଙ୍କ ଗୁରୁତ୍ୱ
ଭୁବନେଶ୍ୱର: ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ରାଜ୍ୟସ୍ତରୀୟ ପ୍ରାକୃତିକ ବିପର୍ଯ୍ୟୟ କମିଟି ବୈଠକ ଅନୁଷ୍ଠିତ ହୋଇଯାଇଛି । ଆଗୁଆ ପ୍ରସ୍ତୁତି, ତ୍ୱରିତ ଉଦ୍ଧାର ଓ ପୁନର୍ଗଠନ ଉପରେ ମୁଖ୍ୟମନ୍ତ୍ରୀ ଗୁରୁତ୍ୱ ଦେଇଛନ୍ତି । ବୈଠକରେ ମୁଖ୍ୟମନ୍ତ୍ରୀ କହିଛନ୍ତି, ବିଭିନ୍ନ ବିପର୍ଯ୍ୟୟରେ ଜନସାଧାରଣଙ୍କ ଉପରକୁ ଆସୁଥିବା ବିପଦକୁ କମ୍ କରିବା ପାଇଁ ରାଜ୍ୟ ସରକାର ଅନେକ ଫଳପ୍ରଦ ପଦକ୍ଷେପ ଗ୍ରହଣ କରିଆସିଛନ୍ତି । ସରକାରଙ୍କ ପ୍ରସ୍ତୁତି ଗତିଶୀଳ, ସାମଗ୍ରିକ ଏବଂ ଭାଗିଦାରୀ ମୂଳକ ହେବା ଉଚିତ୍ । ଆଗୁଆ ପ୍ରସ୍ତୁତି, ତ୍ବରିତ ଉଦ୍ଧାର ଏବଂ ପୁନର୍ଗଠନ ପାଇଁ ବିଭିନ୍ନ ପଦକ୍ଷେପ ସହିତ ଦୀର୍ଘକାଳୀନ ମୁକାବିଲା କାର୍ଯ୍ୟକ୍ରମ ହେଉଛି ବିପର୍ଯ୍ୟୟ ପରିଚାଳନା ଦୃଷ୍ଟିଭଙ୍ଗୀର ମୂଳନୀତି ବୋଲି କହିଛନ୍ତି ମୁଖ୍ୟମନ୍ତ୍ରୀ ।
ଗୋଷ୍ଠୀଭିତ୍ତିକ ପ୍ରସ୍ତୁତି କାର୍ଯ୍ୟକ୍ରମକୁ ସଂସ୍ଥାଗତ ଢାଞ୍ଚା ପ୍ରଦାନ କରିବାରେ ଓଡିଶା ସର୍ବାଗ୍ରେ ରହିଛି । ଗୋଷ୍ଠୀଭିତ୍ତିକ ପରିଚାଳନାରେ ଆମର ଅଭିଜ୍ଞତା କୋଭିଡ୍ ପରିଚାଳନାରେ ମଧ୍ୟ ବହୁ ପରିମାଣରେ ଉପାଦେୟ ହୋଇପାରିଛି ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ମୁଖ୍ୟମନ୍ତ୍ରୀ ଆହୁରି କହିଛନ୍ତି ଯେ, ଗତ ୩ ମାସ ଧରି କୋଭିଡ୍-୧୯ ମହାମାରୀ ରାଜ୍ୟର ଜନସାଧାରଣଙ୍କ ଦୈନନ୍ଦିନ ଜୀବନକୁ ଗଭୀର ଭାବେ ପ୍ରଭାବିତ କରିଛି । ରାଜ୍ୟରେ ଏହି ରୋଗକୁ ନିୟନ୍ତ୍ରଣ କରିବା ପାଇଁ ନିଆଯାଇଥିବା ପଦକ୍ଷେପ ଯୋଗୁ ଓଡିଶା ଆଜି ଏ କ୍ଷେତ୍ରରେ ଭଲ ସ୍ଥିତିରେ ରହିଛି । ଏହି ଅବସରରେ କୋଭିଡ ମୁକାବିଲାରେ ଜନସାଧାରଣଙ୍କ ସହଯୋଗ ପାଇଁ ମୁଖ୍ୟମନ୍ତ୍ରୀ ଧନ୍ୟବାଦ ଜଣାଇଛନ୍ତି ।
ମୁଖ୍ୟମନ୍ରୀ କହିଛନ୍ତି, ଓଡ଼ିଶା ଏକ ପ୍ରାକୃତିକ ବିପର୍ଯ୍ୟୟ ପ୍ରବଣ ରାଜ୍ୟ । ବିଭିନ୍ନ ପ୍ରାକୃତିକ ବିପର୍ଯ୍ୟୟ ଯୋଗୁ ରାଜ୍ୟ ଅନେକ ବିପଦର ସମ୍ମୁଖୀନ ହେଉଥିଲେ ମଧ୍ୟ ପରିସ୍ଥିତିର ମୁକାବିଲା କରିବା ପାଇଁ ପ୍ରସ୍ତୁତ । ଗତ ବର୍ଷ ଫନି ଓ ବୁଲବୁଲ ଭଳି ବାତ୍ୟା ସହିତ ବନ୍ୟା, ବର୍ଷା ଏବଂ ଅନେକ ସ୍ଥାନୀୟ ବିପର୍ଯ୍ୟୟର ସମ୍ମୁଖୀନ ହୋଇଥିଲା ଓଡ଼ିଶା । ଚଳିତ ବର୍ଷ ମଧ୍ୟ ଉତ୍ତର ଉପକୂଳ ଜିଲ୍ଲା ଗୁଡିକ ମେ’ ମାସର ତୃତୀୟ ସପ୍ତାହରେ ମହାବାତ୍ୟା ଅମ୍ଫନ ଦ୍ୱାରା ପ୍ରଭାବିତ ହୋଇଥିଲା । ଓଡିଶାର ଜନସାଧାରଣଙ୍କ ସହଯୋଗରେ ଆମେ କେବଳ ଏହିସବୁ ବିପର୍ଯ୍ୟୟର ମୁକାବିଲା କରିବା ପାଇଁ ସଫଳ ହୋଇନାହୁଁ, ତା ସହିତ ପଡୋଶୀ ରାଜ୍ୟ ପଶ୍ଚିମବଙ୍ଗକୁ ମଧ୍ୟ ତାର ବିପଦ ସମୟରେ ସହାୟତା ଯୋଗାଇ ଦେଇପାରିଛୁ ବୋଲି କହିଛନ୍ତି ମୁଖ୍ୟମନ୍ତ୍ରୀ ।
ସବୁବେଳେ ଅତୀତର ବିପର୍ଯ୍ୟୟ ଗୁଡିକରୁ ଆମେ ଶିକ୍ଷା ଗ୍ରହଣ କରିଆସିଛୁ ଏବଂ ସମ୍ଭାବ୍ୟ ଦୁର୍ବିପାକ ପାଇଁ ପ୍ରସ୍ତୁତିରେ ଉନ୍ନତି ଆଣିବା ପାଇଁ ନିରନ୍ତର ପ୍ରଚେଷ୍ଟା ଜାରି ରହିଛି । ‘ଅଭିଜ୍ଞତାରୁ ଶିକ୍ଷା’ ଏବଂ ‘ପରବର୍ତ୍ତୀ ପ୍ରସ୍ତୁତି’ରେ ଉନ୍ନତିର ଏହି ନିରନ୍ତର ପ୍ରକ୍ରିୟା ପାଇଁ ଆମକୁ ସବୁ କ୍ଷେତ୍ରରୁ ପ୍ରଶଂସା ମିଳିଛି ବୋଲି ମୁଖ୍ୟମନ୍ରୀ କହିଛନ୍ତି ।
ଚଳିତ ବର୍ଷ ଦକ୍ଷିଣ-ପଶ୍ଚିମ ମୌସୁମୀ ବାୟୁ ଠିକ୍ ସମୟରେ ଆସିଛି । ପାଣିପାଗ ବିଭାଗର ପୂର୍ବାନୁମାନ ଅନୁଯାୟୀ ଚଳିତ ବର୍ଷ ଭଲ ବର୍ଷା ହେବାର ଆଶା ରହିଛି । ଜୁନ୍ ଠାରୁ ଅକ୍ଟୋବର ପର୍ଯ୍ୟନ୍ତ ସମୟ ହେଉଛି ଖୁବ୍ ଗୁରୁତ୍ବପୂର୍ଣ୍ଣ । ଏହି ସମୟରେ ବନ୍ୟା, ବାତ୍ୟା, ମରୁଡି ଭଳି ପ୍ରାକୃତିକ ବିପର୍ଯ୍ୟୟ ଆସିପାରେ । ଏହିସବୁ ବିପର୍ଯ୍ୟୟ ପାଇଁ ଆମର ପ୍ରସ୍ତୁତିକୁ ନିରନ୍ତର ସମୀକ୍ଷା କରିବା ଦରକାର ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ଲକଡାଉନ୍ ଯୋଗୁଁ ବଦଳିଗଲା ଷ୍ଟାରଙ୍କ ଜୀବନ: କରୋନା କାଳରେ କାହ ପାଖରେ ଟଙ୍କା ଅଭାବ,କିଏ ପରିବାରଠାରୁ ଦୂରରେ
ମୁମ୍ବାଇ: କରୋନା ଭୂତାଣୁ କେବଳ ସାଧାରଣ ଲୋକଙ୍କ ଜୀବନ ଉପରେ ପ୍ରଭାବ ପକାଇ ନାହିଁ। ବରଂ ଟିଭି ଏବଂ ବଲିଉଡର ଅନେକ ଷ୍ଟାର୍ସଙ୍କ ଉପରେ ମଧ୍ୟ ବରାବର ପ୍ରଭାବ ପରାଇଛି । କରୋନା ଭାଇରସ୍ ଏବଂ ଲକଡାଉନ୍ ଯୋଗୁଁ ଅନେକ କଳାକାର କ୍ଷତିଗ୍ରସ୍ତ ହୋଇଛନ୍ତି । କିଏ ତାଙ୍କ ପରିବାରଠାରୁ ଦୂରାଇ ରହିଛନ୍ତି ତ’ କିଏ ପରିବାର ସହ ଥିଲେ ମଧ୍ୟ ଆର୍ଥିକ ଅବସ୍ଥା ପ୍ରଭାବିତ ହୋଇଛି ।
ଚାନ୍ଦନୀ ଭଗବାନୀ
ଟେଲିଭିଜନ ଜଗତର ଚର୍ଚ୍ଚିତ ଚେହେରା ଥିଲେ, ଚାନ୍ଦନୀ ଭଗବାନୀ । ଲକଡାଉନ୍ ଯୋଗୁଁ ସେ ଅଷ୍ଟ୍ରେଲିଆରେ ଅନେକ ଦିନ ପାଇଁ ଅଟକି ରହିଥିଲେ। ସେ କହିଥିଲେ ଯେ, ସେଠାରେ କେବଳ ସେ ନିଜ ସେଭିଂସ୍ ପାଇଁ ବଞ୍ଚିପାରୁଥିଲେ । ତାଙ୍କ କହିବାନୁସାରେ, ସେ ହୋଟେଲରେ ଏକ ମାସ ବିତାଇଥିଲେ।
ରତନ ରାଜପୁତ
ଟିଭି ଅଭିନେତ୍ରୀ ରତନ ରାଜପୁତ ମଧ୍ୟ ଲକଡାଉନ୍ ପାଇଁ ବହୁତ ପ୍ରଭାବିତ ହୋଇଛନ୍ତି । ଅନେକ ଦିନ ଯାଏଁ ସେ ନିଜ ଗାଁରେ ଫସି ରହିଥିଲେ। ସେ ଏମିତି ଏକ ସ୍ଥାନରେ ଫସିଥିଲେ ଯେଉଁଠାରେ ନା ରହିବାକୁ ଭଲ ଘର ଥିଲା ନା ଟିଭି ଥିଲା । କୌଣସି ଜିନିଷ ବିଷୟରେ ସେ ଜାଣିପାରୁନଥିଲେ । ଗାଁରେ ରତନ କେମିତି ଜୀବନ କାଟୁଥିଲେ, ସେନେଇ ରତନ ଅନେକ ଭିଡିଓ ସୋସିଆଲ ମିଡିଆରେ ଜାରି କରିଛନ୍ତି । ଏହି ଲକଡାଉନ୍ ରେ ସେ ଅନେକ କୁକିଂ ଭିଡିଓ କରି ଇଣ୍ଟରନେଟ୍ ରେ ପୋଷ୍ଟ କରୁଥିଲେ ।
ସେହନାଜ ଗିଲ
ବିଗ ବସ୍ ର ପ୍ରସିଦ୍ଧ ଚେହେରା ସେହନାଜ ଗିଲ ଲକଡାଉନ୍ ଯୋଗୁଁ ନିଜ ପରିବାରଠାରୁ ଦୁରରେ ଥିଲେ । ପଞ୍ଜାବରେ ସେହନାଜଙ୍କ ପୁରା ପରିବାର ବାସ କରନ୍ତି । ହେଲେ ସେ ନିଜ ମାଆ ବାପାଙ୍କ ପାଖକୁ ଯାଇପାରୁନଥିଲେ । ଲକଡାଉନ୍ ଯୋଗୁଁ ସେ ମୁମ୍ବାଇରେ ଅଟକି ରହିଥିଲେ। ତାଙ୍କ ଭାଇ ମଧ୍ୟ ତାଙ୍କ ସହିତ ରହୁଥିଲେ।
ଜାନ ଖାନ
ଅଭିନେତା ଜାନ ଖାନଙ୍କ କାହାଣୀ ସମ୍ପୂର୍ଣ୍ଣ ଭିନ୍ନ । ଲକଡାଉନରେ ଜାନଙ୍କ ସ୍ଥିତି ପୁରା ଅସମ୍ଭାଳ ହୋଇପଡିଥିଲା । କାରଣ ଦୀର୍ଘ ଦିନ ଧରି ସେ ନିଜ ପାରିଶ୍ରମିକ ପାଇନଥିଲେ । ଧାରାବାହିକ “ହାମାରି ବହୁ ସିଲ୍କ” ରେ କାମ କରୁଥିଲେ । ଜାନଙ୍କ ଭଳି ଶୋ’ ସହିତ ଜଡିତ ଅନେକ କଳାକାର ସେମାନଙ୍କ ଫି ପାଇଲେ ନାହିଁ । ଜାନଙ୍କ କହିବା ଅନୁସାରେ କିଛି କଳାକାର ଆତ୍ମହତ୍ୟା ବିଷୟରେ ମଧ୍ୟ ଭାବିଥିଲେ । ଜାନ ସୋସିଆଲ ମିଡିଆ ମାଧ୍ୟମରେ ନିର୍ମାତାଙ୍କ ବିରୋଧରେ ଅନେକ କଥା ପୋଷ୍ଟ କରିଥିଲେ ।
ନୁପୁର ଆଲଙ୍କାରା
ନୁପୁର ଅନେକ ହିନ୍ଦୀ ସିରିଏଲରେ କୋ-ଷ୍ଟାର ଭାବେ କାମ କରିଛନ୍ତି । କିନ୍ତୁ ଲକଡାଉନ୍ ସମୟରେ ସେ ଅନେକ ଅସୁବିଧାର ସମ୍ମୁଖୀନ ହୋଇଛନ୍ତି । ତାଙ୍କ ମା’ଙ୍କ ସ୍ୱାସ୍ଥ୍ୟ ଅବସ୍ଥା ବିଗିଡିବା ସହ ଚିକିତ୍ସା ପାଇଁ ତାଙ୍କ ପାଖରେ ଟଙ୍କାର ଅଭାବ ଥିଲା । ତାଙ୍କ ଟଙ୍କା ବ୍ୟାଙ୍କରେ ଅଟକି ରହିଥିଲା। ତାଙ୍କର ଏଭଳି ଘଡିସନ୍ଧି ମୁହୁର୍ତ୍ତରେ ରେଣୁକା ଶହାନେ ତାଙ୍କୁ ସାହାଯ୍ୟ କରିଥିଲେ । ସେ ସୋସିଆଲ ମିଡିଆ ମାଧ୍ୟମରେ ଲୋକଙ୍କୁ ଟଙ୍କା ଦାନ କରିବାକୁ କହିଥିଲେ। ଏପରିକି ରେଣୁକାଙ୍କ ଭିଡିଓ ଦେଖି ଅକ୍ଷୟ କୁମାର ତାଙ୍କୁ ସାହାଯ୍ୟ କରିବାକୁ ଆଗକୁ ଆସିଥିଲେ ।
ମନୋଜ ବାଜପେୟୀ
ଅଭିନେତା ମନୋଜ ବାଜପେୟୀ ମଧ୍ୟ ଲକଡାଉନ୍ ରେ ତିନି ମାସ ଧରି ଉତ୍ତରାଖଣ୍ଡରେ ଅଟକି ରହିଥିଲେ। ସେ ଏକ ଚଳଚ୍ଚିତ୍ର ପାଇଁ ସେଠାକୁ ଯାଇଥିଲେ, କିନ୍ତୁ ଲକଡାଉନ କାରଣରୁ ସେଠାରେ ଫସି ଯାଇଥିଲେ । ତାଙ୍କ ସହିତ ତାଙ୍କ ପରିବାର ମଧ୍ୟ ସେଠାରେ ଫସିକରି ରହିଥିଲା । କାରଣ ମନୋଜ୍ ମିନି ହଲିଡେରେ ପରିବାରକୁ ନେଇ ସୁଟିଂକୁ ଯାଇଥିଲେ ।
ରୋନିତ ରୟ
ବଲିଉଡ ଅଭିନେତା ରୋନିତ ରୟ ଏକ ସାକ୍ଷାତକାରରେ କହିଛନ୍ତି ଯେ, ଦୀର୍ଘ ମାସ ଧରି ସେ ଟଙ୍କା ରୋଜଗାର କରିପାରିନାହାନ୍ତି । ତାଙ୍କ ବ୍ୟବସାୟ ମଧ୍ୟ ଠପ୍ ହୋଇଯାଇଥିଲା । ସେ ୧୦୦ ଟି ପରିବାର ଚଳାଉଥିଲେ ଯେଉଁମାନେ ତାଙ୍କ ଉପରେ ନିର୍ଭର କରନ୍ତି । ହେଲେ ଲକଡାଉନ୍ ଯୋଗୁଁ ତାଙ୍କର ଆର୍ଥିକ ଅବସ୍ଥା ଖରାପ ହୋଇଯାଇଛି ।
ସଞ୍ଜୟ ଦତ୍ତ
ବଲିଉଡ ଅଭିନେତା ସଞ୍ଜୟ ଦତ୍ତ ଲକଡାଉନ୍ ଯୋଗୁଁ ନିଜ ପରିବାରଠାରୁ ଦୁରରେ ଥିଲେ । ତାଙ୍କ ପତ୍ନୀ ମାନ୍ୟତା ଦତ୍ତ ଦୁବାଇରେ ଫସି ରହିଥିଲେ । ତାଙ୍କ ପିଲାମାନେ ମଧ୍ୟ ମାଆଙ୍କ ସହିତ ଥିଲେ । ଏଭଳି ପରିସ୍ଥିତିରେ ସେମାନେ ଦେଶକୁ ଆସିପାରିନଥିଲେ । ଏହି ସମୟରେ ଭିଡିଓ କଲ୍ ମାଧ୍ୟମରେ ସେ ନିଜ ପରିବାର ସହ ଯୋଡି ହୋଇ ରହିଥିଲେ।
ଭାରତ-ଚୀନ୍ ବିବାଦ: ସେଦିନ କ’ଣ ପାଇଁ ୮ଶହ ମେଣ୍ଢାଙ୍କ ସହ ଚୀନ୍ ଦୂତାବାସକୁ ଯାଇଥିଲେ ବାଜପେୟୀ ?
୧୯୬୨ । ହିନ୍ଦୀ-ଚୀନ୍ ଭାଇ ଭାଇ ନାରା ଦେଇ ବେଜିଂ ପିଠିରେ ଛୁରାମାଡ କରିଥିଲା । ଯୁଦ୍ଧରେ ଭାରତ ହାରିଥିଲା । ଆମେରିକା ଯୁଦ୍ଧରେ ଯୋଗ ଦେବାର ସମ୍ଭାବନା ସୃଷ୍ଟି ହେବାରୁ ଚୀନ ପଛକୁ ଫେରିବାକୁ ବାଧ୍ୟ ହୋଇଥିଲା । କିନ୍ତୁ ଯୁଦ୍ଧ ପରେ ମଧ୍ୟ ଚୀନ୍ ତାର ଚାଲବାଜି ଛାଡିନଥିଲା । ୧୯୬୫ ମସିହାରେ ଚୀନ ଭାରତକୁ ଚିଠି ଲେଖିଥିଲା । ଚିଠିରେ ଡ୍ରାଗନ୍ ଲେଖିଥିଲା ଯେ, ତମ ସୈନିକ ଆମର ୮ଶହ ମେଣ୍ଢା ଚୋରି କରିଛନ୍ତି । ମେଣ୍ଢା ଫେରାଅ,ନହେଲେ ପରିଣାମ ଭଲ ହେବନି । ଚୀନର ଏଭଳି ପତ୍ର ଯବାବରେ ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପାୟୀ ଯାହା କରିଥିଲେ ତାହା ଚୀନର ମୁଖା ଖୋଲି ଦେଇଥିଲା ।
ଆମର ୮୦୦ ମେଣ୍ଢା ତମେ ଚୋରି କରିଛ
୧୯୬୫ ମସିହାର କଥା । ସେତେବେଳେ ଚୀନ ସିକ୍କିମକୁ ହାତେଇବା ଚକ୍କରରେ ଥାଏ । ଭାରତୀୟ ସୈନିକ ତିବ୍ବତରୁ ଭାରତୀୟ ସୈନିକ ୮ଶହ ମେଣ୍ଢା ଓ ୫୯ ୟାକ୍ ଚୋରିକରିଥିବା ଅଭିଯୋଗ ଆଣିଥିଲା । ଚୀନ ଭାରତକୁ ପତ୍ର ଲେଖି ମେଣ୍ଢା ଫେରାଇବାକୁ କହିଥିଲା । ଆଉ ଧମକ ଦେଇଥିଲା,ମେଣ୍ଢା ନଫେରାଇଲେ ପରିଣାମ ପାଇଁ ପ୍ରସ୍ତୁତ ରୁହ ।
ମେଣ୍ଢା ନେଇ ଦୂତାବାସରେ ପହଂଚିଗଲେ ବାଜପେୟୀ
ଚୀନର ଏଭଳି ଅଭିଯୋଗର ଉତ୍ତର ଦେବାକୁ ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ ଗୋଟିଏ ନୂଆ ଉପାୟ ବାହାର କଲେ । ସେ ଚୀନ ଦୂତାବାସକୁ ୮ଶହ ମେଣ୍ଢା ନେଇ ଯାଇଥିଲେ । ସେଠାରେ ବିକ୍ଷୋଭକାରୀଙ୍କୁ ସମ୍ବୋଧନ କରି କହିଥିଲେ ଚୀନ୍ ଏବେ ମେଣ୍ଢା ଓ ୟାକ ପାଇଁ ବିଶ୍ୱଯୁଦ୍ଧ କରିବାକୁ ଚାହୁଁଛି । ତାଙ୍କ ସାଙ୍ଗରେ ଯାଇଥିବା ମେଣ୍ଢାଙ୍କ ବେକରେ ପ୍ଲାକାର୍ଡ ଝୁଲା ଯାଇଥିଲା । ଯେଉଁଥିରେ ଲେଖାଯାଇଥିଲା ‘ଆମକୁ ଖାଇଯାଅ କିନ୍ତୁ ଦୁନିଆକୁ ବଂଚାଅ’
ଡ୍ରାଗନ ରାଗରେ ଲାଲ୍ ପଡିଲା
ବାଜପେୟୀଙ୍କ ମେଣ୍ଢା ବିକ୍ଷୋଭ ଚୀନକୁ ଚିଡାଇ ଦେଇଥିଲା । କାରଣ ଏହାଦ୍ୱାରା ଦୁନିଆ ଜାଣିଥିଲା ଯେ, ଚୀନ୍ ଝଗଡା କରିବା ପାଇଁ କେଉଁଭଳି ବାହାନା ଖୋଜୁଛି । ଏହାପରେ ବେଜିଂସ୍ଥିତ ଭାରତୀୟ ଦୂତାବାସକୁ ଚୀନ ଚିଠି ଲେଖିଥିଲା । ଯେଉଁଥିରେ ଅଭିଯୋଗ କରାଯାଇଥିଲା ଯେ, ବାଜପେୟୀଙ୍କ ବିକ୍ଷୋଭକୁ ସରକାରୀ ସମର୍ଥନ ଥିଲା । ଏହି ଚିଠିରେ ଭାରତୀୟ ସୈନିକ ଚୀନ୍ କ୍ଷେତ୍ରରେ ନିର୍ମାଣ କରୁଥିବା ଅଭିଯୋଗ ମଧ୍ୟ କରାଯାଇଥିଲା ।
ଭାରତ ସରକାର ଦେଲେ ଉତ୍ତର
ଚୀନ୍ ଚିଠିର ଉତ୍ତରରେ ଭାରତ ସରକାର ଲେଖିଥିଲେ ଯେ, ୮ଶହ ମେଣ୍ଢା ଓ ୫୯ ୟାକ୍ ବାବଦରେ ଆମେ ଆଗରୁ ଉତ୍ତର ଦେଇ ସାରିଛୁ । ଆମକୁ ଏସମ୍ବନ୍ଧରେ କିଛି ମଧ୍ୟ ଜଣାନାହିଁ । ଅନ୍ୟପକ୍ଷରେ ବାଜପେୟୀଙ୍କ ବିକ୍ଷୋଭ ବାବଦରେ ଭାରତ ସରକାର କହିଥିଲେ ଯେ, ଏହାର ସରକାରଙ୍କ ସହ କୌଣସି ସମ୍ପର୍କ ନଥିଲା । ଏହା ଚୀନ୍ ସରକାରଙ୍କ ଚରମବାଣୀ ବିରୋଧରେ ଭାରତୀୟ ନାଗରିକଙ୍କ ଶାନ୍ତିପୂର୍ଣ୍ଣ ବିକ୍ଷୋଭ ଥିଲା ।
ଜାମ୍ମୁ-କାଶ୍ମୀରରେ ଆତଙ୍କବାଦୀଙ୍କ ହମ୍ଲା, ଜଣେ ଯବାନ ସହିଦ
ଜାମ୍ମୁକାଶ୍ମୀର: ଶୁକ୍ରବାର ଆତଙ୍କବାଦୀମାନେ ଦକ୍ଷିଣ କାଶ୍ମୀରର ବିଜବେହେରା ଅଞ୍ଚଳରେ ସୁରକ୍ଷା ବାହିନୀ ଉପରେ ଆକ୍ରମଣ କରିଥିଲେ । ଯେଉଁଥିରେ ଜଣେ ସେଣ୍ଟ୍ରାଲ ରିଜର୍ଭ ପୋଲିସ ଫୋର୍ସ (CRPF)ର ସୈନିକ ସହିଦ ହୋଇଛନ୍ତି । ଆତଙ୍କବାଦୀଙ୍କ ଆକ୍ରମଣରେ ଜଣେ ଶିଶୁର ମଧ୍ୟ ମୃତ୍ୟୁ ଘଟିଛି । ଆତଙ୍କବାଦୀମାନେ ସୁରକ୍ଷା ବାହିନୀକୁ ଟାର୍ଗେଟ କରି ବାରମ୍ବାର ଗୁଳି ଚଳାଉଛନ୍ତି ।
ଏହି ଘଟଣା ପରେ ସୁରକ୍ଷା ବାହିନୀ ସମଗ୍ର ଅଞ୍ଚଳକୁ ସିଲ୍ କରି ଦେଇଛନ୍ତି । ଆତଙ୍କବାଦୀଙ୍କୁ ଧରିବା ପାଇଁ ସେନା ପକ୍ଷରୁ ଉଦ୍ୟମ ଜାରି ରହିଛି । ଆତଙ୍କବାଦୀଙ୍କୁ ଟାର୍ଗେଟ କରି ସୁରକ୍ଷା ବାହିନୀ ମଧ୍ୟ କ୍ରମାଗତ ଭାବେ ଗୁଳି ଚଳାଉଛନ୍ତି । ତେବେ ସହିଦ ଯବାନଙ୍କ ପରିଚୟ ଏବେ ସୁଦ୍ଧା ଜଣାପଡିନାହିଁ ।
କାଶ୍ମୀର ଉପତ୍ୟକାରେ ଆତଙ୍କବାଦୀଙ୍କ ବିରୋଧରେ ସୁରକ୍ଷା ବାହିନୀ କ୍ରମାଗତ ଭାବେ ଅପରେସନ୍ ଜାରି ରଖିଛି । ବହୁ ସଂଖ୍ୟକ ଆତଙ୍କବାଦୀ ଲୁଚି ରହିଥିବା ବେଳେ ସେମାନଙ୍କୁ ଧରିବା ପାଇଁ ସୁରକ୍ଷା ବାହିନୀ ଉଦ୍ୟମ ଜାରି ରଖିଛି । ଆତଙ୍କବାଦୀଙ୍କ ଆଡ୍ଡାକୁ ଧ୍ୱଂସ କରିବା ପାଇଁ ମଧ୍ୟ ସେନା ପକ୍ଷରୁ ଅହରହ ଚେଷ୍ଟା ଚାଲିଛି ।
ତ୍ରାଲରେ ୩ ଆତଙ୍କବାଦୀ ନିହତ ହୋଇଥିଲେ
ଏହାପୂର୍ବରୁ ଶୁକ୍ରବାର ତ୍ରାଲରେ ହୋଇଥିବା ଏନକାଉଣ୍ଟରରେ ସୁରକ୍ଷା ବାହିନୀ ଦ୍ୱାରା ତିନି ଜଣ ଆତଙ୍କବାଦୀ ନିହତ ହୋଇଥିଲେ । ଗୁରୁବାର ରାତିରୁ ଏହି ଏନକାଉଣ୍ଟର ଚାଲିଥିଲା । ଏଥିରେ ନିହତ ହୋଇଥିବା ଦୁଇ ଆତଙ୍କବାଦୀଙ୍କ ମୃତଦେହ ଉଦ୍ଧାର କରାଯାଇ ଥିବା ବେଳେ ତୃତୀୟ ଆତଙ୍କବାଦୀର ମୃତଦେହ ଖୋଜା ଚାଲିଛି ।
ତ୍ରାଲରେ ହୋଇଥିବା ଏନକାଉଣ୍ଟରରେ ଜଣେ ଯବାନ ଏବଂ ଜଣେ ପୋଲିସ କର୍ମଚାରୀ ଆହତ ହୋଇଥିଲେ । ତେବେ ଏବେ ବି ସୁରକ୍ଷାବାହିନୀ ପକ୍ଷରୁ ସର୍ଚ୍ଚ ଅପରେସନ୍ ଜାରି ରହିଛି ।
ଜାମ୍ମୁ କାଶ୍ମୀରରୁ ଆତଙ୍କବାଦୀଙ୍କୁ ସଫା କରିବା କାର୍ଯ୍ୟ ଜାରି ରହିଛି । ସୂଚନାନୁସାରେ, ଦକ୍ଷିଣ କାଶ୍ମୀରରେ ୧୨ ଟି ଏନକାଉଣ୍ଟର ହୋଇଛି ଯେଉଁଥିରେ ୩୩ ଆତଙ୍କବାଦୀଙ୍କ ମୁଣ୍ଡ ଗଡ଼ାଇଛି ଭାରତୀୟ ସେନା ।
ସୁଶାନ୍ତଙ୍କ ମୃତ୍ୟୁ ପରେ ତାଙ୍କ ବାପାଙ୍କ ସହ କଣ କଥା ହୋଇଥିଲେ ଅଭିନେତ୍ରୀ କୃତି ସେନନ୍ ଜାଣନ୍ତୁ…
ନୂଆଦିଲ୍ଲୀ: ବଲିଉଡ ଅଭିନେତା ସୁଶାନ୍ତ ସିଂହ ରାଜପୁତଙ୍କୁ ନିକଟରେ ତାଙ୍କ ଫ୍ଲାଟରୁ ମୃତ ଅବସ୍ଥାରେ ଉଦ୍ଧାର କରାଯାଇଥିଲା । ସୁଶାନ୍ତଙ୍କ ମୃତ୍ୟୁ ପରେ ତାଙ୍କ ବାପା ପ୍ରଥମ ଥର ପାଇଁ ମୁହଁ ଖୋଲି ନିଜ ପୁଅ ବିଷୟରେ କହିଛନ୍ତି । ସୂଚନା ମୁତାବକ ସୁଶାନ୍ତଙ୍କ ମୃତ୍ୟୁ ପରେ ଅଭିନେତ୍ରୀ କୃତି ସେନନ୍ ତାଙ୍କ ସହ ଦେଖା କରିଥିଲେ ।
ସୂଚନା ଅନୁଯାୟୀ ସୁଶାନ୍ତ ସିଂହ ରାଜପୁତଙ୍କ ପିତା କେକେ ସିଂହ ଏକ ସାକ୍ଷାତକାରରେ ନିଜ ପୁଅର ଅଭିଳାଷ, ପିଲା ବେଳର ସ୍ମୃତି ଏବଂ ତାଙ୍କ ବିବାହ କରିବାର ଯୋଜନା ବାବଦରେ କଥା ହୋଇଛନ୍ତି । ସୁଶାନ୍ତଙ୍କ ପିତାଙ୍କ ସୂଚନା ଅନୁୟାୟୀ ଅନ୍ତିମ ସଂସ୍କାରରେ ସାମିଲ ହେବା ପାଇଁ ରାଜକୁମାର ରାଓ, ଶ୍ରଦ୍ଧା କପୁର, ରଣବୀର ଶୌରୀ ସମେତ ଅନେକ ଲୋକ ଶ୍ମଶାନ ଘାଟରେ ପହଞ୍ଚିଥିଲେ ।
କେକେ ସିଂହଙ୍କ କହିବା ଅନୁୟାୟୀ ଅଭିନେତ୍ରୀ କୃତି ସେନନ୍ ତାଙ୍କ ପାଖକୁ ଆସି କଥା ହୋଇଥିଲେ । କେକେ ସିଂହ କହିଛନ୍ତି ଯେ, ‘ବହୁତ ଲୋକ ଆସିଥିଲେ କିନ୍ତୁ କୃତି ସେନନ୍ ହିଁ ମୋ ସହ ଦେଖା କରିଥିଲେ । ସେ ସାଙ୍ଗରେ ବସି ମୋ ସହ କଥା ହୋଇଥିଲେ । ମୁଁ ତ କଥା ହୋଇପାରୁନଥିଲି କିନ୍ତୁ ସେ ଯାହା କହୁଥିଲେ ମୁଁ ବାସ୍ ଶୁଣୁଥିଲି । ’
କେକେ ସିଂହଙ୍କ ସୂଚନା ଅନୁଯାୟୀ, କୃତି ତାଙ୍କୁ କହିଥିଲେ ଯେ, ସୁଶାନ୍ତ ଜଣେ ଭଲ ମଣିଷ ଥିଲେ । ଏହା ସହିତ ସେ କହିଛନ୍ତି ଯେ, ଅନେକ ଲୋକ ଆସିଥିଲେ କିନ୍ତୁ ସେମାନେ ମାସ୍କ ପିନ୍ଧିଥିବାରୁ ସେ କାହାକୁ ଚିହ୍ନିପାରୁନଥିଲେ ।
ସୁଶାନ୍ତଙ୍କ ବାପା ଏହା ମଧ୍ୟ କହିଛନ୍ତି ଯେ , ତାଙ୍କ ପୁଅ ବିହାର ପାଇଁ ବହୁତ କିଛି କରିବାକୁ ଚାହୁଁଥିଲା । ତାଙ୍କ କହିବା ଅନୁୟାୟୀ ସୁଶାନ୍ତ ବିହାରରେ ସ୍କୁଲ, କଲେଜ, ଡାକ୍ତରଖାନା ଆଦି ନିର୍ମାଣ କରିବାକୁ ଚାହିଁଥିଲା । କିନ୍ତୁ ଦୁର୍ଭାଗ୍ୟବଶତଃ ଏହି ସବୁ ଇଚ୍ଛାକୁ ପୂରଣ କରିବା ପାଇଁ ଆଜି ସେ ନାହିଁ ।
ସୁଶାନ୍ତଙ୍କ ଶେଷ ଚଳଚିତ୍ରକୁ ମିଳିପାରିଥାନ୍ତା ବମ୍ପର ଓପନିଂ,କିନ୍ତୁ….
ସୁଶାନ୍ତ ସିଂ ରାଜପୁତଙ୍କ ମୃତ୍ୟୁକୁ ୧୦ ଦିନରୁ ଅଧିକ ବିତି ଯାଇଥିବା ବେଳେ ଅନେକ ପ୍ରଶଂସକ ଏହି ସତ୍ୟକୁ ମାନିପାରୁନାହାନ୍ତି । ପଦାର୍ଥ ବିଜ୍ଞାନ ପ୍ରତି ଆଗ୍ରହ ରଖୁଥିବା ଜଣେ ଇଞ୍ଜିନିୟରିଂ ଛାତ୍ର ଟିଭି ଜଗତକୁ ଆସିଥିଲେ ଏବଂ ପରେ ବଲିଉଡ ପରି ଇଣ୍ଡଷ୍ଟ୍ରିରେ ନିଜକୁ ପ୍ରତିଷ୍ଠିତ କରିବାରେ ସଫଳ ହୋଇଥିଲେ ଏବଂ ୧୦ଟି ଚଳଚ୍ଚିତ୍ରରେ ଅଭିନୟ କରିବା ପରେ ତାଙ୍କର ଯାତ୍ରା ଶେଷ କରିଥିଲେ । ତେବେ ନିକଟରେ ଘୋଷଣା କରାଯାଇଛି ଯେ ତାଙ୍କର ଶେଷ ଚଳଚ୍ଚିତ୍ର ଦିଲ ବେଚାରା ଆସନ୍ତା ମାସରେ ଡିଜିଟାଲ ପ୍ଲାଟଫର୍ମରେ ରିଲିଜ ହେବାକୁ ଯାଉଛି, ଯେଉଁଥିପାଇଁ ତାଙ୍କ ପ୍ରଶଂସକମାନେ କ୍ଷୋଭ ପ୍ରକାଶ କରିଛନ୍ତି ।
https://www.instagram.com/p/CBq14feFCKB/?utm_source=ig_embed
ସୁଶାନ୍ତଙ୍କ ମୃତ୍ୟୁ ପରେ ତାଙ୍କ ପ୍ରଶଂସକ ମାନେ କହୁଛନ୍ତି ଯେ ସେମାନେ ସୁଶାନ୍ତଙ୍କ ଶେଷ ଚଳଚିତ୍ରକୁ ଥିଏଟରରେ ଦେଖି ତାଙ୍କୁ ଟ୍ରିବ୍ୟୁଟ ଦେବାକୁ ଚାହୁଛନ୍ତି । କିଛି ପ୍ରଶଂସକ ତ ଏହା ବି କହିଛନ୍ତି ଯେ ସେମାନେ ଏହି ଫିଲ୍ମକୁ ବ୍ଲକ ବଷ୍ଟର ସାବ୍ୟସ୍ତ କରିବାରେ କୌଣସି ମଉକା ଛାଡ଼ିବେ ନାହିଁ । ପୂର୍ବ କିଛି ବର୍ଷ ହେବ ଦେଖିବାକୁ ମିଳିଛି ଯେ ସୋସିଆଲ ମିଡିଆରେ ଯେବେ ବି କୌଣସି ଫିଲ୍ମକୁ ମାଉଥ ପବ୍ଲିସିଟି ମିଳିଛି ସେହି ଫିଲ୍ମ ଜବରଦସ୍ତ ଇନକମ କରିଛି ।
No that's not done.We want #DilBecharaOnBigScreen !! Please convey our messages to the producer & director of the movie. This is the last movie of #SushantSinghRajput atleast one more last time let us watch him on the Big Sceen🙏🏻🙌🏻 #DilBechara #SushantSinghRajput pic.twitter.com/5nx0lGRgPy
— NAKUL GANESHRAO MORE (@morenakul) June 25, 2020
ଯଦି ସୁଶାନ୍ତଙ୍କ ଫିଲ୍ମ କଥା କହିବା ତେବେ ଆମିର ଖାନ ଏବଂ ଅନୁଷ୍କାଙ୍କ ଫିଲ୍ମ ପିକେ ବକ୍ସ ଅଫିସରେ ପ୍ରଥମ ଦିନରେ ପ୍ରାୟ ୨୭ କୋଟି ଟଙ୍କା ଇନକମ କରିଥିଲା । କିନ୍ତୁ ମାଉଥ ପବ୍ଲିସିଟି ପାଇଁ ଏହି ଫିଲ୍ମ ଏତେ ଲୋକପ୍ରିୟ ହୋଇଥିଲା ଯେ ୩୦୦ କୋଟିରୁ ଅଧିକ ଇନକମ କରିଥିବା ଏହା ଭାରତର ପ୍ରଥମ ଫିଲ୍ମ ସାବ୍ୟସ୍ତ ହୋଇଥିଲା ।
This is not fair 😐
We want #DilBechara to release in theaters, so that we'll get a chance to make his last film a #Blockbuster as Tribute to our #SushantSinghRajput ♥️ which will be a tight slap to all those #BollywoodMAFIA 😠 …. !! pic.twitter.com/vtgcfjl46P— Ravindra ✨ (@Ravindra91019) June 25, 2020
ସେହିପରି ଏମ୍ ଏସ୍ ଧୋନୀଙ୍କ ବାୟୋପିକ ପ୍ରଥମ ଦିନରେ ୨୧ କୋଟି ଇନକମ କରିଥିଲା ଯେହେତୁ ଏହି ଫିଲ୍ମକୁ ଭଲ ରିଭ୍ୟୁ ମିଳିଥିଲା ତେଣୁ ଏହା ୧୦୦ କୋଟିରୁ ଅଧିକ ଇନକମ କରିଥିଲା । ଏହା ସୁଶାନ୍ତଙ୍କ ଜୀବନର ପ୍ରଥମ ୧୦୦ କୋଟି ଫିଲ୍ମ ଥିଲା । ଏହା ବ୍ୟତୀତ ସୁଶାନ୍ତଙ୍କ ମଲ୍ଟି ଷ୍ଟାରର ଫିଲ୍ମ ଛିଛୋରେ ପ୍ରଥମ ଦିନରେ ୭.୩ କୋଟି ଟଙ୍କା ଇନକମ କରିଥିଲା ଏବଂ ମାଉଥ୍ ପବ୍ଲିସିଟି ପାଇଁ ଏହି ଫିଲ୍ମ ୧୫୦ କୋଟି ଟଙ୍କାରୁ ଅଧିକ ଇନକମ କରିଥିଲା ।
ଯଦି ଆମେ ଓପନିଂ ଡେ’ ରେ ସର୍ବାଧିକ ଆୟ କରିଥିବା ଚଳଚ୍ଚିତ୍ର ବିଷୟରେ କହିବା, ତେବେ ଆମୀର ଖାନ୍, ଅମିତାଭ ବଚ୍ଚନ ଷ୍ଟାରର୍ ଥଗ୍ସ ଅଫ୍ ହିନ୍ଦୋସ୍ତାନ ଯାହା ରିଲିଜ୍ ହେବାର ପ୍ରଥମ ଦିନରେ ଭାରତରେ ୫୨ କୋଟି ଆୟ କରିଥିଲା । ତେବେ ଏଭଳି ପରିସ୍ଥିତିରେ ସୁଶାନ୍ତଙ୍କ ମୃତ୍ୟୁ ପରେ ତାଙ୍କୁ ଶ୍ରଦ୍ଧାଞ୍ଜଳି ଦେବା ପାଇଁ ପ୍ରଶଂସକ ଥିଏଟରରେ ଭିଡ଼ ଜମାଇଥାନ୍ତେ ଏବଂ ଥଗ୍ସ ଅଫ୍ ହିନ୍ଦୋସ୍ତାନ ରେକର୍ଡ ଭାଙ୍ଗିବାର ଏକ ବଡ଼ ସମ୍ଭାବନା ଥିଲା ।
ସୁଶାନ୍ତଙ୍କ ଶେଷ ଚଳଚ୍ଚିତ୍ର ଏକ ଅତ୍ୟନ୍ତ ଭାବପ୍ରବଣ ପ୍ରେମ କାହାଣୀ-
ଅନେକ ପ୍ରଶଂସକ ଅଛନ୍ତି ଯେଉଁମାନେ କହିଛନ୍ତି ଯେ କରୋନା କାରଣରୁ ଫିଲ୍ମକୁ ଯଦି ବର୍ଷଶେଷ ଆଡ଼କୁ ରିଲିଜ କରିଥାନ୍ତେ ସେଥିରେବି କୌଣସି ଅସୁବିଧା ନଥାନ୍ତା । କାରଣ ସେମାନେ ଥିଏଟରରେ ସେମାନଙ୍କର ପ୍ରିୟ ଅଭିନେତାଙ୍କ ଶେଷ ଚଳଚ୍ଚିତ୍ର ଦେଖିବାକୁ ଚାହୁଁଥିଲେ। ଫକ୍ସ ଷ୍ଟାର ଷ୍ଟୁଡିଓ ପୂର୍ବରୁ ସୁଶାନ୍ତଙ୍କ ଫିଲ୍ମ ଏମଏସ ଧୋନି: ଦ ଅନଟୋଲ୍ଡ ଷ୍ଟୋରୀ ଏବଂ ଛିଛୋରେ ମଧ୍ୟ ପ୍ରସ୍ତୁତ କରିଛି । ଫ୍ୟାନ୍ ମାନେ ଏବେବି ଆଶା କରିଛନ୍ତି ଯେ ନିର୍ମାତାମାନେ ସେମାନଙ୍କ ନିଷ୍ପତ୍ତି ବଦଳାଇବେ । ଏହା ବ୍ୟତୀତ, ଦିଲ ବେଚାରା ବିଷୟବସ୍ତୁ ଅତ୍ୟନ୍ତ ଭାବପ୍ରବଣ ଏବଂ ଦେଶରେ ସଫଳ ଭାବପ୍ରବଣ ପ୍ରେମ କାହାଣୀର ଏକ ସମୃଦ୍ଧ ସଂସ୍କୃତି ରହିଛି । ଏଭଳି ପରିସ୍ଥିତିରେ ଏହି ଚଳଚ୍ଚିତ୍ର ନିଶ୍ଚିତ ଭାବରେ ସୁଶାନ୍ତଙ୍କ କ୍ୟାରିୟରର ସବୁଠାରୁ ବଡ ଚଳଚ୍ଚିତ୍ର ବୋଲି ପ୍ରମାଣିତ ହୋଇପାରିଥାନ୍ତା ।
ଭାଇରାଲ ହେଲା ଅଭିନେତ୍ରୀ ତଥା ନେତ୍ରୀଙ୍କ ଲକଡାଉନ୍ ଫଟୋଶୁଟ୍
କୋଲକାତା: କଂଗ୍ରେସର ସାଂସଦ ଓ ବେଙ୍ଗଲୀ ଅଭିନେତ୍ରୀ ନୁସରତ ଜହାଁ ସୋସିଆଲ ମିଡିଆରେ ଅଧିକାଂଶ ସମୟ ଆକ୍ଟିଭ ରୁହନ୍ତି । ରାଜନୀତିରେ ପ୍ରବେଶ କରିବା ପୂର୍ବରୁ ସେ ନିଜ ଅଭିନୟ ପାଇଁ ବେଶ ଚର୍ଚ୍ଚାରେ ରହୁଥିଲେ । ନିର୍ବାଚନରେ ବେଙ୍ଗଲୀ ଷ୍ଟାର ରାଜନୀତି ମଇଦାନକୁ ଓହ୍ଲାଇ ଅନେକ ସଫଳତା ହାସଲ କରିଛନ୍ତି।
ଅଭିନେତ୍ରୀ ସାଂସଦ ନୁସରତ ଜହାଁଙ୍କର ଭିନ୍ନ ଭିନ୍ନ ଅନ୍ଦାଜରେ ସବୁବେଳେ ଭାଇରାଲ ହେଉଥାଏ । କେତେବେଳେ ସେ ହଟ୍ ଲୁକରେ ନଜର ଆସନ୍ତି ତ କେତେବେଳେ ସେ ଶାଢ଼ୀରେ ଦର୍ଶକଙ୍କୁ ବେହାଲ କରିଦିଅନ୍ତି ।
ଅଭିନେତ୍ରୀ ନୁସରତ ଜାହାଁ ସବୁଠୁ ଅଧିକ ଲାଇମଲାଇଟ୍ରେ ରହିଥାନ୍ତି। ନୁସରତ ଜହାଁ ନିଜ ଲେଟେଷ୍ଟ ଫଟୋଶୁଟ୍ ରେ ଗୋଲ୍ଡେନ୍ ଶାଢ଼ୀରେ ନଜର ଆସିଛନ୍ତି ।
ଏହି ଫଟୋରେ ସେ ବହୁତ ସୁନ୍ଦର ଓ ଆକର୍ଷଣୀୟ ଲାଗୁଛନ୍ତି । ତାଙ୍କର ଏହି ଫଟୋ ଦର୍ଶକଙ୍କ ମଧ୍ୟରେ ବହୁତ ଭାଇରାଲ ହେଉଛି । ତାଙ୍କ ଫ୍ୟାନ୍ସମାନେ ଏହି ଫଟୋକୁ ବହୁତ ପସନ୍ଦ କରୁଛନ୍ତି । ନୁସରତ ନିଜେ ତାଙ୍କ ସୋସିଆଲ ମିଡିଆରେ ଏହି ସବୁ ଫଟୋ ସେୟାର କରିଛନ୍ତି ।
କିଏ ନୁସରତଙ୍କ କେଶର ପ୍ରଶଂସା କରିଛନ୍ତି ତ କିଏ ତାଙ୍କ ଶାଢ଼ୀକୁ ସୁନ୍ଦର କହିଛନ୍ତି । ତାଙ୍କର ଏହି ଫଟୋରେ କିଛି ଫ୍ୟାନ୍ସ ତାଙ୍କୁ ଅପକମିଂ ଫିଲ୍ମ ବିଷୟରେ ମଧ୍ୟ ପଚାରିଛନ୍ତି ।