ମୁମ୍ବାଇ: କରୋନା ମହାମାରୀ ମଧ୍ୟରେ ଏବେ ଆଉ ଏକ ଖବର ସାରା ବିଶ୍ୱରେ ଲୋକଙ୍କ ଦୃଷ୍ଟି ଆକର୍ଷଣ କରିଛି । ଯାହାକୁ ନେଇ ବଲିଉଡ୍ରେ ମଧ୍ୟ ଚର୍ଚ୍ଚା ଆରମ୍ଭ ହୋଇଛି । ପୋଲିସର ବର୍ବରତା କାରଣରୁ ୪୬ ବର୍ଷୀୟ କୃଷ୍ଣକାୟ ବ୍ୟକ୍ତି ଜର୍ଜ ଫ୍ଲୋଏଡଙ୍କ ଜୀବନ ଚାଲିଯାଇଛି । ଏହା ପରେ ଆମେରିକାରେ ପ୍ରତିବାଦ ତୀବ୍ର ହେବାରେ ଲାଗିଛି । ଲୋକମାନେ ରାସ୍ତାକୁ ଓହ୍ଲାଇ ଆନ୍ଦୋଳନ କରୁଛନ୍ତି ।
ତେବେ ହଲିଉଡ୍ଠାରୁ ଆରମ୍ଭ କରି ବଲିଉଡ୍ କଳାକାର ମଧ୍ୟ ଏହି ଘଟଣାକ ନିନ୍ଦା କରିଛନ୍ତି । ଏହାରି ମଧ୍ୟରେ ବଲିଉଡ୍ର ପଙ୍ଗା କୁଇନ୍ ଏହି ଘଟଣାକୁ ତୀବ୍ର ନିନ୍ଦା କରିବା ସହ, ଯେଉଁ ବଲିଉଡ୍ ଷ୍ଟାର୍ମାନେ #BlackLivesMatter କୁ ସମର୍ଥନ କରୁଛନ୍ତି ଏବଂ ଏହାର କ୍ୟାମ୍ପେନ୍ କରୁଛନ୍ତି ସେମାନଙ୍କୁ ମଧ୍ୟ କଡ଼ା ସମାଲୋଚନା କରିଛନ୍ତି ।
ଦେଶର ବିଭିନ୍ନ ପ୍ରସଙ୍ଗରେ କଙ୍ଗନା ନିଜର କିଛି ନା କିଛି ମତ ଦେଉଥିବା ପୂର୍ବରୁ ନଜିର ରହିଛି । ଏହି ପ୍ରସଙ୍ଗରେ ମଧ୍ୟ ସେ ନିଜର ମତ ରଖିଛନ୍ତି । ଅନ୍ୟ ବଲିଉଡ୍ କଳାକାର ମାନଙ୍କଠାରୁ ସେ ଭିନ୍ନ ବୋଲି କୁହାଯାଏ । ନିକଟରେ ସେ ପିଙ୍କଭିଲ୍ଲା ସହିତ ଏକ ସାକ୍ଷାତକାର କରିଥିଲେ । ଏଥିରେ ସେ ମହାରାଷ୍ଟ୍ରରେ ଦୁଇଜଣ ସାଧୁ ଏବଂ ତାଙ୍କ ଡ୍ରାଇଭର ମବ୍ଲିଞ୍ଚିଂର ଶିକାର ହୋଇଥିବା କଥା ଉଠାଇଥିଲେ । ସେ କହିଛନ୍ତି ଯେ, ଯଦି ଜର୍ଜ ଫ୍ଲୋଏଡଙ୍କ ହତ୍ୟାକୁ ଭାରତ ସହ ଯୋଡ଼ା ଯାଏ ତେବେ ନିକଟରେ ମହାରାଷ୍ଟ୍ରରେ ଦୁଇ ସାଧୁଙ୍କ ଲିଞ୍ଚିଂ ହୋଇଥିଲା । କିନ୍ତୁ ଏହି ଘଟଣାରେ କୌଣସି ବଲିଉଡ୍ ସେଲିବ୍ରେଟି ମୁହଁ ଖୋଲିନଥିଲେ । ଆଉ ସବୁଠୁ ବଡ଼ କଥା ହେଲା ଯେଉଁ ସହରରେ ସାଧୁଙ୍କୁ ଲିଞ୍ଚିଂ କରାଯାଇଥିଲା ସେଠାରେ ଅଧିକାଂଶ ସେଲିବ୍ରେଟି ରୁହନ୍ତି ।
କଙ୍ଗନା ଆହୁରି କହିଛନ୍ତି ଯେ, ଲଜ୍ଜାଜନକ କଥା ହେଉଛି, ବଲିଉଡ୍ ସେଲିବ୍ରେଟି ମାନେ ସବୁବେଳେ ହଲିଉଡ୍କୁ ନକଲ କରିବାକୁ ଚେଷ୍ଟା କରନ୍ତି । ଆଉ ଏହା ଦ୍ୱାରା ସେମାନେ ଶସ୍ତା ଲୋକ ପ୍ରିୟତା ହାସଲ କରିବାକୁ ଚାହାନ୍ତି ।
କଙ୍ଗନା ଆହୁରି କହିଛନ୍ତି ଯେ, ଭାରତୀୟଙ୍କ ରକ୍ତରରେ ଦାସତ୍ୱ ଭରି ରହିଛି । ବ୍ରିଟିଶମାନେ ସେଠାରେ ଏକ କ୍ୟାମ୍ପେନ୍ ଚଳାନ୍ତି ଆଉ ଏଠାରେ ସେମାନେ ଏହାକୁ ଅନୁକରଣ କରନ୍ତି ।
