ନବରଙ୍ଗପୁର: କରୋନା ଉଜାଡ଼ିଦେଇଛି ପରିବାର । ତିନିବର୍ଷ ତଳେ ବାପା ଚାଲିଯାଇଥିଲେ, ଏବେ ମାଆ ଚାଲିଗଲା । ଘରେ ଏକା ବଡ଼ ଉଭଣୀ । ଦୂର ରାଇଜକୁ ସାନ ଭଉଣୀ ରୋଜଗାର ପାଇଁ ଯାଇ ଆଉ ଫେରିପାରୁନି । ଟଙ୍କା ପାଇଁ ହାଇଦ୍ରାବାଦରେ ବନ୍ଧା ପଡିଛି ତାର ନୀରିହ ଜୀବନ । ଆଉ ସାନ ଭଉଣୀକୁ ମୁକୁଳାଇବାକୁ ବ୍ଲକ ପ୍ରଶାସନକୁ ନିବେଦନ କରିଛି ବଡ ଭଉଣୀ ।

କରୋନା ଜ୍ୱାଳାରେ ଜାଳିହେଉଛନ୍ତି ଖଟିଖିଆ । ନବରଙ୍ଗପୁର ଚନ୍ଦାହାଣ୍ଡି କେନାଲ୍‌ ସାହିରେ ଦେଖିବାକୁ ମିଳିଛି କରୁଣ ଦୃଶ୍ୟ । ଅନାଦି ଚୌହ୍ଵାନ୍‌ ନାମକ ମହିଳା ସ୍ୱାମୀ ଚାଲିଯିବା ପରେ ୨ ଝିଅଙ୍କୁ ଧରି ବହୁ କଷ୍ଟରେ ଚଳୁଥିଲେ । ପରିବାର ଚଳାଇବା ସହ ନିଜର ଖର୍ଚ୍ଚ ଉଠାଇବା ପାଇଁ ୨ ଝିଅ ଓ ମାଆ ରୋଜଗାର କରିବାକୁ ଅଣ୍ଟା ଭିଡ଼ିଲେ । ଗାଁରେ ରହିଲେ କାମ ମିଳିବନି । ଯଦି ମିଳିବ ତାହା ପେଟକୁ ଦାନା ଯୋଗାଡ଼ କରିବାରେ ନିୟଣ୍ଟିଆ ପଡ଼ିଯିବ । ସେଥିପାଇଁ ଦୂର ରାଇଜକୁ ଯାଇ ରୋଜଗାର କରିବାକୁ ଚିନ୍ତା କରିଥିଲେ ମାଆ ଓ ଝିଅ ।

ତେବେ ସାନଝିଅ ଓ ମାଆ ହାଇଦ୍ରାବାଦର ଇଟାଭାଟିରେ କାମ କରିବା ପାଇଁ ମନସ୍ତ କଲେ, କାମ ପାଇଁ ମଧ୍ୟ ଗଲେ । ହେଲେ ମାଆର ଅଗ୍ରୀମ ଟଙ୍କା ପାଇଁ ସେଠାରେ ବନ୍ଧା ପଡ଼ିଗଲା ସାନ ଝିଅ । ହଠାତ୍‌ ମାଆ ଅନାଦିଙ୍କ ଦେହ ଖରାପ ହେବାରୁ ସେ ମାଲିକ ଠାରୁ କିଛି ଅଗ୍ରୀମ ଆଣିଥିଲେ । ଅଗ୍ରୀମ ଟଙ୍କା ନେଇ ନିଜ ଗାଁକୁ ଚିକିତ୍ସା ପାଇଁ ଚାଲିଆସିଲେ । ଆଣିଥିବା ଟଙ୍କା ମୋ ସାନ ଝିଅ ସୁଝିବ  । ଏହା କହି ମାଲିକ ପାଖାରେ ଝିଅକୁ ଛାଡ଼ି ଆସିଲା ମାଆ । ତେବେ ଘରକୁ ଆସିବା ପରେ ଅନାଦିଙ୍କ ଦେହ ବହୁତ ଖରାପ ହୋଇଥିଲା । ବଡ ଝିଅ ଧାର କରଜ କରି ମାଆର ଚିକିତ୍ସା କରାଇଲା । ହେଲେ ସତ ଚେଷ୍ଟା ପରେ ଶେଷରେ ୪ ତାରିଖରେ ଆଖି ବୁଜିଥିଲା ମାଆ ଅନାଦି  ।

ମାଆକୁ ହରାଇ ଏକା ହୋଇପଡିଛି ବଡ ଝିଅ ପ୍ରିୟଙ୍କା । ଏହାସହ ବାହାର ରାଇଜରେ ଫସିଥିବା ସାନଭଉଣୀକୁ ଫେରାଇ ଅଣିବାକୁ ପ୍ରଶାସନକୁ ବାରମ୍ବାର ନେହୁରା ମଧ୍ୟ ହେଉଛି । ସେପଟେ ପ୍ରଶାସନ ତରଫରୁ ଅସହାୟ ପରିବାରକୁ ପ୍ରାଥମିକ ପର୍ଯ୍ୟାୟରେ ହରିଶ୍ଚନ୍ଦ୍ର ଯୋଜନାରେ ୨ ହଜାର ଟଙ୍କା ଯୋଗାଇ ଦିଆଯାଇଛି । ସେପଟେ ସରକାର ତଥା ପ୍ରଶାସନ ଏହି ପରିବାର ପ୍ରତି ସହାୟତାର ହାତ ବଢାଇବା ସହ ସାନ ଝିଅଙ୍କୁ ଫେରାଇ ଆଣିବାକୁ ଦାବି ହେଉଛି ।

ଭୁବନେଶ୍ୱର: ଦେଶର ବିଭିନ୍ନ ରାଜ୍ୟରେ ରହିଥିବା ଓଡ଼ିଆ ଭାଇ ଭଉଣୀମାନେ ଦୈନିକ ଓଡ଼ିଶା ଫେରୁଛନ୍ତି । ସୋମବାର ୩୦ ହଜାର ୬୧୬ ଜଣ ଓଡ଼ିଆ ଭାଇ ଭଉଣୀ ଓଡ଼ିଶାରେ ପହଞ୍ଚିଛନ୍ତି । ଏ ପର୍ଯ୍ୟନ୍ତ ବାହାର ରାଜ୍ୟଗୁଡ଼ିକରୁ ଓଡ଼ିଶାକୁ ୨ଲକ୍ଷ ୮୬ ହଜାର ୨୦ ଜଣ ପ୍ରବାସୀ ଓଡ଼ିଶା ଫେରିଛନ୍ତି । ସେମାନେ ବସ୍, ଟ୍ରେନ ଓ ଅନ୍ୟ ଯାନବାହନରେ ଆସିଛନ୍ତି । ଅପରପକ୍ଷରେ ରାଜ୍ୟର ବିଭିନ୍ନ ଜିଲ୍ଲାରେ ଅଟକି ରହିଥିବା ୧୦୯୮ ଜଣ ଅନ୍ୟ ରାଜ୍ୟର ଶ୍ରମଜୀବୀଙ୍କୁ ଭୁବନେଶ୍ୱରରୁ ସ୍ୱତନ୍ତ୍ର ଶ୍ରମିକ ଏକ୍ସପ୍ରେସ ଟ୍ରେନ୍‌ରେ ସେମାନଙ୍କ ରାଜ୍ୟକୁ ପଠାଯାଇଛି ।

ସମସ୍ତ ଶ୍ରମିକଙ୍କ ସ୍ୱାସ୍ଥ୍ୟ ପରୀକ୍ଷା ଓ ଷ୍ଟାମ୍ପିଂ ସହିତ ସେମାନଙ୍କୁ ଖାଦ୍ୟ ଓ ପାଣିବୋତଲ ଦିଆଯାଇଛି । କୋଭିଡ -୧୯ ପରିପ୍ରେକ୍ଷୀରେ ଗ୍ରାମାଞ୍ଚଳରେ କ୍ୱାରେଣ୍ଟାଇନ୍‌ ସ୍ୱାସ୍ଥ୍ୟସେବାକୁ ସଶକ୍ତ କରବା ଉଦ୍ଦେଶ୍ୟରେ ୬୭୯୮ ଗ୍ରାମ ପଞ୍ଚାୟତରେ ୧୬ ହଜାର ୬୨୬ଟି ଅସ୍ଥାୟୀ ଚିକିତ୍ସା କେନ୍ଦ୍ର ସ୍ଥାପିତ ହୋଇଛି ।

ଏଥିରେ ମୋଟ ୭ଲକ୍ଷ ୩୧ ହଜାର ୧୩୩ ଶଯ୍ୟାର ବ୍ୟବସ୍ଥା କରାଯାଇଛି । ରାଜ୍ୟରେ କୋଭିଡ ନିୟମ ଏବଂ ମାର୍ଗଦର୍ଶିକ ଉଲ୍ଲଂଘନ କରିଥିବା ଅଭିଯୋଗରେ ମଇ ୨୪ରୁ ମଇ ୨୫ ତାରିଖ ସକାଳ ପର୍ଯ୍ୟନ୍ତ ୨୪ ଘଣ୍ଟା ମଧ୍ୟରେ ୭ଟି ମାମଲା ଦାୟର କରାଯାଇଛି । ଏଥିମଧ୍ୟରୁ ୫ଟି ମାମଲା ଲକ୍‌ଡାଉନ୍‌ ସମ୍ପର୍କିତ ହୋଇଥିବାବେଳେ ୧ଟି ଅନ୍ୟାନ୍ୟ କାରଣ ପାଇଁ ଅଟେ । ବିଭିନ୍ନ ଅଭିଯୋଗରେ ୩୧ ଜଣଙ୍କୁ ଗିରଫ କରାଯାଇଛି ।

ରବିବାର ମଧ୍ୟ ରାତ୍ରୀ ସୁଦ୍ଧା ୧ଲକ୍ଷ ୨୭ ହଜାର ୭୭୬ ଟି ନମୁନା କୋଭିଡ ପରୀକ୍ଷା କରାଯାଇଛି । ବର୍ତ୍ତମାନ ସୁଦ୍ଧା ସମୁଦାୟ ୧୪୩୮ ଜଣ ପଜିଟିଭ୍‌ ଚିହ୍ନଟ ହୋଇଛନ୍ତି । ୬୪୯ ଜଣ ରୋଗୀ ସମ୍ପୂର୍ଣ୍ଣ ସୁସ୍ଥ ହୋଇଛନ୍ତି ଏବଂ ଡିସଚାର୍ଜ ହୋଇଛନ୍ତି । ୭ଜଣ କୋଭିଡ ରୋଗୀଙ୍କ  ମୃତ୍ୟୁ ହୋଇଛି । ସକ୍ରିୟ ଥିବା ସଂକ୍ରମିତଙ୍କ ସଂଖ୍ୟା ୭୮୨ ରହିଛି । ୯୮୯ ଜଣ ହସ୍ପିଟାଲ ଆଇସୋଲେସରେ ଅଛନ୍ତି । ଏ ନେଇ ରାଜ୍ୟ ସୂଚନା ଓ ଲୋକ ସମ୍ପର୍କ ବିଭାଗ ପକ୍ଷରୁ ପ୍ରେସ ବିଜ୍ଞପ୍ତି ଜରିଆରେ ସୂଚନା ଦିଆଯାଇଛି  ।

ଭୁବନେଶ୍ୱର: ଟ୍ୱିନ୍ ସିଟି ବାସୀଙ୍କ ପାଇଁ ଖୁସି ଖବର । ମଙ୍ଗଳବାର ୨୬ ତାରିଖରୁ ଆରମ୍ଭ ହେବ ମୋ ବସ୍ ସେବା । ରାଜ୍ୟ ସରକାରଙ୍କ ଅନୁମତିଚ ପରେ ମଙ୍ଗଳବାରଠାରୁ ଆରମ୍ଭ ହେବାକୁ ଯାଉଛି ମୋ ବସ୍ ସେବା । ତେବେ ଏହା କେବଳ ସକାଳ ୭ ରୁ ସନ୍ଧ୍ୟା ୭ଟା ଯାଏଁ ୭ଟି ରୁଟରେ ଚାଲିବ  । ବିନା ଏସି ବସ୍‌ ଏହି ରୁଟରେ ଚାଲିବ ବୋଲି ସ୍ଥିର ହୋଇଛି । ଆଗାମୀ ଦିନରେ ଆହୁରି ଅଧିକା ରୁଟରେ ବସ୍ ଚଳାଚଳ କରିବ ବୋଲି ପ୍ରବନ୍ଧକ ଦିପ୍ତୀ ମହାପାତ୍ର କହିଥିଲେ । ଏୟାରପୋର୍ଟ-ସିଡିଏ, ନନ୍ଦନବିହାର-ଲିଙ୍ଗିପୁର ରୁଟରେ ବସ୍‌ ଚାଳିବ । ସେହିଭଳି ମାଷ୍ଟରକ୍ୟାଣ୍ଟିନ- ସିଡିଏ, ମାଷ୍ଟରକ୍ୟାଣ୍ଟିନ- ଖୋର୍ଦ୍ଧା ରୁଟରେ ଚାଲିବ ମୋ ବସ୍‌ । ମାଣ୍ଟରକ୍ୟାଣ୍ଟିନ-ସମ ହସ୍ପିଟାଲ, ଡୁମୁଡୁମା- ମଞ୍ଚେଶ୍ୱର ଏବଂ ମାଷ୍ଟରକ୍ୟାଣ୍ଟିନରୁ ଏମସ୍‌ ମଧ୍ୟରେ ଚଳାଚଳ କରିବ ମୋ ବସ୍‌ ।

ବସ୍‌ରେ  ଯେତିକି ସିଟ ରହିଛି ସେତିକି ଲୋକ ଯାଇପାରିବେ । ବସ୍‌ ଭିତରେ ଛିଡ଼ା ହୋଇ ଯାଇପାରିବେ ନାହିଁ ଯାତ୍ରୀ ବୋଲି ଶ୍ରୀ ମହାପାତ୍ର ଜଣାଇଥିଲେ । ଏଥିପାଇଁ ସମସ୍ତ ଗାଇଡ୍ ଓ କ୍ୟାପଟେନ ମାନଙ୍କୁ ନିର୍ଦ୍ଦେଶ ଦିଆଯାଇଛି ଯେ, ସିଟ୍ ଖାଲି ନଥିଲେ ଯାତ୍ରୀଙ୍କୁ ଉଠାଯିବ ନାହିଁ । ଯାତ୍ରୀମାନଙ୍କ ପାଇଁ ମାସ୍କ ବାଧ୍ୟତାମୂଳକ ରହିଛି ବୋଲି ସୂଚନା ଦିଆଯାଇଛି । ବିନା ମାସ୍କ ପିନ୍ଧିଥିବା ଯାତ୍ରୀ ବସ୍‌ ଭିତରେ ଯାତ୍ରା କରିପାରିବେ ନାହିଁ ବୋଲି କଡ଼ା ନିଷ୍ପତ୍ତି ରହିଛି ।

ଯାତ୍ରୀମାନେ ନିଜର ଯତ୍ନ ନିଅନ୍ତୁ ଏବଂ ଯାତ୍ରା ସମୟରେ ନିଜ ସାନିଟାଇଜର ନିଜ ସାଥିରେ ରଖନ୍ତୁ ବୋଲି କ୍ରୁଟ୍ ପକ୍ଷରୁ ପରାମର୍ଶ ଦିଆଯାଇଛି । ଟିକେଟର ସଠିକ୍ ମୁଲ୍ୟ ମୁତାବକ ଖୁଚୁରା ଦେବାକୁ ବିଶେଷ ଅନୁରୋଧ କରାଯାଇଛି । ଆଗାମୀ ଦିନରେ ଡିଜିଟାଲ୍ ଟିକେଟ ବୁକିଂ ସେବାକୁ ଅଧିକାରୁ ଅଧିକା ସମୃଦ୍ଧ କରିବା ପାଇଁ ଏବଂ ନୋଟ ପ୍ରଚଳନକୁ କମ୍ କରିବା ପାଇଁ କ୍ରୁଟ୍ ତରଫରୁ ଚେଷ୍ଟା ଚାଲିଥିବା କୁହାଯାଇଛି । ଖୁବଶୀଘ୍ର TAP & PAY CARD,QR Code ର ସେବା ଆରମ୍ଭ ହେବା ନେଇ କୁହାଯାଇଛି ।