ନୂଆଦିଲ୍ଲୀ: କରୋନ ଭାଇରସ୍ କେବଳ ଜୀବନ ଉପରେ ଆକ୍ରମଣ କରୁନାହିଁ ଏହା ମଧ୍ୟ ଜୀବିକାକୁ ପ୍ରଭାବିତ କରିଛି । ମଧ୍ୟବିତଙ୍କଠାରୁ କୃଷକ ପୁଣି ଶିଳ୍ପପତି । ସମସ୍ତେ ଏହାଦ୍ୱାରା ପ୍ରଭାବିତ ହୋଇଛନ୍ତି । ଏମିତିରେ କେନ୍ଦ୍ର ସରକାର ଅର୍ଥନୀତି ପାଇଁ ସଂଜିବନୀ ବୁଟି ନେଇ ଆସିଛନ୍ତି । ଯାହାର ନାମ ହେଉଛି ଆତ୍ମନିର୍ଭର ଭାରତ । ୨୦ ଲକ୍ଷ କୋଟିର ଏହି ପ୍ୟାକେଜ୍ ପାକିସ୍ତାନ ବଜେଟ୍ର ୬ ଗୁଣରୁ ଅଧିକ । ଏମିତିରେ ଆପଣଙ୍କ ମନରେ ପ୍ରଶ୍ନ ଉଠୁଥିବ କାହାକୁ, କେଉଁ ସେକ୍ଟରକୁ କେତେ ମିଳିବ ? ଆସନ୍ତୁ ୫ଟି ବିନ୍ଦୁରେ ଏହାର ଉତ୍ତର ଜାଣିବାକୁ ଚେଷ୍ଟା କରିବା
୧. ମଧ୍ୟବିତଙ୍କୁ ଏମିତି ମିଳିପାରେ ଲାଭ
ପ୍ରଧାନମନ୍ତ୍ରୀ ମୋଦି ନିଜ ସମ୍ବୋଧନରେ ସ୍ପଷ୍ଟ ଭାବେ କହିଛନ୍ତି ଯେ, ଏହି ପ୍ୟାକେଜ୍ରେ ମଧ୍ୟବିତଙ୍କ ହିତ କଥା ମଧ୍ୟ ଚିନ୍ତା କରାଯାଇଛି । ସେ କହିଛନ୍ତି ଯେ, ଏହି ପ୍ୟାକେଜ୍ ଆମ ଦେଶର ମଧ୍ୟବିତଙ୍କ ପାଇଁ ମଧ୍ୟ, ଯେଉଁମାନେ ସଚ୍ଚୋଟତାର ସହ ଟ୍ୟାକ୍ସ ଦେଇଥାନ୍ତି । ଦେଶରେ ସରକାରୀ ଚାକିରିଆଙ୍କ ସଂଖ୍ୟା ଜନସଂଖ୍ୟାରେ ୧ରୁ ୨ ପ୍ରତିଶତ ହୋଇଥିବା ବେଳେ ବେସରକାରୀ କ୍ଷେତ୍ରରେ ୨୫ରୁ ୩୦ ପ୍ରତିଶତ ଚାକିରି କରିଥାନ୍ତି । ଅନେକ କଂପାନି ଦରମାରେ ୨୫ରୁ ୩୦ ପ୍ରତିଶତ କାଟ କରିଥିବା ବେଳେ ଦରମା ବୃଦ୍ଧି ରୋକି ଦେଇଛନ୍ତି । କିଛି କଂପାନି ମଧ୍ୟ ନିଜ କର୍ମଚାରୀଙ୍କୁ ବିନା ଦରମାରେ ଛୁଟିରେ ପଠାଇ ଦେଇଛନ୍ତି । ଏମିତିରେ ମୋଦି ସରକାର ଚାକିରିଆଙ୍କ ପାଇଁ କର ରିହାତିର ଘୋଷଣା କରି ପାରନ୍ତି । ଯେମିତି ଲୋକଙ୍କ ପାଖରେ ଅଧିକ ଟଙ୍କା ବଳକା ରହିବ । ଅଧିକ ଟଙ୍କା ରହିଲେ ସେମାନେ ଖର୍ଚ୍ଚ ମଧ୍ୟ କରିବେ । ଯାହା ଅର୍ଥବ୍ୟବସ୍ଥାକୁ ଗତି ପ୍ରଦାନ କରିବ । ଜିନିଷ ଚାହିଦା ବଢିଲେ ରୋଜଗାର ମଧ୍ୟ ବଢିବ ।
୨.MSME କଣ ପାଇବ ?
କୁହାଯାଉଛି ଯେ, ମୋଦି ସରକାରଙ୍କ ୨୦ ଲକ୍ଷ କୋଟି ଟଙ୍କାର ଏହି ପ୍ୟାକେଜ୍ରେ ସବୁଠୁ ଅଧିକ ଧ୍ୟାନ ଏମ୍ଏସ୍ଏମ୍ଇକୁ ଦିଆଯିବ । ଏହି ସେକ୍ଟରରେ ସବୁଠୁ ଅଧିକ ରୋଜଗାର ଉତ୍ପନ ହୋଇଥାଏ । ଅନେକ ଏମ୍ଏସ୍ଏମ୍ଇ ପଂଜିକୃତ ହୋଇନଥାନ୍ତି, ତେଣୁ ସେଠାରେ କାମ କରୁଥିବା ଲୋକଙ୍କ ସଂଖ୍ୟା ବାବଦରେ ସଠିକ ସୂଚନା ମଧ୍ୟ ନାହିଁ । ଲକଡାଉନ୍ କାରଣରୁ ସବୁକିଛି ବନ୍ଦ ହୋଇଛି । ଫଳରେ ଅର୍ଥନୈତିକ ଗତିବିଧି ଧୀମା ହୋଇଛି । ଅର୍ଥନୀତିକୁ ଗତି ପ୍ରଦାନ କରିବା ପାଇଁ ପୁସ୍ ଷ୍ଟାର୍ଟ ଦେବାର ଆବଶ୍ୟକତା ରହିଛି । ଅନୁମାନ କରାଯାଉଛି ଯେ, ଏହି କ୍ରମରେ ମୁଦ୍ରା ଲୋନର ପରିସୀମକୁ ବଢାଯାଇପାରେ ଓ ଏହି ସେକ୍ଟର ପାଇଁ ବିନା ଗ୍ୟାରେଣ୍ଟିରେ ଲୋନ୍ ମଧ୍ୟ ଦିଆଯାଇପାରେ । ଏହାସହ ପ୍ରାୟ ୩ ଲକ୍ଷ କୋଟି ଟଙ୍କାର ଅର୍ଥନୈତିକ ପ୍ୟାକେଜ୍ ଏହି ସେକ୍ଟରକୁ ଦିଆଯିବ ବୋଲି ଅନୁମାନ କରାଯାଉଛି ।
୩. କୃଷକଙ୍କ ପାଇଁ ଏମିତ ଦିଆଯାଇ ପାରେ ସୁବିଧା
କରୋନା କାରଣରୁ କୃଷିକ୍ଷେତ୍ର ପ୍ରଭାବିତ ହୋଇଛି । କୁକୁଡା, ମାଛ ଓ ପରିବା ଚାଷ ପ୍ରଭାବିତ ହୋଇଛି । କୃଷକଙ୍କ ଅବସ୍ଥା ଖରାପ ହୋଇଯାଇଛି । କୃଷକଙ୍କ ପାଇଁ ମୋଦି ସରକାର କରଜ ଛାଡ କିମ୍ବା ସେମାନଙ୍କ ଖାତାକୁ ସିଧାସଳଖ ଟଙ୍କା ପଠାଇ ପାରନ୍ତି ।
୪.କୁଟୀର ଶିଳ୍ପକୁ ଏମିତି ଦିଆଯାଇ ପାରେ ସାହରା
ପିଏମ୍ ମୋଦି ନିଜ ଭାଷଣରେ କୁଟୀର ଶିଳ୍ପ କଥା କହିଥିଲେ । ଭାରତର ଗ୍ରାମୀଣ ଅର୍ଥବ୍ୟବସ୍ଥା କୁଟୀର ଶିଳ୍ପ ଉପରେ ନିର୍ଭର କରିଥାଏ । ଲକଡାଉନ୍ କୁଟୀର ଶିଳ୍ପକୁ ପ୍ରଭାବିତ କରିଛି । ପିଏମ୍ ମୋଦି ଏଭଳି ଲୋକଙ୍କୁ କିଛି ଆର୍ଥିକ ସାହାଯ୍ୟ ଦେଇ ପାରନ୍ତି ବୋଲି ଅନୁମାନ କରାଯାଉଛି ।
୫. ଏସବୁର ଅସଲ ଲକ୍ଷ୍ୟ କଣ ?
ପ୍ୟାକେଜ୍ ଘୋଷଣାର ଅସଲ ଲକ୍ଷ୍ୟ ହେଉଛି ଦେଶର ଅର୍ଥନୀତିକୁ ଗତି ପ୍ରଦାନ କରିବା । ଅର୍ଥନୀତିର ସବୁ ସେକ୍ଟର ପୁଣିଥରେ ନିଜ ଟ୍ରାକ୍କୁ ଫେରନ୍ତୁ ତାହା ହେଉଛି ସରକାରଙ୍କ ଲକ୍ଷ୍ୟ । ଅର୍ଥନୀତି ନିଜ ଟ୍ରାକକୁ ଫେରିଲେ ନୂଆ ରୋଜଗାର ସୃଷ୍ଟି ହେବ । ସବୁଠାରୁ ଅଧିକ ଧ୍ୟାନ ଗ୍ରାମୀଣ ଭାରତ ଉପରେ ଦେବାକୁ ପଡିବ । କାରଣ ଗାଁରେ ଲୋକଙ୍କ ପାଖରେ ଅଧିକ ଟଙ୍କା ନାହିଁ । ତେଣୁ ଚାହିଦା କମ୍ ରହିଛି । ବାଇଟ୍ ଗୁଡସ୍ ଅର୍ଥାତ ଏସି, ଫ୍ରିଜ୍ ଭଳି ସାମଗ୍ରୀର ଚାହିଦା ସହରରେ ଅଧିକ ଥାଏ । କିନ୍ତୁ ଗ୍ରାମରେ ଏମିତି ଦ୍ରବ୍ୟର ଚାହିଦା କମ୍ ଥାଏ, କାରଣ ଲୋକଙ୍କ ପାଖରେ କିଣିବା ପାଇଁ ଟଙ୍କା ନଥାଏ । ଏବେ ସହରରେ ଲୋକ ନୂଆ ଫ୍ରିଜ୍ କିମ୍ବା ୱାସିଂ ମେସିନ୍ କିଣିବା ପ୍ରାୟତଃ ଅସମ୍ଭବ ଲାଗୁଛି । ଅଧିକରୁ ଅଧିକ ସହରରେ ଲୋକ ପୁରୁଣା ସାମଗ୍ରୀ ବିକ୍ରି କରି ନୂଆ କିଣିବେ କିନ୍ତୁ ଗ୍ରାମୀଣ ଭାରତରେ ଏହାର ଚାହିଦା ଅଧିକ ବଢିପାରେ । ତେବେ ସର୍ତ୍ତ ହେଲା ଗ୍ରାମରେ ଲୋକଙ୍କ ପକେଟରେ ନଗଦ ଟଙ୍କା ରହିବା ଦରକାର । ଗାଁକୁ ଅଧିକ ଟଙ୍କା ଗଲେ ଚାହିଦା ବଢିବ । ଚାହିଦା ବଢିଲେ ଅର୍ଥନୀତି ଗତିମାନ ହେବ । ଅର୍ଥନୀତି ଗତିମାନ ହେଲେ ନୂଆ ରୋଜଗାର ସୃଷ୍ଟି ହେବ କିମ୍ବା ପୁରୁଣା ରୋଜଗାର ଲୋପ ପାଇବ ନାହିଁ ।
