ଦିଗପହଣ୍ଡି: କରୋନା ସଂକ୍ରମଣ ରୋକିବାକୁ ସରକାର ଲକଡାଉନକୁ କଡ଼ାକଡ଼ି କରିଛନ୍ତି । ଭୋଜିଭାତ ଉପରେ ପ୍ରତିବନ୍ଧକ ଲାଗିଛି । ଗଞ୍ଜାମ ଜିଲ୍ଲାରେ କରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇ ୧୨୫ରେ ପହଞ୍ଚିଲାଣି । ତଥାପି କେତେକ ଅମାନିଆ ସୁଧୁରୁନାହାଁନ୍ତି । ପାଟପୁର ଥାନା ଅଞ୍ଚଳରେ ଭୋଜି କରୁଥିବା ବେଳେ ପୋଲିସ ୮ ଜଣଙ୍କୁ ଗିରଫ କରିଛି ।
ପାଟପୁର ଥାନା ଅନ୍ତର୍ଗତ ଗୋକର୍ଣ୍ଣ ମେରିପଲ୍ଲୀରେ ମଦ, ମାଂସ ଭୋଜି ବେଳେ ପୋଲିସ ଚଢ଼ାଉ କରିଥିଲା । ଭୋଜି ଭାତ କରି ଜୁଆ ଆଡ୍ଡା ଚାଲିଥିଲା । ପୋଲିସ ୮ ହଜାର ଟଙ୍କା ସହ ହଣ୍ଡାହାଣ୍ଡି, ଗ୍ୟାସ୍ ଏବଂ ଚୁଲା ଜବତ କରିଛି ।
ଅନୁଗୁଳ: ରାଜ୍ୟ ସରକାର ବାହାର ରାଜ୍ୟର ଫସିଥିବା ଓଡ଼ିଆମାନଙ୍କୁ ଫେରାଇ ଆଣୁଛନ୍ତି । ତେବେ, ପ୍ରବାସୀମାନେ ଅଧିକାଂଶ ସ୍ଥାନରେ ନିୟମ ମାନୁନାହାଁନ୍ତି । ନିଜେ ସଂକ୍ରମିତ ହେବା ସହ ଅନ୍ୟମାନଙ୍କ ଜୀବନକୁ ବିପନ୍ନ କରିବାକୁ ଉଦ୍ୟମ କରୁଛନ୍ତି । ସୁରତରୁ ଓଡ଼ିଶା ଆସୁଥିବା ଏକ ଟ୍ରେନରୁ ପ୍ରାୟ ୨୦ ଜଣ ପ୍ରବାସୀ ଓଡ଼ିଆ ଖସି ପଳାଇଛନ୍ତି ।
ଅନୁଗୁଳ ଜିଲ୍ଲାର ମଝିକା ନିକଟରେ ସୁରତରୁ ପ୍ରବାସୀ ଓଡ଼ିଆଙ୍କୁ ନେଇ ଆସୁଥିବା ଟ୍ରେନର ଚେନ୍ ଟଣାଯାଇଛି । ଟ୍ରେନ୍ ଚେନ୍ ଟାଣିବା ପରେ ପ୍ରାୟ ୨୦ ଜଣ ପ୍ରବାସୀ ଟ୍ରେନରୁ ଖସି ଯାଉଥିବା ବେଳେ ସ୍ଥାନୀୟ ଗ୍ରାମବାସୀ ୬ ଜଣଙ୍କୁ କାବୁ କରି ପୋଲିସ ଜିମା ଦେଇଛନ୍ତି ।
ଟ୍ରେନ୍ ଏବଂ ବିମାନ ଚଳାଚଳ ନେଇ ପ୍ରଧାନମନ୍ତ୍ରୀଙ୍କୁ ରିପୋର୍ଟ ଦେଲା ମନ୍ତ୍ରୀ ସ୍ତରୀୟ କମିଟି
ଧରାପଡ଼ିଥିବା ୬ ଜଣଙ୍କ ମଧ୍ୟରୁ ୩ ଜଣ ଦେବଗଡ଼ ଜିଲ୍ଲାର ହୋଇଥିବା ଜଣାପଡ଼ିଛି । ତେବେ, ଅନ୍ୟମାନଙ୍କ ସନ୍ଧାନ ମିଳିନାହିଁ । ପୋଲିସ ଖୋଜାଖୋଜି କରୁଛି ।
ନୂଆଦିଲ୍ଲୀ: ଦେଶରେ କରୋନା ମହାମାରୀ ଥମିନଥିବା ବେଳେ ଭାରତୀୟ ରେଳବାଇ ଏକ ବଡ଼ ନିଷ୍ପତ୍ତି ନେଇଛି । ରେଳ ମନ୍ତ୍ରାଳୟ ଅନୁସାରେ, ରେଳବାଇ ମେ ୧୨ ତାରିଖରୁ ପାସେଞ୍ଜର ଟ୍ରେନ୍ ସେବା ଆରମ୍ଭ କରିବ । ପ୍ରଥମ ପର୍ଯ୍ୟାୟରେ ଦେଶର ବିଭିନ୍ନ ସ୍ଥାନକୁ ୩୦ଟି ଟ୍ରେନ୍ ଚାଲିବ ।
Indian Railways plans to gradually restart passenger train operations from 12th May, initially with 15 pairs of trains (30 return journeys): Ministry of Railways pic.twitter.com/kCj5b3GDaV
— ANI (@ANI) May 10, 2020
ଏହି ସ୍ୱତନ୍ତ୍ର ଟ୍ରେନ୍ ସବୁ ନୂଆଦିଲ୍ଲୀରୁ ଦିବ୍ରୁଗଡ଼, ଅଗରତାଲା, ହାୱଡ଼ା, ପାଟନା, ବିଳାସପୁର, ରାଞ୍ଚି, ଭୁବନେଶ୍ୱର, ସିକନ୍ଦରାବାଦ, ବେଙ୍ଗଳୁରୁ, ଚେନ୍ନାଇ, ଥିରୁଭନନ୍ଥପୁରମ, ମଦଗାଓଁ, ମୁମ୍ବାଇ ସେଣ୍ଟ୍ରାଲ୍, ଅହମଦାବାଦ ଓ ଜମ୍ମୁ ତାୱିକୁ ଚଳାଚଳ କରିବ । ଗୋଟିଏ ଟ୍ରେନ୍ ଦିଲ୍ଲୀରୁ ଗନ୍ତବ୍ୟ ସ୍ଥଳକୁ ଆସିବାକୁ ଥିବାବେଳେ ଅନ୍ୟଟି ଉପରୋକ୍ତ ସ୍ଥାନରୁ ଦିଲ୍ଲୀ ଅଭିମୁଖେ ଯାତ୍ରା କରିବ ।
ଏଥିପାଇଁ ଆଇଆରସିଟିସି ୱେବସାଇଟରେ ବୁକିଂ ଆରମ୍ଭ ହେବ । ୧୧ ତାରିଖ ଅପରାହ୍ଣ ୪ଟାରୁ ଆଇଆରସିଟିସି ୱେବସାଇଟରେ ଟିକେଟ୍ ମିଳିବ । ଏନେଇ ରେଳ ମନ୍ତ୍ରାଳୟ ପକ୍ଷରୁ ସୂଚନା ଦିଆଯାଇଛି । ତେବେ, ଯାତ୍ରା ସମୟରେ ମାସ୍କ ପିନ୍ଧିବା ସହ ସାମାଜିକ ଦୂରତ୍ୱ ରକ୍ଷା ଉପରେ ବିଶେଷ ଧ୍ୟାନ ଦିଆଯିବ ।
ଟ୍ରେନ୍ ଏବଂ ବିମାନ ଚଳାଚଳ ନେଇ ପ୍ରଧାନମନ୍ତ୍ରୀଙ୍କୁ ରିପୋର୍ଟ ଦେଲା ମନ୍ତ୍ରୀ ସ୍ତରୀୟ କମିଟି
ବର୍ଣ୍ଣ: ମହାମାରୀ କରୋନା ଯୋଗୁଁ ଦୁନିଆର କେତକ ଦେଶର ଅବସ୍ଥା ବହୁତ ଖରାପ ହୋଇଯାଇଛି । ସବୁଠାରୁ ଧନୀ ଦେଶ କୁହାଯାଉଥିବା ୟୁରୋପୀୟ ଦେଶ ସ୍ୱିଜରଲାଣ୍ଡର ଲୋକ ବି ମାଗଣା ଖାଇବା ପାଇବା ପାଇଁ ଧାଡ଼ିରେ ଛିଡ଼ା ହେଉଛନ୍ତି । ଅନ୍ତର୍ଜାତୀୟ ନ୍ୟୁଜ୍ ଏଜେନ୍ସି ଅନୁସାରେ, ଶନିବାର ଜେନିଭାରେ ଏକ ହଜାରରୁ ଅଧିକ ଲୋକ ଖାଇବା ପାଇଁ ଏମିତି ଧାଡ଼ିରେ ଛିଡ଼ା ହୋଇଥିଲେ ।
ସ୍ୱିଜରଲାଣ୍ଡରେ ଏବେ ଯାଏଁ କରୋନାର ୩୦ ହଜାରରୁ ଅଧିକ ସଂକ୍ରମଣ ମାମଲା ଚିହ୍ନଟ ହୋଇଛି । ୧୮୦୦ରୁ ଅଧିକ ଆକ୍ରାନ୍ତଙ୍କ ମୃତ୍ୟୁ ହୋଇଛି । ଯେତେବେଳେ କି ସ୍ୱିଜରଲାଣ୍ଡର ଜନସଂଖ୍ୟା ପ୍ରାୟ ୮୬ ଲକ୍ଷ । କରୋନା ପ୍ରଭାବରେ ଜେନିଭାର ଲୋକ ଏକ କିଲୋମିଟର ଲମ୍ବା ଲାଇନରେ ଛିଡ଼ା ହୋଇ ଖାଇବା ପ୍ୟାକେଟ୍ ନେଇଥିଲେ । ସକାଳ ୫ଟାରୁ ଲୋକମାନେ ଲାଇନରେ ଛିଡ଼ା ହୋଇଥିବା ଦେଖିବାକୁ ମିଳିଥିଲା ।
୨୦୧୮ ମସିହାର ଏକ ରିପୋର୍ଟ ଅନୁସାରେ, ୮୬ ଲକ୍ଷ ଜନସଂଖ୍ୟା ବିଶିଷ୍ଟ ଦେଶରେ ମାତ୍ର ୬.୬ ଲକ୍ଷ ଲୋକ ଗରିବ ଥାନ୍ତି । ବିଶେଷକରି ଏକୁଟିଆ ପରିବାର ଓ କମ୍ ପାଠ ପଢ଼ିଥିବା ଲୋକଙ୍କୁ ଚାକିରି ପାଇବାରେ ଅସୁବିଧା ହୁଏ । ସ୍ୱିସ୍ ବ୍ୟାଙ୍କ ମୁତାବକ, ତିନି ଜଣିଆ ପରିବାର ଚଳିବା ପାଇଁ ଜେନେଭା ଦେଶର ଏକ ମହଙ୍ଗା ସହର ।
ମାଆକୁ କରୋନା, ଦୁର୍ଘଟଣାରେ ବାପାଙ୍କ ମୃତ୍ୟୁ: ଶବ ପାଖେ ବସି କାନ୍ଦୁଛି ଛୁଆ
ମୁମ୍ବାଇ: ଖୁବ କମ ସମୟ ମଧ୍ୟରେ ନିଜ ପରିଶ୍ରମ ଯୋଗୁଁ ବଲିଉଡ ଅଭିନେତ୍ରୀ ଆଲିୟା ଭଟ୍ଟ ବେଶ ସଫଳତା ହାସଲ କରିପାରିଛନ୍ତି । ଆଜି ବଲିଉଡର ସେ ଜଣେ ଆଗଧାଡିର ଅଭିନେତ୍ରୀ ଭାବେ ପରିଚିତ । କମ ବୟସରେ ସେ ବଲିଉଡରେ ପାଦ ଦେଇ ଖୁବ ପ୍ରତିଷ୍ଠା ଲାଭ କରିଛନ୍ତି । କରୋନା ଯୋଗୁଁ ଏବେ ଚାରିଆଡେ ଲକଡାଉନ୍ ଚାଲିଛି । ଏଥିପାଇଁ ଏବେ ସମସ୍ତେ ନିଜ ନିଜ ଘରେ କ୍ୱାରେଣ୍ଟାଇନ୍ ରେ ଅଛନ୍ତି । ଏଥି ସହିତ, ସେଲିବ୍ରିଟିମାନଙ୍କର ମଧ୍ୟ ଫିଲ୍ମ ଓ ସିରିଏଲ ପାଇଁ ସୁଟିଂ ବନ୍ଦ ହୋଇଯାଇଛି । ଏହି ପରିସ୍ଥିତିରେ ସେଲିବ୍ରିଟିମାନେ ସୋସିଆଲ ମିଡିଆରେ ବହୁତ ଆକ୍ଟିଭ ରହୁଛନ୍ତି। କିଏ ଗୀତ ଗାଉଛି, ତ କିଏ ଡାନ୍ସ କରୁଛି ତ ଅନ୍ୟପକ୍ଷରେ କିଏ ନିଜ ଥ୍ରୋବ୍ୟାକ୍ ଫଟୋ ଏବଂ ଭିଡିଓ ସୋସିଆଲ ମିଡିଆରେ ପୋଷ୍ଟ କରୁଛନ୍ତି । ଯାହା ଏବେ ଭାଇରାଲ ହେବାରେ ଲାଗିଛି ।
ନିକଟରେ ବଲିଉଡ ଅଭିନେତ୍ରୀ ଆଲିୟା ଭଟ୍ଟ ନିଜ ଥ୍ରୋବ୍ୟାକ୍ ଭିଡିଓ ସେୟାର କରିଛନ୍ତି ଯାହା ଏବେ ଭାଇରାଲ ହେବାରେ ଲାଗିଛି । ସେୟାର କରିଥିବା ଭିଡିଓରେ ଆଲିୟା ମାତ୍ର ୮ ବର୍ଷର ଥିଲେ । ପ୍ରତ୍ୟେକ ଥର ଭଳି ଏହି ଭିଡିଓରେ ମଧ୍ୟ ଆଲିୟା କ୍ୟୁଟ୍ ଲାଗୁଛନ୍ତି । ଏହି ଶୋ’ ସୁରେଶ ଓବରୋଏ ହୋଷ୍ଟ କରୁଥିଲେ । ଏହି ସମୟରେ ସେ ଆଲିଆ ଏବଂ ତାଙ୍କ ଭଉଣୀ ଶାହିନଙ୍କୁ ସେଟରେ ପଚାରିଥିଲେ ଯେ ଭବିଷ୍ୟତରେ ସେମାନେ କଣ ହେବାକୁ ଚାହୁଁଛନ୍ତି । ଏନେଇ ଆଲିଆ ଖୁବ ଶୀଘ୍ରରେ ଉତ୍ତର ଦେଇଥିଲେ ଯେ ‘ସେ ଜଣେ ଅଭିନେତ୍ରୀ ହେବେ’ । ଶାହିନ୍ ଅଭିନେତ୍ରୀ ହେବାକୁ କୌଣସି ଇଚ୍ଛା ପ୍ରକାଶ କରିନଥିବା ବେଳେ ସେ ଲେଖକ ହେବାକୁ ଚାହୁଁଛନ୍ତି ବୋଲି କହିଥିଲେ।
ଏହି ଶୋ’ରେ ସୋନି ମହେଶଙ୍କ ମଦ୍ୟପାନର ନିଶା ବିଷୟରେ ମଧ୍ୟ କହିଥିଲେ । ମହେଶ ଭଟ୍ଟ ଅତ୍ୟଧିକ ମଦ ପିଉଥିଲେ । ତେବେ ଶାହିନ ଜନ୍ମ ହେବା ପରେ ମହେଶଙ୍କ ଏହି ବଦଅଭ୍ୟାସ ଛାଡିଥିଲା । ମହେଶ ଭଟ୍ଟ ମଧ୍ୟ ଏହି ଶୋ’ରେ ଶାହିନ୍ଙ୍କ ଜନ୍ମ ଦିନର ପୁରା ବାର୍ତ୍ତା ବାଣ୍ଟିଥିଲେ । ଯେତେବେଳେ ସେ ଶାହିନଙ୍କୁ କୋଳରେ ଉଠାଉଥିଲି, ସେତେବେଳେ ସେ ତାଙ୍କଠୁ ଦୂରେଇ ଯାଉଥିଲେ କାରଣ ତାଙ୍କଠୁ ମଦର ଗନ୍ଧ ଆସୁଥିଲା । ଏହା ମହେଶଙ୍କୁ ଅନେକ କଷ୍ଟ ଦେଇଥିଲା । ଏହା ପରେ ସେ ସବୁଦିନ ପାଇଁ ମଦ୍ୟପାନ ଛାଡିବାକୁ ଶପଥ ନେଇଥିଲେ ।
https://www.instagram.com/tv/B_4zORIBFeH/?utm_source=ig_embed
ଆଲିୟା ପିଲାବେଳୁ ହିଁ ବହୁତ କ୍ୟୁଟ୍ । ସେ ସାନବେଳୁ ଜଣେ ଅଭିନେତ୍ରୀ ହେବେ ବୋଲି ନିଷ୍ପତ୍ତି ନେଇସାରିଥିଲେ । ଆଲିୟାଙ୍କ ଅନୁସାରେ ଯେଉଁ କାମ କରିବାରେ ନିଜକୁ ଖୁସି ମିଳେ ସେଥିରେ ସଫଳତା ମଧ୍ୟ ନିହାତି ମିଳେ । ଏହାର ବଡ ଉଦହାରଣ ହେଉଛନ୍ତି ନିଜେ ଆଲିୟା । ସେ ନିଜ ପିଲାବେଳର ସ୍ୱପ୍ନ ପୂରଣ କରି ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି । ଆଜି ଦିନରେ ଆଲିୟାଙ୍କର ଲକ୍ଷେ ଲକ୍ଷେ ଦିୱାନା ଅଛନ୍ତି । ଆଗକୁ ଆଲିୟାଙ୍କର ଫିଲ୍ମ ବ୍ରହ୍ମାସ୍ତ୍ର, ସଡକ ୨, ଆରଆରଆର, ଗଙ୍ଗୁବାଇ କାଠିୟାବାଡି ଓ ତଖ୍ତ ରିଲିଜ ହେବ ।
ଭୁବନେଶ୍ୱର: ଦିନ ଗଡ଼ିବା ସହ ରାଜ୍ୟରେ କରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି । ଏହି ବୃଦ୍ଧି ସ୍ୱାଭାବିକ ମଧ୍ୟ, ହେଲେ ଏହାକୁ ଯେମିତି ଆମେ ଗ୍ରହଣ କରିବାକୁ ନାରାଜ । ପ୍ରାଥମିକଭାବେ ରାଜ୍ୟରେ ୨୦ରୁ ୩୦ଟି ନମୁନା ପରୀକ୍ଷା ହେଉଥିଲା । ହେଲେ ଏବେ ଗୋଟିଏ ଦିନରେ ରାଜ୍ୟର ବିଭିନ୍ନ ସ୍ୱାସ୍ଥ୍ୟାନୁଷ୍ଠାନରେ ହଜାର ହାଜର ନମୁନା ପରୀକ୍ଷା ହେଉଛି । ନମୁନାର ଆକାର ବଢୁଥିବାରୁ ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି । ରାଜ୍ୟ ବାହାରେ ଦେଶର ବିଭିନ୍ନ ପ୍ରାନ୍ତରେ କାମ କରୁଥିବା ଆମ ଓଡ଼ିଆ ଭାଇମାନେ ନିଜ ଜନ୍ମମାଟିକୁ ଫେରିଛନ୍ତି । ଘଟଣାକ୍ରମରେ ତଥା ସାମାଜିକ ପରିସ୍ଥିତିରେ ରୋଜଗାର ପାଇଁ ସେମାନେ ଅନ୍ୟ ପ୍ରାନ୍ତକୁ ଗସ୍ତ କରିଥିଲେ । ସେଠାରୁ ଅର୍ଥ ଉପାର୍ଜନ କରି ଓଡ଼ିଶାରେ ଥିବା ପରିବାରକୁ ପଠାଉଥିଲେ । ଏହା ଦ୍ୱାରା ଲକ୍ଷ ଲକ୍ଷ ଓଡ଼ିଆଙ୍କ ପରିବାରରେ ଚୁଲି ଜଳୁଛି । ତେଣୁ ଏ ରାଜ୍ୟ ପାଇଁ ତାଙ୍କର ପରୋକ୍ଷରେ ଅର୍ଥନୈତିକ ଅବଦାନକୁ ଅବଜ୍ଞା କରାଯାଇ ନ ପାରେ ।
ରାଜ୍ୟର ପ୍ରତିଟି ଜନସାଧାରଣଙ୍କ ସାମାଜିକ, ଅର୍ଥନୈତିକ ସୁରକ୍ଷାକୁ ସୁରକ୍ଷିତ ରଖିବା ସରକାରଙ୍କ ପ୍ରାଥମିକ ଦାୟିତ୍ୱ । ସେହି ହିସାବରେ ଦେଖିଲେ ବିଦେଶରେ ହେଉ ବା ଦେଶର ଅନ୍ୟ କେଉଁ ପ୍ରାନ୍ତରେ ଓଡ଼ିଆଙ୍କ ପ୍ରତି ରାଜ୍ୟ ସରକାର ନିଜ କର୍ତ୍ତବ୍ୟ ପାଳନ କରୁଛନ୍ତି । ସାରା ବିଶ୍ୱରେ ମହାମାରୀ କରୋନା ଯୋଗୁଁ ଏକ ବିରାଟ ସ୍ୱାସ୍ଥ୍ୟସଙ୍କଟ ସୃଷ୍ଟି ହୋଇଛି । ଏହି ସମୟରେ କୋଣ ଅନୁକୋଣରେ ଓଡ଼ିଆଙ୍କୁ ସହଯୋଗର ହାତ ବଢାଇବା ସମୟର ଆହ୍ୱାନ । କବି ସଚ୍ଚି ରାଉତରାୟଙ୍କ ଭାଷାରେ, ‘ଯେଉଁ ଜନ ଗଢେ ଅଟାଳ ରାଜି , ସକଳ ଦରବ ଜାତ, କଲିଜା ତାହାର ଥରାଏ ଶୀତର ବାତ’ । ଗୁଜରାଟ ଟେକ୍ସଟାଇଲ, ହୀରା, ସୁନା ଶିଳ୍ପଠାରୁ ଆରମ୍ଭ କରି ରାଜଧାନୀ ଦିଲ୍ଲୀର ସୁଉଚ୍ଚ ଅଟ୍ଟାଳିକାରେ ଶ୍ରମଜୀବୀଙ୍କ ହାତର ସାର୍ଥକ ସ୍ପର୍ଶ ରହିଥାଏ । ଏହା ବଦଳରେ ସେମାନେ ପାଉଥିବା ପାରିଶ୍ରମିକ ସେମାନଙ୍କ ପ୍ରତି କିଛିଟା ସାମାଜିକ ସହଯୋଗ । ସେମାନେ ଆମ ତମ ଭଳି ବାବୁଭାୟାଙ୍କର ଦୟାର ପାତ୍ର ନୁହଁନ୍ତି , ସମାଜରେ ଆମ ପ୍ରତି ପରିପୂରକ କାରଣ । ଇଏ ତ ଗଲା ସାମଗ୍ରିକ ଆଭିମୁଖ୍ୟ ।
ଏବେ ଆମ ରାଜ୍ୟ କଥା ବିଚାର କରିବା ଗୁଜରାଟର ସୁରତ, ରାଜଧାନୀ ଦିଲ୍ଲୀ, ଦକ୍ଷିଣ ଭାରତର ବିଭିନ୍ନ ସ୍ଥାନରୁ ପ୍ରବାସୀ ଫେରିଛନ୍ତି । ସୁରତରୁ ଫେରୁଥିବା ଭାଇମାନଙ୍କ ମଧ୍ୟରୁ ଅନ୍ୟ ତୁଳନାରେ କେତେକ ଅଧିକ ସଂକ୍ରମିତ ଚିହ୍ନଟ ହୋଇଛନ୍ତି । ହେଲେ ଏହି ଖବରକୁ ନେଇ ସାମାଜିକ ଗଣମାଧ୍ୟମ ଓ ସାଧାରଣରେ ଆମେ ଅଧିକ ପ୍ରତିକ୍ରିୟାଶୀଳ ହେଉଥିବା ମନେହୁଏ । ଅବଶ୍ୟ ଏକଥା କହିଲେ ଏକପାଖିଆ ହେବ । ହାତଗଣତି କେତେକ ପ୍ରବାସୀଙ୍କ ବିଶୃଙ୍ଖଳିତ ଆଚରଣ ପାଇଁ ଲକ୍ଷଲକ୍ଷ ପ୍ରବାସୀଙ୍କୁ ନ୍ୟୁନ୍ କରିବାର ନୈତିକ ଅଧିକାର ଆମକୁ ଦେଲା କିଏ? ଥରେ ଭାବିଲେ ଖାଲି ଓଡ଼ିଆମାନେ କ’ଣ ଓଡ଼ିଶା ଫେରୁଛନ୍ତି କି? ବିଭିନ୍ନ ସ୍ଥାନରେ ଫସିଥିବା ତାମିଲ ମାନେ ବି ତାମିଲନାଡୁ, ୟୁପିବାସୀ କ’ଣ ଉତ୍ତର ପ୍ରଦେଶ, ବିହାରୀମାନେ ନିଜ ରାଜ୍ୟ ବିହାରକୁ ହିଁ ଫେରି ଯାଉଛନ୍ତି ।
ଯଦି କିଏ ଟିକ୍ ଟିକ୍ ଭିଡିଓ କରି ଉପହାସ କଲେ ଅଥବା ଖାଦ୍ୟ ଫୋପାଡିଲେ ଆମ ମନ ଚିଡ଼ିଯାଉଛି, ସେହିପରି ସଙ୍ଗରୋଧ କେନ୍ଦ୍ରରେ ରହି ନିଜ ହାତରେ ବିଭିନ୍ନ ସ୍କୁଲ ଘରକୁ ଚମକାଇ ଦେଇଥିବା ଘଟଣା ଆମକୁ ଉଲ୍ଲାସିତ କରିବ ନାହିଁ କାହିଁକି ବୋଲି ନିଜକୁ ପଚାରିବା ଦରକାର । ଶନିବାର ଗଞ୍ଜାମର କୁକୁଡାଖଣ୍ଡି ଅଞ୍ଚଳରେ ଥିବା ଆଦର୍ଶ ବିଦ୍ୟାଳୟ ପରିସରରେ ଶୃଙ୍ଖଳିତ ଭାବରେ ବ୍ୟାୟମ କରୁଥିବା, ମାଲକାନଗିରିରେ ସାମାଜିକ ଦୂରତା ରକ୍ଷା କରି ମନୋରଞ୍ଜନ ପାଇଁ ଟିଭି ଦେଖୁଥିବା ଦୃଶ୍ୟ ପାଇଁ ସାବାସି ଦେବାରେ କଣ୍ଠ ଅଟକିବା ଉଚିତ ନୁହେଁ । ଏ ଦୁଃସ୍ଥିତିରେ ସମାଜର ପ୍ରତିଟି ନାଗରିକ ନିଜର ସମାଜିକ ଦାୟବଦ୍ଧତା ତଥା ସାମାଜିକ ନେତୃତ୍ୱ ନେବାର ସମୟ । ତେଣୁ ମଣିଷ ହୋଇ ମଣିଷକୁ ଆପଣାଇବାରେ ମନକୁଣ୍ଠା ନ ହେଉ ।
ଚିଦାନନ୍ଦ ଜେନା
ଭୁବନେଶ୍ୱର: ମହାମାରୀ କରୋନା ସଂକ୍ରମଣ ରାଜ୍ୟରେ ବୃଦ୍ଧି ପାଇବାରେ ଲାଗିଛି । ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇ ୩୭୭ରେ ପହଞ୍ଚିଛି । ଗଞ୍ଜାମରୁ ୭ଟି, ଯାଜପୁରରୁ ଗୋଟିଏ, ଅନୁଗୁଳରୁ ୨, ପୁରୀରୁ ୨ ଜଣ ଲେଖାଏଁ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି । ବୌଦ୍ଧ ଜିଲ୍ଲାରେ ପ୍ରଥମ କରି ୩ଟି ସଂକ୍ରମଣ ମାମଲା ଆସିଛି । ରାଜ୍ୟ ସ୍ୱାସ୍ଥ୍ୟ ବିଭାଗ ଏନେଇ ୱେବସାଇଟରେ ସୂଚନା ଦେଇଛି ।
୭ ସଂକ୍ରମିତଙ୍କ ସହ ଗଞ୍ଜାମରେ ସଂଖ୍ୟା ବୃଦ୍ଧି ପାଇ ୧୨୫ରେ ପହଞ୍ଚିଛି । ଯାଜପୁରରେ ସଂକ୍ରମିତଙ୍କ ସଂଖ୍ୟା ୬୦ ଛୁଇଁଥିବା ବେଳେ ୨ ନୂଆ ସଂକ୍ରମିତଙ୍କ ସହ ଅନୁଗୁଳରେ ଗୋଟିଏ ଦିନରେ ୧୫ ଜଣ ଚିହ୍ନଟ ହୋଇଛନ୍ତି । ପୂର୍ବରୁ ଜଣେ ସଂକ୍ରମିତ ସୁସ୍ଥ ହେବା ପରେ ଗ୍ରୀନ୍ ଜୋନରେ ଥିବା ପୁରୀରେ ୨ଟି ନୂତନ ସଂକ୍ରମଣ ମାମଲା ଆସିଛି ।
ଗ୍ରୀନ୍ ଜୋନରେ ଥିବା ବୌଦ୍ଧରେ ଖାତା ଖୋଲିଛି କରୋନା । ପ୍ରଥମ କରି ଜିଲ୍ଲାରେ ୩ଟି ସଂକ୍ରମିତ ମାମଲା ଚିହ୍ନଟ ହୋଇଛି । ରାଜ୍ୟରେ ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇ ୩୭୭ରେ ପହଞ୍ଚିଛି । ଏବେ ରାଜ୍ୟରେ ସକ୍ରିୟ ସଂକ୍ରମିତଙ୍କ ସଂଖ୍ୟା ୩୦୬ ରହିଥିବା ବେଳେ ୬୮ ଜଣ ସୁସ୍ଥ ହୋଇ ଫେରିଛନ୍ତି । ୩ ଜଣଙ୍କ ମୃତ୍ୟୁ ହୋଇଛି ।
ଭୁବନେଶ୍ୱର: ମହାମାରୀ କରୋନା ସଂକ୍ରମଣ କଣ୍ଟ୍ରୋଲ୍ ପାଇଁ ସ୍ୱତନ୍ତ୍ର ପଦକ୍ଷେପ ନେଇଛି ବିଏମସି । ରାଜଧାନୀ ଭୁବନେଶ୍ୱରର ୩ଟି ପ୍ରବେଶ ପଥରେ ସ୍କ୍ରିନିଂ ବ୍ୟବସ୍ଥା ହୋଇଛି । ତେବେ, ରାଜ୍ୟ ବାହାରୁ ଆସୁଥିବା ଲୋକଙ୍କ ପାଇଁ ଏହି ବ୍ୟବସ୍ଥା ହୋଇଛି । ପ୍ରଥମେ ସେମାନଙ୍କର ଥର୍ମାଲ ସ୍କ୍ରିନିଂ କରାଯିବ । ପରେ ସେମାନେ ହୋମ୍ କ୍ୱାରେଣ୍ଟାଇନ୍ କିମ୍ବା ଗୋଷ୍ଠୀ କ୍ୱାରେଣ୍ଟାଇନ୍ କିମ୍ବା ପେଡ୍ କ୍ୱାରେଣ୍ଟାଇନରେ ରହିବେ । ଯଦି, କରୋନାର କିଛି ଲକ୍ଷଣ ଦେଖାଯଏ ତୁରନ୍ତ ସ୍ୱାସ୍ଥ୍ୟ ବିଭାଗକୁ ସୂଚନା ଦେବେ ।
କେଉଁଠି କରାଯିବ ସ୍କ୍ରିନିଂ ?
୧) ରସୁଲଗଡ଼ର କୋଚିଲେଇ ହାଟ ନିକଟ ଆଶ୍ରମ ସ୍କୁଲ୍
୨) ତପୋବନ ସ୍କୁଲ, ଖଣ୍ଡଗିରି
୩) କୃପାଜଳ ଇଞ୍ଜିନିୟରିଂ କଲେଜ, ଉତ୍ତରା ଛକ
ରାଜ୍ୟ ବାହାରୁ ଆସୁଥିବା କେହି ବି ବିନା ପଞ୍ଜିକରଣରେ ରାଜଧାନୀରେ ପ୍ରବେଶ କରିପାରିବେ ନାହିଁ । ତେବେ, ରାଜ୍ୟର ଅନ୍ୟ ଜିଲ୍ଲାରୁ ଭୁବନେଶ୍ୱର ଆସୁଥିବା ଲୋକଙ୍କ ପାଇଁ ସେମିତି କିଛି ଅସୁବିଧା ନାହିଁ । ଯିଏ କେହି ବି ରାଜଧାନୀ ଆସିଲେ ସାମାଜିକ ଦୂରତ୍ୱ ରକ୍ଷା କରିବା ସହ ମାସ୍କ ପିନ୍ଧିବାକୁ ବିଏମସି ପକ୍ଷରୁ କୁହାଯାଇଛି ।
ଆଜିଠାରୁ କେଉଁଠାକୁ ଚାଲିଲା ଟ୍ରେନ୍ ? କିଏ ଟ୍ରେନରେ ଯାତ୍ରା କରିପାରିବେ ?
ଇସ୍ରାଏଲ: କିଛି ବ୍ୟକ୍ତିତ୍ୱ ସବୁଦିନ ପାଇଁ ଆମ ହୃଦୟରେ ସ୍ମୃତି ହୋଇ ରହିଯାଆନ୍ତି । ସେମିତି ଜଣେ ବ୍ୟକ୍ତିତ୍ୱ ହେଉଛନ୍ତି ନୋବେଲ ପୁରଷ୍କାର ବିଜେତା ରବୀନ୍ଦ୍ରନାଥ ଟାଗୋର ।
ରବୀନ୍ଦ୍ରନାଥ ଟାଗୋରଙ୍କ ୧୫୯ତମ ଜନ୍ମ ବାର୍ଷିକୀ ଅବସରରେ ଇସ୍ରାଏଲ ଟାଗୋରଙ୍କୁ ହୃଦୟସ୍ପର୍ଶୀ ଶ୍ରଦ୍ଧାଞ୍ଜଳି ଅର୍ପଣ କରିଛି । କଳା, ସାହିତ୍ୟ ଏବଂ ରାଜନୀତିରେ ତାଙ୍କର ବହୁମୂଲ୍ୟ ଅବଦାନ ପାଇଁ ତାଙ୍କୁ ସମ୍ମାନିତ କରିବା ପାଇଁ ତେଲ୍ ଅଭିଭ ନାମକ ଏକ ଅଞ୍ଚଳରେ ଥିବା ରାସ୍ତାର ନାମ କବିଙ୍କ ନାମରେ ନାମକରଣ କରିଛି ।
We honor #RabindranathTagore today and every day, as we named a street in Tel Aviv in memory of his valuable contribution to mankind. pic.twitter.com/ZH826Ot0aP
— Israel in India (@IsraelinIndia) May 7, 2020
ଇସ୍ରାଏଲ ଏହାର ନାମ ‘ଟାଗୋର’ ରାସ୍ତା ଦେଇ ଟ୍ୱିଟରରେ ଏକ ପୋଷ୍ଟ ସେୟାର କରି କବିଙ୍କୁ ତାଙ୍କର ମୂଲ୍ୟବାନ ଶିକ୍ଷା ପାଇଁ ଧନ୍ୟବାଦ ଜଣାଇଛନ୍ତି ।
ପ୍ରତିବର୍ଷ ୭ ମଇରେ ରବୀନ୍ଦ୍ର ଜୟନ୍ତୀ ପାଳନ କରାଯାଏ | କୋଲକାତା ଏବଂ ଟାଗୋର ପ୍ରଶଂସକଙ୍କ ପାଇଁ ଏହା ଏକ ବଡ ଦିନ । ସେ ମଧ୍ୟ ବ୍ରିଟିଶ ଉପନିବେଶ ଶାସନ ବିରୁଦ୍ଧରେ ପ୍ରତିରୋଧର ଏକ ଦୃଢ଼ ସ୍ୱର ଥିଲେ । ବ୍ରିଟିଶମାନେ ଯେତେବେଳେ ତାଙ୍କୁ ନାଇଟହୁଡ ନାମରେ ସମ୍ମାନତ କରିବାକୁ ଚାହିଁଥିଲେ, ସେତେବେଳେ ସେ ସମ୍ମାନର ସହ ସେହି ଟାଇଟଲ୍ କୁ ପ୍ରତ୍ୟାଖାନ କରିଥିଲେ ।
୧୯୧୩ ମସିହାରେ ତାଙ୍କୁ ସାହିତ୍ୟ ପାଇଁ ନୋବେଲ ପୁରସ୍କାର ଦିଆଯାଇଥିଲା । ସେ ଏହି ପୁରସ୍କାର ଗ୍ରହଣ କରିଥିବା ଭାରତର ପ୍ରଥମ ବ୍ୟକ୍ତି ଥିଲେ । ଭାରତୀୟ ସାହିତ୍ୟର କେତେକ ଉତ୍ତମ କାର୍ଯ୍ୟ ପାଇଁ ଟାଗୋରଙ୍କୁ ଚୀର ଦିନ ପାଇଁ ସ୍ମରଣ କରାଯିବ । ଆଜି ବି ତାଙ୍କ ଲେଖା କଲେଜ ଏବଂ ବିଶ୍ୱବିଦ୍ୟାଳୟରେ ଶିକ୍ଷା ଦିଆଯାଉଛି ।
ମୁମ୍ବାଇ: ବଲିଉଡର ଦବଙ୍ଗ ଖାନ ସଲମାନ ଖାନ, କରୋନା ଭୂତାଣୁ ନେଇ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବାକୁ ନିକଟରେ କିଛି ଭିଡିଓ ପୋଷ୍ଟ କରିଥିଲେ । କେବଳ ସଲମାନ ନୁହଁନ୍ତି ବଲିଉଡ଼ର ଅନେକ ସେଲିବ୍ରିଟିମାନେ ଲୋକଙ୍କୁ ସଚେତନ କରିବାକୁ ଗୋଟେ ପରେ ଗୋଟେ ଭିଡ଼ିଓ ସେୟାର କରୁଛନ୍ତି । ସଲମାନଙ୍କର ଏହି ସବୁ ଭିଡିଓ ଭାଇରାଲ ମଧ୍ୟ ହୋଇଥିଲା । ତେବେ ପ୍ୟାର କରୋନା ପରେ ସଲମାନଙ୍କର ଏବେ ଆଉ ଏକ ଭିଡିଓ ରିଲିଜ ହେବ । ଏହି ଭିଡିଓର ନାଁ ହେଉଛି “ତେରେ ବିନା” ।
ଭାଇଜାନ ସୋସିଆଲ ମିଡିଆରେ ଏହି ପୋଷ୍ଟର ନିଜେ ସେଆର କରିଛନ୍ତି । ଏହି ରୋମାଣ୍ଟିକ ଗୀତରେ ସଲମାନଙ୍କ ସହ ଜ୍ୟାକଲିନ୍ ଫର୍ଣ୍ଣାନଡିସ୍ ଅଭିନୟ କରିଛନ୍ତି । ଗୀତର ଟିଜର ଆଜି ରିଲିଜ ହୋଇଛି । ଟିଜରରେ ସଲମାନ ଖାନ ଜ୍ୟାକଲିନଙ୍କୁ ରୋମାନ୍ସ କରୁଥିବା ନଜର ଆସିଛି । ମାତୃ ଦିବସରେ ସଲମାନ ଏହି ଗୀତକୁ ସମସ୍ତ ମାଆଙ୍କୁ ସମର୍ପିତ କରିଛନ୍ତି। ସବୁ ମାଆଙ୍କୁ ସେ ମାତୃ ଦିବସର ଶୁଭକାମନା ଜଣାଇଛନ୍ତି । ଲକଡାଉନ୍ ନିୟମଗୁଡ଼ିକର ଯତ୍ନ ନିଆଯାଇଛି ।
https://www.instagram.com/p/B__2NjclF85/?utm_source=ig_embed
ଏହି ଗୀତ ଶୁଟିଂ କରିବା ସମୟରେ ଲକଡାଉନ୍ ନିୟମଗୁଡ଼ିକର ପାଳନ କରିଛନ୍ତି ଭାଇଜାନ୍ । ଏହି ଟିଜର ଦେଖିବାରେ ଏହା ସୀମିତ ସ୍ଥାନ ମଧ୍ୟରେ ସୁଟ୍ ହୋଇଛି ବୋଲି ଜଣା ପଡୁନାହିଁ । ଗୀତକୁ ଖୁବ ସୁନ୍ଦର ଭାବେ ଏଡିଟ୍ କରାଯାଇଛି । ସୂଚନାଯୋଗ୍ୟ ଯେ, ଏହି ଗୀତ ସଲମାନ ଖାନ ନିଜେ ଗାଇଛନ୍ତି । ଏହି ଗୀତକୁ ତାଙ୍କ ମିତ୍ର ଅଜୟ ଭାଟିଆ କମ୍ପୋଜ୍ କରିଛନ୍ତି । ଏହା ସହ ଶବ୍ବୀର ଅହମଦ ଗୀତଟି ଲେଖିଛନ୍ତି । ସଲମାନ ଖାନଙ୍କ ୟୁଟ୍ୟୁବ ଚ୍ୟାନେଲ ତଥା ସୋସିଆଲ ମିଡିଆରେ ଏହି ଗୀତ ଆସନ୍ତା ୧୨ ତାରିଖ ରିଲିଜ ହେବ ।
