ଅଷ୍ଟ୍ରେଲିଆ: ସୋସିଆଲ ମିଡିଆରେ ବେଳେବେଳେ ଏମିତି ଭିଡିଓ ଭାଇରାଲ ହୋଇଯାଏ ଯାହାକୁ ଲୋକମାନେ ଖୁବ ଦେଖନ୍ତି ଏବଂ ପସନ୍ଦ ମଧ୍ୟ କରନ୍ତି । ଏମିତି ଏକ ଭିଡିଓ ଅଷ୍ଟ୍ରେଲିଆରୁ ଭାଇରାଲ ହେଉଛି ଯେଉଁଥିରେ ଅଷ୍ଟ୍ରେଲିଆର ପ୍ରଧାନମନ୍ତ୍ରୀ ସ୍କଟ୍ ମାରିସନ ସେହି ସମୟରେ ପଛକୁ ହଟିଯାଆନ୍ତି ଯେତେବେଳେ ସେ ସାମ୍ବାଦିକ ମାନଙ୍କ ସହ କଥା ହେଉଥିଲେ ।

ବାସ୍ତବରେ, ଅଷ୍ଟ୍ରେଲିଆର ପ୍ରଧାନମନ୍ତ୍ରୀ ରାସ୍ତା ପାଖରେ ଏକ ଘର ସାମ୍ନାରେ ଛିଡ଼ା ହୋଇ ସାମ୍ହାଦିକଙ୍କ ସହିତ କଥା ହେଉଥିଲେ । ଠିକ ସେହି ସମୟରେ ଘର ମାଲିକ ସମସ୍ତଙ୍କୁ ପଠକୁ ଘୁଞ୍ଚିବା ପାଇଁ କହିଥିଲେ କାରଣ ସେମାନେ ତାଙ୍କ ବଗିଚାରେ ଲାଗିଥିବା ଘାସ ଉପରେ ଠିଆ ହୋଇପଡ଼ିଥିଲେ।

Nothing wrong with having pride in your lawn… @9NewsAUS #auspol pic.twitter.com/mQ5eqBmnvC

— Jonathan Kearsley (@jekearsley) June 4, 2020

ଦ ଗାର୍ଜିୟନର ଏକ ରିପୋର୍ଟ ଅନୁସାରେ ପ୍ରଧାନମନ୍ତ୍ରୀ ସ୍କଟ୍ ମାରିସନ ରାଜଧାନୀ କୈନବରାରୁ ଅଳ୍ପ କିଛି ଦୂର ଗୁଗାନ୍ସରେ ଏକ ଘର ସାମ୍ନାରେ ଠିଆ ହୋଇ ସାମ୍ବାଦିକ ମାନଙ୍କ ସହ କଥା ହେଉଥିଲେ ଏବଂ ଅନେକ ବଡ଼ ବଡ଼ ଘୋଷଣା ମଧ୍ୟ କରୁଥିଲେ । ସେହି ସମୟରେ ବଗିଚାର ମାଲିକ ସେ ସମସ୍ତଙ୍କୁ ସେଠାରୁ ଘୁଞ୍ଚିବା ପାଇଁ କହିଥିଲେ । ସେ କହିଥିଲେ ଯେ, ମୁଁ ନିକଟରେ ଲନ୍ ରେ ଘାସ ଲଗାଇଛି, ତେଣୁ ଆପଣ ମାନେ ଘୁଞ୍ଚିକି ଠିଆ ହୁଅନ୍ତୁ ।

ଏହା ପରେ ପ୍ରଧାନମନ୍ତ୍ରୀ ସ୍କଟ ମୋରିସନ୍ ସଙ୍ଗେ ସଙ୍ଗେ ରାଜି ହୋଇ ସେଠାରୁ ଘୁଞ୍ଚିଗଲେ ଏବଂ ସାମ୍ବାଦିକମାନଙ୍କୁ ମଧ୍ୟ ପଛକୁ ଘୁଞ୍ଚିବା ପାଇଁ କହିଥିଲେ । ଏହି ଘଟଣାର ଭିଡିଓ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି। ଲୋକମାନେ ପ୍ରଧାନମନ୍ତ୍ରୀ ସ୍କଟ ମୋରିସନ୍ ଙ୍କୁ ବହୁତ ପ୍ରଶଂସା କରୁଛନ୍ତି ଏବଂ ସେହି ଘର ମାଲିକଙ୍କୁ ମଧ୍ୟ ପ୍ରଶଂସା କରୁଛନ୍ତି |

ବେଜିଂ: ଚୀନର ସରକାର ନିୟନ୍ତ୍ରିତ ଗଣମାଧ୍ୟମ ଭାରତକୁ ଧମକ ଦେଇଛି । ଜି-୭ର ବିସ୍ତାର ଓ ଏଥିରେ ଭାରତକୁ ସାମିଲ କରିବା  ପାଇଁ ଆମେରିକାର ଉଦ୍ୟମ ଚୀନ ମିଡିଆକୁ ଉତକ୍ଷିପ୍ତ କରିଛି ।ସେଠାକାର ଗଣମାଧ୍ୟମ ଚେତାବନୀ ଦେଇ କହିଛି ଯେ,  ଜି-୭ ବିସ୍ତାରରେ ସାମିଲ ହେବା ପାଇଁ ଉଦ୍ୟମ କରି ଭାରତ ନିଆଁ ସହ ଖେଳୁଛି ।

ଚୀନ୍ ଖବରକାଗଜ ଗ୍ଲୋବାଲ ଟାଇମ୍ସ ଲେଖିଛି ଯେ, ଜି-୭ ବିସ୍ତାର ବିଚାର ଜିଓ ପଲିଟିକ୍ସ ବା ଭୂ-ରାଜନୈତିକ ଗଣିତ ଉପରେ ଆଧାରିତ । ଯାହାର ଲକ୍ଷ୍ୟ ହେଉଛି ଚୀନକୁ ଘେରିବା । ଭାରତ କେବଳ ଦୁନିଆର ପଂଚମ ବୃହତ୍ ଆର୍ଥିକ ଶକ୍ତି ନୁହେଁ ଏହା ମଧ୍ୟ ଆମେରିକାର ଭାରତ-ପ୍ରଶାନ୍ତ ମହାସାଗର ରଣନୀତିର ଏକ ଗୁରୁତ୍ୱପୂର୍ଣ୍ଣ ସ୍ତମ୍ଭ ତେଣୁ ଆମେରିକା ଭାରତକୁ ଜି-୭ରେ ସାମିଲ କରିବାକୁ ଚାହୁଁଛି । ଚୀନକୁ ଚେକମେଟ୍ କରିବା ପାଇଁ ଆମେରିକା ଅନେକ ଦିନ ଧରି ଭାରତକୁ ନିଜ ପାଲରେ ପକାଇବା ପାଇଁ ଉଦ୍ୟମ କରି ଆସୁଛି ବୋଲି ଗ୍ଲୋବାଲ ଟାଇମ୍ସ ଲେଖିଛି ।

ମୋଦିଙ୍କ ଦ୍ୱିତୀୟ କାର୍ଯ୍ୟକାଳରେ ଚୀନ ପ୍ରତି ଦୃଷ୍ଟିଭଙ୍ଗୀ ବଦଳିଛି

ଗ୍ଲୋବାଲ ଟାଇମ୍ସ ଅନୁସାରେ ମୋଦିଙ୍କ ଦ୍ୱିତୀୟ କାର୍ଯ୍ୟକାଳରେ ଚୀନ୍ ନେଇ ଭାରତ ସରକାରଙ୍କ ରଣନୀତି ବଦଳିଛି । ମହାଶକ୍ତି ବନିବାର ମହତ୍ୱାକାଂକ୍ଷା ରଖିଥିବା ଭାରତ ଆମେରିକାର ଜି-୭ ବିସ୍ତାର ପ୍ରସ୍ତାବକୁ ସମର୍ଥନ ଦେଇ ଚୀନକୁ ସନ୍ଦେଶ ଦେବାକୁ ଚାହୁଁଛି । ମୋଦି ଅଷ୍ଚ୍ରେଲିଆ,ଆମେରିକା  ଓ ଜାପାନ ସହ ଚୀନ ବିରୋଧରେ ମେଣ୍ଟ କରୁଛନ୍ତି ବୋଲି ଗ୍ଲୋବାଲ ଟାଇମ୍ସ ଦାବି କରିଛି ।

ଭାରତ-ଚୀନ ମଧ୍ୟରେ ସମ୍ପର୍କ ଖରାପ ହେବ

ଗ୍ଲୋବାଲ ଟାଇମ୍ସ ଅନୁସାରେ ଜି-୭ର ବିସ୍ତାର ଅର୍ଥ ଆମେରିକା ଇଣ୍ଡୋ ପେସିଫିକ୍ ରଣନୀତିକୁ ଲାଗୁ କରିବା ପାଇଁ ପ୍ରସ୍ତୁତ ଅଛି । ବଦଳରେ ଭାରତ ଆମେରିକାଠାରୁ ମହାଶକ୍ତି ମାନ୍ୟତା ଓ ଅନ୍ୟ ଯୋଜନା ସମ୍ପୂର୍ଣ୍ଣ କରିବା ପାଇଁ ସାହାଯ୍ୟ ମାଗୁଛି । ଚୀନକୁ ନିଶାନାରେ ନେବା ପାଇଁ ଭାରତ ଆମେରିକାର ଅନେକ ଯୋଜନାରେ ସକ୍ରିୟ ଅଛି । କରୋନା ପରେ ଯଦି ଆମେରିକାର ପତନ ହୁଏ ଓ ଚୀନ ଆଗକୁ ବଢେ, ତେବେ ଚୀନର ଘେରାବନ୍ଦୀ ପାଇଁ ଭାରତ ଆମେରିକା ସହ ମିଶିବାର ପୂର୍ଣ୍ଣ ସମ୍ଭାବନା ରହିଛି ।

ଭାରତ ଯଦି ତରତର ହୋଇ ଚୀନକୁ ଶତ୍ରୁ ଭାବେ ବିବେଚନା କରୁଥିବା ଜି-୭ ଭଳି ଗୋଟିଏ ଛୋଟ ଗ୍ରୁପରେ ସାମିଲ ହୁଏ ତେବେ ଦୁଇ ଦେଶଙ୍କ ମଧ୍ୟରେ ସମ୍ବନ୍ଧ ଖରାପ ହେବ । ଯାହା ଭାରତ ହିତରେ ନୁହେଁ ବୋଲି ଗ୍ଲୋବାଲ ଟାଇମ୍ସ ଦାବି କରିଛି   ।

ଉତ୍ତର କୋରିଆ: ଉତ୍ତର କୋରିଆର ଏକଛତ୍ରବାଦୀ ଶାସକ କିମ ଜୋଙ୍ଗ ଉନଙ୍କ ଭଉଣୀ କିମ ୟୋ ଜୋଙ୍ଗ ପୁଣିଥରେ ଚର୍ଚ୍ଚାକୁ ଆସିଛନ୍ତି । କିମ୍ ୟୋ ଜୋଙ୍ଗଙ୍କ ଆତଙ୍କ ଏମିତି ରହିଛି ଯେ, ଉତ୍ତର କୋରିଆର ଦୀର୍ଘ ଦିନ ଧରି ଥିବା ଏକ ଦାବିକୁ ଦକ୍ଷିଣ କୋରିଆ ଗ୍ରହଣ କରିବାକୁ ବାଧ୍ୟ ହୋଇଛି । ବାସ୍ତବରେ ଉତ୍ତର କୋରିଆର ବିଦ୍ରୋହୀମାନେ ଦକ୍ଷିଣ କୋରିଆ ସୀମାରେ ବେଲୁନ୍ ଉଡାଉଛନ୍ତି। ଏହି ବେଲୁନ୍ ଗୁଡିକରେ କିମ ଜୋଙ୍ଗ-ଉନଙ୍କ ଏକଛତ୍ରବାଦୀ ଶାସନକୁ ବିରୋଧ କରୁଥିବା ବାର୍ତ୍ତା ରହିଛି ।

କିମ୍ ବିଦ୍ରୋହୀମାନଙ୍କୁ ‘ମାନବ ମଳ’, ‘କୁକୁର’ ବୋଲି କହିଛନ୍ତି

କିମ ୟୋ ଜୋଙ୍ଗ ଉତ୍ତର କୋରିଆର ବିଦ୍ରୋହୀମାନଙ୍କୁ କହିଛନ୍ତି ଯେ, ଯେଉଁମାନେ ଏହି ବେଲୁନ୍ ଗୁଡ଼ିକୁ ଉଡ଼ାଉଛନ୍ତି ସେମାନେ ‘ମାନବ ମଳ’ ଏବଂ  ‘କୁକୁର’ ଭାବରେ ନିଜ ଦେଶ ପ୍ରତି ବିଶ୍ୱାସଘାତକତା କରିଥିଲେ। କିମ ୟୋ ଜୋଙ୍ଗ ଦକ୍ଷିଣ କୋରିଆକୁ ଧମକ ଦେଇଛନ୍ତି ଯେ ଯଦି ଦକ୍ଷିଣ କୋରିଆରେ ଏଭଳି ବିରୋଧ ବନ୍ଦ ନହୁଏ ତେବେ ସେ ଦୁଇ ଦେଶ ମଧ୍ୟରେ ହୋଇଥିବା ସାମରିକ ଚୁକ୍ତିକୁ ଭଙ୍ଗ କରିବେ । କିମ ୟୋ ଜୋଙ୍ଗଙ୍କ ଦାବିକୁ ଦୃଷ୍ଟିରେ ରଖି ଦକ୍ଷିଣ କୋରିଆ ଏପରି ବିଦ୍ରୋହକୁ ରୋକିବା ପାଇଁ ଏକ ନୂତନ ଆଇନ ପ୍ରଣୟନ କରିବ ବୋଲି ଘୋଷଣା କରିଛି ।

ଦକ୍ଷିଣ କୋରିଆ ପୂର୍ବରୁ ଏହି ଦାବିକୁ ପ୍ରତ୍ୟାଖ୍ୟାନ କରିଥିଲା

ଦକ୍ଷିଣ କୋରିଆର ଆଶା ରହିଛି ଯେ ଏହି ଆଇନ ପରେ ଉତ୍ତର କୋରିଆ ସହିତ ସେମାନଙ୍କ ସଂପର୍କ ସାମାନ୍ୟ ରହିବ । ଏହାପୂର୍ବରୁ ଦକ୍ଷିଣ କୋରିଆ ଏଭଳି ବେଲୁନ୍ ଉଡାଇବାକୁ ବନ୍ଦ କରିବାକୁ ଯାଇ ପୋଲିସକୁ ଅନେକ ଥର ପଠାଇଛି । ତେବେ ଦକ୍ଷିଣ କୋରିଆ ପୂର୍ବରୁ ଉତ୍ତର କୋରିଆର ବ୍ୟାନ୍ ଲଗାଇବା ଦାବିକୁ ପ୍ରତ୍ୟାଖ୍ୟାନ କରିଛି । ବିଗତ କିଛି ବର୍ଷ ହେବ ଦକ୍ଷିଣ କୋରିଆରୁ ଉତ୍ତର କୋରିଆକୁ ବେଲୁନ୍ ଉଡ଼ାଇବା ପ୍ରକ୍ରିୟା ଚାଲିରହିଛି । ଉତ୍ତର କୋରିଆ ଏହାକୁ ନିଜ ସରକାର ଉପରେ ଆକ୍ରମଣ ବୋଲି ବିବେଚନା କରିଛି ।

ଦକ୍ଷିଣ କୋରିଆ ସହିତ ସାମରିକ ଚୁକ୍ତି ଭଙ୍ଗ କରିବାକୁ ଧମକ ଦିଆଯାଇଛି

ନିକଟ ଅତୀତରେ, ବିଦ୍ରୋହୀମାନେ ପରମାଣୁ ବୋମା ଏବଂ ମାନବିକ ଅଧିକାର ନିର୍ମାଣ ପାଇଁ ଉତ୍ତର କୋରିଆର ଏକଛତ୍ରବାଦୀ ଶାସନକୁ ସମାଲୋଚନା କରି ବେଲୁନ୍ ଉଡାଇଥିଲେ। ଏହା ପରେ କିମ ଜୋଙ୍ଗ ଉନଙ୍କ ଭଉଣୀ ସାମରିକ ଚୁକ୍ତି ଭଙ୍ଗ କରିବାକୁ ଧମକ ଦେଇଥିଲେ । କିମ ୟୋ ଜୋଙ୍ଗ କହିଛନ୍ତି ଯେ ଯଦି ଦକ୍ଷିଣ କୋରିଆ କାର୍ଯ୍ୟାନୁଷ୍ଠାନ ଗ୍ରହଣ ନକରେ ତେବେ ଯୋଗାଯୋଗ କାର୍ଯ୍ୟାଳୟ ଏବଂ ଏକ କାରଖାନା ସ୍ଥଳକୁ ବନ୍ଦ କରିଦିଆଯିବ, ଯାହାକୁ ଦୁଇ ଦେଶ ମଧ୍ୟରେ ଉତ୍ତମ ସମ୍ପର୍କର ସଙ୍କେତ ବୋଲି ବିଶ୍ୱାସ କରାଯାଉଥିଲା ।

ଏକଛତ୍ରବାଦୀ ଶାସକ କିମ ଜୋଙ୍ଗ ଉନଙ୍କ ଅପେକ୍ଷା ଭଉଣୀ ଅଧିକ ନିଷ୍ଠୁର

ଇଂରାଜୀ ଖବରକାଗଜ ମିରର୍ ଅନୁଯାୟୀ କିମ ଯୋଙ୍ଗ ଅତ୍ୟନ୍ତ ନିଷ୍ଠୁର ବୋଲି ବିଶେଷଜ୍ଞମାନେ ଚେତାବନୀ ଦେଇଛନ୍ତି । ବିଶ୍ୱାସ କରାଯାଏ ଜୋଙ୍ଗ ଉନ ପାଖକୁ କେଉଁ କେଉଁ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଯିବ ତାହା ଭଉଣୀ ୟୋ ଜୋଙ୍ଗ ନିଷ୍ପତ୍ତି ନେଉଥିଲେ । କୁହାଯାଏ ଯେ  ପାର୍ଟିର ସଦସ୍ୟ ମାନଙ୍କୁ ସମ୍ମାନ ଏବଂ ଭୟର ସହିତ ବ୍ୟବହାର କରିବାକୁ ୟୋ ଜୋଙ୍ଗ କହୁଥିଲେ । ଉତ୍ତର କୋରିଆର ଗଣମାଧ୍ୟମ ସବୁବେଳେ ୟୋ ଜୋଙ୍ଗଙ୍କ ବିଷୟରେ ଉଲ୍ଲେଖ କରିଥାଏ କାରଣ ଯଦିଓ ସେ ଉପାଧ୍ୟକ୍ଷ ପଦ ପାଇ ନାହାଁନ୍ତି, କିନ୍ତୁ ତାଙ୍କ ପଦବି ଉପାଧ୍ୟକ୍ଷ ସମକକ୍ଷ ମନେ କରାଯାଏ । ସଂଗଠନ ଏବଂ ମାର୍ଗଦର୍ଶନ ବିଭାଗରେ କିମ ୟୋ ଜୋଙ୍ଗଙ୍କ ବଢୁଥିବା ସ୍ଥିତି ତାଙ୍କୁ ୱାର୍କର୍ସ ପାର୍ଟି ଅମଲାତନ୍ତ୍ରଙ୍କ ଦୃଷ୍ଟିରେ ଉତ୍ତର କୋରିଆର ଦ୍ୱିତୀୟ ସ୍ଥାନରେ ରଖିଛି ।

ଉତ୍ତର ପ୍ରଦେଶ: ଉତ୍ତର ପ୍ରଦେଶ ମୌଳିକ ଶିକ୍ଷା ବିଭାଗ ଅନ୍ତର୍ଗତରେ ଆସୁଥିବା କସ୍ତୁରବା ଗାନ୍ଧୀ ବାଳିକା ବିଦ୍ୟାଳୟରେ କାର୍ଯ୍ୟରତ ଜଣେ ଶିକ୍ଷୟତ୍ରୀଙ୍କ ଦରମା ୧ କୋଟି ଥିବା ଜଣା ପଡ଼ିଛି । ସୂଚନା ଅନୁୟାୟୀ ଶିକ୍ଷୟତ୍ରୀ ଜଣଙ୍କ ଏକ ଥରେ ୨୫ଟି ବିଦ୍ୟାଳୟରେ ଚାକିରି କରୁଥିଲେ । ଏହି ଘଟଣା ସେତେବେଳେ ସାମ୍ନାକୁ ଆସିଲା ଯେତେବେଳେ ଶିକ୍ଷା ବିଭାଗ ଶିକ୍ଷୟତ୍ରୀଙ୍କ ଡାଟା ବେସ୍ ପ୍ରସ୍ତୁତ କରିବା ଆରମ୍ଭ କଲେ । ବର୍ତ୍ତମାନ ବିଭାଗ ଏ ପୁରା ଘଟଣାର ତଗନ୍ତ କରିବାକୁ ଆଦେଶ ଦେଇଛନ୍ତି ।

ମୌଳିକ ଶିକ୍ଷା ବିଭାଗ ସୂଚନା ଅନୁଯାୟୀ, ବର୍ତ୍ତମାନ ଶିକ୍ଷକ, ଶିକ୍ଷୟତ୍ରୀ ମାନଙ୍କର ଡିଜିଟାଲ ଡେଟେବେସ ପ୍ରସ୍ତୁତ କରାଯାଉଛି ଏବଂ ଏହି ପ୍ରକ୍ରିୟାରେ ମାଧ୍ୟମରେ କସ୍ତୁରବା ଗାନ୍ଧୀ ବାଳିକା ବିଦ୍ୟାଳୟରେ କାର୍ଯ୍ୟରତ ଶିକ୍ଷୟତ୍ରୀ ଅମେଠୀ, ଆମ୍ବେଦକର ନଗର, ରାୟବରେଲୀ, ପ୍ରୟାଗରାଜ, ଅଲ୍ଲିଗଡ ଏବଂ ଅନ୍ୟ ଜିଲ୍ଲା ଗୁଡ଼ିକୁ ମିଶାଇ ୨୫ଟି ସ୍କୁଲରେ କାମ କରୁଥିବା ନଜର ଆସିଥିଲା ।

ଡିଜିଟାଲ୍ ଡାଟାବେସ୍ ସତ୍ତ୍ୱେ ଶିକ୍ଷୟତ୍ରୀ ଚଳିତ ବର୍ଷ ଫେବୃଆରୀ ପର୍ଯ୍ୟନ୍ତ ଦରମା ହେରଫେର କରିବାରେ ସଫଳ ହୋଇଥିଲେ । ଶିକ୍ଷୟତ୍ରୀ ଜଣଙ୍କ ୧୩ ମାସ ଯାଏଁ ପ୍ରାୟ ୧ କୋଟି ଟଙ୍କା ଦରମା ଉଠାଇଥିଲେ । ବିଭାଗ ଅନୁଯାୟୀ ଅନାମିକା ଶୁକ୍ଲା ନାମକ ଜଣେ ମହିଳା ୨୫ ଟି ବିଦ୍ୟାଳୟରେ ଶିକ୍ଷୟତ୍ରୀ ଭାବରେ କାର୍ଯ୍ୟ କରୁଥିଲେ । ବିଭାଗ ସହିତ ଥିବା ରେକର୍ଡ ଅନୁଯାୟୀ, ଶିକ୍ଷୟତ୍ରୀ ଜଣଙ୍କ ମୈନପୁରୀ ଜିଲ୍ଲାର ମୂଳ ବାସିନ୍ଦା ।

ବିଭାଗ ଅନାମିକାଙ୍କୁ ଏକ ନୋଟିସ ମଧ୍ୟ ପଠାଇଥିଲେ କିନ୍ତୁ ଶିକ୍ଷୟତ୍ରୀଙ୍କ ପାଖରୁ କୌଣସି ପ୍ରତିକ୍ରିୟା ଆସିନାହିଁ । ବର୍ତ୍ତମାନ ଶିକ୍ଷୟତ୍ରୀଙ୍କ ଦରମାକୁ ତୁରନ୍ତ ବନ୍ଦ କରାଯାଇଛି ଏବଂ ବିଭିନ୍ନ ବିଦ୍ୟାଳୟର ଦରମା ପାଇଁ ସମାନ ବ୍ୟାଙ୍କ ଆକାଉଣ୍ଟ ବ୍ୟବହୃତ ହୋଇଛି କି ନାହିଁ ତାହା ଜାଣିବାକୁ ବିଭାଗ ଚେଷ୍ଟା କରୁଛି ।