ବ୍ରହ୍ମପୁର/ଜୟପୁର: କରୋନା ଯୁଦ୍ଧର ଲଢୁଆ ଯୋଦ୍ଧା। ଗଞ୍ଜାମ ଜିଲ୍ଲାର ରମା ସାହୁ ଓ କୋରାପୁଟର ଧନମତି ଗାଦ୍‌ବା। ଗତକାଲି ରାଜ୍ୟ ସରକାର ଏହି ୨ ଅଙ୍ଗନୱାଡି କର୍ମୀଙ୍କୁ ଖୁବ୍‌ ପ୍ରଶଂସା କରିଥିଲେ। ସଂକ୍ରମଣକୁ ନେଇ ସାରା ସଂସାର ଆତଙ୍କିତ। ଏଭଳି ସମୟରେ ସଂକ୍ରମଣ ସହ ଲଢି ଲୋକଙ୍କୁ ସଚେତନ କରୁଛନ୍ତି ଏହି ଦୁଇ ଦିଦି। ସରକାରଙ୍କ ସାବାସି ପରେ ଗ୍ରାଉଣ୍ଡ ଜିରୋକୁ ଯାଇ ରମା ସାହୁଙ୍କୁ ଭେଟିଥିଲା ନନ୍ଦିଘୋଷ ଟିଭି।

ଯିଏ ମୃତ୍ୟୁ ସହ ଲଢି ସାରିଛି। ଯାହା ଜୀବନ ପ୍ରତି ମିନିଟ୍‌ରେ ମୃତ୍ୟୁକୁ ଅନୁଭବ କରୁଛି। ସିଏ କାହିଁକି ଏ ବିଦେଶୀ ଭୂତାଣୁକୁ ଡରିବ। ସେମିତି ଏକ ବାସ୍ତବ ଚରିତ୍ର ହେଲେ ରମା ସାହୁ। ନବୀନଙ୍କ ପଦାତିକ ବାହିନୀର ଅଙ୍ଗନୱାଡି କମାଣ୍ଡର ରମା ସାହୁ। ଗଞ୍ଜାମ ଜିଲ୍ଲା ହିଞ୍ଜିଳି ବ୍ଳକ୍‌ ଖଣ୍ଡରା ଗାଁରେ ଏ ମଧ୍ୟବୟସ୍କା ଅଙ୍ଗନୱାଡି ଦିଦି ସାଜିଛନ୍ତି ଆଶାର ଆଲୋକ। ସଂକ୍ରମଣକୁ ଖାତିର୍‌ ନାହିଁ। ଖରାତରାକୁ ଡର ନାହିଁ। ସଚେତନତାର ସୂତ୍ରଧର ସାଜିଛନ୍ତି ରମା।

ଦିନେ ରମାଙ୍କୁ ଡରାଇଥିଲା ମାରାତ୍ମକ କ୍ୟାନ୍‌ସର। ହେଲେ ଅଜଗରର ଆଲିଙ୍ଗନରୁ ମୁକୁଳିବାକୁ ନିଜେ ଖୋଜିଥିଲେ ବାଟ। ହାରିଲା କ୍ୟାନ୍‌ସର, ଜିତିଲା ମନୋବଳ। ହେଲେ ଦୁଃଖ ଯେମିତି ହାତ ଧରାଧରି ହୋଇ ଆସୁଥିଲେ। ରମାଙ୍କ କୋଳରୁ ଦୁଇଦୁଇଟି ସନ୍ତାନଙ୍କୁ ଛଡ଼ାଇ ନେଇଥିଲା ଅଜଣା ରୋଗ। ହାରିବା ହରାଇବାର ଏ ସ୍ରୋତରେ ରମା ଆହୁରି ଶକ୍ତ ହୋଇଛନ୍ତି। ସମୟର ଆହ୍ଵାନକୁ ଗ୍ରହଣ କରି ନିଜ ଜୀବନକୁ ସମର୍ପି ଦେଇଛନ୍ତି ଅନ୍ୟର ସେବାରେ। ଆଉ ଏବେ ଖଣ୍ଡରା ଗାଁରେ ସାଜିଛନ୍ତି କରୋନା ଯୋଦ୍ଧା। ପୂର୍ବରୁ ନିଜ ନିସ୍ୱାର୍ଥପର ସେବା ପାଇଁ ଶ୍ରେଷ୍ଠ ଅଙ୍ଗନୱାଡ଼ି କର୍ମୀ ଭାବେ ସମ୍ମାନିତ ହୋଇଥିବା ବେଳେ ମୁଖ୍ୟମନ୍ତ୍ରୀଙ୍କ ଏ ସାବାସି ସାରା ଗାଁକୁ କରିଛି ଉତ୍ସାହିତ।

କରୋନା ସହ ଲମ୍ବା ଲଢ଼େଇ ପାଇଁ ସରକାର ପ୍ରସ୍ତୁତ କରିଛନ୍ତି ରଣନୀତି। କିଏ ସେନାପତି ସାଜିଛି ପୁଣି କିଏ ସିପାହୀ। ହେଲେ ଥରେ ଯଦି ଆପଣ ରମାଙ୍କ ଆତ୍ମବିଶ୍ୱାସକୁ ଖୁବ୍‌ ନିକଟରୁ ଦେଖିବେ, ଆପଣ ଅନୁମାନ କରି ପାରିବେ, ଏଠି ବିଜୟ ସୁନିଶ୍ଚିତ। କାରଣ କରୋନା ଯ଼ୁଦ୍ଧରେ ରମାଙ୍କ ଭଳି ହଜାର ହଜାର ଅଙ୍ଗନୱାଡ଼ି ଦିଦିଙ୍କ ହାତରେ ଏବେ ସଚେତନତାର କମାଣ।

ଭୁବନେଶ୍ୱର: ରାଜ୍ୟରେ କରୋନା ସ୍ଥିତି ନେଇ ସମୀକ୍ଷା କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପୂର୍ବାପେକ୍ଷା କରୋନା ସଂକ୍ରମଣର କମୁଥିବାରୁ ଏଥିପାଇଁ ସହଯୋଗ କରିଥିବା ରାଜ୍ୟବାସୀଙ୍କୁ ମୁଖ୍ୟମନ୍ତ୍ରୀ ଧନ୍ୟବାଦ ଦେଇଛନ୍ତି । ନବୀନ କହିଛନ୍ତି, ସରକାରଙ୍କ ପକ୍ଷରୁ ଚାଷୀଙ୍କ ଦୁଃଖ ଦୂର ପାଇଁ ପଦକ୍ଷେପ ନିଆଯାଇଛି ।

ସେହିପରି ଲକ୍‌ଡାଉନ୍‌ ସମୟରେ ପାରିବାରିକ ହିଂସା ରୋକିବା ପାଇଁ ପୋଲିସକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ସେପଟେ ଲକଡାଉନ ସମୟରେ ଘରୋଇ ହିଂସା ରୋକିବାକୁ କମିଶନରେଟ ପୋଲିସର ବଡ ପଦକ୍ଷେପ ନେଇଛି । ମହିଳାଙ୍କ ପାଇଁ ସବୁ ଥାନାରେ ଜାରି ହେବ ସ୍ୱତନ୍ତ୍ର ନମ୍ବର । ନିର୍ଯ୍ୟାତନା ନେଇ ମହିଳା ଫୋନ କଲେ ଘରକୁ ଯିବ ପୋଲିସ ।

ରାଜ୍ୟରେ କରୋନା ସଂକ୍ରମଣ ହାର କମୁ୍ଛି । ଏହା ଏକ ଭଲ ସଂକେତ । ଏହା ସଫଳ କରିଥିବା ବ୍ୟକ୍ତି ବିଶେଷଙ୍କୁ ଧନ୍ୟବାଦ । ଲକ୍‌ଡାଉନ୍‌ ବେଳେ ଚାଷୀଙ୍କ ଦୁଃଖ ବୁଝିବେ ସରକାର । କରୋନା ସ୍ଥିତି ସମୀକ୍ଷା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହା କହିଛନ୍ତି । ରାଜ୍ୟରେ ସଂକ୍ରମଣ ହାର କମିଥିବାରୁ ସେ ଖୁସି ଜାହିର କରିଛନ୍ତି । ଏଥିପାଇଁ କାର୍ଯ୍ୟରତ ଡାକ୍ତର, ସ୍ୱାସ୍ଥ୍ୟକର୍ମୀ, ପ୍ରଶାସନ ଓ ପୋଲିସ ଅଧିକାରୀ, ସଫେଇ କର୍ମଚାରୀ ଏବଂ ଜନସାଧାରଣଙ୍କୁ ଧନ୍ୟବାଦ ଜଣାଇଛନ୍ତି ମୁଖ୍ୟମନ୍ତ୍ରୀ । କୋଭିଡ୍‌ ନିୟନ୍ତ୍ରଣ ପାଇଁ ପୋଲିସ ଓ ପ୍ରଶାସନିକ ଅଧିକାରୀଙ୍କୁ ସର୍ବୋତ୍ତମ ତାଲିମ ଦେବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ।

ଲକ୍‌ଡାଉନ୍‌ ସମୟରେ ସରକାର ଚାଷୀଙ୍କ ଦୁଃଖ ବୁଝୁଛନ୍ତି । ଚାଷୀମାନେ ସେମାନଙ୍କ ଉତ୍ପାଦିତ ସାମଗ୍ରୀର ପରିବହନ, ବିକ୍ରି, କୃଷି ଉପକରଣ କ୍ରୟ ତଥା କୃଷି କାର୍ଯ୍ୟ କରିବାରେ ଯେପରି କୈାଣସି ଅସୁବିଧାରେ ସମ୍ମୁଖୀନ ନ ହୁଅନ୍ତି, ସେନେଇ ପଦକ୍ଷେପ ନିଆଯାଇଛି । ସେହିପରି ଲକ୍‌ଡାଉନ୍‌ ବେଳେ ପାରିବାରିକ ହିଂସା ଅଭିଯୋଗ ଆସିଲେ, ସହାୟତା କରିବା ସହ ଅଭ୍ୟାସଗତ ଅପରାଧୀଙ୍କ ଉପରେ ନଜର ରଖିବା ପାଇଁ ପୋଲିସ ଡିଜିଙ୍କୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ।

ସେପଟେ ଲକଡାଉନ ସମୟରେ ଘରୋଇ ହିଂସା ରୋକିବାକୁ କମିଶନରେଟ ପୋଲିସର ବଡ ପଦକ୍ଷେପ ନେଇଛି । ମହିଳା ହିଂସା ରୋକିବାକୁ ସବୁ ଥାନାରେ ଜାରି ହେବ ସ୍ୱତନ୍ତ୍ର ନମ୍ବର । ନିର୍ଯ଼ାତନା ନେଇ ମହିଳା ଫୋନ କଲେ ଘରକୁ ଯିବ ପୋଲିସ ।

ଭୁବନେଶ୍ୱର: କରୋନା କାୟାରେ ଠପ୍‌ ଜନଜୀବନ । ଗାଁ ଠୁ ସହର ସବୁଠି ଖାଁ ଖାଁ । ସହରରେ ଲାଗିଛି ଲକଡ଼ାଉନ । କାମଧନ୍ଦା ବନ୍ଦ ସାଙ୍ଗକୁ ଘରଭିତରେ ଦିନ ମଜୁରିଆ ଓ ଫୁଟଫାତରେ ଅସହାୟ  । ଏଭଳି ଏକ ଘଡ଼ିସନ୍ଧି ମୁହୁର୍ତ୍ତରେ କରୋନା ସମ୍ପର୍କରେ ଟିକିନିକି ଖବର ପରିବେଶଣ କରୁଛି ନନ୍ଦିଘୋଷ ଟିଭି । କରୋନା ସମ୍ପର୍କିତ ସଠିକ୍‌ ଖବର ପହଞ୍ଚାଇବା ପାଇଁ ପ୍ରତିଶତିବଦ୍ଧ ଥିବା ନନ୍ଦିଘୋଷ ଟିଭି ଏବେ ପହଞ୍ଚିଛି ଗରିବ ଖଟିଖିଆ, ଭିନ୍ନକ୍ଷମ ଏବଂ ଅସହାୟଙ୍କ ପାଖରେ ।

ଗତ ୧୧ ତାରିଖରୁ ଆରମ୍ଭ ହୋଇଥିବା ଏହି କାର୍ଯ୍ୟକ୍ରମ ୪ର୍ଥ ଦିନରେ ପହଁଚିଛି । ମଙ୍ଗଲବାର ରାଜଧାନୀର ଚିନ୍ତାମଣୀଶ୍ୱର, ଶବରସାହି, ଚନ୍ଦାପୋଖରୀ ଓ କଳ୍ପନାଛକ ଅଞ୍ଚଳରେ ଘରେ ଘରେ ଫସି ରହିଥିବା ଦିନମଜୁରିଆ, ଭିନ୍ନକ୍ଷମ ଏବଂ ଅସହାୟଙ୍କ ନିକଟରେ ପହଞ୍ଚାଇଛି ରାସନ୍‌ । ଲକଡାଉନ ସମୟରେ ସାହାଯ୍ୟ ପାଇଁ ନନ୍ଦିଘୋଷ ଟିଭି ଏବଂ ଗଙ୍ଗାଧର ସାହୁ ଫାଉଣ୍ଡେସନ କୁ ମିଳିଛି ପ୍ରଶଂସାର ସୁଅ ।

କରୋନା ଆତଙ୍କ ପରେ ସବୁ ଖବର ଉପରେ ନଜର ରଖିଛି ନନ୍ଦିଘୋଷ ଟିଭି। ଲୋକଙ୍କ ସୁବିଧା ଅସୁବିଧା ଖବର ରାଜ୍ୟ ସରକାର ଏବଂ ପ୍ରଶାସନ ନିକଟରେ ପହଞ୍ଚାଇବା ସହ ଲୋକଙ୍କୁ ବେଶ ସଚେତନ କରୁଛି । ହେଲେ ପରିସ୍ଥିତି ବୁଝି ଲୋକଙ୍କୁ ସହାୟତାର ପରିକଳ୍ପନା କରିବା ବେଳେ ନନ୍ଦିଘୋଷ ଟିଭି ସହ ହାତ ମିଳାଇଥିଲା ଭୁବନେଶ୍ୱରର ଗଙ୍ଗାଧର ଫାଉଣ୍ଡେସନ୍‌ । ରନ୍ଧା ଖାଦ୍ୟ ନୁହେଁ ବଂର ଜରୁରୀ ରାସନ୍‌ ଭୋକିଲାଙ୍କ ପାଖରେ ପହଞ୍ଚା ଯାଇଛି । ଚ୍ୟାନେଲର ଜିଏମ ମାର୍କେଟିଂ ସୁବ୍ରତ ଦାସ ଓ କର୍ମକର୍ତ୍ତାଙ୍କ ସହ କିଛି ଜନ ପ୍ରତିନିଧି ସାମିଲ ହୋଇ ରାଜଧାନୀର ବିଭନ୍ନ ବସ୍ତିରେ ରାସନ ସାମଗ୍ରୀ ବଣ୍ଟନ କରିଛନ୍ତି ।

ସାଧାରଣ ଗରିବଙ୍କ ସବୁ ଦୁଃଖକୁ ଦୂର କରି ନପାରିଲେ ସୁଦ୍ଧା ତାଙ୍କ ପେଟର ଭୋକକୁ କିଛି ମାତ୍ରାରେ ଅଟକାଇ ପାରିଛି ନନ୍ଦିଘୋଷ ଟିଭି ଓ ଗଙ୍ଗାଧର ସାହୁ ଫାଉଣ୍ଡେସନ ।