ଭୁବନେଶ୍ୱର: ଆସିଲା ରାଜ୍ୟ ସରକାରଙ୍କ ଅମ୍ଫାନ ବାତ୍ୟା ନେଇ ପ୍ରଥମ ଆକଳନ ରିପୋର୍ଟ । ବାତ୍ୟା ଅମ୍ଫାନ୍‌ରେ ମୋଟ ୧୦ ଜିଲ୍ଲା ପ୍ରଭାବିତ। ୯ହଜାର ୮୩୩ ଗାଁ, ୧୫ଶହ ୫୮ ଗ୍ରାମ ପଞ୍ଚାୟତ, ୯୨ ବ୍ଳକ୍‌, ୨୭୨ ଓ୍ୱାର୍ଡ, ୨୨ଟି ପୌରାଞ୍ଚଳ ବାତ୍ୟାରେ କ୍ଷତିଗ୍ରସ୍ତ ହୋଇଛି । ଏଥିରେ ମୋଟ୍‌ ୪୪ଲକ୍ଷ ଲୋକ ପ୍ରଭାବିତ ହୋଇଥିବା ସରକାର ରିପୋର୍ଟରେ ଦର୍ଶାଇଛନ୍ତି ।

ବର୍ଷା ପବନରେ ୮ଲକ୍ଷ ୭୨ହଜାର ଗୃହପାଳିତ ପଶୁପକ୍ଷୀ ପ୍ରଭାବିତ ହୋଇଥିବା ବେଳେ ୫ଶହ ଘର ସଂପୂର୍ଣ୍ଣ ନଷ୍ଟ । ୧୫ହଜାର ଘର ଆବାଶିକ ନଷ୍ଟ ହୋଇଛି । ୨୮ଟି ବୃହତ୍‌ ଜୀବ,୯ଟି କ୍ଷୁଦ୍ର ପ୍ରାଣୀ, ୩ହଜାର ୬୮୦ କୁକୁଡ଼ା ଓ ବତକ ପ୍ରାଣ ହରାଇଛନ୍ତି । ଚଳିତ ବାତ୍ୟାରେ ରାଜ୍ୟର ଜଣେ ବି ପ୍ରାଣ ହରାଇ ନାହାଁନ୍ତି ।

ବାତ୍ୟା ଆସିବା ପୂର୍ବରୁ ୨ଲକ୍ଷ ୩୪୬ଲୋକଙ୍କୁ ସ୍ଥାନାନ୍ତର କରାଯାଇଥିଲା । ଆସନ୍ତା ୨୬ ତାରିଖରେ ରାଜ୍ୟ ସରକାର ପୂର୍ଣ୍ଣାଙ୍ଗ ରିପୋର୍ଟ ଦାଖଲ କରିବେ । ତେବେ ବାତ୍ୟାରେ ୩୪ କିଲୋମିଟରର ୩୩ କେଭି ଲାଇନ୍‌, ୪୫୩ କିଲୋମିଟର ୧୧କେଭି ଲାଇନ୍‌ ଓ ୬୮୦ କିଲୋମିଟର୍‌ ଏଲ୍‌ଟି ଲାଇନ୍‌ ପ୍ରଭାବିତ ହୋଇଛି । ପବନରେ ଓଲିଟି ପଡିଛି ୨ହଜାର ୪୩୯ଟି ଟ୍ରାନ୍‌ସଫର୍ମର ।

ଭୁବନେଶ୍ୱର: ବାତ୍ୟା କ୍ଷତି ଭରଣା ପାଇଁ ପ୍ରଧାନମନ୍ତ୍ରୀ ଘୋଷଣା କରିଥିବା ୫ ଶହ କୋଟି ଟଙ୍କାର ସହାୟତା ଆଜି କେନ୍ଦ୍ର ସରକାର ରିଲିଜ୍‌ କରିଛନ୍ତି । ୨୪ ଘଣ୍ଟା ନପୂରୁଣୁ ଟଙ୍କା ରିଲିଜ୍‌ ହୋଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗତକାଲି ବାତ୍ୟାଞ୍ଚଳ ପରିଦର୍ଶନ ପରେ ଭୁବନେଶ୍ୱରରେ ସ୍ଥିତିର ସମୀକ୍ଷା କରିଥିଲେ ଓ ଅଗ୍ରୀମ ଭାବେ ୫ଶହ କୋଟି ଟଙ୍କା ସହାୟତା ଦିଆଯିବ ବୋଲି ଘୋଷଣା କରିଥିଲେ । କେନ୍ଦ୍ର ସରକାର ଆଜି ଏହି ଟଙ୍କା ପ୍ରଦାନ କରିଛନ୍ତି । କେନ୍ଦ୍ରୀୟ ଟିମ୍‌ର କ୍ଷୟକ୍ଷତି ଅନୁଧ୍ୟାନ ଓ ବିସ୍ତୃତ ରିପୋର୍ଟ ମିଳିବା ପରେ ଆବଶ୍ୟକ ଅନୁସାରେ ପ୍ୟାକେଜ୍‌ ମିଳିବ ବୋଲି କହିଥିଲେ ମୋଦି ।

ଉଲ୍ଲେଖନୀୟଯେ ଶୁକ୍ରବାର ଦିନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅମ୍ଫାନ ବାତ୍ୟା ପରବର୍ତ୍ତି କ୍ଷୟକ୍ଷତି ଅନୁଧ୍ୟାନ କରିବା ଲାଗି ଓଡ଼ିଶା ଆସିଥିଲେ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ ସେ ବାତ୍ୟା କ୍ଷତିଗ୍ରସ୍ତ ଅଞ୍ଚଳର ଆକାଶ ମାର୍ଗରୁ ଅନୁଧ୍ୟାନ କରିଥିଲେ । ଏହାପରେ ଓଡ଼ିଶାକୁ ବାତ୍ୟା ସହାୟତା ଭାବେ ୫ଶହ କୋଟି ଟଙ୍କା କେନ୍ଦ୍ର ଦେବ ବୋଲି ଘୋଷଣା କରିଥିଲେ । ମୁଖ୍ୟମନ୍ତ୍ରୀଙ୍କ ଉପସ୍ଥିତିରେ ସେ ଘୋଷଣା କରିଥିଲେ । ଏହାସହ ସେ ବାତ୍ୟା ମୁକାବିଲା ପାଇଁ ଓଡ଼ିଶା ସରକାରଙ୍କୁ ପ୍ରଶଂସା କରିଥିଲେ ।

ଭୁବନେଶ୍ୱର: ଲକଡାଉନ୍ ପାଇଁ ପାଖାପାଖି ୬୦ ଦିନ ହେବ ରାଜ୍ୟରେ ବନ୍ଦ ପଡିଥିବା ମଦ ଦୋକାନ ଖୋଲିବ । କିନ୍ତୁ କାଉଣ୍ଟରରୁ ବିକ୍ରି ହୋଇପାରିବ ନାହିଁ ମଦ । ଏଥିପାଇଁ ଗ୍ରାହକଙ୍କୁ ଅନଲାଇନ୍ ସପିଂ କରିବାକୁ ପଡିବ । ଆଉ ଘରେ ପହଂଚିବ  ମଦ । ଏନେଇ ରାଜ୍ୟ ସରକାର ଶନିବାର ଦିନ ଘୋଷଣା କରିଛନ୍ତି । ତେବେ ଏଥିପାଇଁ ଗ୍ରାହକଙ୍କୁ ପକେଟରୁ ୫୦ ପ୍ରତିଶତ ପ୍ଲସ ଡେଲିଭରି ଚାର୍ଜ୍ ଅଧିକ ଖର୍ଚ୍ଚ  କରିବାକୁ ପଡିବ । 

ଖୁବ୍‌ ଶୀଘ୍ର ଆରମ୍ଭ ହେବ ମଦ ବିକ୍ରୀ । ଏନେଇ ରାଜ୍ୟ ସରକାରଙ୍କ ପକ୍ଷରୁ ଅନୁମତି ମିଳିସାରିଛି । ସକାଳ ୭ରୁ ସନ୍ଧ୍ୟା ୬ ମଧ୍ୟରେ ମଦ ବିକ୍ରୀ ପାଇଁ ଅନୁମତି ଦେଇଛନ୍ତି ସରକାର । ତେବେ ମଦ କୌଣସି କାଉଣ୍ଟର ବା ଦୋକାନରୁ କିଣା ଯାଇପାରିବନାହିଁ ବୋଲି କୁହାଯାଇଛି । ମଦ କେବଳ ହୋମ୍‌ ଡେଲିଭରୀ କରାଯିବା ପାଇଁ ଅନୁମତି ଦେଇଛନ୍ତି ସରକାର । ଘରେ ବସି ଅର୍ଡର ଦେଲେ ପହଞ୍ଚିବ ମଦ । ତେବେ ଏହି ବ୍ୟବସ୍ଥା ୨୪ ମେ’ ରବିବାରଠାରୁ ଆରମ୍ଭ ହେବାକୁ ଯାଉଛି ।

ତେବେ ହୋମ୍‌ ଡେଲିଭରୀରେ ମଧ୍ୟ ଅନେକ କଟକଣା ରହିଛି । ମଦର ଏମ୍‌ଆର୍‌ପିଠାରୁ ୫୦ ପ୍ରତିଶତ ଅଧିକ ଦରରେ ବିକ୍ରି କରାଯିବ । ଏହି ୫୦ ପ୍ରତିଶତ କୋଭିଡ୍‌ ଫି ଭାବେ ରାଜ୍ୟ ସରକାରଙ୍କ ପାଖକୁ ଯିବ । ଖାଲି ସେତିକି ନୁହେଁ ହୋମ୍‌ ଡେଲିଭରୀ ପାଇଁ ପ୍ରତି ୧୦୦୦ ଟଙ୍କାର ମଦରେ ୧୦୦ ଟଙ୍କା ଚାର୍ଜ ଲାଗିବ । ଯଦି ମଦ ଦାମ୍‌ ୧୦୦୦ ଟଙ୍କାରୁ ଅଧିକ ହେବ ତେବେ ପ୍ରତି ୫୦୦ ଟଙ୍କାରେ ୨୫ ଟଙ୍କା ଅଧିକ ଚାର୍ଜ ଲାଗିବ ।

ହୋମ୍‌ ଡେଲିଭରୀ ପାଇଁ କିଛି ନିର୍ଦ୍ଦିଷ୍ଟ ଠିପି ଖୋଲା ଓ ଠିପି ବନ୍ଦ ମଦ ଦୋକନାକୁ ଅନୁମତି ଦିଆଯାଇଛି । ତେବେ କେଉଁ ଦୋକାନକୁ ଅନୁମତି ଦିଆଯାଇଛି ତାହା OSBC ଓ୍ୱେବ୍‌ସାଇଟ୍‌ରେ ଉପଲବ୍ଧ ଅଛି । ଓଏସ୍‌ବିସି ଓ୍ୱେବ୍ ସାଇଟ୍‌ OSBC.Co.in ରେ ଜିଲ୍ଲା ଓ୍ୱାରୀ ଠିପି ଖୋଲା ଓ ଠିପି ବନ୍ଦ ମଦ ଦୋକାନଙ୍କ ତଥ୍ୟ ରହିଛି । ଏହା ସହ ଓ୍ୱେବ୍‌ସାଇଟ୍‌ରେ ବିଭିନ୍ନ ବ୍ରାଣ୍ଡର ମଦର ଏମ୍‌ଆର୍‌ପି ମଧ୍ୟ ଉଲ୍ଲେଖ ରହିଛି ।

ଠିପି ବନ୍ଦ ଓ ଠିପି ଖୋଲା ମଦ ଦୋକାନ ସେମାନଙ୍କ ମୋବାଇଲ ନମ୍ବର, ହ୍ୱାଟ୍ସଆପ୍‌ ନମ୍ବର, ଇମେଲ୍‌, ୟୁପିଆଇ ସମ୍ବନ୍ଧରେ ନିଜ ଦୋକାନ ସାମ୍ନାରେ ବିସ୍ତୃତ ଓ ପ୍ରାଞ୍ଜଳ ଭାବେ ତଥ୍ୟ ଦେବେ । ଯାହାଦ୍ୱାରା ସେମାନେ ଅନ୍ ଲାଇନ୍‌ରେ ଅର୍ଡର ଗ୍ରହଣ କରିପାରିବେ । ତେବେ ଦୋକାନୀଙ୍କୁ ଏହା ନିଶ୍ଚିତ କରିବାକୁ ପଡ଼ିବ ଯେ ଦୋକାନ ଆଗରେ ଯେଭଳି ଲୋକଙ୍କ ଭିଡ଼ ନହୁଏ । ଖାଲି ସେତିକି ନୁହେଁ ରିଟେଲର ମାନେ ନିଜେ ହୋମ୍‌ ଡେଲିଭରୀ କରିପାରିବେ ନଚେତ୍‌ ହୋମ୍‌ ଡେଲିଭରୀ କରୁଥିବା ସଂସ୍ଥା ଯୋଗାଯୋଗ କରିପାରିବେ ।

ହେଲେ କଣ୍ଟେନ୍‌ମେଣ୍ଟ୍‌ ଜୋନ୍‌ ଏବଂ ସପିଂ ମଲ୍‌ରେ ଏହି ସୁବିଧା ମଦ ବିକ୍ରୀ ପାଇଁ ଅନୁମତି ନାହିଁ । ବିଦେଶୀ ମଦ ଓ ବିୟର ଉପରେ ଲାଗିବ ସ୍ୱତନ୍ତ୍ର କୋଭିଡ୍‌ ଫି’ । ଅର୍ଡର କରିବାର ୬ ଘଣ୍ଟା ମଧ୍ୟରେ ଘରେ ପହଞ୍ଚିବ ମଦ ।

ମଦ ହୋମ୍‌ ଡେଲିଭରୀ କରୁଥିବା ସଂସ୍ଥା ଏକ୍ସାଇଜ୍‌ କମିଶନରଙ୍କ ପାଖରୁ ଏନ୍‌ଓସି ନେବା ବାଧ୍ୟତାମୂଳକ ହେବ । ଯେଉଁ ସଂସ୍ଥାକୁ ହୋମ୍‌ ଡେଲିଭରୀ ପାଇଁ ଅନୁମତି ମିଳିଛି ସେମାନଙ୍କ ନାଁ ଓଏସ୍‌ବିସି ଓ୍ୱେବ୍‌ସାଇଟ୍‌ରେ ପ୍ରକାଶ ପାଇବ ।

ମଦର ଏମ୍‌ଆର୍‌ପି ଓ ଡେଲିଭରୀ ଚାର୍ଜ ବ୍ୟତୀତ ଅଧିକ ମୂଲ୍ୟ କେହି ହାଙ୍କିପାରିବେ ନାହିଁ । ଯଦି ଅଧିକ ଦାମ୍‌ରେ କେହି ବିକ୍ରି କରିବେ ତେବେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।