ରାଇରଙ୍ଗପୁର: ସହିଦଙ୍କ ଶେଷଯାତ୍ରା । ବୀର ଯବାନଙ୍କ ପାଇଁ ଗର୍ବିତ ବଡ଼ଚମ୍ପାଓଦା ଗାଁ। ମାତୃଭୂମି ପାଇଁ ପ୍ରାଣବଳୀ ଦେଇଥିବା ନୁଦୁରାମ ସୋରେନ୍‌ ଙ୍କର ଶେଷକୃତ୍ୟ ସମ୍ପନ୍ନ ହୋଇଛି । ରାଇରଙ୍ଗପୁର ବଡ଼ଚମ୍ପାଓଦା ଗାଁ ସହ ଯୋଡ଼ି ହୋଇଯାଇଛି ବୀର ଯବାନଙ୍କ ନାଁ । ସୀମାରେ ଚୀନ୍‌କୁ ମାତ୍‌ ଦେଇ ସହିଦ ହୋଇଛନ୍ତି ନୁଦୁରାମ । ଫେବ୍ରୁଆରିରେ ନୁଦୁରାମ ଶେଷଥର ପାଇଁ ଗାଁକୁ ଆସିଥିଲେ । ଛୁଟି ସରିବା ପରେ ଏପ୍ରିଲରେ ଫେରିଥିଲେ। ହେଲେ କିଏ ଜାଣିଥିଲା ତ୍ରିରଙ୍ଗାରେ ଘୋଡ଼ାଇ ହୋଇ ଫେରିବେ ବୋଲି।

ସହିଦଙ୍କ ଶେଷ ଦର୍ଶନ କରିଛନ୍ତି ସାଂସଦ ବିଶେଶ୍ୱର ଟୁଡୁ ଓ ଅନ୍ୟ ବିଧାୟକ। ଗାଁଲୋକେ, ପରିବାର ସଦସ୍ୟ କାହା ଆଖିରୁ ଲୁହ ଶୁଖୁନି। ଏବେ ଅଫେରା ରାଇଜରେ ନୁଦୁରାମ । ହେଲେ ଯେବେବି ଦେଶପ୍ରେମ କଥା ଉଠିବ ତାଙ୍କ ବଳୀଦାନ ମନେପଡିବ। ବୀର ଯବାନଙ୍କୁ ଜନ୍ମମାଟିରେ ଦିଆଯାଇଛି ଗାର୍ଡ ଅଫ୍‌ ଅନର। ସେପଟେ ସହିଦ ନୁଦୁରାମ ସୋରେନ୍‌ଙ୍କ ସମ୍ମାନରେ ଦିନିକିଆ ବଜାର ବନ୍ଦ ଘୋଷଣା କରିଛି ରାଇରଙ୍ଗପୁର ବଣିକ ସଂଘ ।

ଆଜି ଜନ୍ମମାଟିକୁ ଫେରିବ ୨ ଓଡ଼ିଆ ସହିଦଙ୍କ ପାର୍ଥିବ ଶରୀର

ବାଲେଶ୍ୱର: ସ୍ୱାମୀକୁ ପାଇବାକୁ ହାଇଦ୍ରାବାଦରୁ ଓଡ଼ିଶା ଆସିଲା ସ୍ତ୍ରୀ। ବେଡିଂ ପତ୍ର ଧରି ସ୍ୱାମୀ ଘର ଆଗରେ ରାତି ଅନିଦ୍ରା ହେଲା ସ୍ତ୍ରୀ। ଘଟଣା ଘଟିଛି ବାଲେଶ୍ୱର ସିଂଲା ଥାନା ବିଶିକାଦେଇପୁରରେ । ପ୍ରଥମ ସ୍ତ୍ରୀ ଥାଉ ଥାଉ ଆଉ ଜଣଙ୍କୁ ବିବାହ କରିବା ପରେ ଏବେ ପ୍ରଥମ ସ୍ତ୍ରୀ ସ୍ୱାମୀ ଘର ଆଗରେ ଧାରଣା ଦେଇଛି ।

ଗାଁର ବିପ୍ଲବ ମଲ୍ଲିକ ନାମକ ଜଣେ ଯୁବକ ସୁନ୍ଦରଗଡ଼ର ଜଣେ ଯୁବତୀଙ୍କୁ ଭଲପାଇ ଘରୁ ପଳେଇଆସିଥିଲେ। ହାଇଦ୍ରାବାଦର ଘରୋଇ କମ୍ପାନୀରେ କାମ କରି ଦୁଇ ପ୍ରାଣୀ ଚଳୁଥିଲେ । ଲକଡାଉନରେ ଘରକୁ ଆସି ପୁଣି ପ୍ରେମରେ ପଡ଼ିଗଲା ବିପ୍ଲବ। ବିପ୍ଲବ ଆଉ ହାଇଦ୍ରାବାଦ ଫେରିନଥିବାରୁ ପ୍ରଥମ ସ୍ତ୍ରୀ ବିପ୍ଲବର ଘର ଆଗରେ ସ୍ୱାମୀକୁ ପାଇବାକୁ ଦାବି କରୁଛି ସ୍ତ୍ରୀ ।

ତେବେ ପ୍ରଥମ ସ୍ତ୍ରୀ ଆସିବା ଖବର ଜାଣିବା ପରେ ଦ୍ୱିତୀୟ ସ୍ତ୍ରୀକୁ ଧରି ଚମ୍ପଟ୍‌ ମାରିଛି ବିପ୍ଲବ । ଏନେଇ ସିଂଲା ଥାନାରେ ଲିଖିତ ଅଭିଯୋଗ ହୋଇଛି । ପୋଲିସ ଘଟଣାର ତଦନ୍ତ କରୁଛି ।

ସମ୍ବଲପୁର: ସମ୍ବଲପୁର ଜିଲ୍ଲା ଜୁଜୁମରା ରେଞ୍ଜ ବରଙ୍ଗାମାଲ ଗାଁରେ ହାତୀ ଆତଙ୍କ । ହାତୀ ଆକ୍ରମଣରେ ଜଣେ ମୃତ୍ୟୁ ହୋଇଛି । ମୃତକ ହେଲେ ଅଷାଢୁ ଭୁଏ । ସେ ଟ୍ରାକ୍ଟର ଡ୍ରାଇଭର ଭାବେ କାମ କରନ୍ତି। ଗଲା ରାତିରେ କୁଲଶର ଗାଁରେ କାମ ସାରି ଘରକୁ ଫେରିବା ବେଳେ ବାଟରେ ହାତୀ ଆକ୍ରମଣ କରିଥିଲା। ହାତୀ ଶୁଣ୍ଢରେ କଚାଡି ଅଷାଢୁଙ୍କୁ ମାରିଦେଇଛି । ବିଗତ କିଛିଦିନ ହେବ ଲଗାତର ସମ୍ବଲପୁରରେ ହାତୀ ଓ ଭାଲୁ ଉତ୍ପାତ ଦେଖିବାକୁ ମିଳୁଛି । ୩ ଦିନ ତଳେ ଭାଲୁ ଆକ୍ରମଣରେ ରେଢାଖୋଲରେ ୩ଜଣଙ୍କ ପ୍ରାଣହାନୀ ଘଟିଥିଲା ।

ସେହିପରି ଅନୁଗୁଳ ବନ୍ତଳା ବାରଗୌଣିଆରେ ମଧ୍ୟ ହାତୀ ଆତଙ୍କ । ହାତୀ ଆକ୍ରମଣରେ ଜଣଙ୍କର ମୃତ୍ୟୁ ହୋଇଛି। ମୃତକ ହେଲେ ବାରଗୌଣିଆର ସୁଗାମ ପ୍ରଧାନ । ସୁଦାମ ସକାଳୁ ଗାଁ ପାଖ ଜଙ୍ଗଲକୁ ଡାଳ ସଂଗ୍ରହ ପାଇଁ ଯାଇଥିଲେ। ସେଠାରେ ଦନ୍ତା ହାବୁଡ଼ରେ ପଡ଼ିଥିଲେ ।

ପରେ ରାସ୍ତାରେ ଯାଉଥିବା ମୁଢ଼ି ବ୍ୟବସାୟୀଙ୍କୁ ହାତୀ ଗୋଡାଇଥିଲା। ହେଲେ ବ୍ୟବସାୟୀ ଶ୍ରୀନିବାସ ମହାଲିକ ବାଇକରେ ଥିବାରୁ ଅଳ୍ପକେ ବର୍ତ୍ତି ଯାଇଥିଲେ। ଗତକାଲି କରତପଟା ଜଙ୍ଗଲ ନିକଟରେ ମଧ୍ୟ ହାତୀ ଆକ୍ରମଣରେ ଜଣଙ୍କର ମୃତ୍ୟୁ ହୋଇଥିଲା ।

ରାଉରକେଲା: ରାଉରକେଲା ସୋନାଖାନ ଷ୍ଟେସନ ମାଷ୍ଟରଙ୍କ ମୃତ୍ୟୁ । ଟ୍ରେନ୍‌ ଦୁର୍ଘଟଣାରେ ଇମତିଆଜ୍‌ ଆଲାମଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ଷ୍ଟେସନରୁ ଗୋଟେ କିଲୋମିଟର ଦୂର ରାଜଗାଙ୍ଗପୁର ରେଲୱେ ପୋଲିସ ମୃତଦେହ ଉଦ୍ଧାର କରାଯାଇଛି ।

ସୂଚନା ଅନୁସାରେ ଶୌଚ ପାଇଁ ଯାଇଥିବା ବେଳେ ଟ୍ରେନ୍‌ ଧକ୍କା ଦେଇଥିଲା । ରାଜଗାଙ୍ଗପୁର ରେଲୱେ ପକ୍ଷରୁ ଏକ ଅପମୃତ୍ୟୁ ମାମଲା ରୁଜୁ କରାଯାଇ ଅଧିକ ତଦନ୍ତ ଜାରି ରହିଛି ।

ଭୁବନେଶ୍ୱର: ଲକ୍‌ଡାଉନ୍‌ରେ ଦୀର୍ଘ ମାସ ଧରି ଫସି ରହିଥିବା ପ୍ରବାସୀ ଓଡ଼ିଆ ଆଜି ଓଡ଼ିଶା ଫେରିଛନ୍ତି । ଦୋହାରୁ ୧୫୫ ଜଣ ପ୍ରବାସୀ ଭୁବନେଶ୍ୱରରେ ପହଞ୍ଚିଛନ୍ତି । ଦୋହାସ୍ଥିତ ଭାରତୀୟ ଦୂତାବାସ ଓ ଓଡ଼ିଆ ସୋସାଇଟି ଉତ୍କଳିକାର ସହଯୋଗରେ ବନ୍ଦେ ଭାରତ ମିଶନ୍‌ ଅଭିଯାନରେ ସ୍ୱଦେଶ ଫେରିଛନ୍ତି ପ୍ରବାସୀ ।

ଭୁବନେଶ୍ୱରେ ପହଞ୍ଚିବା ପରେ ଯାତ୍ରୀମାନେ ନିଜ ନିଜ ଘରକୁ ଫେରିଛନ୍ତି । ଦୋହାରୁ ଫେରିଥିବା ପ୍ରବାସୀ ରାଜ୍ୟ ସରକାରଙ୍କୁ କୃତଜ୍ଞତା ଜଣାଇଛନ୍ତି। ଏହାପୂର୍ବରୁ ଦୁବାଇରୁ ବିଭିନ୍ନ ପର୍ଯ୍ୟାୟରେ ଶହଶହ ପ୍ରବାସୀ ଘରକୁ ଓଡ଼ିଶା ଫେରିଛନ୍ତି। ସେମାନଙ୍କୁ ବିମାନ ବନ୍ଦରରେ ସ୍ୱାସ୍ଥ୍ୟ ପରୀକ୍ଷା କରିବା ପରେ ନିଜ ଅଚଂଳକୁ ପଠାଯାଇଛି । ଏହାପରେ ସେମାନେ କୋଭିଡ୍‌ ନିୟମ ଅନୁସାରେ କ୍ୱାରେଣ୍ଟାଇନ୍‌ରେ ରହିଛନ୍ତି ।

ପ୍ରବାସୀ ଓଡ଼ିଆଙ୍କୁ ଫେରାଇ ଆଣୁଛନ୍ତି ଓଡ଼ିଆ ପାଇଲଟ: ଆକାଶରେ ଗୁଞ୍ଜରିତ ହେଲା ଜୟ ଜଗନ୍ନାଥ

କାନ୍ଦୁଛି ମା, ଝୁରୁଛି ଗାଁ । ଜନ୍ମମାଟିରୁ ୨ ବୀର ଯବାନଙ୍କୁ ଦିଆଯାଉଛି ଶେଷ ଶ୍ରଦ୍ଧାଞ୍ଜଳି। ସୀମାରେ ସହିଦଙ୍କ ସାହାସ ଓ ଶୌର୍ଯ୍ୟକୁ ସାରା ଦେଶ ସଲାମ କରୁଛି। ମାତ୍ତୃଭୂମି ପାଇଁ ବଳିଦାନକୁ ମନେରଖିବ ଭାରତ । ୨ ବୀର ସହିଦ ଯବାନଙ୍କ ହେବ ଶେଷକୃତ୍ୟ। ରାଇରଙ୍ଗପୁର ବିଜାତଳା ବ୍ଲକ ବଡ଼ଚମ୍ପାଓଦାରେ ହେବ ନନ୍ଦୁରାମ ସୋରେନ୍‌ଙ୍କ ଅନ୍ତିମ ସଂସ୍କାର। ସହିଦଙ୍କ ଶେଷ ଦର୍ଶନ କରିଛନ୍ତି ସାଂସଦ ବିଶେଶ୍ୱର ଟୁଡ଼ୁ ଓ ଅନ୍ୟ ବିଧାୟକ। ଏସପି, କଲେକ୍ଟର, ବିହାର ରେଜିମେଣ୍ଟର କର୍ମଚାରୀ ଉପସ୍ଥିତ ଅଛନ୍ତି ।

ଫେବ୍ରୁଆରିରେ ନନ୍ଦୁରାମ ଶେଷଥର ପାଇଁ ଗାଁକୁ ଆସିଥିଲେ । ଛୁଟି ସରିବା ପରେ ଏପ୍ରିଲରେ ଫେରିଥିଲେ। ରାଷ୍ଟ୍ରୀୟ ମର୍ଯ୍ୟାଦା ସହ ତାଙ୍କ ଶେଷକୃତ୍ୟ କରାଯିବ। ସେହିପରି କନ୍ଧମାଳ ରାଇକିଆ ମହୋତ୍ସବ ପଡ଼ିଆରେ ପହଞ୍ଚିଛି ସହିଦ ଚନ୍ଦ୍ରକାନ୍ତ ପ୍ରଧାନଙ୍କ ପାର୍ଥିବ ଶରୀର। ସାଂସଦ ଅଚ୍ୟୁତ ସାମନ୍ତ, ମନ୍ତ୍ରୀ ଅରୁଣ ସାହୁ ଓ ବିଧାୟକ ତାଙ୍କର ଶେଷ ଦର୍ଶନ କରିଛନ୍ତି।

ସହିଦ ଚନ୍ଦ୍ରକାନ୍ତ ଙ୍କୁ ସାରା ଗାଁ ଝୁରୁଥିବା ବେଳେ, କୋହସମ୍ଭାଳି ପାରୁନାହାନ୍ତି ବାପା କରୁଣାକର ପ୍ରଧାନ ଓ ମା’ ବିଳାସିନୀ । ଡିସେମ୍ବରରେ ଶେଷ ଥର ପାଇଁ ଛୁଟିରେ ଆସିଥିଲେ  ପୁଅ ଚନ୍ଦ୍ରକାନ୍ତ । ଫେବ୍ରୁଆରୀ ୧୩ରେ ଫେରିଥିଲେ ଲଦାଖ ।

ଆଜି ଜନ୍ମମାଟିକୁ ଫେରିବ ୨ ଓଡ଼ିଆ ସହିଦଙ୍କ ପାର୍ଥିବ ଶରୀର