ଭୁବନେଶ୍ୱର: ଲକଡାଉନ୍ ମଧ୍ୟରେ ଆଶ୍ୱସ୍ଥିକର ଖବର । ବହୁ କଳ୍ପନାଜଳ୍ପନା ପରେ ଏଥର ଗ୍ରୀନ ଜୋନରେ ଗଡ଼ିବ ବସ୍ । ଏନେଇ ପରିବହନ ବିଭାଗ ପଠାଇଥିବା ପ୍ରସ୍ତାବକୁ ମୁଖ୍ୟମନ୍ତ୍ରୀଙ୍କ ଅନୁମୋଦନ ମିଳିଛି । କେବଳ ସେତି ନୁହେଁ ବସରେ ଯାତ୍ରା କରୁଥିବା ଯାତ୍ରୀମାନଙ୍କ ଭଡ଼ାକୁ ଦୁଇ ଗୁଣିତ କରିବା ପାଇଁ ବ୍ୟବସ୍ଥା କରାଯାଇଛି । ଯେହେତୁ ଦୁଇଟି ସ୍ଥାନକୁ ବସ୍ ଚଳାଚଳ କରୁଥିବା ସମୟରେ ଦୁଇଟି ସ୍ଥାନ ଗ୍ରୀନ୍ ଜୋନ ଓ ରେଡ଼ ଜୋନ ହୋଇଯାଉଛି ତେଣୁ ବସ ଚଳାଚଳ କରି ପାରୁନି । ଦିନେ କି ଦୁଇ ଦିନ ଭିତରେ ଏନେଇ ସରକାର ନିଷ୍ପତ୍ତି ନେବେ ।

କିନ୍ତୁ ସରକାରୀ ଅଧିକାରୀଙ୍କ ଯିବା ଆସିବା ପାଇଁ କଟକରୁ ବସ ଚଳାଚଳ ଆରମ୍ଭ କରିବେ ରାଜ୍ୟ ସରକାର ।  ଆସନ୍ତାକାଲି ଠାରୁ ଏହି ସେବା ଆରମ୍ଭ ହେବ ।  କଟକରୁ ଭୁବନେଶ୍ୱରକୁ ଗୋଟିଏ ବସ ଚଲିବ ବୋଲି ନିଷ୍ପତ୍ତି ନିଆଯାଇଛି । କଟକରୁ ଭୁବନେଶ୍ୱର ବସଭଡା ଭଡା ୩୦ ଟଙ୍କା ରହିବ ।

ଟ୍ରେନ୍ ଚଳାଚଳକୁ ନେଇ ନୂଆ ଗାଇଡଲାଇନ୍

ଟ୍ରେନ ଚଳାଚଳକୁ ନେଇ ରାଜ୍ୟ ସରକାରଙ୍କ ଗାଇଡଲାଇନ୍ । ଆଜି ସନ୍ଧ୍ୟା ସୁଧା ଏହି ଗାଇଡଲାଇନ୍ ପ୍ରସ୍ତୁତ କରାଯିବ । ଯେଉଁ ମାନେ ଅନ୍ୟ ରାଜ୍ୟରୁ ଆସିବେ ସେମାନେ ଗାଇଡ଼ଲାଇନ ମାନିବାକୁ ବାଧ୍ୟ । ସଂଗରୋଧ ଓ ସାମାଜିକ ଦୂରତା ମାନିବାକୁ ଏମାନେ ବାଧ୍ୟ ହେବେ । ଟ୍ରେନ ଯୋଗେ ଆସୁଥିବା ଅର୍ଥିକ ସ୍ୱଛଳ ଲୋକ ନିଜସ୍ୱ ସୁବିଧାରେ ଯିବେ । ଯେଉଁମାନେ ଯାଇ ପାରିବେ ନାହିଁ ସେମାନଙ୍କ ପାଇଁ ସରକାର ବ୍ୟବସ୍ଥା କରିବେ । ଯେଉଁମାନେ ଅନ୍ୟ ରାଜ୍ୟରୁ ଆସୁଛନ୍ତି ସେମାନଙ୍କ ପାଇଁ ପଞ୍ଜିକରଣ ବାଧ୍ୟତାମୂଳକ କରାଯାଇଛି । ଯଦି ସେମାନେ ପଞ୍ଜିକରଣ କରି ନଥିବେ ଏହି ଠାରେ କରିବାର ସୁବିଧା ରହିଛି ।

ଭୁବନେଶ୍ୱର: ଆସନ୍ତା ସେପ୍ଟେମ୍ବର ମାସ ସୁଦ୍ଧା ରାଜ୍ୟରେ ପର୍ଯ୍ୟଟନ ଶିଳ୍ପକୁ ପୁନର୍ବାର ସକ୍ରିୟ କରାଯିବ । ଏନେଇ ପର୍ଯ୍ୟଟନ ବିଭାଗ ପ୍ରସ୍ତୁତ କରିଛି ବ୍ଲୁ ପ୍ରିଣ୍ଟ । ବିଶେଷକରି ଡୋମେଷ୍ଟିକ ଟୁରିଜିମ୍ ଉପରେ ବିଭାଗ ଗୁରୁତ୍ୱ ଦେଇଛି । ରୋଡ ସୋ’ ମାଧ୍ୟମରେ ଅଧିକ ପର୍ଯ୍ୟଟକଙ୍କୁ ଆକୃଷ୍ଟ କରାଯିବ । ଏଥିପାଇଁ ପଡ଼ୋଶୀ ରାଜ୍ୟ ଛତିଶଗଡ଼, ଆନ୍ଧ୍ର, ଝାଡ଼ଖଣ୍ଡ, ପଶ୍ଚିମବଙ୍ଗ ଆଦି ରାଜ୍ୟରେ ରୋଡ ସୋ’ କରିବ ପର୍ଯ୍ୟଟନ ବିଭାଗ ।

ଚନ୍ଦ୍ରଭାଗାରେ ଇକୋ ରିଟ୍ରିଟର ସଫଳତା ପରେ ରାଜ୍ୟର ୫ଟି ବେଳାଭୂମି ଓ ଦାରିଙ୍ଗବାଡ଼ିରେ ଇକୋ ରିଟ୍ରିଟ୍ କ୍ୟାମ୍ପ କରାଯିବ ବୋଲି ପର୍ଯ୍ୟଟନ ମନ୍ତ୍ରୀ ଜ୍ୟୋତି ପାଣିଗ୍ରାହୀ ସୂଚନା ଦେଇଛନ୍ତି । ଲକଡାଉନ ଯୋଗୁ ଅଢେଇ ମାସ ହେଲା ପର୍ଯ୍ୟଟକ ଓଡିଶା ଆସିନାହାନ୍ତି । ଫେବ୍ରୁଆରୀ ମାସରୁ ପର୍ଯ୍ୟଟନ ଶିଳ୍ପରେ ବାଧା ଉପୁଜିଛି । ପର୍ଯ୍ୟଟନ ଶିଳ୍ପକୁ ପୁନଃ ସକ୍ରିୟ କରିବା ପାଇଁ ବିଭାଗ ବ୍ଲୁ ପ୍ରିଣ୍ଟ ପ୍ରସ୍ତୁତ କରିଛି ।

ହିନ୍ଦୋଳ: ହିନ୍ଦୋଳ ଫରେଷ୍ଟ ରେଞ୍ଜରେ ହାତୀ ଆତଙ୍କ । ହାତୀ ଆକ୍ରମଣରେ ଜଣେ ମୃତ । ମୃତକ ଚାମୁଚକଡ଼ା ଗାଁର ଦୁର୍ଯ୍ୟୋଧନ ନାଏକ । ଯୁବକ ଜଣକ ବାଇକରେ ମହିଧରପୁର ଗାଁକୁ ଯାଉଥିବାବେଳେ ଦନ୍ତା ଆକ୍ରମଣର ଶିକାର ହୋଇଥିଲେ ।

ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଛି । ଗତ ୨ ତାରିଖରେ ହାତୀ ଆକ୍ରମଣରେ ଖରିଡାଳି ଗାଁର ଦମୃୟନ୍ତୀ ବିଶ୍ୱାଳଙ୍କ ମୃତ୍ୟୁ ହୋଇଛି । କାଜୁ ମଞ୍ଜି ଗୋଟାଇବାକୁ ଯାଇଥିବାବେଳେ ମହିଳା ଜଣକ ହାତୀ ଆକ୍ରମଣର ଶିକାର ହୋଇଥିଲେ । ଗତ ଦୁଇ ସପ୍ତାହରେ ହିନ୍ଦୋଳ ଫରେଷ୍ଟ ରେଞ୍ଜ ଅଞ୍ଚଳରେ ହାତୀ ଆକ୍ରମଣରେ ଦୁଇ ଜଣଙ୍କ ମୃତ୍ୟୁ ହୋଇଥିବାରୁ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଛି ।

ବାଲେଶ୍ୱର: ୨ ଦିନ ପାଇଁ ବାଲେଶ୍ୱର ଖଇରା ପଞ୍ଚାୟତ ସଟ୍‌ଡାଉନ୍‌ କଲେ ସରପଞ୍ଚ । ଆଜି ସକାଳ ୬ଟାରୁ ୧୪ ତାରିଖ ସକାଳ ୬ଟା ପର୍ଯ୍ୟନ୍ତ ୨ଦିନ ପାଇଁ ସଟ୍‌ଡାଉନ୍‌ ଘୋଷଣା କରିଛନ୍ତି ଖଇରା ସରପଞ୍ଚ ସୁଦର୍ଶନ ସେଠୀ ।

ସୁରତ, ତାମିଲନାଡୁ, ମହାରାଷ୍ଟ୍ର ଓ ବେଙ୍ଗଳୁରୁରୁ ପ୍ରବାସୀ ଓଡ଼ିଆ ଶ୍ରମିକ ଆସୁଛନ୍ତି। ସେମାନଙ୍କ ସଂସ୍ପର୍ଶରେ ଯେମିତି କେହି ନଆସିବେ, ସେଥିପାଇଁ ଖଇରା ଓ ଆଖପାଖ ଅଞ୍ଚଳକୁ ୪୮ ଘଣ୍ଟା ପାଇଁ ସଟ୍‌ଡାଉନ୍‌ କରାଯାଇଛି । ସଟ୍‌ଡାଉନ୍‌ ସମୟରେ କେବଳ ଔଷଧ ଦୋକାନ ଖୋଲା ରହିବ। ବାକି ଦୋକାନ ବଜାର ବନ୍ଦ ରହିବ ।

ପୁରୀ: ଆନ୍ଧ୍ରପ୍ରଦେଶରୁ ଜଳପଥ ଦେଇ ଆସିଲେ ମତ୍ସ୍ୟଜୀବୀ । ସ୍ୱତନ୍ତ୍ର ଡଙ୍ଗାରେ ଚନ୍ଦ୍ରଭାଗାରେ ପହଞ୍ଚିଲେ ୧୬ ମତ୍ସ୍ୟଜୀବୀ। ଆଜି ସକାଳ ୬ଟାରେ ଆନ୍ଧ୍ରପ୍ରଦେଶ ତୁନି ଅଞ୍ଚଳରୁ ୧୬ଜଣ ମତ୍ସ୍ୟଜୀବୀ ଏକ ଡଙ୍ଗାରେ ଆସି କୋଣାର୍କ ଉପକୂଳରେ ପହଞ୍ଚିଛନ୍ତି।

ଏହାପରେ ସମସ୍ତଙ୍କୁ ପ୍ରଶାସନ ପକ୍ଷରୁ ଏକ ସ୍ୱତନ୍ତ୍ର ଗାଡ଼ିରେ କୋଣାର୍କ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରର କ୍ୱାରେଣ୍ଟାଇନ୍‌ ସେଣ୍ଟରରେ ଭର୍ତ୍ତି କରାଯାଇଛି। ଏମାନଙ୍କ ମଧ୍ୟରୁ ୧୧ଜଣ ଚନ୍ଦ୍ରଭାଗାର ହୋଇଥିବା ବେଳେ ୫ଜଣ ପୁରୀ ପେଣ୍ଠକଟାର।

ମତ୍ସ୍ୟଜୀବୀମାନେ ୨ମାସ ହେଲା ଲକ୍‌ଡାଉନ୍‌ରେ ଫସିରହିଥିଲେ। ନିଜ ଖର୍ଚ୍ଚରେ ଡଙ୍ଗା କିଣି ଗତ ରବିବାର ସମୁଦ୍ରରେ ଯାତ୍ରା ଆରମ୍ଭ କରିଥିଲେ। ୫ଶହ କିଲୋମିଟର ଯାତ୍ରା କରି ଆଜି ସକାଳେ ଚନ୍ଦ୍ରଭାଗାରେ ପହଞ୍ଚିଥିଲେ।