ଚେନ୍ନାଇ: ବିନା ରାଜନୈତିକ ଦଳ ଗଠନ କରି ପଲିଟିକ୍ସକୁ ଏଣ୍ଟ୍ରି ମାରିଛନ୍ତି ସାଉଥ୍ ସୁପରଷ୍ଟାର ରଜନୀ । ଗୁରୁବାର ଦିନ ଚେନ୍ନାଇରେ ଏକ ସାମ୍ବାଦିକ ସମ୍ମିଳନୀରେ ରଜନୀ ରାଜନୀତିକୁ ନେଇ ନିଜ ଯୋଜନା ସଂପର୍କରେ ଘୋଷଣା କରିଛନ୍ତି । ତାଙ୍କ ଅନୁସାରେ ସେ କେବେ ମଧ୍ୟ ତାମିଲନାଡୁ ମୁଖ୍ୟମନ୍ତ୍ରୀ ହେବାର ସ୍ୱପ୍ନ ଦେଖିନଥିଲେ । ସେ କେବଳ ରାଜନୀତିରେ ପରିବର୍ତ୍ତନ ଚାହାନ୍ତି । ନିଜ ରାଜନୈତିକ ଦଳ ସମ୍ପର୍କରେ ସୂଚନା ଦେଇ ସେ କହିଥିଲେ ଯେ, ସେ ଏମିତି ଏକ ଦଳ ତିଆରି କରିବାକୁ ଯାଉଛନ୍ତି ଯାହାର ମୁଖ୍ୟ ଓ ଶାସନ ମୁଖ୍ୟ ଅଲଗା ବ୍ୟକ୍ତି ରହିବେ ଓ ଅଲଗା କାମ କରିବେ ।
ରଜନୀକାନ୍ତ କହିଛନ୍ତି ଯେ, ତାମିଲନାଡୁ ରାଜନୀତିର ଦୁଇ ବଡ଼ ଖେଳାଳୀ ଜୟଲଳିତା ଓ କରୁଣାନିଧିଙ୍କ ଦେହାନ୍ତ ପରେ ରାଜନୈତିକ ଶୂନ୍ୟତା ସୃଷ୍ଟି ହୋଇଛି । ତେଣୁ ପରିବର୍ତ୍ତନ ପାଇଁ ଆମକୁ ନୂଆ ଆନ୍ଦୋଳନ ଆରମ୍ଭ କରିବାକୁ ହେବ ।
ରଜନୀକାନ୍ତଙ୍କ ତିନି ସୂତ୍ର
1. ଦଳରେ ଏଭଳି ଅନାବଶ୍ୟକ ପଦର ବିଲୋପ କରାଯିବ, ଯାହାର ନିର୍ବାଚନ ବେଳେ ଆବଶ୍ୟକତା ଥାଏ କିନ୍ତୁ ପରେ ଏଭଳି ପଦବୀ ଦୁର୍ନିତୀର କାରଣ ବନନ୍ତି । ଏହାକୁ ରୋକିବାକୁ ପଡିବ ।
2. ରଜନୀଙ୍କ ଦଳରେ ୬୦ରୁ ୬୫ ପ୍ରତିଶତ ପଦ ଯୁବ, ଶିକ୍ଷିତ ଓ ସଫା ଭାବମୂର୍ତ୍ତି ଥିବା ବ୍ୟକ୍ତିଙ୍କ ପାଇଁ ସଂରକ୍ଷିତ ରହିବ । ବାକି ପଦବି ପୂର୍ବତନ ବିଚାରପତି, ପୂର୍ବତନ ଆଇପିଏସ ଓ ସେହି ଭଳି ଅନ୍ୟବ୍ୟକ୍ତିଙ୍କ ସଂରକ୍ଷିତ ରହିବ ଯେଉଁମାନଙ୍କ ଭଲ ରେକର୍ଡ ଥିବ ।
3. ଡିଏମକେ ଓ ଏଆଇଏଡିଏମକେ ଭଳି ଦଳ ମୁଖ୍ୟ ଓ ସରକାର ମୁଖ୍ୟ ଜଣେ ବ୍ୟକ୍ତି ରହିବେ ନାହିଁ । ଦଳ ମୁଖ୍ୟ ଓ ଶାସନ ମୁଖ୍ୟ ଅଲଗା ବ୍ୟକ୍ତି ରହିବେ ।
ମୁଖ୍ୟମନ୍ତ୍ରୀ ହେବା କେବେ ମଧ୍ୟ ତାଙ୍କ ଇଛା ନଥିଲା ବୋଲି କହି ରଜନୀକାନ୍ତ କହିଛନ୍ତି ଯେ, ୧୯୯୬ ମସିହାରେ ମୁଁ ଚାହିଁଥିଲେ ମୁଖ୍ୟମନ୍ତ୍ରୀ ହୋଇ ପାରିଥାନ୍ତି । ଯଦି ୪୫ ବର୍ଷ ବୟସରେ ମୁଁ ମୁଖ୍ୟମନ୍ତ୍ରୀ ହେବାକୁ ଚାହିଁନଥିଲି ତେବେ ଏବେ କଣ ପାଇଁ ଚାହିଁବି’’ ।
୧୯୯୬ ମସିହାରେ ରଜନୀକାନ୍ତଙ୍କ ଅପିଲ କାରଣରୁ ଜୟଲଳିତା ନିର୍ବାଚନରେ ହାରିଥିଲେ । ସେତେବେଳେ ରଜନୀକାନ୍ତ, ଡିଏମକେକୁ ଯିତାଇବାକୁ ପରୋକ୍ଷରେ ନିବେଦନ କରିଥିଲେ । ଏହାପରେ ରଜନୀ ଓ ଜୟାଙ୍କ ମଧ୍ୟରେ ସଂପର୍କ ଖରାପ ହୋଇ ପଡିଥିଲା । ରଜନୀକାନ୍ତ ଏବେ ସିଏଏ ପ୍ରସଙ୍ଗରେ କେନ୍ଦ୍ର ସରକାରଙ୍କୁ ସମର୍ଥନ କରୁଛନ୍ତି । ତେଣୁ ରଜନୀଙ୍କ ଦଳ ଓ ବିଜେପି ମଧ୍ୟରେ ବୁଝାମଣା ହୋଇପାରେ ବୋଲି ,ସମ୍ଭାବନା ବ୍ୟକ୍ତ କରାଯାଉଛି ।
