ଭୁବନେଶ୍ୱର: ଆସନ୍ତା ୨୪ ଘଣ୍ଟା ମଧ୍ୟରେ ରାଜ୍ୟର ୫ ଜିଲ୍ଲାରେ ବର୍ଷାର ସମ୍ଭାବନା ରହିଛି । ସୁନ୍ଦରଗଡ, କେନ୍ଦୁଝର, ଗଜପତି, ବାଲେଶ୍ୱର ଏବଂ ମୟୁରଭଞ୍ଜ ଜିଲ୍ଲାରେ ସ୍ୱଳ୍ପ ବୃଷ୍ଟିପାତ ହେବା ନେଇ ଆକଳନ କରିଛି ପାଣିପାଗ ବିଭାଗ । ଏହାଛଡା ଆସନ୍ତା ୪ ତାରିଖ ବେଳକୁ କନ୍ଧମାଳ, ଯାଜପୁର, ବାଲେଶ୍ୱର, ନୟାଗଡ, କେନ୍ଦୁଝର, ମୟୁରଭଞ୍ଜ, କଟକ ଜିଲ୍ଲାରେ ମଧ୍ୟ ବର୍ଷା ହେବାର ସମ୍ଭାବନା ରହିଛି । ଅପରପକ୍ଷେ ୫ ଏବଂ ୬ ତାରିଖରେ ଉତ୍ତର ଓଡିଶାର କେତେକ ଜିଲ୍ଲାରେ ମଧ୍ୟ ବର୍ଷା ହେବ ବୋଲି ସୂଚନା ରହିଛି ।
ଆଜି ସୁନ୍ଦରଗଡ଼ ଗସ୍ତରେ ଯିବେ ମୁଖ୍ୟମନ୍ତ୍ରୀ
ରାଉରକେଲା: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ସୁନ୍ଦରଗଡ଼ ଗସ୍ତରେ ଯିବେ। ସେଠାରେ ବିଭିନ୍ନ ପ୍ରକଳ୍ପର ଉଦ୍ଘାଟନ ଓ ଭିତ୍ତିପ୍ରସ୍ତର ସ୍ଥାପନ କରିବା କାର୍ଯ୍ୟକ୍ରମ ରହିଛି। ଆଜି ସାଢେ୧୨ଟାରେ ସୁନ୍ଦରଗଡ଼ ଷ୍ଟାଡିୟମରେ ପହଞ୍ଚି ସେଠାରେ ବିଭିନ୍ନ ପ୍ରକଳ୍ପର ଉଦ୍ଘାଟନ ଓ ଭିତ୍ତିପ୍ରସ୍ତର ସ୍ଥାପନ କରିବେ । ଏହାପରେ ସୁନ୍ଦରଗଡ଼ ଭବାନୀ ଭବନ ପଡିଆରେ ଏକ ସଭାରେ ଯୋଗ ଦେବା କାର୍ଯ୍ୟକ୍ରମ ରହିଛି।
ଯୁକ୍ତଦୁଇ ପରୀକ୍ଷା ଆରମ୍ଭ: ସବୁ ହବ୍ରେ ପହଞ୍ଚିସାରିଛି ପ୍ରଶ୍ନପତ୍ର
ଭୁବନେଶ୍ୱର: ଆଜିଠୁ ଯ଼ୁକ୍ତଦୁଇ ପରୀକ୍ଷା । ସବୁ ହବ୍ରେ ପହଞ୍ଚିସାରିଛି ପ୍ରଶ୍ନପତ୍ର । ପରୀକ୍ଷା କେନ୍ଦ୍ରକୁ ଜଗି ରହିଛନ୍ତି ସଶସ୍ତ୍ର ପୋଲିସ । ଚଳିତବର୍ଷ ରାଜ୍ୟର ୧୧୪୩ ପରୀକ୍ଷା କେନ୍ଦ୍ରରେ ୩ ଲକ୍ଷ ୫୦ହଜାର ୮୦୦ ପିଲା ପରୀକ୍ଷା ଦେବେ । କପି ରୋକିବା ସହ ଶୃଙ୍ଖଳିତ ପରୀକ୍ଷା ପରିଚାଳନା ପାଇଁ ସମସ୍ତ ପରୀକ୍ଷା କେନ୍ଦ୍ରରେ ସିସିଟିଭି ଲାଗିଛି । ନକ୍ସଲ ପ୍ରଭାବିତ ଅଞ୍ଚଳରେ ହୋଇଛି ସ୍ୱତନ୍ତ୍ର ବ୍ୟବସ୍ଥା। ଗଜପତି, ରାୟଗଡା ଏବଂ ମାଲକାନଗିରିରେ ପ୍ରଶ୍ନପତ୍ର ହବ୍କୁ ଜଗି ରହିଛନ୍ତି ଆର୍ମଫୋର୍ସ । ମାଲକାନଗିରିରେ ୩ଟି ଷ୍ଟ୍ରଙ୍ଗରୁମ୍ କରାଯାଇଥିବା ବେଳେ ଗଜପତିରେ ୪ଟି ଏବଂ ରାୟଗଡାରେ ୫ଟି ହବ୍ରେ ପ୍ରଶ୍ନପତ୍ର ରହିଛି । ପରୀକ୍ଷା କେନ୍ଦ୍ରରେ ସିସିଟିଭି ଲାଗିଥିବା ବେଳେ ସବୁ ହଲରେ କାନ୍ଥଘଣ୍ଟା ଲଗାଯାଇଛି । ପରୀକ୍ଷା ହଲକୁ ପ୍ରବେଶ ସମୟରେ ପରୀକ୍ଷାର୍ଥୀଙ୍କୁ ଦୁଇ ଥର ଚେକିଂ କରାଯିବ । ସେପଟେ ଚାପମୁକ୍ତ ହୋଇ ପରୀକ୍ଷା କେନ୍ଦ୍ରକୁ ଯିବାକୁ ପରୀକ୍ଷାର୍ଥୀଙ୍କୁ ପରାମର୍ଶ ଦିଆଯାଇଛି ।
‘ମୋ ସରକାର’ରେ ସାମିଲ ହେଲା ଆଉ ପାଞ୍ଚ ବିଭାଗ, ଏଣିକି ଲୋକଙ୍କ ସହ ସିଧା କଥା ହେବେ ଅଧିକାରୀ
ଭୁବନେଶ୍ୱର: ରାଜ୍ୟ ସରକାରଙ୍କ ‘ମୋ ସରକାର’ କାର୍ଯ୍ୟକ୍ରମରେ ସାମିଲ ହୋଇଛି ଆଉ ପାଞ୍ଚଟି ବିଭାଗ । ସେଗୁଡ଼ିକ ହେଉଛି ଜଳ ସମ୍ପଦ, ସହଯୋଗ, ମତ୍ସ୍ୟ ଏବଂ ଏଆର୍ଡି, ସାମାଜିକ ସୁରକ୍ଷା, ଇପିଡି ଏବଂ ଟେକ୍ସଟାଇଲ୍ ହ୍ୟାଣ୍ଡଲୁମ୍ । ଯାହାଫଳରେ ମୋ ସରକାର ଅଧୀନରେ ଥିବା ବିଭାଗର ସଂଖ୍ୟା ଏବେ ୨୨କୁ ବୃଦ୍ଧି ହୋଇଛି ।
ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି, “ଲୋକମାନେ ଏକ ଗଣତାନ୍ତ୍ରିକ ବ୍ୟବସ୍ଥାର ଜୀବନ୍ତ ଶକ୍ତି । ସରକାର ହେଉଛି ଲୋକଙ୍କ ଇଚ୍ଛାର ପ୍ରତିଫଳନ ଯାହା ସେମାନଙ୍କର ଆକାଂକ୍ଷା ପୂରଣ ପାଇଁ ଗଠିତ । ତେଣୁ, ଏହା ଅତ୍ୟନ୍ତ ଜରୁରୀ ଯେ ସରକାରୀ କର୍ମଚାରୀ ସେହି ଲୋକମାନଙ୍କର ସମ୍ମାନ ରକ୍ଷା କରିବା ଆବଶ୍ୟକ । ଲୋକଙ୍କ ପାଇଁ ସେବା କେବଳ ଏକ ସ୍ଲୋଗାନ ନୁହେଁ ବରଂ ଏକ ସଂସ୍କୃତି ହେବା ଆବଶ୍ୟକ । ଯାହା ପ୍ରତ୍ୟେକ ସରକାରୀ କର୍ମଚାରୀ ସର୍ବଦା ଗ୍ରହଣ କରିବା ଏବଂ ପ୍ରଦର୍ଶନ କରିବା ଜରୁରି ।
ମୁଖ୍ୟମନ୍ତ୍ରୀ ଆହୁରି କହିଥିଲେ ଯେ, ‘ମୁଁ ବିଶ୍ୱାସ କରେ ତୁମେ ସମସ୍ତେ ବାର୍ତ୍ତାକୁ ଅତି ସ୍ପଷ୍ଟ ଭାବରେ ପାଇଛ । ସରକାରୀ କର୍ମଚାରୀ ଭାବରେ, ମୋର ଦାୟିତ୍ୱ ଅଛି ଯେ ମୋର ରାଜ୍ୟର ପ୍ରତ୍ୟେକ ନାଗରିକ ତାଙ୍କ ହୃଦୟରୁ କୁହନ୍ତି ଯେ ଏହା ପ୍ରକୃତରେ ମୋ ସରକାର ଅଟେ’।
କାର୍ଯ୍ୟକ୍ରମରେ ଯୋଗଦେଇ ୫-ଟି ସଚିବ ଭି.କେ ପାଣ୍ଡିଆନ କେନ୍ଦୁଝର, ଜଗତସିଂହପୁର, ବୌଦ୍ଧ, ବୋଲାଙ୍ଗୀର ଏବଂ ନବରଙ୍ଗପୁର ଭଳି ଜିଲ୍ଲାର ପାଞ୍ଚଟି ବିଭାଗର ବିଭିନ୍ନ ଅଧିକାରୀଙ୍କ ସହ ଯୋଗାଯୋଗ କରିଥିଲେ। ମୋ ସରକାର ଉପରେ ଅଧିକାରୀ ଏବଂ କର୍ମଚାରୀଙ୍କ ସଚେତନତାକୁ ନେଇ ସେ ସନ୍ତୋଷ ବ୍ୟକ୍ତ କରିଛନ୍ତି । ସେ ଆହୁରି କହିଛନ୍ତି ଯେ, ସୋସିଆଲ ମିଡିଆରେ ପ୍ରକାଶିତ ଯୋଗାଯୋଗକୁ ସରକାରୀ ଯୋଗାଯୋଗ କିମ୍ବା ଆଦେଶ ଭାବରେ ମଧ୍ୟ ବିବେଚନା କରାଯିବା ଆବଶ୍ୟକ। ତେଣୁ, ସୋସିଆଲ ମିଡିଆ ଯୋଗାଯୋଗର ପ୍ରତିକ୍ରିୟା ଶୀଘ୍ର ହେବା ଜରୁରୀ।
ସାମିଲ ହୋଇଥିବା ବିଭାଗର ମନ୍ତ୍ରୀମାନେ ମଧ୍ୟ ଏହି ଅବସରରେ ଉପସ୍ଥିତ ଥିଲେ । ସେମାନେ ହେଲେ, ହସ୍ତତନ୍ତ ଏବଂ ବୟନ ମନ୍ତ୍ରୀ ପଦ୍ମିନୀ ଦିଆନ୍, ଜଳ ସମ୍ପଦ ମନ୍ତ୍ରୀ ରଘୁନନ୍ଦନ ଦାସ, ଏସଏସପିଡି ମନ୍ତ୍ରୀ ଅଶୋକ ପଣ୍ଡା, ମତ୍ସ୍ୟ ଓ ଏଆରଡି ମନ୍ତ୍ରୀ ଡ. ଅରୁଣ କୁମାର ସାହୁ, ସହଯୋଗ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ପ୍ରମୁଖ ନିଜ ନିଜ ବିଭାଗ ସଂପର୍କରେ ମତବ୍ୟକ୍ତ କରିଥିଲେ ।
ମୁଖ୍ୟ ଶାସନ ସଚିବ ଅସିତ ତ୍ରିପାଠୀ ସ୍ୱାଗତ ଭାଷଣରେ କହିଥିଲେ ଯେ, ‘ମୋ ସରକାର’ ଶାସନ ପ୍ରକ୍ରିୟାରେ ପରିବର୍ତ୍ତନ ଆଣିବ ଏବଂ ଓଡିଶାର ଲୋକଙ୍କୁ ସଶକ୍ତ କରିବ।
ରସିକିଆ ଶଳା ପାଇଁ କନିଆ ଠିକ୍ କରି ଫଶିଲା ଭିଣୋଇ
ଆଠଗଡ଼: ମହଙ୍ଗା ପଡ଼ିଲା ବାହାଘର ନିଶା । ଦୁଇଥର ବାହା ହେବା ପରେ ତୃତୀୟ ଥରରେ ଧରାପଡ଼ିଲା ବରର କାରନାମା । ବାହାଘର ପାଇଁ ଚାଲିଥିଲା ଶଳା ଭିଣେଇଙ୍କର ଯୋରଦାର ପ୍ରୟାସ । ପ୍ଲାନ ସଫଳ ହେଲା କିନ୍ତୁ ବରର କାରନାମା ଧରାପଡ଼ିଗଲା । ନିଜ ଭାଇ କହି ଶଳାର ତୃତୀୟ ବିବାହ କରି ଥାନାରେ ଭିଣୋଇ । ଭିଣୋଇକୁ ପୋଲିସ ଥାନାରେ ଅଟକ ରଖିଥିବା ବେଳେ ବର ଏବେ ଫେରାର ରହିଛି । କଟକ ଗୁରୁଡ଼ିଝାଟିଆ ଥାନା ଅଞ୍ଚଳରେ ଘଟିଛି ଏଭଳି ଘଟଣା ।
ସୂଚନା ଅନୁଯାୟୀ, କଟକ କଙ୍କଡ଼ାଯୋଡ଼ି ଗାଁର ଅରବିନ୍ଦ ସାହୁ ପୂର୍ବରୁ ୨ଥର ବିବାହ କରିଥିଲେ । ପରେ ଫେବ୍ରୁଆରୀ ୨୮ ତାରିଖରେ ବୌଦ୍ଧରେ ପୁଣି ତୃତୀୟ ଥର ପାଇଁ ବିବାହ କରିଥଲେ । ତୃତୀୟ ବାହାଘର ନେଇ ଭିଣୋଇ ଏବଂ ଶଳାଙ୍କର ଚାଲିଥିଲା ଯୋରଦାର ପ୍ଲାନ । ନିଜ ଶଳାକୁ ଭାଇର ପରିଚୟ ଦେଇ ଭିଣୋଇ ବାହା କରାଇବା ପରେ ନୂଆବୋହୁକୁ ନିଜ ଘରେ ରଖିଥିଲେ ଭିଣୋଇ ।
କିନ୍ତୁ ନବବିବାହିତା ତାଙ୍କ ସ୍ୱାମୀ ୨ଥର ବିବାହ କରିଥିବା ଜାଣି ନିଜ ପରିବାର ଲୋକଙ୍କୁ ଖବର ଦେଇଥିଲେ । ଝିଅଙ୍କ ପରିବାର ଲୋକ ଗୁରୁଡ଼ିଝାଟିଆ ଥାନାରେ ଏତଲା ଦେବା ପରେ ପୋଲିସ ନବବଧୂଙ୍କୁ ଉଦ୍ଧାର କରିବା ସହ ଯୌତୁକ ଜିନିଷ ଜବତ କରିଛି । ଘଟଣାରେ ଭିଣୋଇ ସନ୍ତୋଷ ସାହୁ ଥାନାରେ ଅଟକ ଥିବା ବେଳେ ବର ଫେରାର ଅଛି ।
ରାଜ୍ୟ କ୍ୟାବିନେଟରେ ୮ଟି ଗୁରୁତ୍ୱପୂର୍ଣ୍ଣ ପ୍ରସ୍ତାବକୁ ମିଳିଲା ମଞ୍ଜୁରୀ
ଭୁବନେଶ୍ୱର: ରାଜ୍ୟ କ୍ୟାବିନେଟରେ ୮ଟି ଗୁରୁତ୍ୱପୂର୍ଣ୍ଣ ପ୍ରସ୍ତାବକୁ ମିଳିଲା ମଞ୍ଜୁରୀ । ୪ଟି ବିଭାଗର ମୋଟ୍ ୮ଟି ପ୍ରସ୍ତାବକୁ ମିଳିଛି ମଞ୍ଜୁରୀ। ଅଙ୍ଗନବାଡ଼ି କେନ୍ଦ୍ର, ପ୍ରାଥମିକ ବିଦ୍ୟାଳୟ, ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଓ ହାଇସ୍କୁଲ୍ଗୁଡ଼ିକର ମୃରାମୃତି ଓ ରକ୍ଷଣାବେକ୍ଷଣ ଦାୟିତ୍ୱ ପଞ୍ଚାୟତକୁ ହସ୍ତାନ୍ତର କରାଯାଇଛି । ଆନ୍ତଃ ମନ୍ତ୍ରୀସ୍ତରୀୟ କମିଟି ସୁପାରିଶ ଆଧାରରେ ଏହାକୁ ଅନୁମୋଦନ କରିଛି କ୍ୟାବିନେଟ୍ । ସେହିପରି ହଜ୍ କମିଟିକୁ ଭୁବନେଶ୍ୱରରେ ଶୂନ୍ ଦଶମିକ ୦.୨୨ ଡେସିମିଲ୍ ଜମି ମାଗଣାରେ ଯୋଗାଇ ଦିଆଯିବ । ଏଥିପାଇଁ କୈାଣସି ଷ୍ଟାମ୍ପ ଡ୍ୟୁଟି ଲାଗୁ ହେବ ନାହିଁ । ଡ୍ରେନେଜ୍ ଉନ୍ନତିକରଣ ଓ କେନାଲ୍ ମରାମତି ସଂପର୍କୀୟ ଦୁଇଟି ପ୍ରସ୍ତାବକୁ କ୍ୟାବିନେଟ୍ ମଞ୍ଜୁରୀ ଦେଇଛି । ଅଚଳ ପଡିଥିବା ଉଠା ଜଳସେଚନ ପଏଣ୍ଟଗୁଡ଼ିକର ପୁନରୁଦ୍ଧାରକୁ ମଧ୍ୟ ମିଳିଛି ଅନୁମୋଦନ। ଜାତୀୟ ଓ ଅନ୍ତର୍ଜାତୀୟସ୍ତରର ଅନୁଷ୍ଠାନଗୁଡ଼ିକୁ ଓଡ଼ିଶାରେ ଡାକ୍ତରଖାନା ଓ ବିଦ୍ୟାଳୟ ପ୍ରତିଷ୍ଠା ପାଇଁ ପ୍ରସ୍ତୁତ ହୋଇଛି ନୂଆ ଗାଇଡ୍ଲାଇନ୍ । ଏହି ଗାଇଡ୍ଲାଇନ୍କୁ କ୍ୟାବିନେଟ୍ ଅନୁମୋଦନ ଦେଇଛି ।
କାଲିଠୁ ଯୁକ୍ତ ଦୁଇ ପରୀକ୍ଷା: ଜାଣନ୍ତୁ କପି ରୋକିବାକୁ କେମିତି ହୋଇଛି ବ୍ୟବସ୍ଥା ?
ଭୁବନେଶ୍ୱର: ଆସନ୍ତାକାଲିଠୁ ଯୁକ୍ତ ଦୁଇ ପରୀକ୍ଷା । ପ୍ରସ୍ତୁତି ଚୁଡାନ୍ତ। ସବୁ ହବ୍ରେ ପହଞ୍ଚି ସାରିଛି ପ୍ରଶ୍ନପତ୍ର । କେନ୍ଦ୍ରକୁ ଜଗି ରହିଛନ୍ତି ସଶସ୍ତ୍ର ପୋଲିସ । ଚଳିତ ବର୍ଷ ରାଜ୍ୟର ୩ ଲକ୍ଷ ୫୦ହଜାର ୮ଶହ ପିଲା ପରୀକ୍ଷା ଦେବେ । କପି ରୋକିବା ସହ ଶୃଙ୍ଖଳିତ ପରୀକ୍ଷା ପରିଚାଳନା ପାଇଁ ସମସ୍ତ ପରୀକ୍ଷା କେନ୍ଦ୍ରରେ ଲାଗିଛି ସିସିଟିଭି । ହଲକୁ ପ୍ରବେଶ ସମୟରେ ପରୀକ୍ଷାର୍ଥୀଙ୍କ ଦୁଇ ଦୁଇ ଥର ଚେକିଂ କରିବାର ବ୍ୟବସ୍ଥା କରିଛି ବୋର୍ଡ । ସବୁକେନ୍ଦ୍ରରେ ଲାଗିଛି ସିସିଟିଭି । ଯୁକ୍ତ ଦୁଇ ପରୀକ୍ଷା ପାଇଁ ଏଭଳି ବ୍ୟବସ୍ଥା କରିଛି ଗଣଶିକ୍ଷା ବିଭାଗ। ନକ୍ସଲ ପ୍ରଭାବିତ ଅଞ୍ଚଳରେ ହୋଇଛି ସ୍ୱତନ୍ତ୍ର ବ୍ୟବସ୍ଥା। ଗଜପତି, ରାୟଗଡା ଏବଂ ମାଲକାନଗିରିରେ ପ୍ରଶ୍ନପତ୍ର ହବ୍କୁ ଜଗି ରହିଛନ୍ତି ଆର୍ମଫୋର୍ସ । ପରୀକ୍ଷା କେନ୍ଦ୍ରରେ ସିସିଟିଭି ଲାଗିଥିବା ବେଳେ ସବୁ ହଲରେ କାନ୍ଥଘଣ୍ଟା ଲଗାଯାଇଛି । ମାଲକାନଗିରିରେ ୩ଟି ଷ୍ଟ୍ରଙ୍ଗରୁମ୍ କରାଯାଇଥିବା ବେଳେ ଗତପତିରେ ୪ଟି ଏବଂ ରାୟଗଡାରେ ୫ଟି ହବ୍ରେ ପ୍ରଶ୍ନପତ୍ର ରହିଛି ।
ସେପଟେ ଚାପମୁକ୍ତ ହୋଇ ପରୀକ୍ଷା କେନ୍ଦ୍ରକୁ ଯିବାକୁ ପରୀକ୍ଷାର୍ଥୀଙ୍କୁ ପରାମର୍ଶ ଦେଇଛି ବୋର୍ଡ । ୧୧୪୩ ପରୀକ୍ଷା କେନ୍ଦ୍ରରେ 3 ଲକ୍ଷ ୫୦ହଜାର ୮୦୦ ପିଲା ପରୀକ୍ଷା ଦେବେ । ପରୀକ୍ଷା ହଲ୍ ଚତୁଃର୍ପ।ଶ୍ବକୁ ନୋ ମୋବାଇଲ୍ ଜୋନ୍ ଘୋଷଣା କରାଯାଇଛି । ଏପରିକି ସ୍କ୍ୱାର୍ଡ ଓ ନୀରିକ୍ଷକ ମଧ୍ୟ ମୋବାଇଲ ନେଇ ପାରିବେ ନାହିଁ । ସ୍ୱଚ୍ଛ ଏବଂ ଶୃଙ୍ଖଳିତ ପରୀକ୍ଷା ପାଇଁ ଅଭିଭାବକ ଏବଂ ଛାତ୍ରଛାତ୍ରୀଙ୍କୁ ଆହ୍ଵାନ ଦେଇଛନ୍ତି ଶିକ୍ଷାବିତ୍ ।
ସୋମବାର ଶୃଙ୍ଖଳିତ ଭାବରେ ଶେଷ ହୋଇଛି ମାଟ୍ରିକ ପରୀକ୍ଷା । ମାଟ୍ରିକ ଭଳି ଯୁକ୍ତ ଦୁଇ ପରୀକ୍ଷା ସାରିବାକୁ ସବୁ କଳବଳ ଲଗାଇ ଦେଇଛି ଗଣଶିକ୍ଷା ବିଭାଗ। ଏସବୁ ଭିତରେ ପ୍ରଶ୍ନପତ୍ର ଲିକ୍କୁ ରୋକିବା ବିଭାଗ ପାଇଁ ଏକ ବଡ ଚ୍ୟାଲେଞ୍ଜ।
ତୃତୀୟଥର ପାଇଁ ଘୁଞ୍ଚିଲା ନିର୍ଭୟା ଦୋଷୀଙ୍କ ଫାଶୀ ତାରିଖ, କାଲି ହେବନି ଫାଶୀ
ନୂଆଦିଲ୍ଲୀ : କଥାରେ ଅଛି ଦଣ୍ଡେ ନିମିଷେ ଥିଲେ ପ୍ରାଣ ନନେଇ ପାରେ ଜନ୍ତୁରାଣ । ଅର୍ଥାତ୍ ଯମ ନ ଚାହିଁଲେ ପ୍ରାଣ ଯିବନାହିଁ । ଠିକ୍ ସେଇଆ ହିଁ ହୋଇଛି ନିର୍ଭୟା ଦୋଷୀଙ୍କ କ୍ଷେତ୍ରରେ । ଆସନ୍ତାକାଲି ହେବାକୁ ଥିବା ଫାଶୀ ପୁନର୍ବାର ସ୍ଥଗିତ ରହିଛି । ପଟିଆଲା ହାଉସ୍ କୋର୍ଟର ଡେଥ୍ ଓ୍ୱାରେଣ୍ଟ ଉପରେ ରୋକ୍ ଲଗାଇଛନ୍ତି ଦିଲ୍ଲୀର ଏକ କୋର୍ଟ । ଫାଶୀ ଉପରେ ପୁନର୍ବାର ରୋକ୍ ଲଗାଇବା ସହ ତୃତୀୟ ଥର ପାଇଁ ଘୂଞ୍ଚିଛି ନିର୍ଭୟା ଗଣଦୁଷ୍କର୍ମ ଓ ହତ୍ୟା ମାମଲାର ଦୋଷୀଙ୍କ ତାରିଖ । ତେବେ ପରବର୍ତ୍ତୀ ତାରିଖ ଧାର୍ଯ୍ୟ କରାଯାଇନାହିଁ ।
ଆସନ୍ତାକାଲି ସକାଳ ୬ଟାରେ ଫାଶୀ ପାଇଥାନ୍ତେ ନିର୍ଭୟା ଗଣଦୁଷ୍କର୍ମ ଓ ହତ୍ୟା ମାମଲାର ୪ ଅଭିଯୁକ୍ତ ପବନ, ମୁକେଶ, ଅକ୍ଷୟ ଓ ବିନୟ । ତେବେ ଦିଲ୍ଲୀ କୋର୍ଟ କହିଛନ୍ତି ଯେ, ଆସନ୍ତାକାଲି ଫାଶୀ ହେବ ନାହିଁ । ଯେହେତୁ ପବନର ରାଜକ୍ଷମା ଆବେଦନ ଉପରେ ବିଚାର ହୋଇନାହିଁ ତେଣୁ ଫାଶୀକୁ ସ୍ଥଗିତ ରଖାଯାଇଥିବା କୋର୍ଟ କହିଛନ୍ତି । ପବନର ରାଜକ୍ଷମା ଆବେଦନ ରାଷ୍ଟ୍ରପତିଙ୍କ ପାଖରେ ଥିବାରୁ ଏଭଳି ନିର୍ଦ୍ଦେଶ ଦେଇଛନ୍ତି କୋର୍ଟ ।
ପୂର୍ବରୁ ଦୁଇ ଦୁଇ ଥର ଘୁଞ୍ଚିସାରିଛି ଫାଶୀର ତାରିଖ । ପ୍ରଥମେ ଜାନୁଆରୀ ୨୨ ତାରିଖରେ ଫାଶୀ ଦେବାକୁ ଡେଥ୍ ଓ୍ୱାରେଣ୍ଟ ଜାରି ହୋଇଥିଲା । ପରେ ଫେବ୍ରୁଆରୀ ୧ ତାରିଖରେ ଫାଶୀ ଦେବାକୁ ଦିଲ୍ଲୀର ପଟିଆଲା ହାଉସକୋର୍ଟ ତାରିଖ ଧାର୍ଯ୍ୟ କରିଥିଲେ । ପରେ ମାର୍ଚ୍ଚ ୩ ତାରିଖ ସକାଳ ୬ଟାକୁ ଫାଶୀ ତାରିଖ ଧାର୍ଯ୍ୟ ହୋଇଥିଲା । ମାତ୍ର ଭିନ୍ନ ଭିନ୍ନ କାରଣ ଦର୍ଶାଇ ଏହାକୁ ଘୁଞ୍ଚାଇଥିଲେ ଦୋଷୀଙ୍କ ଓକିଲ ।
ରିଲିଜ ହେଲା ସୂର୍ଯ୍ୟବଂଶୀର ଟ୍ରେଲର, ୪ ଘଣ୍ଟାରେ ଦେଖିଲେ ୧୧ ମିଲିୟନ ଲୋକ
ଶେଷ ହେଲା ଅପେକ୍ଷା । ବହୁ ଚର୍ଚ୍ଚିତ ବଲିଉଡ୍ ଅପ୍ କମିଂ ଫିଲ୍ମ ‘ସୂର୍ଯ୍ୟବଂଶୀ’ର ଟ୍ରେଲର ରିଲିଜ୍ ହୋଇଛି। ଏଥିରେ ମୁଖ୍ୟ ଭୂମିକାରେ ନଜର ଆସୁଛନ୍ତି ବଲିଉଡର ଖିଲାଡି ବୟ ଅକ୍ଷୟ କୁମାର, ଅଭିନେତ୍ରୀ କ୍ୟାଟ୍ରିନା କୈଫ, ଜ୍ୟାକି ଶ୍ରଫ, ଗୁଲଶନ ଗ୍ରୋଭର, ନିକିତିନ ଧିର, ବିଧାନ ଶର୍ମା ଆଦିଙ୍କୁ ଦେଖିବାକୁ ମିଳିବ।
ମାତ୍ର ୪ ଘଣ୍ଟାରେ ଟ୍ରେଲର ଟିକୁ ୧୧ ମିଲିୟନ ଲୋକ ଦେଖିସାରିଥିବା ବେଳେ ୟୁଟୁବରେ ଏହା ଏକ ନମ୍ବର ଟ୍ରେଡିଂରେ ଅଛି ।
ଏହି ଟ୍ରେଲର ରିଲିଜ୍ ଅବସରରେ ଟ୍ରାଫିକ ଜାମ୍କୁ ଦୂରେଇ ଦେବାକୁ ଅକ୍ଷୟ କୁମାର ଏକ ନୂଆ ଫର୍ମୁଲା ଆପଣେଇ ଥିବା ଦେଖାଯାଇଛି। ଟ୍ରେଲର୍ ରିଲିଜ ଅବସରରେ ସେ ଏକ ରେସିଂ ବାଇକ୍ ନେଇ ପହଞ୍ଚିଥିବା ଜଣାପଡିଛି। ଏହି ରେସିଂ ବାଇକ୍ ସହ ଅକ୍ଷୟ ହାତରେ ହେଲମେଟ୍ ଧରିଥିବାର ଏକ ଫଟୋ ସୋସିଆଲ ମିଡିଆରେ ଶେୟାର କରିଛନ୍ତି। ଏହାସହ ଅକ୍ଷୟ ଲେଖିଛନ୍ତି ‘ସୂର୍ଯ୍ୟବଂଶୀ’ର ଟ୍ରେଲର ରିଲିଜ୍ ଅବସରରେ ମୁମ୍ବାଇ ଟ୍ରାଫିକରୁ ବଞ୍ଚିବାକୁ ଆଜି ସୂର୍ଯ୍ୟବଂଶୀ ହେଲିକପ୍ଟର ବଦଳରେ ବାଇକ୍ର ସାହାରା ନେଇଛନ୍ତି। ଅକ୍ଷୟଙ୍କ ଏହି ଫଟୋକୁ ଦେଖିବା ପରେ ତାଙ୍କର ପ୍ରଶଂସକମାନେ ଭିନ୍ନ ଭିନ୍ନ କମେଣ୍ଟ ଦେଇଛନ୍ତି।
ବିଜୁଙ୍କ ଆଦର୍ଶ ବିଜେଡିର ଆଭିମୁଖ୍ୟ : ସାଧାରଣ ଲୋକଙ୍କ ସେବାରେ ନିଜକୁ ଉତ୍ସର୍ଗ କରିବ ଦଳ
ଭୁବନେଶ୍ବର: ଆସନ୍ତା ମାର୍ଚ୍ଚ ୫ରେ ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ରାଜ୍ୟବ୍ୟାପୀ ଜୟନ୍ତୀ ପାଳନ ହେବ । ପ୍ରତିବର୍ଷ ଦଳ ପକ୍ଷରୁ ରାଜ୍ୟବ୍ୟାପୀ ଜୟନ୍ତୀ ପାଳନ କରୁଥିବା ବେଳେ ଏଥର ଦଳ ଟିକେ ନିଆରା ଢଙ୍ଗରେ ପାଳନ କରିବାକୁ ଲକ୍ଷ୍ୟ ରଖାଯାଇଛି । ଏନେଇ ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦଳର ସବୁ କର୍ମକର୍ତ୍ତା, ପର୍ଯ୍ୟବେକ୍ଷକ, ସାଂସଦ, ବିଧାୟକ, ବିଧାୟିକା, ଜିଲ୍ଲା ସଭାପତି, ଛାମୁଆ ସଂଗଠନର ରାଜ୍ୟ ସଭାପତି, ଜିଲ୍ଲା ପରିଷଦ ଅଧ୍ୟକ୍ଷ, ଅଧ୍ୟକ୍ଷ, ଉପାଧ୍ୟକ୍ଷଙ୍କୁ ଚିଠି ଲେଖିଛନ୍ତି । ଏଥିରେ ଜୟନ୍ତୀ ପାଳନ ପାଇଁ ଗ୍ରହଣ କରାଯାଉଥିବା କାର୍ଯ୍ୟକ୍ରମ ସହ ଦଳୀୟ ଏକତା, ଶୃଙ୍ଖଳା ଏବଂ ଅନୁଶାସନକୁ ପାଳନ କରିବା ପାଇଁ ତାଗିଦ କରିଛନ୍ତି ସୁପ୍ରିମୋ ।
ଚଳିତ ବର୍ଷ ବିଜୁ ବାବୁଙ୍କ ୧୦୪ତମ ଜୟନ୍ତୀ ମାର୍ଚ୍ଚ ୫ ଠାରୁ ୨୦ ତାରିଖ ଯାଏଁ ବିଭିନ୍ନ ନିର୍ବାଚନୀମଣ୍ଡଳୀରେ ପାଳନ କରାଯିବ । କେବଳ ସେତିକି ନୁହେଁ ବିଜୁ ବାବୁଙ୍କ ଜୟନ୍ତୀ ଠାରୁ ତିରୋଧାନ ଦିବସ ଏପ୍ରିଲ ୧୭ ତାରିଖ ମଧ୍ୟରେ ବିଜେଡ଼ିର ଯୁବ ଏବଂ ଛାତ୍ର ସଙ୍ଗଠନ ଦ୍ୱାରା ସ୍ବେଚ୍ଛାକୃତ ରକ୍ତଦାନ ଶିବିର ଜୀବନ ବିନ୍ଦୁ ଆୟୋଜନ କରାଯିବ ।
ଦାରିଦ୍ର୍ୟ ଦୂରୀକରଣ ସହିତ ସାମାଜିକ ସୁରକ୍ଷା, ଖାଦ୍ୟ ନିରାପତ୍ତା, ମହିଳା, ଯୁବକ, କୃଷକଙ୍କ ସଶକ୍ତିକରଣ ଭିତ୍ତିଭୂମିର ଉନ୍ନତି ତଥା ବିଭିନ୍ନ ବର୍ଗର ଲୋକଙ୍କ କଲ୍ୟାଣ ପାଇଁ ସଂଖ୍ୟାଧିକ ପଦକ୍ଷେପ ଗ୍ରହଣ କରାଯାଇଛି । ପ୍ରସାଶନକୁ ଆହୁରି ଉତ୍ତରଦାୟୀ, ସ୍ୱଚ୍ଛ ଏବଂ ଲୋକାଭିମୂଖୀ କରିବା ପାଇଁ 5ଟି ମନ୍ତ୍ର ସହିତ ମୋ ସରକାର କାର୍ଯ୍ୟକ୍ରମ ଆରମ୍ଭ କରାଯାଇଛି । ନିକଟରେ ସାମାଜିକ ଓ ଶିକ୍ଷା କ୍ଷେତ୍ରରେ ପଛୁଆ ବର୍ଗ ତାଥା ଅନ୍ୟାନ୍ୟ ପଛୁଆ ବର୍ଗଙ୍କ ସାମାଜିକ ଏବଂ ଅର୍ଥନୈତିକ ସର୍ଭେ କରିବା ପାଇଁ ଏକ ଐତିହାସିକ ନିଷ୍ପତି ଗ୍ରହଣ କରାଯାଇଛି । ବିଜୁବାବୁଙ୍କ ଜନ୍ମ ତିଥିରୁ ଆରମ୍ଭ କରି ଏହି ଦୁଇ ସପ୍ତାହ ବ୍ୟାପୀ କାର୍ଯ୍ୟକ୍ରମରେ ଗ୍ରାମାଞ୍ଚଲରେ ପକ୍କା ଘର ପାଇ ନଥିବା ଯୋଗ୍ୟ ହିତାଧିକାରୀଙ୍କୁ ପକ୍କା ଘର ଯୋଗ୍ୟତା କାର୍ଡ ଏବଂ ସହରାଞ୍ଚଳରେ ରହୁଥିବା ବସ୍ତିବାସିନ୍ଦାଙ୍କୁ ଜାଗା ମିଶନ ମାଧ୍ୟମରେ ଭୂମି ଅଧିକାର ଯୋଗ୍ୟତା ପ୍ରମାଣ ପତ୍ର ବଣ୍ଟନ କରାଯିବ ।
ମାର୍ଚ୍ଚ ୮ରେ ଆନ୍ତର୍ଜାତିକ ମହିଳା ଦିବସ ପାଳନ ଅବସରରେ ଦଳର ମହିଳା ସଂଗଠନ ପକ୍ଷରୁ ନିର୍ବାଚନମଣ୍ଡଳୀ ସ୍ତରରେ ମହିଳା ସମାବେଶ ଆୟୋଜନ କରାଯାଇ ବିଭିନ୍ନ କ୍ଷେତ୍ରରେ ପାରଦର୍ଶିତା ଲାଭ କରିଥିବା ୧୦ଜଣ ସଫଳ ମହିଳାଙ୍କୁ ସମ୍ମାନିତ କରାଯିବା ସହିତ ମହିଳା ସଶକ୍ତିକରଣ ଦିଗରେ ବିଜୁ ବାବୁଙ୍କ ଅବଦାନ ଏବଂ ନବୀନ ପଟ୍ଟନାୟକଙ୍କ ୨୦ ବର୍ଷ ଶାସନ କାଳରେ ମହିଳାଙ୍କ ସଶକ୍ତିକରଣ ପାଇଁ ଗ୍ରହଣ କରାଯାଇଥିବା ବିଭିନ୍ନ ପଦକ୍ଷେପ ଉପରେ ଆଲୋଚନା କରାଯିବ ବୋଲି ନବୀନ ଲେଖିଥିବା ଚିଠିରେ ଉଲ୍ଲେଖ କରିଛନ୍ତି ।