ଭୁବନେଶ୍ୱର: ଅମ୍ଫାନରେ ବିଶେଷ ଭାବେ ଏବେ ପ୍ରଭାବିତ ହେଉଛି ଜଗତସିଂହପୁର, କେନ୍ଦ୍ରାପଡା ଓ ଭଦ୍ରକ । ପାରାଦୀପଠାରୁ ବାତ୍ୟା ଏବେ ୧୧୫ କିମି ଦୂରରେ ଗତି କରୁଛି । ପାରାଦୀପରେ ସର୍ବାଧିକ ୧୦୨ କିମି ବେଗରେ ପବନ ବହିଥିବା ବେଳେ ପ୍ରବଳ ବର୍ଷା ରେକର୍ଡ କରାଯାଇଛି । ଆଗରୁ ଅନୁମାନ କରାଯାଉଥିଲା ଯେ, ଅମ୍ଫାନ ବାଲେଶ୍ୱରରେ ଲାଣ୍ଡଫାଲ କରିବ । କିନ୍ତୁ ଅମ୍ଫାନ ଏବେ ତା’ର ପୂର୍ବନିର୍ଦ୍ଧାରିତ ଗତିପଥରେ ଯିବ ବୋଲି ଆଇଏମଡି ତରଫରୁ ସୂଚନା ମିଳିଛି । ଯାହାର ଅର୍ଥ ହେଉଛି ଓଡ଼ିଶା ପ୍ରତି ଆପାତତଃ ବିପଦ ଟଳିଛି ।

ଅନ୍ୟ ପକ୍ଷରେ ଜଗତସିଂହପୁର ଜିଲ୍ଲାର ଏରସମା ଅଞ୍ଚଳରେ ବ୍ୟାପକ ଗଛ ଉପୁଡ଼ି ପଡିଛି । ଘର ଉପରେ ଗଛ ଭାଙ୍ଗିପଡ଼ିଥିବାରୁ ଘର ମଧ୍ୟ ଭାଙ୍ଗିଯାଇଛି । ସେପଟେ ପ୍ରବଳ ବର୍ଷା ଯୋଗୁଁ ମାଟି ଘରର କାନ୍ଥ ପଡି ୩ମାସର ଶିଶୁପୁତ୍ରର ମୃତ୍ୟୁ ହୋଇଛି । ତିହିଡ଼ି ବ୍ଲକ କାଂପଡ଼ା ପଞ୍ଚାୟତ ଦକ୍ଷିଣପାରି ଗାଁରେ ଏଭଳି ଅଭାବନୀୟ ଘଟଣା ସାମନାକୁ ଆସିଛି । ପ୍ରବଳ ବର୍ଷା ଯୋଗୁଁ ଗାଁର ବଳରାମ ଦାସଙ୍କ ମାଟି କାନ୍ଥ ଭୁଶୁଡି ପଡ଼ିଥିଲା। ରାତିରେ ମାଆ ଓ ୩ମାସର ଶିଶୁ ଶୋଇଥିବା ବେଳେ କାନ୍ଥ ଭୁଶୁଡ଼ି ପଡିଥିଲା । ମାଆ ସାମାନ୍ୟ ଆହତ ହୋଇଥିବା ବେଳେ ଶିଶୁ ପୁତ୍ରର ମୃତ୍ୟୁ ହୋଇଛି।

ଢିଙ୍କିଆ ପଞ୍ଚାୟତର ପାନବରଜ ବିଶେଷ ଭାବେ କ୍ଷତିଗ୍ରସ୍ତ ହୋଇଥିବା ଜିଲ୍ଲାପାଳ ସୂଚନା ଦେଇଛନ୍ତି । ସମୁଦ୍ର ଭିତରେ ବାତ୍ୟା ଏବେ ଯେଉଁଠାରେ ରହିଛି, ସେଠାରେ ପବନର ଗତି ଘଣ୍ଟାକୁ ୧୭୦ କିମି ରହିଛି । ପାରାଦୀପ ପରେ ପରେ କେନ୍ଦ୍ରାପଡାର ଡାଙ୍ଗମାଳ ଓ ଭଦ୍ରକର ଧାମରା ଅଞ୍ଚଳରେ ପବନର ଗତି ବଢିବ । ଏଠାରେ ପବନର ଝଟ୍‌କା ୧୨୫ କିମି ପର୍ଯ୍ୟନ୍ତ ହୋଇପାରେ ବୋଲି ଏସଆରସି କହିଛନ୍ତି ।

ବର୍ତ୍ତମାନ ସୁଦ୍ଧା ଏହି ୪ ଜିଲ୍ଲାରୁ ୧ଲକ୍ଷ ୩୭ ହଜାର ଲୋକଙ୍କୁ ନିରାପଦ ସ୍ଥାନକୁ ସ୍ଥାନାନ୍ତର କରାଯାଇଛି । ବାଲେଶ୍ବର ଓ ମୟୂରଭଞ୍ଜରେ ଏବେବି ଲୋକେ ବାତ୍ୟା ଆଶ୍ରୟସ୍ଥଳୀକୁ ଆସୁଛନ୍ତି । ଅପରାହ୍ନରେ ବାଲେଶ୍ବର ଜିଲ୍ଲାର ଭୋଗରାଇ, ତାଳସାରି, ଜଳେଶ୍ବର ଆଦି ଅଞ୍ଚଳରେ ପବନର ବେଗ ବଢିବ। ସେଥିପାଇଁ ପ୍ରଶାସନ ପକ୍ଷରୁ ସମସ୍ତ ପ୍ରକାର ବ୍ୟବସ୍ଥା କରାଯାଇଛି ।

ଭୁବନେଶ୍ୱର: ଓଡ଼ିଶା ଉପରୁ ଟଳିଲା ଅମ୍ଫାନର ଭୟ । ଓଡ଼ିଶା ଉପକୂଳରେ ଲ୍ୟାଣ୍ଡଫଲ କରିବ ନାହିଁ ଅମ୍ଫାନ । ଆଇଏମଡିର ପୂର୍ବ ସୂଚନା ମୁତାବକ ପଶ୍ଚିମବଙ୍ଗରେ କରିବ ଲ୍ୟାଣ୍ଡଫଲ । ତେବେ ବର୍ତ୍ତମାନ ଗଞ୍ଜାମ, ଗଜପତି, ନୟାଗଡ଼, ଖୋର୍ଦ୍ଧା ଜିଲ୍ଲା ବାତ୍ୟା ଅମ୍ଫାନ କବଳରୁ ମୁକ୍ତ ହୋଇଥିବା ଏସଆରସି କହିଛନ୍ତି । ସେ କହିଛନ୍ତି, ଗଞ୍ଜାମ ଜିଲ୍ଲାର ଗୋପାଳପୁରଠାରେ ଏବେ ମାତ୍ର ଘଣ୍ଟାକୁ ୪କିମି ବେଗରେ ପବନ ବହୁଛି । ଗତ ୨୪ଘଣ୍ଟା ମଧ୍ୟରେ ଗୋପାଳପୁରରେ ମାତ୍ର ୮.୬ ମିମି ବର୍ଷା ରେକର୍ଡ କରାଯାଇଛି ।

ସେହିପରି ଖୋର୍ଦ୍ଧା ଜିଲ୍ଲାରେ ମଧ୍ୟ ବାତ୍ୟାର ବିଶେଷ ପ୍ରଭାବ ନାହିଁ । ଯଦିଓ ଆଜି ସକାଳେ ରାଜଧାନୀ ଭୁବନେଶ୍ବରରେ ଗୋଟିଏ ସମୟରେ ପବନର ବେଗ ଘଣ୍ଟାକୁ ୫୬ କିମି ରହିଥିଲା । ତେବେ ପରବର୍ତ୍ତନ ସମୟରେ ତାହା ଘଣ୍ଟାପ୍ରତି ୪୦ କିମିକୁ ଖସିଆସିଥିଲା । ଭୁବନେଶ୍ବରରେ ପବନର ବେଗ ଆହୁରି କମିବ ବୋଲି ଏସଆରସି କହିଛନ୍ତି । ପୁରୀରେ ମଧ୍ୟ ଅମ୍ଫାନର ପ୍ରଭାବ ବିଶେଷ ପଡିବନି। ଜିଲ୍ଲାରେ ୮୭ ମିମି ବର୍ଷା ହୋଇଛି । ପବନର ବେଗ ଘଣ୍ଟାକୁ ୪୦କିମିରୁ କମ୍‌ ରହିଛି ।

ବିଶେଷ ଭାବେ ଏବେ ପ୍ରଭାବିତ ହେଉଛି ଜଗତସିଂହପୁର, କେନ୍ଦ୍ରାପଡା ଓ ଭଦ୍ରକ। ପାରାଦୀପଠାରୁ ବାତ୍ୟା ଏବେ ୧୧୫ କିମି ଦୂରରେ ଗତି କରୁଛି । ପାରାଦୀପରେ ସର୍ବାଧିକ ୧୦୨ କିମି ବେଗରେ ପବନ ବହିଥିବା ବେଳେ ପ୍ରବଳ ବର୍ଷା ରେକର୍ଡ କରାଯାଇଛି ।

ଆଗରୁ ଅନୁମାନ କରାଯାଉଥିଲା ଯେ, ଅମ୍ଫାନ ବାଲେଶ୍ୱରରେ ଲାଣ୍ଡଫାଲ କରିବ । କିନ୍ତୁ ଅମ୍ଫାନ ଏବେ ତା’ର ପୂର୍ବନିର୍ଧାରିତ ଗତିପଥରେ ଯିବ ବୋଲି ଆଇଏମଡି କହିଛି । ଯାହାର ଅର୍ଥ ହେଉଛି ଓଡ଼ିଶା ପ୍ରତି ଆପାତତଃ ବିପଦ ଟଳିଛି ।

ଭୁବନେଶ୍ୱର: ଅମ୍ଫାନ ବାରମ୍ବାର ତାର ବେଗରେ ପରିବର୍ତ୍ତନ କରୁଛି । କେତେବେଳେ ଧିମେଇ ଯାଉଛି ତ ପୁଣି କେତେବେଳେ ପ୍ରଖର ଗତିରେ ମାଡ଼ିଆସୁଛି । ଯାହା ଫରେ ଅମ୍ଫାନ ଲ୍ୟାଣ୍ଡଫଲରେ ବାରମ୍ବାର ପରିବର୍ତ୍ତନ ହେଉଛି । ଏବେ ପୁଣି ନୂଆ ସୂଚନା ଅନୁଯାୟୀ ଅମ୍ଫାନ ତାର ଗତିପଥରେ ପୁଣି ପରିବର୍ତ୍ତନ କରିଛି । ସୂଚନା ଅନୁଯାୟୀ ଓଡ଼ିଶା ଉପକୂଳରେ ବାତ୍ୟା ଅମ୍ଫାନ୍‌ ଲ୍ୟାଣ୍ଡଫଲ କରିବ ନାହିଁ । ଆଇଏମ୍‌ଡିର ପୂର୍ବ ଅନୁମାନ ଅନୁସାରେ ପଶ୍ଚିମବଙ୍ଗର ସୁନ୍ଦରବନ ଅଞ୍ଚଳରେ ହିଁ ଲ୍ୟାଣ୍ଡଫଲ୍‌ କରିବ ବୋଲି ସ୍ୱତନ୍ତ୍ର ରିଲିଫ କମିଶନର ପ୍ରଦୀପ ଜେନା ସ୍ପଷ୍ଟ କରିଛନ୍ତି ।

ସେ କହିଛନ୍ତି, ରାତି ୨ଟା ବେଳେ ଜେଟି ଡବ୍ଲୁସି ଓ ୟୁଏସ ନେଭିର ମ୍ୟାପ୍‌ ଅନୁସାରେ ଅମ୍ଫାନ୍‌ ଗତିପଥ ବଦଳାଇ ଓଡିଶା ଆଡକୁ ମୁ୍ହାଁଉଥିବା ଜଣାପଡୁଥିଲା। ଏହା ଆଧାରରେ କିଛି ପାଣିପାଗ ବିଶେଷଜ୍ଞ ଆଶଙ୍କା କରୁଥିଲେ, ଅମ୍ଫାନ୍‌ ସମ୍ଭବତଃ ବାଲେଶ୍ବର ଜିଲ୍ଲା ସୀମାରେ ଲ୍ୟାଣ୍ଡଫଲ୍‌ କରିପାରେ।

କିନ୍ତୁ ସକାଳ ୮ଟା ପରେ ଜେଟିଡବ୍ଲୁସି ମ୍ୟାପ୍‌ରେ ପୁଣି ପରିବର୍ତ୍ତନ ଆସିଥିଲା। ବାତ୍ୟାର ଗତିପଥ ନେଇ ଆଇଏମ୍‌ଡି କରିଥିବା ପୂର୍ବାନୁମାନ ସହ ଜେଟିଡବ୍ଲୁସିର ଅନୁମାନ ମେଳ ଖାଇଥିଲା। ତେଣୁ ବର୍ତ୍ତମାନ ଓଡିଶା ଉପକୂଳରେ ଅମ୍ଫାନ୍‌ ଲ୍ୟାଣ୍ଡଫଲ୍‌ କରୁନଥିବା ସ୍ପଷ୍ଟ ହେବା ସହ ଏହା ସୁନ୍ଦରବନ ଅଞ୍ଚଳରେ ବିଳମ୍ବିତ ସଂଧ୍ୟା ଅର୍ଥାତ ସାଢେ ୮ରୁ ସାଢେ ୧୦ଟା ମଧ୍ୟରେ ଲ୍ୟାଣ୍ଡଫଲ୍‌ କରିବ ବୋଲି ଆକଳନ କରାଯାଇଛି।

ବାତ୍ୟା ଅମ୍ଫାନ ପାଇଁ ସ୍ଥାନାନ୍ତର ହୋଇଛନ୍ତି ୧ ଲକ୍ଷରୁ ଅଧିକ ଲୋକ…

ଭୁବନେଶ୍ୱର: ଆଇଏମ୍‌ଡିର ପୂର୍ବ ସୂଚନା ମୁତାବକ ଅମ୍ଫାନ ସୁନ୍ଦରବନରେ ସ୍ଥଳଭାଗ ଛୁଇଁବ । ତେବେ ଏନେଇ ରାଜ୍ୟର ବିଭିନ୍ନ ସ୍ଥାନରେ ଦେଖିବାକୁ ମିଳିଛି ଏହାର ପ୍ରଭାବ । ପ୍ରଭାବରେ ରାଜ୍ୟର ବିଭିନ୍ନ ସ୍ଥାରେ ପ୍ରବଳ ବର୍ଷା ହେବା ସହ ପବନର ବେଗ ମଧ୍ୟ ବଢ଼ିବାରେ ଲାଗିଛି । ଗତ ରାତିରୁ ବିଭିନ୍ନ ଜିଲ୍ଲାରେ ପ୍ରବଳ ବର୍ଷା ଲାଗି ରହିଛି । ତେବେ ସର୍ବାଧିକ ବର୍ଷା ପାରାଦୀପରେ ହୋଇଥିବା ସୂଚନା ମିଳିଛି । ମୁଖ୍ୟ ଶାସନ ସଚିବ ଅସିତ ତ୍ରିପାଠୀଙ୍କର ସୂଚନା ଅନୁଯାୟୀ ପାରିଦୀପରେ ସର୍ବାଧିକ ୧୪୪ ମିଲିମିଟର ବର୍ଷା ରେକର୍ଡ କରାଯାଇଛି ।

ଅମ୍ଫାନ ଏବେ ପାରଦୀପଠାରୁ ୧୨୫ କିଲୋମିଟର ଦୂରରେ ଥିବା ବେଳେ ଦୀଘା ଠାରୁ ୨୪୦ କିଲୋମିଟର ଦୂରରେ ରହିଛି  । ତେବେ ଏହାର ପ୍ରଭାବରେ ରାଜ୍ୟର ବିଭିନ୍ନ ସ୍ଥାନରେ ବର୍ଷା ଲାଗି ରହିଛି । ପାରାଦୀପରେ ଏବେ ୧୧୦ କିଲୋମିଟର ବେଗରେ ପବନ ବହୁଥିବାରୁ ପାରାଦୀପରେ ୮ ନମ୍ବର ବିପଦ ସଙ୍କେତ ଜାରି ହୋଇଛି । ସେପଟେ ବାଲେଶ୍ୱରରେ ବିଭିନ୍ନ ସ୍ଥାନରେ ପବନ ସହ ବର୍ଷା ଲାଗି ରହିଛି । ଉଦୟ ପୁର ପାଖ ସମୁଦ୍ରରେ ଉଚ୍ଚ ଜୁଆର ଉଠୁଥିବାର ଲୋକେ ଡ଼ରିଯାଇଛନ୍ତି । ଯାହାପାଇଁ ଡଙ୍ଗାଗୁଡ଼ିକୁ ସୁରକ୍ଷିତ ସ୍ଥାନକୁ ନେଇଯାଛନ୍ତି ।

ବାତ୍ୟା ଅମ୍ଫାନ ପାଇଁ ସ୍ଥାନାନ୍ତର ହୋଇଛନ୍ତି ୧ ଲକ୍ଷରୁ ଅଧିକ ଲୋକ…

ଭୁବନେଶ୍ୱର: ପ୍ରବଳ ବେଗରେ ସ୍ଥଳପଥକୁ ମାଡ଼ି ଆସୁଛି ବାତ୍ୟା ଅମ୍ପାନ । ଅମ୍ଫାନ ପ୍ରଭାବରେ ରାଜ୍ୟର ବିଭିନ୍ନ ସ୍ଥାନରେ ବର୍ଷା ଜାରି ରହିଛି । ଆସନ୍ତା କାଲି ଠାରୁ ପବନ ହେବା ସହ ପ୍ରବଳ ମାତ୍ରାରେ ବର୍ଷା ଲାଗି ରହିଛି । ବର୍ଷା ଆସନ୍ତା କାଲି ପର୍ଯ୍ୟନ୍ତ ଲାଗିରହିବ ବୋଲି ପାଣିପାଗ କେନ୍ଦ୍ରର ସୂଚନା ରହିଛି । ତେବେ ବାତ୍ୟା ପ୍ରଭାବରେ ଭୋଗରାଇ, ତାଳସାରୀ ସମେତ ଉପକୂଳ ଅଞ୍ଚଳରେ ପବନର ବେଗ ଅଧିକ ରହିବ । ବାଲେଶ୍ୱର, ଭଦ୍ରକ ସମେତ ଉପକୂଳରରେ ବାତ୍ୟାର ପ୍ରଭାବ  ଅଧିକ ରହିବ । ଅନ୍ୟପଟେ ପ୍ରଭାବିତ ଅଞ୍ଚଳରୁ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି ।

ଗତ ରାତି ସୁଦ୍ଧା ୧ଲକ୍ଷରୁ ଅଧିକ ଲୋକଙ୍କୁ ସ୍ଥାନାନ୍ତର କରାଯାଇଛି । ବାତ୍ୟା ଆଶ୍ରୟସ୍ଥଳୀରେ ରହିବାବେଳେ ସାମାଜିକ ଦୂରତା ବଜାୟ ରଖିବାକୁ ପରାମର୍ଶ ଦେଇଛନ୍ତି ଏସଆରସି ପ୍ରଦୀପ ଜେନା । ସେହିପରି କରୋନା ସଂକ୍ରମଣରୁ ବଞ୍ଚିବାକୁ ମାସ୍କ ପିନ୍ଧିବାକୁ ଏସଆରସି ଅନୁରୋଧ କରିଛନ୍ତି । ସରକାରୀ ନିୟମ ମାନି ବାହାରକୁ ନଯିବା, ବାତ୍ୟାବେଳେ ଆମ୍ବ, ନଡିଆ ଗୋଟାଇବାକୁ ନ ଯିବାକୁ ମଧ୍ୟ ସେ ପରାମର୍ଶ ଦେଇଛନ୍ତି । ମୁକାବିଲା ପାଇଁ ୧୫ ଟିମ ଓଡ୍ରାଫ, ୧୬ ଟିମ୍‌ ଏନଡିଆରଏଫ ଏବଂ ଅଗ୍ନୀଶମ ବିଭାଗର ୧୧୭ଟି ଟିମ ମୁତୟନ ଅଛନ୍ତି ।