ନୂଆଦିଲ୍ଲୀ: କରୋନା ଯୋଗୁଁ ଲକଡାଉନ୍ ବୃଦ୍ଧି କରାଯାଇଛି। ତେବେ ନୂଆ ଗାଇଡ୍ ଲାଇନ୍ ଅନୁସାରେ ଖାଦ୍ୟ ପାଇଁ ରିହାତି ଦିଆଯାଇଛି  । ନିକଟରେ ଏକ ଖବର ସାମ୍ନାକୁ ଆସିଛି  । ତେବେ ରିପୋର୍ଟ ଅନୁସାରେ ଦିଲ୍ଲୀରେ ଜଣେ ପିଜ୍ଜା ଡେଲିଭରି ବୟ କରୋନା ସଂକ୍ରମିତ ହୋଇଛନ୍ତି । ଏହି ଡେଲିଭରି ଯୁବକ ଡ୍ୟୁଟିରେ ଥିଲା ଏବଂ ଗତ ସପ୍ତାହ ପର୍ଯ୍ୟନ୍ତ ପିଜ୍ଜା ଡେଲିଭର କରିଥିଲେ । ତାଙ୍କର କିଛି ଲକ୍ଷଣ ଦେଖାଯାଇନଥିଲା । ସେ ଡାଏଲିସିସ୍ ପାଇଁ ଏକ ଡାକ୍ତରଖାନା ଯାଇଥିଲେ। ସେଠାରେ ଟେଷ୍ଟ ପରେ ତାଙ୍କର ରିପୋର୍ଟ ପଜିଟିଭ ଆସିଛି ଓ ସେ କରୋନା ସଂକ୍ରମିତ ଜଣାପଡିଛି ।  ଏବେ ତାଙ୍କୁ ଆରଏମ୍‌ଏଲ ହସପିଟାଲରେ ଭର୍ତ୍ତି କରାଯାଇଛି।

ରିପୋର୍ଟ ପଜିଟିଭ୍‌ ଆସିବା ପରେ ଯୁବକଙ୍କ ସଂସ୍ପର୍ଶରେ ଆସିଥିବା ୭୨ ପରିବାର ଓ ୨୦ରୁ ଅଧିକ ସହକର୍ମୀଙ୍କୁ ହୋମ କ୍ବାରେଣ୍ଟାଇନରେ ରହିବାକୁ ନିର୍ଦ୍ଦେଶ ଦିଆଯାଇଛି। ପିଜ୍ଜା ଡେଲିଭରି ବୟଙ୍କ ରିପୋର୍ଟ ପଜିଟିଭ୍‌ ଆସିବା ପରେ ଭୟର ବାତାବରଣ ସୃଷ୍ଟି ହୋଇଛି । ଏହାପରେ ଅର୍ଡର ଡିଟେଲ୍‌ସ ବାହାର କରାଯାଇଥିଲା। ଦକ୍ଷିଣ ଦିଲ୍ଲୀର ହଜ୍‌ ଖାସ, ମାଲବ୍ୟ ନଗର ଓ ସାବିତ୍ରୀ ନଗରର ୭୨ଟି ପରିବାରର ଲୋକଙ୍କୁ କ୍ବାରେଣ୍ଟାଇନ୍‌ରେ ରଖାଯାଇଛି। ସେମାନଙ୍କ ସ୍ୱାସ୍ଥ୍ୟାବସ୍ଥା ଉପରେ ନଜର ରଖାଯାଇଛି। କୈାଣସି ବ୍ୟକ୍ତିଙ୍କଠାରେ କରୋନା ଲକ୍ଷଣ ଦେଖାଦେଲେ ଟେଷ୍ଟ କରାଯିବ। ଏଥିସହ ୨୦ରୁ ଅଧିକ ସହକର୍ମୀଙ୍କୁ ଛତରପୁରରେ କ୍ବାରେଣ୍ଟାଇନ୍‌ରେ ରଖାଯାଇଛି। ଡେଲିଭରି ବୟଙ୍କର କୈାଣସି ଟ୍ରାଭେଲ୍‌ ହିଷ୍ଟ୍ରି ନଥିବାରୁ ସେ ପିଜ୍ଜା ଡେଲିଭରି କରିବା ସମୟରେ ହିଁ ସଂକ୍ରମିତ ହୋଇଥିବା ସନ୍ଦେହ କରାଯାଉଛି। ଦିଲ୍ଲୀରେ ଏବେ କରୋନା ସ୍ଥିତି ସଂଗୀନ ରହିଛି। ୧୫ଶହରୁ ଅଧିକ ସଂକ୍ରମିତ ହୋଇଛନ୍ତି।

ନୂଆଦିଲ୍ଲୀ: ଭାରତରେ କରୋନାଭାଇରସ ସଂକ୍ରମିତ ରୋଗୀମାନଙ୍କୁ ପ୍ଲାଜମା ଥେରାପି ଦିଆଯାଇ ଚିକିତ୍ସା ଆରମ୍ଭ ହେବ। ପ୍ଲାଜମା ଥେରାପିରେ କରୋନା ସଂକ୍ରମିତ ଠିକ୍ ହୋଇଥିବା ଲୋକଙ୍କ ରକ୍ତରୁ ପ୍ଲାଜମା ନେଇ କରୋନା ପଜିଟିଭ ଲୋକଙ୍କ ଚିକିତ୍ସା ହୋଇପାରିବ । ଇଣ୍ଡିଆନ୍ କାଉନସିଲ୍ ଅଫ୍ ମେଡିକାଲ୍ ରିସର୍ଚ୍ଚ (ଆଇସିଏମ୍ଆର) ଏହି ପ୍ଲାଜ୍ମା ଟେକ୍ନୋଲୋଜିର ପରୀକ୍ଷାକୁ ଅନୁମତି ଦେଇସାରିଛି । ପ୍ଲାଜ୍ମା ଥେରାପିରେ, କରୋନା ଭାଇରସ୍ ସଂକ୍ରମିତ ଲୋକଙ୍କ ମଧ୍ୟରୁ ୮୦୦ ଲୋକେ ସଂପୂର୍ଣ୍ଣ ଆରୋଗ୍ୟ ହୋଇଛନ୍ତି । ଏହି ଥେରାପିରେ ରକ୍ତ ନିଆଯାଏ ଏବଂ ଆଣ୍ଟିବଡି ପ୍ଲାଜମାକୁ ଅଲଗା କରାଯାଏ । ଏହା ପରେ ସେହି ପ୍ଲାଜମା କରୋନା ରୋଗୀଙ୍କୁ ଇଂଜେକ୍ଟ କରାଯାଏ ।

ଯେତେବେଳେ ଶରୀର କୌଣସି ଜୀବାଣୁ ସଂସ୍ପର୍ଶରେ ଆସେ, ଏହି ପ୍ରଣାଳୀ ସ୍ୱୟଂ ସକ୍ରିୟ ହୋଇ ଆଣ୍ଟିବଡି ରିଲିଜ କରେ । ରିପୋର୍ଟ ଅନୁସାରେ ଏହି ପ୍ଲାଜମା ଥେରାପି କରୋନା ଚିକିତ୍ସାରେ ବହୁ ପ୍ରଭାବଶାଳୀ ପ୍ରମାଣିତ ହୋଇଛି। ଚୀନ୍, ଦକ୍ଷିଣ କୋରିଆ, ଆମେରିକା ଏବଂ ବ୍ରିଟେନରେ ଏହାକୁ ପରୀକ୍ଷା କରାଯାଉଛି । ଏହି ଟେକ୍ନୋଲୋଜି ପରୀକ୍ଷଣରେ ଭାରତ ମଧ୍ୟ ଆଗକୁ ବଢୁଛି । ତେବେ ଏହି ଥେରାପି ଆରମ୍ଭ କରିବା ପୂର୍ବରୁ ଡ୍ରଗ୍ କଣ୍ଟ୍ରୋଲର୍ ଜେନେରାଲ୍ ଅଫ୍ ଇଣ୍ଡିଆ (DCGI) ର ଅନୁମତି ନେବାକୁ ପଡିବ । ଏହା ବ୍ୟତୀତ ଭାରତର କ୍ଲିନିକାଲ୍ ଟ୍ରାଏଲ୍ ରେଜିଷ୍ଟ୍ରିରେ ଡାକ୍ତରଖାନା ପଞ୍ଜିକରଣ କରିବା ମଧ୍ୟ ଆବଶ୍ୟକ।

ଆଇସିଏମଆର କହିବା ଅନୁସାରେ ବର୍ତ୍ତମାନ କ୍ଲିନିକାଲ ଟ୍ରାଏଲ ବାହାରେ ପ୍ଲାଜମା ଥେରାପିର ବ୍ୟବହାର କରାଯିବା ଅନୁଚିତ୍ । କେରଳ ହେଉଛି ଦେଶର ପ୍ରଥମ ରାଜ୍ୟ ଯିଏକି ପ୍ଲାଜମା ଥେରାପି ଉପରେ ଗବେଷଣା ଏବଂ ପ୍ରୋଟୋକଲ ଆରମ୍ଭ କରିଛି। ଶ୍ରୀ ଚିତ୍ରା ତିରୁନାଲ୍ ଇନଷ୍ଟିଚ୍ୟୁଟ୍ ଫର୍ ମେଡିକାଲ ସାଇନ୍ସ ଆଣ୍ଡ ଟେକ୍ନୋଲୋଜିକୁ (SCTIMST) ଆଇସିଏମଆର ଏପ୍ରିଲ ୧୧ତାରିଖରେ ପ୍ଲାଜମା ଥେରାପି ପରୀକ୍ଷା ପାଇଁ ଅନୁମତି ଦେଇଛି । ତେବେ ଡିସିଜିଆଇ (ଡ୍ରଗ୍ସ କଣ୍ଟ୍ରୋଲର ଜେନେରାଲ୍ ଅଫ୍ ଇଣ୍ଡିଆ) ରୁ ଏଯାଏଁ ଅନୁମତି ମିଳିନାହିଁ। DCGI ରକ୍ତ ଦାନ କରିବାକୁ ନେଇ ଅନେକ ନିୟମ କରିଛନ୍ତି । ଦିଲ୍ଲୀରେ ପ୍ଲାଜମା ଥେରାପି ପରୀକ୍ଷା ପାଇଁ ମଧ୍ୟ ପ୍ରସ୍ତୁତି ଚାଲିଛି।

ଆମେରିକାର ଫୁଡ୍ ଆଣ୍ଡ ଡ୍ରଗ୍ସ ପ୍ରଶାସନ ଅନୁମତି ଦେଇନଥିବାରୁ କେରଳ ଏହି ପ୍ଲାଜମା ଥେରାପି ପରୀକ୍ଷା ଆରମ୍ଭ କରିଥିଲା। ଆଇସିଏମଆର ସୂଚନା ଅନୁସାରେ କିଛି ଦିନ ମଧ୍ୟରେ ସାରା ଦେଶରେ କେତେ ପରୀକ୍ଷା କରାଯିବ ତାହା ଜଣାପଡିବ। ୨୦୦୩ ମସିହାରେ SARS ମହାମାରୀ, H-1N-1 ସ୍ୱାଇନ୍ ଫ୍ଲୁ ଏବଂ ୨୦୧୨ ମାର୍ସ ମହାମାରୀ ସମୟରେ ପ୍ଲାଜମା ଥେରାପି ନେଇ ଅନୁସନ୍ଧାନ  ଆରମ୍ଭ କରାଯାଇଥିଲା।

ମୁରାଦାବାଦ: ଉତ୍ତରପ୍ରଦେଶର ମୁରାଦାବାଦରେ ମେଡିକାଲ ଟିମ ଉପରେ ଆକ୍ରମଣ ମାମଲାରେ ବାକି ଆରୋପୀ ମାନଙ୍କୁ ଖୋଜାଚାଲିଛି । ଏଯାବତ ୧୭ ଜଣ ଆରୋପୀଙ୍କୁ ଗିରଫ କରାଯାଇଛି, ଅନ୍ୟ ଆରୋପୀଙ୍କ ଗିରଫଦାରୀ ପାଇଁ ସିସିଟିଭି ଫୁଟେଜ ଦେଖାଯାଉଛି । ପୁରା ଅଞ୍ଚଳରେ ରାପିଡ ଆକ୍ସନ ଫୋର୍ସ (ଆରଏଏଫ୍) ସହିତ ପୁଲିସ ଫୋର୍ୟ ମୁତୟନ କରାଯାଇଛି ।

ଇତି ମଧ୍ୟରେ ଆକ୍ରମଣର ଶିକାର ହୋଇଥିବା ଡାକ୍ତର ଆସ.ସି ଅଗ୍ରୱାଲ ପୁରା ଘଟଣାକୁ ବଖାଣିଛନ୍ତି । ସେ କହିଛନ୍ତି ଯେ ଶହ ଶହ ଲୋକ ହଠାତ ତାଙ୍କୁ ଆକ୍ରମଣ କରିବାକୁ ମାଡ଼ିଆସିଲେ  । ଆକ୍ରମଣରେ ସେ ତଳେ ପଡ଼ିଯାଇଥିଲେ । ଭିଡ଼ ଭିତରୁ ତାଙ୍କୁ ଜଣେ ବାହାର କରି ଥିଲେ ନହେଲେ ତାଙ୍କୁ ଜୀବନରୁ ମାରି ଦିଆଯାଇଥାନ୍ତା ବୋଲି ଡାକ୍ତର କହିଛନ୍ତି ।

ଡାକ୍ତର ଜଣଙ୍କ କହିଛନ୍ତି ଯେ, କରୋନା ପଜିଟିଭ ମୃତକଙ୍କ ପରିବାରବର୍ଗ କ୍ୱାରେଣ୍ଟାଇନରେ ରହିବାକୁ ପ୍ରସ୍ତୁତ ଥିଲେ ଏବଂ ସେମାନେ ଗାଡ଼ିରେ ମଧ୍ୟ ବସିସାରିଥିଲେ । ସେହି ସମୟରେ ହଠାତ ଲୋକଙ୍କ ଭିଡ଼ ଜମା ହେଲା ଏବଂ ସେମାନେ ମାରଣାନ୍ତକ ଆକ୍ରମଣ କରିବା ଆରମ୍ଭ କରିଦେଲେ । ଭିଡ଼ ମଧ୍ୟରୁ କିଛି ଲୋକ କହୁଥିଲେ ଯେ, ‘ ଖାଇବାକୁ କିଛି ଦିଆହେଉନି, ଭୁଲ ଇଞ୍ଜେକସନ ଲଗା ହେଉଛି, ଏବଂ ତା ପରେ ଲୋକମାନେ  ପଥର ମାରିବା ଆରମ୍ଭ କରିଦେଲେ ।  ଗୋଟିଏ ଇଟା ଡାକ୍ତରଙ୍କ ମୁଣ୍ଡରେ ମଧ୍ୟ ବାଜିଥିଲା ।

କଣ ଥିଲା ପୂରା ମାମଲା – ମୋରାଦାବାଦର ନବାବପୁରା ଗଳିରେ ଅବସ୍ଥିତ ହାଜିନେବଙ୍କ ମସଜିଦ ଅଞ୍ଚଳରେ ରହୁଥିବା ସରତାଜଙ୍କ ମୃତ୍ୟୁ ହୋଇଥିଲା । ସେ କରୋନା ପଜିଟିଭ୍ ବୋଲି ଜଣାପଡିଥିଲେ । ଏହା ପରେ ଡାକ୍ତରୀ ଦଳ ମୃତକଙ୍କ ପରିବାର ପାଖରେ ପହଞ୍ଚିଥିଲେ ଏବଂ ପରିବାର ସଦସ୍ୟଙ୍କୁ  କ୍ୱାରେଣ୍ଟାଇନରେ ରହିବାକୁ କହିଥିଲେ । ତେବେ ଏହି ସମୟରେ ସ୍ୱାସ୍ଥ୍ୟ ବିଭାଗ ଏବଂ ପୋଲିସ ଟିମ୍ ଉପରେ ହଠାତ୍ ସେହି ଅଞ୍ଚଳର ଲୋକମାନେ ପଥର ଫିଙ୍ଗିବା ଆରମ୍ଭ କରିଥିଲେ ।

ସ୍ୱାସ୍ଥ୍ୟ ବିଭାଗର ଡାକ୍ତର ଏବଂ କର୍ମଚାରୀମାନେ ମଧ୍ୟ ଏହି ଆକ୍ରମଣରେ ଆହତ ହୋଇଥିଲେ ଏବଂ ପୋଲିସର ଦୁଇଟି ଗାଡି ଭଙ୍ଗାରୁଜା କରିଥିଲେ। ଏହା ପରେ ପୋଲିସ ଫୋର୍ସ ଘଟଣାସ୍ଥଳରେ ପହଞ୍ଚିଥିଲା । ତେବେ ଏହି ସମୟ ମଧ୍ୟ ପଥର ଫିଙ୍ଗିବା ମଧ୍ୟ ଜାରି ରହିଥିଲା। ଅନେକ ମହିଳା ଛାତରୁ ପଥର ଫିଙ୍ଗିଥିବାର ନଜର ଆସିଥିଲେ। ସିସିଟିଭି ଫୁଟେଜକୁ ଆଧାର କରି ପୋଲିସ କାର୍ଯ୍ୟାନୁଷ୍ଠାନ ଆରମ୍ଭ କରିଛି।