ମାଲକାନାଗିରି: ନକ୍ସଲ ଦମନ କରିବା ପାଇଁ ଦିନ ରାତି କାର୍ଯ୍ୟରତ ରହିଛି ବିଏସଏଫ୍ । ନକ୍ସଲ ମୁକାବିଲା କରିବା ସହ ଆଦିବାସୀ ଅଧ୍ୟୁଷିତ ଅଞ୍ଚଳରେ ସହାୟତାର ହାତ ବଢାଇଛି ବିଏସ୍ଏଫ୍ ।
ମାଲକାନଗିରିର ମାଥିଲି ବ୍ଲକ୍ର ଟେମୁରପାଲି ଗାଁର ଲୋକଙ୍କୁ ଆତ୍ମନିର୍ଭରଶୀଳ କରାଇବା ପାଇଁ ନିଆରା ପଦକ୍ଷେପ ନେଇଛି ବିଏସ୍ଏଫ୍ । ଗାଁର ଯୁବାବର୍ଗଙ୍କୁ କମ୍ପ୍ୟୁଟର ଶିକ୍ଷା ଦାନ କରାଇବା ପାଇଁ ବ୍ୟବସ୍ଥା କରିଛି ବିଏସ୍ଏଫ୍ ।
ଏହାସହ ଯୁବତୀ ଓ ମହିଳାଙ୍କୁ ଆତ୍ମନିର୍ଭଶୀଳ କରିବା ପାଇଁ ବଣ୍ଟାଯାଇଛି ସିଲେଇ ମେସିନ । ଆଉ ଖେଳକୁଦ ପାଇଁ ବିଭିନ୍ନ ଖେଳ ସାମଗ୍ରୀ ବି ବଣ୍ଟାଯାଇଛି ।
ବାଲେଶ୍ୱର: ୧୦୦ ଗ୍ରାମ୍ ବ୍ରାଉନ୍ ସୁଗର ସହିତ ନଗଦ ୩ ଲକ୍ଷ ୧୪ ହଜାର ଟଙ୍କା ଓ ଏକ କାର୍ ଜବତ, ୩ ଜଣ ଗିରଫ । ବାଲେଶ୍ୱର ଜିଲ୍ଲା ଜଳେଶ୍ୱର ସେଖ୍ସରାଇ ଛକ ନିକଟରୁ ପୋଲିସ ଚଢ଼ାଉ କରି ଏସବୁ ଜବତ କରିବା ସହିତ ୩ ଜଣଙ୍କୁ ଗିରଫ କରିଛି ।
ଗିରଫ ବ୍ୟକ୍ତିମାନେ ହେଲେ ପୁରୀ କୁମ୍ଭାରସାହି ଥାନା ଅନ୍ତର୍ଖତ ନରେନ୍ଦ୍ରକୋଣର ଶ୍ରୀଧର ନାୟକ, ଲିଟୁ ଦୋରା ଏବଂ ଦେବାଶିଷ ମହାନ୍ତି । ଏମାନେ ଜଳେଶ୍ୱରରୁ କାର୍ ଯୋଗେ ପୁରୀକୁ ବ୍ରାଉନ୍ ସୁଗର ଚୋରା ଚାଲାଣ କରିବା ବେଳେ ପୋଲିସ ଚଢ଼ାଉ କରି ଧରିଥିଲା । ଜବତ ବ୍ରାଉନ୍ ସୁଗରର ମୂଲ୍ୟ ପ୍ରାୟ ୧୦ ଲକ୍ଷ ଟଙ୍କା ହେବ ।
ଭୁବନେଶ୍ୱର: ଆଗାମୀ ୨୪ ଘଣ୍ଟା ଯାଏଁ ରହିବ ଘନ କୁହୁଡ଼ିର ଆସ୍ତରଣ । ବିଶେଷକରି ଓଡ଼ିଶାର ଉପକୁଳବର୍ତ୍ତି ଜିଲ୍ଲାରେ ଏହାର ପ୍ରଭାବ ଦେଖିବାକୁ ମିଳିବ । କଟକ, ଜଗତସିଂହପୁର, ଖୋର୍ଦ୍ଧା, ପୁରୀ, ନୟାଗଡ଼, କନ୍ଧମାଳ ଜିଲ୍ଲାରେ ରହିବ ଘନକୁହୁଡି ।
୨୦୦ ମିଟରରୁ ଅଧିକ ରାସ୍ତା ଦୃଶ୍ୟମାନ ହେବ ନାହିଁ । ଦିନ ଓ ରାତି ତାପମାତ୍ରାରେ କିଛି ପ୍ରଭାବ ପଡ଼ିବନି । ଆହୁରି ୨ରୁ ୪ ଦିନ ଏଭଳି ତାପମାତ୍ରା ରହିବ ବୋଲି ଆକଳନ କରିଛି ପାଣିପାଗ କେନ୍ଦ୍ର ।
ପରେ ତାପମାତ୍ରା ଧୀରେ ଧୀରେ ବଢ଼ିବ । ଓଡ଼ିଶାର ବିଭିନ୍ନ ସ୍ଥାନରେ କେଉଁଠି କେଉଁଠି ୨ ରୁ ୫ ଡ଼ିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି ପାଉଛି । ସେହିପରି ପୂର୍ବାନୁମାନ ଅନୁଯାୟୀ ଗତକାଲିଠାରୁ ଶୀତ କମିବା ସହ ଓଡ଼ିଶାର ବିଭିନ୍ନ ସହରରେ ଦିନର ତାପମାତ୍ରା ବଢ଼ିବାରେ ଲାଗିଛି । ପାରାଦୀପ, ପୁରୀ, ଛତ୍ରପୁର, ଫୁଲବାଣୀ ବ୍ୟତୀତ ଅନ୍ୟ ସମସ୍ତ ସହରରେ ଆଜି ଦିନର ତାପମାତ୍ରା ୩୦ ଡିଗ୍ରି ଟପିଯାଇଛି ।
ମାଲକାନଗିରିର ତାପମାତ୍ରା ପୂର୍ବଭଳି ୩୫ ଡିଗ୍ରି ରହିଥିବା ବେଳେ ପାରଳାଖେମୁଣ୍ଡିରେ ୩୪.୫ ଡିଗ୍ରି ରେକର୍ଡ ହୋଇଛି। ମଙ୍ଗଳବାରଠାରୁ ଦିନର ତାପମାତ୍ରା ଆହୁରି ବଢ଼ିବ ।
ଆଖି ପିଛୁଳାକେ ନେଇଗଲେ ୧୨କୋଟି ଟଙ୍କାର ସୁନା । ୨୦ମିନିଟରେ ଉଠାଇନେଲେ ୩୦କେଜିର ସୁନା ଗାଏବ କଲେ ଦୁର୍ବୃତ୍ତ । ଘଟଣାଟି ହେଉଛି ପଞ୍ଜାବର ଯେଉଁଠି ୪ ଜଣ ସଶସ୍ତ୍ର ଡକାୟତ ଦିନ ଦ୍ୱିପ୍ରହରରେ ଏକ ଆର୍ଥିକ ସେବା ପ୍ରଦାନ କରୁଥିବା କମ୍ପାନୀ ଠାରୁ ବନ୍ଧୁକ ଦେଖାଇ ୩୦ କିଲୋଗ୍ରାମ ସୁନା ଲୁଟି ନେଇଛନ୍ତି । ଏନେଇ ଜାତୀୟ ଗଣମାଧ୍ୟମର ରିପୋର୍ଟରୁ ଜଣାପଡ଼ିଛି । ତେବେ ଏନେଇ ପୋଲିସ ସୋମବାର ଦିନ ଏହି ସୂଚନା ଦେଇଛି । ପୋଲିସ କହିଛି, ଚଣ୍ଡିଗଡ଼ର ଗିଲ ରୋଡରେ ଇଣ୍ଡିଆ ଇନଫୋଲାଇନ ଫାଇନାନ୍ସ ଲିମିଟେଡ କମ୍ପାନୀରୁ ପୂର୍ବାହ୍ନ ୧୧ଟାରେ ଏହି ଡକାୟତି ହୋଇଛି । ସୁନା ଲୁଟ ହୋଇଥିବା ସିସିଟିଭି ଫୁଟେଜରୁ ଜଣାପଡ଼ିଛି ।
ଦୁର୍ବୃତ୍ତମାନେ କମ୍ପାନୀର କର୍ମଚାରୀଙ୍କୁ ପ୍ରଥମେ ଦଉଡିରେ ବାନ୍ଧିଦେଇଥିଲେ । ମାତ୍ର ୨୦ ମିନିଟରେ ଏହି ଲୁଟ ହୋଇଥିବା ପୋଲିସ କହିଛି । ଲୁଟ ହୋଇଥିବା ସୁନାର ମୂଲ୍ୟ ୧୨ କୋଟି ଟଙ୍କା । ଏହି ଅଫିସ ନିକଟରେ ଅପରାଧ ତଦନ୍ତ କାର୍ଯ୍ୟାଳୟ ଅଛି । ପୋଲିସ କମିସନର ରାକେଶ ଅଗ୍ରୱାଲ ଗଣମାଧ୍ୟମର ପ୍ରତିନିଧିଙ୍କୁ କହିଛନ୍ତି, ଦୁର୍ବୃତ୍ତମାନେ ଆଇଆଇଏଫଏଲ କର୍ମଚାରୀଙ୍କ ଆଲାରାମ ବଜାଇଥିଲେ । ଏହା ପରେ ସେମାନେ କାର୍ଯ୍ୟାଳୟକୁ ପ୍ରବେଶ କରିଥିଲେ । ଘଟଣା ସମୟରେ ୫ ଜଣ କର୍ମଚାରୀ ଥିଲେ ଏବଂ କୌଣସି ଗ୍ରାହକ ନ ଥିଲେ ।
ବ୍ରହ୍ମପୁର: ବୈଦନାଥପୁର ଗୁରୁଦେବ ହସ୍ପିଟାଲରେ ଉତ୍ତେଜନା । ଡାକ୍ତରଙ୍କୁ ରୋଗୀଙ୍କ ସଂପର୍କୀୟ ମାଡ଼ ମାରିଥିବା ଅଭିଯୋଗ ହୋଇଛି । ଚିକିତ୍ସା ଆବହେଳା ଯୋଗୁଁ ମହିଳାଙ୍କ ମୃତ୍ୟୁ ଅଭିଯୋଗ ।
ଘଟଣାକୁ ନେଇ ରାତି ତମାମ ହସ୍ପିଟାଲ ପରିସରରେ ଉତ୍ତେଜନା ଲାଗି ରହିଥିଲା । ତେବେ ଖବର ପାଇ ପୋଲିସ ପହଞ୍ଚି ହସ୍ପିଟାଲ ମାଲିକ ଓ ଡାକ୍ତର ପ୍ରଭାତ ପାଣିଗ୍ରାହୀଙ୍କୁ ଉଦ୍ଧାର କରିଛି । ସେମାନଙ୍କୁ ଅଟକ ରଖି ପଚରାଉଚରା କରୁଛି ପୋଲିସ ।
ସୂଚନା ଅନୁଯାୟୀ, ଗତକାଲି ମହିଳା ଜଣକ ତାଙ୍କର ଆପେଣ୍ଡିକ୍ସ ଅପରେସନ ପାଇଁ ଗୁରୁଦେବ ହସ୍ପିଟାଲକୁ ଆସିଥିଲେ । ସେଠାରେ ତାଙ୍କର ଅପରେସନ ମଧ୍ୟ ହୋଇଥିଲା ।
କିନ୍ତୁ ଅପରେସନ ପରେ ହଠାତ ତାଙ୍କର ଦେହ କୋଲାପ୍ସ ହୋଇଯାଇଥିଲା । ଏବଂ ପରବର୍ତ୍ତି ସମୟରେ ମହିଳାଙ୍କର ମୃତ୍ୟୁ ହୋଇଛି । ଏନେଇ ଚିକିତ୍ସା ଅବହେଳାରୁ ମହିଳାଙ୍କର ମୃତ୍ୟୁ ହୋଇଛି ବୋଲି ପରିବାର ଲୋକ ହସ୍ପିଟାଲର ମାଲିକ ଏବଂ ଡାକ୍ତରଙ୍କୁ ମାଡ଼ ମାରିବା ସହ ଅଭିଯୋଗ ମଧ୍ୟ କରିଛନ୍ତି ।
ଭଦ୍ରକ: ଚିକିତ୍ସା ଅବହେଳାରୁ ରୋଗୀ ମୃତ୍ୟୁକୁ ନେଇ ଭଦ୍ରକ ମେଡିକାଲରେ ଉତ୍ତେଜନା । ଡ୍ୟୁଟିରେ ଥିବା ନର୍ସ ଟଙ୍କା ନେବା ସହ ଚିକିତ୍ସାରେ ଅବହେଳା ଅଭିଯୋଗ ଆଣିଛନ୍ତି ପରିବାର ଲୋକ ।
ତିହିଡି ଗୋପସାହିର ପ୍ରଶାନ୍ତ ନାୟକଙ୍କ ସ୍ତ୍ରୀ ପାରିବାରିକ କଳହକୁ ନେଇ ବିଷ ପିଇ ଦେଇଥିଲେ । ଗୁରୁତର ଅବସ୍ଥାରେ ତାଙ୍କୁ ପ୍ରଥମେ ତିହିଡି ମେଡିକାଲ ଓ ପରେ ଭଦ୍ରକ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା ।
ତେବେ ଅବସ୍ଥା ଗୁରୁତର ହେବାରୁ ତୁରନ୍ତ ଚିକିତ୍ସା ପାଇଁ ଡ୍ୟୁଟିରେ ଥିବା ନର୍ସଙ୍କୁ କହିବାରୁ ସେ ଟଙ୍କା ମାଗିଥିଲେ ବୋଲି ପରିବାର ଲୋକ କହିଛନ୍ତି । ପରେ ଚିକିତ୍ସା ହୋଇନପାରିବାରୁ ରୋଗୀଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି । ଏହି ଘଟଟଣାକୁ ନେଇ ମେଡିକାଲ ପରିସରରେ ଅଶାନ୍ତି ଦେଖାଦେଇଥିଲା । ଏନେଇ ଡାକ୍ତର ଓ ନର୍ସଙ୍କ ଠାରୁ କୈାଣସି ପ୍ରତିକ୍ରିୟା ମିଳିପାରିନାହିଁ ।
ଗଞ୍ଜାମ: ବୁଲେଟରେ ବୁଲିଲେ ବିଜୟ । ବ୍ରହ୍ମପୁରର ବିଭିନ୍ନ ଅଞ୍ଚଳରେ ପରିମଳ ଓ ସ୍ୱଚ୍ଛତାର ସମୀକ୍ଷା କରିଲେ । ପ୍ରଥମେ ଚାଲିଚାଲି, ସାଇକେଲ ଆଉ ଏବେ ବୁଲେଟରେ ବୁଲିଛନ୍ତି ବ୍ରହ୍ମପୁର ଜିଲ୍ଲାପାଳ । କାରିଣୀ ସାହି ଛକରେ ଦୋକାନ ଆଗରେ ଅଳିଆ ପକାଇବା ଓ ଅପରିଷ୍କାର କରିଥିବାରୁ ଦୋକାନୀଙ୍କୁ ୫ ହଜାର ଟଙ୍କା ଜରିମାନା ଲଗାଇଛନ୍ତି । ନିଜ ବାସଭବନରୁ ବାହାରି ଅପର ବସଷ୍ଟାଣ୍ଡ, ମୁଖ୍ୟବଜାର, ରିକାପଲ୍ଲୀ ଓ ଲୋୟର ବସଷ୍ଟାଣ୍ଡ ବୁଲିଥିଲେ । ସେହିପରି ଛତ୍ରପୁର ଠାକୁରାଣୀ ମନ୍ଦିର ରୋଡ ଏବଂ ବଡ଼ ବଜାରର କିଛି ଦୋକାନରେ ସ୍ୱଚ୍ଛତା ସହ ପଲିଥିନ ନ ରଖିବାକୁ କହିଥିଲେ । ନିଜର ନିଆରା ଅନ୍ଦାଜରେ ସମୀକ୍ଷା କରିବାକୁ ନେଇ ଏବେ ଚର୍ଚ୍ଚାରେ ବ୍ରହ୍ମପୁର ଜିଲ୍ଲପାଳ ବିଜୟ ଅମୃତ କୁଲାଙ୍ଗ ।
ଆଜି ଗୃହରେ ଉପସ୍ଥାପିତ ହେବ ରାଜ୍ୟ ବଜେଟ୍ । ଏଥର ଆକାର ଦେଢ଼ ଲକ୍ଷ କୋଟି ଟପିବା ଅନୁମାନ । ସେପଟେ ସର୍ଭେ ରିପୋର୍ଟ କହିଲା, କମୁଛି ଅଭିବୃଦ୍ଧି, ବଢ଼ୁଛି ମୁଦ୍ରାସ୍ଫୀତି ।
ଗଞ୍ଜାମ: ଗୋଳନ୍ଥରା ଛକ ନିକଟରେ ସଡ଼କ ଦୁର୍ଘଟଣା । ଟ୍ରକକୁ ପିଟିଲା ବାଇକ୍ ୨ମୃତ, ଜଣେ ଗୁରୁତର ।
ବ୍ରହ୍ମପୁର: ମରିଗଲା ମାନବିକତା । ସମ୍ପତ୍ତି ଆଗରେ ସବୁକିଛି ସରିଗଲା । ୫ ଘଣ୍ଟା ଧରି ରାସ୍ତାକଡ଼ ବାରଣ୍ଡାରେ ପଡ଼ିରହିଲା ମାଆର ଶବ । ସେପଟେ ସମ୍ପତି ବଣ୍ଟାକୁ ନେଇ କଳିରେ ବ୍ୟସ୍ତ ଥିଲେ ୪ ଝିଅ । ୨ କୋଟି ଟଙ୍କାର ମାଲିକାଣୀର ଶବ ଘର ବାହାରେ ସେମିତି ପଡ଼ିରହିଥିଲା । ଝିଅ, ନାତି ଓ ନାତୁଣୀ, ସମସ୍ତେ ଉପସ୍ଥିତି ଥିଲେ । କାହା ଆଖିରୁ ଲୁହ ଝରିବା ତ ଦୂରର କଥା, ବୁଢ଼ୀ ମାଆ ଉପରକୁ କାହା ଆଖି ବି ଯାଇ ନ ଥିଲା । ଏଭଳି ଅଭାବନୀୟ ଘଟଣାକୁ ନେଇ ବ୍ରହ୍ମପୁରରେ ଚର୍ଚ୍ଚା ।
ବଡ଼ବଜାର ଥାନା ଶ୍ରୀରାମୃନଗର ଦ୍ୱିତୀୟ ଲେନରେ ୪ ମହଲା ଘର । ଯେଉଁଠି ରହୁଥିଲେ ସୂର୍ଯ୍ୟମଣି ସାହୁ । ବ୍ରହ୍ମପୁର ମେଡିକାଲରେ ୮୫ ବର୍ଷ ବୟସରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହେଲା । ଶବ ଧରି ଆମ୍ବୁଲାନ୍ସ ଘର ଆଗରେ ପହଞ୍ଚିଲା । କିନ୍ତୁ ଭିତରକୁ ଯାଇପାରିଲାନି । ସମ୍ପତ୍ତି ଭାଗବଣ୍ଟାକୁ ନେଇ ଘରେ ତାଲା ପକାଇଥିଲେ ଝିଅ । ଗୋଟିଏ ନୁହେଁ ତିନି ତିନି ଟି ତାଲା ମାଆର ଶବକୁ ଘରେ ପଶିବାକୁ ଦେଇ ନ ଥିଲା । ୪ ଝିଅ, ନାତି ନାତୁଣୀଙ୍କ ପାଇଁ ସମ୍ପତ୍ତିର ଭାଗବଣ୍ଟା ଆଗରେ ଯେମିତି ମରିଯାଇଥିଲା ମାନବିକତା । ଶେଷରେ ସ୍ଥାନୀୟ ଲୋକେ ଶବ ସତ୍କାର ପାଇଁ ଆଗେଇ ଆସିଲେ । ପୋଲିସ ଓ ମାଜିଷ୍ଟ୍ରେଟଙ୍କୁ ମଧ୍ୟ ଆସିବାକୁ ପଡ଼ିଲା । ତା ପରେ ଯାଇ ଶବ ପାଇଁ ଯୋଗାଡ଼ ହୋଇଥିଲା କୋକେଇ ।
