ଭୁବନେଶ୍ୱର: ଭୁବନେଶ୍ୱରରେ କରୋନା ଯୋଦ୍ଧା ଅସୁରକ୍ଷିତ । ମହିଳା ଡାକ୍ତରଙ୍କଠାରୁ ଲୁଟ । ଦୁର୍ବୃତ୍ତ ମାରଣାସ୍ତ୍ର ଦେଖାଇ ଟଙ୍କା ଓ ମୋବାଇଲ ଲୁଟି ନେଇଥିବା ଅଭିଯୋଗ ହୋଇଛି । ଲୁଟର ଶିକାର ହୋଇଛନ୍ତି ମହିଳା ଡାକ୍ତର ସୀମା ହାଁସଦା । ଗତ ୨୮ ତାରିଖରେ ରାତି ୮ଟା ସମୟରେ ଘରକୁ ଫେରୁଥିବା ବେଳେ ଶାସ୍ତ୍ରୀନଗରରେଠାରେ କିଛି ଦୁର୍ବୃତ୍ତ ମାରଣାସ୍ତ୍ର ଦେଖାଇ ଲୁଟ୍ କରିଥିଲେ ।

ଟ୍ରାଫିକ ଚେକ୍‌ ପଏଣ୍ଟରେ କାର୍ଯ୍ୟରତ ଟ୍ରାଫିକ ପୋଲିସକୁ ଜଣାଇଥିଲେ ଡାକ୍ତର । ସଂପୃକ୍ତ ଟ୍ରାଫିକ ପୋଲିସ କର୍ମଚାରୀ ଜଣଙ୍କ ସ୍ଥାନୀୟ ଥାନାରେ ଅଭିଯୋଗ କରିବାକୁ କହିଥିଲେ । ଏନେଇ ଟ୍ୱିଟ୍‌ କରି କମିଶନରେଟ ପୋଲିସକୁ ଜଣାଇଥିଲେ ଡାକ୍ତର । ସେ ଲେଖିଛନ୍ତି, ଡ୍ୟୁଟିକୁ ଯିବା ବେଳେ ମୁଁ ସୁରକ୍ଷିତ ମଣୁନାହିଁ । ମୁଁ ଭୁବନେଶ୍ୱରରେ ସୁରକ୍ଷିତ କି ? କେବେ ମୋର ଲୁଟ ଜନିଷ ମିଳିବ ? କାହା ଉପରେ ଭରସା କରି ଡ୍ୟୁଟି କରିବାକୁ ଯିବି ବୋଲି ଡାକ୍ତର ସୀମା ହାଁସଦା ପ୍ରଶ୍ନ କରିଛନ୍ତି ।

ମାଳମାଳ ସିସିଟିଭି ଲଗାଇ ଭୁବନେଶ୍ୱର ନିରାପଦ ବୋଲି କହିବା ଲୋକ ଦେଖାଣିଆ କାମ ବୋଲି ସେ କହିଛନ୍ତି । ଏ ମାମଲାର ତଦନ୍ତ ଜୋନ-୧ ଏସିପିଙ୍କୁ ଦିଆଯାଇଥିବା କମିଶନରେଟ ପୋଲିସ ପକ୍ଷରୁ ଡାକ୍ତର ସୀମା ହାଁସଦାଙ୍କ ଟ୍ୱିଟକୁ ରି-ଟ୍ୱିଟ କରି ସୂଚନା ଦେଇଛନ୍ତି । ସେହିପରି ଦୁଇ ଦିନ ତଳେ ଆଉ ଜଣେ ମହିଳା ଡାକ୍ତର ଦୁଇ ପିଲାଙ୍କ ସହ ହାଇଦ୍ରାବାଦରୁ ଫେରୁଥିବା ବେଳେ ଭଉବନେଶ୍ୱର ଉପକଣ୍ଠ ଗଣ୍ଡରପୁରରେ ତାଙ୍କୁ ପୂରାଇ ଦିଆଯାଇ ନଥିଲା ବୋଲି ନନ୍ଦନକାନନ ଥାନାରେ ଅଭିଯୋଗ ହୋଇଥିଲା । ସେହିଭଳି ପୂର୍ବରୁ ନୟାପଲ୍ଲୀରେ ଜଣେ ଡାକ୍ତରଙ୍କୁ ଛାଡ଼ିବାକୁ ଗଲା ବେଳେ ପୋଲିସ ରାସ୍ତାରେ ପାସ୍‌ ମାଗି ଅଟକାଇବା ଘଟଣା ସାମ୍ନକୁ ଆସିଥିଲା । ଏସବୁ ଘଟଣା ନେଇ ରାଜଧାନୀରେ ଅସନ୍ତୋଷ ପ୍ରକାଶ ପାଇଛି ।

ନୂଆଦିଲ୍ଲୀ:  ଲକଡାଉନ୍ କାରଣରୁ ଦେଶର ବିଭିନ୍ନ ଭାଗରେ ଫସି ରହିଥିବା ଯାତ୍ରୀଙ୍କୁ ନିଜ ରାଜ୍ୟରେ ପହଂଚାଇବା ପାଇଁ ଭାରତୀୟ ରେଳ ମଙ୍ଗଳବାରଠାରୁ ୧୫ ଏସି ସ୍ପେଶାଲ ଟ୍ରେନ ଚଲାଇବ । ରେଳବାଇ ଅନୁସାରେ ଏହି ଟ୍ରେନ ଗୁଡିକ ସୀମିତ ଷ୍ଟେଶନରେ ଅଟକିବେ । କିନ୍ତୁ ଯାତ୍ରୀ ଏହି ଷ୍ଟେଶନରେ ଓହ୍ଲାଇ ପାରିବେ କିମ୍ବା ଚଢି ପାରିବେ । ଉଦାହରଣ ସ୍ୱରୁପ ନୂଆଦିଲ୍ଲୀରୁ ପାଟନା ଯାଉଥିବା ଏସି ସ୍ପେଶାଲ ଟ୍ରେନ୍ କାନପୁର ସେଣ୍ଟ୍ରାଲ,ପଣ୍ଡିତ ଦିନଦୟାଲ ଉପାଧ୍ୟାୟ ଜଙ୍କସନ ଓ ପ୍ରୟାଗରାଜ ଜଙ୍କସନରେ ଅଟକିବ । ଏହି ସବୁ ଷ୍ଟେଶନରେ ଯାତ୍ରୀ ଓହ୍ଲାଇ ପାରିବେ କିମ୍ବା ଏଠାରୁ ଟ୍ରେନରେ ଚଢି ପାରିବେ । ଏହାପୂର୍ବରୁ ପ୍ରବାସୀ ଶ୍ରମିକଙ୍କୁ ନେଇ ଯାଉଥିବା ଟ୍ରେନ୍ ବାଟରେ କୌଣସି ଷ୍ଟେଶନରେ ଅଟକୁ ନଥିଲା କିମ୍ବା ଯାତ୍ରୀଙ୍କୁ ମଧ୍ୟବର୍ତ୍ତି ଷ୍ଟେଶନରୁ ଉଠାଉ ନଥିଲା  ।

ସେହିଭଳି ହାୱଡା ଯାଉଥିବା ଟ୍ରେନ୍ ଆସନସୋଲ,ଧନବାଦ,ପାରସନାଥ,ଗୟା,ପଣ୍ଡିତ ଦିନଦୟାଲ ଉପାଧ୍ୟାୟ ଜଙ୍କସନ୍,ପ୍ରୟାଗରାଜ ଜଙ୍କସନ ଓ କାନପୁର ସେଣ୍ଟ୍ରାଲରେ ଅଟକିବ । ଏହି ସବୁ ଷ୍ଟେଶନରୁ ଯାତ୍ରୀ ଟ୍ରେନରେ ଚଢି ପାରିବେ କିମ୍ବା ଓହ୍ଲାଇ ପାରିବେ । ଏହି ୧୫ ଟ୍ରେନଙ୍କ ମଧ୍ୟରୁ ଅଧିକାଂଶ ଦୈନିକ ଚାଲିବେ ଓ କିଛି ସପ୍ତାହରେ ତିନି ଦିନ,କିଛି ଦୁଇ ଦିନ ଓ କିଛି କେବଳ ଦିନକ ପାଇଁ ଚାଲିବେ ।  ହାୱଡା,ପାଟନା,ଦିବ୍ରୁଗଡ,ଜମ୍ମୁ,ମୁମ୍ବାଇ,ଅହମ୍ମଦାବାଦ,ଭୁବନେଶ୍ୱର ଓ ବେଙ୍ଗାଲୁରୁ ପାଇଁ ଟ୍ରେନ୍ ଦୈନିକ ଚାଲିବ । ଅନ୍ୟପକ୍ଷରେ ଅଗରତାଲା ପାଇଁ ସପ୍ତାହରେ ଗୋଟିଏ ଦିନ ଟ୍ରେନ୍ ଚାଲିବ ।

ସଂଧ୍ୟା ୪ରୁ ଆରମ୍ଭ ହେବ ଟିକେଟ୍ ବୁକିଂ

ଆଇଆରସିଟିସିର ୱେବସାଇଟ୍ ଆଜି ସଂଧ୍ୟା ୪ଟାରୁ ଟିକେଟ୍ ବୁକିଂ ଆରମ୍ଭ ହେବ । ଟିକେଟ୍ କେବଳ ଅନଲାଇନ୍ ହିଁ ବୁକିଂ କରାଯାଇ ପାରିବ । କାଉଣ୍ଟର କିମ୍ବା ଏଜେଣ୍ଟଙ୍କ ଜରିଆରେ ଟିକେଟ୍ ନିଆଯାଇ ପାରିବ ନାହିଁ ।

ଟିକେଟ୍ ଦର କେତେ ?

ରାଜଧାନୀ ଏକ୍ସପ୍ରେସ ଟିକେଟ୍ ଦର ସହିତ ଏହି ସ୍ପେଶାଲ ଏସି ଟ୍ରେନ୍ ଟିକେଟ୍ ଦର ସମାନ ରହିବ ।

ମାସ୍କ ଅନିବାର୍ଯ୍ୟ

ସବୁ ଯାତ୍ରୀଙ୍କ ପାଇଁ ମାସ୍କ ଅନିବାର୍ଯ୍ୟ ହେବ । ବିନା ମାସ୍କରେ ଥିବା ଯାତ୍ରୀଙ୍କୁ ଯାତ୍ରା ଅନୁମତି ମିଳିବ ନାହିଁ ।

ଏକ ଘଣ୍ଟା ପୂର୍ବରୁ ଷ୍ଟେଶନରେ ପହଂଚିବାକୁ ପଡିବ

ଟ୍ରେନ୍ ଛାଡିବାର ଅତିକମରେ ଗୋଟିଏ ଘଣ୍ଟା ଆଗରୁ ଷ୍ଟେଶନରେ ପହଂଚିବାକୁ ପଡିବ । ଯାତ୍ରୀଙ୍କୁ ସ୍କ୍ରିନିଂ ପରେ ହିଁ ଟ୍ରେନରେ ବସିବାକୁ ଅନୁମତି ମିଳିବ । ତେଣୁ ଟ୍ରେନ ଛାଡିବାର ଏକ ଘଣ୍ଟା ପୂର୍ବରୁ ଷ୍ଟେଶନରେ ପହଂଚିବାକୁ ପଡିବ । ଯେଉଁ ଯାତ୍ରୀଙ୍କ ଠାରେ କରୋନା ଲକ୍ଷଣ ନଥିବ ସେମାନଙ୍କୁ ହିଁ ଯାତ୍ରା ଅନୁମତି ମିଳିବ

ଆରୋଗ୍ୟ ସେତୁ ଆପ୍ ଜରୁରୀ

ଯାତ୍ରା କରୁଥିବା ସମସ୍ତ ଯାତ୍ରୀ ଆରୋଗ୍ୟ ସେତୁ ଆପ୍ ଡାଉନଲୋଡ୍ କରିବାକୁ ବାଧ୍ୟ । ଏହି କରୋନା ସଂକ୍ରମିତଙ୍କ ସମ୍ପର୍କରେ ସତର୍କ କରିଥାଏ । କନଫର୍ମ ଟିକେଟ୍ ଯାତ୍ରୀ ହିଁ ସ୍ପେଶାଲ ଟ୍ରେନରେ ଯାତ୍ରା କରି ପାରିବେ ।

ପାଖରେ ନିଜ କମ୍ବଳ ରଖନ୍ତୁ

ଟ୍ରେନରେ ଯାତ୍ରୀଙ୍କୁ କମ୍ବଳ ଓ ଚାଦର ସୁବିଧା ମିଳିବ ନାହିଁ । ତେଣୁ ଘରୁ ବାହାରିବା ବେଳେ ନିଜ ସହ ଚାଦର ଓ କମ୍ବଳ ନେଇଯାନ୍ତୁ ।

ଖାଦ୍ୟ ମିଳିବ ନାହିଁ

ଯାତ୍ରାକାଳରେ ଟ୍ରେନରେ ଖାଦ୍ୟ ମିଳିବ ନାହିଁ ତେଣୁ ଘରୁ ଖାଦ୍ୟ ନେଇକରି ଯାନ୍ତୁ ।

ଭୁବନେଶ୍ୱର: ଘରୋଇ ସ୍କୁଲଗୁଡ଼ିକର ମନମାନି ଅଭିଯୋଗ । ପ୍ରତିବାଦରେ ଓଡ଼ିଶା ଅଭିଭାବକ ମହାସଂଘର ଧାରଣା। ଭୁବନେଶ୍ୱର ଜୟଦେବ ଭବନ ଆଗରେ ଅଭିଭାବକମାନେ ଧାରଣାରେ ବସିଛନ୍ତି । ଲକଡାଉନ୍‌ରେ କୋଭିଡ୍‌ ଗାଇଡଲାଇନ୍‌ ଅନୁସାରେ ସାମାଜିକ ଦୂରତା ରଖି ଆନ୍ଦୋଳନରେ ବସିଛନ୍ତି ।

କରୋନା ମହାମାରୀ ପରି ଜାତୀୟ ବିପର୍ଯ୍ୟୟ ସମୟରେ ବେସରକାରୀ ବିଦ୍ୟାଳୟମାନଙ୍କୁ କୈାଣସି ମାସିକ ଦେୟ, ଆଡମିସନ୍‌ ଫି ଓ ଅନ୍ୟ ଫି ଆଦାୟ ନକରିବାକୁ ସରକାର ଅପିଲ୍‌ କରିଥିଲେ । ତେବେ ବିଭିନ୍ନ ଆଳ ଦେଖାଇ ସ୍କୁଲ କର୍ତ୍ତୃପକ୍ଷ ଫି ଆଦାୟ କରୁଥିବା ଅଭଯୋଗ ହୋଇଛି । ଏହାସହ ବିଦ୍ୟାଳୟ ପରିସରରେ ଘରୋଇ ପ୍ରକାଶନ ସଂସ୍ଥାର ବହିକୁ ଚଢା ଦରରେ ବିକ୍ରି କରୁଛନ୍ତି ।

ଓଡିଶା ମାନବାଧିକାର କମିଶନଙ୍କ ଏପ୍ରିଲ ୨୦ର ନିର୍ଦ୍ଦେଶନାମା ଅନୁଯାୟୀ ପ୍ରତ୍ୟେକ ବିଦ୍ୟାଳୟ ନିଜ ୱେବସାଇଟରେ ପୁସ୍ତକ ସଂପର୍କିତ ସମସ୍ତ ତଥ୍ୟ ଦେବାର ଥିଲା କିନ୍ତୁ ତାହା ସେମାନେ କରୁନାହାଁନ୍ତି । ତେବେ ଏ ସମସ୍ତ ନିୟମ ଓ ନିର୍ଦ୍ଦେଶକୁ ଫୁ କରି ଘରୋଇ ବିଦ୍ୟାଳୟ ମନମାନି କରୁଥିବା ଅଭିଯୋଗ କରିଛନ୍ତି ଅଭିଭାବକମାନେ । ଏହା ବିରୋଧରେ ମହାସଂଘ ପକ୍ଷରୁ ଭୁବନେଶ୍ୱର ଜୟଦେବ ଭବନ ଆଗରେ ଧାରଣା ଦିଆଯାଇଛି ।