ମମତା ବାନାର୍ଜୀ ଙ୍କ ସରକାର ରାଜ୍ୟରେ ଲକ୍ ଡାଉନ୍ ସମୟରେ ମଦ ବିତରଣକୁ ଅନୁମତି ଦେବାକୁ ନିଷ୍ପତ୍ତି ନେଇଛନ୍ତି। ପଶ୍ଚିମବଙ୍ଗ ସରକାରଙ୍କ ଏକ୍ସାଇଜ୍ ନିର୍ଦ୍ଦେଶାଳୟର ସୂତ୍ର ଅନୁଯାୟୀ, ମଦ ବିକ୍ରି ଉପରେ କୌଣସି ପ୍ରତିବନ୍ଧକ ନଥିଲା। ତେବେ ଅଧିକାଂଶ ମଦ ଦୋକାନ ଲକ୍ ଡାଉନ୍ କାରଣରୁ ବନ୍ଦ ଥିଲା ଏବଂ ଆଗକୁ ମଧ୍ୟ ବନ୍ଦ ରହିବ ବୋଲି ସୂଚନା ରହିଛି। ହୋମ ଡେଲିଭରୀ ପାଇଁ କେବଳ ବ୍ୟାକେଣ୍ଡ ଯୋଗାଣ ଆରମ୍ଭ ହୋଇପାରିବ ବୋଲି ସୂତ୍ରରୁ ପ୍ରକାଶ ପାଇଛି।

ଏକ୍ସାଇଜ୍ ବିଭାଗ ଅନୁଯାୟୀ କୋଲକାତା ପୋଲିସ ସ୍ଥାନୀୟ ପୋଲିସ ଷ୍ଟେସନ ମାଧ୍ୟମରେ ଖୁଚୁରା ବ୍ୟବସାୟୀଙ୍କୁ ଡେଲିଭରୀ ପାସ୍ ହସ୍ତାନ୍ତର କରିବ। ମଦ ଦୋକାନ ମାଲିକମାନଙ୍କୁ ପାସ୍ ପାଇବା ପାଇଁ ନିଜ ନିଜ ସ୍ଥାନୀୟ ପୋଲିସ ଷ୍ଟେସନ ନିକଟକୁ ଯିବାକୁ ପଡ଼ିବ | ଗୋଟିଏ ଦୋକାନ କେବଳ ତିନୋଟି ଡେଲିଭରୀ ପାସ୍ ପାଇପାରିବ ବୋଲି ସୂତ୍ରରୁ ପ୍ରକାଶ।

ସୂଚନା ଅନୁଯାୟୀ ଗ୍ରାହକମାନେ ସେମାନଙ୍କର ନିକଟତମ ମଦ ଦୋକାନରେ ଫୋନ୍ ମାଧ୍ୟମରେ ଅର୍ଡର ଦେଇପାରିବେ ଯାହା ପରେ ଖୁଚୁରା ବ୍ୟବସାୟୀମାନେ ଗ୍ରାହକଙ୍କୁ ଷ୍ଟକ୍ ବିତରଣ କରିପାରିବେ। ତେବେ ଏହି ଖବର ଭାଇରାଲ ହେବା ପରେ ବଙ୍ଗଳା ମୁଖ୍ୟ ସଚିବ ରାଜୀବ ସିହ୍ନା ଏକ୍ସାଇଜ୍ ବିଭାଗର ଦାବିକୁ ଖଣ୍ଡନ କରିଛନ୍ତି। ସିହ୍ନା କହିଛନ୍ତି ଯେ ରାଜ୍ୟ ସରକାରଙ୍କ ଦ୍ୱାରା କୌଣସି ଆଦେଶ ଜାରି କରାଯାଇ ନାହିଁ।

ଲକ୍ଷ୍ନୌ: ସାରା ବିଶ୍ୱରେ କରୋନା ମହାମାରୀରୁ ବର୍ତ୍ତିବା ପାଇଁ ଏଯାଏ କୌଣସି ଭ୍ୟାକସିନ୍‌ ତିଆରି ହୋଇ ପାରିନାହିଁ। ଏଭଳି ସ୍ଥିତିରେ କରୋନାରୁ ନିଜକୁ ବଞ୍ଚାଇବାକୁ ହେଲେ ସାମାଜିକ ଦୂରତା ରକ୍ଷା ଏକମାତ୍ର ବିକଳ୍ପ। ତେଣୁ ବାରମ୍ବାର ସରକାର ଲୋକଙ୍କୁ ସାମାଜିକ ଦୂରତା ରକ୍ଷା କରିବା ପାଇଁ ପରାମର୍ଶ ଦେଉଛନ୍ତି। ସରକାରଙ୍କ ଏହି ପରାମର୍ଶ ଜଣେ ବ୍ୟକ୍ତିଙ୍କ ଉପରେ ଏଭଳି ପ୍ରଭାବ ପକାଇଛି ଯେ, ସାମାଜିକ ଦୂରତା ରକ୍ଷା କରିବା ପାଇଁ ସେ ଗଛ ଉପରେ ନିଆରା ଭାବେ ଘର ତିଆରି କରିଥିବା ଦେଖିବାକୁ ମିଳିଛି। ସୂଚନାଯୋଗ୍ୟ, ଉତ୍ତରପ୍ରଦେଶ ହାପୁର ଜିଲାର ଅସୋଧା ଗାଁରେ ରହୁଥିବା ମୁକୁଲ ତ୍ୟାଗି ମହାମାରୀ କରୋନାରୁ ବର୍ତ୍ତିବା ଲାଗି ଏଭଳି ଏକ ଉଦ୍ୟମ କରିଛନ୍ତି।

ସାମାଜିକ ଦୂରତା ରକ୍ଷା କରିବା ପାଇଁ ସେ ଗଛ ଉପରେ ରହିବାକୁ ନିଷ୍ପତ୍ତି ନେଇଥିଲେ। ଏଥିପାଇଁ ମୁକୁଲ ଗଛ ଉପରେ ଏକ ଘର ତିଆରି କରିଛନ୍ତି। ପୁଅର ସହାୟତାରେ ମୁକୁଲ ଗଛର ଡାଳରେ କାଠକୁ କାଠ ଖଞ୍ଜି ଏକପ୍ରକାର ଶେଯ ତିଆରି କରିଛନ୍ତି। ଏଠାରେ ବାପା ରହୁଥିବା ବେଳେ ପ୍ରତିଦିନ ତାଙ୍କ ପାଇଁ ଘରୁ ଖାଇବା ଆସିଥାଏ ବୋଲି ମୁକୁଲଙ୍କ ପୁଅ କହିଛନ୍ତି। ତେବେ ଗଛରେ ଘର ତିଆରି କରିବା ଓ ସେଠାରେ ରହିବା ତାଙ୍କ ପାଇଁ ଏକ ଅଲଗା ଅନୁଭୂତି ବୋଲି ମୁକୁଲ କହିଛନ୍ତି। ସୂଚନା ମୁତାବକ ଉତ୍ତରପ୍ରଦେଶରେ ଏପର୍ଯ୍ୟନ୍ତ ୪ଶହରୁ ଊର୍ଦ୍ଧ୍ୱ କରୋନା ସଂକ୍ରମିତ ରୋଗୀ ଚିହ୍ନଟ ହୋଇଛନ୍ତି।

ଭାରତ କରୋନା ବିରୋଧରେ ଆରପାର୍ ଲଢେଇ ଘୋଷଣା କରିଛି । ୨୧ ଦିନ ଲକଡାଉନ୍ ଅବଧି ବଢାଇବା ପାଇଁ ସରକାର ଚିନ୍ତା କରୁଛନ୍ତି । ଏହା ଭିତରେ ବିହାରରୁ ଏମିତି ଗୋଟିଏ ଖବର ଆସିଛି ଯାହା ବିହାର ପୋଲିସ ସହ କେନ୍ଦ୍ରିୟ ସୁରକ୍ଷା ଏଜେନ୍ସୀଙ୍କ ନିଦ ହଜାଇ ଦେଇଛି । ପଡୋଷୀ ଦେଶ ନେପାଳର ଜଣେ ବ୍ୟକ୍ତି ଭାରତରେ ମହାମାରୀ କରୋନାର ମାରକ ସଂକ୍ରମଣ କରିବାକୁ ଷଡ଼ଯନ୍ତ୍ର କରୁଥିବା ଜଣା ପଡିଛି ।

ବିହାରର ପଶ୍ଚିମ ଚମ୍ପାରଣ ଜିଲ୍ଲାପାଳ ସେଠାରେ ମୁତୟନ ଥିବା ଏସଏସବି ଠାରୁ ମିଳିଥିବା ସୂଚନା ଆଧାରରେ ଏସପିଙ୍କୁ ଚିଠି ଲେଖିଛନ୍ତି । ନେପାଳରେ ରହୁଥିବା ଜାଲିମ୍ ମୁଖିଆ ନାମକ ବ୍ୟକ୍ତି ଭାରତରେ କୋଭିଡ୍-୧୯ ମହାମାରୀ ସଂକ୍ରମଣ ବିସ୍ତାର ପାଇଁ ଯୋଜନା ବନାଉଥିବା ଜିଲ୍ଲାପାଳ ତାଙ୍କ ଚିଠିରେ  କହିଛନ୍ତି ।

ଜାଲିମ୍ ମୁଖିଆ ଭାରତ ଓ ନେପାଳ ମଧ୍ୟରେ ଚାଲିଥିବା ଅସ୍ତ୍ରଶସ୍ତ୍ର ଚୋରାକାରବାରରେ ମଧ୍ୟ ସାମିଲ ଅଛି । ଜାଲିମ ୪୦ରୁ ୫୦ କରୋନା ସନ୍ଦିଗ୍ଧଙ୍କୁ ଭାରତ ଭିତରକୁ ଛାଡିଥିବା କୁହାଯାଉଛି ।

ଜିଲ୍ଲାପାଳ ପୋଲିସ ଅଧିକ୍ଷକଙ୍କୁ ନେପାଳ-ଭାରତ ସୀମାର ସୁରକ୍ଷା ବ୍ୟବସ୍ଥା କଡାକଡି କରିବାକୁ କହିଛନ୍ତି । ସେଠାରେ କୌଣସି ପ୍ରକାରର ସନ୍ଦିଗ୍ଧ ଗତିବିଧି ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଏସପିଙ୍କୁ କୁହାଯାଇଛି ।

ସୂଚନା ଅନୁସାରେ ଜାଲିମ ମୁଖିଆ ନେପାଳର ପାର୍ଷଦ ଜିଲ୍ଲା ସ୍ଥିତ ସେରଖା ଥାନା ଅଧିନରେ ଆସୁଥିବା ଜଗନ୍ନାଥପୁର ଗାଁର ବାସିନ୍ଦା । ଜିଲ୍ଲାପାଳ ପୋଲିସକୁ ସୂଚିତ କରିବା ପରେ ଭାରତ ନେପାଳ ସୀମାରେ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି