କଳାହାଣ୍ଡି: କଳାହାଣ୍ଡି କଲମପୁର ବ୍ଲକ ପାତ୍ରବସା ଗଁ । ନିକଟରେ ଟ୍ରାକ୍ଟର ଓ ବାଇକ୍‌ ମୁହାଁମୁହିଁ ଧକ୍କା  । ଦୁର୍ଘଟଣା ଯୋଗୁ ଜଣେ ମୃତ । ମୃତକ ହେଲେ ପାତ୍ରବସା ଗଁ।ର ବେଲାଳସେନ ନାୟକ । ବେଲାଳସେନଙ୍କ ମୁଣ୍ଡରେ ଗଭିର ଆଘାତ ଲାଗିଥିଲା ।

ପ୍ରବଳ ରକ୍ତ ଶ୍ରାବ ଯୋଗୁ ବେଲାଳସେନଙ୍କ ମୃତ୍ୟୁ ହୋଇଛି । ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ତଦନ୍ତ ଜାରି ରଖିଛି ।

ଜୟପୁର: ଏବେ ଏଟିଏମ୍‌ ବି ଦେଉଛି ଜାଲ୍‌ ଟଙ୍କା । ଜୟପୁର ସହରରେ ଦେଖିବାକୁ ମିଳିଛି ଏଭଳି ଘଟଣା । ସ୍ଥାନୀୟବାସିନ୍ଦା ହିତେଶ ଦାଶ ବ୍ୟାଙ୍କ ଅଫ୍‌ ଇଣ୍ଡିଆରୁ ଉଠାଇଥିଲେ ୩ ଶହ ଟଙ୍କା । ହେଲେ ଏହି ଟଙ୍କା ମଧ୍ୟରେ ଥିଲା ଗୋଟିଏ ଜାଲ୍‌ ଦୁଇଶହ ଟଙ୍କିଆ ନୋଟ୍‌ ।

ଏନେଇ ହିତେଶ ବ୍ୟାଙ୍କ ଅଫ୍‌ ଇଣ୍ଡିଆକୁ ଯାଇ ପଚାରିବାରୁ ଏହାକୁ ନେଇ ତଦନ୍ତ କରାଯିବ ବୋଲି କହିଛନ୍ତି ବ୍ୟାଙ୍କ କର୍ତ୍ତୃପକ୍ଷ । ହେଲେ ଘଟଣାକୁ ବ୍ୟାଙ୍କ କର୍ତ୍ତୃପକ୍ଷ ଗୁରୁତର ସହ ନେଇନଥିବାରୁ ଟାଉନ୍‌ ଥାନାରେ ଅଭିଯୋଗ କରିଛନ୍ତି ହିତେଶ । ଅଭିଯୋଗ ପାଇବା ପରେ ତଦନ୍ତ ଆରମ୍ଭ କରିଛି ପୋଲିସ ।

କେନ୍ଦୁଝର: ପରିବା ବୋଝେଇ ପିକଅପ ଭ୍ୟାନକୁ ପିଟିଲା ଟ୍ରକ । ଦୁର୍ଘଟଣାରେ ୨ ମୃତ, ଜଣେ ଗୁରୁତର । କେନ୍ଦୁଝର ଟାଉନ ଥାନା ନେଙ୍କଡ଼ାଘର ନିକଟରେ ବିଳମ୍ବିତ ରାତିରେ ଘଟିଛି ଦୁର୍ଘଟଣା । ଗାଡ଼ି ଖରାପ ଥିବାରୁ ୨ଟି ପରିବା ବୋଝେଇ ପିକଅପ ଭ୍ୟାନ ରାସ୍ତାରେ ଗାଡ଼ି ସଜାଡ଼ୁଥିଲେ । ତେବେ ସେହି ସମୟରେ ପଛପଟୁ ଏକ ଟ୍ରକ ସେମାନଙ୍କ ଗାଡ଼ିକୁ ଧକ୍କା ଦେଇଥିଲା ।

ଘଟଣାସ୍ଥଳରେ ପିକଅପ ଭ୍ୟାନରେ ଥିବା ୨ ଜଣଙ୍କର ମୃତ୍ୟୁ ହୋଇଥିଲା । ସେହିପରି ଅନ୍ୟ ୨ ଜଣ ଗୁରୁତରଙ୍କୁ କେନ୍ଦୁଝର ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଛି । ଗାଡ଼ିଟି ଯାଜପୁର କୁଆଖାଇରୁ ପରିବା ନେଇ ରାଞ୍ଚି ଅଭିମୁଖେ ଯାଉଥିଲା । ମୃତକଙ୍କ ପରିଚୟ ମିଳିପାରି ନ ଥିବା ବେଳେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।

ପୁରୀ: ପବିତ୍ର ଶ୍ରୀପଞ୍ଚମୀ ଅବସରରେ ଆଜି ସଂନ୍ଧ୍ୟାରେ ଅନୁଷ୍ଠିତ ହେବ ରଥକାଠ ପୂଜା ନୀତି । ପରମ୍ପରା ଅନୁସାରେ ମାଆ ସରସ୍ୱତୀଙ୍କ ପୂଜାର୍ଚ୍ଚନା ପରେ ରଥଖଳାରେ ରଥକାଠ ପୂଜା କରିବେ ରାଜ ପୁରୋହିତ ଓ ବ୍ରାହ୍ମଣ । ନୟାଗଡ଼ ବନଖଣ୍ଡରୁ ଆସିଥିବା ରଥକାଠ ମଧ୍ୟରୁ ତିନୋଟି ୧୨ଫୁଟିଆ ଧଉରା କାଠର ପୂଜା କରାଯିବ ।

ଏ ଅବସରରେ ଘୋଷଯାତ୍ରା ଶାନ୍ତିଶୃଙ୍ଖଳାର ସହ ସମାପନ ପାଇଁ ଶ୍ରୀଜିଉଙ୍କ ପାଖରେ ପ୍ରାର୍ଥନା କରିବେ ରାଜପୁରୋହିତ । ଏଥିପାଇଁ ପୂର୍ବରୁ ୨ଟି ଟ୍ରକରେ ୫୩ଖଣ୍ଡ ଧଉରା ଏବଂ ଅଶନ କାଠ ଶ୍ରୀକ୍ଷେତ୍ର ପହଞ୍ଚିଥିଲା ।

ଭୁବନେଶ୍ୱର: କାଲିଠୁ ଦୁଇଦିନିଆ ବ୍ୟାଙ୍କ ଧର୍ମଘଟ । ବେତନ ବୃଦ୍ଧି ଓ ୧୨ ଦଫା ଦାବି ନେଇ ଧର୍ମଘଟର ଡ଼ାକରା ଦିଆଯାଇଛି । ଫଳରେ ଲଗାତାର ୪ ଦିନ ବନ୍ଦ ରହିବ ବ୍ୟାଙ୍କ । ୩୦ରେ ସରସ୍ୱତୀ ପୂଜା ଛୁଟି, ୩୧ ଓ ୧ ତାରିଖ ଧର୍ମଘଟ ଏବଂ ଫେବ୍ରୁଆରୀ ୨ ରବିବାର ପଡ଼ୁଛି ।

ଧର୍ମଘଟ ସଂପର୍କରେ ସୂଚନା ଦେଇଛି, ୟୁନାଇଟେଡ ଫୋରମ ଅଫ ବ୍ୟାଙ୍କ ୟୁନିୟନ । ସେପଟେ ଦାବି ପୂରଣ ନ ହେଲେ ମାର୍ଚ୍ଚ୧୧ରୁ ୧୩ ପର୍ଯ୍ୟନ୍ତ  ତିନିଦିନିଆ ଧର୍ମଘଟ କରାଯିବ ।

ଏହା ପରେ ଏପ୍ରିଲ ପହିଲାରୁ ଅନିର୍ଦ୍ଦିଷ୍ଟ କାଳ ପାଇଁ ଧର୍ମଘଟ କରିବାକୁ ୟୁନିୟନ ପକ୍ଷରୁ ଚେତାବନୀ ଦିଆଯାଇଛି ।

୨୦ ପ୍ରତିଶତ ବେତନ ବୃଦ୍ଧି, ୫ ଦିନିଆ କାର୍ଯ୍ୟଦିବସ ପରି ଦାବିରେ ଆନ୍ଦୋଳନ ଡ଼ାକରା ଦିଆଯାଇଛି।

ବାରିପଦା: ବାଲି ମାଫିଆଙ୍କ ଗୁଣ୍ଡାରାଜ । ଭାରପ୍ରାପ୍ତ ତହସିଲଦାରଙ୍କ ଉପରେ ମରଣାନ୍ତକ ଆକ୍ରମଣ । ମୟୁରଭଞ୍ଜ ସାରସକଣା ତହସିଲ ପାଣ୍ଡରା ଗାଁର ଅଘଟଣ । ବୁଧବାର ବିଳମ୍ବିତ ରାତିରେ ତହସିଲଦାର ମହିନୀ ନାଏକଙ୍କୁ ମରଣାନ୍ତକ ଆକ୍ରମଣ ହୋଇଛି ।

ଯାହାକୁ ନେଇ ଝାରପୋଖରୀଆ ଥାନାରେ ଅଭିଯୋଗ ହୋଇଛି । ବାଲି ବୋଝେଇ ଟ୍ରକକୁ ସ୍କର୍ପିଓରେ ବସି ପିଛା କରୁଥିବା ବେଳେ ତାଙ୍କ ଗାଡ଼ିକୁ ଟାର୍ଗେଟ କରାଯାଇଥିବା ଅଭିଯୋଗ ହୋଇଛି ।

୭ରୁ ୮ ଦୁର୍ବୃତ୍ତ ଗାଡ଼ି ଭାଙ୍ଗିବା ସବ ଡ୍ରାଇଭର ଓ ତହସିଲଦାରଙ୍କୁ ଆକ୍ରମଣ କରିଛନ୍ତି ।

ଭୁବନେଶ୍ୱର: ଆଜି ହେଉଛି ମା’ ସରସ୍ୱତୀଙ୍କ ପୂଜା। ମାଘ ମାସ ଶୁକ୍ଳ ପକ୍ଷ ପଞ୍ଚମୀ ତିଥୀରେ ଦେବୀଙ୍କ ପୂଜା କରାଯାଉଛି। ଧରାବତରଣ କରିଛନ୍ତି ବୀଣାପାଣି। ପୂଜା ମଣ୍ଡପ ଠାରୁ ଆରମ୍ଭ କରି ବିଭିନ୍ନ ଶିକ୍ଷା ଅନୁଷ୍ଠାନରେ ବିଦ୍ୟାଦାତ୍ରୀ ଦେବୀ ମା’ ସରସ୍ୱତୀଙ୍କ ଆରାଧନା କରାଯାଉଛି।

ପୂଜା ପାଇଁ ବ୍ୟାପକ ଆୟୋଜନ କରାଯାଇଛି। ପୁଷ୍ପ।ଞ୍ଜଳି ସହ ପରମ୍ପରା ଅନୁସାରେ ଦେବୀଙ୍କ ପୂଜାର୍ଚ୍ଚନା କରାଯାଉଛି। ବିଦ୍ୟାଦାୟିନୀ ମା’ଙ୍କ ଆଶିଷ ପାଇଁ ବିଭିନ୍ନ ସ୍ଥାନରେ ଆରାଧନା କରାଯାଉଛି।…