ଲକ୍ଷ୍ନୌ: ଅଯୋଧ୍ୟାରେ ଲଜ୍ଜା । ପ୍ରେମ ପାଇଁ କଟିଲା ନାକ । ବର୍ବରୋଚିତ ବ୍ୟବହାରର ଆଉ ଏକ ଘଟଣା ଦେଖିବାକୁ ମିଳିଛି ଉତ୍ତର ପ୍ରଦେଶର ଅଯୋଧ୍ୟାରେ । ରାମ ଜନ୍ମଭୂମି ଅଯୋଧ୍ୟା ରାମ ମନ୍ଦିରକୁ ନେଇ ଚର୍ଚ୍ଚାକୁ ଆସୁଥିବା ବେଳେ ଏକ ଅଜବ ଘଟଣା ପାଇଁ ପୁଣି ଶିରୋନାମା ପାଲଟିଛି । ପର ପୁରୁଷ ସହ ଧରାପଡ଼ି ନାକ ହରାଇଛନ୍ତି ବିବାହିତା ମହିଳା । ସଭ୍ୟ ସମାଜର କିଛି ଅସଭ୍ୟ ଲୋକ ମହିଳାଙ୍କ ସହ ଉକ୍ତ ଯୁବକଙ୍କ ନାକକୁ କାଟି ଦେଇଛନ୍ତି । କୁହାଯାଉଛି ମହିଳାଙ୍କ ସହ ଥିବା ଯୁବକ ଜଣକ ଅନ୍ୟ ଏକ ସମ୍ପଦାୟର । ଅଯୋଧ୍ୟା ପୋଲିସ ମାମଲାର ତଦନ୍ତ କରୁଛି ।
ପଟରଙ୍ଗା ଥାନା ପିପରା ଗାଁର ଜଣେ ୩୦ ବର୍ଷୀୟ ମହିଳାଙ୍କୁ ପ୍ରେମିକଙ୍କ ସହ ଦେଖି ପରିବାର ଲୋକ ରାଗି ଯାଇଥିଲେ । ଦୁହିଁଙ୍କ ସମ୍ପର୍କ ବିଷୟରେ ଜାଣିବା ପରେ ଉଭୟଙ୍କ ନାକ କାଟି ଦେଇଥିଲେ । ଉଭୟଙ୍କ ଅବସ୍ଥା ଗୁରୁତର ହେବାରୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି ।
ମଙ୍ଗଳବାର ଉଭୟଙ୍କୁ ଆପତ୍ତିଜନକ ଅବସ୍ଥାରେ ଗାଁ ଲୋକ ଧରିଥିଲେ । ତାପରେ ଆରମ୍ଭ ହୋଇଥିଲା ବର୍ବରତା । ଦୁହିଁଙ୍କୁ ଦଉଡ଼ିରେ ବାନ୍ଧିଦେଇ ନିର୍ଧୁମ ପିଟିବା ସହ ନାକ କାଟିଦେଇଥିଲେ ।
ପ୍ରେମିକଙ୍କ ସହ ଧରାପଡ଼ିଲେ ବିବାହିତା ମହିଳା, ଦୁହିଁଙ୍କ ନାକ କାଟିଦେଲେ ଲୋକ
ଢେଙ୍କାନାଳ: ଭାପୁର ଗୋହିରାଖାଲ ରାସ୍ତାରେ ବାଇକ୍-ବସ୍ ମୁହାଁମୁହିଁ ଧକ୍କା, ୨ ମୃତ । ମୃତକ ସାଲେପୁର ଅଞ୍ଚଳର ପ୍ରତାପ ଷଡ଼ଙ୍ଗୀ ଓ ପ୍ରୀତମ ଷଡ଼ଙ୍ଗୀ । ଉଭୟ ସମ୍ପର୍କୀୟଙ୍କ ଏକାଦଶାହ କାମରେ ଯୋଗ ଦେବା ପାଇଁ ଆସୁଥିବା ବେଳେ ଦୁର୍ଘଟଣା ।
ଢେଙ୍କାନାଳ: ଭାପୁର ଗୋହିରାଖାଲ ରାସ୍ତାରେ ବାଇକ୍-ବସ୍ ମୁହାଁମୁହିଁ ଧକ୍କା, ୨ ମୃତ । ମୃତକ ସାଲେପୁର ଅଞ୍ଚଳର ପ୍ରତାପ ଷଡ଼ଙ୍ଗୀ ଓ ପ୍ରୀତମ ଷଡ଼ଙ୍ଗୀ । ଉଭୟ ସମ୍ପର୍କୀୟଙ୍କ ଏକାଦଶାହ କାମରେ ଯୋଗ ଦେବା ପାଇଁ ଆସୁଥିବା ବେଳେ ଦୁର୍ଘଟଣା ।
କଟକ: ଆଚାର୍ଯ୍ୟ ହରିହର କର୍କଟ ରୋଗ ପ୍ରତିଷ୍ଠାନର ହେବ ନବ କଳେବର । ତିଆରି ହେବ ନୂତନ ବିଲ୍ଡିଂ । ୪୨୧ ଶଯ୍ୟା ହେବ, ୧୦ଟି ଆଇସିୟୁ ବେଡ ରହିବ ବୋଲି ଘୋଷଣା କଲେ ସ୍ୱାସ୍ଥମନ୍ତ୍ରୀ ନବ ଦାସ ।
କଟକ: ଆଚାର୍ଯ୍ୟ ହରିହର କର୍କଟ ରୋଗ ପ୍ରତିଷ୍ଠାନର ହେବ ନବ କଳେବର । ତିଆରି ହେବ ନୂତନ ବିଲ୍ଡିଂ । ୪୨୧ ଶଯ୍ୟା ହେବ, ୧୦ଟି ଆଇସିୟୁ ବେଡ ରହିବ ବୋଲି ଘୋଷଣା କଲେ ସ୍ୱାସ୍ଥମନ୍ତ୍ରୀ ନବ ଦାସ ।
ବାଲେଶ୍ୱର: ହରି ପ୍ଲାଜା ନିକଟରୁ ୨ ଜଣ ବ୍ରାଉନ ସୁଗର ମାଫିଆକୁ ଗିରଫ କଲା STF । ୩୦୧ ଗ୍ରାମର ବ୍ରାଉନ ସୁଗର, ବୁଲେଟ୍ , ୨ ଲକ୍ଷ ୨ ହଜାର ଟଙ୍କା, ୩ଟି ମୋବାଇଲ୍, ଏଟିଏମ ଜବତ । ଗିରଫ ମାଫିଆ ଶେଖ୍ ହାଇଦର ଓ ତନ୍ମୟ ଭୂୟାଁ ।
ବାଲେଶ୍ୱର: ହରି ପ୍ଲାଜା ନିକଟରୁ ୨ ଜଣ ବ୍ରାଉନ ସୁଗର ମାଫିଆକୁ ଗିରଫ କଲା STF । ୩୦୧ ଗ୍ରାମର ବ୍ରାଉନ ସୁଗର, ବୁଲେଟ୍ , ୨ ଲକ୍ଷ ୨ ହଜାର ଟଙ୍କା, ୩ଟି ମୋବାଇଲ୍, ଏଟିଏମ ଜବତ । ଗିରଫ ମାଫିଆ ଶେଖ୍ ହାଇଦର ଓ ତନ୍ମୟ ଭୂୟାଁ ।
ଏବେ ଯାଏଁ ୧୦୬ ଜଣଙ୍କ ମୃତ୍ୟୁ; ସାମାନ୍ୟ ଥଣ୍ଡା ନା କରୋନା ଭାଇରସ୍, ଲୋକଙ୍କ ମଧ୍ୟରେ ଆତଙ୍କ
ନୂଆଦିଲ୍ଲୀ: କରୋନା ଭାଇରସ୍ । ଏହି ଗୋଟିଏ ଶବ୍ଦ ଚୀନ ସହିତ ଅନ୍ୟ ଦେଶଗୁଡ଼ିକର ନିଦ ହଜାଇ ଦେଇଛି । ଏଥିରେ ବର୍ତ୍ତମାନ ଯାଏ ୧୦୬ ଜଣ ଲୋକଙ୍କ ମୃତ୍ୟୁ ହେଲାଣି । ଚୀନର ବୁହାନରୁ ଚିହ୍ନଟ ହୋଇଥିବା ଏହି ଭାଇରସ ୧୨ରୁ ଅଧିକ ଦେଶରେ କାୟା ବିସ୍ତାର କରିସାରିଲାଣି । ମୁମ୍ବାଇ, ଜୟପୁର ପରେ ଦିଲ୍ଲୀରେ ଏହାର ସନ୍ଦିଗ୍ଧ ମାମଲା ନଜର ଆସିଛି । ଯାହାକୁ ନେଇ ଲୋକଙ୍କ ମଧ୍ୟରେ ଆତଙ୍କ ଖେଳିଯାଇଛି । ତେବେ, ଆପଣଙ୍କୁ କରୋନା ନା ସାଧାରଣ ଥଣ୍ଡା ହୋଇଛି । ଏହା ଜାଣିବାର ମୁଖ୍ୟ ଉପାୟ ହେଉଛି ଆପଣଙ୍କ ଟ୍ରାଭେଲ ହିଷ୍ଟ୍ରୀ ମାନେ ଯାତ୍ରା ବିବରଣୀ ।
ଆମ ଦେଶରେ ବର୍ତ୍ତମାନ ଯାଏଁ କରୋନା ଭାଇରସକୁ ନେଇ କୌଣସି ପଜିଟିଭ୍ କେସ୍ ସାମନାକୁ ଆସିନାହିଁ । କିନ୍ତୁ, ବଦଳୁଥିବା ପାଣିପାଗ ଲୋକଙ୍କ ମନରେ ଭୟ ସୃଷ୍ଟି କରିଛି । ସାଧାରଣ ଥଣ୍ଡା ଜ୍ୱର, କାଶକୁ ମଧ୍ୟ ଲୋକ କରୋନା ଭାବୁଛନ୍ତି । କାରଣ କରୋନାର ଲକ୍ଷଣ ବିଲକୁଲ୍ ଏମିତି । ଡାକ୍ତରଙ୍କ କହିବା ଅନୁଯାୟୀ କରୋନା ଆରମ୍ଭରୁ ସାମାନ୍ୟ ଥଣ୍ଡା ଜ୍ୱର ହୁଏ । ପରେ ନିଶ୍ୱାସ ପ୍ରଶ୍ୱାସ ନେବା ଆଣିବାରେ ଅସୁବିଧା, ହାତ ଗୋଡ଼ ଦରଜ ହେଲେ ଏହାକୁ ବିପଜ୍ଜନକ କୁହାଯାଏ । ପରେ ଏହା ନିମୋନିଆ ସହ କିଡନୀ ଅଚଳ କରିଦେବା ସହ ମୃତ୍ୟୁମୁଖରେ ପକାଇପାରେ ।
କେଉଁଠି କେତେ ମାମଲା ?
| ଦେଶ | ବର୍ତ୍ତମାନ ଯାଏଁ |
| ଚୀନ (ବୁହାନ) | ୨,୭୪୪ |
| ନେପାଳ | ୧ |
| ଥାଇଲାଣ୍ଡ | ୫ |
| ମାଲେସିଆ | ୪ |
| ସିଙ୍ଗାପୁର | ୪ |
| ଦକ୍ଷିଣ କୋରିଆ | ୪ |
| ଜାପାନ | ୪ |
| ତାଇୱାନ୍ | ୩ |
| ଭିଏତନାମ | ୨ |
| ଅଷ୍ଟ୍ରେଲିଆ | ୫ |
| କାନାଡ଼ା | ୧ |
| ଫ୍ରାନ୍ସ | ୩ |
| ଆମେରିକା | ୫ |
କରୋନା କଣ ?
ଅନ୍ୟ ଭୂତାଣୁ ଭଳି କରୋନା ଭାଇରସ ଜଣଙ୍କ ଠାରୁ ଅନ୍ୟ ଜଣଙ୍କୁ ବ୍ୟାପେ । ଚୀନରୁ ଏହାକୁ ଚିହ୍ନଟ କରାଯାଇଥିବା ବେଳେ ଚୀନରୁ ଆସୁଥିବା ଅନ୍ୟ ଦେଶର ଯାତ୍ରୀଙ୍କ ଦ୍ୱାରା ବିଭିନ୍ନ ଦେଶରେ ଏହି ଭୂତାଣୁ ବ୍ୟାପିବାରେ ଲାଗିଛି । ଏହି ଭାଇରସ୍ ସମୁଦ୍ରରେ ଥିବା ଜୀବଜନ୍ତୁଙ୍କ ଠାରୁ ଚୀନର ଲୋକଙ୍କ ଶରୀରକୁ ପ୍ରବେଶ କରିଛି ।
କରୋନାର ସାଧାରଣ ଲକ୍ଷଣ
- ଜ୍ୱର
- ନିଶ୍ୱାସ ପ୍ରଶ୍ୱାସରେ କଷ୍ଟ ଅନୁଭବ
- ଥଣ୍ଡା
- କାଶ
- ନାକରୁ ନିୟମିତ ପାଣି ବାହାରିବା
- ହାତଗୋଡ଼ (ଶୀର) ଦରଜ
- କୌଣସି ଅଙ୍ଗ କାମ କରିବା ବନ୍ଦ କରିଦେବା
କାଶ, ଥଣ୍ଡା କରୋନା ନୁହେଁ ତ ?
ଆପଣଙ୍କୁ ହୋଇଥିବା ଥଣ୍ଡା, କାଶ କରୋନା ନୁହେଁ ତ ? ଏହାକୁ ଚିହ୍ନଟ କରିବା ପାଇଁ ବର୍ତ୍ତମାନ ଅଧିକ ପ୍ରକ୍ରିୟା ବାହାରିନାହିଁ । କେବଳ ଚୀନରୁ ଆସଥିବା ବ୍ୟକ୍ତି ଓ ତାଙ୍କ ସହ ସମ୍ପର୍କରେ ଆସିଥିବା ଲୋକଙ୍କୁ ଥଣ୍ଡା, କାଶ ହେଲେ ଏହା କରୋନାର ଲକ୍ଷଣ ହୋଇପାରେ ।
କଣ କରିବେ ?
କରୋନା ଭାଇରସରୁ ବର୍ତ୍ତିବା ପାଇଁ ଯଥାସମ୍ଭବ ଭିଡ଼ ସ୍ଥାନକୁ ଯାଆନ୍ତୁ ନାହିଁ । କାରଣ ଜଣଙ୍କ ଠାରୁ ଅନ୍ୟ ଜଣଙ୍କୁ ବ୍ୟାପିଥାଏ । ଡାକ୍ତରଙ୍କ କହିବା ଅନୁଯାୟୀ କୁଆଡ଼େ ଯାଉଥିଲେ ମାସ୍କ ପିନ୍ଧନ୍ତୁ । ଏହା ଭୂତାଣୁକୁ ଆପଣଙ୍କ ଶରୀରଠାରୁ ଦୂରେଇ ରଖିବାରେ ସହାୟକ ହେବ । କରୋନା ପାଇଁ ବର୍ତ୍ତମାନ କୌଣସି ଟୀକା ବାହାରି ନାହିଁ ।
ଗୁଜୁରାଟ ଦଙ୍ଗାର ୧୭ ଦୋଷୀଙ୍କୁ ଜାମିନ: ସାମାଜିକ ଓ ଧାର୍ମିକ କାମ କରିବାକୁ ସୁପ୍ରିମକୋର୍ଟଙ୍କ ନିର୍ଦ୍ଦେଶ
ନୂଆଦିଲ୍ଲୀ: ୨୦୦୨ ଗୁଜୁରାଟ ଦଙ୍ଗା ମାମଲାର ୧୭ ଜଣ ଅଭିଯୁକ୍ତଙ୍କୁ ସର୍ତ୍ତମୂଳକ ଜାମିନ ପ୍ରଦାନ କରିଛନ୍ତି ମାନ୍ୟବର ସୁପ୍ରିମକୋର୍ଟ । ୧୭ ଜଣ ଦୋଷୀଙ୍କୁ ୨ଟି ବ୍ୟାଚ୍ରେ ବିଭକ୍ତ କରାଇବ ସହ ଗୋଟିଏ ବ୍ୟାଚ୍କୁ ଇନ୍ଦୋର ଓ ଅନ୍ୟ ଏକ ବ୍ୟାଚ୍କୁ ଜବଲପୁର ପଠାଯାଇଛି । ମାନ୍ୟବର କୋର୍ଟ ସମସ୍ତ ଦୋଷୀଙ୍କୁ ଜାମିନରେ ରହିବ ସମୟରେ ସାମାଜିକ ଓ ଧାର୍ମିକ କାମ କରିବାକୁ ନିର୍ଦ୍ଦେଶ ଦେଇଛନ୍ତି ।
ଇନ୍ଦୋର ଏବଂ ଜବଲପୁରରେ ଦୋଷୀମାନଙ୍କ ଦ୍ୱାରା ସାମାଜିକ ଓ ଧାର୍ମିକ କାର୍ଯ୍ୟ କରାଯିବା ନେଇ ନିଶ୍ଚିତ କରାଇବାକୁ ବିଧିକ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି ମାନ୍ୟବର କୋର୍ଟ । ଏଥିସହିତ ଜାମିନ ସମୟରେ ଦୋଷୀଙ୍କ ଆଚରଣ ଉପରେ ମଧ୍ୟ ରିପୋର୍ଟ ଦେବାକୁ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି ।
ସୂଚନା ଯୋଗ୍ୟ ଗ୍ରୋଧା ପରେ ଗୁଜୁରାଟ ଅନେକ ସ୍ଥାନରେ ଦଙ୍ଗା ହୋଇଥିଲା । ଯେଉଁଥିରେ ୩୩ ଜଣ ପ୍ରାଣ ହରାଇଥିଲେ ।ସର୍ବୋଚ୍ଚ ନ୍ୟାୟଳୟ ଆଦେଶ ଦେଇଛନ୍ତି ଯେ, ଏ ସମସ୍ତ ଦୋଷୀଙ୍କୁ ସାମାଜିକ କାର୍ଯ୍ୟରେ ସହଯୋଗ କରିବାକୁ ପଡ଼ିବ । ଏହି ଦୋଷୀମାନଙ୍କୁ ସପ୍ତାହକ ମଧ୍ୟରେ ଅତି କମ୍ରେ ୬ ଘଣ୍ଟା କାର୍ଯ୍ୟ କରିବାକୁ ପଡ଼ିବ । ଜାମିନ ବେଳେ ଏହା ମଧ୍ୟ ସର୍ତ୍ତ ରଖାଯାଇଛି ଯେ, ସେମାନେ ସ୍ଥାନୀୟ ପୋଲିସ ଷ୍ଟେସନ୍କୁ ହାଜିରା ପାଇଁ ଆସିବେ । ଏଥିସହିତ ସୁପ୍ରିମକୋର୍ଟ ଜାମନର ସର୍ତ୍ତଗୁଡ଼ିକ ଦୋଷୀଙ୍କ ଦ୍ୱାରା ପାଳନ କରାଯାଉଛି କି ନାହିଁ ତାହା ସୁନିଶ୍ଚିତ କରିବାକୁ ଇନ୍ଦୋର ଓ ଜବଲପୁରର ଡିଷ୍ଟ୍ରିକ୍ଟ ଲିଗାଲ୍ ସବଜଜ୍ ଅଥୋରିଟିଙ୍କୁ ନିର୍ଦ୍ଦେଶ ଦେଇଛନ୍ତି
ରାଜ୍ୟସ୍ତରୀୟ କରୋନା ସଚେତନତା କର୍ମଶାଳା, ଚାଇନାରୁ ଆସିଥିବା ଟେକ୍ନିସିଆନ୍ଙ୍କ ଉପରେ ରହିବ ନଜର
ଭୁବନେଶ୍ୱର: କରୋନା ମୁକାବିଲା ପାଇଁ ରାଜ୍ୟସ୍ତରୀୟ ସଚେତନତା କର୍ମଶାଳା । ସ୍ୱାସ୍ଥ୍ୟ ବିଭାଗ ପ୍ରମୁଖ ସଚିବ ନିକୁଞ୍ଜ ବିହାରୀ ଧଳଙ୍କ ଅଧ୍ୟକ୍ଷତାରେ ମେଡିକାଲ ସୁପରିଟେଣ୍ଡେଣ୍ଟ ଓ ଜିଲ୍ଲା ମୁଖ୍ୟ ଚିକିତ୍ସାଳୟ ହସପିଟାଲ ମ୍ୟାନେଜରଙ୍କୁ ସଚେତନ କରାଯାଉଛି । କରୋନା ସଂକ୍ରମଣ ସନ୍ଦେହ ଥିଲେ, କିପରି ୩ଟି ପର୍ଯ୍ୟାୟରେ ରୋଗୀଙ୍କୁ ଚିକିତ୍ସା ସୁବିଧା ଦିଆଯିବ, ସେନେଇ ଅବଗତ କରାଯାଉଛି ।
ଚାଇନାରୁ ଆସୁଥିବା ଲୋକଙ୍କର କିପରି ଯତ୍ନ ନିଆଯିବ, ତାଉପରେ ଗୁରୁତ୍ୱ ଦିଆଯାଉଛି । କରୋନା ଯାଞ୍ଚ ପାଇଁ ପୂର୍ବରୁ ଦେଶର ୧୯ଟି ବିମାନବନ୍ଦର ଚିହ୍ନଟ ହୋଇଥିଲା ।
ରାଜ୍ୟ ସରକାରଙ୍କ ଅନୁରୋଧ ପରେ ଭୁବନେଶ୍ୱର ବିମାନବନ୍ଦର ବି ଏଥିରେ ସାମିଲ ହୋଇଛି । କରୋନା ଭୁତାଣୁ ରକ୍ତ ନମୁନା ପରୀକ୍ଷଣ ପାଇଁ ଏନ୍ଆଇଭି ପୁନେ ସମେତ ଦେଶର ୧୦ଟି ଲ୍ୟାବ୍ ଚିହ୍ନଟ କରିଛି କେନ୍ଦ୍ର ସ୍ୱାସ୍ଥ୍ୟ ବିଭାଗ ।
ଓଡ଼ିଶାର ଆର୍ଏମ୍ଆର୍ସି ବି ଏଥିରେ ସାମିଲ ହୋଇଛି । ସେପଟେ ଭୁବନେଶ୍ୱର ଭିଭୋ ଓ ଓପୋ ଅଫିସର ଚାଇନାରୁ ଆସିଥିବା ଟେକ୍ନିସିଆନ୍ଙ୍କ ଉପରେ ନଜର ରଖାଯିବ ବୋଲି ସ୍ୱାସ୍ଥ୍ୟ ବିଭାଗ ପ୍ରମୁଖ ସଚିବ ନିକୁଞ୍ଜ ବିହାରୀ ଧଳ ସୂଚନା ଦେଇଛନ୍ତି ।
ମହିଳା ଆଇନଜୀବୀ ଦୀପାଳିଙ୍କ ରହସ୍ୟ ଜନକ ମୃତ୍ୟୁ ମାମଲା: ପୁରୁଷ ବନ୍ଧୁଙ୍କ ଆତ୍ମସମର୍ପଣ
ଭୁବନେଶ୍ୱର: ମହିଳା ଆଇନଜୀବୀ ଦୀପାଳିଙ୍କ ରହସ୍ୟ ଜନକ ମୃତ୍ୟୁ ମାମଲା । ମୃତ ଦୀପାଳିଙ୍କ ପୁରୁଷ ବନ୍ଧୁ ବିକ୍ରମ ମିଶ୍ରଙ୍କ ଆତ୍ମସମର୍ପଣ । ଖୋର୍ଦ୍ଧା ଜିଲ୍ଲା ଦୌରାଜଜ୍ କୋର୍ଟରେ ଆତ୍ମସମର୍ପଣ କରିଛନ୍ତି ବିକ୍ରମ ମିଶ୍ର । ଦୀର୍ଘ ୪ମାସ ପରେ ପୋଲିସ ନିକଟରେ ଆତ୍ମସମର୍ପଣ କରିଥିବା ସୂଚନା ମିଳିଛି । ପୁରୁଷ ବନ୍ଧୁ ହିଁ ତାଙ୍କୁ ହତ୍ୟା କରିଥିବା ପୋଲିସ ପୂର୍ବରୁ ସନ୍ଦେହ କରୁଥିଲା । ତେବେ ପୁଲିସ ଗିରଫଦାରୀ ଭୟରେ ବିକ୍ରମ ହାଇକୋର୍ଟଙ୍କ ଦ୍ଵାରସ୍ଥ ହୋଇଥିଲେ । କିନ୍ତୁ ହାଇକୋର୍ଟ ତାଙ୍କୁ ତଳକୋର୍ଟରେ ହାଜର ହେବାକୁ ନିର୍ଦ୍ଦେଶ ଦେଇଥିଲେ ।
ଅକ୍ଟୋବର ୨୦ରେ ଲିଙ୍ଗିପୁର ଭଡାଘରୁ ଆଇନଜୀବୀ ଦୀପାଳିଙ୍କ ମୃତ ଦେହ ଉଦ୍ଧାର କରାଯାଇଥିଲା । ଝୁଲନ୍ତା ଅବସ୍ଥାରେ ତାଙ୍କର ମୃତ ଦେହ ଉଦ୍ଧାର କରାଯାଇଥିବା ବେଳେ ପୁରୁଷ ବନ୍ଧୁ ବିକ୍ରମ ଫେରାର ହୋଇଯାଇଥିଲା ।
ବିଜେଡି ସଂସଦୀୟ ଦଳ ବୈଠକ ଶେଷ: ରେଳ ପ୍ରକଳ୍ପ ପାଇଁ ଅଧିକ ଅର୍ଥ ଦାବି କରିବ ଓଡ଼ିଶା
ଭୁବନେଶ୍ୱର: ସଂସଦରେ ବିଜେଡି ଉଠାଇବ ମହାନଦୀ ଓ ପୋଲାଭରମ୍ ପ୍ରସଙ୍ଗ । ରେଳ ପ୍ରକଳ୍ପ ପାଇଁ ଅଧିକ ଅର୍ଥ ଦେବାକୁ ଦାବି କରାଯିବ । ‘ଏନ୍ପିଆର ରେ ସଂଶୋଧନ ପ୍ରସ୍ତାବ ଦିଆଯାଇଥିଲା । ଏସ୍ସି/ଏସ୍ଟି ଙ୍କ ସହ ଓବିସିଙ୍କୁ ମଧ୍ୟ ଚିହ୍ନଟ କରିବାକୁ ଦାବି କରାଯାଇଛି।
ସେହିପରି ବିଧାନ ପରିଷଦ ନେଇ ପ୍ରତିଶ୍ରୁତି ମିଳିଥିବା ସାଂସଦ ପିନାକୀ ମିଶ୍ର କହିଛନ୍ତି । ୩୧ ତାରିଖରୁ ସଂସଦର ବଜେଟ୍ ଅଧିବେଶନ ଆରମ୍ଭ ହେଉଛି ।
ଏହା ପୂର୍ବରୁ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ବିଜେଡି ସଂସଦୀୟ ଦଳ ବୈଠକ ବସିଥିଲା । ବୈଠକ ପରେ ବଜେଟ୍ ଅଧିବେଶନରେ ବିଜେଡିର ଆଭିମୁଖ୍ୟ ନେଇ ବିଜେଡି ସାଂସଦ ପିନାକୀ ମିଶ୍ର ସୂଚନା ଦେଇଛନ୍ତି।
ଅନୁରାଗ ଠାକୁରଙ୍କ ବିବାଦୀୟ ବୟାନ୍ ଉପରେ ରିପୋର୍ଟ ମାଗିଲେ ନିର୍ବାଚନ କମିଶନ
ନୂଆଦିଲ୍ଲୀ: ବିଜେପି ନେତା ତଥା କେନ୍ଦ୍ର ମନ୍ତ୍ରୀ ଅନୁରାଗ ଠାକୁରଙ୍କ ବିବାଦୀୟ ମନ୍ତବ୍ୟ ନେଇ ରିପୋର୍ଟ ମାଗିଛନ୍ତି ନିର୍ବାଚନ କମିଶନର । ସ୍ଥାନୀୟ ଅଧିକାରୀଙ୍କଠାରୁ ଏ ସମ୍ପର୍କିତ ରିପୋର୍ଟ ମାଗିଛନ୍ତି ଆୟୋଗ । ଦିଲ୍ଲୀ ବିଧାନସଭା ନିର୍ବାଚନ ପ୍ରଚାର ସମୟରେ ବିବାଦୀୟ ମନ୍ତବ୍ୟ ଦେଇଥିଲେ ଅନୁରାଗ । ଏ ନେଇ ଏକ ଭିଡିଓ ସୋସିଆଲ ମିଡିଆରେ ଭାଇରଲ ହେବାରେ ଲାଗିଛି । ଆଉ ଏବେ ଏହାକୁ ନେଇ ଦେଖାଦେଇଛି ତୀବ୍ର ବିରୋଧ । ଏହି ଭିଡିଓରେ ଅନୁରାଗ ‘ଦେଶ କେ ଗଦ୍ଦାରକୋ ….’ ଅର୍ଥାତ ଦେଶଦ୍ରୋହୀଙ୍କୁ ଗୁଳିମାର ବୋଲି କହୁଥିବା ଦେଖିବାକୁ ମିଳିଛି । ଏକ ନିର୍ବଚାନୀ ସଭାରେ ଏଭଳି କହିଛନ୍ତି ଅନୁରାଗ ଠାକୁର । ଖବର ସରବରାହ ସଂସ୍ଥା ଏଏନ୍ଆଇ ଅନୁସାରେ ଏହି ଭାଷଣକୁ ନେଇ ବିରୋଧ ପରେ ମୁଖ୍ୟ ନିର୍ବାଚନ ଅଧିକାରୀ ଦିଲ୍ଲୀର ରିଠାଲା ବିଧାନସଭା ସିଟର ରିଟଣ୍ଣିଂ ଅଫିସରଙ୍କ ଠାରୁ ଏ ସମ୍ପର୍କରେ ରିପୋର୍ଟ ମାଗିଛନ୍ତି ।