ବାରିପଦା: ବିବାହ ଭୋଜି ଖାଇ ୧୫୦ରୁ ଅଧିକ ଲୋକ ଝାଡ଼ାବାନ୍ତିରେ ଆକ୍ରାନ୍ତ ।

ବାରିପଦା ଷ୍ଟେସନ ବଜାରରେ ଏକ ବିବାହ ଭୋଜିରେ ଖାଇବା ପରେ ଲୋକମାନଙ୍କର ପେଟ ବ୍ୟଥା ହୋଇଥିଲା ।

ଝାଡ଼ାବାନ୍ତି ହେବା ପରେ ସେମାନଙ୍କୁ ମେଡିକାଲରେ ଭର୍ତ୍ତି କରାଯାଇଥିଲା । କିଛି ଲୋକଙ୍କୁ ଚିକିତ୍ସା ପରେ ଛାଡ଼ି ଦିଆଯାଇଥିବା ବେଳେ ଆହୁରି ବହୁ ଶିଶୁ ଚିକିତ୍ସାଧୀନ ଅଛନ୍ତି । ସମସ୍ତେ ବିପଦମୁକ୍ତ ଥିବା ଡାକ୍ତର କହିଛନ୍ତି ।

ଗଞ୍ଜାମ: ପୁଣି ବାଳାଶ୍ରମରୁ ଅନ୍ତେବାସୀ ନିଖୋଜ । ବ୍ରହ୍ମପୁର ବାଳାଶ୍ରମରୁ କିଛିଦିନ ତଳେ ୧୩ଜଣ ନାବାଳିକା ନିଖୋଜ ହୋଇଯାଇଥିବା ବେଳେ ଏପର୍ଯ୍ୟନ୍ତ ୬ଜଣଙ୍କ ପତ୍ତା ମିଳିନାହିଁ । ଆଜି ଗଞ୍ଜାମ ଜିଲ୍ଲା ସୋରଡ଼ାରେ ଥିବା ଆର୍‌ସିଏମ୍‌ ବାଳକ ଆଶ୍ରମରୁ ଜଣେ ଅନ୍ତେବାସୀ ନିଖୋଜ ହୋଇ ଯାଇଛନ୍ତି । ସମ୍ବଲପୁର ଅଞ୍ଚଳର ମହମ୍ମଦ ଆରିଫ୍‌ ଏଠାରେ ରହି ଅଷ୍ଟମ ଶ୍ରେଣୀରେ ପଢୁଥିଲେ । ଆଜି ସାକାଳୁ ସେ ନିଖୋଜ ହୋଇ ଯାଇଛନ୍ତି । ଆଖପାଖରେ ଖୋଜାଖୋଜି ପରେ ବି ତାଙ୍କ ପତ୍ତା ମିଳିନାହିଁ ।

ନୟାଗଡ଼: ଜୁଆ ଆଡ୍ଡା ଉପରେ ଚଢ଼ାଉ । ନୟାଗଡ଼ ଦଶପଲା ଦୁଆରଗାଁରେ ଜୁଆ ଖେଳ ଚାଲିଥିବା ଖବରପାଇ ଅଚାନକ ଚଢ଼ାଉ କରିଥିଲା ଦଶପଲା ପୋଲିସ । ଏଥିରେ ୬ ଜଣ ଜୁଆଡ଼ି ଗିରଫ ହୋଇଛନ୍ତି ।

ସେମାନଙ୍କ ନିକଟରୁ ୧୪ ହଜଜାର ୯୮୦ ଟଙ୍କା, ଟି ମୋବାଇଲ ଫୋନ୍‌ ଓ ଗୋଟିଏ ହୁଣ୍ଡାଇ କାର ଜବତ କରିଛି ପୋଲିସ । ଗିରଫ ଜୁଆଡ଼ିଙ୍କ ମଧ୍ୟରୁ ଦୁଇ ଜଣ କଟକ ଜିଲ୍ଲା ନରସିଂହପୁରର ହୋଇଥିବା ବେଳେ ସୋରଡ଼ା ଅଞ୍ଚଳର ଜଣେ ଓ ଦଶପଲା ଥାନା ଞ୍ଚଳର ୩ ଜଣ ବୋଲି ଜଣାପଡ଼ିଛି । ଏମାନଙ୍କ ନାଁରେ ପୂର୍ବରୁ ମାମଲା ଥିବା ଦଶପଲା ଆଇଆଇସି କହିଛନ୍ତି ।

ବଲାଙ୍ଗିର: ବଲାଙ୍ଗିର ସୁଦପଡାରେ ଥିବା ସଖୀ ସେଣ୍ଟରରେ ଜଣେ ମହିଳାଙ୍କ ଆତ୍ମହତ୍ୟା । ମହିଳାଙ୍କ ଘର ଗଞ୍ଜାମ ଜିଲ୍ଲାରେ ହୋଇଥିବା ଜଣାପଡ଼ିଛି । ଘଟଣା ସ୍ଥଳରୁ ପୋଲିସ ମହିଳାଙ୍କ ସୁଇସାଇଡ୍‌ ନୋଟ୍‌ ଜବତ କରିଛି ।

ବଲାଙ୍ଗିର ଟିକ୍ରାପଡାର ଅନିଲ ନାୟକଙ୍କ ସହ ପ୍ରେମ ସଂପର୍କ ପରେ ସେ ବଲାଙ୍ଗିର ଆସିଥିଲେ । ତେବେ ଅନିଲ ତାଙ୍କୁ ପ୍ରତାରଣା କରିବା ନେଇ ସେ ଟାଉନ୍‌ ଥାନାରେ ଅଭିଯୋଗ କରିଥିଲେ । ଏହାପରେ ପୋଲିସ ଅନିଲକୁ ଗିରଫ କରି କୋର୍ଟ ଚାଲାଣ କରିଥିଲା । ଏହାପରେ ଗତ ୨୬ତାରିଖରୁ ସଖୀ ସେଣ୍ଟରରେ ମହିଳା ଜଣକ ରହିଥିଲେ । ଗତକାଲି ରାତି ଗୋଟାଏରେ ସଖି ସେଣ୍ଟରରେ ସେ ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ତେବେ ଏହାକୁ ନେଇ ଟାଉନ୍‌ ଥାନା ପୋଲିସ  ଘଟଣାର ତଦନ୍ତ ଜାରି ରଖିଛି ।

ଅନୁଗୁଳ: ଅନୁଗୁଳ ବନ୍ତଳା ଥାନା କଞ୍ଜା ଗାଁରେ ଅଘଟଣ । ବାର୍‌ହା ଶିକାର ପାଇଁ ବିଛାଇଥିବା ବିଦ୍ୟୁତ ତାର ସଂସ୍ପର୍ଶରେ ଆସି ୨ଜଣ ଯୁବକଙ୍କର ମୃତ୍ୟୁ ହୋଇଛି । ୧୧କେଭି ବିଦ୍ୟୁତ ତାର ସଂସ୍ପର୍ଶରେ ଆସି ସେମାନଙ୍କ ମୃତ୍ୟୁ ହୋଇଥିବା ଜଣାପଡ଼ିଛି ।

ମୃତକ ମାନଙ୍କ ମଧ୍ୟରୁ ଜଣେ ସେହି ଗାଁର ମହେଶ୍ୱର ବିଶ୍ୱାଳ ଓ ଅନ୍ୟଜଣେ କବିନ୍ଦ୍ର ଗଡ଼ନାୟକ ହୋଇଥିବା ଜଣା ପଡ଼ିଛି । ଉଭୟଙ୍କର ଅସାବଧାନତା ଯୋଗୁଁ ସେମାନେ ସେଇ ବିଦ୍ୟୁତ ତାର ସଂସ୍ପର୍ଶରେ ଆସି ଯାଇଥିଲେ । ତେବେ ଘଟଣା ସ୍ଥଳରେ  ମହେଶ୍ୱରଙ୍କ ମୃତ୍ୟୁ ହୋଇଥିବା ବେଳେ କବୀନ୍ଦ୍ରଙ୍କୁ ସକାଳେ ସ୍ଥାନୀୟ ଲୋକ ଗୁରୁତର ଅବସ୍ଥାରେ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ । ତେବେ ସେହିଠାରେ ତାଙ୍କର ମଧ୍ୟ ମୃତ୍ୟୁ ହୋଇଥିବା ଜଣା ପଡ଼ିଛି । ଖବର ପାଇ ପୋଲିସ ଓ ବନ ବିଭାଗ ଘଟଣା ସ୍ଥଳରେ ପହଞ୍ଚି ତଦନ୍ତ ଜାରି ରଖିଛି ।

ଭୁବନେଶ୍ୱର: ଫେବୃଆରୀ ପ୍ରଥମ ସପ୍ତାହରେ ଶେଷ ହେବ ଏ ବର୍ଷର ଶୀତଋତୁ । ଆଜି ଶୀତ କମିବ, ତାପମାତ୍ରା ବଢିବ । ଦୁଇ ଦିନ ବର୍ଷା ପରେ ପରିବର୍ତ୍ତନ ହେବ ପାଗ । ୩-୪ଡିଗ୍ରୀ ତାପମାତ୍ରା ବଢିବ । ଆକାଶ ମେଘମୁକ୍ତ ରହିବା ସହ ତାପାମାତ୍ରା ବଢିବ ବୋଲି ଭୁବନେଶ୍ୱର ପାଣିପାଗ କେନ୍ଦ୍ର ପୂର୍ବାନୁମାନ କରିଛି  । ବର୍ଷା ପରେ ଉପକୂଳରୁ ଉପାନ୍ତ, ଘନ କୁହୁଡିରେ ଆଚ୍ଛାଦିତ ହେବା ନେଇ ସୂଚନା ମିଳିଛି । ସେପଟେ ବର୍ଷାକୁ ଦୃଷ୍ଟିରେ ରଖି ଚାଷୀ ଆଗୁଆ ପ୍ରସ୍ତୁତ ରହିବାକୁ ଖାଦ୍ୟ ଓ ସମବାୟ ମନ୍ତ୍ରୀ ରଣେନ୍ଦ୍ର ପତାପ ସ୍ୱାଇଁ ପରାମର୍ଶ ଦେଇଛନ୍ତି । ଅମଳ ଧାନକୁ ସୁରକ୍ଷିତ ସ୍ଥାନରେ ରଖିବାକୁ ମଧ୍ୟ ମନ୍ତ୍ରୀ ପରାମର୍ଶ ଦେଇଛନ୍ତି ।

ଭୁବନେଶ୍ୱର: ଆଜି ପଦୋନ୍ନତି ଅଦାଲତର ପ୍ରଥମ ଦିନ । ପ୍ରଥମ ପର୍ଯ୍ୟାୟରେ ୩ଦିନ ବସିବ ପଦୋନ୍ନତି ଅଦାଲତ। ଜାନୁଆରୀ ୨୩ତାରିଖ ସୁଦ୍ଧା ପଦୋନ୍ନତି ଅଦାଲତ ପାଇଁ ୮ହଜାର ୯୦୯ ଆବେଦନ ପତ୍ର ଆସିଥିଲା। ସେଥିମଧ୍ୟରୁ ୨ହଜାର ୨୭୩ ଆବେଦନର ବିଚାର ପ୍ରଥମ ପର୍ଯ୍ୟାୟରେ କରାଯିବ। ଅବଶିଷ୍ଟ ଆବେଦନର ବିଚାର ଦ୍ୱିତୀୟ ପର୍ଯ୍ୟାୟରେ ଫେବ୍ରୁଆରୀ ୨୭, ୨୮ ଓ ୨୯ ତାରିଖରେ ହେବ। ଯେଉଁ ସରକାରୀ କର୍ମଚାରୀ ୨୦୧୯ ଡିସେମ୍ବର ୩୧ ସୁଦ୍ଧା ପଦୋନ୍ନତି ଯୋଗ୍ୟ ହୋଇଥିଲେ ଓ ପଦୋନ୍ନତିରୁ ବଞ୍ଚିତ ହୋଇଥିଲେ ସେମାନଙ୍କୁ ପଦୋନ୍ନତି ଦେବାକୁ ମୁଖ୍ୟମନ୍ତ୍ରୀ ପଦୋନ୍ନତି ଅଦାଲତ ପାଇଁ ନିର୍ଦ୍ଦେଶ ଦେଇଥିଲେ। ପଦୋନ୍ନତି ଅଦାଲତରେ ନିଜେ କର୍ମଚାରୀ ଉପସ୍ଥିତ ରହିବାକୁ ନିର୍ଦ୍ଦେଶ ଦିଆଯାଇଛି। ତାଙ୍କ ଛଡ଼ା ତାଙ୍କ ପାଇଁ ଅନ୍ୟ କେହି ପକ୍ଷ ରଖିପାରିବେ ନାହିଁ। ଏହି ଅଦାଲତରେ ବିଭିନ୍ନ ପ୍ରଶାସନିକ ବିଭାଗର ପ୍ରମୁଖ ସଚିବ, ମୁଖ୍ୟ ଶାସନ ସଚିବ ଅଧ୍ୟକ୍ଷତା କରିବେ ।

ରାଉରକେଲା: ରାଉରକେଲାରେ ଏବେ ଦେଖାଦେଇଛି କୁକୁର ଆତଙ୍କ । ସହରର ବିଭିନ୍ନ ସ୍ଥାନରେ କୁକୁର ଆତଙ୍କ ଖେଳାଇଥିବା ବେଳେ କୁକୁର କାମୁଡାରେ ୧୪୧ଜଣ ଆହତ ହୋଇଛନ୍ତି । ସହରର ଜଗଦା, ଝିରପାଣି ଆଦି ଅଞ୍ଚଳରେ ବୁଲା କୁକୁରର ଉତ୍ପାତ ବଢି ଚାଲିଛି । ସୋମବାର ମଧ୍ୟ ପୁଣି ୮୯ଜଣ ଆହତ ହୋଇଥିବା ଅଭିଯୋଗ ହୋଇଛି । ଆହତ ମାନଙ୍କୁ ରାଉରକେଲା ସରକାରୀ ମେଡିକାଲରେ ଚିକିତ୍ସା କରାଯାଇଛି । ଦିନକୁ ଦିନ କୁକୁର ଦୌରାତ୍ମ୍ୟ ବଢିଚାଲିଥିବା ବେଳେ ଏନେଇ ପଦକ୍ଷେପ ନେବାକୁ ସହରବାସୀ ଦାବି କରିଛନ୍ତି ।