ଭୁବନେଶ୍ୱର:ଫେବ୍ରୁଆରୀ ୧ରେ କେନ୍ଦ୍ର ବଜେଟ୍‌ । ବଜେଟ୍‌ ପୂର୍ବରୁ ରାଜ୍ୟ ସରକାରଙ୍କ ପସ୍ତୁତି । ଆଜି ବସିବ ବିଜେଡି ସଂସଦୀୟ ଦଳର ବୈଠକ । ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ନବୀନ ନିବାସରେ ବସିବ ବୈଠକ । ଦିନ ୧୧ଟା ୨୫ରେ ଏହି ବୈଠକ ବସିବାକୁ ଥିବା ବେଳେ ବଜେଟ୍‌ ଅଧିବେସନରେ  ଶାସକ ଦଳର  କଣ ରହିବ ଆଭିମୁଖ୍ୟ ଓ ଦାବି ସେନେଇ ଆଲୋଚନା କରାଯିବ । ବୈଠକରେ ଉପସ୍ଥିତ ରହିବା ପାଇଁ ଦଳର ସମସ୍ତ ସାଂସଦମାନଙ୍କୁ ନିର୍ଦ୍ଦେଶ ଦିଆଯାଇଛି। ବିଜେଡିର ଉଭୟ ଲୋକସଭା ଓ ରାଜ୍ୟସଭା ସାଂସଦମାନେ ଏହି ବୈଠକରେ ସାମିଲ ହେବେ। ଜାନୁୟାରୀ ୩୧ତାରିଖରେ ଆରମ୍ଭ ହେବାକୁ ଯାଉଥିବା ସଂସଦର ବଜେଟ୍ ଅଧିବେଶନରେ ବିଜେଡି କିଭଳି ଆଭିମୁଖ୍ୟ ପୋଷଣ କରିବ ସେ ନେଇ ଆଲୋଚନା ହେବା ସହ ମୁଖ୍ୟତଃ ରାଜ୍ୟସ୍ୱାର୍ଥ ସମ୍ବଳିତ ପ୍ରସଙ୍ଗ ଉପରେ ଦଳ ଗୁରୁତ୍ୱ ଦେବ ବୋଲି ଜଣାପଡ଼ିଛି।

ବଢିଚାଲିଛି କରୋନା ଭାଇରସର ଆତଙ୍କ । ଏହି ଭାଇରସ୍ ଏବେ ଡେଇଁ ଚାଲିଛି ଗୋଟିଏ ପରେ ଗୋଟିଏ ଦେଶ   । ୮୦ରୁ ଅଧିକ ଲୋକଙ୍କ ଜୀବନ ଗଲାଣି, ୧୨ଶହରୁ ଅଧିକ ଲୋକ ମେଡ଼ିକାଲରେ ଭର୍ତ୍ତି ହୋଇଛନ୍ତି । ଚୀନରୁ ଥାଇଲାଣ୍ଡ, ଆମେରିକା, ତାଇଓ୍ୱାନ, ଭିଏତନାମ୍‌, ସିଙ୍ଗାପୁର ପରେ ଏବେ ଇଉରୋପରେ ନିଜର କାୟା ବିସ୍ତାର କଲାଣି ।

ଏବେ ଓଡ଼ିଶାକୁ ମଧ୍ୟ ଆକ୍ରାନ୍ତ କରିପାରେ କରୋନା ଭାଇରସ୍‌ । ଭାଇରସ୍‌ରୁ ରାଜ୍ୟକୁ ରକ୍ଷା ପାଇଁ ଆଗୁଆ ପ୍ରସ୍ତୁତି ଆରମ୍ଭ କରିଛି ସ୍ୱାସ୍ଥ୍ୟ ବିଭାଗ । ଏନେଇ ଆଜି ଭୁବନେଶ୍ୱରରେ ବସିବ ସିଡିଏମ୍‌ଓ ବୈଠକ । ବୈଠକରେ ସମସ୍ତ ଜିଲ୍ଲା ସିଡିଏମ୍‌ଓ ମାନେ ଯୋଗ ଦେବାର କାର୍ଯ୍ୟକ୍ରମ ରହିଛି ।  ମାଲେସିଆରେ ତିନି ଜଣ କରୋନା ଭାଇରସ୍‌ ଦ୍ଵାରା ଆକ୍ରାନ୍ତ ପରେ ଓଡ଼ିଶାରେ ହାଇଆଲର୍ଟ ଜାରି କରାଯାଇଛି । କେନ୍ଦ୍ର ସରକାରଙ୍କ କଡା ନିର୍ଦ୍ଦେଶ ପରେ ମାଲେସିଆରୁ ଆସୁଥିବା ସମସ୍ତ ଯାତ୍ରୀଙ୍କୁ ଟିକନିକ୍ ଯାଞ୍ଚ କରାଯାଉଛି । ଗତ ରବିବାର ରାତିରେ କ୍ୱାଲାଲମପୁରରୁ ଭୁବନେଶ୍ୱର ଆସିଥିବା ସମସ୍ତ ଯାତ୍ରୀଙ୍କୁ ଡାକ୍ତର ପରୀକ୍ଷା କରିଛନ୍ତି । ଏଥିପାଇଁ ବିମାନ ବନ୍ଦର ପରିସରରେ ୨୪ଘଣ୍ଟିଆ ମେଡିକାଲ ଇନସପେକ୍ସନ୍ ରୁମ୍‌ ଖୋଲା ଯାଇଛି । ସେପଟେ ପାରଦୀପ ବନ୍ଦରରେ ମଧ୍ୟ ଆଲର୍ଟ ଜାରି କରାଯାଇଛି । ବନ୍ଦରରେ ଯାତ୍ରୀଙ୍କୁ ସ୍ୱାସ୍ଥ୍ୟ ପରୀକ୍ଷା କରିବାକୁ କଡା ନିର୍ଦ୍ଦେଶ ଦିଆଯାଇଛି । ହେଲେ କରୋନା ଭାଇରସର ପ୍ରତିଷେଧକ ନଥିବାରୁ ଚିନ୍ତା ବଢିବାରେ ଲାଗିଛି । ଏ ସଂକ୍ରାନ୍ତରେ କେନ୍ଦ୍ର ସ୍ୱାସ୍ଥ୍ୟ ସଚିବଙ୍କ ସହ ଭିଡିଓ କନଫରେସିଂ ଜରିଆରେ ପ୍ରମୁଖ ସ୍ୱାସ୍ଥ୍ୟ ସଚିବ ଆଲୋଚନା କରିଛନ୍ତି । ସେପଟେ ଏସସିବି ଓ ସମ୍ବଲପୁର ଭିମସାରରେ ଏ ନେଇ ସ୍ୱତନ୍ତ୍ର ବ୍ୟବସ୍ଥା କରାଯାଇଛି ।

ଜଳେଶ୍ୱର: ରୋଗୀ ଛାଡି ଫେରୁଥିବା ବେଳେ ୧୦୮ ଆମ୍ବୁଲାନ୍ସ ହେଲା ଦୁର୍ଘଟଣା ଗ୍ରସ୍ତ । ସୂଚନା ଅନୁଯାୟୀ, ଗତକାଲି ବିଳମ୍ବିତ ରାତିରେ ୧୦୮ ଆମ୍ବୁଲାନ୍ସ ବାଲେଶ୍ଵର ହସ୍ପିଟାଲରୁ ରୋଗୀ ଛାଡି ଫେରୁଥିବା ବେଳେ ଜାତୀୟ ରାଜପଥ ଗୁଡ଼ିଖାଳ ଛକ ନିକଟରେ ଦୁର୍ଘଟଣାର ସମ୍ମୁଖିନ ହୋଇଛି ।

ସୂଚନା ଅନୁଯାୟୀ, ଡ୍ରାଇଭର ସମେତ ୩ଗୁରୁତର ଥିବା ଜଣାପଡ଼ିଛି । ସେମାନଙ୍କୁ ବାଲେଶ୍ଵର ମେଡିକାଲରେ ଭର୍ତ୍ତି କରାଯାଇଛି । ତେବେ ଦୁର୍ଘଟଣା କାରଣ ଅସ୍ପଷ୍ଟ ରହିଛି ।