ଭୁବନେଶ୍ୱର: ଭୁବନେଶ୍ୱର ଇଡ୍‌କୋ ପ୍ରଦର୍ଶନୀ ପଡ଼ିଆରେ ଆଜିଠାରୁ ଆରମ୍ଭ ହେଲା ଆଦିବାସୀ ମେଳା- ୨୦୨୦ । ମୁଖ୍ୟମନ୍ତ୍ରୀ  ନବୀନ ପଟ୍ଟନାୟକ ଏହାକୁ ଉଦ୍‌ଘାଟନ କରିଛନ୍ତି । ଆଦିବାସୀ ମେଳା ଫେବ୍ରୃଆରୀ ୯ ତାରିଖ ପର୍ଯ୍ୟନ୍ତ ଚାଲିବ । ଅନୁସୂଚିତ ଜାତି ଓ ଜନଜାତି କଲ୍ୟାଣ ବିଭାଗ ପକ୍ଷରୁ ଏହି ମେଳା ଆୟୋଜନ କରାଯାଇଛି ।

ଚଳିତବର୍ଷ ଆଦିବାସୀ ମେଳାରେ ମୋଟ ୨୬୨ଟି ଷ୍ଟଲ ନିର୍ମାଣ କରାଯାଇଛି । ବିଭିନ୍ନ ଜନଜାତିଙ୍କର ୨୪ ଗୋଟି ପାରମ୍ପରିକ ଗୃହ ଉପକରଣ, ଚଳଣୀ ଓ ପରମ୍ପରାର ଝଲକ ପ୍ରଦର୍ଶିତ ହୋଇଛି । ଆଦିବାସୀ ଚିତ୍ରକଳା ଓ କଳା ସାମଗ୍ରୀ, ହସ୍ତତନ୍ତ ଶିଳ୍ପ ସାମଗ୍ରୀର ବିକ୍ରୟ ପାଇଁ ସ୍ୱତନ୍ତ୍ର ୪୨ ଗୋଟି ଷ୍ଟଲ କରାଯାଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଦିବାସୀ ମେଳା ଓ ହସ୍ତତନ୍ତ ମେଳା ବୁଲି ପରିଦର୍ଶନ କରିଛନ୍ତି ।

ଭୁବନେଶ୍ୱର: ରାଜଧାନୀରେ ମାତିଲା ଷଣ୍ଢ । ସାମନ୍ତରାପୁର ବିଜୟନଗର ଅଞ୍ଚଳରେ ଷଣ୍ଢ ଆକ୍ରମଣରେ ଜଣେ ମହିଳା ମୃତ୍ୟୁ ବରଣ କରିଥିବାବେଳେ ୫ ଗୁରୁତର । ମୃତକ ହେଲେ ଭାବେନୀ ବରାଳ ।

ଆଜି ଭୋର ୫ଟାରେ ଫୁଲ ତୋଳିବାକୁ ଆସିଥିବା ବେଳେ ତାଙ୍କୁ ଷଣ୍ଢ ଆକ୍ରମଣ କରିଥିଲା । ସ୍ଥାନୀୟ ବାସିନ୍ଦାଙ୍କ ଅନୁସାରେ, ଆକ୍ରମଣ କରିଥିବା ଷଣ୍ଢଟି ପାଗଳ ହୋଇଯାଇଥିଲା । ଗତ ତିନିଦିନ ଧରି ସ୍ଥାନୀୟ ଅଞ୍ଚଳରେ ଆତଙ୍କ ଖେଳାଇଥିଲା ।

ମହିଳାଙ୍କ ମୃତ୍ୟୁ ପରେ ଷଣ୍ଢକୁ କାବୁ କରି BMCକୁ ହସ୍ତାନ୍ତର କରିଛନ୍ତି ସ୍ଥାନୀୟ ବାସିନ୍ଦା । ସେପଟେ ସମସ୍ତ ଆହତଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଥିଲା । ରେଡକ୍ରସ ଓ ସ୍ଥାନୀୟ ତହସିଲଦାରଙ୍କ ପକ୍ଷରୁ ମୃତକଙ୍କ ପରିବାରକୁ ୧୦ ହଜାର ଟଙ୍କା ଲେଖାଏଁ ସହାୟତା ରାଶି ପ୍ରଦାନ କରାଯାଇଛି ।

ସମ୍ବଲପୁର: ସମ୍ବଲପୁରରେ ବସ୍‌-ଟ୍ରାକ୍ଟର ମଧ୍ୟରେ ମୁହାଁମୁହିଁ ଧକ୍କା ହୋଇଛି । ଟ୍ରାକ୍ଟର ଓଲଟି ୨ ଜଣଙ୍କ ମୃତ୍ୟୁ ହୋଇଥିବା ବେଳେ ୫ ଜଣ ଆହତ ହୋଇଛନ୍ତି । ସମ୍ବଲପୁର ଯୁଯୁମରା ଥାନା ମୁଣ୍ଡେରଠାରେ ଏହି ଦୁର୍ଘଟଣା ଘଟିଛି ।

ଟ୍ରାକ୍ଟରରେ ୫ ଜଣ ଯାଉଥିବା ବେଳେ ଏଥିରୁ ୨ ଜଣଙ୍କର ମୃତ୍ୟୁ ହୋଇଛି । ବାକି ୫ ଆହତଙ୍କୁ ଚିକିତ୍ସା ପାଇଁ ସଦର ଡାକ୍ତରଖାନାରେ ଭର୍ତ୍ତି କରାଯାଇଛି । ଝାରସୁଗୁଡ଼ାକୁ ଯାଉଥିବା ପ୍ରଧାନ ବସ୍‌ ଏବଂ ଟ୍ରାକ୍ଟର ମଧ୍ୟରେ ମୁହାଁମୁହିଁ ଧକ୍କା ହେବା ପରେ ଟ୍ରାକ୍ଟରଟି ଓଲଟି ପଡ଼ିଥିଲା।