ପୁରୀ: ଘୋଷଜାତ ପାଇଁ ପ୍ରସ୍ତୁତି ଏବେ ଠାରୁ ଆରମ୍ଭ ହୋଇ ସାରିଲାଣି । ପୁରୀରେ ପହଞ୍ଚିଲା ରଥକାଠ । ସରସ୍ୱତୀ ପୂଜାରେ ରଥକାଠ ପୂଜାନୀତି । ସେଥିପାଇଁ ପ୍ରଥମ ପର୍ଯ୍ୟାୟରେ ୨ଟି ଟ୍ରକରେ ୫୭ଖଣ୍ଡ କାଠ ପହଞ୍ଚିଛି । ଏଥିରେ ରହିଛି ଧଉରା ଓ ଅଶନ ପ୍ରଜାତିର କାଠ ।

ଦଶପଲ୍ଲା ବନଖଣ୍ଡରୁ ରଥଯାତ୍ରା ପାଇଁ କାଠ ଆସିଛି । ଏହା ପୂର୍ବରୁ ନୟାଗଡ଼ ପୁରୁଣା ସହର ନିକଟ ଜଗନ୍ନାଥ ମନ୍ଦିର ଠାରେ ପୂଜାର୍ଚ୍ଚନା କରାଯାଇଥିଲା । ଏହା ପରେ ରଥକାଠ ଧରି ୨ଟି ଟ୍ରକ ପୁରୀ ଅଭିମୁଖେ ବାହାରିଥିଲା ।

ଭୁବନେଶ୍ୱର: ସ୍ମାର୍ଟସିଟି ଭୁବନେଶ୍ୱରକୁ ପଦୂଷଣମୁକ୍ତ କରିବା ପାଇଁ ବିଏମ୍‌ସିର ଆଉଏକ ପଦକ୍ଷେପ । ମହାନଗର ଅଞ୍ଚଳରେ ୪୩ଟି ମାଇକ୍ରେ। କମ୍ପୋଷ୍ଟ କେନ୍ଦ୍ର ସ୍ଥାପନ କରାଯିବ । ପ୍ରତ୍ୟେକ କେନ୍ଦ୍ର ପାଇଁ ୭୦ଲକ୍ଷ ଲେଖାଏଁ ମୋଟ୍‌ ୩୦କୋଟିରୁ ଅଧିକ ଟଙ୍କାର ଖର୍ଚ୍ଚ ଅଟକଳ କରାଯାଇଛି । ଏସବୁ ପ୍ରକଳ୍ପ ପାଇଁ କିଛି ବାଧକ ଥିଲେ ବି ୬ମାସରୁ ବର୍ଷକ ମଧ୍ୟରେ କାମ ସଂପୂର୍ଣ୍ଣ କରିବାକୁ ଲକ୍ଷ୍ୟ ରଖିଛନ୍ତି ବିଏମ୍‌ସି କର୍ତ୍ତୃପକ୍ଷ।

ସ୍ମାର୍ଟସିଟି ଭୁବନେଶ୍ୱରର ବିଭିନ୍ନ ଓ୍ୱାର୍ଡରୁ ଦୈନିକ ସଂଗୃହୀତ ଅଳିଆ ଆବର୍ଜନାର ସୁପରିଚାଳନା ପାଇଁ ନୂଆ ଯ଼ୋଜନା । ବର୍ଜ୍ୟବସ୍ତୁରୁ ଶୁଖିଲା, ଓଦା ଓ ପ୍ଲାଷ୍ଟିକ୍‌କୁ ଅଲଗା କରି ରିସାଇକ୍‌ଲ କରାଯିବ । ପଦୂଷଣ ନିୟନ୍ତ୍ରଣରେ ଏହା ବେଶ୍‌ ସହାୟକ ହେବ ।

ବିଏମ୍‌ସିରେ ୬୭ଟି ଓ୍ୱାର୍ଡ ମଧ୍ୟରୁ ଏବେ ୪୩ଟି ସ୍ଥାନରେ ମାଇକ୍ରେ। କମ୍ପୋଷ୍ଟ କେନ୍ଦ୍ର ବା ଏମ୍‌ସିସି ସ୍ଥାପନ କରାଯିବ । ପ୍ରତି କେନ୍ଦ୍ର ପାଇଁ ୭୦ଲକ୍ଷ ଟଙ୍କା ହିସାବରେ ୩୦କୋଟିରୁ ଅଧିକ ଟଙ୍କା ଅଟକଳରେ କାମ ଆରମ୍ଭ ହୋଇଛି । ତେବେ ଏଥିରେ କିଛି ବାଧା ଅଛି । କିଛି ଅଞ୍ଚଳରେ ଲୋକ ବିରୋଧ କରୁଛନ୍ତି । ସ୍ଥାନ ପରିବର୍ତ୍ତନ କରିବାକୁ ଦାବି ହୋଇଛି ।

ତେବେ ବିଏମ୍‌ସି କମିଶନର ନିଜେ ସମ୍ପୃକ୍ତ ଅଞ୍ଚଳକୁ ଯାଇ ଲୋକଙ୍କ ସହ ଆଲୋଚନା କରି ସମସ୍ୟାର ସ୍ଥାୟୀ ସମାଧାନର ବାଟ ବାହାର କରୁଛନ୍ତି । ଏନେଇ ସର୍ବୋଚ୍ଚ ନ୍ୟାୟାଳୟ ଏବଂ ଜାତୀୟ ଗ୍ରୀନ ଟ୍ରିବ୍ୟୁନାଲ୍‌ଙ୍କ ନିର୍ଦ୍ଦେଶ ଥିବାରୁ ଖୁବ୍‌ଶୀଘ କାମ ସଂପୂର୍ଣ୍ଣ କରାଯିବ ବୋଲି ବିଏମ୍‌ସି କମିଶନର ସ୍ପଷ୍ଟ କରିଛନ୍ତି । ପ୍ରଦୂଷଣଜନିତ ସମସ୍ୟା ଦିନକୁ ଦିନ ଜଟିଳ ହେଉଥିବା ବେଳେ ଭୁବନେଶ୍ୱର ମହାନଗର ନିଗମର ପଦକ୍ଷେପ ନିଶ୍ଚିତ ଭାବେ ସ୍ୱାଗତଯୋଗ୍ୟ ।

ଭୁବନେଶ୍ୱର: ଆଇକନିକ୍‌ ସିଟି ହେବ ଶ୍ରୀକ୍ଷେତ୍ର ପୁରୀ ଓ ଅର୍କକ୍ଷେତ୍ର କୋଣାର୍କ । କେନ୍ଦ୍ର ସରକାର ଏନେଇ ଖୁବ୍‌ଶୀଘ୍ର ଘୋଷଣା କରିବେ । ଏହି ସୂଚନା ଦେଇଛନ୍ତି ଓଡ଼ିଶା ଗସ୍ତରେ ଆସିଥିବା କେନ୍ଦ୍ର ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ପ୍ରହ୍ଲାଦ ସିଂହ ପଟେଲ । ଓଡ଼ିଶାର ବିଭିନ୍ନ ପର୍ଯ୍ୟଟନ ତଥା ଧାର୍ମିକ ସ୍ଥଳର ବିକାଶ ପାଇଁ ରାଜ୍ୟ ସରକାର ଅନେକ ଯୋଜନା କରୁଥିବାବେଳେ କେନ୍ଦ୍ର ସରକାର ଏବେ ନୂଆ ସ୍ୱପ୍ନ ଦେଖାଇଛନ୍ତି ।

ବିଶ୍ୱରେ ପୁରୀ ଓ କୋଣାର୍କ ସୂର୍ଯ୍ୟ ମନ୍ଦିରର ସ୍ୱତନ୍ତ୍ର ପରିଚୟ ରହିଛି । ଜଗନ୍ନାଥ ସଂସ୍କୃତି ଏବଂ ଉତ୍କଳୀୟ ଐତିହ୍ୟ ସର୍ବଦା ଗବେଷକ ଓ ବିଦେଶୀ ପର୍ଯ୍ୟଟକଙ୍କୁ ଆକୃଷ୍ଟ କରୁଛି । ଏବେ ଆଉ ଏକ ଗୁରୁତ୍ୱପୂର୍ଣ୍ଣ ସ୍ଥାନ ନେବାକୁ ଯାଉଛି ଓଡ଼ିଶା । ଖୁବ୍‌ଶୀଘ୍ର ପୁରୀ ଓ କୋଣାର୍କକୁ କେନ୍ଦ୍ର ସରକାର ଆଇକନିକ ସାଇଟ ଘୋଷଣା କରିବେ । କେନ୍ଦ୍ର ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ପ୍ରହ୍ଲାଦ ସିଂହ ସୂର୍ଯ୍ୟ ମନ୍ଦିର ପରିଦର୍ଶନ ଓ ଏହାର ସୁରକ୍ଷା ନେଇ ପ୍ରତ୍ନତତ୍ତ୍ଵ ବିଭାଗ ସହ ଆଲୋଚନା କରିଛନ୍ତି ।

ଐତିହ୍ୟ ଓ ପର୍ଯ୍ୟଟନସ୍ଥଳୀ ପାଇଁ  ରାଜ୍ୟ ସରକାର ଆରମ୍ଭ କରିଛନ୍ତି ସ୍ୱତନ୍ତ୍ର ବିକାଶ ଯୋଜନା । ପୁରୀରୁ ଏହା ଆରମ୍ଭ ହୋଇଛି । ପୁରୀ ସହ କୋଣାର୍କ ଓ ଲିଙ୍ଗରାଜ ଭଳି ଅନ୍ୟ  ପର୍ଯ୍ୟଟନସ୍ଥଳୀର ବିକାଶ ପାଇଁ ଯୋଜନା କରାଯାଇଛି । ତେବେ ରାଜ୍ୟରେ ରହିଛି ଆହୁରି ଅନେକ ଧାର୍ମିକ,ଐତିହ୍ୟ ଓ ପର୍ଯ୍ୟଟନ କ୍ଷେତ୍ର । ସବୁର ବିକାଶ ହେଲେ ରାଜ୍ୟର ରାଜସ୍ୱ ପାଣ୍ଠି ବୃଦ୍ଧି ସହ ଓ ପର୍ଯ୍ୟଟନ ମାନଚିତ୍ରରେ ଓଡ଼ିଶା ନୂଆ ପରିଚୟ ପାଇବ ବୋଲି ମତ ପ୍ରକାଶ ପାଇଛି ।

ଓଡ଼ିଶାକୁ ଅତି ନିକଟରୁ ବୁଝିବା ପାଇଁ ଚନ୍ଦ୍ରାଭାଗା ବେଳାଭୂମିରେ ଆୟୋଜିତ ଇକୋ ରିଟ୍ରିଟ ଏକ ମାଧ୍ୟମ ପାଲଟିଛି । ଏଠାରେ ନ୍ୟାସନଲ ଟୁରିଜିମ କନଫେରେନ୍‌ସ ଆୟୋଜନ ଦ୍ଵାରା ରାଜ୍ୟ ଓ କେନ୍ଦ୍ର ସରକାର ମଧ୍ୟରେ ସମନ୍ୱୟ ରକ୍ଷା ହୋଇପାରଛି । କେନ୍ଦ୍ର ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ପ୍ରହ୍ଲାଦ ସିଂହ ଏଥିରେ ଯ଼ୋଗଦେଇଥିଲେ ।

ନୂଆଦିଲ୍ଲୀ: ଫାଶୀରୁ ବର୍ତ୍ତିବା ପାଇଁ ପୁଣି ଚାଲ ଖେଳିବାକୁ ଯାଉଛନ୍ତି ନିର୍ଭୟାକାଣ୍ଡର ସୈତାନ । ମୁକେଶ ସିଂହ ପରେ ଏବେ ଫାଶୀରୁ ବଞ୍ଚିବା ପାଇଁ ପୱନ, ଅକ୍ଷୟ ଓ ବିନୟ ରାଜକ୍ଷମା ଆବେଦନ କରିବାକୁ ଇଛା କରିଛନ୍ତି । ସୁପ୍ରିମକୋର୍ଟରେ ପୱନ ଓ ଅକ୍ଷୟ କ୍ୟୁରେଟିଭ ପିଟିସନ ଦାଖଲ କରିବାକୁ ଚାହୁଁଥିବାବେଳେ ରାଜକ୍ଷମା ଆବେଦନ ଲାଗି ତିନିହେଁ ଇଛା ପ୍ରକାଶ କରିଛନ୍ତି । ଏ ନେଇ ଓକିଲ ଏ ପି ସିଂହ ପଟିଆଲା ହାଉସ କୋର୍ଟରେ ଆବେଦନ କରିଛନ୍ତି । କିନ୍ତୁ ତିହାର ଜେଲ କର୍ତ୍ତୃପକ୍ଷ ଏ ସଂପର୍କୀତ ଜରୁରୀ କାଗଜପତ୍ର ହସ୍ତାନ୍ତର କରିବାକୁ ବିଳମ୍ବ କରୁଥିବା ଆବେଦନପତ୍ରରେ ଅଭିଯୋଗ କରିଛନ୍ତି ଓକିଲ । ଜାଣିଶୁଣି ତିହାର କର୍ତ୍ତୃପକ୍ଷ କାଗଜପତ୍ର ଦେଉନାହାଁନ୍ତି ବୋଲି ସେ ଅଭିଯୋଗ କରିଛନ୍ତି । ଦାବି ମୁତାବକ କାଗଜପତ୍ରରେ ସେମାନଙ୍କ ଡାଏରୀରେ ଲେଖାଯାଇଥିବା ପରିବାର ପ୍ରତି ଦାୟିତ୍ୱ, ବିଭିନ୍ନ ସମୟରେ ସେମାନଙ୍କ ଉପରେ କରାଯାଇଥିବା ମେଡିକାଲ ରିପୋର୍ଟ ଆଦି ରହିଛି । ଯଦି ତିହାର କର୍ତ୍ତୃପକ୍ଷ କାଗଜପତ୍ର ହସ୍ତାନ୍ତର କରନ୍ତି ତେବେ ଫେବ୍ରୁଆରୀ ପହିଲାକୁ ଧାର୍ଯ୍ୟ ଫାଶୀ ଟଳିଯିବ । ଯଦି ସେମାନଙ୍କ ଆବେଦନ ସୁପ୍ରିମକୋର୍ଟରେ ଖାରଜ ହୋଇଯାଏ ଏହାପରେ ସେମାନେ ରାଷ୍ଟ୍ରପତିଙ୍କ ନିକଟରେ ଦଣ୍ଡକୁ ଆଜୀବନ କରିବା ଲାଗି ଗୁହାରୀ କରି ରାଜକ୍ଷମା ଆବେଦନ କରିପାରନ୍ତି । ତେଣୁ ଫାଶୀ ଟଳିବ ପକ୍କା ।

ସେପଟେ ଫାଶୀକୁ ଆଉ ୭ଦିନ ବାକି ଅଛି । ଡେଥ ୱାରଣ୍ଟ ଜାରି ହେବା ପରେ ସେମାନଙ୍କୁ ଭେଟିବା ପାଇଁ ତାଙ୍କ ପରିବାର ଲୋକଙ୍କୁ ଚିଠି ଲେଖିଥିଲେ ତିହାର ଜେଲ୍‌ କର୍ତ୍ତୃପକ୍ଷ । ଜେଲ୍‌ ମାନୁଆଲ୍‌ ଅନୁସାରେ ସପ୍ତାହକୁ ୨ଦିନ ହେଉଥିବା ସାକ୍ଷାତକାରରେ ଦୋଷୀଙ୍କୁ ସେମାନଙ୍କ ପରିବାର ସଦସ୍ୟ ଭେଟୁଛନ୍ତି । କିନ୍ତୁ ଜେଲ କର୍ତ୍ତୃପକ୍ଷ ଶେଷ ସାକ୍ଷାତର ତାରିଖ ମାଗିଥିଲେ ସୁଦ୍ଧା ୪ ଦୋଷୀଙ୍କ ପରିବାର ଲୋକ ନିରବ ଅଛନ୍ତି । କେହି ବି ତାରିଖ ଫିକ୍ସ କରିନାହାଁନ୍ତି । ଯାହା ସୂଚନା ମିଳୁଛି, ସେମାନଙ୍କ ପରିବାର ଶେଷ ଥର ପାଇଁ ଭେଟିବାକୁ ଚାହୁଁନାହାଁନ୍ତି ବୋଲି କୁହାଯାଉଛି ।

ଖୋର୍ଦ୍ଧା: ଖୋର୍ଦ୍ଧା ଅଞ୍ଚଳରେ ମାତିଲେ ଲୁଟେରା । ଦିନ ଦିପହରେ ସତ୍ୟସାଇ ମନ୍ଦିର ରାସ୍ତାରୁ ୨୩ ଲକ୍ଷ ଲୁଟ୍‌ । ସ୍ଥାନୀୟଅଞ୍ଚଳର ବାପୁଜି ମହାରଣାଙ୍କ ଠାରୁ ଟଙ୍କା ଭର୍ତ୍ତି ବ୍ୟାଗ୍‌ ଲୁଟିନେଇଛନ୍ତି ଲୁଟେରା ।

ଏଲ୍‌ଆଇସି ଅଫିସକୁ ଟଙ୍କା ବାନ୍ଧିବାକୁ ଯାଉଥିଲେ ବାପୁଜି । ହେଲେ ବାଟରେ ତାଙ୍କୁ ପିଛା କରି ଏହି ଲୁଟପାଟ କରିଛନ୍ତି ଲୁଟେରା । ଏନେଇ ଖବର ପାଇବା ପରେ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି ପୋଲିସ ।