ରାଜସ୍ଥାନ: କରୋନା କର୍ମବୀରଙ୍କ ଉପରେ ଆକ୍ରମଣ ଥମିବାର ନାଁ ନେଉନାହିଁ । ରାଜସ୍ଥାନରେ ପୋଲିସ ଟିମ୍‌ ଉପରେ ହୋଇଛି ହମ୍‌ଲା । ଟୋଙ୍କ ଜିଲ୍ଲାରେ ପୋଲିସକୁ ଲୋକେ ଘେରି ଯାଇ ଆକ୍ରମଣ କରିଛନ୍ତି । ଠେଙ୍ଗା ଓ ଖଣ୍ଡାରେ ଆକ୍ରମଣ ଯୋଗୁଁ ତିନି ପୋଲିସ କର୍ମଚାରୀ ଆହତ ହୋଇ ଜିଲ୍ଲା ହସ୍‌ପିଟାଲରେ ଭର୍ତ୍ତି ହୋଇଛନ୍ତି ।

ରାଜସ୍ଥାନର ଟୋଙ୍କର  କସାଇ ମୋହାଲା ଅଞ୍ଚଳରେ ପାଟ୍ରୋଲିଂ କରିବାକୁ ଯାଇଥିବା ଏକ ପୋଲିସ୍ ଟିମ୍ ଉପରେ ଆକ୍ରମଣ ହୋଇଛି ।  ଫଳସ୍ୱରୂପ ତିନି ଜଣ ପୋଲିସ କର୍ମଚାରୀ ଆହତ ହୋଇଥିଲେ । ଟୋଙ୍କ ପୋଲିସ ୧୨ ଜଣଙ୍କ ବିରୋଧରେ ଏଫଆଇଆର ପଞ୍ଜିକରଣ କରିଛି । ଆହତ ପୋଲିସ କର୍ମଚାରୀଙ୍କୁ ଜିଲ୍ଲା ଡାକ୍ତରଖାନାରେ ଭର୍ତ୍ତି କରାଯାଇଛି । ଟୋଙ୍କରେ ଅନେକ କରୋନାଭାଇରସ୍ ମାମଲା ତାଲିକାଭୁକ୍ତ ହୋଇଛି । ତେଣୁ କରୋନାଭାଇରସ୍ ହଟସ୍ପଟ୍ ଚାରିପାଖରେ କର୍ଫ୍ୟୁ ଲାଗୁ କରାଯାଇଛି ।

ସୂଚନା ଅନୁଯାୟୀ, ଶୁକ୍ରବାର ସକାଳେ କାସାଇ ମୋହଲା ଅଞ୍ଚଳରେ ଏକ ଜନସମାଗମ ଆରମ୍ଭ ହୋଇଥିଲା। ଉକ୍ତ ଅଞ୍ଚଳରେ ପାଟ୍ରୋଲିଂ କରିବା ଏବଂ ସ୍ଥାନୀୟ ଲୋକଙ୍କୁ ଘରେ ରହିବାକୁ ମନାଇବା ପାଇଁ ଏକ ପୋଲିସ ଦଳ ପଠାଯାଇଥିଲା । ତେବେ ବାହାରେ ଏକାଠି ହୋଇଥିବା ସ୍ଥାନୀୟ ଲୋକ ପୋଲିସ ଦଳ ଉପରେ ଆକ୍ରମଣ ଆରମ୍ଭ କରିଥିବା ଅଭିଯୋଗ ହୋଇଛି ।

ସେମାନଙ୍କ ମଧ୍ୟରୁ କେତେକ ଲୋକ ପୋଲିସ କଥା ମାନିବାକୁ ମନା କରିଦେଇଥିଲେ । ଏହାପରେ ପୋଲିସ ସେମାନଙ୍କୁ ବିରୋଧ କରିବା ପରେ ଉତ୍ୟକ୍ତ ଲୋକେ ପୋଲିସ ଉପରେ ଆକ୍ରମଣ କରିଥିଲେ । ଘଟଣାର ସୂଚନା ପାଇବା ମାତ୍ରେ ଅତିରିକ୍ତ ପୋଲିସ ଟିମ୍ ଉଦ୍ଧାର କରିବାକୁ ଆସିଥିଲେ । ପୋଲିସ ୧୨ ଜଣଙ୍କ ବିରୋଧରେ ଏଫଆଇଆର ପଞ୍ଜୀକୃତ କରି ସେମାନଙ୍କୁ ଅଟକ ରଖିଛି ।

ସେପଟେ ଗତ ୨୪ ଘଣ୍ଟାରେ ବିହାରର ବିଭିନ୍ନ ସ୍ଥାନରେ ସ୍ୱାସ୍ଥ୍ୟକର୍ମୀଙ୍କ ଉପରେ ଆକ୍ରମଣ ହୋଇଛି । ଆକ୍ରମଣ ନେଇ ସରକାର ମୁହଁ ଖୋଲୁନଥିବାରୁ ସ୍ୱାସ୍ଥ୍ୟକର୍ମୀମାନେ ଅସନ୍ତୋଷ ଜାହିର କରିଛନ୍ତି । ଏହା ପୂର୍ବରୁ ଉତ୍ତରପ୍ରଦେଶ ମୁରାଦାବାଦରେ ଏକ ମେଡିକାଲ ଟିମ୍‌ ଉପରେ ଆକ୍ରମଣ ହୋଇଥିଲା । କରୋନା ଜନିତ ଏକ ମୃତ୍ୟୁ ମାମଲାରେ ଯେତେବେଳେ ଡାକ୍ତରୀ ଟିମ୍‌ ପରିବାର ସଦସ୍ୟଙ୍କୁ କ୍ୱାରେଣ୍ଟାଇନ କରିବାକୁ ପହଞ୍ଚିଥିଲେ ସେତେବେଳେ ଲୋକେ ଘେରିଯାଇ ପଥର ମାଡ଼ କରିଥିଲେ । ଏଥିରେ ଡାକ୍ତର ସମେତ ଅନେକ ଆହତ ହୋଇଥିଲା । ପୋଲିସ ୧୭ ଜଣଙ୍କୁ ଗିରଫ କରିଥିଲା ।

ଦେଶରେ କରୋନା ସଂକ୍ରମଣ ସଂଖ୍ୟା ପ୍ରାୟ ୧୩ ହଜାର ପାଖାପାଖି ପହଞ୍ଚିଛି । ଗୁରୁବାର ଦିନ ୮୨୬ଟି ନୂଆ ମାମଲା ଚିହ୍ନଟ କରାଯିବା ସହିତ ରୋଗୀଙ୍କ ସଂଖ୍ୟା ୧୨,୭୫୯ କୁ ବୃଦ୍ଧି ପାଇଛି  । ଏପର୍ଯ୍ୟନ୍ତ ୪୨୦ ରୋଗୀଙ୍କ ମୃତ୍ୟୁ ହୋଇଥିବା ବେଳେ ୧,୫୧୪ ଜଣ କରୋନା ବିପକ୍ଷରେ ଯୁଦ୍ଧରେ ଜିତିଛନ୍ତି । ସ୍ୱାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ ଗତ ୨୪ ଘଣ୍ଟା ମଧ୍ୟରେ ୯୪୧ ଟି ନୂଆ ମାମଲା ହୋଇଥିବାବେଳେ ୩୭ ଜଣଙ୍କର ମୃତ୍ୟୁ ଘଟିଛି । ଏହିଭିତରେ ୩୦,୦୪୩ ଜାଞ୍ଚ ସହିତ, ଏପର୍ଯ୍ୟନ୍ତ ୨.୯୦ ଲକ୍ଷ ନମୁନା ପରୀକ୍ଷା କରାଯାଇଛି  ।

ସୂଚନା ଅନୁଯାୟୀ ଦେଶରେ ସଂକ୍ରମଣରୁ ମୃତ୍ୟୁ ତୁଳନା ଠାରୁ ୪ ଗୁଣା ଲୋକ ସଂକ୍ରମଣରୁ ଭଲ ହେଉଛନ୍ତି । ମନ୍ତ୍ରଣାଳୟର ଯୁଗ୍ମ ସଚିବ ଲବ ଅଗ୍ରୱାଲ କହିଛନ୍ତି ଯେ ୩୨୫ ଟି ଜିଲ୍ଲା ଅଛି ଯେଉଁଠାରେ ଏପର୍ଯ୍ୟନ୍ତ କୌଣସି ଲୋକ ସଂକ୍ରମିତ ହୋଇ ନାହାନ୍ତି । ଦେଶରେ ସଂକ୍ରମଣରେ ମୃତ୍ୟୁ ହାର ୩.୩ ପ୍ରତିଶତ ହୋଇଥିବା ବେଳେ ସୁସ୍ଥ ହେଉଥିବା ରୋଗୀଙ୍କ ପ୍ରତିଶତ ୧୨.୦୨ ରହିଛି ।

ସେପଟେ ପୂର୍ବରୁ ଯେଉଁ ଅଞ୍ଚଳ ଗୁଡ଼ିକରେ ସଂକ୍ରମଣ ଚିହ୍ନଟ କରାଯାଇଥିଲା ସେହି ଅଞ୍ଚଳରେ ଏବେ  ସବୁ କିଛି ଧିରେ ଧିରେ ଠିକ୍‌ ହେବାରେ ଲାଗିଲାଣି । ସେପଟେ ପୁଡୁଚେରୀର ମାହେ ଜିଲ୍ଲାରେ କୌଣସି ସକାରାତ୍ମକ ମାମଲା ୨୮ ଦିନ ହେବ ଆସିନାହିଁ  । କେବଳ ଏତିକି ନୁହେଁ, ୧୭ ଟି ରାଜ୍ୟର ୨୭ ଟି ଜିଲ୍ଲାରୁ ଗତ ୧୪ ଦିନ ମଧ୍ୟରେ କୌଣସି ସଂକ୍ରମିତଙ୍କ ସୂଚନା ଆସିନାହିଁ ।

ବଳରାମପୁର: ସମଗ୍ର ବିଶ୍ୱ କରୋନା ମହାମାରୀ ସହିତ ଲଢ଼ୁଛି। ଏହି ମାରାତ୍ମକ ଜୀବାଣୁ ଯୋଗୁଁ ଭାରତରେ ଲକଡାଉନ ଜାରି କରାଯାଇଛି । ଏହି କାରଣରୁ ଲୋକଙ୍କ କାର୍ଯ୍ୟ ବନ୍ଦ ହୋଇପଡିଛି ଏବଂ ଲୋକମାନେ ଘରେ ବନ୍ଦୀ ହୋଇ ରହିଛନ୍ତି। କିନ୍ତୁ ଏହି ଲକଡାଉନ ଭିତରେ ଜଣେ ଯୁବକ ବିବାହ କରିବା ପାଇଁ ପାଖାପାଖି ଏକ ହଜାର କିଲୋମିଟର ଲମ୍ବା ରାସ୍ତା ପାର କରିବାକୁ ସାହସ କରିଥିଲେ । | କିନ୍ତୁ ଦୁର୍ଭାଗ୍ୟକୁ ଗନ୍ତବ୍ୟ ସ୍ଥଳରେ ପହଞ୍ଚିବା ପୂର୍ବରୁ ଯୁବକ ପୋଲିସ ହାବୁଡରେ ପଡିଥିଲେ । ଆଉ ବିବାହ ବେଦୀକୁ ଯିବା ବଦଳରେ କ୍ୱାରେଣ୍ଟାଇନ୍ ହୋମରେ ପହଂଚିଥିଲେ ।

ନିଜ ବିବାହ ପାଇଁ ଉଛନ୍ନ ଥିବା ଏହି ଯୁବକ ଏବେ  ଉତ୍ତର ପ୍ରଦେଶର ବଳରାମପୁରର କ୍ୱାରେଣ୍ଟିନ ସେଣ୍ଟର ଅଛନ୍ତି । ଆସନ୍ତୁ ଜାଣିବ ପୁରା ଘଟଣାକ୍ରମ କଣଥିଲା ।  ସୋନୁ କୁମାର ଚୌହାନ ମହରାଜଗଞ୍ଜ ଜିଲ୍ଲାର ପିପଲା ରସୁଲପୁର ଗାଁର ବାସିନ୍ଦା । ପଞ୍ଜାବର ଲୁଧିଆନାରେ ଟାଇଲ୍ସ କାମ କରନ୍ତି ।

ଲକଡାଉନ ପରେ ଯେତେବେଳେ କାମ ବନ୍ଦ ହୋଇଗଲା ସୋନୁ କୁମାରଙ୍କୁ ନିଜ ଘରର ଚିନ୍ତା ଘାରିବାକୁ ଲାଗିଲା । ସୋନୁ କୁମାରଙ୍କ ଏପ୍ରିଲ ୧୫ ତାରିଖ ଦିନ ବାହାଘର ମଧ୍ୟ ଠିକ ହୋଇଯାଇଥିଲା । ତାଙ୍କ ବାହଘର ଗାଁଠୁ ପ୍ରାୟ ୨୫ କିମି ଦୂରରେ ହୋବାକୁ ଥିଲା ।

ସୋନୁ ନିଜ ଅନ୍ୟ ତିନି ସାଙ୍ଗଙ୍କ ସହିତ ସାଇକେଲ ଚଲେଇ ହିଁ ଲୁଧିଆନାରୁ ବାହାରି ପଡ଼ିଲା । ଛଅ ଦିନରେ ୮୫୦ କିମି ରାସ୍ତା ଅତ୍କ୍ରମ କରି ସୋନୁ ନିଜ ସାଙ୍ଗ ମାନଙ୍କ ସହ ବଳରାମପୁର ପହଞ୍ଚିଥିଲା । ଯେଉଁ ପୋଲିସ ତାଙ୍କୁ ଏହି ତାଙ୍କ ସାଙ୍ଗ ମାନଙ୍କୁ ସେଇଠି ଅଟକାଇ ଦେଇଥିଲେ । ପୋଲିସ ତାଙ୍କ ଆଗକୁ ଯିବାର ଅନୁମତି ଦେଇନଥିଲେ ।

ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ଲକଡାଉନ ମଧ୍ୟରେ ଜଣେ ମହିଳା ପୋଲିସ୍ ଜିପ୍ସିରେ ଏକ ଶିଶୁକୁ ଜନ୍ମ ଦେଇଛନ୍ତି। ଉଭୟ ମହିଳା ଏବଂ ଶିଶୁ ସୁସ୍ଥ ଅଛନ୍ତି। ପୋଲିସର ସୂଚନାନୁସାରେ, ଗୁରୁବାର ରାତି ପ୍ରାୟ ସାଢ଼େ ୯ଟା ବେଳେ ମିନି ନାମକ ଜଣେ ମହିଳା ତାଙ୍କ ସ୍ୱାମୀ ଏବଂ ପରିବାରଙ୍କ ସହ ଖିଲା ପୋଲିସ ଷ୍ଟେସନ ଅଞ୍ଚଳରେ ଥିବା ରଘୁବୀର ନଗର ପୋଲିସ ପୋଷ୍ଟରେ ପହଞ୍ଚି  ସେ ଗର୍ଭଯନ୍ତ୍ରଣା ଅନୁଭବ କରୁଥିବା କହିଥିଲେ। ଡାକ୍ତରଖାନାରେ ପହଞ୍ଚିବା ପାଇଁ ଏକ ଗାଡ଼ି ଦରକାର ବୋଲି କହିଥିଲେ । ସେଠାରେ ଉପସ୍ଥିତ ଥିବା ଜଣେ ମହିଳା ପୋଲିସ କର୍ମଚାରୀ ସୁମନ ତୁରନ୍ତ ଖିଲା SHO  କୁମାର କୁନ୍ଦନଙ୍କୁ ଏହା ବିଷୟରେ ଜଣାଇଥିଲେ।

ଏହା ପରେ ମହିଳାଙ୍କୁ ତୁରନ୍ତ ପୋଲିସ ଜିପ୍ସିରେ ବସି ଡାକ୍ତରଖାନା ନିଆଯାଇଥିଲା, କିନ୍ତୁ ଜିପ୍ସି ନିକଟ ଗୁପ୍ତା ନର୍ସିଂହୋମ ବାହାରେ ପହଞ୍ଚିବା ମାତ୍ରେ ମହିଳା ନିଜେ ଜିପ୍ସିରେ ଏକ ସନ୍ତାନ ଜନ୍ମ ଦେଇଥିଲେ। ଏହି ସମୟ ମଧ୍ୟରେ ମହିଳାଙ୍କ ସହ ଉପସ୍ଥିତ କର୍ମଚାରୀମାନେ ତାଙ୍କୁ ସାହାଯ୍ୟ କରିଥିଲେ। ପୋଲିସ ତୁରନ୍ତ ନର୍ସିଂହୋମ ଭିତରୁ ନର୍ସ ଏବଂ ଅନ୍ୟ କର୍ମଚାରୀଙ୍କୁ ଡାକିଥିଲା। ମହିଳା ଜଣକ ବର୍ତ୍ତମାନ ଏକ ନର୍ସିଂହୋମରେ ଅଛନ୍ତି ଏବଂ ଉଭୟ ପିଲା ଓ ମାଆ ସୁସ୍ଥ ଅଛନ୍ତି। ଏହାପୂର୍ବରୁ କିଡୱାଇ ନାଗରରେ ଜଣେ ମହିଳା ପୋଲିସ୍ ଜିପ୍ସିରେ ଏକ ଶିଶୁ କନ୍ୟାକୁ ଜନ୍ମ ଦେଇଥିଲେ।