ଭୁବନେଶ୍ୱର: ଓଡ଼ିଶାରେ ନାହିଁ କରୋନା ଭୟ । ଏ ଯାବତ ମିଳିଥିବା ସନ୍ଦିଗ୍ଧ ୧୬ଟି ନମୁନାରୁ ୧୪ଟି ରିପୋର୍ଟ ନେଗେଟିଭ ଆସିଛି । ଅନ୍ୟ ଦୁଇଟି ପରୀକ୍ଷା ରିପୋର୍ଟ ଆସିନାହିଁ । କିନ୍ତୁ କରୋନା ଆକ୍ରାନ୍ତ ଦେଶକୁ ଯାତ୍ରା ନକରିବାକୁ ପରାମର୍ଶ ଦେଲେ ସ୍ୱାସ୍ଥ୍ୟ ସଚିବ । ଚାଇନା , ହଙ୍ଗକଙ୍ଗ , ଦକ୍ଷୀଣ କୋରିଆ , ଜାପାନ, ଇଟାଲି, ସିଙ୍ଗାପୁର, ଇରାନ , ମାଲେସିଆ, ଫ୍ରାନ୍ସ, ସ୍ପେନ, ଆମେରିକା ,ୟୁକେ ଓ ଜର୍ମାନୀ ଯାତ୍ରା ନକରିବାକୁ କହିଲେ ବିଭାଗ ।

କରୋନା ସଂକ୍ରମଣ ଦେଶରୁ ଆସୁଥିବା ବ୍ୟକ୍ତି ୧୪ ଦିନ ପର୍ଯ୍ୟନ୍ତ ସତର୍କତା ଅବଲମ୍ବନ କରିବା ସହ ଆଇସୋଲେଟେଡ ହୋଇରୁହନ୍ତୁ ବୋଲି ପରାମର୍ଶ ଦେଲେ ସ୍ୱାସ୍ଥ୍ୟ ସଚିବ ।

ଅନ୍ୟପଟେ କରୋନା ଭାଇରସ ୧୧୦ ଦେଶକୁ ବ୍ୟାପିଛି । ୧ ଲକ୍ଷ ୨୦ ହଜାରରୁ ଅଧିକ ଲୋକ ଏହି ଭାଇରସରେ ଆକ୍ରାନ୍ତ ଅଛନ୍ତି ଏବଂ ଭାରତରେ ୬୦ ଲୋକ ଆକ୍ରାନ୍ତ ଅଛନ୍ତି । ଚାଇନା ପରେ ସବୁଠୁ ବେଶି ପ୍ରଭାବିତ ଦେଶ ହେଉଛି ଇଟାଲୀ । ଏଥିପାଇଁ କରୋନା ଆକ୍ରାନ୍ତ ଦେଶକୁ ନଯିବା ପାଇଁ ନିର୍ଦ୍ଦେଶନାମା ଜାରି କରାଯାଇଛି। ଭାରତରେ ଦିଲ୍ଲୀ, ରାଜସ୍ଥାନ, ଉତ୍ତରପ୍ରଦେଶ, ମହାରାଷ୍ଟ୍ର, ତେଲେଙ୍ଗାନା କର୍ଣ୍ଣାଟକ, କେରଳରେ ଚିହ୍ନଟ ହୋଇଛନ୍ତି କରୋନା ଭାଇରସ ସଂକ୍ରମିତ ରୋଗୀ ।

ସାନିଟାଇଜର ଓ ମାସ୍କର କଳାବଜାରୀ ରୋକିବା ପାଇଁ ସମସ୍ତ ଜିଲ୍ଲାପାଳ ଓ ଡ୍ରଗ କଣ୍ଟ୍ରୋଲଙ୍କୁ ମଧ୍ୟ ନିର୍ଦ୍ଦେଶ ଦିଆଯାଇଛି ।

ଭୁବନେଶ୍ୱର: ରାଜ୍ୟରେ ମାଓ ହିଂସା ହ୍ର।ସ ପାଇଛି। ଲୋକଙ୍କୁ ତୁରନ୍ତ ନ୍ୟାୟ ପ୍ରଦାନ ପାଇଁ ପ୍ରତିଷ୍ଠା ହୋଇଛି ୧୪ଟି ନୂଆ କୋର୍ଟ। ବିଧାନସଭାରେ ଆଜି ଉପସ୍ଥାପିତ ଷ୍ଟାଣ୍ଡିଂ କମିଟି ରିପୋର୍ଟରୁ ଏମିତି କିଛି ଗୁରୁତ୍ୱପୂର୍ଣ୍ଣ ତଥ୍ୟ ସାମ୍ନାକୁ ଆସିଛି। ଏସବୁ ଭିତରେ ମୋ ସରକାରର କାମକୁ ଖୁବ୍‌ ପ୍ରଂଶସା ମିଳିଛି ।

ରାଜ୍ୟରେ କମିଛି ମାଓବାଦୀ କାର୍ଯ୍ୟକଳାପ। ତ୍ୱରିତ ନ୍ୟାୟ ପାଇଁ ପ୍ରତିଷ୍ଠା ହୋଇଛି ୧୪ଟି ନୂଆ କୋର୍ଟ। ୧୧ଟି ଜେଏମଏଫସି, ଦୁଇଟି ଏଡିଜେ ଓ ଗୋଟିଏ ସିନିଅର ସିଭିଲ ଜଜ୍‌ କୋର୍ଟ କାର୍ଯ୍ୟକ୍ଷମ କରାଯାଇଛି। ୨୦୧୯ରେ ତିନୋଟି ଲ୍ୟାଣ୍ଡ ଆକ୍ୱିଜେସନ ରିହାବିଲିଟେସନ୍‌ ଆଣ୍ଡ ରିସେଟେଲମେଣ୍ଟ ଅଥରିଟିକୁ କଟକ, ସମ୍ବଲପୁର ଓ ବ୍ରହ୍ମପୁରଠାରେ ସ୍ଥାପନ କରାଯାଇଛି। ସ୍ପେସିଫିକ ରିଲିଫ୍‌ ଆକ୍ଟ ଆଧାରରେ ୭୬ଟି ସିନିଅର ସିଭିଲ ଜଜ୍‌ କୋର୍ଟକୁ ସ୍ୱତନ୍ତ୍ର କୋର୍ଟର ମାନ୍ୟତା ଦେଇଛନ୍ତି ସରକାର । ରିପୋର୍ଟ କହୁଛି,ରାଜ୍ୟରେ ଦଙ୍ଗା ମଧ୍ୟ କମିଛି। ନୂଆରେ ଆରମ୍ଭ ହୋଇଥିବା ଅଭିଯାନ-ମୋ ସରକାରକୁ ମଧ୍ୟ ଖୁବ୍‌ ପ୍ରଶଂସା ମିଳିଛି ।

ସେହିପରି ମାଓ ହିଂସା ପୂର୍ବାପେକ୍ଷା ଅନେକ କମିଛି। ତଥାପି କିଛି ମାଓପ୍ରବଣ ଜିଲ୍ଲାରେ ଏବେ ବି ମାଓବାଦୀଙ୍କ ଗତିବିଧି ଜାରି ରହିଛି। ୨୦୧୯ରେ ୪୪ଟି ମାଓବାଦୀ କାର୍ଯ୍ୟକଳାପ ରିପୋର୍ଟ ହୋଇଥିଲା। ୧୨ଟି ଘଟଣାରେ ପୋଲିସ ଓ ମାଓବାଦୀଙ୍କ ଭିତରେ ଗୁଳି ବିନିମୟ ହୋଇଛି । ୮ ଜଣ ମାଓବାଦୀ ସମାଜର ମୁଖ୍ୟସ୍ରୋତକୁ ଫେରିଛନ୍ତି । ୫୦ ଗିରଫ ଓ ୧୩ ଜଣ ଆତ୍ମସମର୍ପଣ କରିଛନ୍ତି ।

ଆଣ୍ଟି ନକ୍ସଲ୍‌ ଅପରେସନ ସମୟରେ ୨୧ଟି ବନ୍ଧୁକ, ୩୦ ଅତ୍ୟାଧୁନିକ ବିସ୍ଫୋରକ ଓ ବହୁ ଅସ୍ତ୍ରଶସ୍ତ୍ର ଜବତ ହୋଇଛି। ହେଲେ ତଥ୍ୟ କହୁଛି,ରାଜ୍ୟରେ ଅପରାଧ ହାର ବଢିଛି। ଦୁଷ୍କର୍ମ ମାମଲାରେ ମଧ୍ୟ ଦେଶ ଭଳି ରାଜ୍ୟର ସ୍ଥିତି। ୨୦୧୮ରେ ୧୦, ୭୪୦୮ ଅପରାଧିକ ମାମାଲ ଦାୟର ହୋଇଥିଲା। ୨୦୧୯ରେ ଏହା ବଢି ୧୨,୧୫୨୫କୁ ବୃଦ୍ଧି ପାଇଛି ।

ଭୁବନେଶ୍ୱର: ମହିଳା ଦିବସର ଦୁଇଦିନ ପରେ ମହିଳାଙ୍କୁ ମରଣାତ୍ମକ ଆକ୍ରମଣ। ରାଜଧାନୀରେ ଚାଞ୍ଚଲ୍ୟ । ସିସିଟିଭିରେ କଏଦ ଛାତିଥରା ଦୃଶ୍ୟ ଏବେ ରାଜଧାନୀକୁ ଥରାଇ ଦେଇଛି। ମହିଳାଙ୍କ ଅଭିଯୋଗ ପରେ କମିଶନରେଟ୍‌ ପୋଲିସ୍‌ ତଦନ୍ତ ଆରମ୍ଭ କରିଛି।

ପ୍ରଥମ ଦଫାରେ ଦୁଇ ଆକ୍ରମଣକାରୀଙ୍କୁ ଉଠାଇ ଆଣିବା ସହ ବିଭିନ୍ନ ସ୍ଥାନରେ ଚଢ଼ାଇ ଆରମ୍ଭ କରିଛି। ସେପଟେ ତିନିମାସ ତଳର ଏକ ଭିଡିଓ, ଯେଉଁଥିରେ ମହିଳା ଜଣଙ୍କ ଆକ୍ରମଣ କରୁଥିବାର ଦୃଶ୍ୟ ରହିଛି ତାହା ଏବେ ପୂରା ଘଟଣାରେ ଟୁଇଷ୍ଟ୍ ଆଣିଛି ।

ହୋଲି ଦିନ ମହିଳାଙ୍କୁ ୧୦ରୁ ଅଧିକ ଯୁବକ ତଳେ ପକାଇ ମାଡ଼ ମାରିଥିଲେ । ସିସିଟିଭିରେ କଏଦ ହୋଇଥିଲା ଏ ସମ୍ବେଦନଶୀଳ ଦୃଶ୍ୟ। ଅଭିଯୋଗ ଅନୁସାରେ ଏକ ଘରୋଇ ୟୁଥ୍‌ କ୍ଳବ୍‌ର ସଦସ୍ୟ ଏହି ଆକ୍ରମଣ ପଛରେ ଅଛନ୍ତି । ମଙ୍ଗଳବାର ଦିନ ହୋଲି ହଙ୍ଗାମା ଭିତରେ ମହିଳାଙ୍କ ଘର ଉପରକୁ ଟେକା ପଥର ମାଡ଼ ହୋଇଥିଲା। ଆଉ ବିରୋଧ କରିବାରୁ ତାଙ୍କ ଉପରେ ହୋଇଥିଲା ଆକ୍ରମଣ ।

ସିସିଟିଭି ଫୁଟେଜ୍‌କୁ ଆଧାର କରି ଅଭିଯ଼ୁକ୍ତଙ୍କୁ ଚିହ୍ନଟ କରିଛି ଲିଙ୍ଗରାଜ ଥାନା ପୋଲିସ୍‌। ବର୍ତ୍ତମାନ ସୁଦ୍ଧା ଦୁଇ ଆକ୍ରମୃଣାକାରୀଙ୍କୁ ଉଠାଇ ଆଣିଥିବା ବେଳେ ବିଭିନ୍ନ ସ୍ଥାନରେ ଜାରି ରଖିଛି ଚଢ଼ାଉ। ଜମିଜମା ବିବାଦକୁ ନେଇ ଆକ୍ରମଣ ହୋଇଥିବା ପ୍ରାଥମିକ ତଦନ୍ତରୁ ଜଣା ପଡିଛି।

କିନ୍ତୁ ଏବେ ତିନି ମାସ ତଳର ଗୋଟିଏ ଭିଡିଓ ଭାଇରାଲ ହେଉଛି ଯେଉଁଥିରେ ମହିଳା ଜଣଙ୍କ ଦେଖାଉଛନ୍ତି ଦବଙ୍ଗଗିରି। ଭିଡିଓରେ ସେ ଜଣେ ବ୍ୟକ୍ତିଙ୍କୁ ଆକ୍ରମଣ କରୁଥିବା ଦେଖିବାକୁ ମିଳିଛି । ଏହି ଭିଡିଓ ପୁରା ଘଟଣାକ୍ରମକୁ ଗୋଳମାଳିଆ କରିଦେଇଛି  ।

ନବରଙ୍ଗପୁର: ରାଇଘରରୁ କୁନ୍ଦେଇ ଯିବା ରାସ୍ତାରେ ଦୁର୍ଘଟଣା । ରାସ୍ତା କଡ଼ରେ ପ୍ରାୟ ୮ରୁ ୧୦ ଛାତ୍ରଛାତ୍ରୀ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ପଡ଼ି ଛଟପଟ ହେଉଛନ୍ତି । ଏହି ଦୃଶ୍ୟ ଦେଖି ହଠାତ୍ ଅଟକି ଯାଇଥିଲେ ସମସ୍ତ ପଥଚାରୀ । କ’ଣ ହେଇଛି କେମିତି ହୋଇଛି ଦୁର୍ଘଟଣା ବୁଝିବାକୁ ଜମିଥିଲା ଭିଡ଼ । କିନ୍ତୁ କିଛି ସମୟରେ ସବୁ ସ୍ପଷ୍ଟ ହୋଇ ଯାଇଥିଲା । ଆଦର୍ଶ ବିଦ୍ୟାଳୟର ୮ରୁ ୧୦ ଜଣ ଛାତ୍ରଛାତ୍ରୀ ଖରାପ ରାସ୍ତାକୁ ମରାମତି କରିବାକୁ ଏହି ଅଭିନବ ପ୍ରୟାସ କରିଥିଲେ ।

ଆଦର୍ଶ ବିଦ୍ୟାଳୟ କିଛି ଛାତ୍ରଛାତ୍ରୀଙ୍କ ଦ୍ୱାରା କାଳ୍ପନିକ ନାଟକ, ପ୍ରଶାସନକୁ ସଚେତନ କରାଇବା ସହ ଖରାପ ରାସ୍ତାକୁ ମରାମତି କରିବାକୁ ଏହି ଅଭିନବ ଉପାୟରେ ପ୍ରତିବାଦ କରିଥିଲେ l ନିଜ ଯାତାୟତ କରୁଥିବା ରାସ୍ତା ସମ୍ପୁର୍ଣ୍ଣ ବିପର୍ଯ୍ୟସ୍ତ ଯୋଗୁଁ ଆଜି ଅଭିନୟ ଜରିଆରେ ସରକାର ଏବଂ ପ୍ରଶାସନର ଦୃଷ୍ଟି ଆକର୍ଷଣ କରିଛନ୍ତି l ଆଜିର ଏହି ଘଟଣା ଚର୍ଚ୍ଚାର ବିଷୟ ପାଲଟିଛି l ଛାତ୍ରଛାତ୍ରୀ ନିଜେ ଅସୁରକ୍ଷିତ ହୋଇ ଯାତାୟତ କରୁଥିବା ବେଳେ ପ୍ରଶାସନ ସ୍ଥାନୀୟ ଲୋକ ପ୍ରତିନିଧି ଏଥି ପ୍ରତି ସ୍ୱତନ୍ତ୍ର ଦୃଷ୍ଟି ଦେବାକୁ ଅନୁରୋଧ କରିଛନ୍ତି । ଏହାସହ ବିଦ୍ୟାଳୟ ସମୟରେ ୯ରୁ ୧୦ ଏବଂ ୩ରୁ ୪ ଟା ସମୟ ପର୍ଯ୍ୟନ୍ତ ଯଦି ଭାରିଯାନ ଯିବା ଆସିବା ବନ୍ଦ କରିଦିଅନ୍ତି ତେବେ ଛାତ୍ରଛାତ୍ରୀ ମାନେ ଉପକୃତ ହୋଇପାରିବେ ବୋଲି ଅନୁରୋଧ କରିଛନ୍ତି ଛାତ୍ରଛାତ୍ରୀ । ଉମରକୋଟ ଠାରୁ ଖିଲଲି ଯାଏଁ ରାସ୍ତା ଏବେ ସମ୍ପୂର୍ଣ୍ଣ ଶୋଚନୀୟ, ପ୍ରତିଦିନ ଏହି ରାସ୍ତାରେ ୧୫ହଜାରରୁ ଊର୍ଦ୍ଧ୍ୱ ଗାଡ଼ି ଯାତାୟତ କରିଥାଏ ।