ଉମରକୋଟ: ନଷ୍ଟ ହେଲା ଜବତ ହୋଇଥିବା ଟିଫିନ୍‌ ବୋମା । ନବରଙ୍ଗପୁର ଜିଲ୍ଲାରେ ଠାବ କରାଯାଇଥିବା ଦୁଇଟି ଟିଫିନ୍‌ ବୋମାକୁ ସୁରକ୍ଷାକର୍ମୀ ସୁରକ୍ଷିତ ଭାବେ ବିସ୍ଫୋରଣ କରି ନଷ୍ଟ କରିଦେଇଛନ୍ତି ।

ନବରଙ୍ଗପୁର ଜିଲ୍ଲା ରାଇଘର ବ୍ଲକ୍‌ ସରଗୁଲି ଗାଁରୁ ଗତକାଲି ଦୁଇଟି ଟିଫିନ୍‌ ବୋମା ମିଳିଥିଲା । ରାଇଘର ଥାନା ପୋଲିସ କର୍ମଚାରୀ ତାକୁ ସୁରକ୍ଷିତ ଭାବେ ଜନବସତିଠାରୁ ଦୂରକୁ ସ୍ଥାନାନ୍ତର କରି ରାତିସାରା ଜଗି ରହିଥିଲେ ।

ଆଜି ବିଏସଏଫ୍‌ କର୍ମଚାରୀ ପହଞ୍ଚି ତାକୁ ସୁରକ୍ଷିତ ଭାବେ ବିସ୍ଫୋରଣ କରି ନଷ୍ଟ କରିଦେଇଛନ୍ତି । ଟିଫିନ୍‌ ବୋମା ମିଳିବା ପରେ ରାଇଘର ଅଞ୍ଚଳରେ ଆତଙ୍କ ସୃଷ୍ଟି ହୋଇଛି । ଏ ବୋମା କିଏ ଓ କାହିଁକୁ ଖଞ୍ଜିଥିଲା, ମାଓବାଦୀଙ୍କ କାମ କି ନୁହେଁ, ସେନେଇ ଖୋଳତାଡ଼ ଜାରି ରହିଛି ।

ଅନୁଗୋଳ: ମହଙ୍ଗା ପଡ଼ିଲା ମହିଳାଙ୍କୁ ଅସଦାଚରଣ । ବିଚ ରାସ୍ତାରେ ମହିଳା କରାଇଲେ ଉଠ୍‌ବସ୍‌ । ମହିଳାଙ୍କ ଧମକରେ କଣ୍ଡକ୍ଟର ମଧ୍ୟ ବଠ୍‌ବସ୍‌ ହେବାକୁ ବାଧ୍ୟ ହୋଇଥିଲେ । ଏଭଳି ଏକ ଘଟଣା ଅନୁଗୋଳ ଜିଲ୍ଲା ଆଠମଲ୍ଲିକ ମହାତ୍ମା ଗାନ୍ଧୀ ବସଷ୍ଟାଣ୍ଡରେ ଦେଖିବାକୁ ମିଳିଛି । ମହିଳାଙ୍କୁ ଦୁର୍ବ୍ୟବହାର କରିବା ଯୋଗୁଁ ଏଭଳି ଅବସ୍ଥା ଭୋଗିବାକୁ ପଡିଛି ।

ସୂଚନା ନୁଯାୟୀ, ଅନୁଗୋଳରୁ ଆଠମଲ୍ଲିକ ଆସୁଥିବା ଘରୋଇ ଶ୍ରୀରାମର ବସ କଣ୍ଡକ୍ଟର ମହିଳାଙ୍କୁ ବସ ଭିତରେ ଦୁର୍ବ୍ୟବହାର କରିଥିଲେ । କିନ୍ତୁ ମହିଳା ଜଣକ ବସ ଭିତରେ କିଛି ନକହି ଆଠମଲ୍ଲିକ ବସ ଷ୍ଟାଣ୍ଡ ରେ ପହଞ୍ଚିବାପରେ ଉକ୍ତ କଣ୍ଡକ୍ଟରଙ୍କ ନାମରେ ଅଭିଯୋଗ କରିଥିଲେ ।

ଶେଷରେ ସ୍ଥାନୀୟ ଲୋକେ ଓ ମହିଳା ଜଣଙ୍କ ଉକ୍ତ କଣ୍ଡକ୍ଟରଙ୍କୁ  କାନ ଧରି ବସ୍‌ଉଠ୍‌ କରାଇଥିଲେ । ଏହି ଦୃଶ୍ୟ ଏବେ ସୋସିଆଲ ମିଡିଆରେ ଭାଇରାଲ ହେଉଛି ।

ଉମରକୋଟ: ଆପେ ଆପେ ଜଳିଗଲା ବାଇକ୍‌ । ଘରେ ଥୁଆ ହୋଇଥିବା ବେଳେ କୌଣସି କାରଣରୁ ବାଇକ୍‌ଟି ଜଳିଯାଇଥିଲା । ପରେ ପାଣି ପକାଇ ନିଆଁକୁ ଲିଭାଇଥିଲେ ଉପସ୍ଥିତ ଲୋକେ । ଏମିତି ଏକ ଘଟଣା ଦେଖିଵାକୁ ମିଳିଛି ନଵରଙ୍ଗପୁର ଜିଲ୍ଲା ଉମରକୋଟ ସହରର ଗୁଲିପାଟଣା ସାହିରେ ।

ସୂଚନା ଅନୁଯାୟୀ, ଗୁଲିପାଟଣାରେ ରହୁଥିଵା ଶିଵାନନ୍ଦ ରାଉତ ଆଜି ସକାଳୁ ମନ୍ଦିର ଯିଵାପାଇଁ ନିଜ ହୋଣ୍ଡା ୟୁନିକର୍ଣ୍ଣ ବାଇକ୍‌ କୁ ଘରୁ ଵାହାର କରି ଵାହାରେ ରଖିଥିଲେ । ପରେ ଘର ଭିତରକୁ କୌଣସି କାମ ପାଇଁ ଯାଇଥିଲେ ।

କିଛି ସମୟ ପରେ ଘରୁ ଵାହାରି ଦେଖିବା ଵେଳକୁ ବାଇକ୍ ଟି ହୁତ୍‌ହୁତ୍‌ ହୋଇ ଜଳୁଛି । ପରେ ପାଣି ଢାଳି ନିଆଁ କୁ ଆୟତ କରିଥିଲେ ମଧ୍ୟ ବାଇକ୍‌ଟି ସମ୍ପୁର୍ଣ୍ଣ ଜଳିଯାଇଥିଲା । ତେଵେ ଵାଇକ୍‌ରେ କେମିତି ନିଆଁ ଲାଗିଲା ତାହା ଏବେ ଅସ୍ପଷ୍ଟ ରହିଛି ।

କେନ୍ଦୁଝର: କେନ୍ଦୁଝର ଜିଲ୍ଲା ତେଲକୋଇ ବନାଞ୍ଚଳ ଖୁଣ୍ଟାପଡ଼ା ଗାଁରେ ହାତୀ ଉପଦ୍ରପ । ୫ ଟିକିଆ ହାତୀପଲ ଗାଁରେ ପଶି ଖଳାରେ ଥିବା ଧାନକୁ ଖାଇବା ସହ ଧାନ ଜଗିବା ପାଇଁ ଥିବା ମଞ୍ଚା କୁ ଭାଙ୍ଗିଲେ । ସେପଟେ ମଞ୍ଚାରେ ଶୋଇଥିବା ଚାଷୀ ମଦନ ସାହୁ ଅଳ୍ପକେ ବର୍ତ୍ତିଲେ । ସେହିଭଳି ଗାଁର ସୁଶାନ୍ତ ପ୍ରଧାନ, କପିକେତନ ପ୍ରଧାନ, ବିଭୁତି ପ୍ରଧାନଙ୍କର ପ୍ରାୟ ୩୦ ବସ୍ତା ଧାନକୁ ହାତୀ ଖାଇବା ସହ ନଷ୍ଟ କରିଦେଇଛି ।

ଖାଲି ସେତିକି ନୁହଁ, କଦଳୀ ଗଛ ଓ ନଡ଼ିଆ ଗଛ କୁ ମଧ୍ୟ ନଷ୍ଟ କରିଛନ୍ତି ହାତୀ ପଲ । ଅନ୍ୟପଟେ ବନବିହାରୀପୁର ଓ କନ୍ତଲେଇ ଗାଁରେ ମଧ୍ୟ ସମାନ ଅବସ୍ଥା । ସେଠାରେ କୋବି ଫସଲ ନଷ୍ଟ କରିବା ସହ ଘର ଭିତରୁ ଧାନ ବସ୍ତା ଟାଣି ଖାଇଯାଇଛନ୍ତି ହାତୀ ।

ଲୋକେ ଭୟଭୀତ ଅବସ୍ଥାରେ ଅଛନ୍ତି । ବିଲରୁ ଧାନ ଅମଳ ସରିଯାଇଥିବାରୁ ଖାଦ୍ୟ ଅନ୍ୱେଷଣରେ ହାତୀପଲ ଗାଁ ମୁହାଁ ହେଉଥିବା ଜଣାପଡିଛି । ହାତୀପଲ ଗାଁ ପାଖରେ ଥିବାରୁ ଲୋକେ ଆତଙ୍କିତ ଅବସ୍ଥାରେ ଥିବା ବେଳେ ବନ ବିଭାଗ ହାତୀ ଉପରେ ନଜର ରଖିଛି ।