ଭୁବନେଶ୍ୱର: ଆଜିଠାରୁ ପ୍ରଥମ ପର୍ଯ୍ୟାୟ ଜେଇଇ ମେନ୍ ପରୀକ୍ଷା ଆରମ୍ଭ । ୯ ତାରିଖ ପର୍ଯ୍ୟନ୍ତ ଏହି ପରୀକ୍ଷା ଚାଲିବ । ଦେଶରେ ଥିବା ସମସ୍ତ ଘରୋଇ ଏବଂ ସରକାରୀ ଇଂଜିନିୟରିଂ କଲେଜରେ ସ୍ନାତକ ପାଠ୍ୟକ୍ରମରେ ନାମ ଲେଖାଇବା ପାଇଁ ଛାତ୍ରଛାତ୍ରୀ ମାନେ ପରୀକ୍ଷା ଦେଉଛନ୍ତି । ଏଥିପାଇଁ ଦେଶ ଓ ବିଦେଶରେ ୨୩୩ଟି  ସହରରେ ପରୀକ୍ଷା କେନ୍ଦ୍ର ହୋଇଥିବା ବେଳେ ଚଳିତ ବର୍ଷ ସର୍ବମୋଟ ୯ ଲକ୍ଷ ଛାତ୍ରଛାତ୍ରୀ ପରୀକ୍ଷା ଦେଉଛନ୍ତି । ଓଡିଶାରୁ ପ୍ରାୟ ୩୩ ହଜାର ଛାତ୍ରଛାତ୍ରୀ ପରୀକ୍ଷା ଦେବାପାଇଁ ନାମ ପଞ୍ଜିକରଣ କରିଛନ୍ତି । ଓଡ଼ିଶାର ୭ ଟି ସହରରେ ପରୀକ୍ଷା କେନ୍ଦ୍ର ହୋଇଛି । କଟକ, ଭୁବନେଶ୍ୱର, ବାଲେଶ୍ୱର, ଢେଙ୍କାନାଳ,ରାଉରକେଲା ଏବଂ ସମ୍ବଲପୁର ରେ ପରୀକ୍ଷା କେନ୍ଦ୍ର କରାଯାଇଛି ।

ପ୍ରଥମ ସିଟିଂ ୯.୩୦ରୁ ଆରମ୍ଭ ହୋଇ ୧୨.୩୦ରେ ସରିବ । ସେହିପରି ୨ୟ ସିଟିଂ ୨.୩୦ରୁ ଆରମ୍ଭ ହୋଇ ୫.୩୦ରେ ସରିବ । ୨ ଘଣ୍ଟା ପୂର୍ବରୁ ଛାତ୍ର ଛାତ୍ରୀ ମାନେ ପରୀକ୍ଷା କେନ୍ଦ୍ରକୁ ପ୍ରବେଶ କରିବେ । ଆଡମିଟ୍ କାର୍ଡ, ପାସପୋର୍ଟ ସାଇଜ ଫଟୋ ଏବଂ ପରିଚୟପତ୍ରକୁ ବାଧ୍ୟତାମୂଳକ କରାଯାଇଛି । ପରୀକ୍ଷାର୍ଥୀ ମାନେ ସାଙ୍ଗରେ କୌଣସି ବୈଦ୍ୟୁତିକ ସଂରଞ୍ଜାମ ନେଇପାରିବେ ନାହିଁ ।

ଏଟିଏ ବା ନ୍ୟାସନାଲ ଟେଷ୍ଟିଙ୍ଗ ଏଜେନ୍ସି ପକ୍ଷରୁ ଏହି ପରୀକ୍ଷା ପରିଚାଳନା କରାଯାଉଛି । ଜାନୁଆରୀ ୩୧ ରେ ଏହାର ଫଳ ପ୍ରକାଶ ପାଇବ । ଏପ୍ରିଲ ୩ ରୁ ୯ ଯାଏଁ ୨ୟ ପର୍ଯାୟ ଜେଇଇ ମେନ୍ ପରୀକ୍ଷା ଅନୁଷ୍ଠିତ ହେବ ।

ଭୁବନେଶ୍ୱର: ଆଜି ସୁପ୍ରିମକୋର୍ଟରେ ବଂଶଧାରା ଜଳ ବିବାଦ ମାମଲାର ଶୁଣାଣି ହେବ । ଜଷ୍ଟିସ ଡି. ୱାଇ ଚନ୍ଦ୍ରଚୂଡ଼ ଏବଂ ଜଷ୍ଟିସ ହୃଷିକେଶ ରାୟଙ୍କୁ ନେଇ ଗଠିତ ୨ ଜଣିଆ ଖଣ୍ଡପୀଠ ମାମଲାର ଶୁଣାଣି କରିବେ । ବଂଶଧାରା ଜଳ ବିବାଦର ଟ୍ରିବୁନାଲକୁ ଚାଲେଞ୍ଜ କରି ଓଡ଼ିଶା  ସୁପ୍ରିମକୋର୍ଟ ଯାଇଛି । ଗତ ଏପ୍ରିଲରେ ନିଜ ରାୟ ପ୍ରକାଶ କରିଥିଲେ । ଯେଉଁଥିରେ ଓଡ଼ିଶାର ସ୍ୱାର୍ଥକୁ ଅଣଦେଖା କରାଯାଇଥିବା ରାଜ୍ୟ ଅଭିଯୋଗ କରିଥିଲା ।

ଆନ୍ଧ୍ରପ୍ରଦେଶ ପକ୍ଷରୁ ନିର୍ମାଣ କରାଯାଉଥିବା ନେରେଡି ପ୍ରକଳ୍ପ ପାଇଁ ୧୦୬ ଏକର ଜମି ଅଧିଗ୍ରହଣ ପାଇଁ ଓଡ଼ିଶାକୁ ନିର୍ଦ୍ଦେଶ ଦିଆଯାଇଥିଲା । ତେବେ ଓଡ଼ିଶା ପକ୍ଷରୁ ପ୍ରକଳ୍ପ ଡିଜାଇନ ମଗାଯାଇଥିଲେ ମଧ୍ୟ ଏନେଇ କୈାଣସି ନିର୍ଦ୍ଦେଶନାମା ନଥିଲା ।ଗତ ଡିସେମ୍ବର ୧୬ ରେ ମାମଲାର ଶୁଣାଣି ଥିଲା, ମାତ୍ର ଓଡ଼ିଶା ଅଧିକ ସମୟ ମାଗିବାରୁ ଶୁଣାଣି ହୋଇପାରିନଥିଲା ।

ଅନୁଗୋଳ: ଖୋଲାଖୋଲି ଚାଲିଛି ଅନ୍ଧବିଶ୍ୱାସର ନାଟକ । ବିଶ୍ୱାସର ଦ୍ଵାହି ଦେଇ ଚାଲିଛି ଅନ୍ଧବିଶ୍ୱାସର ଖେଳ । କେବଳ ସାଧାରଣ ଜନତା ନୁହନ୍ତି, ଏଠି ବିଧାୟକ ମଧ୍ୟ । ଏ ଦୃଶ୍ୟ ହେଉଛି ଆଠ ମଲ୍ଲିକ ଆମ୍ବସରମୁଣ୍ଡାର। ଆଉ ଇଏ ହେଉଛନ୍ତି ଆଠମଲ୍ଲିକ ବିଧାୟକ ରମେଶ ସାଏ । ଆମ୍ବସରମୁଣ୍ଡା ଗାଁରେ ଗଣ୍ଡ ସମାଜର ଜାତିଦେବୀଙ୍କ ପୂଜା ଥିଲା ।

ପୂଜାରେ ଘଣ୍ଟ, ଶଙ୍ଖ ଓ ବାଦ୍ୟର ତାଳେତାଳେ ମା’ଙ୍କ ଶୋଭାଯାତ୍ରା ଚାଲିଥିଲା ।ହେଲେ ଶୋଭାଯାତ୍ରା ବେଳେ ବିଧାୟକଙ୍କ ଦେହରେ କୁଆଡ଼େ କାଳିସୀ ବିଜେ କରିଥିଲେ ବୋଲି କୁହାଯାଉଛି । ଖଣ୍ଡା ଧରି ଝୁମିଥିଲେ ବିଧାୟକ ରମେଶ ସାଏ । ଇଏ ହେଉଛି ସେ ସମୟର ଦୃଶ୍ୟ । ଦେଖନ୍ତୁ ମୁଣ୍ଡରେ ନାଲି ପଗଡ଼ି, ବେକରେ ଫୁଲମାଳ ସହ ଖଣ୍ଡା ଧରିଛନ୍ତି ବିଧାୟକ ।

ଆଉ ତାଙ୍କ ଦେହରେ ଦେବୀ ଉଭା ହୋଇଥିବା ଭାବି ତାଙ୍କୁ ପୂଜାର୍ଚ୍ଚନା କରୁଛନ୍ତି ଗଣ୍ଡ ସମାଜର ଲୋକ । ଧୂପ, ଦୀପ, ଫୁଲ, ଚନ୍ଦନ ଦେଇ ପୂଜା ଚାଲିଛି । ଶହଶହ ଲୋକଙ୍କ ଆଗରେ ଚାଲିଛି ଅନ୍ଧବିଶ୍ୱାସର ଏ ଖେଳ । ଖୋଦ୍‌ ବିଧାୟକଙ୍କ ଦେହରେ କାଳିସୀ ବିଜେ କରିଥିବା ଲୋକ କହୁଛନ୍ତି । ଦେବୀଙ୍କ ଆବିର୍ଭାବ ଭାବି ଚାଲିଛି ପୂଜାର୍ଚ୍ଚନା । ହେଲେ ପ୍ରଶ୍ନ ଉଠୁଛି, ଏ କି ମାନସିକତା ? ତେବେ ଏନେଇ ବିଧାୟକ ରମେଶ ସାଏଙ୍କ ପ୍ରତିକ୍ରିୟା ମିଳିପାରିନାହିଁ।

ଟାଙ୍ଗୀ: ରାସ୍ତା ଉପରେ ରଖା ଯାଇଛି ୧୦୮ ଆମ୍ବୁଲାନ୍ସ  । ଆଉ ଆମ୍ବୁଲାନ୍ସ ଭିତରେ ଡ୍ରାଇଭର ବାବୁଙ୍କର ଖୋଲିଛି ମଦର ଆସର । ପଚାରିଲେ ଗାଡ଼ିଚାଳକ କହୁଛନ୍ତି ଏସବୁ ମଦ ନୁହଁ କୋଲ୍ଡ ଡ୍ରିଙ୍କ୍‌ସ । ଏଭଳି ଏକ ଦୃଶ୍ୟ ଦେଖିବାକୁ ମିଳିଛି ନୟାଗଡ଼ ଜିଲ୍ଲାର ରଣପୁର ଅଞ୍ଚଳରେ ।

ସୂଚନା ଅନୁଯାୟୀ, ଏହି ୧୦୮ ଆମ୍ବୁଲାନ୍ସ କୌଣସି କାର୍ଯ୍ୟରେ ନଯାଇ ଗାଡ଼ିକୁ ଗଛ ତଳେ ଲଗାଇଦେଇ ଆରମ୍ଭ କରିଥିଲେ ମଦର ଆସର । ଗାଡ଼ି ଭିତରେ ଡ୍ରାଇଭରଙ୍କ ସମେତ ଆଉ ଦୁଇଜଣ ମିଶି ପିଉଥିଲେ ମଦ । ଏହି ସମୟରେ ଆମର ପ୍ରତିନିଧି ଯାଇ ସେଠାରେ ପହଞ୍ଚିଥିଲେ ।

କାହିଁକି ମଦ ପିଉଛ ବୋଲି ପଚାରିବାରୁ ଡ୍ରାଇଭର ଜଣକ ଏ ମଦ ନୁହେଁ କୋଲ୍ଡ ଡ୍ରିଙ୍କ୍ସ ବୋଲି ଯୁକ୍ତି କରିଥିଲେ । ଆପଣ ମାନଙ୍କୁ ଜଣାଇଦେବକୁ ଚାହୁଁଛୁ ଏହି ଗାଡ଼ିକୁ ଖୋର୍ଦ୍ଧା ଜିଲ୍ଲା ଟାଙ୍ଗୀ ବ୍ଲକର ବଡ଼ ପୋଖରିଆ ସ୍ୱାସ୍ଥ୍ୟ କେନ୍ଦ୍ରରେ ମୁତୟନ କରାଯାଇଛି ।

ଏବେ ଏଠି ପ୍ରଶ୍ନ ଉଠୁଛି, ଏଭଳି ଡ୍ରାଇଭରଙ୍କ ଅବହେଳା ଯୋଗୁଁ  ବୋଧେ କେଉଁଠି ପ୍ରସବ ପୀଡ଼ାରେ ମହିଳା ଟିଏ ଡାକ୍ତରଖାନା ଆସିପାରୁନି ତ କେଉଁଠି ରାସ୍ତା ଉପରେ ଶିଶୁକୁ ଜନ୍ମ ହେଉଛି ମହିଳା ।