ନୂଆଦିଲ୍ଲୀ : ଓଡ଼ିଶା ହାଇକୋର୍ଟର ବରିଷ୍ଠ ବିଚାରପତି କୁମାରୀ ଜଷ୍ଟିସ୍ ସଞ୍ଜୁ ପଣ୍ଡା ହାଇକୋର୍ଟର ପରବର୍ତ୍ତୀ ମୁଖ୍ୟ ବିଚାରପତି ହେବେ । କେନ୍ଦ୍ର ଆଇନ୍ ମନ୍ତ୍ରାଳୟ ପକ୍ଷରୁ ଆଜି ଏ ନେଇ ବିଜ୍ଞପ୍ତି ପ୍ରକାଶ ପାଇଛି । ରାଷ୍ଟ୍ରପତି ରାମନାଥ କୋବିନ୍ଦ ଜଷ୍ଟିସ୍ ପଣ୍ଡାଙ୍କ ନାଁରେ ଅନୁମୋଦନ ପରେ କେନ୍ଦ୍ର ଆଇନ ବିଭାଗ ବିଜ୍ଞପ୍ତି ପ୍ରକାଶ କରିଛି ।
ବର୍ତ୍ତମାନ ଓଡ଼ିଶା ହାଇକୋର୍ଟର ମୁଖ୍ୟ ବିଚାରପତି ଥିବା କେ.ଏସ୍ ଜାଭେରୀଙ୍କ ଅବସର ପରେ ନୂଆ ମୁଖ୍ୟ ବିଚାରପତି ହେବେ ଜଷ୍ଟିସ୍ ପଣ୍ଡା। ଆସନ୍ତାକାଲି ସେ ଶପଥ ନେବେ ବୋଲି ଜଣାପଡ଼ିଛି ।
ବଲାଙ୍ଗୀର: ବାହା ହେବାକୁ ଜିଦ୍ ଧରିବାରୁ ପ୍ରେମିକାଙ୍କୁ ଦୁଷ୍କର୍ମ ପରେ ଗଳାକାଟି ଜଙ୍ଗଲରେ ଫିଙ୍ଗିଦେଲା ସୈତାନ ପ୍ରେମିକ । ବଲାଙ୍ଗୀର ଜିଲ୍ଲା ତୁଷରା ଅଞ୍ଚଳରେ ଏହି ଘଟଣା ଘଟିଛି । ଯୁବତୀଙ୍କୁ ମୁମୁର୍ଷୂ ଅବସ୍ଥାରେ ଉଦ୍ଧାର କରାଯାଇଥିବା ବେଳେ ଯୁବକକୁ ଗିରଫ କରିଛି ପୋଲିସ । କଳାହାଣ୍ଡି ଜିଲ୍ଲା ନର୍ଲା ଅଞ୍ଚଳର ଜଣେ ଯୁବତୀ ଓ ବଲାଙ୍ଗୀର ଜିଲ୍ଲା ତୁଷରା ଥାନା ତେନ୍ତୁଲିଖୁଣ୍ଟି ଗାଁର ଛବିଲାଲ ଭୋଇଙ୍କ ମଧ୍ୟରେ ପ୍ରେମ ସମ୍ପର୍କ ଥିଲା ।
ଦେଢ଼ବର୍ଷ ତଳେ ସେମାନେ ତାମିଲନାଡୁ ପଳାଇଥିଲେ । ବାହା ହେବାକୁ ଯୁବତୀ ଜିଦ୍ ଧରିବାରୁ ଗୁରୁବାର ସେମାନେ ଆସି ବଲାଙ୍ଗୀର ରେଳ ଷ୍ଟେସନରେ ପହଞ୍ଚିଥିଲେ । ପରେ ଛବିଲାଲର ଭିଣୋଇ ସହ ସେମାନେ ଯାଇଥିଲେ ସଇଁତଲା । ସେଠାରୁ ରାତିରେ ଘରକୁ ଫେରିବା ବେଳେ ଯୁବତୀଙ୍କୁ ସିକେରପାଟ ଜଙ୍ଗଲରେ ଦୁଷ୍କର୍ମ କରିବା ପରେ ଛୁରିରେ ଯୁବତୀଙ୍କ ଗଳା କାଟି ଫିଙ୍ଗି ଦେଇଥିଲା ଛବିଲାଲ୍ ।
ଯୁବତୀ ମରି ଯାଇଥିବା ଭାବି ସେ ପଳାଇଥିଲା । ଯୁବତୀ ରାତିରେ ଗୁରୁତର ଅବସ୍ଥାରେ ଜଙ୍ଗଲରୁ ବାହାରକୁ ଆସିବା ପରେ ସକାଳେ ପୋଲିସ ତାଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରିଛି । ପ୍ରତାରକ ପ୍ରେମିକ ତଥା ହତ୍ୟା ଉଦ୍ୟମ କରିଥିବା ଛବିଲାଲ୍ ଭୋଇକୁ ପୋଲିସ ଗିରଫ କରିଛି ।
ଜଳେଶ୍ୱର: ବାଲେଶ୍ଵର ନାବାଳିକା କଲେଜ ଛାତ୍ରୀଙ୍କ ବେକ କାଟିଦେବା ଘଟଣା । ଏହି ଘଟଣାରେ ଅଭିଯୁକ୍ତ ବିଶ୍ୱଜିତ ନାଥକୁ ଗିରଫ କରିଛି ପୋଳିସ । ପଶ୍ଚିମବଙ୍ଗରେ ଲୁଚିଥିବା ବେଳେ ପୋଲିସର ଏକ ସ୍କ୍ୱାର୍ଡ ଗିରଫ କରିଛି । ଏଭଳି ଘଟଣା ବାଲେଶ୍ଵର ଜିଲ୍ଲା ଭୋଗରାଇ ଥାନା ଅନ୍ତର୍ଗତ ଦେହୁରଦା ଗାଁରେ ଦେଖିବାକୁ ମଳିଥିଲା ।
ସୂଚନା ଅନୁଯାୟୀ, ଅଭିଯୁକ୍ତ ସାର ଛାତ୍ରୀଙ୍କୁ ଏକ ତରଫା ପ୍ରେମ କରୁଥିଲେ । ଛାତ୍ରୀ ଜଣଙ୍କ ତାଙ୍କୁ ମନା କରିଦେବାରୁ ଜାନୁଆରୀ ଦୁଇ ତାରିଖରେ ଟ୍ୟୁସନ ସାର ଛାତ୍ରୀଙ୍କ ବେକକୁ ଧାରୁଆ ଅସ୍ତ୍ରରେ କାଟି ଦେଇଥିଲେ । ଫଳରେ ତାଙ୍କୁ ଗୁରୁତର ଅବସ୍ଥାରେ ବାଲେଶ୍ଵର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା ।ସେଠାରେ ତାଙ୍କର ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ଡାକ୍ତର କଟକ ଏସ୍ସିବି ମେଡିକାଲକୁ ସ୍ଥାନାନ୍ତର କରିଛନ୍ତି ।
ଅନ୍ୟପଟେ ମୁଖ୍ୟ ଅଭିଯୁକ୍ତକୁ ଗିରଫ କରି କଠୋର କାର୍ଯ୍ୟାନୁଷ୍ଠାନ ପାଇଁ ପରିବାର ଲୋକେ ଦାବି କରିଥିଲେ । ଅଭିଯୋଗକୁ ଆଧାର କରି ଆଜି ଭୋଗରାଇ ପୋଲିସର ଏକ ସ୍ୱତନ୍ତ୍ର ଟିମ୍ ପଶ୍ଚିମବଙ୍ଗରୁ ଅଭିଯୁକ୍ତ ବିଶ୍ୱଜିତ ନାଥଙ୍କୁ ଗିରଫ କରି କୋର୍ଟ ଚାଲାଣ କରିଛି ।
ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉଦ୍ୟମରେ ଓଡ଼ିଶା ଆଜି ସ୍ପୋର୍ଟ୍ସ କ୍ୟାପିଟାଲ ହୋଇଛି । କ୍ରୀଡା କ୍ଷେତ୍ରରେ ଓଡ଼ିଶା ଆଗଉଛି ବୋଲି କହିଛନ୍ତି ପୂର୍ବତନ କ୍ରିକେଟର ଅନିଲ କୁମ୍ବଲେ । ଆଜି ଲୋକସେବା ଭବନରେ ଆରମ୍ଭ ହୋଇଥିବା ଓଡ଼ିଶା ନଲେଜ୍ ହବ ଲେକଚର ସିରିଜ୍ରେ ଅନିଲ ଯୋଗଦେଇ ଏହା କହିଛନ୍ତି ।
ରାଜ୍ୟ ସରକାରଙ୍କ ଯୋଜନା ଓ ସଂଯୋଜନା ବିଭାଗ ପକ୍ଷରୁ ଆୟୋଜିତ ହେଉଛି ଓକେଏଚ୍ ଓଡ଼ିଶା ନଲେଜ୍ ହବ ଲେକଚର ସିରିଜ୍ । ଏହି ସିରିଜ୍ରେ ଏବେ ଦ୍ଵାବିଂଶ ବକୃତା ପ୍ରଦାନ କାର୍ଯ୍ୟକ୍ରମ ଅନୁଷ୍ଠିତ ହୋଇଛି । ଏଥିରେ ‘ଭାରତୀୟ କ୍ରୀଡା-ଏକ ଅନ୍ତର୍ଦୃଷ୍ଟି’ ଉପରେ ବକ୍ତବ୍ୟ ପ୍ରଦାନ କରିଛନ୍ତି ପୂର୍ବତନ କ୍ରିକେଟର ଅନିଲ କୁମ୍ବଲେ । ଏହି ଅବସରରେ ସେ ଓଡ଼ିଶା ସରକାରଙ୍କ ଭୂୟସୀ ପ୍ରଶଂସା କରିଛନ୍ତି ।
କାର୍ଯ୍ୟକ୍ରମରେ ୫-ଟି ସଚିବ ଭି. କାର୍ତ୍ତିକେୟ ପାଣ୍ଡିଆନ୍, ମିଶନ ଶକ୍ତି ନିର୍ଦ୍ଦେଶିକା ସୁଜାତା କାର୍ତ୍ତିକେୟନ, ଉନ୍ନୟନ କମିଶନର ସୁରେଶ ମହାପାତ୍ରଙ୍କ ସମେତ ବିଭିନ୍ନ ବିଭାଗର ସଚିବ ମାନେ ଉପସ୍ଥିତି ରହିଥିଲେ ।
କେନ୍ଦୁଝର: ନାବାଳିକାଙ୍କ ସହ ଗଣଦୁଷ୍କର୍ମ । ତା’ପରେ ସଡ଼କ ଦୁର୍ଘଟଣା । ପୀଡ଼ିତା ଏବେ ଗୁରୁତର ଅବସ୍ଥାରେ ଚିକିତ୍ସାଧୀନ ଅଛନ୍ତି । କେନ୍ଦୁଝର ଜିଲ୍ଲା ଝୁମ୍ପୁରା ଅଞ୍ଚଳରେ ଏହି ଘଟଣା ଘଟିଛି ।
ସୂଚନା ଅନୁଯାୟୀ, ନାବାଳିକା ଜଣଙ୍କ ହାଟକୁ ଯାଇଥିବା ବେଳେ ଜଗା ଓ ବିକି ନାମକ ଦୁଇଜଣ ଯୁବକ ତାଙ୍କୁ ଜବରଦସ୍ତ ଉଠାଇ ନେଇ ଦୁଷ୍କର୍ମ କରିଥିବା ଅଭିଯୋଗ ହୋଇଛି । ଦୁଷ୍କର୍ମ ପରେ ରାତିରେ ବାଇକ୍ରେ ଆଣିବା ବେଳେ ନାବାଳିକା ଜଣକ ଗାଡ଼ିରୁ ପଡ଼ି ଯାଇ ଆହତ ହୋଇଛନ୍ତି । ପରେ ଦୁର୍ବୃତ୍ତ ତାଙ୍କୁ ଆଣି ଘର ପାଖରେ ଫିଙ୍ଗି ଦେଇ ପଳାଇଛନ୍ତି । ନାବାଳିକାଙ୍କୁ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ।
ସ୍ୱେଚ୍ଛାସେବୀ ଅନୁଷ୍ଠାନ ‘ସଖୀ ଓ୍ୱାନ୍ ଷ୍ଟପ୍’ ସହାୟତାରେ ଝୁମ୍ପୁରା ଥାନାରେ ଅଭିଯୋଗ ପରେ ତଦନ୍ତ ଆରମ୍ଭ କରିଛି ପୋଲିସ । ଅଭିଯୁକ୍ତଙ୍କୁ ଶୀଘ୍ର ଗିରଫ କରାଯିବ ବୋଲି ପୋଲିସ କହିଛି ।
କଟକ: ଜେଲ ଭିତରୁ ସକିଲ ଭିଡିଓ କଲରେ ଦାଦା ବଟି ମାଗିବା ଘଟଣା । ପୋଲିସ ସ୍କାନରରେ ସକିଲର ୩ ନମ୍ବର ଗାର୍ଲଫ୍ରେଣ୍ଡ । ପୂର୍ବରୁ ଦୁଇ ଗାର୍ଲଫ୍ରେଣ୍ଡ ଗିରଫ ହୋଇ ସାରିଥିବା ବେଳେ, ୩ ନମ୍ବର ଗାର୍ଲଫ୍ରେଣ୍ଡଙ୍କୁ ଧରିବାକୁ ଯୋଜନା କରୁଛି ପୋଲିସ ।
ଏମାନେ ସକିଲ ସହ ଜେଲରେ ଦେଖାକରିବା ବାହାନାରେ ଦାଦା ବଟି ଅପରେଟ ପାଇଁ ଯୋଜନା କରୁଥିଲେ । ଏନେଇ ଜେଲବିଭାଗକୁ ଡିସିପି ଏକ ଚିଠି ଲେଖିଛନ୍ତି । ସେପଟେ ଗିରଫ ଗାର୍ଲଫ୍ରେଣ୍ଡକୁ ପୁଲିସ ଅଟକ ରଖିବା ସହିତ ପଚରାଉଚରା ଜାରି ରଖିଛି ।
ଜେଲର ଚାରିକାନ୍ଥ ଭିତରେ ସକିଲ ଗ୍ୟାଙ୍ଗ ଲିଡ୍ ରୋଲରେ ରହୁଥିବାବେଳେ ଗ୍ୟାଙ୍ଗର ସଙ୍ଗଠିତ ଓ ପରିଚାଳନାର ଦାୟିତ୍ୱ ସମ୍ଭାଳୁଥିଲେ ଗାର୍ଲଫ୍ରେଣ୍ଡ ।
ପୁରୀ: ପୁରୀ ଜିଲ୍ଲା ବଳଙ୍ଗା ଦୁଷ୍କର୍ମ ମାମଲାରେ ନୂଆମୋଡ଼ । ମାଜିଷ୍ଟ୍ରେଟ୍ଙ୍କ ସାମ୍ନାରେ ସଂପୃକ୍ତ ମହିଳାଙ୍କ ବୟାନ ରେକର୍ଡ ବେଳେ ଦୁଷ୍କର୍ମ ଅଭିଯୋଗ କରିନଥିବା ଜଣାପଡ଼ିଛି । ବିଶ୍ୱସ୍ତ ସୂତ୍ରରୁ ଏହି ସୂଚନା ମିଳିଛି ।
ଧାରା ୧୬୪ ଅନୁସାରେ କୋର୍ଟରେ ମହିଳାଙ୍କ ବୟାନ ରେକର୍ଡ କରାଯାଇଥିଲା । କୋର୍ଟରେ ମହିଳା ଦୁଷ୍କର୍ମ ଅଭିଯୋଗ ନେଇ କିଛି କହି ନଥିବା ସୂଚନା ମିଳିଛି । ଅନ୍ୟପକ୍ଷରେ ଧାରା ୧୬୧ ଅନୁସାରେ ମହିଳାଙ୍କ ବୟାନକୁ ଭିତ୍ତି କରି ବଳଙ୍ଗା ଥାନା ଏ.ଏସ୍.ଆଇ. ଚିତ୍ତରଞ୍ଜନ ଦାସଙ୍କୁ ଗିରଫ ପରେ ଚାକିରିରୁ ସସ୍ପେଣ୍ଡ କରାଯାଇଛି ।
ଚାନ୍ଦବାଲି: ଉଦ୍ଧାର ହେଲା ଦୁଇପରରେ ଛିଡ଼ା ହେଉିଥିବା ବିରଳ ମାଛ । ଏଭଳି ମାଛ ଚାନ୍ଦବାଲି ସ୍ଥିତ ସ୍ଥାନୀୟ ଖ୍ରୀଷ୍ଟିୟାନ ପୋଖରୀରୁ ଉଦ୍ଧାର ହୋଇଛି । ଉଦ୍ଧାର ହେବାପରେ ସେହି ମାଛକୁ ଦେଖିବା ପାଇଁ ସ୍ଥାନୀୟ ଲୋକଙ୍କ ଭିଡ଼ ଜମିଥିଲା ।
ସୂଚନା ଅନୁଯାୟୀ, ଆଜି ସକାଳୁ କିଛି ମତ୍ସ୍ୟଜୀବୀ ମାଛ ଧରିବାକୁ ପୋଖରୀକୁ ଯାଇଥିଲେ । ମାଛ ଧରିବା ବେଳେ ଜାଲରେ ଏକ ବିରଳ ପ୍ରଜାତିର ମାଛ ଫସିଥିଲା । ଏହି ମାଛ ତାର ଦୁଇ ପର ସାହାଯ୍ୟରେ ମାଟି ଉପରେ ଛିଡ଼ା ହୋଇପାରୁଛି ଏବଂ ଶବ୍ଦ ମଧ୍ୟ କରୁଛି । ମାଛଟିର ୪ ଟି ଆଖି ରହିଥିବା ବେଳେ ଓଜନ ୨ କିଲୋଗ୍ରାମ ରହିଛି । ତାର ପିଠି ଓ ଲାଞ୍ଜ ଅଧିକ ଟାଣ ଓ କୁମ୍ଭୀର ଚମଡା ପରି ହୋଇଛି ।
ସ୍ଥାନୀୟ ମତ୍ସ୍ୟଜୀବୀ ମାନେ ଏହି ମାଛକୁ ଆଳଙ୍କରିକ ବା ଆକ୍ଟିଫିସିଆଲ ବ୍ଲାକ ଡାଇମଣ୍ଡ ମାଛ ବୋଲି ପ୍ରକାଶ କରିଛନ୍ତି । ଏହି ମାଛକୁ ଦେଖିବା ପାଇଁ ସେଠାରେ ଲୋକଙ୍କର ଭିଡ଼ ଜମିଥିଲା । ସେପଟେ ମାଛକୁ ପୁଣିଥରେ ପୋଖରୀକୁ ଛାଡ଼ି ଦିଆଯାଇଛି ।
ପୁରୀ: ପୁରୀରେ ପାକିସ୍ତାନୀ ହିନ୍ଦୁ ପର୍ଯ୍ୟଟକ । ହାତରେ ତୁଳସୀ ମାଳି ମୁହଁରେ ଜଗନ୍ନାଥଙ୍କ ନାମ । ଜଣେ କି ଦୁଇଜଣ ନୁହଁ । ଏକାଥରକେ ଶହେରୁ ଉର୍ଦ୍ଧ୍ୱ ପାକିସ୍ତାନରେ ରହୁଥିବା ହିନ୍ଦୁ ପର୍ଯ୍ୟଟକ ଦର୍ଶନରେ ଆସିଛନ୍ତି । ଉଭୟ ପୁରୁଷ ଓ ମହିଳା ଶୁକ୍ରବାର ବସ ଯୋଗେ ପୁରୀରେ ପହଞ୍ଚିବା ପରେ ରାତ୍ରୀ ଯାପନ କରିଥିଲେ ।
ଆଜି ସକାଳୁ ସେମାନେ ଶ୍ରୀମନ୍ଦିରକୁ ଯାଇ ମହାପ୍ରଭୁଙ୍କୁ ଦର୍ଶନ କରିବା ସହ ଆଶିଷ ଲାଭ କରିଥିଲେ । ଏବେ ଭାରତ ଓ ପାକିସ୍ତାନ ମଧ୍ୟରେ ତିକ୍ତତା ସମ୍ପର୍କ ରହିଛି । ଉଭୟ ଦେଶର ସୀମାରେ ଏବେ ବି ସେନାଙ୍କ ମଧ୍ୟରେ ଚାଲିଛି ଛକା ପଞ୍ଝା । ଏଭଳି ପରିସ୍ଥିତିରେ ପାକିସ୍ତାନରେ ରହୁଥିବା ହିନ୍ଦୁ ମାନେ ଉଭୟ ଦେଶରେ ଶାନ୍ତି ପ୍ରତିଷ୍ଠା ପାଇଁ ମହାପ୍ରଭୁ ଶ୍ରୀଜଗନ୍ନାଥଙ୍କ ପାଖରେ କାମନା କରିଛନ୍ତି ।
ମହାପ୍ରଭୁଙ୍କୁ ଦର୍ଶନ କରିବା ସହ ମହାପ୍ରସାଦ ପାଇ ସେମାନଙ୍କ ଜୀବନ ସାର୍ଥକ ହୋଇଛି ବୋଲି କହିଛନ୍ତି । ସେପଟେ ଅଧିକାଂଶ ହାତରେ ମାଳି ଧରି ଜପ କରୁଥିବା ଦେଖିବାକୁ ମିଳିଛି ।
