ଢେଙ୍କାନାଳ: ପୁଣି ହାତୀ ଉପଦ୍ରବ । ସଦରରେଞ୍ଜ ଅନ୍ତର୍ଖତ ଦୁଧକାଟୋନି ବେଲଗୁଣ୍ଠାରେ ହାତୀ ଆକ୍ରମଣରେ ମହିଳା ଗୁରୁତର । ଗୁରୁତର ହେଲେ ଗାଁର ସୀତା ଭୂୟାଁ । ମହିଳା ଜଣକ ଗାଁ ଜଙ୍ଗଲକୁ ଯାଇଥିବା ବେଳେ ତାଙ୍କୁ ହାତୀ ଆକ୍ରମଣ କରିଥିଲା । ଗୁରୁତର ଅବସ୍ଥାରେ ତାଙ୍କୁ ଢେଙ୍କାନାଳ ମେଡିକାଲରେ ଭର୍ତ୍ତି କରାଯାଇଛି ।

ଭୁବନେଶ୍ୱର: ଆପଣ ରାଜ୍ୟ ବଜେଟ୍‌ ଜାଣିବାକୁ ଚାହୁଁଛନ୍ତି ? ମୋବାଇଲ ଆପ୍‌ରେ ମିଳିବ ରାଜ୍ୟ ବଜେଟର ଅପଡେଟ୍‌ । କାଗଜ ନୁହେଁ, ଏଥର ଆଇପଡରେ ରାଜ୍ୟ ବଜେଟ । ପ୍ରସ୍ତୁତ ହୋଇଛି ଆପ୍‌ ।  ପ୍ରଥମଥର ପାଇଁ ଆଇପଡରେ ବିଧାୟକ ଓ ମନ୍ତ୍ରୀ ଦେଖିବେ ରାଜ୍ୟ ବଜେଟ । ସାଧାରଣ ଜନତା ବି ମୋବାଇଲରେ  ଓଡ଼ିଶା ବଜେଟ ଆପ ଅପଲୋଡ କରି ରାଜ୍ୟ ବଜେଟର ଟିକିନିଖି ଅପଡେଟ ପାଇ ପାରିବେ । ଓଡ଼ିଶା ବିଧାନସଭାକୁ ପେପରଲେସ କରିବା ପାଇଁ ଓ ସଦସ୍ୟମାନଙ୍କୁ ସଂପୂର୍ଣ୍ଣ ଟେକ୍ନୋସେଭି କରିବା ପାଇଁ ଏପରି ବ୍ୟବସ୍ଥା କରାଯାଇଛି ବୋଲି ବାଚସ୍ପତି କହିଛନ୍ତି । ବଜେଟ ଅଧିବେଶନର ବିଧାୟକମାନେ ପଚାରୁଥିବା ପ୍ରଶ୍ନ ଓ ଉତ୍ତର ଏବେ ଅନଲାଇନରେ ଆରମ୍ଭ ହୋଇଥିବା ବାଚସ୍ପତି କହିଛନ୍ତି ।

ବିଧାନସଭାର ଡିଜିଟାଲାଇଜେସନକୁ ବିଧାୟକମାନେ ସ୍ୱାଗତ କରିଛନ୍ତି । ହେଲେ ବିଧାୟକମାନଙ୍କୁ ଏନେଇ ଟ୍ରେନିଂ ଦିଆଯିବା ଦରକାର ବୋଲି ଶାସକ ଓ ବିରୋଧୀ ବିଧାୟକ କହିଛନ୍ତି  । ପ୍ରଥମଥର ଲାଗି ବଜେଟ ଆଇପଡରେ ଦେଖିବାର ବ୍ୟବସ୍ଥା ହୋଇଛି । ଏପରି ବ୍ୟବସ୍ଥା ଦ୍ଵାରା ୫୭ଲକ୍ଷ ପେପରସେଭ୍‌ ହେବା ସହ ୭ଶହ ଗଛକଟାରୁ ବଞ୍ଚିତ ହୋଇପାରିବ ।

୧୮ ତାରିଖ ଦିନ ଅର୍ଥମନ୍ତ୍ରୀ ନିରଂଜନ ପୂଜାରୀ ୨୦୨୦-୨୧ ଆର୍ଥିକ ବର୍ଷର ବଜେଟ ଉପସ୍ଥାପନ କରିବେ । ପ୍ରଥମଥର ପାଇଁ ବଜେଟ ସଂପୂର୍ଣ୍ଣ ଡିଜିଟାଲାଇଜେସନ ହୋଇଥିବାରୁ ଏହାକୁ  ନେଇ ସବୁ ମହଲରେ ଉତ୍ସାହ ଦେଖିବାକୁ ମିଳିଛି ।

ଭୁବନେଶ୍ୱର: ରେଳ ଷ୍ଟେସନ୍‌ରେ ଅଳ୍ପକେ ବର୍ତ୍ତିଲେ ଯ଼ୁବତୀ । ଭୁବନେଶ୍ୱର ରେଳ ଷ୍ଟେସନ୍‌ର ୧ ନମ୍ବର ପ୍ଳ।ଟ୍‌ଫର୍ମର ସିସିଟିଭିରେ କଏଦ୍‌ ହୋଇଥିବା ଦୃଶ୍ୟ ଦେଖିଥିଲେ ଆପଣ ତାଜୁବ୍‌ ହୋଇଯିବେ । ଚଳନ୍ତା ଟ୍ରେନ୍‌ରୁ ଖସି ପଡିଥିଲେ ଯ଼ୁବତୀ ଜଣକ । ତେବେ ଏହି ସମୟରେ ଦେବଦୂତ୍ତ ସାଜି ମରଣ ମୁହଁରୁ ତାଙ୍କୁ ଟାଣି ଆଣୁଛନ୍ତି ପ୍ଳ।ଟ୍‌ଫର୍ମରେ ଡ୍ୟୁଟି କରୁଥିବା ଆର୍‌ପିଏଫ୍‌ ଜବାନ।

ଅଳ୍ପକେ ବର୍ତ୍ତି ଯାଇଥିବା ଯାତ୍ରୀଙ୍କ ପରିଚୟ ମିଳିଛି । ସେ ହେଲେ ଭୁବନେଶ୍ୱର ରମାଦେବୀ ମହିଳା ବିଶ୍ୱବିଦ୍ୟାଳୟ ଅଧ୍ୟାପିକା ନିବେଦିତା ସାହୁ। ଆସନ୍ତାକାଲି ତାଙ୍କର ନିର୍ବନ୍ଧ ଉତ୍ସବ ଥିଲା । ତେଣୁ ସେ ଭୁବନେଶ୍ୱରରୁ ମେରାମୁଣ୍ଡଳିକୁ ଯାଉଥିଲେ । ଏନେଇ ନିବେଦିତାଙ୍କ ପ୍ରତିକ୍ରିୟା ମିଳି ପାରି ନଥିବା ବେଳେ ଆର୍‌ପିଏଫ୍‌ ଜବାନଙ୍କ ଏଭଳି ଦୁଃସାହାସକୁ ସମସ୍ତେ ପ୍ରଶଂସା କରିଛନ୍ତି ।

କେନ୍ଦ୍ରାପଡ଼ା: ଉଦଘାଟିତ ହେଲା ଭିତରକନିକା ମହୋତ୍ସବ । କେନ୍ଦ୍ରାପଡ଼ା ରାଜନଗର ନଳିତାପାଟିଆ ଠାରେ ଆୟୋଜିତ ହୋଇଛି ଉତ୍ସବ । ଅଭୟାରଣ୍ୟକୁ ଜାତୀୟ ଉଦ୍ୟାନ ମାନ୍ୟତା ମିଳିବାର ଦୀର୍ଘ ୨୨ ବର୍ଷ ପରେ ପ୍ରଥମଥର ପାଇଁ ଅନୁଷ୍ଠିତ ହୋଇଛି ଭିତରକନିକା ମହୋତ୍ସବ । ପ୍ରତିଦିନ ସଂଧ୍ୟାରେ ଜମୁଛି ସାଂସ୍କୃତିକ କାର୍ଯ୍ୟକ୍ରମର ଆସର । ଚଟପଟି ଖାଇବା ସାଙ୍ଗକୁ ବିଭିନ୍ନ ନାଚଗୀତର ମଜା ଉଠାଉଛନ୍ତି ଲୋକେ । ପ୍ରଥମଦିନ ମହୋତ୍ସବରେ ମୁଖ୍ୟଅତିଥିଭାବେ ଯୋଗ ଦେଇଥିଲେ ସଂସ୍କୃତି ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ । କାର୍ଯ୍ୟକ୍ରମରେ କୁମ୍ଭୀର ବିଶାରଦ ଡକ୍ଟର ସୁଧାକର କରଙ୍କୁ ଏହି ଉତ୍ସବରେ ପୁରସ୍କୃତ କରିଥିଲେ ପର୍ଯ୍ୟଟନ ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ । ୧୬ ତାରିଖରେ ଉଦଯାପିତ ହେବ ମହୋତ୍ସବ ।

ବ୍ରହ୍ମପୁର: ସୀମା ଡେଇଁଲା ଶାସ୍ତି । ଛାତ୍ରୀଙ୍କୁ ଦଣ୍ଡ ଦେବାପାଇଁ ରାକ୍ଷସ ପାଲଟିଲା ଶିକ୍ଷୟିତ୍ରୀ । କ୍ଲାସ ମଝିରେ ୬ ବର୍ଷର ଝିଅର ପ୍ୟାଣ୍ଟ ଖୋଲିବା ପାଇଁ ପଛାଇଲେନି ସଂପୃକ୍ତ ଶିକ୍ଷୟିତ୍ରୀ । ବ୍ରହ୍ମପୁର ଟାଟାବେଞ୍ଜ ଛକ ନିକଟରେ ଥିବା ଏକ ସ୍କୁଲରେ ଘଟିଛି ଏଭଳି ଲଜ୍ଜାକର ଘଟଣା ।

ଜଣେ ଆଇନଜୀବୀଙ୍କ ୬ ବର୍ଷର ଝିଅ ସ୍କୁଲକୁ ୟୁନିଫର୍ମ ପିନ୍ଧି ଆସିନଥିବାରୁ ଏଭଳି ଦଣ୍ଡ ଦେଇଛନ୍ତି ଶିକ୍ଷକ । ଘଟଣା ଲୋକଲୋଚନକୁ ଆସିବା ପରେ ପୋଲିସ ତଦନ୍ତ ଆରମ୍ଭ ହୋଇଛି । ୫୦ରୁ ଅଧିକ ଆଇନଜୀବୀ ସ୍କୁଲରେ ପହଞ୍ଚି ଶିକ୍ଷୟିତ୍ରୀଙ୍କ ଏଭଳି ଆଚରଣକୁ ବିରୋଧ କରିଛନ୍ତି  । ସମ୍ପୃକ୍ତ ଶିକ୍ଷୟିତ୍ରୀଙ୍କୁ କଡା ଦଣ୍ଡ ଦେବାକୁ ଦାବି କରିଛନ୍ତି ।

ନୂଆପଡ଼ା: ଘରୋଇ କଳହରୁ ହତ୍ୟାକାଣ୍ଡ । ସାନ ଭାଇର ଟାଙ୍ଗିଆ ଚୋଟରେ ବଡ ଭାଇର ମୃତ୍ୟୁ ହୋଇଛି । ନୂଆପଡ଼ା କୋମନା ଥାନା ହରିଜନ ପଡ଼ାରେ ଏଭଳି ଅମାନୁଷିକ କାଣ୍ଡ ଘଟିଛି । ମୃତକଙ୍କ ନାମ ଶିବା ହରପାଲ ହୋଇଥିବା ଜଣାପଡିଛି ।

ସୂଚନା ଅନୁସାରେ ଶିବା ହରପାଲ ଓ ସାନ ଭାଇ ବିଦ୍ୟା ହରପାଲଙ୍କ ଭିତରେ କୈାଣସି କଥାକୁ ନେଇ ବଚସା ହୋଇଥିଲା । କଥାରେ ଉତକ୍ଷିପ୍ତ ହୋଇ ସାନଭାଇ ବିଦ୍ୟା ଟାଙ୍ଗିଆରେ ନିଜ ଭାଇକୁ ଆକ୍ରମଣ କରିଥିଲା ।

ତେବେ ଗୁରୁତର ଅବସ୍ଥାରେ ଶିବାଙ୍କୁ ମେଡିକାଲ ନିଆଯାଉଥିବା ବେଳେ ବାଟରେ ତାଙ୍କର ମୃତ୍ୟୁ ହୋଇଥିବା ସୂଚନା ରହିଛି । ଘଟଣାସ୍ଥଳରୁ ହତ୍ୟାରେ ବ୍ୟବହୃତ ଟାଙ୍ଗିଆ ଜବତ କରିଛି ପୋଲିସ । ଏହାସହ ହତ୍ୟାକାରୀକୁ ଥାନାରେ ଅଟକ ରଖି ଅଧିକ ତଦନ୍ତ ଜାରି ରଖିଛି ପୋଲିସ୍ ।