ଭୁବନେଶ୍ୱର: ମାତ୍ର ୨ ଘଣ୍ଟାରେ ଆପଣ ପହଞ୍ଚିବେ ସୁରଟ । କାରଣ ଆଜିଠୁ ଆରମ୍ଭ ହୋଇଛି ଭୁବନେଶ୍ୱରରୁ ସୁରଟକୁ ସିଧାସଳଖ ବିମାନ ସେବା । ବିଜୁ ପଟ୍ଟନାୟକ ବିମାନବନ୍ଦରରୁ ସକାଳ ୮ଟା ୪୦ରେ ଉଡ଼ାଣ ଭରିଛି ଏୟାର ଇଣ୍ଡିଆ ବିମାନ । ସୋମବାର ଓ ଗୁରୁବାର ଭୁବନେଶ୍ୱରରୁ ସୁରଟକୁ ବିମାନ ଉଡ଼ିବ । ସେହିଭଳି ସୁରତରୁ ଭୁବନେଶ୍ୱରକୁ ଶୁକ୍ରବାର ଓ ରବିବାର ଦିନ ବିମାନ ଚଳାଚଳ କରିବ ।

ଏଥିପାଇଁ ଯାତ୍ରୀଙ୍କୁ ୫ ହଜାର ୫୫୩ ଟଙ୍କା ଦେବାକୁ ପଡ଼ିବ । ଏହି ବିମାନରେ ଥରକେ ୧୮୦ ଜଣ ଯାତ୍ରା କରିପାରିବେ । ଓଡ଼ିଶାରୁ ସୁରତକୁ ସିଧାସଳଖ ବିମାନ ଉଡ଼ାଣ ନେଇ ବହୁଦିନରୁ ଦାବି ହୋଇଆସୁଥିଲା । ୨୦୧୮ରେ କେନ୍ଦ୍ର ବେସାମରିକ ମନ୍ତ୍ରଣାଳୟକୁ ଏନେଇ ଚିଠି ଲେଖିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।

ପରେ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ଗତ ଜୁଲାଇ ୨୨ରେ କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀ ହରଦିପ ପୁରୀଙ୍କୁ ଭେଟି ଦାବି ଜଣାଇଥିଲେ ।

ଏହାପରେ ଏହି ଅନୁରୋଧକୁ ସ୍ୱୀକୃତି ଦେଇଥିଲେ କେନ୍ଦ୍ରମନ୍ତ୍ରୀ । ଓଡ଼ିଶାରୁ ସିଧାସଳଖ ସୁରତକୁ ବିମାନ ଚଳାଚଳକୁ ମଞ୍ଜୁରି ମିଳିବା ପରେ ମୁଖ୍ୟମନ୍ତ୍ରୀ ଟ୍ୱିଟ୍‌ କରି କେନ୍ଦ୍ରମନ୍ତ୍ରୀ ହରଦୀପ ପୁରୀଙ୍କୁ ଧନ୍ୟବାଦ ଜଣାଇଥିଲେ ।

ଜଳେଶ୍ୱର: ୬୦ ନମ୍ବର ଜାତୀୟ ରାଜପଥ ନନ୍ଦିକା ଛକ ନିକଟରେ ପିକନିକ୍ ବସକୁ ପଛପଟୁ ଧକ୍କା ଦେଲା ଗୋରୁ ବୋଝେଇ ଟ୍ରକ । ୭ ଜଣ ପର୍ଯ୍ୟଟକ ଗୁରୁତର ଭାବେ ଆହତ ହୋଇଛନ୍ତି ।

ଗୁରୁତରଙ୍କୁ ଜଳେଶ୍ୱର ହସ୍ପିଟାଲରେ ଭର୍ତ୍ତି କରିଛନ୍ତି ସ୍ଥାନୀୟ ଲୋକ । ପଶ୍ଚିମବଙ୍ଗର ପର୍ଯ୍ୟଟକ ମାନେ ପୁରୀରୁ କଲିକତା ଫେରୁଥିବା ବେଳେ ଏହି ଦୁର୍ଘଟଣା ଘଟିଛି  ।

ସମସ୍ତ ଆହତଙ୍କ ଘର ପଶ୍ଚିମବଙ୍ଗ ବୋଲି ସୂଚନା ମିଳିଛି । ପୋଲିସ ଘଟଣା ସ୍ଥଳକୁ ପହଞ୍ଚି ଗୋରୁ ବୋଝେଇ ଟ୍ରକକୁ ଜବଦ କରିଛି । ଡ୍ରାଇଭର ଏବଂ ହେଲପର ଫେରାର ହୋଇଯାଇଥିବା ସୂଚନା ମିଳିଛି ।

ଯାଜପୁର: ଯାଜପୁର ଜିଲ୍ଲା କଳିଙ୍ଗନଗର ଥାନା ଶାଳୀଜଙ୍ଗା ପଞ୍ଚାୟତର ବେଣାପଟିଆ ଗ୍ରାମରେ ହାତୀ ଆକ୍ରମଣରେ ଜଣଙ୍କର ମୃତ୍ୟୁ ହୋଇଛି । ମୃତକ ହେଉଛନ୍ତି ସେହି ଗ୍ରାମର ବେଣୁଧର ସିଦ୍ଧୁ।ସୂଚନା ମୁତାବକ ରାତି ପ୍ରାୟ ୧୦ଟାରେ ଏକ ବଣୁଆ ହାତୀ ଗ୍ରାମକୁ ପ୍ରବେଶ କରି ବେଣୁଧରଙ୍କ ବାଡ଼ିରେ ଛଣ କୁଟା ଖାଉଥିଲା।

ଏହା ଦେଖି ବେଣୁଧରଙ୍କ ସ୍ତ୍ରୀ ଡାକ ପକାଇବାରୁ ବେଣୁଧର ବାହାରକୁ ଆସି ହାତୀକୁ ଘଉଡାଇବାକୁ ଉଦ୍ୟମ କରିଥିଲେ। ଏହି ସମୟରେ ହାତୀଟି ବେଣୁଧରଙ୍କୁ ଘୋଷାଡ଼ି ଆଣି ଦଳି ଦେଇଥିଲା। ଫଳରେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା। ପରେ ଖବର ପାଇ ବନ ବିଭାଗ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ହାତୀ ଟିକୁ ଘଉଡ଼ାଇବାକୁ ପ୍ରୟାସ ଜାରି ରଖିଛନ୍ତି।