ଧାର ଟଙ୍କା ଫେରସ୍ତ ମାଗିବାରୁ ବିଧବାଙ୍କୁ ଜୀଅନ୍ତା ଜାଳିଦେଲେ
ମହାକାଳପଡ଼ା: ଟଙ୍କା ଧାର ଦେଇଥିଲେ, ମାଗିବାରୁ ବିଧବା ମହିଳାଙ୍କୁ ଜୀଅନ୍ତା ଜାଳିଦେଲେ। ଏଭଳି ଅମାନବୀୟ ଆଉ ହୃଦୟ ବିଦାରକ ଘଟଣା ଘଟିଛି ମାର୍ଶାଘାଇ ଥାନା ତିଖିରି ପଞ୍ଚାୟତ ଧନିଆପଡ଼ା ଗାଁରେ ।
ଧନିଆପଡ଼ା ଗାଁର ସୁଭଦ୍ରା ବେହେରାଙ୍କ ଠାରୁ ୫୦ ହଜାର ଟଙ୍କା ଧାର ନେଇଥିଲେ ସେହି ଗାଁର ବିଶ୍ୱଜିତ୍ ସ୍ୱାଇଁ । ଟଙ୍କା ଧାର ନେବା ପରେ ଏକ ମାସ ହେଲା ଯୁବକ ଜଣଙ୍କ ଗାଁରେ ରହୁ ନଥିଲେ । ସେ ଗାଁକୁ ଆସିଥିବା ଜାଣିବା ପରେ ରାତିରେ ସୁଭଦ୍ରା ତାଙ୍କ ଘରକୁ ଯାଇ ଟଙ୍କା ମାଗିଥିଲେ । ସ୍ୱାମୀଙ୍କୁ ହରାଇବା ପରେ ସୁଭଦ୍ରା ବହୁ କଷ୍ଟରେ ସେ ଯାହା କିଛି ଉପାର୍ଜନ କରିଥିଲେ ତାକୁ ବିଶ୍ୱଜିତ୍ ତାଙ୍କ ପାଖରୁ କୌଶଳକ୍ରମେ ନେଇଯାଇଥିଲେ ।
କଷ୍ଟ ଉପାର୍ଜିତ ଧନକୁ ଫେରାଇ ଦେବାକୁ ସୁଭଦ୍ରା ବିଶ୍ୱଜିତ୍ଙ୍କୁ କହିଥିଲେ । ହେଲେ, ଧାର ଫେରସ୍ତ କରିବା ପରିବର୍ତ୍ତେ ହିଂସ୍ର ହୋଇ ଉଠିଥିଲେ ବିଶ୍ୱଜିତ ଆଉ ତାଙ୍କ ପରିବାର । ସୁଭଦ୍ରାଙ୍କୁ ଗାଁ ଦାଣ୍ଡରେ କିରାସିନି ଢାଳି ଜିଅନ୍ତା ଜାଳି ଦେଇଥିଲେ । ମରିଗଲି… ମରିଗଲି… ଚିତ୍କାର କରିଥିଲେ ସୁଭଦ୍ରା । ଚିତ୍କାର ଶୁଣି ଗାଁ ଲୋକ ତାଙ୍କୁ ଉଦ୍ଧାର କରି ପ୍ରଥମେ କେନ୍ଦ୍ରାପଡ଼ା ମେଡିକାଲରେ ଭର୍ତ୍ତି କରିଥିଲେ । ପରେ କଟକ ବଡ଼ ମେଡିକାଲ ସ୍ଥାନାନ୍ତର କରାଯାଇଥିଲା । ଚିକିତ୍ସାଧୀନ ଅବସ୍ଥାରେ ସେଠାରେ ତାଙ୍କର ମୃତ୍ୟୁ ହୋଇଛି । ସୁଭଦ୍ରାଙ୍କର ୧୨ ବର୍ଷର ପୁଅଟିଏ ଅଛି । ମା’କୁ ହରାଇବା ପରେ ସେ ଅନାଥ ହୋଇଯାଇଛି ।
ଘଟଣା ନେଇ ମାର୍ଶାଘାଇ ଥାନାରେ ଅଭିଯୋଗ କରିଛନ୍ତି ମୃତ ସୁଭଦ୍ରାଙ୍କ ଭାଇ କିଶୋର ବେହେରା । ପୋଲିସ ଏକ ହତ୍ୟା ମାମଲା ରୁଜୁ କରିବା ସହ ଘଟଣାର ତଦନ୍ତ କରୁଛି । ଅଭିଯୁକ୍ତ ବିଶ୍ୱଜିତ୍ ଫେରାର୍ ହୋଇଯାଇଛି ।
ଆମ୍ବୁଲାନ୍ସରୁ ତେଲ ସରିଯିବାରୁ ମେଡିକାଲ ପହଞ୍ଚି ନପାରି ମହିଳାଙ୍କ ମୃତ୍ୟୁ ଅଭିଯୋଗ
ସାଲେପୁର: ୧୦୮ ପାଇଁ ଚାଲିଗଲା ଜୀବନ । ଆଖି ବୁଜିଲେ ମହିଳା । ଛାତିରେ ଯନ୍ତ୍ରଣା ହେବାରୁ କଟକ ଜିଲ୍ଲା ମାହାଙ୍ଗା ବ୍ଲକ କୁରୁଜଙ୍ଗାର ଗାଁର ସେବତୀ ପୃଷ୍ଟିଙ୍କ ପରିବାର ଲୋକ ୧୦୮ ଆମ୍ବୁଲାନ୍ସକୁ ଫୋନ୍ କରିଥିଲେ । ଆମ୍ବୁଲାନ୍ସ ଆସିବା ବାଟରେ ହିଁ ତେଲ ସରିଗଲା । ଫଳରେ ଠିକ୍ ସମୟରେ ନିଶ୍ଚିନ୍ତକୋଇଲି ମେଡିକାଲରେ ପହଞ୍ଚି ପାରିଲେନି ସେବତୀ ।
ଆମ୍ବୁଲାନ୍ସ ଗାଁ ଠାରୁ ପ୍ରାୟ ଏକ କିଲୋମିଟରରେ ଦୂରରେ ଅଟକି ରହିଲା । ଆଉ ୨ ଘଣ୍ଟା ପରେ ଆସିଲା ଆଉ ଏକ ଆମ୍ବୁଲାନ୍ସ । ସେଥିରେ ସେବତୀଙ୍କୁ ମେଡିକାଲ ନିଆଗଲା । ହେଲେ, ଡେରି ହୋଇଯାଇଥିବାରୁ ତାଙ୍କୁ ବଞ୍ଚାଇ ପାରିନଥିଲେ ଡାକ୍ତର । ସେଠାରେ ତାଙ୍କୁ ଡାକ୍ତର ମୃତ ଘୋଷଣା କରିଥିଲେ ।
ଚନ୍ଦ୍ରପୃଷ୍ଠରେ ଲାଣ୍ଡର ‘ବିକ୍ରମ’କୁ ଖୋଜି ପାଇଲା ନାସା
ଭୁବନେଶ୍ୱର: ମିଳିଲା ଲାଣ୍ଡର ‘ବିକ୍ରମ’ର ସନ୍ଧାନ । ଆମେରିକୀୟ ମହାକାଶ ଗବେଷଣା ସଂସ୍ଥା ନାସାର ମୁନ ମିଶନ ଲାଣ୍ଡର ‘ବିକ୍ରମ’କୁ ଚନ୍ଦ୍ରପୃଷ୍ଠରେ ଖୋଜି ପାଇଛି । ଚନ୍ଦ୍ରଯାନ-୨ର ଲାଣ୍ଡର ‘ବିକ୍ରମ’ ଦୁର୍ଘଟଣାସ୍ଥଳର ୭୫୦ ମିଟର ଦୂରରେ ପଡ଼ିଥିବା ଦାବି କରିଛି ନାସା । ‘ବିକ୍ରମ’ର ଭଗ୍ନାଂଶ ଫଟୋ ନାସା ଟ୍ୱିଟ୍ କରିଛି । ଭଗ୍ନାଂଶର ୩ଟି ବଡ଼ ଟୁକୁଡ଼ା ମିଳିଛି । ରାତି ପାଖାପାଖି ସାଢେ ଗୋଟାଏ ବେଳେ ଲାଣ୍ଡର ‘ବିକ୍ରମ’ ଇମ୍ପାକ୍ଟ ସାଇଟର ଫଟୋ ନାସା ଅର୍ବିଟର ଉଠାଇଛି ।
ନାସା ମୁତାବିକ ଲାଣ୍ଡର ‘ବିକ୍ରମ’ର ଫଟୋ ଚନ୍ଦ୍ରପୃଷ୍ଠର ୧ କିମି ଉପରୁ ନିଆଯାଇଛି । ଚନ୍ଦ୍ରପୃଷ୍ଠରେ ‘ବିକ୍ରମ’ ଖସି ପଡ଼ିଥିବା ମାଟି କ୍ଷତି ହୋଇଥିବା ଫଟୋରେ ଦେଖାଯାଉଛି । ଭାରତୀୟ ଅନ୍ତରୀକ୍ଷ ଏଜେନ୍ସି ଇସ୍ରୋ, ନାସା ସହ ସମ୍ପର୍କ କରି ଇମ୍ପାକ୍ଟ ସାଇଟ୍ ବାବଦରେ ତଥ୍ୟ ମାଗିଛି । ମିଳିଥିବା ସୂଚନା ଅନୁଯାୟୀ ନାସା, ଇସ୍ରୋକୁ ‘ବିକ୍ରମ’ ବାବଦରେ ଏକ ରିପୋର୍ଟ ପ୍ରଦାନ କରିବ । ଯେଉଁଥିରୁ ଲାଣ୍ଡର ‘ବିକ୍ରମ’ ବାବଦରେ ଅଧିକ ତଥ୍ୟ ମିଳିପାରିବ।
ଏହା ପୂର୍ବରୁ ଅନ୍ତରୀକ୍ଷ ଗବେଷଣା ସଂସ୍ଥା ନାସା ‘ବିକ୍ରମ’ ସମ୍ପର୍କରେ ଖବର ପାଇବା ପାଇ ଆଶା ଦେଖାଇଥିଲା । କାରଣ ନାସାର ଲୁନାର ରିକନେସେସ୍ ଅର୍ବିଟର (ଏଲଆରଓ) ‘ବିକ୍ରମ’ ଖସି ପଡ଼ିଥିବା ସ୍ଥାନ ଉପରେ ପରିକ୍ରମା କରିବାର ଥିଲା।
୨୨ ଜୁଲାଇରେ ପ୍ରାୟ ୯୭୮ କୋଟି ଟଙ୍କା ଖର୍ଚ୍ଚରେ ଭାରତ ଚନ୍ଦ୍ରଯାନ-୨କୁ ପଠାଇଥିଲା। ସବୁକିଛି ଠିକଠାକ୍ ଥିଲେ ହେଁ ସେପ୍ଟେମ୍ବର ୭ରେ ଚନ୍ଦ୍ରପୃଷ୍ଠରେ ଲାଣ୍ଡର ‘ବିକ୍ରମ’ ସଫ୍ଟ ଲାଣ୍ଡିଂ ବଦଳରେ ହାର୍ଡ ଲାଣ୍ଡିଂ କରିଥିଲା। ଫଳରେ ଚନ୍ଦ୍ରଯାନ-୨ ଅଭିଯାନ ସମ୍ପୂର୍ଣ୍ଣ ସଫଳ ହୋଇପାରି ନଥିଲା।
୩୩ ବର୍ଷ ପରେ ସ୍ୱାମୀ ସ୍ତ୍ରୀ ଜାଣିଲେ ସେମାନେ ଭାଇ ଭଉଣୀ, ପଢ଼ନ୍ତୁ ପୂରା ଘଟଣା
ଆମେରିକା: ବିବାହ ଏକ ପବିତ୍ର ବନ୍ଧନ। କୁହାଯାଏ ଏହା ଭଗବାନଙ୍କ ବରାଦ ମାନେ ମ୍ୟାରେଜ୍ସ ମେଡ୍ ଇନ୍ ହେଭେନ୍ । କିନ୍ତୁ ଥରେ ଭାବନ୍ତୁ ବିବାହ ପରେ ଯଦି ଜଣାପଡ଼େ ଯେ ଆପଣ ଯାହାକୁ ବାହା ହୋଇଛନ୍ତି ସେ ଆପଣଙ୍କ ରକ୍ତ ସମ୍ପର୍କୀୟ ? ସେତେବେଳେ ପାଦତଳୁ ମାଟି ଖସିଗଲା ପରି ଲାଗେ ! ଠିକ୍ ଏମିତି ଏକ ଘଟଣା ଘଟିଛି ଆମେରିକାର ୱାଶିଂଟନ୍ରେ।
ଦୀର୍ଘ ୩୩ ବର୍ଷର ବିବାହ ପରେ ସ୍ୱାମୀ ସ୍ତ୍ରୀ ଜାଣିବାକୁ ପାଇଛନ୍ତି ଯେ ସେମାନେ ଯାଆଁଳା ଭାଇଭଉଣୀ । ଏହି ଦୁଇଜଣ ଯେତେବେଳେ ପରସ୍ପରକୁ ଦେଖିଲେ ସେମାନଙ୍କ ମଧ୍ୟରେ ପ୍ରଥମ ଦେଖାରେ ପ୍ରେମ ମାନେ ଲଭ୍ ଆଟ୍ ଫାଷ୍ଟ ସାଇଟ୍ ହୋଇଥିଲା । ସେମାନେ ଯେତେବେଳେ ନିଜ ନିଜ ମଧ୍ୟରେ ପରିଚୟ ଦିଆନିଆ ହେଲେ ସେମାନେ ଜାଣିଲେ ଯେ, ଉଭୟଙ୍କ ଜନ୍ମଦିନ ଏକା ମସିହା, ଏକା ବାର ଏବଂ ଏକା ତାରିଖରେ । ଏହାକୁ ସେମାନେ ଭଗବାନଙ୍କ ସଂଯୋଗ ବୋଲି ଭାବିଲେ ଆଉ ଭଗବାନ ଉଭୟଙ୍କୁ ଉଭୟଙ୍କ ପାଇଁ ଜନ୍ମ ଦେଇଛନ୍ତି (ମେଡ୍ ଫର୍ ଇଚ୍ ଅଦର) ଭାବି ବିବାହ କରିଥିଲେ ।
କିନ୍ତୁ ସତ କଥା ଜାଣିଲା ପରେ ଉଭୟଙ୍କ ମନକୁ ପାପ ଛୁଇଁଚି ।
କ୍ଲିନିକ୍ର ଡାକ୍ତର ଯେତେବେଳେ ଦୁଇଜଣଙ୍କ ଜନ୍ମ ପ୍ରମାଣପତ୍ର ଦେଖିଲେ ଦୁହିଁଙ୍କ ଭିତରେ ସମାନତା ଥିବା ଜାଣିପାରିଥିଲେ। ଦୁଇଜଣଙ୍କ ଜନ୍ମ ୧୯୮୪ ମସିହାରେ ହୋଇଥିଲା। ଏକା ତାରିଖ ଆଉ ଏକା ବାରରେ। ତେଣୁ ଡାକ୍ତର ଏହି କଥାର ସତ୍ୟତା ସେମାନଙ୍କୁ ଜଣାଇଥିଲେ। ଡାକ୍ତରଙ୍କ କଥା ତାଙ୍କୁ ଚକିତ କରିଦେଇଥିଲା।
ଏହି ଯାଆଁଳା ଭାଇଭଉଣୀ ଯେତେବେଳେ ଛୋଟ ଥିଲେ ସେମାନଙ୍କ ମାତାପିତାଙ୍କର ଏକ ସଡ଼କ ଦୁର୍ଘଟଣାରେ ମୃତ୍ୟୁ ଘଟିଥିଲା। ଏହା ପରେ ପିଲା ଦୁହିଁଙ୍କୁ କେହି କୋଳେଇ ନେବାକୁ ଇଚ୍ଛା ପ୍ରକାଶ କଲେ ନାହିଁ। ଏହାର ସମାଧାନ ପାଇଁ ଦୁଇଜଣଙ୍କୁ ଅଲଗା ସ୍ଥାନକୁ ପଠାଇ ଦିଆଯାଇଥିଲା। ଭିନ୍ନ ଭିନ୍ନ ପରିବାରରେ ଦୁହେଁ ବଢ଼ିଲେ।
ଯେହେତୁ ଉଭୟଙ୍କ ମଧ୍ୟରେ ପ୍ରେମ ହୋଇଥିଲା, ଉଭୟଙ୍କୁ ପାଳିଥିବା ପରିବାର ଲୋକେ ବେଶୀ କିଛି ଚିନ୍ତା ନ କରି ନ ଥିଲେ ଆଉ ନିର୍ଦ୍ଦ୍ୱନ୍ଦ୍ୱରେ ବିବାହ ହୋଇଯାଇଥିଲା ।
ଏହି ଛୋଟିଆ ରିଚାର୍ଜ ପ୍ଲାନ୍ ଆପଣଙ୍କ ପଇସା ବଞ୍ଚାଇବ, ଜାଣନ୍ତୁ କୋଉ ଅପରେଟର ଦେଉଛି ସୁବିଧା
ଆପଣ ଦିନକୁ କେତେ ସମୟ ଫୋନ୍ରେ କଥା ହେଉଛନ୍ତି?
ଆପଣ ଦିନକୁ ପାଖାପାଖି ୨୦୦ ଏମ୍ବି ବା କମ୍ ଡାଟା ବ୍ୟବହାର କରୁଛନ୍ତି କି ?
ଯଦି ଏସବୁର ଉତ୍ତର ହଁ, ତେବେ ଅଯଥାରେ ମୋବାଇଲ୍ ଅପରେଟର କମ୍ପାନୀଙ୍କୁ ପୋଷିବା ଦରକାର ନାହିଁ । ୫୦ ଟଙ୍କାରୁ ବି କମ୍ରେ ଆପଣ ଆପଣଙ୍କ ମୋବାଇଲ ରିଚାର୍ଜ କରି ନିଜର ଆବଶ୍ୟକତା ପୂରଣ କରିପାରିବେ । ଆଉବାକି ପଇସା ଅନ୍ୟ ଜରୁରୀ କାମରେ ବ୍ୟବହାର କରିପାରିବେ ବା ସଞ୍ଚୟ କରିପାରିବେ ।
ବିଏସଏନଏଲ ଆପଣଙ୍କ ପାଇଁ ଆଣି ଦେଇଛି ଦୁଇଟି ବଢ଼ିଆ ଅଫର । ଗୋଟିଏରେ ଆପଣ ୩୬ ଟଙ୍କା ରିଚାର୍ଜ କରି ୧୦୦୦୦ ସେକେଣ୍ଡ ଫ୍ରି କଲ୍ ପାଇପାରିବେ । ଦଶ ହଜାର ସେକେଣ୍ଡ ଅର୍ଥାତ୍ ୧୬୬ ମିନିଟ୍ ମାନେ ଅଢ଼େଇ ଘଣ୍ଟାରୁ ଅଧିକ ଟକ୍ ଟାଇମ୍ । ଏହାର ବୈଧତା ହେଉଛି ୩୦ ଦିନ । ତା’ ଛଡ଼ା ଆପଣଙ୍କୁ ଦିନକୁ ୨୦୦ ଏମବି ଡାଟା ମିଳିବ । ଆପଣ ଯଦି ଅଧିକ ଭିଡିଓ ଡାଉନଲୋଡ୍ କରୁନାହାନ୍ତି ବା ଡାଟା ବ୍ୟବହାର କରୁ ନାହାନ୍ତି, ତେବେ ୨୦୦ ଏମ୍ବି ଡାଟା ଆପଣଙ୍କ ପାଇଁ ଯଥେଷ୍ଟ । ଯଦି ଡାଟା ସରିଗଲା ତେବେ ଆପଣ ୩୦ ଟି ଫ୍ରି ଏସଏମଏସ୍ କରିପାରିବେ । ଏବେ କୁହନ୍ତୁ ଅଫରଟି କେମିତି ଲାଗୁଛି ।
ଆଉ ଏକ ବଢ଼ିଆ ପ୍ଲାନ୍ ହେଉଛି ୭୨ ଟଙ୍କା ରିଚାର୍ଜ । ଏଥିରେ ୨୦୦୦୦ ସେକେଣ୍ଡ ଫ୍ରି କଲ୍, ୭୨ ଦିନ ପାଇଁ ଦିନକୁ ୨୦୦ ଏମବି ଡାଟା ଏବଂ ୭୨ଟି ମେସେଜ ପାଇପାରିବେ ।
ସବୁଠୁ ବଡ଼ କଥା ହେଲା ୧୬୬ ମିନିଟ୍ ରୁ ଯଦି ଆପଣ କମ କଥା ହେଉଛନ୍ତି ତେବେ ଅନ୍ୟ ପ୍ଲାନ ଭଳି ଏହା ବ୍ୟର୍ଥ ନ ହୋଇ ବଳକା ମିନିଟ ସବୁ ଆପଣଙ୍କ ଆଗାମୀ ରିଜାର୍ଜ ପରେ ଯୋଡ଼ି ହେଇଯିବ । ଜିଓ ବା ଅନ୍ୟ ଅପରେଟର ଭଳି ତାହା ବିଲକୁଲ ଏକ୍ସପାରି ହେବ ନାହିଁ ।
ଦେଶର ବିଶିଷ୍ଟ ଟେଲିକମ୍ କମ୍ପାନୀର ଘୋଷଣା ପରେ ଏବେ ନୂଆ ଟ୍ୟାରିଫ ଅନୁଯାୟୀ କମ୍ପାନୀ କଲ୍ ଏବଂ ଡାଟା ପ୍ଲାନର ଦର ବଢ଼ାଇଛନ୍ତି । ଟେଲିକମ୍ ସେକ୍ଟରରେ ହେଉଥିବା କ୍ଷତିକୁ ଆଖି ଆଗରେ ରଖି ଏହି ନିଷ୍ପତ୍ତି ନିଆଯାଇଛି । ତେବେ ଏହି ନିଷ୍ପତ୍ତି ଆପଣଙ୍କ ପକେଟ ଉପରେ ଭାରି ପଡ଼ିପାରେ । ଚଢ଼ା ଦର ଦେଇ ଆପଣ ଯଦି ରିଚାର୍ଜ କରିବାକୁ ଚାହୁଁନାହାନ୍ତି ତେବେ ଏହି ପ୍ଲାନ ଦ୍ୱାରା ଆପଣ ଲାଭବାନ ହୋଇପାରିବେ ।
ଅନ୍ୟ ପକ୍ଷରେ ବିଏସଏନଏଲ ନିଜ ସେବାରେ ଏବେ ସୁଧାର ଆଣିଛି । ଲୋକଙ୍କ ପାଇଁ ଭଲ ଅଫର ସହ ସ୍ପିଡ୍ ଇଣ୍ଟରନେଟ ମଧ୍ୟ ଯୋଗାଇ ଦେଉଛି ବିଏସଏନଏଲ ।
ଜିଓଠୁ ବି ଭଲ
ଏହି ଦୁଇଟି ବିଏସ୍ଏନ୍ଏଲ୍ ପ୍ୟାକ୍ ତୁଳନାତ୍ମକ ଭାବେ ଜିଓଠୁ ବି ଭଲ । ଜିଓରେ ଆପଣଙ୍କୁ ମାସକୁ ଅତି କମ୍ରେ ୧୦୮ ଟଙ୍କା ( ୯୮ ଟଙ୍କା ଓ ୧୦ ଟଙ୍କା ଆୟୁସି) ରିଜାର୍ଜ କରିବାକୁ ପଡ଼ିବ । ଜିଓରେ ଆପଣ କେବଳ ଜିଓକୁ ଫ୍ରି କଲ ପାଉଥିବା ବେଳେ ବିଏସ୍ଏନ୍ଏଲ୍ର ୧୬୬ ମିନିଟ୍କୁ ଆପଣ ଯେ କୌଣସି ମୋବାଇଲ୍କୁ କଲ୍ କରିପାରିବେ । ଜିଓରେ ମୋଟ୍ ୨ ଜିବି ଡାଟା ମିଳୁଥିବା ବେଳେ ଆପଣ ୩୬ ଟଙ୍କିଆ ପ୍ୟାକ୍ରେ ଦିନକୁ ୨୦୦ ଏମ୍ବି ଲେଖାଏଁ ମାସକୁ ୬ ଜିବି ଓ ୭୨ ପ୍ୟାକ୍ରେ ଦିନକୁ ୨୦୦ ଏମ୍ବି ଲେଖାଏଁ ମାସକୁ ପାଖାପାଖି ୧୪ ଜିବି ଡାଟା ପାଇେବ ।
ପୁରୀରେ ଗଣଦୁଷ୍କର୍ମ ଘଟଣା, ଜୀତେନ୍ଦ୍ର ସେଠୀଙ୍କ ସମେତ ୩ ଅଟକ, ଯୁବତୀ କହିଲେ, ମୁଁ ହୋଟେଲରେ ଖାଉଥିଲି…
ଭୁବନେଶ୍ୱର : ନିମାପଡ଼ା ଛକରୁ ଆଣି ପୁରୀରେ ଗଣଦୁଷ୍କର୍ମ ଅଭିଯୋଗ ପ୍ରସଙ୍ଗରେ ତ୍ୱରିତ କାର୍ଯ୍ୟାନୁଷ୍ଠାନ ନେଇଛି ପୁରୀ ପୋଲିସ । ଏ ଘଟଣାରେ ଜଣେ ବହିସ୍କୃତ ପୋଲିସ କନେଷ୍ଟବଳଙ୍କ ସହ ୩ ଜଣଙ୍କୁ ଧରିଛି ପୋଲିସ । ସେପଟେ ପୀଡିତା ମୁଁହ ଖୋଲିଛନ୍ତି । କୁମ୍ଭାରପଡ଼ା ଥାନାରେ ସେ ଦେଇଥିବା ଏତଲାରେ ଉଲ୍ଲେଖ କରିଛନ୍ତି ଯେ, ସେ ଭୁବନେଶ୍ୱରରେ ରୁହନ୍ତି । ୩ ଦିନ ତଳେ ସେ କାକଟପୁର ଘରକୁ ଫେରୁଥିଲେ । ନିମାପଡ଼ାରେ ଖାଉଥିବା ବେଳେ ତାଙ୍କର ବସ୍ ମିସ୍ ହୋଇଯାଇଥିଲା ।
https://nandighoshatv.comgang-rape-in-puri-fir-lodged-at-kumbharpada-ps/
ଏହାପରେ ସେ କାକଟପୁର ଯିବାକୁ ନିମାପଡ଼ା ଛକରେ ଅପେକ୍ଷା କରିଥିଲେ । ଏହି ସମୟରେ ୪ ଜଣ ଯୁବକ ତାଙ୍କୁ ଲିଫ୍ଟ ଦେବାକୁ କହିଥିଲେ । ସେ ପ୍ରଥମେ ରାଜି ହୋଇନଥିଲେ । ସେମାନେ ତାଙ୍କୁ ଘରେ ଛାଡ଼ିଦେବାକୁ କହିବା ସବ ବାଧ୍ୟ କରି ଗାଡ଼ିରେ ନେଇଥିଲେ ।
ଏହାପରେ ପୁରୀର ପୋଲିସ୍ ଲାଇନ୍ କ୍ୱାଟରରେ ଦୁଷ୍କର୍ମ କରିଥିବା ସେ ଅଭିଯୋଗ କରିଛନ୍ତି । ୨ ଜଣ ଏଥିରେ ସଂପୃକ୍ତ ଥିବା ପୀଡିତା ଏତଲାରେ ଦର୍ଶାଇଛନ୍ତି । ଜଣେ ବ୍ୟକ୍ତିଙ୍କର ପର୍ସକୁ ରଖିଦେଇଥିଲେ ପୀଡିତା । ବହିସ୍କୃତ ପୋଲିସ କନେଷ୍ଟବଳ ଜିତେନ୍ଦ୍ର ସେଠୀ ବୋଲି ଜଣାପଡ଼ିଛି । ପୁରୀ ଏସପି କହିଛନ୍ତି ଘଟଣାକୁ ଗୁରୁତର ସହ ନିଆଯାଇଛି । ଘଟଣାକୁ ସବୁ ଦିଗରୁ ତଦନ୍ତ କରାଯାଉଛି । ପୋଲିସ ପ୍ରାଥମିକ ଭାବେ ଅଭିଯୁକ୍ତ ଜିତୁ ସେଠୀକୁ ଉଠାଇ ନେଇଥିଲା ପରେ ଆଉ ୩ ଜଣଙ୍କୁ ଧରିଥିଲା ।
ପୀଡିତାଙ୍କର ଡାକ୍ତରୀ ମାଇନା କରାଯାଇଥିବା ଜଣାପଡ଼ିଛି । ଏ ଦିଗରେ ଅଧିକ ତଦନ୍ତ ଜାରି ରଖିଛି ପୁରୀ ପୋଲିସ ।