ଭୁବନେଶ୍ୱର: ଉଚ୍ଚକୋଟିର ହେବ ରାଜ୍ୟ ଏମ୍ସରେ ସ୍ୱାସ୍ଥ୍ୟ ସେବା । ଲୋକାର୍ପଣ ହେବ ୧୦ଟି ମଡ୍ୟୁଲାର ଓଟି । ଏହାସହ ଆଇସିୟୁ କମ୍ପ୍ଳେକ୍ସ, କ୍ୟାଥ ଲ୍ୟାବ୍ ଏବଂ ଫ୍ଲୁରୋସ୍କୋପି ସେବା ମଧ୍ୟ ଲୋକାର୍ପିତ ହେବ । ଏହି ସେବାକୁ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ଡକ୍ଟର ହର୍ଷବର୍ଦ୍ଧନ ଲୋକାର୍ପିତ କରିବେ । ରୋଗୀ ସଂଖ୍ୟା ବୃଦ୍ଧିକୁ ଦୃଷ୍ଟିରେ ରଖି ଏଭଳି ପଦକ୍ଷେପ ଗ୍ରହଣ କରିଛି ଏମ୍ସ । ଏହି ଅବସରରେ ଭୁବନେଶ୍ୱର ଏମ୍ସ ଭିତ୍ତିପ୍ରସ୍ତର ସ୍ଥାପନ କରିଥିବା ଭାରତର ପୂର୍ବତନ ପ୍ରଧାନମନ୍ତ୍ରୀ ବାଜପେୟୀଙ୍କର ଏକ ପ୍ରତିମୂର୍ତ୍ତି ମଧ୍ୟ ଅନାବରଣ କରାଯିବ ।
ବର୍ତ୍ତମାନ ୭୯୭ ଟି ଶଯ୍ୟା ବିଶିଷ୍ଟ ଭୁବନେଶ୍ୱର ଏମ୍ସରେ ୧୫ଟି ଓଟି କାର୍ଯ୍ୟକ୍ଷମ ରହିଛି । ୧୦ଟି ନୂଆ ଖୋଲିଲେ ତାହା ୨୫ରେ ପହଞ୍ଚିବ । ୬୩ଟି ଆଇସିୟୁ ବେଡ ରହିଥିବା ବେଳେ ୨୭ଟି ବେଡରେ ଭେଣ୍ଟିଲେଟର ସେବା ଉପଲବ୍ଧ ଅଛି । ୪୧ଟି ବିଭାଗ ରୋଗୀ ସେବାରେ କାର୍ଯ୍ୟ କରୁଛି । ଏଠାରେ ୧୧ଶହ ଡାକ୍ତରୀ ଛାତ୍ରଛାତ୍ରୀଙ୍କୁ ୧୫୪ଜଣ ଫ୍ୟାକଲଟି ପାଠ ପଢାଉଛନ୍ତି ।
୧୧୭ ଏକର ଜମି ପରିବର୍ତ୍ତେ ୯୧ ଏକର ଜମିରେ ନିଜର ବିଲଡିଂ ନିର୍ମାଣ କରିପାରିଛି ଏମ୍ସ । ଆଗାମୀ ଦିନରେ ଗାମାନାଇଫ୍, ଅର୍ଗାନ ଟ୍ରାନ୍ସପ୍ଲାଣ୍ଟ, ଗ୍ୟାଷ୍ଟ୍ରୋ ସର୍ଜରୀ ସମେତ ସେଣ୍ଟର ଅଫ ଏକ୍ସଲେନ୍ସି ଏବଂ ସୁପର ସ୍ପେଶାଲିଟି ବିଭାଗ ଖୋଲିବାକୁ ଯାଉଥିବା ଏମ୍ସ ନିର୍ଦ୍ଦେଶିକା ସୂଚନା ଦେଇଛନ୍ତି ।
ଦିନକୁ ୪ହଜାର ରୋଗୀ ଆସୁଥିବା ବେଳେ ସେମାନଙ୍କୁ ଉପଯୁକ୍ତ ଚିକତ୍ସା ସେବା ଯୋଗାଇବା ଭୁବନେଶ୍ୱର ଏମ୍ସ ପାଇଁ ଚ୍ୟାଲେଞ୍ଜ ହୋଇଛି ।
