ମହାରାଷ୍ଟ୍ର: ମହାବିକାଶ ଅଘାଡିର ବଡ଼ ନିଷ୍ପତ୍ତି । ୨ ଲକ୍ଷ ଟଙ୍କା ପର୍ଯ୍ୟନ୍ତ କୃଷି ଋଣ ଛାଡ଼ ନେଇ କଲେ ଘୋଷଣା । ବିଧାନସଭାରେ ଘୋଷଣା କଲେ ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେ । ଆସନ୍ତା ମାର୍ଚ୍ଚରୁ କାର୍ଯ୍ୟକାରୀ ହେବ ଯୋଜନା । ହିତାଧିକାରୀଙ୍କ ଖାତାରେ ସିଧାସଳଖ ଜମା ହେବ ଟଙ୍କା ।
ଅପରପକ୍ଷରେ ସମ୍ପୂର୍ଣ୍ଣ କୃଷି ଋଣ ଛାଡ଼ ଦାବିରେ ବିଧାନସଭା ତ୍ୟାଗ କରିଛନ୍ତି ବିରୋଧୀ ।
ଫ୍ରାନ୍ସ : ଡାକ୍ତରଙ୍କ ନାଁରେ ଦୁଷ୍କର୍ମ ଅଭିଯୋଗ । ଜଣେ କି ୨ ଜଣ ନୁହେଁ । ୩୪୯ ଝିଅଙ୍କୁ ଦୁଷ୍କର୍ମ ଓ ଯୌନ ଶୋଷଣ କରିବା ଭଳି ସଙ୍ଗୀନ ଅଭିଯୋଗରେ ତାଙ୍କୁ ଗିରଫ କରାଯାଇଛି । ୬୮ ବର୍ଷୀୟ ଏହି ଡାକ୍ତରଙ୍କ ବିରୋଧରେ ଯାଞ୍ଚ ହେବା ପରେ ଓକିଲ ଏଭଳି ସୂଚନା ଦେଇଛନ୍ତି । ବର୍ତ୍ତମାନ ସଂପୃକ୍ତ ଡାକ୍ତରଙ୍କୁ ଜେଲକୁ ପଠାଇ ଦିଆଯାଇଛି । 
ଶୁକ୍ରବାର ଫ୍ରାନ୍ସର ବ୍ରିଟେନ ସହରର ଓକିଲ ଲରେଲିନ ପିରୋଫିଟ କହିଛନ୍ତି ଯେ, ଡାକ୍ତରଙ୍କ ଏଭଳି ଆଚରଣର ଶିକାର ହୋଇଥିବା ପୀଡ଼ିତାଙ୍କ ସଂଖ୍ୟା ୩୪୯ ହୋଇପାରେ । ନିଜ ୩୦ ବର୍ଷ କାର୍ଯ୍ୟକାଳ ମଧ୍ୟରେ ୬୮ ବର୍ଷୀୟ ଅବସରପ୍ରାପ୍ତ ଡାକ୍ତର ଜୋଏଲ ଲି. ସ୍କୋର୍ନେକ ଏହି ଅପରାଧରେ ସାମିଲ ଥିବା ସ୍ୱୀକାର କରିଛନ୍ତି ।
ସୂଚନା ଅନୁଯାୟୀ, ଜୋଏଲ ଏକ ଡାଏରୀ ରଖିଥିଲେ, ଯେଉଁଥିରେ ସେ ଶିଶୁ ମାନଙ୍କ ପ୍ରତି କରୁଥିବା ଯୌନ ଆକ୍ରମଣ ଗୁଡ଼ିକୁ ନିର୍ଦ୍ଦିଷ୍ଟ ଭାବରେ ଲେଖି ରଖିଥିଲେ । ପୋଲିସର ତନାଘନା ସମୟରେ ଏହି ଡାଏରୀଟିକୁ ଜବତ କରାଯାଇଥିଲା ଯେଉଁଥିରେ ଶିଶୁଙ୍କ ନାଁ ମଧ୍ୟ ଲେଖା ଯାଇଥିଲା । ପରବର୍ତ୍ତୀ ସମୟରେ ସେହି ଶିଶୁ ମାନଙ୍କ ପରିବାର ସହ ସଂପର୍କ କରିବା ପୋଲିସ ପକ୍ଷେ ସହଜ ହୋଇଥିଲା । ଅନ୍ୟପଟେ ଡାକ୍ତରଙ୍କ ଓକିଲ ସେହି ଡାଏରୀଟି ନକଲି ବୋଲି କହି କୋର୍ଟରେ ଜାମିନ୍ ପାଇଁ ଆବେଦନ କରିଛନ୍ତି ।
ଫ୍ରାନ୍ସରେ ଏହି ଘଟଣାକୁ ଶିଶୁଙ୍କ ଉପରେ ହୋଇଥିବା ଯୌନ ହିଂସାର ସବୁଠୁ ବଡ଼ ମାମଲା ବୋଲି ଧରାଯାଉଛି । ତେବେ ୪ ଜଣ ଶିଶୁଙ୍କ ବୟାନ ମୁତାବକ ଡାକ୍ତରଙ୍କ ବିରୋଧରେ ଆସନ୍ତା ବର୍ଷ ମାର୍ଚ୍ଚରେ ଅଦାଲତରେ ବିଚାର ଆରମ୍ଭ ହେବ ।
ଜୋଏଲ ଜଣେ ପେଟ ରୋଗ ସମ୍ବନ୍ଧିତ ସର୍ଜନ । ନିଜ କ୍ୟାରିୟର ମଧ୍ୟରେ ଡାକ୍ତର ଫ୍ରାନ୍ସର ବିଭିନ୍ନ ସ୍ଥାନରେ ଥିବା ଡାକ୍ତରଖାନାରେ କାମ କରିଛନ୍ତି । ଡାକ୍ତରଙ୍କ ବିରୋଧରେ ଜଣେ ୬ ବର୍ଷର ଶିଶୁଙ୍କ ସମେତ ତାଙ୍କର ଜଣେ ସଂପର୍କୀୟଙ୍କ ସହ ଯୌନ ଶୋଷଣ କରିଥିବାର ଅଭିଯୋଗ ରହିଛି । ଯେହେତୁ କିଛି ଘଟଣା ବହୁ ବର୍ଷ ପୁରୁଣା ତେଣୁ ତା ଉପରେ ମୋକଦ୍ଦମା କରିବା ସମ୍ଭବ ନୁହେଁ ବୋଲି ଓକିଲ କହିଛନ୍ତି ।
ହାଇଦ୍ରାବାଦ : ବହୁଚର୍ଚ୍ଚିତ ମହିଳା ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣାରେ ଅଭିଯୁକ୍ତଙ୍କ ଶବକୁ ପୁଣିଥରେ ବ୍ୟବଚ୍ଛେଦ କରିବାକୁ ନିଷ୍ପତ୍ତି ହୋଇଛି । ତେଲେଙ୍ଗାନା ହାଇକୋର୍ଟ ଏ ମାମଲାରେ ଆଜି ଶୁଣାଣି କରି ପୁଣିଥରେ ପୋଷ୍ଟମର୍ଟମ କରିବାକୁ ନିର୍ଦ୍ଦେଶ ଦେଇଛନ୍ତି । କୋର୍ଟଙ୍କ ଏ ନିର୍ଦ୍ଦେଶ ପରେ ଏବେ ଗାନ୍ଧି ହସ୍ପିଟାଲର ଶବ ଗୃହରେ ସଂରକ୍ଷିତ ଥିବା ୪ ଅଭିଯୁକ୍ତଙ୍କ ଶବକୁ ପୁଣିଥରେ ବ୍ୟବଚ୍ଛେଦ କରାଯିବ ।
ସୂଚନା ଯୋଗ୍ୟ ଯେ, ନଭେମ୍ବର ୨୭ ତାରିଖରେ ହାଇଦ୍ରାବାଦରେ ଜଣେ ମହିଳା ପଶୁଡାକ୍ତରଙ୍କୁ ୪ ଜଣ ଅଭିଯୁକ୍ତ ଦୁଷ୍କର୍ମ କରିବା ସହ ଜାଳିଦେଇଥିଲେ । ୨୮ ତାରିଖ ସକାଳେ ଏ ଘଟଣା ସାମ୍ନାକୁ ଆସିବା ସହ ଯୁବତୀଙ୍କ ଅର୍ଦ୍ଧଦଗ୍ଧ ଶରୀର ଉଦ୍ଧାର କରିଥିଲା ପୋଲିସ । ଏହାପରେ ୨ ଦିନ ମଧ୍ୟକେ ସବୁ ଅଭିଯୁକ୍ତଙ୍କୁ ପୋଲିସ ଗିରଫ କରି ହେପାଜତକୁ ନେଇଥିଲା । ଏହି ଘଟଣାର ସତ୍ୟାସତ୍ୟ ପାଇଁ ୬ ଡିସେମ୍ବର ରାତି ୩ଟାରେ ୪ ଅଭିଯୁକ୍ତଙ୍କୁ ସିନ୍ ରିକ୍ରିଏସନ୍ ପାଇଁ ଘଟଣାସ୍ଥଳକୁ ନିଆଯାଇଥିବା ବେଳେ ସେମାନେ ଖସି ଯିବାକୁ ଚେଷ୍ଟା କରୁଥିଲେ । ପୋଲିସ ସହ ସଂଘର୍ଷରେ ସେମାନଙ୍କୁ ଏନକାଉଣ୍ଟର କରିଥିଲା ପୋଲିସ ।
ସେହିଠାରେ ହିଁ ୪ ଅଭିଯୁକ୍ତଙ୍କର ମୃତ୍ୟୁ ହୋଇଥିଲା । ଏହାକୁ ନେଇ ସେତେବେଳେ ସାରା ଦେଶରେ ତର୍କ ବିତର୍କ ସୃଷ୍ଟି ହୋଇଥିଲା । କିଛି ଏହାକୁ ସମର୍ଥନ କରିଥିବା ବେଳେ ଆଉ କିଛି ଗୋଷ୍ଠୀ ପୋଲିସର କାର୍ଯ୍ୟକୁ ନେଇ ପ୍ରଶ୍ନ ଉଠାଇଥିଲେ । ଏହାପରେ ସୁପ୍ରିମକୋର୍ଟରେ ମଧ୍ୟ ମାମଲା ଦାୟର ହୋଇଥିଲା । କୋର୍ଟ ପୂର୍ବତନ ବିଚାରପତିଙ୍କ ଅଧ୍ୟକ୍ଷତାରେ ଏକ ୩ ଜଣିଆ କମିଟି ଗଠନ କରିଥିଲେ । ଏ କମିଟି ୬ ମାସ ମଧ୍ୟରେ ରିପୋର୍ଟ ପ୍ରଦାନ କରିବାକୁ କୁହାଯାଇଛି । ଏବେ ହାଇକୋର୍ଟ ପୁନର୍ବାର ଶବ ବ୍ୟବଚ୍ଛେଦ ପାଇଁ ନିର୍ଦ୍ଦେଶ ଦେଇଛନ୍ତି ।
ନୂଆଦିଲ୍ଲୀ: ପୂର୍ବତନ କ୍ରିକେଟର ତଥା ବିଜେପି ସାଂସଦ ଗୌତମ ଗମ୍ଭୀଙ୍କୁ ହତ୍ୟା ଧମକ । ଏ ନେଇ ଶାହଦରା ଜିଲ୍ଲା ଡିସିପିଙ୍କୁ ଚିଠି ଲେଖି ଜଣାଇଲେ ଗମ୍ଭୀର । ଅଜଣା ଇଣ୍ଟରନ୍ୟାସନାଲ ନମ୍ୱରରୁ କଲ୍ ଆସୁଛି । ଫୋନ୍ରେ ତାଙ୍କୁ ଓ ତାଙ୍କ ପରିବାରର ସମସ୍ତ ସଦସ୍ୟଙ୍କୁ ହତ୍ୟା କରାଯିବ ବୋଲି ଧମକ ଦିଆଯାଉଥିବା କହିଛନ୍ତି ଗମ୍ଭୀର । ଏ ନେଇ ମାମଲା ରୁଜୁ କରିବା ସହ ମୋ ପରିବାରର ସୁରକ୍ଷା ସୁନିଶ୍ଚିତ କରନ୍ତୁ ବୋଲି ଚିଠିରେ ଅନୁରୋଧ କରିଛନ୍ତି ।
ସୂଚନାଯୋଗ୍ୟ ଯେ, ଗତ ୨ ଦିନ ତଳେ ତାଙ୍କୁ ହତ୍ୟା ଧମକ ମିଳିଥିବା ବେଳେ ସେ ଆଜି ଏ ନେଇ ଅଭିଯୋଗ କରିଛନ୍ତି ।
ଯାଜପୁର: ସାରାଦେଶରେ ନାଗରିକତ୍ୱକୁ ନେଇ ବିବାଦ। କେଉଁଠି କାର ଜଳୁଛି ତ କେଉଁଠି ଟେକା ପଥର ମାଡ଼ରେ ଲହୁ ଲୁହାଣ ହେଉଛନ୍ତି ପୋଲିସ। ଚାଲିଛି ଘମାଘୋଟ ଆଉ ଟଣାଓଟରା । ଏଭଳି ପରିସ୍ଥିତିରେ ଜଣେ ବ୍ୟକ୍ତିଙ୍କ ପାଖରେ ରହିଛି ଦୁଇଦୁଇଟି ପରିଚୟ ପତ୍ର । ଆଉ କେବଳ ସେତିକି ନୁହେଁ ଦୁଇଟି ପରିଚୟ ପତ୍ରରେ ନାଁ ଅଲଗା ରହିବା ସହ ଧର୍ମରେ ମଧ୍ୟ ଅଲଗା।
ଯାଜପୁରର ଏହି ବ୍ୟକ୍ତିଙ୍କ ରହିଛି ୨ଟି ପରିଚୟ ପତ୍ର । ଗୋଟିଏ ପରିଚୟ ପତ୍ରରେ ହିନ୍ଦୁ ଓ ଅନ୍ୟଟିରେ ମୁସଲମାନ । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଗୋଟିଏ ଆଧାର ନମ୍ବର ଥାଇ ଦୁଇଟି ଭିନ୍ନ ଭିନ୍ନ ପରିଚୟ ରହିଛି । ଗୋଟିଏରେ ସୋଲେମାନ ଶେଖ ଏବଂ ଅନ୍ୟଟିରେ ବିଟୁ ବିଶ୍ୱାସ ଆଉ ଆଧାର ନମ୍ବର ରହିଛି 897727291967 । କେବଳ ସେତିକି ନୁହେଁ ସୋଲେମାନ ନାଁରେ ଏକ ଭୋଟ ପରିଚୟ ପତ୍ର ମଧ୍ୟ ରହିଛି। ଉକ୍ତ ପରିଚୟ ପତ୍ରରେ ସୋଲେମାନ ପଶ୍ଚିମବଙ୍ଗର ମୁର୍ସିଦାବାଦ ଅଞ୍ଚଳର ବୋଲି ଜଣା ପଡ଼ିଛି । ଅନ୍ୟପଟେ ଆଉ ଏକ ଆଧାର କାର୍ଡ ରେ ଚୋରଦା , ଯାଜପୁର ରୋଡ଼ ଠିକଣା ରହିଛି । ଦୁଇ ଦୁଇଟି ପରିଚୟ ଥିବା ଘଟଣା ସମ୍ପର୍କରେ ବଜରଙ୍ଗ ଦଳ ପକ୍ଷରୁ ଯାଜପୁର ରୋଡ଼ ଥାନାରେ ଲିଖିତ ଅଭିଯୋଗ କରାଯାଇଛି। ସୂଚନା ଅନୁସାରେ ସୋଲେମାନ ଓରଫ ବିଟୁ ଜଣେ ହିନ୍ଦୁ ଝିଅଙ୍କୁ ବିବାହ କରି ଦିର୍ଘଦିନ ହେବ ଏହି ଯାଜପୁର ରୋଡ଼ ଅଞ୍ଚଳରେ ରହି ଆସୁଛି ଏବଂ ପରେ ସେ ବିଟୁ ନାଁରେ ଆଉ ଏକ ପରିଚୟ ଦେଇଥିଲା । ଏଥିସହ ବିଟୁ ବିଶ୍ୱାସ ନାଁରେ ସେ ଏକ ବୋଲେରୋ ଗାଡ଼ି ମଧ୍ୟ କିଣିଛନ୍ତି। ଅଭିଯୋଗ ପାଇବା ପରେ ଛାନଭିନ୍ କରୁଛି ପୋଲିସ ।
ନୂଆଦିଲ୍ଲୀ: ଭାରତୀୟ ସେନାବାହିନୀର ଯବାନମାନଙ୍କ ପାଇଁ ସରକାର ଏକ ନୂଆ ପଦକ୍ଷେପ ନେଇଛନ୍ତି । ପରିବାର, ବନ୍ଧୁ, ପରିଜନ ସମସ୍ତଙ୍କ ଠାରୁ ଅନେକ ଦୂରରେ ରହି ଦେଶରକ୍ଷା କରୁଥିବା ଏହି ଯବାନ ମାନେ ଏବେ VSAT ସାହାଯ୍ୟରେ ଆବଶ୍ୟକ ସ୍ଥଳେ ସମସ୍ତଙ୍କ ସହ ଯୋଗାଯୋଗ କରିପାରିବେ । ୧୪୦୦ ରିମୋଟ୍ ଲୋକେସନ୍ ସ୍ଥାନରେ ବର୍ତ୍ତମାନ ନୂତନ ଟେକନୋଲୋଜି ସାହାଯ୍ୟରେ ଇଣ୍ଟରନେଟ୍ ଓ କଲ୍ ବ୍ୟବସ୍ଥା ଉପଲବ୍ଧ କରାଇବାକୁ ସରକାର ଯୋଜନା କରିଛନ୍ତି । ଏହା ଭାରତୀୟ ସେନାର ଯବାନମାନଙ୍କୁ ନିଜ ପରିବାର ସହ ସମ୍ବନ୍ଧ ରଖିବାରେ ସାହାଯ୍ୟ କରିବ ବୋଲି ଶୁକ୍ରବାର ଭାରତ ସରକାରଙ୍କ ପକ୍ଷରୁ କୁହାଯାଇଛି । ଏହାସହ ଯବାନମାନେ ଦୈନିକ ୧ ଜିବି ଡାଟା ଇଣ୍ଟରନେଟ୍ ବ୍ୟବହାର କରିବାର ବ୍ୟବସ୍ଥା ମଧ୍ୟ କରାଯିବ । ଡିଜିଟାଲ୍ କମ୍ୟୁନିକେସନ୍ କମିଶନ ପକ୍ଷରୁ ସରକାରଙ୍କ ଏହି ପ୍ରସ୍ତାବ ଅନୁସାରେ କାର୍ଯ୍ୟ ଚାଲିଛନ୍ତି । ଏଠାରେ ପ୍ରତି ସେକେଣ୍ଡରେ ୧-୧୦ ମେଗାବାଇଟ୍ ସ୍ପିଡ୍ ଡାଟା ଯୋଗାଇ ଦିଆଯିବ ।
ଦୂର ସଞ୍ଚାର ବିଭାଗ ପକ୍ଷରୁ ଦେଶର ୧୧୨ ଜିଲ୍ଲାରେ ୪୦୯୭ଗାଁରେ ଡିଜିଟାଲ୍ କନେକଟିଭିଟି ପ୍ରଦାନ କରାଯିବ । ଏଥିରେ ଜାମ୍ମୁର ୧୪୪ଗାଁ, ଯେଉଁଠି ଦୂରସଞ୍ଚାରର ବ୍ୟବସ୍ଥା ନଥିଲା ତାହାକୁ ମଧ୍ୟ ସାମିଲ କରାଯାଇଛି । ଦେଶର ୧୧,୮୭୬ ଏମିତି ଗାଁ ଅଛି ଯେଉଁଠି କୌଣସି ଯୋଗାଯୋଗର ବ୍ୟବସ୍ଥା ନାହିଁ ।ସେଠାରେ ମଧ୍ୟ ଏହି ବ୍ୟବସ୍ଥା ଉପଲବ୍ଧ କରାଯିବାର ଯୋଜନା ରହିଛି ।
ଏଠାରେ ଉଲ୍ଲେଖଯୋଗ୍ୟ, ଏହି ଗାଁ ଗୁଡିକମଧ୍ୟରୁ ଏବେଯାଏଁ ୪୦୮୭ଟି ଗାଁରେ ଏହି ବ୍ୟବସ୍ଥା ଆରମ୍ଭ ହୋଇସାରିଲାଣି ।
କଟକ : ଦର୍ଶକଙ୍କ ସହ ବନ୍ଧୁତ୍ୱପୂର୍ଣ୍ଣ ବ୍ୟବହାର ପାଇଁ କମିଶନରେଟ ପୋଲିସର ନିଆରା ପଦକ୍ଷେପ । ରାତି ପାହିଲେ ବାରବାଟୀରେ ହେବ ଇଣ୍ଡିଆ-ୱେଷ୍ଟଇଣ୍ଡିଜ ମଧ୍ୟରେ ଦିନିକିଆ ମ୍ୟଚ । ଏଥିପାଇଁ ସବୁ ପ୍ରସ୍ତୁତି ଏବେ ଶେଷ ପର୍ଯ୍ୟାୟରେ । ସୁରକ୍ଷା ବ୍ୟବସ୍ଥାକୁ ଅଧିକ ଗୁରୁତ୍ୱ ଦିଆଯାଇଥିବା ବେଳେ, ଶୃଙ୍ଖଳିତ ଭାବେ ମ୍ୟାଚ ଆୟୋଜନ ପାଇଁ ପୋଲିସ ପକ୍ଷରୁ ବ୍ୟାପକ ବନ୍ଦୋବସ୍ତ କରାଯାଇଛି ।
ତେବେ ପ୍ରଥମ ଥର ପାଇଁ ଦର୍ଶକଙ୍କ ସହ ବନ୍ଧୁତ୍ୱପୂର୍ଣ ବ୍ୟବହାର ପାଇଁ କମିଶନରେଟ ପୋଲିସ ପକ୍ଷରୁ ଏକ ନିଆରା ପଦକ୍ଷେପ ହାତକୁ ନିଆଯାଇଛି । ମ୍ୟାଚ ସମୟରେ ଦର୍ଶକଙ୍କୁ ସବୁ ପ୍ରକାର ସହଯୋଗ ଯୋଗାଇଦେବା ସହ ଷ୍ଟାଡିୟମରେ ସୁରକ୍ଷା ବ୍ୟବସ୍ଥାର ନଜର ରଖିବ ପାଇଁ କମିଶନରେଟ ପୋଲିସ ଚିରାଚରିତ ମାଟିଆ ପୋଷାକ ବଦଳରେ ବ୍ଲାକ୍ ଟି ସାର୍ଟ ପିନ୍ଧିବାକୁ ନିଷ୍ପତ୍ତି ନେଇଛି । ମ୍ୟାଚ ଦିନ ଦାୟିତ୍ୱରେ ଥିବା ପୋଲିସ ଅଧିକାରୀ କଳା ରଙ୍ଗର ଟି-ସାର୍ଟ ସହ ମାଟିଆ ପ୍ୟାଣ୍ଟ ପିନ୍ଧିବେ । ଏଥିପାଇଁ ଷ୍ଟାଡିୟମ ଭିତରେ ୩୫୦ ଷ୍ଟାଫ୍ ନିୟୋଜିତ ରହିବେ । ଷ୍ଟାଡିୟମ ବାହାରେ କାର୍ଯ୍ୟରତ ପୋଲିସ ଅଧିକାରୀ ନିୟମିତ ପୋଲିସ ୟୁନିଫର୍ମରେ ରହିବେ ବୋଲି ସୂଚନା ମିଳିଛି ।
ପ୍ରତ୍ୟେକ ଷ୍ଟାଣ୍ଡରେ ପୋଲିସ ଏଡ୍-ପୋଷ୍ଟ ରହିଛି । ଏହି ଏଡ୍-ପୋଷ୍ଟ ଗୁଡ଼ିକରେ ନିୟୋଜିତ ଥିବା ପୋଲିସ କର୍ମଚାରୀ ଦର୍ଶକଙ୍କୁ ସମସ୍ତ ପ୍ରକାର ସହଯୋଗ ଯୋଗାଇ ଦେବେ । ବାରବାଟୀ ଷ୍ଟାଡିୟମରେ ଆସନ୍ତାକାଲି ମ୍ୟାଚ୍ ପାଇଁ ପୋଲିସ ଅଧିକାରୀଙ୍କ ଟି-ସାର୍ଟ ଉନ୍ମୋଚିତ ହୋଇଛି । ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ, ଡିସିପି ଆଖିଳେଶ୍ୱର ସିଂହ ପ୍ରମୁଖ ଯୋଗଦେଇ ଏହି କଳା ରଙ୍ଗର ପୋଲିସ ଟି-ସାର୍ଟ ଉନ୍ମୋଚନ କରିଛନ୍ତି ।
ଭୁବନେଶ୍ୱର : ମହାକାଳପଡ଼ାର ଦୁଇ ଭଉଣୀଙ୍କୁ ମିଳିବ ଜାତୀୟ ସାହସିକତା ପୁରସ୍କାର । ଜଗତସିଂହପୁର ଜିଲ୍ଲା କୁଜଙ୍ଗ ବ୍ଲକ ହସିବା ଗାଁର କିଛି ପରିବାର ୨୦୧୯ ଜାନୁଆରୀ-୨ ତାରିଖରେ ହୁକିଟୁଲାରେ ବଣଭୋଜି ସାରି କୂଳକୁ ଫେରୁଥିବା ବେଳେ ସଂଧ୍ୟାରେ ନିପାଣିଆ ଘାଳିଆ ନଦୀରେ ବୁଡ଼ିଯାଇଥିଲା ଡଙ୍ଗା । ଦୁଇ ଭଉଣୀ ଘରେ ବସି ପଢୁଥିବା ସମୟରେ ଶୁଭିଥିଲା ବଞ୍ଚାଅ ବଞ୍ଚାଅର ଶ୍ୱର । ବାହାରକୁ ଆସି ସେମାନେ ଦେଖିଥିଲେ ଯେ, ଡଙ୍ଗା ବୁଡିଯାଇଛି ଏବଂ ଡଙ୍ଗାରେ ଥିବା ଲୋକମାନେ ନଦୀର ପାଣିରେ ବୁଡି ବଞ୍ଚାଇବାକୁ ଚିତ୍କାର କରୁଛନ୍ତି ।
ନଦୀରେ କୁମ୍ଭୀର ଓ ଅନ୍ଧାର ରାତି ସାଙ୍ଗକୁ ପ୍ରବଳ ଶୀତକୁ ଖାତିରି ନକରି ଦୁଇ ଭଉଣୀ ପୂର୍ଣ୍ଣିମା ଓ ସବିତା ମିଶି ୧୨ ଜଣଙ୍କୁ ନଦୀରୁ ଉଦ୍ଧାର କରିଥିଲେ । ନିପାଣିଆ ଡଙ୍ଗା ବୁଡ଼ି ଘଟଣାରେ ସାରା ଓଡିଶାରେ ଚହଳ ସୃଷ୍ଟି କରିଥିଲା । ସେ ସମୟରେ ଦେବଦୁତ ସାଜି ୧୨ଟି ମୁଲ୍ୟବାନ ଜୀବନ ବଞ୍ଚାଇଥିବା ପୂର୍ଣ୍ଣିମା ଓ ସବିତାଙ୍କୁ ମୁଖ୍ୟମନ୍ତ୍ରୀ ଓ ବିଭିନ୍ନ ଅନୁଷ୍ଠାନ ସମ୍ବର୍ଦ୍ଧିତ କରିଥିଲେ । ଏବେ କେନ୍ଦ୍ର ସରକାରଙ୍କ ପକ୍ଷରୁ ଦୁଇ ଭଉଣୀଙ୍କୁ ଜାତୀୟ ସାହାସିକତା ପୁରସ୍କାର ପାଇଁ ମନୋନୀତ କରାଯାଇଛି ।
ଏହି ସୂଚନା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟ୍ୱିଟ୍ କରି ସେମାନଙ୍କୁ ଶୁଭେଚ୍ଛା ଜଣାଇଛନ୍ତି । ଉଲ୍ଲେଖ କରିଛନ୍ତି ଯେ, ଉଚ୍ଚ ଜୁଆର ଏବଂ ବିପଦ ଜନକ କୁମ୍ଭୀରଙ୍କ ମୁଁହରେ ନିଜ ଜୀବନକୁ ବାଜି ଲଗାଇ ୨ ଭଉଣୀ ସାହସର ସହିତ ଅନ୍ୟମାନଙ୍କ ଜୀବନ ବଞ୍ଚାଇଥିଲେ । ସେମାନଙ୍କର କାର୍ଯ୍ୟକୁ ପ୍ରଶଂସା କରିବା ସହ ଏହା ଅନ୍ୟମାନଙ୍କ ପାଇଁ ପ୍ରେରଣା ବୋଲି କହିଛନ୍ତି ମୁଖ୍ୟମନ୍ତ୍ରୀ ।
ଏ ଖବର ପାଇବା ପରେ ମହାକାଳପଡା ବ୍ଲକ ଓ ବତିଘର ପଞ୍ଚାୟତ ସମେତ ପୂର୍ଣ୍ଣିମା, ସବିତା ପଢୁଥିବା ଜ୍ଞାନମୟୀ ଉଚ୍ଚ ବିଦ୍ୟାଳୟ, ବରକୋଳିଖଳାର ସମସ୍ତ ଶିକ୍ଷକ ଶିକ୍ଷୟତ୍ରୀ ବେଶ୍ ଗର୍ବ ଅନୁଭବ କରୁଥିବା କହିଛନ୍ତି ।
ଜୟପୁର: ଏମାନେ ହେଉଛନ୍ତି ଅଲୋଡ଼ା । ସମସ୍ତେ ଥାଇ ବି ଏମାନେ ଆଜି ବେସାହାରା । ଆଉ ସାହାରା କହିଲେ ଅନ୍ୟର ବାରଣ୍ଡା । ଖରା, ବର୍ଷା, ଶୀତ ଏମାନଙ୍କ ପାଇଁ ସବୁ ସମାନ । ଯେଉଁ ମାଆ ଦିନେ ପୁଅକୁ ପଣତରେ ବାନ୍ଧି ରଖୁଥିଲା ଆଉ କ୍ଷଣିକ ପାଇଁ ଆଖିରୁ ଦୂରେଇ ଦେଇନଥିଲା । ସେହି ମାଆକୁ ଆଜି ପୁଅ ଦୂରେଇ ଦେଇଛି । ଯେଉଁ ବାପା, ପୁଅର ହାତ ଧରି ଚାଲିବା ଶିଖାଇଥିଲା । ସେ ପୁଅ ଆଜି ବୁଢା ବାପାକୁ ରାସ୍ତାରେ ଏକା ଛାଡ଼ି ଦେଇଛି । ବୟସର ଅପରାହଣରେ ସାହାରା ଦେବା ବଦଳରେ ଛାଡ଼ି ଚାଲିଯାଇଛି । ବେସାହାରା ହୋଇ ବାର ଦୁଆର ହେଉଛନ୍ତି ବୃଦ୍ଧ, ବୃଦ୍ଧା ।
ଏ ଦୃଶ୍ୟ ଦେଖିବାକୁ ମିଳିଛି କୋରାପୁଟ ଜିଲ୍ଲାର ଜୟପୁରରେ । ବୃଦ୍ଧାବସ୍ଥାରେ ପୁଅ ପର କରଦେବା ପରେ ସାହାରା ନପାଇ ଘୁରି ବୁଲୁଛନ୍ତି । ଶଶିରେଖା ଆଚାରୀ, ବୟସ ପ୍ରାୟ ୭୦ ହେବ । ସ୍ୱାମୀ ଛାଡ଼ି ଆରପାରିକୁ ଚାଲିଗଲା ପରେ ପୁଅ ବୋହୂ ପର କରିଦେଇଛନ୍ତି । ରାସ୍ତାରେ ବୁଲୁଥିବାର ଦେଖି ତାଙ୍କୁ ଜଣେ ଭଦ୍ର ବ୍ୟକ୍ତି ଏକ ବୁଦ୍ଧାଶ୍ରମରେ ନେଇ ଛାଡ଼ିଥିଲେ । ହେଲେ ମାଆ ଆଶ୍ରମରେ ରହିଲେ ପୁଅର କାଳେ ମାନସମ୍ମାନ ନଷ୍ଟ ହେବ ।
ସେଥିପାଇଁ ପୁଅ ବୃଦ୍ଧା ମାଆକୁ ଆଶ୍ରମରୁ ନେଇ ପୁଣି ରାସ୍ତା ଉପରେ ଛାଡ଼ି ଚାଲିଗଲା । ସେପଟେ ମାଆ ଘରକୁ ଯିବାକୁ ଚାହିଁଲେ ମଧ୍ୟ ଯାଇପାରୁନି । କାରଣ ପୁଅର ସାଥ ଦେଇଛି ବୋହୂ ।
ସେହିଭଳି ଆଉଜଣେ ବୃଦ୍ଧ ଦମ୍ପତ୍ତିଙ୍କ ଦୁଃଖ କହିଲେ ନସରେ । କୁଷ୍ଠ ଜାନୀ (୭୫) ଏବଂ ସ୍ୱରୀ ସୁନ୍ଦରୀ ଜାନୀ (୬୫) । ପୁଅ ବିବାହ ପରେ ବୋହୂକୁ ସାଙ୍ଗରେ ନେଇ ୨ ଜଣଙ୍କୁ ଛାଡ଼ି ନବରଙ୍ଗପୁର ଚାଲି ଯାଇଛି । ଘର ଭାଙ୍ଗିଯିବା ପରେ ଆଶ୍ରୟ ନପାଇ ଦମ୍ପତି ଏବେ ଅନ୍ୟ ପିଣ୍ଢାରେ ରାତି କାଟୁଛନ୍ତି ।
